1, 2. (1) ¿Jamüsü meemataka nakuwaʼipa na wayuu mojulaakana sümaa nukuwaʼipa chi wayuu oʼutünajachikai aaʼin? (Piirakaa sümüin tü ayaakuaakat). (2) ¿Jameerü nanüiki na chainjanakana chaa iipünaa jee na yaainjanakana yaa Mmapaʼa najaʼttinnapa na mojulaashiikana?

EETAALASHI wanee wayuu oʼunüi saaʼin wayuu, ajattünüshi nia natuma waneeinnua waaria suluʼupünaa tü kaatsetkat, müsü nanüiki yaa: «¡Ouktüshi chi makai waraittüin jiʼrüin!». ¿Jamüsü makaʼa nanüiki sümaa nnojoluin ouktüin chi wayuukai? Eeyaai joo ayuuikai naaʼin. Makaʼa nanüiki shia süka nuʼutünajachin aaʼin chi wayuukai, nnojoishi kasakainjachin nia. *

² Tü wayuu mojulaasükalüirua kepiakalü aʼaka waya, alüʼütshii süpüla najaʼlajeʼennüinjanain maʼaka naaʼin chi wayuu oʼutünajachikai aaʼin. Saashin tü Wiwüliakat, yüüʼülaa meena naya (1 Juan 2:17). Eeshiijaʼa wayuu nnojoliikana anain amüin nuʼutünajachin aaʼin chi wayuu mojulaashikai otta eeshii nachajaale sukuwaʼipa süpüla nnojoluin nuʼutünüin aaʼin. Nnojotpejeʼe eein wanee  wayuu aküjüinjatka nümüin Jeʼwaa mojuin tü kasa naaʼinrajatkat naka na wayuu mojulaashiikana, süka jamüin, lotuin süpüshuaʼa tü kasa naaʼinrakat Jeʼwaa, matüjüinsai nia oʼtchejawaa sümaa wanee kasa (Deut. 32:4). Alüʼütshaatasü süpüla sajaʼttinnüinjatüin tü kasa mojusü eekat yaa Mmapaʼa. Kettaapa tia nutuma Jeʼwaa «shiimaintaʼaleejaʼa tü nümakat» mayaa meerü nanüiki na cheenakana chaa iipünaa jee na yaajeenakana yaa Mmapaʼa. ¡Aneerü maʼin süntapa kaʼikat tia!

3. ¿Jara tü pienchisükat kasa sajaʼttirüinjatka Nuluwataaya Maleiwa?

³ Choʼujaʼalaa neʼe palit kaʼi süpüla sajaʼttinnüinjatüin süpüshuaʼa tü kasa mojusü weʼrakat sükaluʼu kaʼi. Tia makalü yaa, shia soʼutku tü pütchi anasükat süchiki Nuluwataaya Maleiwa (Mat. 24:14). Sünain ekirajaayakat tüü, wekirajaweerü anain pienchisü kasa mojusü ajaʼttinnajatka sutuma Nuluwataaya Maleiwa. Anuʼusa shia: tü wayuu mojulaasükalüirua, tü organización aainjakat kasa mojusü, tü mojulawaakat otta tü kasa müliakalü atuma saaʼin wayuu. Wekirajaapa sünain waneʼewai sukua tia, watüjaajeerü aaʼu jamüin müliaka waaʼin sutuma, tü naainjeetkat Jeʼwaa süpüla nunouktüin sukuwaʼipa tia jee kaseerüin niʼitaain süchikumüin.

4. ¿Jamüsü müliaka waaʼin sutuma tü kasa mojusü naainjakat na mojulaashiikana?

