1, 2. (1) ¿Kasa niyaawataka aaʼu wanee wawala? (2) ¿Kasa naaʼinraka mapa chia wawalakai?

WOUTIISASHI Robert jimaʼaleematapa nia. Nnojotpejeʼe kojutuin maʼin nümüin tü anoujaakat. Anuu nünüiki: «Nnojoishi taya aaʼinrüin kasa mojusü, akaisaʼa taʼyataain neʼe nümüin Jeʼwaa süka kiʼrain taya sünain. Müsü ichekai saaʼin tanoula namüin na wawalayuukana, jama toʼunapuʼuin waneepia sünain tü outkajawaakat otta pürekutsootshi aaʼusiliaat taya kojuyatua süpüla juyaka. Nnojoipejeʼe talatüin maʼin taya».

² Niyaawataleʼe aaʼu Robert jamüin maka nia kaʼwayuusereepa nia. Jamüshijaʼa nia, ashaittapuʼushi sümaa nuʼwayuuse sünain nasakiijiraain sünain pütchi suluʼujeejatü tü Wiwüliakat. Shiapuʼusü atüjaka maʼin asouta tü nuʼwayuusekat, eekajasaʼa niakai, nuʼtchejaapuʼu amaalü tü süsakitkalü anain nia otta eʼrüshi japülii. Anuu nünüiki: «Müshi nnojorüleekai aaʼin kasain tatüjaain aaʼu. ‹Choʼujaasü tanouteʼerüin takuwaʼipa süka tayain laülaain saaʼu taʼwayuuse›, maa müshi taya suluʼu taaʼin». Naaʼinrüinjaʼa tia Robert. Ekirajaashii maʼin nia sünain tü Wiwüliakat otta wainma kasa niyaawataka aaʼu, pansaaitpa nümüin tü shiimainkat. Akaʼaya nia, aleewaleeshia nümaa Jeʼwaa.

3. (1) ¿Kasa watüjaka sünainjee tü alatakat nümüin Robert? (2) ¿Kasa wekirajaainjatka anain jooluʼu?

 ³ Wainma kasa eeka süpüla watüjain sünainjee tü alatakat nümüin Robert. Eeshiijaʼa watüjale maʼin sünainjee tü Wiwüliakat, nnojoluin makatüin waya suulia tü outkajawaakat otta waküjawalin pütchi. Nnojoliipejeʼe waya jüüjüüin nümüin chi naaʼinkai Maleiwa sutuma neʼe waaʼinrüin tia. Jee müsia, eeshiijaʼa kakaliainnale waya sünain achajawaa sukuwaʼipa süpüla laülaainjatüin waaʼin sünain anoujaa, shiasaʼa wasakireʼerapa waaʼin sünain tü wakuwaʼipakat, weʼrüin sünain choʼujaayülüin wapüleerua (Filip. 3:16). Sünain ekirajaayakat tüü, wekirajaajeerü anain apünüinsü pütchi: 1) ¿Kasa waaʼinrajatka süpüla watüjaain saaʼu jüüjüüle maʼin waya nümüin chi naaʼinkai Maleiwa? 2) ¿Kasa waaʼinrajatka süpüla icheinjatüin maʼin wanoula? Otta 3) ¿Jameerü wakuwaʼipa jüüjüüle waya nümüin chi naaʼinkai Maleiwa?

4. ¿Jaralii aaʼinrajanaka tü sümakat Éfeso 4:23, 24?

⁴ Süpülapünaa waʼyataain nümüin Jeʼwaa, wainma kasa wanouteʼeraka sünainjee tü wakuwaʼipakat. Ayatapajaʼa wanouteʼerawalüin wakuwaʼipa süchikijee woutiisain waya. Anuu sünüiki tü Wiwüliakat: «Ayataʼaya jiiʼiratüin tü kasa jülüjakat jaaʼin» (Éf. 4:23, 24, TNM). Wanouteʼerawalinjatü tü wakuwaʼipakat waneepia süka waleʼeruʼuin tü kaainjalaakat. Jaʼitakajeʼe neʼe na kakaliainnakana sünain anoujaa, ayatüinjatü naaʼinmajüin nakuwaʼipa nümaa Jeʼwaa (Filip. 3:12, 13).

