1, 2. (1) ¿Jamüsü nanüiki waneinnua wawalayuu süchiki tü jüüjüwaakat nümüin chi naaʼinkai Maleiwa? (2) ¿Kasa wekirajaainjatka anain sünain ekirajaayakat tüü?

ANUU sünüiki wanee wawala kepiaka chaa Canadá: «Sutuma jüüjüüin taya nümüin chi naaʼinkai Maleiwa talatüsü maʼin taya otta eejiraasü taya sümaa tü alatawaikat tamüin». Anuutaa joo nünüiki wanee wawala chejeʼewaika Brasil: «Alatüirü 23 juya süchikijee kasaalüin taya sümaa tü taʼwayuusekat otta talatüshii maʼin waya saaʼu wachajaain sukuwaʼipa süpüla jüüjüüin waya nümüin chi naaʼinkai Maleiwa». Jee müshia wanee wawala chejeʼewai Filipinas, müsü nünüiki: «Anashi taya sutuma jüüjüüin taya nümüin chi naaʼinkai Maleiwa otta aleewashi taya namaa napüshuaʼa na wawalayuukana».

² Wainma kasa anasü weʼrakat saaʼujee jüüjüüin waya nümüin chi naaʼinkai Maleiwa. ¿Kasa waaʼinrajatka süpüla jüüjüüleein waya nümüin chi naaʼinkai Maleiwa? Choʼujaasü wayaawatüin saaʼu palajana jamüin sünüiki tü Wiwüliakat nüchiki chi wayuu jüüjüükai nümüin chi naaʼinkai Maleiwa. Sünain ekirajaayakat tüü, wekirajaajeerü  anain apünüinsü pütchi: 1) ¿Jarat tü nukuwaʼipakat wanee wayuu eekai jüüjüüin nümüin chi naaʼinkai Maleiwa? 2) ¿Jaralii na anakana süpüla washatüin akuwaʼipa süpüla jüüjüüleein waya nümüin chi naaʼinkai Maleiwa? Otta 3) ¿Jamüshii jüüjüüjeenaka waya nümüin chi naaʼinkai Maleiwa jülüjale waaʼin tü jülüjakat naaʼin Kürisüto?

3. Saashin tü Wiwüliakat, ¿jamüsü naataka nukuwaʼipa chi wayuu aaʼinrakai tü kasa mojusü suchuntaakat naaʼin nuulia chi jüüjüükai nümüin chi naaʼinkai Maleiwa?

³ Sutuma tü nümakat Pablo, wayaawata aaʼu tü nukuwaʼipakat wanee wayuu eekai jüüjüüin nümüin chi naaʼinkai Maleiwa otta chi eekai naaʼinrüin tü kasa mojusü suchuntaakat naaʼin (paashajeʼera 1 Corinto 2:14-16, TNM). Chi wayuu aaʼinrakai tü kasa mojusü suchuntaakat naaʼin, nnojotsü kasajatüin nümüin tü kasa nünainpünaakat chi naaʼinkai Maleiwa, nnojotsü kasain anain apüla tia naashin jee nnojotsü niyaawatüin saaʼu tia kasakalüirua. Aluʼujasaʼa chi wayuu jüüjüükai nümüin chi naaʼinkai Maleiwa, nikirajaa anainrü süpüshuaʼa tia otta jülüjasü naaʼin tü jülüjakat naaʼin Kürisüto. Naashin Pablo, jüüjüüinjana waya nümüin chi naaʼinkai Maleiwa. ¿Kasa maa naataka anainjee chi wayuu aaʼinrakai tü kasa mojusü suchuntaakat naaʼin nuulia chi jüüjüükai nümüin chi naaʼinkai Maleiwa?

4, 5. ¿Jarat tü nukuwaʼipakat chi wayuu aaʼinrakai tü kasa mojusü suchuntaakat naaʼin?

