1, 2. ¿Kasa shapaaka atuma naaʼin Jesuu?

SOʼU tü kaʼi outajachikalü oʼu Jesuu, shapaasü maʼin naaʼin sutuma nütüjaain saaʼu nülüʼülüin süpüla müliainjachin nia jee nuʼutunajachin aaʼin natuma na nüʼünüükana. Eepejeʼe wanee kasa naaʼinreeka amüin. Sutuma alin nüpüla chi Nüshikai, naaʼinreein tü kasa talatakalü atuma naaʼin. Nütüjaa aaʼu kojuteechin Jeʼwaa atumawaa waneepiale nia nümaa jaʼitashi eʼrüin nia müliaa. Jee müsia, aishii waya nüpüla otta nütüjaa aaʼu kateerüin woʼu waneepiale nia nümaa Maleiwa outaleepa nia.

² Anasü naaʼin Jesuu mayaainjeʼe shapaain maʼin naaʼin. Anuu nünüiki palaa namüin na nikirajüinkana: «[Taapeerü] wane anaa jümüin» (Juan 14:27). Anasü naaʼin maʼaka naaʼin wanee wayuu aleewakai nümaa Maleiwa. Jutatüsü naaʼin Jesuu suulia shapawaa aaʼin jee anasü naaʼin (Filip. 4:6, 7).

3. ¿Kasa wekirajaainjatka anain sünain ekirajaayakat tüü?

³ Shiimainsaʼaya nnojoleenain müliain maʼin waya maʼaka naaʼin Jesuu. Eʼreenapejeʼe waya müliaa (Mat. 16:24, 25; Juan 15:20). Eesüjaʼa shapaajeerüle waaʼin soʼunnaa tü alateetkat wamüin maʼaka shapaain naaʼin Jesuu. ¿Kasa waaʼinrüinjatka süpüla nnojoluinjatüin shapaain maʼin waaʼin? Wekirajaa sünain apünüinsü kasa naainjaka Jesuu soʼu nüküjain pütchi otta tü waaʼinrüinjatkat süpüla washatüin nukuwaʼipa weʼrüle müliaa.

4. Sünainjee tü sümakat 1 Tesalónica 5:17, ¿jamüsü watüjaaka saaʼu nuʼuraajüin maʼin Jesuu soʼu tü kaʼi naapajiraakalü oʼu nikii?

⁴ (Paashajeʼera 1 Tesalónica 5:17). Kojuyatua nuʼuraajüin Jesuu soʼu tü kaʼi naapajiraakalü oʼu nikii. Wanaa sümaa nüküjain namüin na nikirajüinkana sotuinjachin nia naaʼin outapa nia, oʼuraajüshi nia süpülapünaa nülatirüin tü pankat jee süpülapünaa nülatirüin tü wiinokot (1 Cor. 11:23-25). Jee müsia, süpülapünaa noʼunüin suluʼujee tü miichi nekaakalü aluʼu tü Pascuakat, oʼuraajüshi nia (Juan 17:1-26). Nantapa chaa Getsemanímüin, kojuyatua nuʼuraajüin (Mat. 26:36-39, 42, 44). Jaʼitakajeʼe sumotsojunapa naaʼin, oʼuraajüshi nia nümüin chi Nüshikai (Luc. 23:46). Oʼuraajüshi Jesuu nümüin Jeʼwaa soʼu tü kaʼi müliakalü oʼu nia.

5. ¿Jamüsü nnojotka eejüin naaʼin na aluwataaushiikana?

⁵ Nüchecherüin naaʼin Jesuu soʼunnaa niʼrüin müliaa süka nuchuntuin kaalinwaa nümüin chi Nüshikai. Eekajasaʼa na aluwataaushiikana nnojotsü eejüin naaʼin, atunkajüshii neʼe jee nnojoishii oʼuraajüin soʼu aikat tia (Mat. 26:40, 41, 43, 45, 56). ¿Kasa watüjaka sünainjee tia? Waneepieena waya nümaa Jeʼwaa woʼuraajüle maʼaka naaʼinrüin shia Jesuu. ¿Kasa wachuntajatka?

6. ¿Jamüsü aneetka waaʼin kooʼomüinre wanoula?

