Amülialaainjatü waaʼin saalin wayuu süpüshuaʼa
WANAA sümaa niʼiküin Jesuu na nikirajüinkana süpüla naküjain tü pütchi anasükat, nütüjaatüjülia aaʼu nnojoleerüin kamalain sümüin wayuu süpüshuaʼa aapajaa tia pütchikat (Luc. 10:3, 5, 6). Maaʼulu yaa, wojuʼitapa sünain aküjaa pütchi, eeshii wantiraale sümaa wayuu eekai nnojoluin saapajeein wanüiki, eesü eeka jashichin wamüin otta nasheʼeteein waya. Wantiraale sümaa wayuu eekai müin mayaa, eesü kapüleere wamüin amülialawaa saalin otta aküjaa pütchi sümüin.
Chi wayuu amülialaakai naalin na waneinnua, jülüjasü naaʼin tü choʼujaakat namüin jee tü alatakat namüin, shiasaʼa sutuma naaʼinrüin tia, mojusü naaʼin naaliijee na waneinnua otta nükaaliinjeein naya. Mamülialaainre waaʼin saalin wayuu, nnojoleerü waaʼin sünain aküjaa pütchi otta nnojoleerü wakaaliinjain wayuu. Aluʼujasaʼa sümülialaale waaʼin saalin wayuu, keeʼireejeerü waaʼin aküjaa pütchi sümüin. Tia müsü aka saaʼin ojoʼttawaa sukua siki süpüla ayatüin chuwatüin shia (1 Tes. 5:19, TNM).
¿Kasaka waaʼinrüinjatüin süpüla watüjain amülialawaa aaʼin saalin wayuu jaʼitairü kapüleein shia wamüin? Wekirajaa sünain nukuwaʼipa Jeʼwaa, Jesuu otta chi aluwataaushikai Pablo.
WAMÜLIALAA AAʼIN SAALIN WAYUU MAʼAKA NAAʼINRÜIN SHIA JEʼWAA
Kakaliairü maʼin aküjünüin alawaa nüchiki Jeʼwaa. Ayatapejeʼe nia «kamaneein sümüin wayuu eekai kaainjalain, eekai nnojolüin saapüin analuʼut nümüin» (Luc. 6:35). Nnojoishi nia jashichijaain namüin «süka keeʼireein maʼi naaʼin suʼtteʼennüinjatüin wayuu süpüshua» (1 Tim. 2:3, 4). Mayaapejeʼe niyoutashaatain maʼin Jeʼwaa tü mojulawaakat, kojutusü wayuu nümüin otta nnojotsü nücheküin süpüleerua eeinjatüin wayuu eekai outuin (2 Ped. 3:9).
Nütüjaa aaʼu Jeʼwaa nunoujirüin Satanaa tü wayuukalüirua sünain alawaa (2 Cor. 4:3, 4). Watta naalii na nunoujirakana sünain alawaa nüchiki Jeʼwaa tepichijaiwaʼaya naya. Müsüjeseʼe kapüleein namüin nanoujain sünain tü shiimainkat. Keeʼireepejeʼe naaʼin Jeʼwaa nükaaliinjain naya. ¿Jamüsü watüjaaka saaʼu tia?
Jülüjataa waaʼin nakuwaʼipa na wayuu chajanakana Nínive. Mayaapejeʼe mojulaain maʼin naya, müshi Jeʼwaa nümüin Jonás: «Amülialaasü taaʼin saalii Nínive tü pueulo miyoʼusükat, eere sülatüin suulia siento weinte miit wayuu kepiaka suluʼu, nnojotka atüjaain saaʼu kasain naatain atuma tü najapü nekiakat suulia tü nepeʼekat» (Jon. 4:11). Nütüjaa aaʼu Jeʼwaa nnojoluin nayaawatüin saaʼu na niniviitakana tü shiimainkat nüchiki, müshijeseʼe nuluwataain Jonás süpüla naapirüin naya süchiki tü naaʼinrajatkat naka.
Kojutusü wamüin wayuu maʼaka kojutuin shia nümüin Jeʼwaa. Washateerü nukuwaʼipa Jeʼwaa wekirajüle wayuu nüchiki jaʼitairü müin nnojotkai naapaajeerüin sümaa tü shiimainkat.
WAMÜLIALAA AAʼIN SAALIN WAYUU MAʼAKA NAAʼINRÜIN SHIA JESUU
Nüshatüin Jesuu nukuwaʼipa Jeʼwaa, amülialaasü naaʼin saalin wayuu «süka müliain saaʼin atümaa otta walakatüin shia maa aka saaʼin anneerü eekai marüleejuuin» (Mat. 9:36). Nütüjaa aaʼu Jesuu müliain tia wayuukalüirua natuma na sacerdootekana, na fariseokana jee na karaloʼutamaajanakana otta ekirajünüshii naya sünain alawaa natuma. Nikirajüin Jesuu naya wayuukana sünain wainma kasa mayaapejeʼe nütüjaain saaʼu eejeenain na nnojoliikana oushikajaain süchiirua nukuwaʼipa (Mar. 4:1-9).