⁴ ¿Kasa jülüjaka naaʼin chi wayuu aaʼinrakai tü kasa mojusü suchuntaakat naaʼin? Chi wayuu makai akuwaʼipa, shia jülüjaka naaʼin nukuwaʼipa neʼe nümüiwaʼa otta oʼunushi süchiirua nakuwaʼipa na manoujainsaliikana. Naashin Pablo, tia akuwaʼipaakat shia nakuwaʼipa na oonookana nümaa chi Yolujaakai (Éf. 2:2). Oʼunushiijeseʼe na wayuukana süchiirua tü namakat na waneinnua otta nashatüin nakuwaʼipa. Müsüjeseʼe shiain naaʼinrüin tü anakat saaʼin namüin otta nnojotsü naaʼinrüin tü nümakat Jeʼwaa. Chi wayuu aaʼinrakai tü kasa mojusü suchuntaakat naaʼin, shia jülüjaka naaʼin kapülainjachin nia sümüin wayuu, washirüinjachin nia otta atkaashi neʼe süpüla saapünüinjatüin nümüin wanee kasa nümüinjatka naashin.

⁵ Saashin tü Wiwüliakat, chi wayuu aaʼinrakai tü kasa mojusü suchuntaakat naaʼin, shia naaʼinraka neʼe tü mojusükat (Gal. 5:19-21). Suluʼu tü palajatkat karaloʼuta nuluwataaka Pablo namüin na anoujashii chejeʼewaliikana Corinto, nüküjain waneirua kasa naaʼinraka na jülüjakana aaʼin tü kasa mojusü suchuntaakat naaʼin. Naashin niakai, keejiasü namüin naya wayuukana ekerotoo sünain sütkaalaa wayuu, keejiasü namüin atkeʼeraa wayuu, eʼrütsü wayumüin wayuu natuma, neenakirawalin wayuu laülaapialuʼu süpüla nümaünajüin namüin, mojutsalii namüin na wayuu laülaakana naaʼu otta shia jülüjaka naaʼin ekaa jee asaa. Akaʼaya naya, nnojotsü nachecherüin naaʼin suulia aaʼinraa kasa mojusü (Prov. 7:21, 22). Naashin Judas, nnojoishi «eein chi Naaʼinkai Maleiwa suluʼu naaʼin» naya wayuukana (Jud. 18, 19).

6. ¿Jarat tü nukuwaʼipakat chi wayuu jüüjüükai nümüin chi naaʼinkai Maleiwa?

⁶ Naatajatshaana maʼin nukuwaʼipa chi wayuu jüüjüükai nümüin chi naaʼinkai Maleiwa, süka jamüin, jülüjain naaʼin nukuwaʼipa nümaa Maleiwa otta nüchajaain sukuwaʼipa süpüla nüshatüin nukuwaʼipa Maleiwa (Éf. 5:1). Shieesü jülüjaka naaʼin tü jülüjakat naaʼin Maleiwa süchiki wanee kasa. Kojutusü maʼin nümüin tü nümakat Jeʼwaa otta aleewashi maʼin nia nümaa (Sal. 119:33; 143:10). Nnojotsü naaʼinrüin tü kasa mojusü suchuntaakat naaʼin shia nüchajaaka maʼin sukuwaʼipa süpüla eeinjatüin nünain tü akuwaʼipaa eeka nutuma chi naaʼinkai Maleiwa (Gal. 5:22, 23). Anuu wanee sukuwaʼipa süpüla wayaawatüin saaʼu nukuwaʼipa wanee wayuu jüüjüükai  nümüin chi naaʼinkai Maleiwa: wanee wayuu eekai jülüjain naaʼin waneepia tü sünainpünaakat muusika, «kamalainsü nümüin tü muusikakat» münüshi. Akaataajaʼa neʼe chi wayuu kojutukai amüin tü kasa eekai nümaʼanajeejatüin Maleiwa, «wayuu kanoulashi chira» münüshi.

7. ¿Jamüsü sünüiki tü Wiwüliakat nüchiki chi wayuu jüüjüükai nümüin chi naaʼinkai Maleiwa?

