1-3. (1) ¿Jamüsü watüjaaka saaʼu keejiain tü outkajawaakat namüin na aʼyataashiikana nümüin Jeʼwaa? (Piirakaa sümüin tü ayaakuaakat). (2) ¿Kasa wekirajaainjatka anain sünain ekirajaayakat tüü?

WANAA SÜMAA 17 suuyase Corinna, ataʼünnüsü tü shiikat otta amaanüsü wattamüin suulia shipia süpüla shiʼyateʼennüinjatüin, aʼyatawaa jashichi tü eʼitaanakat süpüla. Shiasaʼa mapa süchikijee tia, amaanüsü Corinnaya, chajatü amaanüin Siberiamüin, wattashaatasü tia mmakat suulia shipia. Aʼyateʼennüsü Corinna suluʼu wanee granja, müliashaanasü maʼin shia atumawaa, maaʼatsü aka saaʼin wanee piuuna atumawaa. Eesü shiʼyateʼennüle suʼunnaa jemiai otta müliasü maʼin shia süka nnojoluin kaʼlein maʼin soʼu süsheʼin. Aashajaajiraasü Corinna sümaa wanee wawala süpüla noʼunüinjanain sünain wanee outkajawaa wattashaanasü suulia tü granja eejanale naya.

² Oʼunaajaa namüin na piamashiikana jieyuu aliika, waraittüshii naya 25 kiloometüro süpüla nantüin eemüin tü türein noʼunajatkalü aluʼu. Anuu sünüiki Corinna: «Oʼunüshii waya suluʼu tü türeinkat lato maalia, aipirua oora waya sünain oʼunajawaa suluʼu tü türeinkat. Shiasaʼa eejeejanale washakatüin waraittüshii waya poloo kiloometüro süpüla wantüin eere saainjünüin tü outkajawaakat».  Talatüsü maʼin saaʼin Corinna sutuma saaʼinrüin tia. Anuu sooʼomüin sünüiki: «Sünain tü outkajawaa woʼunakalü anainmüin, wekirajaa anainrü tü rewiisütakat Aapiria Wayuu otta eeʼirajüshii waya nümüin Jeʼwaa. Atütülaasü waaʼin otta akatsüinraasü wanoula sutuma chajanain waya sünain tia outkajawaakat». Aleʼejüshii na jieyuukana nachikuaʼa apünüin kaʼi süchikijee noʼunüin. Eeyaai neʼe nütüjaain aaʼu chi jülüjakai aaʼin tü granjakat nojuʼitüin naya jieyuukana.

³ Kojutüsü namüin na aʼyataashiikana nümüin Maleiwa noutkajaainjanain, mapuʼusia nakuwaʼipa na nikirajüinkana Jesuu namaiwa. Keejiapuʼusü namüin jutkataa süpüla naʼwaajüin Jeʼwaa sümaa nekirajaain nüchiki (Aluw. 2:42). Kamalainsia wamüin wayakana oʼunaa sünain tü outkajawaakat. Eepejeʼe na kapüleekana amüin oʼunaa sünain süpüshuaʼa tü outkajawaakalüirua. Iraʼayaa chi siraakai kaʼi naaʼu sünain aʼyatawaa, eeshi eekai wainmain kasa naaʼinraka otta eeshi chira mapüsakai maʼin. ¿Kasa akaaliinjeenaka waya süpüla nnojoliinjanain makatüin waya suulia tü outkajawaakat? ^[1] ¿Kasa waaʼinrajatka süpüla watütüleʼerüin naaʼin na wekirajüinkana jee na wanee wayuukana süpüla noʼunüinjanain sünain tü outkajawaakat? Sünain ekirajaayakat tüü, wekirajaajeerü anain apünüinsü pütchi. Palajana, wekirajaajeerü anain jamüin aneetka wakuwaʼipa woʼunüle sünain tü outkajawaakat. Wekirajaajeerü anain jamüin aneetka nakuwaʼipa na wawalayuukana woʼunüle sünain tü outkajawaakat otta müsia wekirajaajeerü anain jamüin naaʼin Jeʼwaa sutuma woʼunüin sünain tü outkajawaakat. ^[2]

4. ¿Jamüsü weʼraajaka maʼin nukuwaʼipa Jeʼwaa sutuma tü outkajawaakat?

