Tü sümakat tü Wiwüliakat: «Anakaja müleka nnojoliire keeʼireein jaaʼin washirüü. Shia anaka aluʼu müleka talatüle neʼe jaaʼin waneʼewai jukua sümaa tü eekai eein jümaʼana» (Hebreokana 13:5).

Watta saalii kasa choʼujaaka wamüin naashin na wayuukana. Süküjapejeʼe tü Wiwüliakat eein süpüla talatüin waaʼin sümaa tü eekai eein wamaʼana. ¿Jamüinjatü sukuwaʼipa watuma?

Nnojo kachiiruain waaʼin washirüü. Eeshii wayuu kachiiruakana maʼin naaʼin tü washirüükat, palajanasü tia natuma süpüleerua napüshi, naʼaleewainyuu. Kachiirualeesia maʼin naaʼin tü washirüükat jaʼitaina naainjain kasa mojusü süpüleerua, jaʼitaina ayuulin jee mojutuin naya sünainjee (1 Timoteo 6:10). Saashin tü Wiwüliakat «chi wayuu keeʼireekai aaʼin washirüü, nnojotsü talatüin naaʼin sümaa tü kasa eekat nümaʼana, keeʼireesü naaʼin sooʼomüin» (Eclesiastés 5:10).

Soto waaʼin alanaʼaleein sujutü wayuu suulia wanee korolo. Eesü korolo kojutuka maʼin wamüin, nnojoliipejeʼe alin waya süpüla tü kasakalüirua. Na aikana apüla waya naya na wayuukana. Makalaka talatüin maʼin waaʼin müleka eere wanee waʼaleewain aikai maʼin apüla waya (Proverbios 17:17).

Tü sümakat tü Wiwüliakat: «Talatüle naaʼin wanee wayuu, aneechi nia, akatsaʼa mojule naaʼin ayuuijeechi» (Proverbios 17:22).

Talatüle naaʼin wanee wayuu, mapüleejeerü nümüin eejiraain nia sümaa wanee ayuulii. ¿Kasa naaʼinrajatka wanee wayuu süpüla talatüin naaʼin mayaainjeʼe ayuulin nia?

Watüjale aapaa analuʼut. Younakuʼu wamüle waneepia sutuma ayuulin waya, ayateeria neʼe mojuin waaʼin waneepia (Proverbios 15:15). Anuupejeʼe tü sümakat tü Wiwüliakat: «Shia anaka aluʼu müleka jaapüle analuʼut waneepia» (Colosas 3:15). Waapüinjatü analuʼut waneepia nümüin Maleiwa saaʼu tü kasa anasü alatakat wamüin, jaʼitairü shiain wanee kasa eekai müin malaachonkai saaʼin. Eeshii süpüla talatüin waya niishojoole chi Kaʼikai, saamatuuire tü joutaikat jee shiale saaʼu nukulemeraain wamüin wanee wapüshi aikai wapüla.

Waaʼinrüle kasa anasü napüleerua na waneinnua. Jaʼitaina ayuulin waya, talateena waya wasülajüliire. Saashin tü Wiwüliakat, «nia talataleeka chi wayuu asülajakai nuulialeʼeya chi asülajünakai amüin». (Aluwataaushikana [Hechos] 20:35, TNM). Jamüshijaʼa talatüle naaʼin wanee wayuu sutuma waaʼinrüin wanee kasa nüpüleerua, talataleesia waaʼin sutuma wakaalinjain nia otta nnojotsü  jülüjain maʼin waaʼin tü ayuulii wanainkat. Aneerü waaʼin wakaalinjale na waneinnua.

Tü sümakat tü Wiwüliakat: «Shia jaaʼinmaainjatka maʼin tü kasa alanaʼaleekat suluʼu anain» (Filipos 1:10, TNM).

Eesü süpüla sumojujeʼerüin nukuwaʼipa wanee wayuu sümaa nuʼwayuuse nnojoire nükatalüin kaʼi süpüla naaʼinrüin wanee kasa sümaa. Shia alanaʼaleeinjatka namüin na kaʼwayuuseshiikana tü nakuwaʼipakat suulialeʼeya wanee kasa naata.

Jaaʼinra kasa kamalainka jümüin piamaleʼeya. Saashin tü Wiwüliakat «anashii piamashii wayuu nuulia waneeshia» (Eclesiastés 4:9). Suulia shiain jaaʼinrüin tü kamalainkat jümüin waneʼewai jukua, shia anaka aluʼu, jülüjale jaaʼin kasain anain süpüla jaaʼinrüin piamaleʼeya. Eeshii süpüla jüʼlakajaain, juwaraijaain, jeemeraain sümaa jüsüin kepein jee jaaʼinrüle wanee kasa eekai kamalain jümüin.

Aijiraainjana jia. Saashin tü Wiwüliakat kojutujiraainjana otta aijiraainjana na kaʼwayuuseshiikana (Éfeso 5:28, 33). Aijiraajeena maʼin na kaʼwayuuseshiikana müleka nakulemeraale, najuupajiraale otta kakoloinwaire naya. Chi toolokoi nnojoishi amaʼüjiraainjachin sümaa wayuu nnojotka nuʼwayuusein, akaʼaya tü jietkat, nnojotsü saaʼinrüinjatüin tia (Hebreokana 13:4).