1. ¿Kasa keeʼireeka waaʼin wapüshuaʼa wayakana?

JÜLÜJATAA paaʼin püntiraale nümaa wanee wayuu piʼraajakai jee kojutukai maʼin pümüin. Akaisaʼa nnojoluin niyaawatüin pia chia wayuukai otta nnojotsü sotuin naaʼin pünülia. ¿Jameerü paaʼin sutuma tia? ¿Aashin mojeerüin paaʼin sünainjee? Wapüshuaʼa wayakana keeʼireesü waaʼin kojutuin waya sümüin wayuu. Nnojotpejeʼe shiain keeʼireein neʼe waaʼin weʼraajünüin sutuma wayuu, keeʼireesü waaʼin kojutuin waya amüinwaa otta kojutuin sümüin wayuu tü waaʼinrakat (Núm. 11:16; Job 31:6).

2, 3. ¿Kasa keeʼireejeetka waaʼin nnojorüle eejüin waaʼin? (Piirakaa sümüin tü ayaakuaakat).

² Nnojorüle eejüin maʼin waaʼin eesü süpüla keeʼireein waaʼin kojuteein waya sutuma wayuu. Süka suluʼuin waya wanee mma nuluwataaka aaʼu Satanaa eesü süpüla suchuntaain maʼin waaʼin kojuteein  waya sümaa weʼraajüneein sutuma wayuu. Shiale suchuntaain waaʼin tia, nnojoleechi kojutuin jee waʼwaajüin Jeʼwaa chi Washi iipünaajachikai (Alat. Map. 4:11).

³ Alatüsü tia nükalioʼu Jesuu namüin waneinnua karaloʼutamaajana. Müshi Jesuu namüin na nikirajüinkana: «Jalia jia suulia ashataa nakuaippa na karalouktamaajanakana waraitteekana maʼi aaʼin chaʼaya metkaaraluʼupünaa sünain kasheʼiin naya kuluulu anasü shiiʼiree nasaküneein sütüma wayuu. Je suluʼu tü ekirajüleekat je sünain wane miʼiraa, ojoyolooshii naya naʼaka na laülaayuukana süpüla kojutüinjanain naya sütüma wayuu». Nümaka nüchikuaʼa: «Alanaʼaleejeeria maʼi sünain süsalain naya nütüma Maleiwa saaliijee tia» (Luc. 20:46, 47). Naata maʼin nukuwaʼipa Jesuu, jamüsüjaʼa soʼu niʼrüin wanee wayuu outa aʼwayuuset asülajaka piamasü nneerü kachueerachen neʼe, anasü nünüiki süchiki tü saaʼinrakat mayaapejeʼe eein süpüla nnojoluin jaralin kachipünaain aaʼin tia (Luc. 21:1-4). Nnojotsü wanaawain tü jülüjakat naaʼin Jesuu namaa na waneinnua süchiki tü saaʼinrakat tia wayuukot. Ekirajaayakat tüü, sükaaliinjeena waya süpüla anainjatüin tü jülüjakat waaʼin maʼaka jülüjain shia naaʼin Jeʼwaa süchiki kapülaa aaʼin wayuu.

4. ¿Jaraiche chi anakai süpüla weʼraajünüin atuma? ¿Jamüsü choʼujaaka niʼraajüin waya?