⁴ Ekirajünüshii waya sünain tü outkajawaakat. Sünain tü outkajawaakat weʼraajüin maʼin tü nukuwaʼipakat Jeʼwaa sutuma tü ekirajünakalü anain waya. Jamüshiijaʼa waya, wekirajaa anainrü jekenainka tü karalouktakat Ayata alin jüpüla Maleiwa, wekirajaa anainrü shia sünain tü outkajawaa süpülajatkat Ekirajawaa sünain tü Wiwüliakat namaa na Wawalayuukana. ¿Jamüsü paaʼin wanaa sümaa shikirajaanüin anain tü akuwaʼipaa eekat nünain Maleiwa? ¿Jamüsü paaʼin wanaa sümaa paapüin nanüiki na wawalayuukana naküjapa sünain alin Jeʼwaa napüla? Akooʼomüinraakajasaʼa naalin Jeʼwaa püpüla. Wainma kasa watüjaka sünainjee tü Wiwüliakat jülüjale waaʼin tü pütchi ekirajünakat sünain tü outkajawaakat, tü akuwaʼipaa eeʼiyatünawaikat jee sutuma tü wetsiikulo waashajeʼerakat (Neh. 8:8). Akaʼaya waashajeʼerapa tü kapiitulo ekirajaanajatkalü anain sünain tü outkajawaakat semaanawai otta naküjawaipa na wawalayuukana tü pütchi anakat namüin, watta saalii tü kasa watüjakat sünainjee tü Wiwüliakat.

5. Püküja jamüin pukuwaʼipa sünain aküjaa pütchi sutuma tü outkajawaakat jee kasain paaʼinrüin süpüla piʼitaain suluʼu pukuwaʼipa tü ekirajünakat sünain.

⁵ Sükaaliinjain waya tü outkajawaakalüirua süpüla weʼitaainjatüin suluʼu wakuwaʼipa tü sümakat tü Wiwüliakat (1 Tes. 4:9, 10). Eesüjaʼa wekirajaairüle sünain wanee pütchi suluʼu Aapiria Wayuu akooʼomüinraka tü waʼyataainkat nümüin Jeʼwaa, eere süküjünüin tü waaʼinrajatkat süpüla anainjatüin woʼuraajia jee motuinjatüin  waaʼin naainjala wanee wawala wamüin. Tü outkajawaakat Wakuwaʼipa otta Waʼyataain nümüin Maleiwa, sükaaliinjain waya süpüla watüjainjanain aküjaa pütchi jee ekirajaa wayuu sünain tü sümakat tü Wiwüliakat (Mat. 28:19, 20).

6. ¿Kasa atütüleʼerawaika waaʼin sünain tü outkajawaakat?

⁶ Atütüleʼennüsü waaʼin sünain tü outkajawaakat. Tü kasa nuluwataakalü aaʼu Satanaa sümalajeʼereein wanoula. Aluʼuinjaʼa tü outkajawaakat, sütütüleʼerüin waaʼin jee süchecherüin waaʼin süpüla ayatüin waʼyataain nümüin Jeʼwaa waneepia (paashajeʼera Aluwataaushikana 15:30-32). Sünain tü outkajawaakat, wekirajaa anainrü tü pütchi ekeraajüitpakat suluʼujee tü Wiwüliakat. Tia, sükaaliinjain waya süpüla weʼitaashaatain waaʼin sünain nikeraajeerüin Jeʼwaa süpüshuaʼa tü nümakat wamüin. Natütülüin waaʼin na wawalayuukana nekirajapa sünain tü outkajawaakat ooʼulaka neeʼiyatapa wanee sukuwaʼipa. Atütülaasia waaʼin nayalerapa najapü süpüla nasouktüin shiʼipajee tü asakinnakalü anain jee müsia neeʼirajapa nümüin Jeʼwaa süka süpüshuaʼa naaʼin (1 Cor. 14:26). Atütülaasü waaʼin yootule waya namaa na wawalayuukana süpülapünaa suʼttüin tü outkajawaakat jee shiale sajaʼttapa. Waaʼinrüle tia, watteena naalii na waʼaleewainyuu jülüjakana aaʼin waya (1 Cor. 16:17, 18).