5. ¿Kasa wasakireʼerüinjatka anain waaʼin süpüla watüjaain saaʼu jamüin maʼin sukuwaʼipa tü wanoulakat?

⁵ Jaʼitainna jimaʼalin jee laülaain waya, choʼujaasü maʼin wasakireʼerüin waaʼin müleka shiimainre ichein tü wanoulakat. Eeshii süpüla wasakireʼerüin waaʼin sünain tüü: «¿Jüüjüüleeshiche taya nümüin chi naaʼinkai Maleiwa? ¿Meematüsüche takuwaʼipa maʼaka saaʼin nukuwaʼipa Kürisüto? ¿Kasa taashajaaka maʼin achiki? ¿Ekirajaashiche taya waneepia sünain tü Wiwüliakat? ¿Anasüche sukuwaʼipa tü taʼanaayakat? ¿Kasa taaʼinraka tachiaanüle? ¿Kasa taaʼinraka suchuntaale taaʼin aaʼinraa wanee kasa mojusü? ¿Laülaasüche taaʼin sünain anoujaa? Sünainpa taya tü outkajawaakat, ¿jaʼyasüche taaʼu jüüjüüin taya nümüin chi naaʼinkai Maleiwa?» (Éf. 4:13). Wasoutapa shiʼipajee pütchikat tüü, watüjaajeerü aaʼu jamüin maʼin sukuwaʼipa tü wanoulakat.

6. ¿Kasa maa choʼujaaka süpüla watüjaain saaʼu jüüjüüle waya nümüin chi naaʼinkai Maleiwa?

⁶ Eesü choʼujaʼawaire nakaaliinjain waya na wawalayuukana süpüla wayaawatüin saaʼu müleka jüüjüüle waya nümüin chi naaʼinkai Maleiwa. Naashin Pablo, chi wayuu aaʼinrakai waneepia tü kasa mojusü suchuntaakat naaʼin, nnojotsü niyaawatüin saaʼu mojuin maʼin tü naaʼinrakat noʼuluʼu Maleiwa. Eekajasaʼa chi jüüjüükai nümüin chi naaʼinkai Maleiwa, wanaawasü naaʼin nümaa Maleiwa otta nütüjaa aaʼu mojushiin nümüin nukuwaʼipa chi aaʼinrakai tü kasa mojusü suchuntaakat naaʼin (1 Cor. 2:14-16, TNM; 3:1-3, TNM). Süka wanaawain tü jülüjakat naaʼin na laülaashiikana sümaa tü jülüjakat naaʼin Kürisüto, eesü nayaawatamaatüle saaʼu eere wanee wawala jülüjakai aaʼin tü kasa mojusü suchuntaakat naaʼin. Sülatüle tia wamüin otta nakaaliinjeere  waya na laülaashiikana, ¿oonoweenache waya sümaa tü namakat wamüin? Woonoole namaa, shia süka jüüjüweein waya nümüin chi naaʼinkai Maleiwa (Ecl. 7:5, 9).

7. ¿Jamüsü watüjaaka saaʼu nnojoluin jüüjüümaatüin neʼe wanee wayuu nümüin chi naaʼinkai Maleiwa sutuma nütüjaain saaʼu tü pütchi suluʼukat tü Wiwüliakat?

⁷ Nnojoliishii waya jüüjüümaatüin neʼe nümüin chi naaʼinkai Maleiwa sutuma watüjaain saaʼu tü pütchi suluʼukat tü Wiwüliakat. Wainma maʼin kasa nütüjaapuʼuka aaʼu Salomón nüchiki Jeʼwaa otta ashajünüsü suluʼu tü Wiwüliakat süpüshi tü nümapuʼukat. Amojujaapejeʼe mapa nukuwaʼipa nümaa Jeʼwaa (1 Rey. 4:29, 30; 11:4-6). Müsüjeseʼe nnojoluin choʼujaain neʼe wamüin watüjaainjatüin saaʼu tü sümakat tü Wiwüliakat, choʼujaasü icheinjatüin wanoula waneepia (Col. 2:6, 7). ¿Kasa waaʼinrajatka süpüla wountuin tia?

