1. (1) Wayakana aʼyataashiikana nümüin Maleiwa, ¿kasa tü wekeraajeekalü amüin? (2) ¿Jamüsü wekeraajüinjatka shia? (Piirakaa sümüin tü ayaakuaa sünainkat süta tü rewiisütakat).

NAASHIN Jesukürisüto, oʼunajana na nikirajüinkana sünain ekirajaa wayuu (Mat. 28:19). Wayakana aʼyataashiikana nümüin Maleiwa, wekeraajeein maʼin tü aʼyatawaa eʼitaanakat wajapuluʼu (2 Tim. 4:5). Wekeraajüinjatü shia süka shiain wanee kasa kojutuka maʼin jee choʼujaaka maʼin süpüla waaʼinrüin. Eepejeʼe kapüleere wamüin waaʼinmaain shia.

2. ¿Kasa kapüleeka atuma wekeraajüin tü waʼyataainkat nümüin Maleiwa?

² Eesü waneirua kasa kapüleeka atuma wekeraajüin tü waʼyataainkat nümüin Maleiwa. Eeshiijaʼa waʼyataale maʼin süpüleerua waapüin tü choʼujaakat sümüin wapüshi, eeshijaʼa waaʼinmajüle wapüshi eekai ayuulin, mojule waaʼin jee laülaale waya. Müle wakuwaʼipa, ¿kasa waaʼinrüinjatka süpüla wekeraajüin tü aʼyatawaa eʼitaanakat wajapuluʼu mayaainjeʼe sülatüin wamüin tia?

3. ¿Kasa nüküjeeka achiki Jesuu süka tü pütchi suluʼukat Mateo 13:23?

³ Nnojotsü mojuinjatüin waaʼin paliʼirüle tü oora waʼyataakalü oʼu nümüin Jeʼwaa. Nütüjaatüjülia aaʼu Jesuu nnojoleerüin wanaawain tü waʼyataainkat namaa na waneinnua (paashajeʼera Mateo 13:23). Kojutusü nümüin Jeʼwaa wachajaale sukuwaʼipa süpüla waʼyataain nümüin süka süpüshuaʼa waaʼin (Heb. 6:10-12). Eesüjaʼa jülüjale waaʼin wainkeerüin kooʼomüin waʼyataain nümüin Jeʼwaa. Wekirajaa sünain tü waaʼinrüinjatkat süpüla kojutuinjatüin wamüin tü waʼyataainkat nümüin  Jeʼwaa, nnojoluinjatüin kachiiruain waaʼin wainma kasa otta süpüla watüjainjanain aküjaa pütchi jee ekirajaa. Süpülapünaa tia, wekirajaa sünain kasain waaʼinrüinjatüin süpüla wekeraajüin tü waʼyataainkat nümüin Maleiwa.

4. ¿Kasa waaʼinraka shiimainre wekeraajüin tü waʼyataainkat nümüin Maleiwa?

⁴ Tü waaʼinrakat shiimainre wekeraajüin tü waʼyataainkat nümüin Maleiwa, shia wachajaain sukuwaʼipa süpüla waküjain pütchi otta wekirajüin wayuu. Nnojotsü shiain neʼe kojutuin nümüin Jeʼwaa tü oora walatirakat sünain aküjaa pütchi. Shia kojutuka maʼin nümüin waküjale pütchi süka alin nia wapüla, alin wapüla wayuu otta waʼyataain nümüin süka süpüshuaʼa waaʼin * (Mar. 12:30, 31; Col. 3:23). Süpüla waaʼinrüin tia, aʼyataainjana waya sünain süka süpüshuaʼa waaʼin. Kojutule wamüin tü aküjaakat pütchi, wachajaajeerü sukuwaʼipa süpüla waküjain pütchi sümüin wainma wayuu.

5, 6. ¿Kasa maka aka saaʼin wakuwaʼipa kamalainre wamüin aküjaa pütchi mayaainjeʼe kapüleein shia wamüin?

⁵ Tü wakuwaʼipakat sünain aküjaa pütchi müsü aka saaʼin nukuwaʼipa wanee wayuu kamalainkai maʼin amüin ekirajaa. Ekirajawaishi nia wayuu süpütaale kaʼi nüpüla. Shiasaʼa mapa, ekirajüshi nia suluʼu wanee koleejia saawanoʼu jee rimiinkoʼu. Nnojotpejeʼe kettaain tü nükanainkat sümaa tü kasa choʼujaakat nümüin. Niʼyataaka sünain oikawaa eküülü luunoʼu sünainmüin piennoʼu. Mayaainjeʼe niʼyataain waneepia sünain oikawaa eküülü, shia kamalainka maʼin nümüin ekirajaa. Atüjeeshi maʼin nia ekirajaa otta ekirajeeshi nia waneepia. Makalaka nikirajawalin wayuu, jaʼitairü motsomüin shia nutuma.