⁷ Naashin Jesuu, talatüshi maʼin wanee wayuu eekai jüüjüüin nümüin chi naaʼinkai Maleiwa. Müshi nia: «Anataʼaleeshiijaʼa maʼi jia eʼrakana sünain cheʼojaain chi Maleiwakai jümüin, süka jikeroteenain chamüin eere nuluwataain» (Mat. 5:3). Jee müsia suluʼu Roma 8:6 süküjain jamüin anaʼleeka jüüjüwaa nümüin chi naaʼinkai Maleiwa, müsü mayaa: «Masütaajule wane wayuu sünain jülüjüin naaʼin tü nüchekakat chi Naaʼinkai Maleiwa, aapüneerü wane anaa nümüin nütüma Maleiwa saaʼu taashiichipain nia suulia tü ouktaakat. Akaajasa chi eekai masütaajuin sünain jülüjüin naaʼin kaainjalaa, oukteechi nia saaliijee tia». Jüüjüüle waya nümüin chi naaʼinkai Maleiwa, anajiraajeena waya nümaa Maleiwa, aneerü waaʼin otta kateerü woʼu waneepia mapeena.

8. ¿Jamüsü wachajaainjatka maʼin sukuwaʼipa süpüla jüüjüüin waya waneepia nümüin chi naaʼinkai Maleiwa?

⁸ Sutuma saʼakain waya wayuu mojutkana amüin tü nümakat Maleiwa, eesü süpüla sumojujaain wanoula, müsüjeseʼe wachajaainjatüin maʼin sukuwaʼipa süpüla nnojoluinjatüin sumojujaain tü jülüjakat waaʼin. Müleka wooʼulaale suulia jülüjain waaʼin tü jülüjakat naaʼin Jeʼwaa, shieerü antajaaka wekiiruʼumüin tü kasa mojusü suchuntaakat waaʼin otta shieerü waaʼinraka tia. ¿Kasa waaʼinrajatka süpüla nnojoluin sülatüin tia wamüin? ¿Kasa waaʼinrajatka süpüla kooʼomüin tü wanoulakat?

9. (1) ¿Kasa waaʼinrajatka süpüla jüüjüüleein waya nümüin chi naaʼinkai Maleiwa? (2) ¿Jaralii wekirajaainjanaka achiki?

⁹ Choʼujaasü nümüin wanee jintüi nüshatüin tü kasa anasü naaʼinrakat chi nüshikai jee  tü niikat, akaataajaʼa neʼe wayakana, choʼujaasü washatüin nakuwaʼipa na aleewakana maʼin nümaa Jeʼwaa. Waaʼinrüle tia, jüüjüüjeena waya nümüin chi naaʼinkai Maleiwa. Jee sükajee nakuwaʼipa na aaʼinrakana tü kasa mojusü suchuntaakat naaʼin, wayaawata aaʼu tü nnojotkat süpüla waaʼinrüin (1 Cor. 3: 1-4). Aashajaasü tü Wiwüliakat nachiki na anakana süpüla washatüin akuwaʼipa jee na nnojoliikana anain süpüla washatüin akuwaʼipa. Wekirajaa palajana nachiki waneinnua wayuu anakana süpüla washatüin akuwaʼipa: Jacob, María otta Jesuu.

10. ¿Kasa naaʼinraka Jacob sutuma jüüjüüin nia nümüin chi naaʼinkai Maleiwa?

