1. ¿Jamüshi sülaülajanaka Jeʼwaa kasaka süpüshuaʼa? (Piirakaa sümüin tü ayaakuaakat).

SÜLAÜLAJANA Jeʼwaa tü kasakat süpüshuaʼa. Nukumala tü sirumakat, tü Mmakat otta süpüshuaʼa tü eekat saaʼu (Deut. 10:14; Alat. Map. 4:11). Süka nukumalain Jeʼwaa na wayuukana, nüchonnii naya (Sal. 100:3). Nüneekapajaʼa Jeʼwaa waneinnua wayuu süpüla naʼyataainjanain nümüin.

2. Saashin tü Wiwüliakat, ¿jaralii na akatannakana nutuma Maleiwa jee na nüneekajalakana?

² Saashin Salmos 135, na israeliita waneepiapuʼukana nümaa Jeʼwaa «na nupueulosekana» münapuʼushii naya (Sal. 135:4). Aküjünüsü suluʼu tü karaloʼutakat Oseas eejeenain wayuu nnojoliikana israeliitain saʼaka nupueulose Jeʼwaa (Os. 2:23). Ekeraajüsü tia pütchikat soʼu juyaka 36 soʼu wakalia wanaa sümaa nüneeküin Jeʼwaa wayuuinnua nnojoliikana israeliitain süpüla naluwataain wanaa nümaa Jesuu chaa iipünaa (Aluw. 10:45; Roma 9:23-26). Na akatannakana nutuma Maleiwa jee na nupueulosekana münüshii naya  wayuukana (1 Ped. 2:9, 10). Na tapueulosekana jee na «wayuu taneekajalakana» müshi Jeʼwaa namüinya na anoujashii kepiainjanakana yaa saaʼu tü Mmakat (Isa. 65:22).

3. (1) ¿Jaralii na aleewakana nümaa Jeʼwaa maaʼutpünaa? (2) ¿Kasa wekirajaainjatka anain sünain ekirajaayakat tüü?

³ Maaʼutpünaa yaa, na anoujashii chainjanakana iipünaa otta na yaainjanakana kepiain saaʼu tü Mmakat, paaʼinwajiraashii naya sünain aʼyatawaa nümüin Jeʼwaa (Luc. 12:32, TNM; Juan 10:16). Waapeein analuʼut nümüin Jeʼwaa saaʼu nüneeküin waya süpüla aleewa nümaa. Suluʼu ekirajaayakat tüü, wekirajaajeerü anain kasain waaʼinrajatüin süpüla waapüin analuʼutka nümüin Jeʼwaa saaʼu tia.

4. (1) ¿Kasa waaʼinrajatka süpüla waapüin analuʼut nümüin Jeʼwaa saaʼu nüneeküin waya süpüla aleewa nümaa? (2) ¿Jamüsü meemataka tia aka saaʼin tü naaʼinrakat Jesuu?

⁴ Sükajee waapüin waaʼin nümüin Jeʼwaa otta woutiisain waya, waapüin analuʼut nümüin saaʼu nüneeküin waya süpüla aleewa nümaa. Woutiisapa waya weeʼiyatüin suʼupala wayuu niain Jeʼwaa laülaain waaʼu otta woonoweein nümaa (Heb. 12:9). Tia meematüsü aka saaʼin tü naaʼinrakat Jesuu wanaa sümaa woutiisain nia. Mayaapejeʼe joʼuuin nia suluʼu nupueulose Jeʼwaa, müshi nümakai aaʼin nümüin: «Talatüsü taaʼin sünain taaʼinrüin tü keeʼireekat paaʼin» (Sal. 40:7, 8).

5, 6. (1) ¿Jamüsü naaʼin Jeʼwaa woutiisapa Jesuu? (2) ¿Jamüsü naaʼin Jeʼwaa woutiisapa waya? Püküja nüchiki wanee wayuu apünajakai maata.

⁵ ¿Jamüsü naaʼin Jeʼwaa sutuma woutiisain Jesuu? Müsü tü Wiwüliakat süchiki tia: «Kettaapa nuwoutisaajünüin Jesús, ashaʼwalaa müshia nia shirokujee tü wüinkat. Je wanaa maʼi sümaa tia, eerulaasü tü sirumakat chaa iipünaa. Niʼrakalaka Jesús chi Naaʼinkai Maleiwa sünain ashakataa nünainmüin sünain müin aka saaʼin wane moʼuwa. Saapünakalaka joo wane putchi chaa iipünaajee sünain maa: ‹Anii chi Tachonkai aishikai tapüla. Talatüshi maʼi taya nümaa›» (Mat. 3:16, 17). Talatashaatashi maʼin Jeʼwaa süka naapüin naaʼin Jesuu süpüla aʼyatawaa nümüin. Müsia neʼe naaʼin Jeʼwaa wanaa sümaa waapüin waaʼin nümüin otta eʼreena waya kasa anasü nutuma.