⁶ Mayaainjeʼe kamalain maʼin wamüin aküjaa pütchi, eeshii nnojorüle waküjain maʼin pütchi süka kapüleein shia wamüin. Süka kojutuin wamüin aküjaa pütchi, wachajaain sukuwaʼipa süpüla sujutuuinjatüin suluʼumüin saaʼin wayuu nünüiki Maleiwa. Sutuma wainmain tü kasa waʼyataakalü anain, eesü jülüjale waaʼin kasain waaʼinrüinjatüin süpüla kojutuinjatüin wamüin tü aküjaakat pütchi.

7, 8. ¿Kasa waaʼinrüinjatka süpüla washatüin nukuwaʼipa Jesuu?

⁷ Anasü maʼin süpüla washatüin tü naaʼinrakat Jesuu sünain aküjaa pütchi. Tü kojutukat maʼin nümüin shia aküjaa pütchi süchiki Nuluwataaya Maleiwa (Juan 4:34, 35). Watta nukua süpüla nüküjain pütchi sümüin wainma wayuu. Nüchajaain sukuwaʼipa süpüla nüküjain pütchi sainküin miichi jee eepünaale nia. Shia alanaʼaleeka sujutü nümüin Jesuu tü niʼyataainkat nümüin Maleiwa.

⁸ Wachajaain sukuwaʼipa süpüla waküjain pütchi eepünaale waya maʼaka naaʼinrüin shia Jesuu. Wainma kasa wooʼulaaka süpüleerua aküjaa tia pütchikat (Mar. 6:31-34; 1 Ped. 2:21). Eeshii wawalayuu eekana pürekutsoolüin pesiaat, rekulaat jee aaʼusiliaat. Eeshii waneinnua ekirajaakana sünain anüikii naatajatü jee okolojookana eere choʼujaain aküjalii pütchi. Eeshii waneinnua wawalayuu achajaakana maʼin sukuwaʼipa süpüla naküjain pütchi, mayaainjeʼe kapüleein shia namüin. Jaʼitairü jetsüin tü waʼyataainkat nümüin Jeʼwaa, nnojotsü nuchuntuin wamüin wanee kasa iseetka wachiki. Nücheküin wapüleerua talatüin waaʼin sünain aküjaa tü pütchi anasükat (1 Tim. 1:11, TNM; Deut. 30:11).

9. (1) ¿Jamüsü watüjaaka saaʼu kojutuin maʼin nümüin Pablo tü aküjaakat pütchi mayaainjeʼe niʼyataain? (2) ¿Kasa süküjaka Aluwataaushikana 28:16, 30, 31 süchiki tü naaʼinrakat Pablo sünain aküjaa pütchi?

⁹ Eesü süpüla washatüin nukuwaʼipa chi aluwataaushikai Pablo. Soʼu chajachin nia Corinto, aʼyataashi nia sünain aainjaa loona süka palitchoin nneerü eejatka nümaʼana. Nnojotpejeʼe shiawalain naaʼinmaain maʼin tia. Naaʼinrüin tia suulia nikeʼejüin saaʼin wayuu süchiirua tü niküinjatkat jee süpüla nüküjain pütchi namüin na chajanakana Corinto (2 Cor. 11:7). Mayaainjeʼe niʼyataain, kojutusü maʼin nümüin tü aküjaakat pütchi jee naaʼinrawalin tia saawanoʼu. Taashipa nukuwaʼipa Pablo suulia tü niʼyataainkat, oʼttüshi nia «sünain aküjaa waneepia süchikü tü nünüikükat Maleiwa. Nüküjain sümüin tü judíokalüirua tü nütüjaakat aaʼu nooʼopünaa Jesús sünain niain chi Nüneekajalakai Maleiwa» (Aluw. 18:3-5; 2 Cor. 11:8, 9). Shiasaʼa mapa, soʼu püreesain nia piama juya chaa Roma, aküjashi pütchi namüin na awaraijaakana naaʼu jee ashajüshi nia karaloʼuta (paashajeʼera Aluwataaushikana 28:16, 30, 31). Shia naaʼinmaaka maʼin Pablo niʼyataain waneepia nümüin Maleiwa. Naashin niakai nüneeküin nia Maleiwa süpüla nüküjain pütchi jee nnojolinjachi nia ooʼulaain suulia aʼyatawaa nümüin (2 Cor. 4:1). Mayaainjeʼe waʼyataain, eesü süpüla kojutuin wamüin tü aküjaakat pütchi maʼaka naaʼinrüin shia chi aluwataaushikai Pablo.