⁴ ¿Jamüsü müliaka waaʼin sutuma tü kasa naainjakat na mojulaashiikana? Naashin Pablo, müliainjatü saaʼin wayuu «sülüʼütpa sükalia sajaʼttüinjatüin tü kasakat süpüshua». Mojulaaleeinjatü wayuu maaʼulu naashin (2 Tim. 3:1-5, 13). Maaʼulu yaa, alatüsü tia makalü yaa. Eeshiijaʼa waʼluwajünüinnale sutuma kaʼruwarannuu, müliainnale waya sutuma wayuu eʼrünnüü wayumüin jee walerajünüle. Eeyaai neʼe japüikai saaʼin wayuukalüirua tüü, yüüü. Eetaalashii joo na akaaliinjayaakana wayuu, mojulaapajaʼa naya. Eeshiijaʼa nnojoyüliire weʼrüin wamüliala sutuma wayuu mojulaasü, mojupejeʼe wakuwaʼipa sutuma tü namaʼülakat. ¿Aashin müliain waaʼin sutuma neʼnnüin amüin na laülaacheinkana, na tepichicheinkana jee na wayuu jookana apülaa? Eesü wayuu mojulaaka maʼin, müsü aka saaʼin mürüt jashichi otta yolujaa (Sant. 3:15, TNM). Akalajasaʼa watüjaain saaʼu tü kasa anasü weʼreetkat saashin nünüiki Maleiwa.

5. (1) ¿Kasa eeyütka süpüla naainjain na mojulaashiikana? (2) ¿Kaseerü alataka namüin na wayuu mojulaashii nnojoliikana anoukteʼereein nakuwaʼipa?

⁵ ¿Kasa naainjeetka Jeʼwaa? Nuuʼulaain Jeʼwaa nanoukteʼerüin nakuwaʼipa na wayuu mojulaakana (Isa. 55:7). Nnojoyülia süsalain atumaa na wayuu mojulaakana mayaapejeʼe sülüʼülüin sükalia sajaʼttajatüin kasakat süpüshuaʼa. ¿Kaseerü alataka namüin na wayuu nnojoliikana anoukteʼereein nakuwaʼipa? ¿Kaseerü alataka namüin süntüle naaʼu tü müliaa miyoʼusükat? Najaʼlajeʼerüinjana Jeʼwaa yaa saaʼujee tü Mmakat (paashajeʼera Salmo 37:10). Maaʼulu yaa, wainma na wayuu atüjüinnakana süpüla ounjula süchiki namaʼüla, nnojotsü jaralüin süsalain atuma naya naainjala (Job 21:7, 9). Müsü tü Wiwüliakat: «Niʼrüin Jeʼwaa jamüin nukuwaʼipa wanee wayuu otta niʼrüin tü naainjakat. Nnojoishii süpüla nounjulaain saʼaka piyuushi jee sheemioshi wanee kasa na aainjakana kasa mojusü» (Job 34:21, 22, TNM). Nnojoishi eein wanee wayuu ounjulaaka nuulia Jeʼwaa, niʼrüin Jeʼwaa süpüshuaʼa tü namaʼülakat na mojulaashiikana. Nnojoleena eein wayuukana naainnua süchikijee Armagedón, oʼutüneena aaʼin. Müinnaya nnojoluin weʼrüin nachikuaʼa (Sal. 37:12-15).

6. ¿Jaraliijeena kataka oʼu najaʼttinnapa na mojulaashiikana? ¿Jamüsü anaka tia?

⁶ ¿Jaraliijeena kataka oʼu najaʼttinnapa  na mojulaashiikana? Müsü nünüiki Jeʼwaa: «Na anamiakana namüinjeerü tü mmakat otta shiimain talateenain naya süka jimateerüin naaʼin». Nümaka süchikijee: «Na lotokana akuwaʼipa, nayeena kepiaka saaʼu tü mmakat süpüla kaʼika süpüshuaʼa» (Sal. 37:11, 29, TNM). ¿Jaralii «na anamiakana» otta «na lotokana akuwaʼipa»? Na anamiakana naya na wayuu nnojoliikana yaletüin aaʼin, ekirajaashii naya nünain Jeʼwaa jee oonooshii naya nümaa. Na lotokana akuwaʼipa münüshii nayayaa süka naaʼinrüin tü anakat naashin Jeʼwaa. Maaʼulu yaa, wainmaleeshiʼiya na mojulaashiikana noulia na lotokana akuwaʼipa. Paʼaraiisüpa tü Mmakat, nayeena eeka neʼe na wayuu anamiakana jee na lotokana akuwaʼipa. Nayeena Paʼaraiisüka atuma tü Mmakat.

7. ¿Jamüsü müliaka waaʼin sutuma tü organización aainjakat kasa mojusü?