⁴ ¿Kasache eʼnnaajünüinjanaka anainjee waya? ¿Shiache sünainjee watüjain karaloʼuta, woikaaliin jee shiale saaʼujee weeʼiraliin jee washaitüliin? Nüküjain Pablo tia soʼu nümüin: «Süka jiʼraajüitchipain Maleiwa otta süka jiʼraajünüinnapain nutuma, ¿jamataalaka joo jaaʼinrajatka süchikuaʼa tü kasa mojusü jaaʼinrapuʼukat sümaiwa, tü kasa nnojotkat kasain anain apüla? ¿Ayateeshia jia süchepchiain süchikuaʼa?» (Gal. 4:9, TNM). ¡Anakatche maʼin weʼraajünüle nutuma Chi Maleiwa Miyoʼushikai saaʼu kasaka süpüshuaʼa! Keeʼireesü naaʼin Maleiwa aleewain maʼin waya nümaa. Naashin wanee wayuu atüjakai süpüleerua sukuwaʼipa tü Wiwüliakat, «jülüjashii waya naaʼin Maleiwa otta kapülasü naaʼin wakuwaʼipa». Keeʼireesü naaʼin Jeʼwaa aleewain waya nümaa, shiaʼaya nukumajaka apüla waya tia (Ecl. 12:13, 14).

5. ¿Kasaka waaʼinrüinjatüin süpüla «taʼaleewain» nümüinjachin Maleiwa wamüin?

⁵ Alatüsü tia nümüin Moisés wanaa sümaa nuchuntuin kaaliinwaa nümüin Jeʼwaa süpüla niʼraajüin maʼin nukuwaʼipa. Nümaka Jeʼwaa nümüin: «Taaʼinreerü tü puchuntakat tamüin saaʼu anain pukuwaʼipa toʼuluʼu otta saaʼu teʼraajüin maʼin pia» (Éx. 33:12-17). Watta maʼin saalii kasa anasü weʼraka weʼraajünapa nutuma Jeʼwaa. ¿Kasaka waaʼinrüinjatüin süpüla «taʼaleewain» nümüinjachin Maleiwa wamüin? Alinjachi nia wapüla sümaa waapüinjatüin waaʼin nümüin (paashajeʼera 1 Corinto 8:3).

6, 7. ¿Kasa nnojoleenaka aleewain atuma waya nümaa Jeʼwaa?

⁶ Choʼujaapejeʼe waaʼinmajüinjatüin maʼin wakuwaʼipa nümaa chi Washi Iipünaajachikai. Washata nakuwaʼipa na anoujashii chajanakana Galacia, wayouta süchepchia tü kaainjalaakat, müshi Pablo namüin: «¿Jamataalaka joo jaaʼinrajatka süchikuaʼa tü kasa mojusü jaaʼinrapuʼukat sümaiwa, tü kasa nnojotkat kasain anain apüla?». Nnojo kachiiruain waaʼin eʼraajünaa sutuma wayuu (Gal. 4:9, TNM). Na anoujashii namaiwajanakana nüshajakana amüin Pablo eʼraajünüshii naya nutuma Maleiwa. Nüküjain Pablo namüin naya anoujashiikana naleʼejüin neʼe nachikuaʼa sünainmüin tü kasa nnojotkat kasain saamüin namüin. Müshi nümakai aaʼin Pablo namüin: «Wainma tü kasa juuntakat sünain anoujaa, ¿jamüshii jiitaaka jüchikuaʼa sünainmüin tü kasa nnojotkat kasain anain apüla?».

 ⁷ ¿Eesüche süpüla sülatüin tia wamüin? Jamüsaʼa shia. Watüjaapa saaʼu tü shiimainkat, eeshiijaʼa wooʼulaale suulia kachiiruain waaʼin kojutuin waya sümüin wayuu maʼaka nuuʼulaain Pablo suulia tia (paashajeʼera Filipos 3:7, 8). Eeshiijaʼa nnojorüle wekirajaain suluʼu wanee eʼikülee miyoʼu, nnojorüle kachiiruain waaʼin aapünaa amüin wanee aʼyatawaa anaka maʼin jee shiale akanajaa wainma nneerü. Otta eeshiijaʼa süpüla weʼraajünayüliin saaʼujee watüjain eeʼirajaa jee shiale sünainjee watüjain ashaitaa. Akatsaʼa wayoutuin süpüshuaʼa tia (Heb. 11:24-27). Nnojotsü anain jülüjale waaʼin anayüliinje maʼin wakuwaʼipa nnojorüle wooʼulaain tia. Jülüjale waaʼin tia, eesü kachiirueerüle waaʼin wachikuaʼa «tü kasa nnojotkat kasain anain apüla». *

8. ¿Kasa keeʼireejeetka atuma waaʼin weʼraajüneein nutuma Jeʼwaa?