8, 9. (1) ¿Kasa waaʼinrajatka süpüla ichein wanoula waneepia? (2) ¿Kasapülajatü wekirajaaka sünain tü Wiwüliakat sümaa wasakireʼerüin waaʼin sünain? (Piirakaa sümüin tü ayaakuaa suluʼukat süpana 22).

⁸ Nüküjain Pablo namüin na anoujashii namaiwajannuukana choʼujaain maʼin nalaüleʼerüinjatüin naaʼin sünain anoujaa (Heb. 6:1-3). Anasü maʼin waaʼinrüle tia nümakat Pablo. Müsüjeseʼe choʼujaain wekirajaain sünain tü karaloʼutakat Wayaawata waneepia waaliin nüpüla Maleiwa. Sükajee tia, wayaawateerü aaʼu tü waaʼinrajatkat süpüla weʼitaain suluʼu wakuwaʼipa tü pütchi sümakat tü Wiwüliakat. Wekirajaaitpale sünain tia karaloʼutakat, anashii wekirajaale sünain waneʼeya eekai sükaaliinjain waya süpüla ichein wanoula waneepia (Col. 1:23). Jee müsia wasakireʼerüinjatü waaʼin sünain tü wekirajaakalü anain otta achuntajana waya kaaliinwaa nümüin Jeʼwaa süpüla weʼitaain suluʼu wakuwaʼipa tü wekirajaakalü anain.

⁹ Ekirajaainjana waya otta wasakireʼerüinjatü waaʼin süpüla keeʼireeinjatüin waaʼin talatüin Jeʼwaa watuma otta woonooin nümaa (Sal. 40:8; 119:97). Wayoutajatü tü eekai nnojoluin laülaain atuma waaʼin sünain anoujaa (Tito 2:11, 12).

10. ¿Kasa naaʼinrajatka na jimaʼaliikana otta na majayünnüükana süpüla katsüinjatüin nanoula?

¹⁰ Jiakana jimaʼaliikana otta majayünnüü, ¿jütüjaa aaʼu tü jiʼyataweekalü anain nümüin Jeʼwaa? Eeshi wanee wawala aʼyataakai suluʼu Weteet, aashajaʼawaika namaa na jimaʼaliikana otta na majayünnüü woutiisainjanakana sünain tü Outkajawaa miyoʼu piantuakat juyawai. Nüsakirawalin naya sünain kasain naʼyataweein anain nümüin Jeʼwaa. Wainma na atüjaakana saaʼu tü keeʼireekat naaʼin. Eeshii na aʼyataweekana waneepia  nümüin Jeʼwaa otta eeshii eekai nakaaliinjeein eere choʼujaain Aküjalii pütchi. Eepejeʼe na tepichi nnojoliikana atüjaain saaʼu jamüinjatüin nanüiki niʼipajee chia wawalakai nüsakirapa naya. ¿Shiache jülüjaka naaʼin nnojoluin choʼujaain neʼitaain napüleerua tü naʼyataweekalü anain nümüin Maleiwa? Jiakana tepichiyüliikana, jüsakireʼera jaaʼin tüü: «¿Oʼunushiche taya sünain tü outkajawaakat jee sünain aküjaa pütchi süka shiain keeʼireein naaʼin tashi otta tei? ¿Taaʼinrataapa shia sutuma aleewain taya nümaa Jeʼwaa?». Choʼujaapejeʼe wamüin wapüshuaʼa weʼitaain wapüleerua tü waʼyataweekalü anain nümüin Jeʼwaa. Katsüinjeerü wanoula sutuma tia (Ecl. 12:1, 13).