⁷ ¿Jamüsü müliaka waaʼin sutuma tü organización aainjakat kasa mojusü? Tü kasa mojusü alatakat yaa mmapaʼa nnojotsü nüsirüin neʼe shia waneeshia wayuu, süsit shiaʼaya tü organización aainjakat kasa mojusü. Wainma tü organización emeejakat watta saalii wayuu süka saʼalain maʼaka saaʼin tü iküleesiakalüirua. Aküjüsü alawaa nüchiki Maleiwa, nnojotsü süküjüin tü alatajatkat sümüin tü Mmakat mapeena jee sümüin wayuu. «Nnojo jiʼitaain jaaʼin sünain tü sümakat tü Wiwüliakat» müsü shiaʼayaa. Eesü tü gobierno aʼaküjakat wayuu süpüla noʼutüin saaʼin wayuu naataka eʼiruku. Müliasü saaʼin tü wayuukalüirua sutuma süka jooin naya süpüla. Washirü washirü müsü shiʼipaʼaya, naya anakana sutuma na sümaajanakana jee aapaasü shia nneerü süpüla süküjüin wanee alawaa. Anuutaa joo tü konpainyiia aainjakat kasa mojusü, nnojotsü kasajatüin sümüin sumojujüle tü Mmakat jee tü kasa eekat yaa saaʼu. Saʼalainpalasü wayuu süpüla shiainjatüin neʼe washirüin. Tü organización aainjakat kasa mojusü, shia kasitka tü kasa mojusü alatakat yaa mmapaʼa.

8. ¿Kaseerü alataka sümüin tü organización aainjakat kasa mojusü saashin tü Wiwüliakat?

⁸ ¿Kasa naainjeetka Jeʼwaa? Oʼtteerü tü müliaa miyoʼusükat nashutapa na sülaülashiikana mma saaʼu tü iküleesiairua nnojotkat shiimain. «Tü wayuu maaʼinsatkat maʼi» müsü tü Wiwüliakat süchiki Babilonia tü Miyoʼusükat (Alat. Map. 17:1, 2, 16; 18:1-4). Ajaʼttinneerü tia iküleesiakalüirua süpüshuaʼa. ¿Kaseerü alataka sümüin tü wanee organización mojulaajakalüirua? Tia organizaciónkalüirua müsü aka saaʼin uuchi jee mma pasanainka sünain palaa saashin tü Wiwüliakat (paashajeʼera Alateetkat Mapeena 6:14). Ajaʼttinneena na sülaülashiikana mma jee tü organización eekat maaʼulu müleka nnojorüle naʼyataweein sümüin Nuluwataaya Maleiwa. Alateerü tia sajaʼttiamüin tü müliaa miyoʼusükat (Jer. 25:31-33). Soʼujee tia, nnojoleerü eein wanee organización aainjaka kasa mojusü.

9. ¿Jamüsü watüjaaka saaʼu aneerüin maʼin sukuwaʼipa tü mma jeketkat?

⁹ ¿Kaseerü niʼitaaka Jeʼwaa süchikumüin tü organización aainjaka kasa mojusü? ¿Eejeetche wanee organización yaa Mmapaʼa süchikijee Armagedón? Müsü tü Wiwüliakat: «Eeinjatia wanee jeketü sirumatuʼu jee müsia wanee jeketü mma waʼatapajaka maʼin saaʼujee tü nümatüjütkalia Maleiwa wamüin. Otta müsia aainjüneerü tü kasa anasükat waneepia» (2 Ped. 3:13, TNM). Tü sirumatuʼu laülaakat naya na sülaülashiikana mma aainjakana kasa mojusü. Tü mma laülaakat naya na wayuu naluwataakana aaʼu. ¿Jaraliijeena eʼitaanaka nachikumüin najaʼttinnapa? Shieerü «wanee jeketü sirumatuʼu jee müsia wanee jeketü mma». Tü jeketkat sirumatuʼu shia wanee  aluwataaya jeketü, tia shia tü Nuluwataayakat Maleiwa. Nia aneekünaka Jesuu süpüla aluwatawaa namaa na 144.000 wayuu. Tü jeketkat mma naya na suluwataainjanakana aaʼu tü Nuluwataayakat Maleiwa. Anainjatü maʼin nakuwaʼipa na wayuukana nutuma Jesuu namaa na nuluwataainjanakana amaa. Nuunteerü Jesuu tia namaa na nuluwataainjanakana amaa süka niain nashateechin akuwaʼipa Jeʼwaa, anasü maʼin sukuwaʼipa tü kasakalüirua nutuma (1 Cor. 14:33). Na wayuu aneeküneenakana süpüla noʼunirüin sukuwaʼipa wanee kasa, nayeena na lotokana akuwaʼipa, naaʼinreerü tü nuluwataakalü anain naya Jesuu jee na 144.000 wayuu (Sal. 45:16). Aneetkajasaʼa maʼin tü mmapaʼakat nnojotpa tü organización aainjakat kasa mojusü. Eejeerü neʼe waneesia organización jee nnojoleerü amojujaain sukuwaʼipa.