⁶ Süpüla wayaawatüin saaʼu jamüin maʼin naaʼin Jeʼwaa wanaa sümaa waapüin waaʼin nümüin, jülüja waaʼin nukuwaʼipa wanee wayuu apünajakai maata nipiapaʼa. Shiasaʼa soʼu wanee kaʼi, süsüʼütüin tü nüchonchonkot wanee süsi tü maatakat jee saapaka shia nümüin. Mayaapejeʼe nüpünajalain shia, talatüsü naaʼin süka saapüin shia tü nüchonchonkot nümüin saaʼujee alin nia süpüla. Anachonleesia maʼin tia süsi maata saapakat tü nüchonkot nümüin suulialeʼeya tü waneirua. Müsia neʼe naaʼin Jeʼwaa waapapa waaʼin nümüin, talatashaatashi nia (Éx. 34:14).

7. Maʼaka süküjain tü karaloʼutakat Malaquías, ¿jamüsü naaʼin Jeʼwaa waapüle waaʼin nümüin?

⁷ (Paashajeʼera Malaquías 3:16). Müleka nnojoiyüire paapüin paaʼin nümüin Jeʼwaa jee woutiisain pia, jülüjeesü paaʼin jamüin choʼujaaka paaʼinrüinjatüin shia. Mayaapejeʼe nukumalain waya Jeʼwaa, talatashaatashi nia wamaa waapapa waaʼin nümüin süpüla laülaain nia waaʼu (Prov. 23:15). Nütüja aaʼu Jeʼwaa jaraliin  na aʼyataakana nümüin otta nüshajüin nanülia suluʼu tü karaloʼuta nanüliamaajatkat na katüinjanakana oʼu waneepia nutuma.

8, 9. ¿Kasa naaʼinrajatka na ashajünakana anülia suluʼu tü karaloʼuta nanüliamaajatkat na katüinjanakana oʼu waneepia nutuma Jeʼwaa?

⁸ Süpüla nüshajüin Jeʼwaa wanülia suluʼu tü karaloʼuta nanüliamaajatkat na katüinjanakana oʼu waneepia nutuma, waaʼinrüinjatü waneirua kasa. Saashin tü karaloʼutakat Malaquías, mmoluwaainjana waya neema Jeʼwaa otta jülüjainjatü waaʼin tü nünüliakat. Müleka waʼwaajüle wanee maleiwayaasü jee wanee kasa naata nuulia Jeʼwaa, nüsünneʼereerü wanülia suluʼujee tia karaloʼutakat (Éx. 32:33; Sal. 69:28).

⁹ Waapüle waaʼin nümüin Jeʼwaa nnojotsü neʼe shiain süka wamüin nümüin «waaʼinreerü tü keeʼireekat paaʼin» jee woutiisain waya. Uwatua neʼe waaʼinrüin tia otta alatamaatüsü shia. Weeʼiyatüinjatpejeʼe waneepiain waya nümaa Jeʼwaa sükajee waaʼinrüin waneepia tü nuluwataakalü anain waya (1 Ped. 4:1, 2).

10. ¿Jamüsü naatainjatka maʼin nakuwaʼipa na aʼyataakana nümüin Jeʼwaa noulia na nnojoliikana aʼyataain nümüin?

¹⁰ Sünain tü ekirajaayakat apünüin, wekirajaa anainrü süchiki tü alatakat nümüin Caín, Salomón otta namüin na israeliitakana. Napüshuaʼa naya wayuukana «waʼwaajüin Jeʼwaa» müshii naya, nnojoipejeʼe naʼwaajüin nia nümüiwaʼa. Süpüla niainjachin Jeʼwaa waʼwaajüin nümüiwaʼa, wayoutuinjatü tü kasa mojusükat jee waaʼinrüinjatü tü kasa anasükat (Roma 12:9). Naashin Jeʼwaa, naata nukuwaʼipa chi aʼyataakai nümüin nuulia chi nnojoikai aʼyataain nümüin (Mal. 3:18).

11. ¿Jamüsü jaʼyainjatka saaʼu wakuwaʼipa niain neʼe Jeʼwaa waʼyataain amüin?