¹⁰ Wainma kasa alataka nümüin Jacob maʼaka sülatüin wamüin maaʼulu. Jamüshijaʼa nia, oʼutunajachiaa aaʼin nutuma Esaú, chi nuwalakai. Jee müshia nia, emeejüneeshi nutuma chi nüshimiakai. Niʼitaapejeʼe naaʼin Jacob sünain nikeraajeerüin Jeʼwaa tü pütchi nüpansaajakat nümüin Abraham. Nütüjaa aaʼu shikeraajeerüin tia pütchikat sükajee nüpüshi, müshiijeseʼe naaʼinmajüin maʼin naya (Gén. 28:10-15). Jaʼyasü saaʼu nukuwaʼipa otta nünüikipala Jacob sünain kojutuin maʼin nümüin tü nümakat Jeʼwaa otta tü keeʼireekat naaʼin. Jamüshijaʼa soʼu nushutuinjachiaain Esaú naaʼu, achuntushi nia kaaliinwaa nümüin Jeʼwaa. Müshi nia nümüin: «Soto paaʼin tü pümakat tamüin sünain maa: ‹Pansaatüjülia tanüiki pümüin süpüla aneerüin pukuaippa je süpüla watteerüin saalii puuʼuliwoʼu tatüma. Iseerü achikii ayaawajünaa, süka wainmeerüin maʼi shia maa aka tü jasai sotpünaakat palaa›» (Gén. 32:6-12). Sükajee tü nukuwaʼipakat Jacob jee tü naaʼinrakat, wayaawata aaʼu sünain niʼitaain maʼin naaʼin sünain tü nikeraajeerüin Jeʼwaa tü nümakat.

11. ¿Jamüsü watüjaaka saaʼu jüüjüüin María nümüin chi naaʼinkai Maleiwa?

¹¹ Wekirajaa jooluʼu süchiki María. Nüneeküin shia Maleiwa süpüla niinjatüin chi Nüchonkai süka jüüjüüin shia nümüin chi naaʼinkai Maleiwa. Watüjaa aaʼu tia sutuma tü sümakat nümüin Jeʼwaa soʼu suwaraijaain naaʼu Zacarías otta Elisabet (paashajeʼera Lucas  1:46-55). Jaʼyasü saaʼu María kojutuin maʼin sümüin tü Nünüikikat Maleiwa otta sütüjain maʼin süpüleerua (Gén. 30:13; 1 Sam. 2:1-10; Mal. 3:12). Jee müsia kasaatpa shia nümaa José, nnojotsü shia nünainpünaain «waneʼereʼeya jemeyutpa shia nümaa chi süchonkai». Kojutuleesia nümüin José sümaa María tü keeʼireekat naaʼin Jeʼwaa suulialeʼeya tü keeʼireekat naaʼin nayakana (Mat. 1:25). Jülüjashaanasü saaʼin María waneepia süpüshuaʼa tü nümakat jee tü naaʼinrakat Jesuu shiʼipaʼaya najaʼpülaain (Luc. 2:51). Keeʼireeshaatasü saaʼin María shikeraajüin tü nümakat Maleiwa nüchiki chi Mesíaskai. ¿Kasaka waaʼinrüinjatüin süpüla washatüin sukuwaʼipa María otta shiain palajanain watuma tü keeʼireekat naaʼin Maleiwa?

12. (1) ¿Kasa wanaawaka anain Jesuu nümaa Jeʼwaa? (2) ¿Kasa waainjainjatka süpüla washatüin nukuwaʼipa Jesuu? (Piirakaa sümüin tü ayaakuaa suluʼukat süpana 16).

¹² Wekirajaa nüchiki Jesuu. Nnojoishi eeichin wanee wayuu eekai jüüjüüin maʼin nümüin chi naaʼinkai Maleiwa maʼaka naaʼin Jesuu. Suʼunnaa yaajachin nia yaa mmapaʼa, niiʼiyatüin sünain nüshateein maʼin nukuwaʼipa chi Nüshikai. Wanaawasü tü jülüjakat naaʼin sümaa tü jülüjakat naaʼin Jeʼwaa, tü nukuwaʼipakat sümüin wayuu jee tü naaʼinrakat. Naaʼinrüin waneepia tü keeʼireekat naaʼin Jeʼwaa otta kojutusü nümüin tü nümakat (Juan 8:29; 14:9; 15:10). Watüjaa aaʼu wanaawain nukuwaʼipa Jesuu nümaa Jeʼwaa. Jamüsüjaʼa tü nümakat Isaías sünain sümülialaain naaʼin Jeʼwaa naaliin na müliakana wanaawasü sümaa tü nümakat Marcos nüchiki Jesuu (paashajeʼera Isaías 63:9; Marcos 6:34, TNM). ¿Amülialaasüche waaʼin naalin na müliakana maʼaka naaʼinrüin shia Jesuu? ¿Shiache palajanaka watuma tü aküjaakat pütchi otta ekirajaa wayuu sünain tü pütchi anasükat? (Luc. 4:43). Na wayuu jüüjüükana nümüin chi naaʼinkai Maleiwa, namüliajüin na müliakana otta nachajaain sukuwaʼipa süpüla nakaaliinjain na waneinnua.