⁶ Eesü süpüla wachuntuin nümüin Jeʼwaa kooʼomüin sütsüin wanoula (Luc. 17:5; Juan 14:1). Choʼujaasü wamüin tia süka nuuʼulakeerüin waaʼin Satanaa (Luc. 22:31). ¿Jamüsü aneetka waaʼin kooʼomüinre wanoula jaʼitasü wainmain tü kasa alatakat wamüin? Süchikijee wachajaain  sukuwaʼipa süpüla walatüin süchikumüin, weʼitaajeerü shia najapuluʼu Jeʼwaa süka watüjaain saaʼu nükaalinjeenain waya sünain tü alatakat wamüin (1 Ped. 5:6, 7).

7. ¿Kasa watüjaka sünainjee tü nümakat Robert?

⁷ Jaʼitairü kasain alatüin wamüin, aneerü waaʼin woʼuraajüle nümüin Jeʼwaa. Anuu tü naainjakat Robert, wanee laülaashi, alatüirü suulia 80 nuuyase. Anuu nünüiki süchiki tü naaʼinrakat süpüla anain naaʼin: «Eejiraashi taya sümaa tü kasa alatakat tamüin sutuma tü sümakat Filipos 4:6, 7. Choʼujaʼawaisü nneerü tamüin jee nnojoipünaashi laülaashin taya suluʼu tü outkajaaleekat». Anuu sooʼomüin nünüiki: «Oʼuraajüshi taya nümüin Maleiwa wanaa sümaa shapaain taaʼin. Sutuma toʼuraajüin waneepia nümüin, anasü taaʼin».

8. Saashin tü sümakat Juan 8:29, ¿kasa amaa anaka atuma naaʼin Jesuu?

⁸ (Paashajeʼera Juan 8:29). Nnojotsü shapaain naaʼin Jesuu soʼu nüpüleeruaanüin aaʼin. ¿Jamüsü nnojotka shapaain naaʼin? Nütüjaa aaʼu talatüin naaʼin chi Nüshikai süka nüchecherüin naaʼin. Oonooshi nia waneepia sümaa nünüiki Jeʼwaa, jaʼitashi eʼrüin nia müliaa. Naaʼinmaasü tü aʼyatawaakat waneepia nümüin Jeʼwaa süka alin nia nüpüla. Süpülapünaa nüntüin yaa saaʼumüin tü Mmakat, aʼyataajiraashi nia nümaa Maleiwa (Prov. 8:30). Nüntapa yaamüin, nikiraja anainrü waneepia tü shiimainkat nüchiki chi Nüshikai (Mat. 6:9; Juan 5:17). Talatüsü  maʼin naaʼin sutuma naaʼinrüin tia (Juan 4:34-36).

9. ¿Jamüsü aneetka waaʼin waaʼinmaale tü aküjaakat pütchi?

⁹ Woonoole sümaa nünüiki Jeʼwaa jee waʼyataale waneepia nümüin, washatüin nukuwaʼipa Jesuu (1 Cor. 15:58). Naaʼinmaale waneepia aküjaa pütchi wanee anoujashi, nnojoleerü shapaain maʼin naaʼin sutuma tü alatakat nümüin (Aluw. 18:5). Wainmaleʼeya tü kasa shapaakalü atuma naaʼin na wayuu waküjakana amüin pütchi woulialeʼeya wayakana. Shiasaʼa aipa Jeʼwaa napüla jee noonoopa sümaa nünüiki, anoutaasü nakuwaʼipa jee talatüsü naaʼin. Weʼrapa müin nakuwaʼipa na wayuukana, weʼitaain waaʼin sünain naaʼinmajeenain waya Jeʼwaa. Anasü waaʼin sutuma tia. Eesü wanee wawala mojuwaika aaʼin waneepia jee nnojotsü kasain anain apüla shia saaʼin sümüin, anuu sünüiki: «Sutuma taaʼinmaain tü aküjaakat pütchi, tachecherüin taaʼin suulia mojuin taaʼin jee talatüsü taaʼin. Sutuma taküjain maʼin pütchi, aleewasü maʼin taya nümaa Jeʼwaa».

10. ¿Kasa watüjaka sünainjee tü sümakat Brenda?