⁸ ¿Kasa waaʼinrajatka süpüla shiain kachiiruain waaʼin weʼraajüneein nutuma Jeʼwaa suulialeʼeya eʼraajünaa sutuma wayuu? Süpüla tia, sotuinjatü waaʼin piamasü kasa choʼujaaka maʼin. Palajana, jülüjasü naaʼin Jeʼwaa waneepia tü kasa naaʼinrakat na waneepiakana nümaa (paashajeʼera Hebreokana 6:10; 11:6). Kojutushii maʼin nümüin Jeʼwaa waneʼewai nakua na aʼyataakana nümüin otta nnojotsü antapünaain suluʼu naaʼin nnojoluin kasajanain naya nümüin. «Niʼraajüin Jeʼwaa jaraliin na nümaajanakana» (2 Tim. 2:19, TNM). Jülüjasü naaʼin Jeʼwaa «napüna na lotokana akuwaʼipa» otta nütüjaa aaʼu kasain naaʼinrajatüin süpüla nükaaliinjain naya (Sal. 1:6; 2 Ped. 2:9).

9. Püküja süchiki waneirua kasa naaʼinraka Jeʼwaa süpüleerua tü nupueulosekat.

⁹ Niiʼiyatüin Jeʼwaa kapülain naaʼin tü nupueulosekat sükajee tü kasa pülasü naaʼinrakat süpüleerua (2 Crón. 20:20, 29). Jülüja paaʼin tü naaʼinrakat Jeʼwaa napüleerua na israeliitakana. Nuʼtteʼerüin naya nuulia Faraón jee noulia na nusurulaatsekana wanaa sümaa napüleeruaanüin aaʼin chaa süʼütpaʼa tü Palaa Ishosükat (Éx. 14:21-30; Sal. 106:9-11). Süka anashaatain maʼin tü naaʼinrakat Jeʼwaa soʼu tia, ayatüsü sotuin saaʼin wayuu tü naaʼinrakat sümaa sülatüin 40 juya süchikijee tia (Jos. 2:9-11). Atütülaasü maʼin waaʼin sutuma tü kasa pülasü naaʼinrakat Jeʼwaa sümaiwa paala süpüla nuʼtteʼerüin tü nupueulosekat, shialeekajaʼa süka sülüʼülüin tü kaʼi nushutajatkalü oʼu waaʼu Gog chi chejeʼewaikai Magog (Ezeq. 38:8-12). Soʼu kaʼikat, tia talatashaateerü waaʼin süka shiain kachiiruain maʼin waaʼin anain wakuwaʼipa noʼuluʼu Jeʼwaa suulialeʼeya anain wakuwaʼipa suʼupalapünaa wayuu.

10. ¿Kasa maa sotuinjatka waaʼin?

¹⁰ Tü wane kasa sotuinjatkat waaʼin shia naapeerüin Jeʼwaa kasa anasü wamüin waneepiale waya nümaa. Jaʼitairü nnojoluin waʼatapajüin shia. Naaʼinrüle na wayuukana wanee kasa süpüla naʼwaajünüin sünainjee tia sutuma wayuu, nnojoleerü kasain naapüin Jeʼwaa namüin, süka jamüin, kettaaitpain tü namüinjatkat naashin Jesuu müleka naʼwaajünüle sutuma wayuu maaʼulu yaa (paashajeʼera Mateo 6:1-5). Otta naashin niakai niʼrüin chi Nüshikai tü kasa anasü naaʼinrakat na wayuukana  napüleerua na waneinnua, jaʼitasü nnojoluin kachipünaain saaʼin wayuu tü naaʼinrakat. Jülüjasü naaʼin Jeʼwaa tü kasa naaʼinrakat na aʼyataashiikana nümüin otta aapüshi nia kasa anasü namüin, jaʼitairü nnojoluin naʼatapajüin tia. Wekirajaa süchiki tia.