Nnojo waawalaain suulia aküjaa pütchi sutuma niyoutuin shia wanee wayuu soʼu tü palajatkat wakua
Aʼwanajaʼawaisü nakuwaʼipa na wayuukana otta eeshii naapajeenale tü pütchikat
Nayoutule na wayuukana tü pütchi waküjakat namüin, wayaawatüinjatü aaʼu jamüin makaʼa nayoutuin shia. Eesüjaʼa nayoutule tü Wiwüliakat jee tü anoujaakat sutuma neʼrüin naainjain kasa mojusü na anoujakana nünain Jesuu naashin. Eeshii eekai nnojoliin naapajeein tü wanüikikat sutuma süküjünüin namüin alawaa wachiki. Eetaashii na nnojoliikana aapajüin wanüiki suulia nemeeʼerainpalain naya na napüshikana otta na kepiakana naʼütpünaa.
Eeshii wayuu eekai nnojoliin naapajeein wanüiki sutuma sülatüirüin kasa mojusü namüin. Anuu sünüiki wanee wawala misioneera, Kim sünülia: «Eeshii waneinnua wayuu waküjawaikana amüin pütchi, eʼrakana müliaa otta nnojoliikana kasain namaʼanain sutuma eejatüin wanee kasachiki chaa noumainpaʼa. Nnojoishii naya kaʼatapalain kasa anasü. Yüülasü naaʼin otta nnojotsü jaralüin nanoujain anüiki. Eeshii eekai nnojoliin nooʼulaweein waküjain pütchi chayaa. Jamüsüjaʼa soʼu wanee kaʼi taküjaka oʼu pütchi, süsalasü taya sutuma wayuu».
¿Kasaka saaʼinrüin Kim süpüla ayatüin sümülialaain aaʼin saalin wayuu mayaapejeʼe müliain shia atumawaa? Anuu sünüiki: «Saainjale wayuu kasa mojusü tamüin, sotowaisü taaʼin tü sümakat Proverbios 19:11: ‹Chi wayuu ayaawatakai saaʼu nukuwaʼipa, nnojoishi aashichijaamaatüin nia›. Sutuma jülüjain taaʼin tü alatakat namüin na wayuu kepiakana eere taküjain pütchi, amülialaasü taaʼin naalin. Akaʼaya shia, eesü wayuu eekai kamaneein wamüin chayaa, eeshii eekai wouyantüin amaʼanamüin süka natüjaweein saaʼu tü shiimainkat».
Piale alatüin amüin tü alatakat namüin naya wayuukana, ¿kasaje paaʼinraka müleka süntüle wayuu pipialuʼumüin sünain aküjaa pümüin tü pütchi anasükat? Süküjünüle paala pümüin alawaa nachiki na Aküjaliikana pütchi, ¿aashin piyouteerüin tü pütchi naküjakat pümüin? Müle pukuwaʼipa, choʼujaajeerü pümüin pümüliannüin aaʼin. Naashin Jesuu, waaʼinrüinjatü tü anasükat sümüin wayuu maʼaka wacheküin saaʼinnüin tü anasükat wamüin. Jülüjale waaʼin tia nümakat Jesuu, wayaawateerü aaʼu jamüin naaʼin na waneinnua otta nnojoleena waya jashichijaain namüin, jaʼitairü kapüleein wamüin aaʼinraa tia (Mat. 7:12).
WAMÜLIALAA AAʼIN SAALIN WAYUU MAʼAKA NAAʼINRÜIN SHIA PABLO
Amülialaasü naaʼin Pablo saalin wayuu, jaʼitakajeʼe neʼe naalin na müliakana atuma nia sünainjee aküjaa pütchi. Naaʼinrüin tia süka jülüjain naaʼin mapuʼuin nia nümaiwa. Anuu nünüiki: «Niʼitaain taya süpüla aküjaa nüchiki sümüin wayuu süpüshua, eereje eʼrüipüʼüin wayumüin taya nümüin süka tanüiki je mayaashiije teipirapüʼüin na anoujashiikana. Nümüliajüin taya süka anayaain tü taaʼinrakat saaʼin tamüin süka manoujain taya nünain» (1 Tim. 1:13). Nütüjaa aaʼu Pablo sümülialaain naaʼin Jeʼwaa otta Jesuu naalin. Eesüjaʼa jülüjale naaʼin Pablo mapuʼuin nukuwaʼipa maʼaka naaʼin noʼutku na wayuu nüküjakana amüin pütchi.
