Anuu nünüiki Maleiwa nümüin Adán: «Müleka piküle süchon wunuʼukot tüü, shiimüinshaana ouktajachin pia» (Génesis 2:17). Nukumajüle Jeʼwaa Adán süpüla laülaain jee outuin nia, nnojotsüjeʼe choʼujaain nüküjain tia nümüin. Akaataajaʼa Adánya, nütüjaa aaʼu outajachin nia niküle süchon tia wunuʼukot.

Wattapuʼusü saalii wunuʼulia ekünaajuut süchon suluʼu tü Paʼaraiisükat, nnojotsü choʼujaain nümüin Adán otta Eva neküinjatüin süchon tü wunuʼu apülajünakat noulia (Génesis 2:9). Nnojoliirejeʼe neküin süchon tia wunuʼukot, neeʼiyatüinjeʼe sükajee tia kojutuin namüin tü nuluwataakalü anain chi Kakumajalakai naya otta niain neʼe Jeʼwaa anakai süpüla aküjaa namüin tü naaʼinrajatkat.

Süpüla watüjaain saaʼu kasanainjeein outaka Adán sümaa Eva anasü jülüjale waaʼin wanee kasa alataaka chaa Edén. Sükajee wanee wüi nüküjain naʼalain Satanaa nüchiki Jeʼwaa, sutuma tü naaʼinrakat Satanaa, eʼrüsü sümüliala wayuu süpüshuaʼa. Anuu tü sümakat tü Wiwüliakat: «Saʼaka tü kasa unaʼapüjatkat akumajuushikat nütüma Jehová, chi Maleiwakai, eejatü wüiʼiya. Je tü wüikat, keʼikeʼerüinrü maʼi sümaa yalayalain maʼi suulialeʼeya tü kasakat süpüshua. Sümakalaka joo tü wüikat sümüin tü jietkat: ¿Jamüsü taaʼin nünüiki Maleiwa jümüin? ¿Shiimüinsaʼaya nümüin jümüin nnojoliinjanain jiküin süchon tü wunuʼuliakat süpüshua yaakat suluʼu tü apainkat?» (Génesis 3:1).

Sümakalaka Eva sümüin: «Nnojo, eesü süpüla weküin süchon tü wunuʼuliakat süpüshua yaakat suluʼu tü apainkat. Shia neʼe apülajünaka woulia, tü wunuʼu yaa pasanainkat sünain tü apainkat süpüla nnojolüinjatüin weküin süchon. ‹Müleka jiküle shia, jaʼitakaje neʼe jipettüle shia, shiimüinshaana ouktajanain jia sütüma›, müshi chi Maleiwakai wamüin». Sümakalaka jooluʼu tü wüikat: «Nnojo. Nnojotsü shiimüin tia. Nnojoleena jia ouktüin. Müleka jiküle süchon tü wunuʼukot, kekiijeena maʼi jia süpüla kasa süpüshua. Meena aka jia Maleiwakai sünain jiyaawatüin saaʼu tü anasükat je tü mojusükat. Müsüjeseʼe niyouktüin süpüleerua jiküinjatüin süchon tü wunuʼukat». Naashin Satanaa aküjashi naʼalain Jeʼwaa namüin otta nuunjulajüin kasa anasü nuulia Adán otta Eva (Génesis 3:2-5).

Sunoujain Eva tü nümakat Satanaa. Sünanajüinjeseʼe Eva süchon tü wunuʼukot, jaʼyasü saaʼu jemetüin maʼin sümüin, süsüʼütüinjeseʼe tü süchonkot sünain shiküin. Aküjünüsü suluʼu tü Wiwüliakat kasain alatüin süchikijee tia: «Shikiraakalaka shia nümaa chi suʼwayuusekaʼiya» (Génesis 3:6).

Mojukajasaʼa maʼin naaʼin Maleiwa sutuma neʼrüliijaain wayumüin na nüchonnii aishiikana maʼin nüpüla. ¿Kasa naaʼinraka Jeʼwaa sutuma tia? Anuu  tü nümakat: «Eʼreechi pia aʼyatawaa jashichin püpüleerua sümaa piroujeeinjatüin tü pipijaainjatkat aka waneʼereʼeyajaʼa sajaʼttüin piʼyataain ouktapa pia. Aleʼejeechi ouktapa pia saʼakamüin tü mma tatükakat anainjee pia. Shiimüin sünain mmainjachin pia püchikua, süka aainjuushin pia sünainjee» (Génesis 3:17-19). Ekeraajüsü tia, «ouktüshi Adán 930 nuuyase» (Génesis 5:5). Nnojoishi jalamüin oʼunuin Adán süchikijee outuin nia, nnojoishi oʼunüin nia sirumatuʼumüin. Akumajünüshi Adán nutuma Jeʼwaa süka sümamüla mma, outapa nia aleʼejüshi sümamülain mma nüchikuaʼa. Makalaka nnojoluin katüin noʼu. ¡Aluʼuwatshi Adán!

Süka moonooloin Adán otta Eva sümaa tü nuluwataakalü anain Jeʼwaa kaainjalashii naya otta nnojotsü süpüla katüin noʼu waneepia. Soʼujeʼereʼeya kaʼikat tia kaleʼeruʼushii naya kaainjalaa otta nnojoluitpa lotuin nakuwaʼipa. Jaʼitakajaʼa na nooʼuliwoʼukana, mojusü nakuwaʼipa sünainjee tü naaʼinrakat Adán sümaa Eva. Anuu tü sümakat Roma 5:12: «Kaainjalashi Adán nuulia Maleiwa sükajee niyouktajaain sümaa nünüiki nümüin. Ouktakalaka nia saaliijee. Je sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktakalaka naya saaliijee».

Saashin tü Wiwüliakat, tü outaakat müsü aka saaʼin wanee «kuluulu saaʼukat wayuu süpüshuaʼa, tü ichekat saaʼu wayuu sainküinjeejatü mmakat süpüshuaʼa» (Isaías 25:7). Tia maluʼulu kaleʼeruʼuin kaainjalaa wayuu süpüshuaʼa otta nnojoishi jaʼralin isajüin suulia outaa. «Maleeirümaʼaka ouktüin wayuu süpüshua saaʼu saainjala maa aka naaʼin [Adán]» (1 Corinto 15:21, 22). Eesüjaʼa jülüjale waaʼin tü nümakat chi aluwataaushikai Pablo: «Aluʼutaʼaleeshija maʼi taya süchepchiaka taainjala. Kasataalejese tajuittinnüin maalü suulia» (Roma 7:24, 25).