10, 11. ¿Kasa waaʼinrüinjatka süpüla wekeraajüin tü waʼyataainkat nümüin Maleiwa ayuuire waya?

¹⁰ ¿Kasa eeka süpüla waaʼinrüin kapüleere wamüin aküjaa pütchi sainküin miichi sutuma laülaain jee ayuulin waya? Eesü süpüla waaʼinrüin waneirua kasa. Na anoujashii eejanakana nükalioʼu Jesuu, najayatüin naküjain pütchi eepünaale eein wayuu, sainküin miichi, metkaaraluʼu jee eepünaale naya (Aluw. 17:17; 20:20). ¿Jama isale wachiki waraittaa? Eeshii süpüla waküjain pütchi eere sülatüin wainma wayuu. Eeshii süpüla waküjain pütchi süka teleepono, süka karaloʼuta jee waküjain pütchi jalapünaale waya. Wainma wawalayuu aaʼinrakana tia mayaainjeʼe ayuulin naya otta talatüsü naaʼin sutuma naaʼinrüin tia.

¹¹ Jaʼitaina ayuulin waya, eeshii süpüla wekeraajüin tü waʼyataainkat nümüin Maleiwa. Anuu nünüiki chi aluwataaushikai Pablo: «Nüneeküin taya chi Maleiwakai süpüla niiʼiyatüin sünain nükajeejatüin niakai nümüiwa tü yalayalaakat, süka nütüjaain saaʼu takuaippa sünain  matsüin taaʼin tamüiwa. Nia alanaʼaleeka sünain pülain nümüiwa» (2 Cor. 4:7). Yalayalasü naaʼin Pablo nutuma Maleiwa soʼu ayuulin nia. Anuu nünüiki namüin na chajanakana Galacia: «Soto jaaʼin wanaa sümaa tantüin jaʼakamüin palajana paala. Mayaainje tantüin sümaa ayuulii jaʼakamüin, ayatshia taya aküjüin nüchiki chi Oʼtteʼerüikai jümüin» (Gal. 4:13). Eesü süpüla waaʼinrüin tia, waküjain pütchi namüin na tottootkana, na perümeerakana otta na aʼyataakana eere weʼrajeʼerüin. Eeshii nnojoliire wapüla naya wayuukana soʼu waküjain pütchi nepialuʼu.

12. «Müleka anale tü woʼukot», ¿kasa aküjüneeka sükajee tia pütchikat?

¹² «Otta tü woʼukot, müsü aka saaʼin suwarala luusa, süka weʼrüin tü kasa wapuleeruakat sütüma. Müleka anale tü woʼukot, weʼrüin tü kasakat süpüshua sütüma», müshi Jesuu (Mat. 6:22). ¿Kasa nüküjeeka sükajee tia pütchikat? Nnojoluinjatüin kachiiruain waaʼin wainma kasa otta waneesüinjatüin neʼe tü kasa waaʼinmaainjatkat. Naaʼinrüin tia Jesuu wapüleerua, shia naaʼinmaaka maʼin aküjaa pütchi jee nüküjain namüin na nikirajüinkana shiainjatüin naaʼinmaain maʼin tü aʼyatawaakat nümüin Jeʼwaa jee naküjain pütchi süchiki tü Nuluwataayakat. Washateerü nukuwaʼipa Jesuu waaʼinmaale waneepia «tü nuluwataayakat Maleiwa otta tü lotookalü akuwaʼipaa» (Mat. 6:33, TNM).

13. ¿Kasa waaʼinrüinjatka süpüla waaʼinmaain tü aküjaakat pütchi?

¹³ Wanee sukuwaʼipa süpüla waaʼinmaain tü waʼyataainkat nümüin Maleiwa shia nnojorüle kachiiruain waaʼin wainma kasa, wakaalinjüle na wayuukana süpüla neʼraajüin jee alin Jeʼwaa  napüla. * Süpüla waküjain pütchi semaanawai, eesü süpüla waneeküin jaralüin tü kaʼi waʼyataainjatkalü oʼu, wooʼulaain suulia waneepiain waya sünain ashaitaa otta anajaa waneirua kasa.

14. ¿Kasa naainjaka wanee wawala sümaa nuʼwayuuse süpüla kooʼomüin naʼyataain sünain aküjaa pütchi?

