MAYAAINJEʼE oʼttüin wayuu ütamüinreʼeya sünain kaainjalaa jee outaa nünainjee Adán, nnojoishi aawalaain chi Maleiwakai suulia nikeraajüin tü keeʼireetüjütkalia naaʼin, katüinjatüin soʼu tü wayuukalüirua süpüla kaʼikat süpüshuaʼa. Kojuyatua aküjünüin suluʼu tü Wiwüliakat süchiki tia.

• «Nayeena kepiaka suluʼu tü mmakat süpüla kaʼikat süpüshuaʼa na lotokana akuwaʼipa» (Salmo 37:29).

• «Müiria nnojoluin eein outaa. Müiria nnojoluin eein aʼyalajaa, najaʼttireerü tia Jeʼwaa» (Isaías 25:8).

• «Niyamütpa Maleiwa tü nüʼünüükalüirua. [...] Nüsünneʼerüinjatü tü outaakat» (1 Corinto 15:26).

• «Müiria nnojolüin ouktaa, mojuu aaʼin, aʼyalajaa, je saalii ayuulii» (Alateetkat Mapeena [Apocalipsis] 21:4).

¿Kasa naaʼinrajatka Maleiwa süpüla najaʼttirüinjatüin tü outaakat? Maʼaka wamayülin, aküjünüsü suluʼu tü Wiwüliakat nayainjanain na wayuu lotokana akuwaʼipa na kepiainjanakana saaʼu tü Mmakat «süpüla kaʼikat süpüshuaʼa». Aküjünapejeʼe suluʼu tü Wiwüliakat nnojolin «eeichin wanee wayuu lotokai akuwaʼipa yaa mmapaʼa aaʼinrakai kasa anasü sümaa maainjalain nia» (Eclesiastés 7:20). ¿Ooʼulaajeeiche chi Maleiwakai suulia aaʼinraa tü kasa lotusükat süpüla katüinjatüin soʼu tü wayuukalüirua süpüla kaʼikat süpüshuaʼa? Nnojottaa, nnojoleerü naaʼinrüin Maleiwa tia süka matüjain nia aküjaa naʼalain (Tito 1:2). ¿Kasakaʼa naaʼinrajatüin Maleiwa süpüla nikeraajüin tü keeʼireekat naaʼin napüleerua na wayuukana?

Süka aishaatain maʼin wayuu nüpüla Jeʼwaa, awalaajüshi nia süpüla taashiinjanain naya nutuma suulia outaa. ¿Kasa wayu tü taashii münakat? Saashin tü Wiwüliakat, shia tü awalaajünakat saaʼu wanee kasa eekai seewaain atumawaa otta wanaawainjatü sümaa sülia tü kasa eewaakat. Süka kaleʼeruʼuin kaainjalaa wayuu süpüshuaʼa, outajanaʼaya neʼe naya saaliijee. Anuu tü sümakat tü Wiwüliakat: «Isaleesia nüchiki wanee wayuu taashin nutuma wanee nuwala jee naapüin nümüin Maleiwa wanee kasa niiʼirakaluʼu (kojutusü maʼin tü awalaajünajatkat süpüla taashinjachin wanee wayuu. Nnojotsü jaralüin ountuin tia)» (Salmo 49:7, 8).

Outapa wanee wayuu kaleʼeruʼukai kaainjalaa shia nuwalaajaka neʼe tü naainjalakat. Jee isasia neʼe nüchiki nuʼttaainjachin jee suʼttaainjatüin wayuu nünainjee (Roma 6:7). Choʼujaashijeseʼe naapajiraainjachin nikii wanee wayuu eekai mamojulain otta eekai maainjalain. Nnojoishi outajachin nia naaʼujiraa, naaʼinrajatü tia saaʼu saainjala wayuu süpüshuaʼa (Hebreokana 10:1-4).

Nuluwataainjeseʼe Maleiwa chi Nüchonkai chejee iipünaajee süpüla wayuuinjachin nia yaa mmapaʼa (1 Pedro 2:22). Nüküjain Jesuu namüin na nikirajüinkana taashinjatüin wayuu wainma suulia saainjala sünainjee outuin nia saaʼu (Marcos 10:45) Outushi Jesuu süpüla najaʼttirüinjatüin tü outaakat, sükajee tü naaʼinrakat eeshii süpüla waʼatapajüin tü kataakalü oʼuu waneepia (Juan 3:16, TNM).

Joutsü maʼin kasa mojusü maaʼutpünaa, shiimainjaʼa mata tü sümakat tü Wiwüliakat süchiki kepiain waya soʼu tü kaʼi alüʼütkat süpüla «sajaʼttüinjatüin  tü kasakat süpüshua» (2 Timoteo 3:1). Sülatapa tü kaʼi alüʼütka süpüla sajaʼttajatüin tü kasakat süpüshuaʼa, süsalainjatü nutuma Maleiwa saainjala tü wayuu mojulaasükalüirua otta najaʼttireena naya (2 Pedro 3:3, 7, TNM). Akanasaʼa na wayuu aikana apüla Jeʼwaa alateena süchikumüin tü nükaliakat Maleiwa otta kateerü noʼu süpüla kaʼikat süpüshuaʼa (Mateo 25:46, TNM).

Eejeena watta naalii wayuu asoʼiraainjanaka aaʼin süpüla katüin noʼu waneepia. Eeshii süpüla nüsoʼireʼerüin naaʼin Jesuu na outushiikana. Jamüshijaʼa wanaa sümaa chajachin nia suluʼu wanee pueulo kanüliasü Naín, nüsoʼireʼerüin naaʼin süchon wanee wayuu outa aʼwayuuset süka sümülialüin naaʼin (Lucas 7:11-15). Anuu tü nümakat chi aluwataaushikai Pablo: «Otta tayaʼyaa, anoujashi nünain Maleiwa sümaa kaʼatapalain taya nünain majaʼa aka nayakana kaʼatapalain sünain süsoʼiraajeerüin aaʼin tü wayuu ouktüsükalüirua, makat aka wayuu eekai saaʼinrüin tü anasükat otta türa eekai saaʼinrüin tü mojusükat». Sükajee tü nümakat Pablo wayaawata aaʼu alin maʼin tü wayuukalüirua nüpüla Maleiwa (Aluwataaushikana [Hechos] 24:15).

Watta maʼin naalii na wayuu eekana süpüla katüin noʼu süpüla kaʼikat süpüshuaʼa. Saashin tü Wiwüliakat, na wayuu lotokana akuwaʼipa kepieena waneepia saaʼu tü Mmakat (Salmo 37:29). Talateena maʼin na wayuukana otta wanaaweerü nanüiki sümaa tü nümakat Pablo maʼaka 2.000 juya paala: «Nnojoliinapa jooluʼu waya mmolüin seema tü ouktaakat, süka nükanajüitpain shia chi Maleiwakai» (1 Corinto 15:55). Shikeraajapa tia, müiria nnojoluin outuin tü wayuukalüirua, anakatche maʼin.