7. ¿Jamüsü choʼujaaka woʼunüin sünain tü outkajawaakat?

⁷ Nükaaliinjain waya Maleiwa nükajee chi naaʼinkai müleka woutkajaale. Nuʼunirüin Jesuu nakuwaʼipa na anoujashiikana nükajee chi naaʼinkai Maleiwa. Naashin Jesuu, anasü jülüjale waaʼin tü nümakat chi naaʼinkai Maleiwa wamüin (Alat. Map. 2:7). Nükaaliinjain waya chi naaʼinkai Maleiwa süpüla eejiraain waya sümaa tü ooʼulakünakalü aka waaʼin, süpüla yalayalain waaʼin sünain aküjaa pütchi otta süpüla waaʼinrüinjatüin tü anasükat. Choʼujaasüjeseʼe woʼunüin sünain tü outkajawaakat süpüla nükaaliinjain waya Maleiwa nükajee chi naaʼinkai.

8. ¿Jamüsü naaʼin na wawalayuukana neʼrüle waya sünain tü outkajawaakat, wayalerüle wajapü jee weeʼirajüle? (Paashajeʼera « Anawaisü naaʼin nüleʼejapa sünainjee tü outkajawaakat»).

⁸ Outkajaashii waya süpüla weeʼiyatüin sünain alin wapüla na wawalayuukana. Eeshii wawalayuu eʼrakana maʼin namüliala. «Anakaja müleka wakaaliijiraale wapüshua», müshinka Pablo (Heb. 10:24, 25). Kapürale waaʼin nakuwaʼipa na waneeinnua shiimain sünain  waaʼinrüin tü nümakat Pablo. Weeʼiyatüin tia sünain tü outkajawaakat süka watütüleʼerajiraain waaʼin. Woʼuna sünain tü outkajawaakat süpüla weeʼiyatüin namüin na wawalayuukana sünain kottiraweein waya namaa, yooteein waya namaa jee watüjaweein aaʼu anale jee mojule naaʼin. Watütüleʼerüin naaʼinyaasa wayalerüle wajapü sünain tü outkajawaakat jee weeʼirajüle nümüin Jeʼwaa süka süpüshuaʼa waaʼin (Col. 3:16).

9, 10. (1) ¿Jamüsü sütütüleʼetka waaʼin süpüla woʼunüinjanain sünain tü outkajawaakat tü nümakat Jesuu suluʼu Juan 10:16? (2) ¿Jamüsü aneetka nakuwaʼipa na wawalayuu manoujainkana apüshi woʼunüle sünain tü outkajawaakat?

⁹ Outkajaashii waya süpüla kottiraain waya namaa na wawalayuukana (paashajeʼera Juan 10:16). Nia Jesuu chi anneetpüʼükai naashin otta na nikirajüinkana naya na anneetkana. Tü anneetkalüirua matüjainsat walakataa, kottüsü otta jaa müsü shiairua nümüin chi anneetpüʼükai. ¿Jameerü pünüiki piʼrüle piamasü anneerü saaʼu wanee uuchi, jee piʼrataarüle piamasü saaʼu wanee nasapüshi jee wanee sümüiwaʼa kaʼyataluʼujee? «Naatawai kamüʼlüinshi», ¿aashin meechin pia sümüin tü anneetkalüirua? Kotteere waya nüchiirua chi anneetpüʼükai, acheküshii woʼunajanain sünain tü outkajawaakat süpüla kottiraain waya namaa na wawalayuukana.

¹⁰ Sükaaliinjain waya tü outkajawaakat süpüla kottiraainjanain jee aijiraainjanain waya (Sal. 133:1). Eeshii wawalayuu aʼleejünaka nutuma nashi, nei jee nawalayuu saaliijee naküjüliin pütchi nüchiki Jeʼwaa. Nüküjapejeʼe Jesuu namüin na makana akuwaʼipa sünain naapeenain nashi namüin, nei, nawalayuu jee naaʼinmajeenain naya süka alin naya nüpüla (Mar. 10:29, 30). Woʼunüle waneepia sünain tü outkajawaakat, atalatalaajeerü naaʼin naya wawalayuukana wamaa, meena waya maʼaka naaʼin wanee nashi namüin, nei, nawalayuu. Jülüjale waaʼin  tia, nnojoleena waya motuuin suulia tü outkajawaakat.