11. (1) ¿Kasa waaʼinrajatka süpüla laülaainjatüin waaʼin sünain anoujaa? (2) ¿Jarai anaka süpüla washatüin akuwaʼipaa?

¹¹ Wayaawatapa saaʼu tü wanouteʼerajatkat sünainjee wakuwaʼipa, wanouteʼeramaatüinjatü shia. Choʼujaashaatasü waaʼinrüin tia süpüla taashin waya suulia «tü ouktaakat» (Roma 8:6-8). Nütüja aaʼu Jeʼwaa nnojoluin süpüla lotuin maʼin wakuwaʼipa otta nükaaliinjain waya nükajee chi naaʼinkai. Aʼyataainjanapejeʼe waya süchiirua laülaain waaʼin sünain anoujaa. Eepuʼushi wanee wawala John Barr nünülia, niapuʼushi noʼutku na Laülaashii Jülüjakana Aaʼin na Aküjaliikana Pütchi, aashajaashi nia süchiki Lucas 13:24 (TNM), müshi nia: «Wainma na nnojoliikana anain maʼin anoula süka nnojoluin naʼyataain maʼin süchiirua katsüin nanoula». Washatüinjatü nukuwaʼipa Jacob, eejiraashi nia nümaa wanee aapiee niiʼiyataleepa naʼanasia nümüin (Gén. 32:26-28). Mayaapejeʼe anain naaʼin wane wayuu nikirajaapa sünain tü Wiwüliakat, nnojotsü müin shia maʼaka saaʼin wanee noweela ashajünaka neʼe süpüla anainjatüin  waaʼin motsomüin sutuma. Wekirajaainjatü maʼin anain süpüla wantüin sünain pütchi akaaliinjeenaka waya süpüla laülaainjatüin waaʼin sünain anoujaa.

12, 13. (1) ¿Kasa waaʼinrajatka süpüla weʼitaain suluʼu wakuwaʼipa tü sümakat Roma 15:5? (2) ¿Kasa watüjaka sünainjee nukuwaʼipa Pedro otta sünainjee tü nümakat? (3) ¿Kasa waaʼinrajatka süpüla jüüjüüin maʼin waya nümüin chi naaʼinkai Maleiwa? (Paashajeʼera tü pütchikat «Tü paaʼinrajatkat süpüla laülaain paaʼin sünain anoujaa»).

¹² Wachajaale maʼin sukuwaʼipa süpüla laülaainjatüin waaʼin sünain anoujaa, akaaliinjüneena waya nutuma chi naaʼinkai Maleiwa süpüla weeʼiratüin tü jülüjakat waaʼin. Sutuma tia, washateerü shiʼipaʼaya tü jülüjakat naaʼin Kürisüto (Roma 15:5, TNM). Eere waaʼu chi naaʼinkai Maleiwa, eejiraajeena waya sümaa tü kasa mojusü suchuntaakat waaʼin otta shieerü eeka wanain tü akuwaʼipaa anakat noʼuluʼu Maleiwa (Gal. 5:16, 22, 23). Wayaawatüle saaʼu shiain keeʼireein waaʼin aaʼinraa tü kasa mojusü suchuntaakat waaʼin jee keeʼireere waaʼin kamaʼanaa wainma kasa, ayata wachecherüin waaʼin suulia tia. Ayataʼaya wachuntüin nümüin Jeʼwaa chi naaʼinkai süpüla shiainjatüin jülüjain waaʼin tü kasa anasükat (Luc. 11:13). Soto waaʼin nukuwaʼipa Pedro. Kojuyatua nnojoluin jülüjain naaʼin tü jülüjakat naaʼin Kürisüto (Mat. 16:22, 23; Luc. 22:34, 54-62; Gal. 2:11-14). Eejiraapejeʼe nia sümaa tia otta nükaaliinjain nia Jeʼwaa. Shiasaʼa mapa wanaawasü tü jülüjakat naaʼin sümaa tü jülüjakat naaʼin Kürisüto. Wounteerü tia wayakanaya.