11. ¿Kasa naaʼinraka Jeʼwaa süpüleerua María sutuma anain sukuwaʼipa noʼuluʼu?

¹¹ Nüneeküin Jeʼwaa wanee majayüt nnojotka yaletayaain aaʼin süpüla niinjatüin shia Jesuu chi Nüchonkai. María sünülia tia majayütkat otta kepiasü shia suluʼu wanee pueulo joʼuuchon Nazaret sünülia, wattasü tia pueulokot suulia Jerusalén eere joo tü aʼwaajüleekat Maleiwa (paashajeʼera Lucas 1:26-33). ¿Jamüsüche süneekünaka María nutuma Jeʼwaa? Nüküjain chi aapieekai Gabriel sümüin María anain maʼin sukuwaʼipa noʼuluʼu Maleiwa. Jayasü saaʼu María shiain wanee wayuu kanoulaka maʼin wanaa sümaa saashajaain mapa sümaa Elisabet (Luc. 1:46-55). Jülüjasü naaʼin Jeʼwaa sukuwaʼipa María, shiasaʼa süka kanoulain maʼin shia nüneeküin shia Jeʼwaa süpüla wanee kasa anashaatasü maʼin nnojotka saʼatapajüin.

12, 13. ¿Jamüsü shiiʼiyatia nujutü Jesuu nümüin wanaa sümaa joʼuuin nia jee wanaa sümaa chajachin nia eeka tü aʼwaajüleekat?

¹² Wanaa sümaa joʼuuin Jesuu, ¿jara nüküjaka amüin shia Jeʼwaa? Nnojotsü nüküjain namüin na aluwataakana saaʼu Jerusalén jee saaʼu Belén joʼuuin Jesuu. Nüjütüin waneinnua aapiee süpüla naküjain shia namüin waneinnua arüleejülii aaʼinmajakana naʼanneetse süpaʼa wanee anoouishii chayaa süʼütpaʼa Belén (Luc. 2:8-14). Oʼunamaatüshii joo na arüleejüliikana sünain anaʼlawaa nümüin chi joʼuukai (Luc. 2:15-17). Ponokajasaʼa naaʼin José sümaa María tü aküjünakat nüchiki Jesuu natuma na arüleejüliikana. Naata maʼin sukuwaʼipa tü naaʼinrakat Jeʼwaa suulia tü naaʼinrakat chi Yolujaakai. Jamüsüjaʼa wanaa sümaa nuluwataain Satanaa waneinnua wayuu atüjakana süpüleerua sukuwaʼipa jolotsü süpüla nanaʼlaain nümüin Jesuu jee na wayuu kachonkana nia, watta maʼin saalii kasa mojusü alataka chaa Jerusalén (Mat. 2:3). Otta watta maʼin naalii na tepichi oʼutunakana aaʼin sünainjee tia (Mat. 2:16).

¹³ Shiasaʼa sülatapa 40 shikii kaʼi süchikijee joʼuuin Jesuu, oʼunusü María nümaa José otta Jesuu suluʼumüin tü aʼwaajüleekat süpüla saapüinjatüin nümüin Maleiwa tü asülajünajatkat  nümüin saashin tü Pütchi aapünakat nümüin Moisés (Luc. 2:22-24). Eesüjaʼa süsakirüle saaʼin María müleka shiiʼiyatünüinjatüle nujutü Jesuu nümüin chaa suluʼu tü aʼwaajüleekat nutuma chi sacerdootekai sünainjee tü naaʼinrajatkat mapa. Eeʼiyatünüsü nujutü Jesuu nümüin, nnojotpajaʼa müin sukuwaʼipa maʼaka jülüjain shia saaʼin María. Naaʼinrüin Jeʼwaa tia nükajee wanee wayuu lotokai akuwaʼipa otta aʼyataakai waneepia nümüin, Simeón nünülia chia wayuukai. Otta müsia niiʼiyatüin Jeʼwaa nujutü Jesuu nümüin sükajee wanee wayuu nünüikimaajatü, outa aʼwayuuset shia. Ana sünülia tia wayuukot otta 84 suuyase, nüküjain Jeʼwaa sükajee Ana niainjachin Jesuu chi Mesías aküjünakai achiki paala (Luc. 2:25-38).