11. ¿Kasa weeʼiyataka nümüin Jeʼwaa woʼunüle sünain tü outkajawaakat?

¹¹ Outkajaashii waya süpüla waʼwaajüin Jeʼwaa jee süpüla waapüin analuʼut nümüin. Süka nukumalain waya Jeʼwaa, waapüinjatü analuʼut nümüin saaʼu tia jee waʼwaajüinjachi nia (paashajeʼera Alateetkat Mapeena 7:12). Waaʼinrüin tia woʼuraajapa nümüin Jeʼwaa sünain tü outkajawaakat, weeʼirajapa nümüin otta waashajaapa süchiki tü naaʼinrakat wapüleerua. Kojutüinjatü wamüin woutkajaain semaanawai sünain aʼwaajaa Jeʼwaa.

12. ¿Jamüsü naaʼin Jeʼwaa sutuma woʼunüin sünain tü outkajawaakat?

¹² Süka nukumalain waya Jeʼwaa, oonooinjana waya sümaa nünüiki. Nuluwataain waya Jeʼwaa sünain woutkajaainjanain weinshi, shialeekajaʼa sülüʼülaain sükalia sajaʼttajatüin kasakat süpüshuaʼa. Miyoʼu maʼin tü talataa eekat suluʼu naaʼin Jeʼwaa woonoole sümaa tia nuluwataakalü anain waya (1 Juan 3:22). Nütüjaa aaʼulu Jeʼwaa tü waaʼinrakat süpüla woʼunüinjanain sünain tü outkajawaakat jee kojutüsü shia nümüinyaʼasa (Heb. 6:10).

13, 14. ¿Jamüshii warütkaaka nünainmüin Jeʼwaa jee nünainmüin Jesuu woʼunüle sünain tü outkajawaakat?

¹³ Outkajaashii waya süpüla warütkaainjanain maʼin nünainmüin Jeʼwaa jee nünainmüin chi Nüchonkai. Ekirajünüshii waya sünain tü outkajawaakat süchiki tü Wiwüliakat jee süchiki tü keeʼireekat naaʼin Jeʼwaa wapüleerua (Is. 30:20, 21). Na wayuu antawaikana sünain tü outkajawaakat, nayaawata aaʼu sünain shiimain nuʼunirüin wakuwaʼipa Jeʼwaa (1 Cor. 14:23-25). Sutuma niain Jeʼwaa oʼunirüin sukuwaʼipa tü outkajawaakat nükajee chi naaʼinkai, nia ekirajaka waya. Woʼunüle sünain tü outkajawaakat, nia waapajaka anüiki Jeʼwaa jee wayaawata aaʼulu sünain alin waya nüpüla. Mayaa, arütkaashii maʼin waya nünainmüin Jeʼwaa.

¹⁴ Nia Jesuu oʼuniraka sukuwaʼipa tü outkajawaakat. Müshinka Jesuu yaa: «Eejeechi taya jümaa jiakana anoujashiikana tanain wanaa sümaa jutkatüin jia [...] jaʼitaina piamashiin je apünüinshiin neʼe jia» (Mat. 18:20). Saashin tü Wiwüliakat, eeshi Jesuu naʼaka na anoujashii outkajaakana (Alat. Map. 1:20–2:1). Nia Jesuu oʼunitka sukuwaʼipa tü outkajawaakat, arütkaashiijeseʼe waya nünainmüin woʼunüle sünain tü outkajawaakat. Watüjaa aaʼu eein Jeʼwaa otta Jesuu wamaa otta natütüleʼerüin waaʼin sünain tü outkajawaakat. ¿Jamüsüche naaʼin Jeʼwaa sutuma niʼrüin tü paaʼinrakat süpüla pürütkaainjachin nünainmüin jee nünainmüin chi Nüchonkai?