¹⁴ Anuu tü naainjakat Elías sümaa nuʼwayuuse, laülaashi nia suluʼu tü outkajaaleekat. Anuu nünüiki: «Nnojoishii süpüla pürekutsooliinjanain waya, wachajaaka sukuwaʼipa süpüla kooʼomüin waʼyataain sünain aküjaa pütchi. Nnojotsü wainmain tü nneerü wakataajakat, wooʼulaain suulia waneepiain waya sünain ashaitaa, anajaa waneirua kasa jee wachuntuin nümüin chi walaamainkai niiʼiratüin tü kaʼi waʼyataakalü oʼu. Sutuma tia, ojuʼitüshii waya sünain aküjaa pütchi aliikawai, ekirajaa wayuu otta ojuʼitüinapa waya piama kaʼi sooʼomüin semaanawai. Talatashaatasü maʼin waaʼin».

15, 16. Sünainjee tü sümakat 1 Timoteo 4:13, 15, ¿kasa waaʼinrüinjatka süpüla watüjain aküjaa pütchi jee ekirajaa wayuu? (Paashajeʼera tü pütchikat  «Waaʼinrajatka süpüla wekeraajüin waʼyataain nümüin Maleiwa»).

¹⁵ Wanee sukuwaʼipa süpüla wekeraajüin tü waʼyataainkat nümüin Maleiwa shia wekirajaain süpüla watüjainjanain ekirajaa. Wanee wayuu eekai niʼyataain, achuntünüsü nümüin nikirajaainjachin süpüla kooʼomüinjatüin tü nütüjaakalü aaʼu jee tü nütüjakalü apüleerua. Müinjatia wakuwaʼipa süpüla watüjainjanain ekirajaa wayuu (Prov. 1:5; paashajeʼera 1 Timoteo 4:13, 15).

¹⁶ ¿Kasa waaʼinrüinjatka süpüla wountüin tia? Jülüjainjatü maʼin waaʼin tü ekirajünakalü anain waya sünain tü outkajawaakat Wakuwaʼipa  otta Waʼyataain nümüin Maleiwa. Ekirajünüshii waya sünain tia outkajawaakat süpüla watüjainjanain maʼin aküjaa pütchi. Wanaa sümaa nüküjain chi shikiipüʼükai tü outkajawaakat tü naaʼinrüinjatkat na ekirajakana, jülüja waaʼin tü münakat namüin. Shiasaʼa waküjapa pütchi sümüin wayuu waaʼinra tia münakat. Wanee kasa eeka süpüla waaʼinrüin shia wamüin nümüin chi wawala laülaakai wapüleerua eere waküjain pütchi, nüküjai pütchi wamaa. Eeshiʼiya süpüla wachuntuin kaalinwaa namüin waneinnua wawalayuu atüjakana aküjaa pütchi, nümüin wanee pürekutsoot jee shiale nümüin chi wawala alapalaakai waaʼu. Sükaalinjeena waya tia süpüla watüjain süpüleerua tü wekirajüinjatkalü aka wayuu. Müle shia watuma, talateerü waaʼin sünain aküjaa pütchi jee ekirajaa wayuu.

17. ¿Jamüsü waaʼin wekeraajüle tü waʼyataainkat nümüin Maleiwa?

¹⁷ Anakuwaʼipalii maʼin waya nutuma Jeʼwaa waʼyataajiraaka nümaa (1 Cor. 3:9, TNM). Talatüsü waaʼin wanaa sümaa waaʼinmaain «tü kasa alanaʼaleekat suluʼu anain» jee waaʼinmaain tü waʼyataainkat nümüin Maleiwa (Filip. 1:10, TNM; Sal. 100:2). Watüjaa aaʼu naapeerüin wamüin Maleiwa chi naaʼinkai süpüla wekeraajüin tü waʼyataainkat nümüin jaʼitairü kasain alatüin wamüin jee kasain isain wachiki (2 Cor. 4:1, 7; 6:4). Talateerü waaʼin müleka waʼyataale nümüin Maleiwa süka süpüshuaʼa waaʼin jaʼitairü wainmain jee palitchoin tü oora waküjakalü oʼu pütchi (Gal. 6:4). Wekeraajüle tü waʼyataainkat nümüin Maleiwa, weeʼiyatüin sünain alin wapüla Jeʼwaa jee na wayuukana. ¿Kasa anasü weʼreetka sünainjee tia? Anuu sünüiki tü Wiwüliakat: «Müleka püchecherüle paaʼin sünain tüü, oʼtteʼenneena na aapajakana pünüiki. Je müshia piakaʼiya, oʼttaweechi» (1 Tim. 4:16).