14. ¿Jarat tü kasa anasü naapakat Jeʼwaa sümüin María?

¹⁴ ¿Ayatüsüche eʼrüin kasa anasü María nutuma Jeʼwaa süka anain maʼin nipijia Jesuu sutuma? Aa. Nüshajirüin Jeʼwaa suluʼu tü Wiwüliakat süchiki tü saaʼinrakat jee tü sümakat María. Eesüjaʼa nnojorüle suʼunuin María nümaa Jesuu sünain aküjaa pütchi suʼunnaa tü apünüinkat juya shiatapünaamüin nüküjaka oʼu pütchi. ¿Makatüsüche María shipialuʼu chaa Nazaret süka outuin chi suʼwayuusekai? Eesüjaʼa süpüla müin shia. Müsüjeseʼe nnojoluin shiʼrüin wainma kasa anasü naaʼinraka Jeʼwaa nükajee chi süchonkai. Eejatpejeʼe shia nümaa Jesuu soʼu outuin nia (Juan 19:26). Akaʼaya shia, eejatü namaa na nikirajüinkana Jesuu chaa Jerusalén süpülapünaa tü miʼiraakat Pentecostés soʼu juyaka 33, wanaa sümaa nüshakatüin chi naaʼinkai Maleiwa suluʼumüin naaʼinrua (Aluw. 1:13, 14). Eesüjaʼa süneekünüle soʼu tia nutuma Maleiwa süpüla oʼunaa chaa iipünaamüin wanaa namaa na wane nikirajüinkana Jesuu. Mülejeʼe shia, chainjatü nümaa Jesuu chaa iipünaamüin süpüla kaʼikat süpüshuaʼa. Anashaatasü maʼin tia naapakat Jeʼwaa sümüin saaʼu shiʼyataain waneepia nümüin.

15. ¿Kasa naaʼinraka Jeʼwaa soʼu yaajachin Jesuu yaa Mmapaʼa süpüla niiʼiyatüin sünain kapülain naaʼin nukuwaʼipa Jesuu?

¹⁵ Nnojotsü kachiiruain naaʼin Jesuu kapülainjatüin nukuwaʼipa namüin na fariseokana, na saduceokana jee na sacerdootekana, shia kachiiruaka naaʼin kapülainjatüin nukuwaʼipa nümüin Jeʼwaa. Talatakajasaʼa naaʼin Jesuu soʼu nüküjain Jeʼwaa chaa iipünaajee sünain alin nia  nüpüla. Apünüintua nüküjain Jeʼwaa tia. Tü palajatkat shia süchikijeechon woutiisain Jesuu shiroku tü süchikat Jordán, müshi Jeʼwaa: «Anii chi Tachonkai aishikai tapüla. Talatüshi maʼi taya nümaa» (Mat. 3:17). Eeshijaʼa niale neʼe Juan chi Owoutisaajüikai otta müshia Jesuu aapüin tia pütchikat. Shiasaʼa wanee juya süpülapünaa nuʼutunuin aaʼin Jesuu, aapünüsü nünüiki Maleiwa natuma apünüinshii nikirajüin Jesuu sünain maa: «Anii chi Tachonkai aishikai tapüla. Talatüshi maʼi taya nümaa. Jüüjüü jümata sümüin nünüiki» (Mat. 17:5). Mapa, sülüʼütpa nükalia Jesuu süpüla nuʼutunuin aaʼin, aashajaashi Jeʼwaa nümaa chaa iipünaajee (Juan 12:28).

