Müliasü saaʼin wayuu maʼleekalia sutuma tü outaakat
JÜLÜJATAA paaʼin pünajüin wanee peliikula süchiki wanee wayuu eʼnnaajünaka maʼin, eesüjaʼa shiale wanee wayuu anaka ashoʼu pümüin. Suʼttiajee tü peliikulakat jintut shia, ekirajaasü waneepia sünain muusika. Mapa, eeʼirajüsü shia suʼupala wainma wayuu, oʼunusü sainküin mma sünain eeʼirajaa otta eʼnnaajünüsü maʼin. Laülaasü shia mapa sümaa outuin shia sajaʼttiamüin tü peliikulakat.
Tü piʼrakat suluʼu tü peliikulakat shiimain alatüin sümüin wanee wayuu, nnojoluitpa eein süka outuitpain shia. Maʼleesia neʼe outuin wayuu süpüshuaʼa, jaʼitaichi niain wanee cientiifico, wanee ayoujiraai jee niale wanee wayuu eʼnnaajünakai maʼin. Mayaainjeʼe nuuntuin wainma kasa wanee wayuu, eeshiijaʼa wamüle: «Wainmayülüjeʼe kasa nuuntaka apüleerua nnojoirejeʼe laülaain jee outuin nia».
Tü alatakat sümüin tia wayuukot alatüsü sümüin wayuu maʼleekalia, aluʼuleekajaʼa maʼin sukuwaʼipa wayuu (Eclesiastés 9:5). Mayaapejeʼe nachajaain maʼin sukuwaʼipa na wayuukana süpüla nnojoliin laülaain jee outuin naya, isasia neʼe nachiki. Eeshiijaʼa outalaa wamüle sutuma ayuulii jee pasiruwaale waya. Saashin tü Wiwüliakat, müshii aka waya saaʼin «tü mannuuyakat wattaʼa maalü», eesü shia motsomüin jee matüʼülaa müsü mapa (Santiago 4:14).
Eeshii na wayuu makana matüjaajuin aaʼu wakuwaʼipa otta nnojotsü kasain saamüin wamüin katüin woʼu, «anashii wemiʼijaale neʼe, süka sülüʼülüin wakalia süpüla ouktaa» müshii naya (1 Corinto 15:32). Na wayuu jülüjakana aaʼin tia nayaawata aaʼu outajanain naya soʼu wanee kaʼi, naaʼinrüinjeseʼe tü keeʼireekat naaʼin. Anteeria neʼe tü kaʼi jülüjainjatkalü oʼu waaʼin kasapülajanain wakumajünaka, shialeekajaʼa weʼrüle müliaa. ¿Jalasüche aküjünüin wamüin süchiki tia?
Eeshii na achajaakana susoutia tü natüjaweekalü aaʼu sükajee tü namakat na cientiificokana jee na tottootkana. Wainma kasa natüjaaitpakalü aaʼu na cientiificokana, eesü kakaliale katüin soʼu wayuu sutuma tü naaʼinrakat. Nachajaapejeʼe maʼin sukuwaʼipa süpüla kakalialeeinjatüin katüin soʼu tü wayuukalüirua. Mayaainjeʼe wainmain kasa nountaka apüleerua, ayatüsia matüjaajuuin aaʼu jamüin laülaaka jee outaka wayuu, nnojotsü atüjaanüin aaʼu müleka süntajatüle wanee kaʼi nnojoleetkalü oʼu outuin wayuu. Sünain tü wane pütchikalüirua, wekirajaajeerü anain tia otta wasouteerü eʼipajee asakiraakat tüü: ¿Kasapülajanache wakumajünaka?