¹⁰ Waashajaa süchiki tü alatakat sümüin tü wawalakat Brenda. Ayuuisü shia sümaa tü süchonkat, esclerosis múltiple sünülia tü ayuulii nanainkat. Tü wawalakat, saaʼusü shia silla de ruedas jee maʼlainsat saaʼin. Nnojorüle mayein maʼin saaʼin, ojuʼitawaisü sünain aküjaa pütchi sainküin miichi jee tü saainjakat maʼin shia süshajüin karaloʼuta sümüin wayuu süpüla süküjain pütchi. Anuu sünüiki: «Tatüjaa aaʼu mepin maaʼulu tü ayuulii tanainkat, müsüjeseʼe taaʼinmaain maʼin tü aküjaakat pütchi. Motusü taaʼin tü alatakat tamüin sutuma taaʼinmaain tia. Shia jülüjaka taaʼin takaalinjain na wayuu taküjakana amüin pütchi. Sotusü taaʼin waneepia aneerüin taya nutuma Jeʼwaa».

11-13. (1) ¿Kasa naaʼinraka nüpüleerua Jesuu na nikirajüinkana otta waneinnua naʼaleewainyuu? (2) ¿Jamüsü naaʼin Jesuu sutuma tü naaʼinrakat na nikirajüinkana?

¹¹ Wainma tü kasa alatakat nümüin Jesuu soʼu nüküjain pütchi. Nakaalinjapejeʼe nia na nikirajüinkana, naaʼinrüin tü sümakat Proverbios 18:24, tü makat: «Eeshi chi wayuu aikai maʼin apüla naʼaleewain nuulialeʼeya wanee nuwala». Kojutushii maʼin naya nümüin Jesuu. Soʼunnaa niʼyataain nümüin Maleiwa, nnojoishii na nuwalayuukana anoujain nünain (Juan 7:3-5). «Maaʼinkai cheje aaʼin nia», müshii na nüpüshikana nümüin (Mar. 3:21). Nnojotpejeʼe müin nakuwaʼipa na nikirajüinkana, naashin Jesuu nnojoishi nia nayüülajüin soʼunnaa tü müliaa niʼrakat (Luc. 22:28).

¹² Eeshii naainjale kasa mojuka atuma naaʼin Jesuu. Nnojotpejeʼe jülüjain naaʼin Jesuu tü kasa mojukat natuma, shia jülüjaka naaʼin kanoulain naya nünain (Mat. 26:40; Mar. 10:13, 14; Juan 6:66-69). Anuu nünüiki namüin soʼu tü ai outajachikalü oʼu nia: «‹Tatünajut› tamüshii jia süka taküjüin jümüin süpüshua tü aküjünakat tamüin nütüma chi Tashikai» (Juan 15:15). Atütüleʼennüsü naaʼin Jesuu natuma na naʼaleewainkana. Talatüsü naaʼin sutuma nükaalinjünüin natuma (Luc. 10:17, 21).

¹³ Eeshiʼiya waneinnua naʼaleewainyuu Jesuu akaalinjaka nia sünain aküjaa pütchi jee sünain waneirua kasa. Nounejaʼawalin nia nepialuʼu sünain ekawaa namaa (Luc. 10:38-42; Juan 12:1, 2).  Eeshii na oʼunakana nümaa jee akaalinjakana nia sünain wanee kasa eekai choʼujaain nümüin (Luc. 8:3). Akaalinjünüshi Jesuu natuma na naʼaleewainyuukana süka natüjaain saaʼu nükaalinjeenain naya. Nükaalinjain Jesuu naya jee nnojotsü nuchuntuin namüin kasa eekai kapüleein. Kojutusü nümüin Jesuu nükaalinjünüin natuma na nikirajüinkana mayaainjeʼe pülashin nia. Anasü naaʼin sutuma nükaalinjünüin.

14, 15. (1) ¿Kasa waaʼinrüinjatka napüleerua na waʼaleewainkana? (2) ¿Kaseerü naaʼinraka süpüla nakaalinjain waya?