16, 17. ¿Kasa naapaka Jeʼwaa nümüin Jesuu sümaa nnojoluin naʼatapajüin shia?

¹⁶ Nütüjaatüjülia aaʼu Jesuu nuʼutunajachin aaʼin maʼaka naaʼin wanee kaainjarai otta shiʼitaanüinjatüin naaʼu mojuin nünüiki nüchiki Maleiwa. Oʼuraajapejeʼe nia süpüla shikeraajüinjatüin tü keeʼireekat naaʼin Jeʼwaa suulialeʼeya tü nüchekakat neʼe nümüiwaʼa (Mat. 26:39, 42). «Nnojotsü niyouktajaain amaa ouktaa saaʼu [tü wunuʼukot] mayaasüje nütüjaain saaʼu meeʼerapaleechin nia sünainjee» otta nnojotsü kachiiruain naaʼin kapülain nia sümüin wayuu manoujainsat, shia kachiiruaka naaʼin kapülain nia nümüin chi Nüshikai (Heb. 12:2). ¿Kasaka naaʼinrüin Jeʼwaa süpüla niiʼiyatüin sünain kapülain Jesuu nümüin?

¹⁷ Soʼu yaajachin Jesuu yaa Mmapaʼa, nuchuntuin nümüin chi Nüshikai süpüla kojutuin nia nümüin maʼaka kojutupuʼuin nia nümüin chaiwaʼaya nia chaa iipünaa nümaa (Juan 17:5). Nnojotsü süküjain tü Wiwüliakat naʼatapajüin Jesuu naapüinjatüin Jeʼwaa nümüin wanee kasa anashaataleeka suulia tia nuchuntakat. Nnojotsü naʼatapajüin saapünüinjatüin nümüin wanee kasa anashaatasü saaʼu naaʼinrüin tü keeʼireekat naaʼin Jeʼwaa yaa Mmapaʼa. ¿Kasaka naaʼinrüin Jeʼwaa? Niiʼiyatüin nujutü Jesuu sükajee wanee kasa anashaatasü maʼin. Saashin tü Wiwüliakat, süchikijee nüsoʼireʼerüin Jeʼwaa naaʼin Jesuu, eʼitaanüshi nia nutuma «süpüla kojutüinjachin sütüma wayuu süpüshua» otta müichia nia nnojolin outuin piantua (Filip. 2:9; 1 Tim. 6:16). * Anakatche maʼin tü naapakat Jeʼwaa nümüin Jesuu saaʼu jüüjüüin nia waneepia nümüin.

18. ¿Kasa waaʼinrajatka süpüla nnojoluin kachiiruain waaʼin kapülain waya sümüin wayuu manoujainsat?

¹⁸ ¿Kasa waaʼinrajatka süpüla nnojoluin kachiiruain waaʼin kapülain waya sümüin wayuu manoujainsat? Jülüjeesü waaʼin kojutuin nümüin Jeʼwaa waneepia na jüüjüüjakana nümüin otta naapüin namüin kasa nnojotka naʼatapajüin. Kaseetkajasaʼa naapüin Jeʼwaa wamüin mapeena. Sümaʼinruʼu waʼatapajüin tia, jülüjeesü waaʼin waneepia sülüʼülüin süpüla yüüʼülaa sümüin nakuwaʼipa na manoujainsaliikana otta nnojoleerü jaralüin kapülain namüin. Jülüjeesü waaʼin tia maaʼulu suʼunnaa weʼrüin wamüliala (1 Juan 2:17). Aipürai maʼin wayuu Jeʼwaa otta nnojoleerü motuin naaʼin «tü kasa anasü jaaʼinrakat jiiʼiyatakat aka nümüin tü naaliikat jüpüla» (Heb. 6:10). Shiimain maʼin niiʼiyateerüin Jeʼwaa kapülain waya nümüin otta naapeerüin wamüin kasa nnojotka waʼatapajüin.