¹³ Sünain wanee karaloʼutaka nüshajaka Pedro mapa, nüküjain tü wakuwaʼipainjatkat, waaʼinrüinjatü tü anasükat waneepia naashin, wachecherüinjatü waaʼin otta alinjatü wayuu wapüla waneepia (paashajeʼera 2 Pedro 1:5-8). Waʼyataale maʼin süchiirua eeinjatüin wanain akuwaʼipaakat tiairua, laülaajeerü waaʼin sünain anoujaa. Anasü wasakireʼerüle waaʼin waneepia sünain tüü: «¿Kasa taaʼinrajatka soʼukai süpüla jüüjüüin maʼin taya nümüin chi naaʼinkai Maleiwa?».

14. ¿Jameerü wakuwaʼipa wanaawale tü jülüjakat waaʼin sümaa tü jülüjakat naaʼin Kürisüto?

¹⁴ Wanaawale tü jülüjakat waaʼin sümaa tü jülüjakat naaʼin Kürisüto, jaʼyeerü tia sünain wakuwaʼipa waʼyataaleruʼu, koleejialuʼu, jaʼyeerü saaʼu wanüiki jee sünain tü kasa waneekakat süpüla waaʼinrüin. Sükajee tia, atüjaaneerü aaʼu washateere nukuwaʼipa Kürisüto. Jüüjüüle waya nümüin chi naaʼinkai Maleiwa, nnojoleerü wooʼulaain sumojujaain wakuwaʼipa nümaa Jeʼwaa. Akaʼaya waya, wayouteerü tü kasa mojusü suchuntaakat waaʼin. Jee müsia süpülapünaa waneeküin wanee kasa waaʼinrajatka, wasakireerü waaʼin sünain tüü: «¿Jarat tü pütchi suluʼujeejatkat tü Wiwüliakat akaaliinjeechika taya sünain aneeka tü taaʼinrajatkat? ¿Kasajeʼe naaʼinraka Jesuu nialejeʼe alatüin amüin tüü? ¿Kaseerü talataka atuma Jeʼwaa?». Wasakireʼerüinjatü waaʼin sünain tia waneepia süpülapünaa waaʼinrüin wanee kasa. Wekirajaa sünain waneirua kasa jee wekirajaa sünain tü pütchi suluʼujeejatkat tü Wiwüliakat akaaliinjeenaka waya süpüla watüjain aneeka tü waaʼinrajatkat.

15, 16. Püküja jamüin anaka maʼin jülüjale paaʼin tü jülüjakat naaʼin Kürisüto: (1) püneeküinjachipa tü puʼwayuuseinjatkat. (2) püneeküinjachipa na paʼaleewainkana.

¹⁵ Püneeküinjachipa tü puʼwayuuseinjatkat. Aküjünüsü tia suluʼu 2 Corinto 6:14, 15 (paashajeʼera). Nüküjain Pablo naatain maʼin tü jülüjakat chi jüüjüükai nümüin chi naaʼinkai Maleiwa nuulia chi aaʼinrakai tü kasa mojusü suchuntaakat naaʼin. ¿Jamüsü süpüla sükaaliinjain pia pütchikat tia püneeküinjachipa tü puʼwayuuseinjatkat?

¹⁶ Püneeküinjachipa na paʼaleewainkana. Aküjünüsü tia suluʼu 1 Corinto 15:33, TNM  (paashajeʼera). Chi eekai jüüjüüin nümüin chi naaʼinkai Maleiwa nnojoishi aʼaleewajaain nümaa chi eekai süpüla mojuin atuma nunoula. Jülüja paaʼin jameerüin pükaaliinjia sutuma tü sümakat 1 Corinto 15:33 püneeküinjachipa wanee kasa sünainpünaaka tü kanüliakat redes sociales jee puunejaanüle sünain ashaitaa suluʼupünaa Internet nutuma wanee wayuu nnojoikai piʼraajüin.