¹¹ Wanee kasa waapaka akajee tü analuʼutkat nümüin Jeʼwaa saaʼu nüneeküin waya süpüla waʼyataain nümüin shia sükajee jaʼyain waaʼu laülaain waaʼin sünain anoujaa (Mat. 5:16; 1 Tim. 4:15). Wasakireʼera waaʼin sünain tüü: «¿Jaʼyasüche saaʼu takuwaʼipa sünain taaʼinrüin tü nuluwataakalü anain Jeʼwaa? ¿Talatüsüche taaʼin süka taküjain namüin na waneinnua sünain taküjalin pütchi nüchiki Jeʼwaa?». Mojeerü maʼin naaʼin Jeʼwaa watuma japüire waya sünain waküjain namüin na waneinnua waʼyataaliin nümüin (Sal. 119:46; paashajeʼera Marcos 8:38).

12, 13. ¿Jamüshii eeka wawalayuu wanaawakana akuwaʼipa namaa na manoujainsaliikana?

¹² Eeshii wawalayuu ashatakana nakuwaʼipa na manoujainsaliikana, sutuma tia nnojotsü naatain maʼin nakuwaʼipa noulia (1 Cor. 2:12, TNM). Na wayuu makana akuwaʼipa shia neʼe jülüjaka naaʼin tü suchuntaakat naaʼin (Éf. 2:3). Mayaapejeʼe süküjünüin wamüin waneepia jamüin choʼujaaka anain waʼanaaya,  eeshii na ayatakana sünain mojuin naʼanaaya. Eeshii wawalayuu ichekana maʼin anain nasheʼin sümaa arülachoin maʼin shia, jaʼitakajeʼe neʼe sünain tü outkajawaakat, nanainsü kuluulu maʼaka saaʼin tia. Eeshii na kashüülakana aüjia jee na mayaawatujuukana aʼwala (1 Tim. 2:9, 10). Shiasaʼa naʼakapa naya na manoujainsaliikana, nnojoishii ayaawatünüin aaʼu sünain naküjaliin pütchi nüchiki Jeʼwaa (Sant. 4:4).

¹³ Eetaashii na anoujashii ashatakana nakuwaʼipa na manoujainsaliikana. Jamüshiijaʼa noʼunule sünain wanee miʼiraa, nashatüin nayonnajia na manoujainsaliikana otta tü nakuwaʼipakat nnojotsü nukuwaʼipayaain wanee anoujashi. Neʼitaain nayaakua suluʼu redes sociales otta nashajüin pütchi süchiki tü suchuntaakat saaʼin neʼiruku. Mayaapejeʼe nnojoluin noutkajaain apünüinshii laülaashii namaa sünainjee tia naaʼinrakat, mojeerü nakuwaʼipa na waneinnua nanainjee (paashajeʼera 1 Pedro 2:11, 12).

14. ¿Kasa waaʼinrajatka süpüla ayatüinjanain aleewain waya nümaa Jeʼwaa?

¹⁴ Tü kachiiruakat naaʼin na manoujainsaliikana waneepia shia tü suchuntaakat saaʼin neʼiruku, «nachuntüin naaʼin tü neirakaakat amüin je aʼwaatawaa suluʼu nawashirüin ooʼulaka suluʼu tü naaʼinrakat» (1 Juan 2:16). Naatapejeʼe wakuwaʼipa noulia sükajee niain laülaain waaʼu Jeʼwaa otta nuluwataain waya sünain ayoutaa «süpüshua tü kasa mojutkat akajee nia watüma je suulia kachiiruain waaʼin tü kasa mojusü keejiakat namüin na manoujainsaliikana. Tü nüchekakat chi Maleiwakai wapüleerua maaʼulu yaa, shia laülaainjatüin waaʼin, waaʼinrüinjatüin tü nüchekakat  wapüleerua, je keisalainjanain waya sümüin wakuaippa nuʼupala» (Tito 2:12). Sükajee süpüshuaʼa tü waaʼinrakat weeʼiyatüinjatü sünain niain Jeʼwaa waʼwaajüin neʼe nümüiwaʼa, sükajee tü wanüikipalakat, tü weküinkat, tü kasa wasakat, washeʼinpala, waʼanaaya otta müsia tü wakuwaʼipakat sünain aʼyatawaa (paashajeʼera 1 Corinto 10:31, 32).

15. ¿Jamüshii kamaneeinjanaka waya namüin na wawalayuukana otta alinjanaka naya wapüla?

¹⁵ Sükajee kojutuin wamüin na wawalayuukana, weeʼiyatüin kojutuin wamüin aleewain Jeʼwaa wamaa. Nüchonnii Jeʼwaa na wawalayuukana wanaa wamaa, jülüjale waaʼin tia waneepia kamaneejeena waya namüin otta aijeena naya wapüla (1 Tes. 5:15). Müshi Jesuu namüin na nikirajüinkana: «Müleka shiimüinre sünain aijiraain jia jüpüla, ayaawatüneena jia sütüma wayuu süpüshua sünain tekirajanain jia» (Juan 13:35).