15. Püküja kasain weeʼiyatüin nümüin Jeʼwaa woʼunüle sünain tü outkajawaakat.

¹⁵ Outkajaashii waya süka woonoweein sümaa nünüiki Jeʼwaa. Nnojoishi wachiiruaakuʼu müin Jeʼwaa süpüla woʼunüinjanain sünain tü outkajawaakat (Is. 43:23). ¿Jameechika pia kapüleere pümüin oʼunaa sünain tü outkajawaakat sutuma niʼyateʼerüin maʼin pia chi pülaamainkai? «Juutkajaale, achekajeena waya jümüin», «püreeseena jia juutkajaale», namüle na sülaülashiikana mma wamüin, ¿kaseerü  waaʼinraka? ¿Jameena waya müleka nnojoliire woʼunüin sünain tü outkajawaakat süpüleerua aaʼinraa waneeirua kasa? Waneeküinjatü tü waaʼinrajatkat (Aluw. 5:29). Woonoole sümaa nünüiki Jeʼwaa, weeʼiyatüin nümüin sünain alin nia wapüla jee niain waneekaka süpüla nuʼunirüin wakuwaʼipa (Roma 6:17). Talateechi maʼin Jeʼwaa wamaa waaʼinrüle tia (Prov. 27:11).

16, 17. (1) ¿Jamüsü watüjaaka saaʼu kojutüin tü outkajawaakat namüin na anoujashii namaiwajanakana? (2) ¿Jamüsü naaʼin George Gangas sutuma nuʼunawalin sünain tü outkajawaakat?

¹⁶ Süchikijee tü miʼiraa Pentecostés eejatkat soʼu juyakat 33, ayatüshiʼiya na anoujashiikana «waneepia sünain nooʼulaküin tü akuaippaa neʼikakat anain naya na Aluwataaushikana. Ayatshii naya sünain tü aleewajirawaakat» (Aluw. 2:42). Makalaka ayatüin na anoujashiikana sünain noutkajaʼawaliin süpüla naʼwaajüinjachin Jeʼwaa. Mayaainjeʼe müliain maʼin naya natuma na sülaülashiikana Roma otta na nekiipüʼükana na judíokana, ayatüshiʼiya naya outkajaʼawaliin sünain aʼwaajaa chi Maleiwakai.

¹⁷ Maaʼulu yaa, ayatüsia kojutüin wamüin tü outkajawaakat. Jamüshijaʼa chi wawalakai George Gangas talatüshi maʼin nia naashin wanaa sümaa nuutkajaʼawalin namaa na wawalayuukana jee atütülaʼawaisü naaʼin sutuma tia. George Gangas, noʼuluku na Laülaashii Jülüjakana Aaʼin na Aküjüliikana Pütchi sainküin Mma, alatüsü suulia 22 juya sünain niʼyataain namaa. Kamalainpuʼusü maʼin nümüin nüntawalin napülapünaa na wawalayuukana suluʼu tü Piichi Outkajaaleekat ooʼulaka oʼunawaishi nia süchikijee nakoyoluin napüshuaʼa na wawalayuukana. Naashin niakai, talatüsü naaʼin naashajaapa namaa na wawalayuukana sümaa kottiraain nia namaa, müshi naʼakakai aaʼin na kasayuukana nünain naashin. Kamalainpuʼusü maʼin nümüin jutkatüin nia waneepia namaa na wawalayuukana naajüin, müshi suluʼukai naaʼin tü paʼaraiisükat.

18. (1) Püküja jamüin paaʼin sutuma püntawalin sünain tü outkajawaakat. (2) ¿Kasa sükaaliinjaka anain pia ekirajaayakat tüü?

¹⁸ ¿Jama piakai? ¿Müsüche paaʼin maʼaka naaʼin chi wawalakai Gangas puʼunapa sünain tü outkajawaakat? Mülejeʼe shia, ayata puʼunawalin sünain tü outkajawaakat süpüla kottiraain pia namaa na wawalayuukana, jaʼitasü kapüleejeerüin shia pümüin. Piiʼiyata nümüin Jeʼwaa sünain shiimain anain paaʼin puutkajaʼawaipa sünain aʼwaajaa nia maʼaka saaʼin nutuma David (Sal. 26:8).