Eeshi nüntiraapuʼule Pablo namaa wayuu ichekana maʼin süchiirua tü alawaa nanoujakalü anain. ¿Jamüsü naaʼin Pablo nüntiraapa namaa naya wayuukana? Saashin Aluwataaushikana 17:16, «sünain chain Pablo Atenas [...] mojushiisü nümüin tü joulüin suʼuyaakua kasa maleiwayaakat atümaa sainküinpünaa tü pueulokat». Aküjapejeʼe nia pütchi sükajee tia kasa mojushiikat nümüin (Aluw. 17:22, 23). Jülüjasü naaʼin Pablo waneepia nakuwaʼipa na wayuukana otta nüchajaain sukuwaʼipa süpüla nüküjain pütchi namüin shiiʼiree noʼttaainjanain (1 Cor. 9:20-23).
Wantiraale sümaa wayuu eekai jashichin wamüin waküjapa pütchi jee sunoujale sünain tü alawaakat, anasü washatüle tü naaʼinrakat Pablo. Waküja tü pütchi anasükat namüin na wayuukana sükajee tü kasa watüjaakalü aaʼu nachiki (Isa. 52:7). Anuu sünüiki wanee wawala Dorothy sünülia: «Eere waküjain pütchi, wainma wayuu anoujinnaka sünain müliain wayuu nutuma Maleiwa. Tü taaʼinrakat shia anain tanüiki namüin saaʼu nanoujain nünain Maleiwa, süchikijee, taküjain namüin süka tü Wiwüliakat aipüralin maʼin wayuu Maleiwa otta taküjain namüin tü kasa anasü naaʼinrajatkat Maleiwa mapeena».
WAYAMÜLA TÜ MOJUSÜKAT SÜKA TÜ ANASÜ WAAʼINRAKAT
Suʼunnaa sülüʼülaain sükalia süpüla sajaʼttüin kasa süpüshuaʼa, keemaleejeeria namaʼüla na eekana mojulaain (2 Tim. 3:1, 13, TNM). Ayatüinjatpejeʼe amülialaain waaʼin saalin wayuu otta talatüin waaʼin mayaapejeʼe mojulaain wayuu wamüin. Nükaaliinjeena waya Jeʼwaa süpüla wayamülüin tü mojusükat süka tü anasü waaʼinrakat (Roma 12:21). Anuu sünüiki wanee pürekutsoot Jessica sünülia: «Antiraʼawaisü taya sümaa wayuu eekai yaletüin saaʼin aʼleejaka waya otta ayoutaka tü pütchi waküjakat. Eesü süpüla üttüin waaʼin sutuma tia. Yootuinjatpa taya sümaa wanee wayuu, achuntawaisü taya kaaliinwaa nümüin Jeʼwaa süpüla shiain jülüjain taaʼin tü jülüjakat naaʼin süchiki tia wayuukot. Sükajee taaʼinrüin tia, nnojotsü jülüjain taaʼin tü saainjakat wayuu tamüin, shia jülüjakat taaʼin takaaliinjain shia».
Ayatüshii waya achajaain nachiki na atüjaweekana saaʼu tü shiimainkat
Mapa, eejeena wayuu aapaajeenaka sümaa tü shiimainkat sünainjee wakaaliinjain naya sünain
Wanee kasa jülüjainjatka waaʼin shia tü waaʼinrajatkat süpüla watütüleʼerüin naaʼin na wawalayuu waküjakana amaa pütchi. Anuu sünüiki Jessica: «Sülatüle wamüin wanee kasa mojusü sünain aküjaa pütchi, nnojotsü jülüjakuʼu müin taaʼin tia. Shia taashajaaka achiki wanee kasa naatajatü, wanee kasa eekai anain. Maʼaka saaʼin tü kasa anasü eekat sünainjee aküjaa pütchi mayaapejeʼe eein wayuu eekai shiyoutuin tü pütchikat».
Nütüjaa aaʼu Jeʼwaa tü eejiraakalü amaa waya sünain aküjaa pütchi otta talatüshi nia niʼrapa wamülialaain aaʼin saalin wayuu maʼaka naaʼinrüin niakai (Luc. 6:36). Nnojotpejeʼe amülialaajeerüin naaʼin Jeʼwaa waneepia naalin na wayuu manoujainsaliikana. Kettaaitpa sükalia nutuma süpüla najaʼttirüin süpüshuaʼa tü kasa mojusükat, sümaʼinruʼu süntüin sükalia tia, ayataʼaya waküjain maʼin pütchi (2 Tim. 4:2). Ayateeshii waya aküjain pütchi süka süpüshuaʼa waaʼin sümaa sümülialaain waaʼin saalin wayuu süpüshuaʼa.