16. Sünainjee tü Pütchi aapünakat nümüin Moisés, ¿kasa wayaawataka süchiki saalin tü nupueulosekat Jeʼwaa nüpüla?

¹⁶ Jülüja waaʼin wanee kasa wayaawateetka akajee jamüinjatüin wakuwaʼipa namüin na wawalayuukana. Tü kasairua eejatkat suluʼu tü aʼwaajüleekat Jeʼwaa, süpülajatü neʼe tü sünainpünaakat aʼwaajaa nia. Suluʼu tü Pütchi aapünakat nümüin Moisés aküjünüsü tü aainjünajatkat süpüla shiisattünüin tia kasakalüirua. Nayasaʼa na nnojoliikana oonooin sümaa tia pütchikat, oʼutunaa aaʼinchii naya (Núm. 1:50, 51). Naaʼinmajüle Jeʼwaa tü kasairua süpülajatkat aʼwaajaa nia, nayaleekajaʼa nnojoleematüin naaʼinmajüin  na aʼyataakana nümüin waneepia. Müshi Jeʼwaa: «Na wayuu müliakana atuma jia müshii nachüütakai saaʼin toʼu» (Zac. 2:8).

17. ¿Kasa naapaka jee jülüjaka naaʼin Jeʼwaa?

¹⁷ Naashin Malaquías, naapajüin jee jülüjasü naaʼin Jeʼwaa tü namakat na aʼyataashiikana nümüin wanaa sümaa yootiraain naya (Mal. 3:16). «Nütüjaa aaʼu Jeʼwaa jaraliin na nümaajanakana» (2 Tim. 2:19, TNM). Jülüjasü naaʼin Jeʼwaa süpüshuaʼa tü kasa waaʼinrakat jee tü wamakat (Heb. 4:13). Nnojoliire kamaneein waya namüin na wawalayuukana, nütüjaa aaʼu Jeʼwaa tia. Otta jülüjasü naaʼin Jeʼwaa wanaa sümaa motuin waaʼin naainjala na wawalayuukana, kamaneein waya namüin otta wasülajüliin (Heb. 13:16; 1 Ped. 4:8, 9).

18. ¿Kasa waapaka akajee analuʼutka nümüin Jeʼwaa saaʼu nupueulosein waya?

¹⁸ Waapeein analuʼut nümüin Jeʼwaa saaʼu nupueulosein waya. Nnojotsü eein wanee kasa alanaʼaleeka sünain anain suulialeʼeya aapaa waaʼin nümüin Jeʼwaa. Mayaapejeʼe naʼakain waya wayuu yarüttakana maʼin akuwaʼipa, eesü süpüla wulein wakuwaʼipa sümaa müin warattuuikai waaʼin pasanain sünain wayuu (Filip. 2:15, TNM). Wayoutuin tü kasa mojusü nüʼürülakat Jeʼwaa (Sant. 4:7). Jee aishii wapüla sümaa kojutuin wamüin na wawalayuukana sükajee watüjaain saaʼu nüchonniin naya Jeʼwaa (Roma 12:10).

19. ¿Kasa anasü naapaka Jeʼwaa sümüin tü nupueulosekat?

¹⁹ Müsü tü Wiwüliakat: «Nnojoleerü nüpütüin Jeʼwaa tü nupueulosekat» (Sal. 94:14). Ekeraajeerü waneepia pütchikat tüü, jaʼitairü kasain alatüin wamüin. Jaʼitaina outuin waya, ayateena waya alin nüpüla Maleiwa (Roma 8:38, 39). Katüle woʼu shia süpüla aʼyatawaa nümüin Jeʼwaa, shiasaʼa outule waya, outeena waya sünain aaʼinraa tü nüchekakat Jeʼwaa wapüleerua süka niain laülaain waaʼu (Roma 14:8, TNM). Waʼatapajashaatain tü kaʼi nüsoʼireʼereetkalü oʼu Jeʼwaa naaʼin na naʼaleewainkana (Mat. 22:32). Jaʼitakajaʼa neʼe maaʼutpünaa yaa, watta maʼin saalii tü kasa anasü weʼrakat nutuma Jeʼwaa. Anuujeseʼe sünüiki tü Wiwüliakat: «Anataʼaleeshiijaʼa maʼin na wayuu Kamaleiwasekana Jeʼwaa, na nüneekakana süpüla nupueulosein» (Sal. 33:12).