17-19. Jülüjale waaʼin tü jülüjakat naaʼin Kürisüto, (1) ¿kasa wayu nnojoleetka waaʼinrüin? (2) ¿kasa palajaneetka watuma? (3) ¿kaseerü waaʼinraka mojujiraale waya namaa na waneinnua?

¹⁷ Waneirua kasa nnojoleetka laülaain atuma paaʼin sünain anoujaa. Aküjünüsü wanee pütchi jülüjeeka maʼin waaʼin suluʼu Hebreokana 6:1, TNM (paashajeʼera). ¿Kasache wayu tü kasa «nnojotka kasain anain apüla» naashin Pablo? Shia tü nnojotkalü akaaliinjain waya süpüla icheinjatüin tü wanoulakat. Tia nümakat Pablo sükaaliinjeena waya süpüla wasoutuin sümüin pütchikat tüü: «¿Eʼrüshiche taya kasa anasü sutuma taaʼinrüin tüü? ¿Nnojottaapa kasain anain apüla? ¿Anashiche taapaale aʼyatawaakat tüü süpüla takanajüin wainma nneerü? ¿Jamüsü nnojotka anain naʼakale taya na wayuu anouteʼereekana tü kasa mojusü alatakat mmapaʼa?».

¹⁸ Tü piʼyataweekalü anain nümüin Maleiwa. Wanaa sümaa nikirajüin Jesuu wainma wayuu saaʼu wanee namüna, nüküjain tü anakat süpüla waaʼinrüin (Mat. 6:33, TNM). Wanee wayuu eekai jüüjüüin nümüin chi naaʼinkai Maleiwa, shia palajanaka nutuma tü Nuluwataayakat Maleiwa. Tia nümakat Jesuu sükaaliinjeena waya süpüla watüjaain saaʼu müleka anale ekirajawaa suluʼu wanee eʼikülee miyoʼu otta sükaaliinjain waya waneeküinjanapa tü waʼyataainjatkalü anain.

¹⁹ Suulia mojujiraain pia namaa na waneinnua. Tü nümakat Pablo namüin na anoujashii chajanakana Roma, sükaaliinjeena waya mojujiraale waya namaa na waneinnua (Roma 12:18). Sutuma woushikajaain süchiirua nukuwaʼipa Kürisüto, kamaneeshii waya sümüin wayuu süpüshuaʼa. ¿Kasa waaʼinraka müleka mojujiraale waya namaa na waneinnua sünainjee wanee kasa? ¿Achecheraashiiche waya süchiirua tü wamakat? ¿Wachajaataapa sukuwaʼipa süpüla anajiraainjanain waya sümaa wayuu? (Sant. 3:18).

20. ¿Jamüsü keeʼireeka paaʼin jüüjüüinjachin pia nümüin chi naaʼinkai Maleiwa?

²⁰ Sükajee tü jaʼraisü kasa wekirajaaitpakalü anain, wayaawata aaʼu sükaaliinjain waya tü pütchi suluʼujeejatkat tü Wiwüliakat süpüla waneeküin tü waaʼinrajatkat otta jaʼyeerü waaʼu jüüjüüin waya nümüin chi naaʼinkai Maleiwa. Talateerü maʼin waaʼin sükajee waaʼinrüin tia. Naashin Robert, chi wayuu wachuntayüikai anülia suʼttiajee ekirajaayakat tüü, aleewapa maʼin nia nümaa Jeʼwaa, anoutaasü nukuwaʼipa, alitpa maʼin nüpüla nuʼwayuuse otta nüchonnii. Talatüshi maʼin nia sutuma tia naashin. Eʼreenaʼaya waya kasa anasü müleka kachiiruale waaʼin jüüjüüin waya nümüin chi naaʼinkai Maleiwa. Talateena maʼin waya maaʼulu otta kateerü woʼu süpüla kaʼikat süpüshuaʼa mapeena (1 Tim. 6:19, TNM).