¹⁴ Waneepieena waya nümaa Jeʼwaa sutuma nakaalinjain waya na waʼaleewainkana. Aaʼinrüinjana waya kasa anasü napüleerua süpüla nakaalinjain waya (Mat. 7:12). Saashin tü Wiwüliakat wamüliajüinjana na waneinnua, nayaleekajaʼa na eʼrakana choʼujawaa (Éf. 4:28). Eeshii süpüla wakaalinjain na wawalayuu ayuuikana jee na laülaayuukana. Saaʼu isaitpain nachiki ayaʼlajaa wanee kasa, eesü süpüla wayaʼlajüin tia namüin otta wasülajüin eküülü namüin na eʼrakana müliaa. Watüjale süpüleerua jw.org^® otta JW Library^® wekiraja naya sünain jamüinjatüin sukuwaʼipa natuma. Talateerü waaʼin waaʼinmaale wakaalinjain na waneinnua (Aluw. 20:35).

¹⁵ Na waneekakana süpüla waʼaleewain, nakaalinjeena waya soʼunnaa tü alatakat wamüin otta aneerü waaʼin natuma. Naapajeerü wanüiki waküjapa namüin tü alatakat wamüin maʼaka naapajüin Elihú nünüiki Job (Job 32:4). Nnojoliipejeʼe nayainjanain aneeküin tü waaʼinrüinjatkat,  shieerü jülüjaka waaʼin tü pütchi naküjakat wamüin suluʼujee tü Wiwüliakat (Prov. 15:22). Weʼrüle müliaa, waaʼinra tü naaʼinrakat David, nnojotsü niyoutuin tü aapünakat nümüin natuma na naʼaleewainyuukana (2 Sam. 17:27-29). Nükaalinjain waya Jeʼwaa nakajee na waʼaleewainkana (Sant. 1:17).

16. (1) Saashin Filipos 4:6, 7, ¿jarai chi anainjachikai akajee waaʼin naashin Jeʼwaa? (2) ¿Jamüsü anainjatka waaʼin nükajee?

¹⁶ (Paashajeʼera Filipos 4:6, 7). ¿Jamüsü aneetka waaʼin nükajee neʼe Jesuu naashin Jeʼwaa? Süpüla anainjatüin waaʼin waneepia, watüjaainjatü aaʼu niain aneekünüin Jesuu nutuma Maleiwa süpüla shikeraajüin tü keeʼireekat naaʼin otta weʼitaainjatü waaʼin nünain. Amülialaajeerü waaʼin watüjaale saaʼu motuin naaʼin Maleiwa waainjala saaʼujee naapajiraain nikii Jesuu (1 Juan 2:12). Aneerü waaʼin watüjaale saaʼu Nuluwataainjachin Jesuu nutuma Maleiwa jee nunouteʼerüinjatüin tü kasa mojusü naainjakat wamüin Satanaa namaa na nümaajanakana (Is. 65:17; 1 Juan 3:8; Alat. Map. 21:3, 4). Jee meimmoluinsalii waya sutuma watüjaain saaʼu nükaalinjain waya Jesuu sünain tü aʼyatawaa naapakat wamüin (Mat. 28:19, 20). ¿Aashin anain waaʼin sutuma sümüliannüin waaʼin, eein tü waʼatapajakat otta meimmoluin waya?

17. (1) ¿Kasa naaʼinrüinjatka wanee anoujashi süpüla anain naaʼin? (2) Saashin Juan 16:33, ¿kaseerü walataka achikumüin?

¹⁷ ¿Kasa waaʼinrüinjatka süpüla anain waaʼin weʼrüle müliaa? Washatüinjatü nukuwaʼipa Jesuu. Tü palajatkat kasa waaʼinrüinjatka shia woʼuraajüin waneepia. Tü piamakat kasa shia woonooin sümaa nünüiki Jeʼwaa jee waaʼinmaain tü aküjaakat pütchi, jaʼitashii müliain waya. Otta tü apünüinkat shia nnojoluin wayoutuin tü aapünakat wamüin natuma na waʼaleewainyuukana. Müle shia watuma, aneerü waaʼin sutuma tü anaa naapakat wamüin Maleiwa. Jee müsia, alateena waya süchikumüin müliaa maʼaka nülatüin Jesuu (paashajeʼera Juan 16:33, TNM).