10. (1) ¿Kasa tü mojusü joutkat maʼin eepünaale kepiain pia? (2) ¿Jamüsü müliaka paaʼin sümaa püpüshi sutuma tü kasa mojusükat?

¹⁰ ¿Jamüsü müliaka waaʼin sutuma tü kasa mojusü eekat maaʼulu? Maaʼulu yaa, joutsü maʼin tü amaʼüjirawaakalü akuwaʼipa, wainma wayuu nnojoliikana lotuin akuwaʼipa otta mojulaakana maʼin. Ojuʼitüsü tia suluʼu telewisoot jee raawia, anayaasü maʼin sukuwaʼipa tia atumawaa. Nnojotpejeʼe anain tia süka nemeeʼerainpalain tü nümakat Jeʼwaa süchiki tü kasa anakat jee tü mojukat (Isa. 5:20). Na kachonshiikana, naaʼinmajüinjana na nachonniikana suulia tia. Maaʼulu yaa, wainma na mojutkana amüin tü nümakat Jeʼwaa, weisalajüinjatü wakuwaʼipa süpüla ayatüin aleewain waya nümaa Jeʼwaa.

11. ¿Kasa shikirajaka anain waya tü naainjakat Jeʼwaa süka Sodoma otta Gomorra?

¹¹ ¿Kasa naainjeetka Jeʼwaa? Soto paaʼin tü kasa naainjakat Jeʼwaa süka Sodoma otta Gomorra (paashajeʼera 2 Pedro 2:6-8). Loto akuwaʼipachi Lot, müliasü maʼin naaʼin sümaa nüpüshi sutuma tü kasa mojusü naainjakat na kepiakana pejepünaa nünain. Najaʼttirüin Jeʼwaa süpüshuaʼa tü wayuu mojulaasükalüirua eejatkat suluʼu tia mmakat. Naainjain Jeʼwaa tia süpüla nayaawajaain naaʼin na wayuu mojulaakana eekana maaʼulu yaa. Najaʼttirüin Jeʼwaa tü akuwaʼipa yarüttüsükat maʼaka saaʼin tü amaʼüjirawaakat akuwaʼipa eejatkat soʼu kaʼikat tia, soʼu palit kaʼi naaʼinreerü tia najaʼttirapa na wayuu mojulaakana.

12. ¿Kasa wayuu paaʼinreeka amüin sajaʼttapa süpüshuaʼa tü kasa mojusükat?

¹² ¿Kaseerü niʼitaaka Jeʼwaa süchikumüin tü kasa mojusü eekat maaʼulu yaa? Wainmeerü kasa anasü waaʼinreetkat suluʼu tü Paʼaraiisükat. Aʼyataajiraajeena waya süpüla Paʼaraiisüin tü Mmakat watuma, akumajeena waya wepia jee nepia na kasakana wanain. Talateerü waaʼin namaa na asoʼiraajeenakana aaʼin jee wekirajeena naya nüchiki Jeʼwaa jee sünain süpüshuaʼa tü kasa anasü naainjakat Jeʼwaa napüleerua na wayuukana napüshuaʼa (Isa. 65:21, 22; Aluw. 24:15). Talateerü maʼin waaʼin sünain aaʼinraa tü waʼyataainkat jee waʼwaajeechi Jeʼwaa sükajee tia.

13. ¿Kasa eeka sutuma tü kasa mojusü alatakat chaa Edén?

¹³ ¿Jamüsü müliaka waaʼin sutuma tü kasa mojusükat? Müliasü maʼin waaʼin sutuma tü mojulawaakat jee tü organización aainjakat kasa mojusü. Müliasü waaʼin wapüshuaʼa sutuma tü atkawaakat, sutuma tü maʼletseekat, tü ayuuliikat otta tü ouktaakat. Makaʼa sülatüin tia shia süka neʼrüliijaain wayumüin nümüin Jeʼwaa wanee wayuuinnua; naya eʼrüliikana wayumüin nia Satanaa, Adán otta Eva.  Müliasü waaʼin sutuma tü kasa mojusü naaʼinrakat.