13, 14. (1) ¿Kasa naainjaka na wawalayuu jüüjüükana nümüin chi naaʼinkai Maleiwa maʼaka naaʼin Kürisüto? (2) Püküja süchiki tü alatakat sümüin wane wawala.

¹³ Wainma wawalayuu maaʼulu achajaakana sukuwaʼipa süpüla nashatüin nukuwaʼipa Kürisüto. Müshiijeseʼe tütüin naya sünain aküjaa pütchi, kamaneeshii naya otta amüliajülii naya wayuu. Mayaapejeʼe nnojoluin lotuin maʼin nakuwaʼipa naya wawalayuukana, nachajaain maʼin sukuwaʼipa süpüla eeinjatüin nanain tü akuwaʼipaa anakat noʼuluʼu Jeʼwaa. Anuu tü alatakat sümüin Rachel, wanee wawala kepiaka chaa Brasil. Müsü shia: «Kamalainpuʼusü tamüin aʼyalajaa tü kuluulu jeketüwaikalü ojuʼitüin. Nnojotpejeʼe anain maʼin tasheʼinpala. Shiasaʼa tekirajaapa sünain tü shiimainkat, tachajaain maʼin sukuwaʼipa süpüla jaʼyainjatüin taaʼu wayuuin kanoulasü taya. Kapüleesü tamüin eeʼirataa tü tasheʼinpalakat. Talatapajaʼa maʼin taya sutuma taaʼinrüin tia otta tatüjaa aaʼu tü takuwaʼipainjatkat».

¹⁴ Naata tü alatakat sümüin Reylene wanee wawala kepiaka chaa Filipinas. Shia saaʼinmaaka maʼin tia wawalakat shikirajaain suluʼu wanee eʼikülee miyoʼu otta süchajaain wane aʼyatawaa eere wainmain nneerü sükanajüin. Kojutuleesia maʼin tia sümüin Reylene suulia tü sukuwaʼipakat nümaa Jeʼwaa. Anuu tü sümakat: «Tayaawata aaʼu mapa choʼujaain maʼin tamüin wanee kasa eekai kojutuin maʼin suulia tü taʼyataainkat. Müsüjeseʼe shiain palajanain tatuma süchikuaʼa tü taʼyataainkat nümüin Jeʼwaa». Sütüjaaitpa aaʼu Reylene shiimain tü nümakat Jeʼwaa suluʼu Mateo 6:33, 34, (TNM). Müsü Reylene: «¡Tatüjaa aaʼu shiimain naaʼinmajeerüin taya Jeʼwaa!». Eeshiijaʼa weʼraajüle wawalayuu eekai nanoutuinnain nakuwaʼipa süpüla palajanain natuma tü naʼyataainkat nümüin Jeʼwaa. Sutuma weʼrüin nashatüin nukuwaʼipa Kürisüto, suchuntüin waaʼin müin wakuwaʼipa mayaa (1 Cor. 11:1; 2 Tes. 3:7).

15, 16. (1) ¿Kasa waainjainjatka süpüla washatüin nukuwaʼipa Kürisüto? (2) ¿Kasa waaʼinrajatka süpüla watüjaain saaʼu tü jülüjakat naaʼin Kürisüto?

¹⁵ ¿Kasa waainjainjatka süpüla washatüin nukuwaʼipa Kürisüto? Saashin 1 Corinto 2:16 (TNM), «jülüjainjatü waaʼin tü jülüjakat naaʼin Kürisüto». Jee müsia suluʼu Roma 15:5 (TNM), aküjünüsü jülüjainjatüin waaʼin «tü akuwaʼipaa jülüjakat naaʼin Kürisüto». Süpüla müinjatüin wakuwaʼipa maʼaka naaʼin Jesuu, watüjainjatü aaʼu tü jülüjakat naaʼin jee tü naaʼinrapuʼukat. Shiapuʼusü kojutuka maʼin nümüin Jesuu tü nukuwaʼipakat nümaa Jeʼwaa. Arütkaajeena maʼin waya nünainmüin Jeʼwaa müle wakuwaʼipa maʼaka naaʼin Jesuu. Müsüjeseʼe choʼujaain maʼin jülüjainjatüin waaʼin tü jülüjakat naaʼin Kürisüto.

¹⁶ ¿Jamüinjatü sukuwaʼipa watuma süpüla wountuin waaʼinrüin tia? Na nikirajüinkana Jesuu neʼrüin nia sünain aainjaa kasa pülasü, sünain ekirajaa wayuu, neʼrüin tü nukuwaʼipakat sümüin wayuu süpüshuaʼa otta neʼrüin noonooin sümaa nünüiki Jeʼwaa. «Weʼrajüin sükua süpüshuaʼaleʼeya tü naaʼinrakat», müshii naya (Aluw. 10:39). Maaʼulu yaa, nnojoishi süpüla weʼrüin Jesuu. Eepejeʼe süpüla weʼraajüin nukuwaʼipa otta tü jülüjakat naaʼin Jesuu sükajee tü karaloʼutakat Mateo, Marcos, Lucas otta Juan. Müsüjeseʼe waashajeʼerüinjatüin shia sümaa wasakireʼerüin waaʼin sünain tü waashajeʼerakat suluʼujee. Waaʼinrüle tia, oushikajaajeena waya süchiirua nukuwaʼipa Jesuu (1 Ped. 2:21; 4:1).

17. ¿Jamüsü anaka jülüjale waaʼin tü jülüjakat naaʼin Kürisüto?

¹⁷ ¿Jamüsü anaka jülüjale waaʼin tü jülüjakat naaʼin Kürisüto? Anuu wanee shiyaawase: katsüinsü waaʼin anale tü weküinkat. Akaʼaya neʼe jülüjale waaʼin waneepia tü jülüjakat naaʼin Kürisüto, katsüinjeerü tü wanoulakat. Jee müsia atüjeena waya ashataa nukuwaʼipa waaʼinrüinjanapa kasa süpüshuaʼa. Kekiijeena maʼin waya süpüla aaʼinraa tü anakat noʼuluʼu Jeʼwaa otta nnojoleerü waaʼinrüin wanee kasa mojeetka atuma waaʼin mapa. Müsüjeseʼe anain maʼin woonoole sümaa pütchikat tüü: «Shia anaka aluʼu müleka jüshatüle nukuaippa chi Senyotkai Jesucristo» (Roma 13:14).

18. ¿Kasa pütüjaaitpaka aaʼu nüchiki chi wayuu jüüjüükai nümüin chi naaʼinkai Maleiwa?

¹⁸ Sükajee tü wekirajaaitpakalü anain suluʼu ekirajaayakat tüü, wayaawata aaʼu jamüin nukuwaʼipa chi wayuu jüüjüükai nümüin chi naaʼinkai Maleiwa otta jamüin anaka washatüle nukuwaʼipa. Jee watüjaaitpa aaʼu aleeweenain maʼin waya nümaa Jeʼwaa jülüjale waaʼin tü jülüjakat naaʼin Kürisüto. Eeyütpejeʼe waneirua kasa choʼujaaka süpüla wekirajaain anain süchiki tia. ¿Kasa waaʼinrajatka süpüla watüjaain saaʼu ichere maʼin wanoula? ¿Kasa waaʼinrajatka süpüla icheinjatüin wanoula? ¿Jameerü wakuwaʼipa jüüjüüle waya nümüin chi naaʼinkai Maleiwa? Wekirajaajeerü anain tia sünain tü wane ekirajaayakat.