14. ¿Kasa naainjeetka Jeʼwaa süka tü kasa mojusü müliakalü atuma waaʼin?

¹⁴ ¿Kasa naainjeetka Jeʼwaa? Jülüja paaʼin tü kasa naainjeetkat Jeʼwaa süpüla najaʼttirüin tü kasa mojusü müliakalü atuma waaʼin. Najaʼttireerü tü atkawaakat (paashajeʼera Salmo 46:8, 9). Najaʼttireerü tü ayuuliikat (Isa. 33:24). Ajaʼlajaajeerü tü ouktaakat nutuma (Isa. 25:8). Najaʼttireerü tü maʼletseekat (Sal. 72:12-16). Najaʼttireerü süpüshuaʼa tü kasa mojukalü atuma waaʼin. Jee najaʼttireerü nümaʼüla Satanaa namaa na yolujaakana (Éf. 2:2).

15. ¿Kasa nnojoleetka süchikijee Armagedón?

¹⁵ Aneetkajasaʼa maʼin paashin nnojotpa atkawaa, ayuulii jee ouktaa. Nnojoleerü choʼujaain surulaat, katkousü, estatua süpüla sotuinjanain aaʼinyüü na ouktüinnakana sünain atkawaa. Nnojoleerü choʼujaain pitaat, tottoot, perümeera, morgue jee amuuyuu. Nnojoleerü choʼujaain pulusiia süka nnojoleerüin kaʼruwarannuu, nnojoleerü alarma. Eesüjaʼa nnojoleerüle sütürankajia puettoʼu jee yaawe. Ajaʼtteerü süpüshuaʼa tü shapaakalü atuma waaʼin.

16, 17. (1) ¿Jameetche naaʼin na wayuu kateenakana oʼu süchikijee Armagedón? Püküja wanee shiyaawase. (2) ¿Kasa waaʼinrüinjatka süpüla nnojoluin wajaʼttinnüin namaa na mojulaashiikana?

¹⁶ ¿Jameerü waaʼin nnojotpa tü kasa mojusü müliakalü atuma waaʼin? Kapüleesü süpüla watüjaain saaʼu tü kasa anasü weʼreetkat mapa. Nnojotsü waponojokai saaʼin tü müliaa weʼrakat maaʼulu yaa süka kiʼrainnain waya sümaa. Jamüshiijaʼa na wayuu kepiakana süʼütpaʼa süshaʼwajüle türein, nnojotsü kekeʼerain namüin shiʼira tü türeinkat süka kiʼrainnain naya sünain naapüin tia. Eeshii na kepiakana peje sünain eere sojotünüin tü wasuurakat, meejuuitpa namüin süka kiʼrainnain naya sünain. Süsünneʼennüle noulia tia kekeʼerakat jee tia jawaikat eejuu, anashaateerü naaʼin. Meeria neʼe wakuwaʼipa, aneena maʼin waya najaʼttirapa Jeʼwaa süpüshuaʼa tü kasa müliakalü atuma waaʼin.

¹⁷ Wainma kasa shapaaka atuma waaʼin, ¿kaseetche anaka atuma shia? Saashin Salmo 37:11, jimateerü waaʼin mapa. Talatüsü waaʼin süka shiain naaʼinreerüin Jeʼwaa tia wapüleerua, ¿aashi müin? Maaʼulu yaa, eesia tü shapaakalü atuma waaʼin, ayatüinjanapejeʼe waya pejein nünain Jeʼwaa jee sünain tü nupueulosekat. Ayataʼaya ichein waya süchiirua tü kasa anasü waʼatapajakat, jülüja waaʼin shia weinshi. Waʼatapaja shia jee waashajaa süchiki tia namaa na wayuukana (1 Tim. 4:15, 16; 1 Ped. 3:15). Kacheʼere waya sümüin tia, nnojoleena waya ajaʼttinnüin namaa na mojulaashiikana otta aneerü wakuwaʼipa süpüla kaʼikat süpüshuaʼa.