1. ¿Jamüsü nünüiki wanee jintüi süka shiimain nümüin süsoʼiraainjatüin saaʼin wayuu?

 EESHI wanee jintüi kanüliashi Matthew, nünainsü wanee ayuulii keemasü jee kojuyatuaichi aʼwannüin nia. Wanaa sümaa akaratshin nuuyase, yalajachi nia nümaa chi nüshikai jee sümaa tü niikat sünain anajaa tü ojuʼitawaikat kashiwai suluʼu JW Broadcasting^®. Sajaʼlajaayamüin tü nanajakat, neʼrüin wanee video jayeechimaajatü eejanale na wawalayuukana namaa na napüshi asoʼiraakana aaʼin süchikijee outaa. b Nürütkaaka Matthew nünainmüin chi nüshikai otta tü niikat sümaa naapaain najapü, nümakalaka namüin: «Maama, taata, jütüjaaitpa aaʼu tasoʼiraajeechin aaʼin outule taya, jaʼatapajeechi taya, aneechi taya». Talatakajasaʼa naaʼin naya wawalayuukana süka shiimain maʼin nümüin chi nachonkai süsoʼiraainjatüin saaʼin wayuu.

2, 3. ¿Jamüsü anaka jülüjawaire waaʼin tü kaʼi süsoʼiraainjatkalü oʼu wayuu outusü?

² Anasü jülüjawaire waaʼin tü kaʼi süsoʼiraainjatkalü oʼu saaʼin wayuu outusü (Juan 5:28, 29, TNM). Anasü waaʼinrüle tia süka nnojoluin watüjaain saaʼu jameerüin wakuwaʼipa watta kaʼi. Eeshii süpüla ayuuijaʼalaʼa wamüin sutuma wanee ayuulii eekai keemain jee outalaa nümüle wanee wapüshi (Ecl. 9:11; Sant. 4:13, 14). Sülatüle wamüin tia, katsüinjeerü waaʼin wanoujale maʼin sünain nasoʼiraajeenain aaʼin na outushiikana (1 Tes. 4:13, TNM). Saashin tü Bibliakat niʼraajüin wakuwaʼipa chi Washi iipünaajachikai otta aishii maʼin waya nüpüla (Luc. 12:7, TNM). Süka niʼraajüin wakuwaʼipa nüsoʼireʼereerü waaʼin süchikijee outaa jee ayateeria wakuwaʼipa nutuma maʼakaapuʼu shia. Eesü süpüla katüin woʼu süpüla kaʼikat süpüshuaʼa  nutuma süka alin maʼin waya nüpüla. Jaʼitainna outuin waya, nüsoʼireʼereerü waaʼin.

³ Sünain ekirajaayakat tüü, wekirajaajeerü anain jamüin wanoujainjanaka sünain nasoʼiraajeenain aaʼin na outushiikana. Sükatchinreeria wanoula wekirajaapa sünain tü pütchi ayuʼnnakalü anainjee sünülia ekirajaayakat tüü, tü makat mayaa: «Asoʼiraweechi aaʼin chi puwalakai» (Juan 11:23, TNM). Jee müsia wekirajaajeerü süchiki tü waaʼinrajatkat süpüla shiimain maʼin wamüin nasoʼiraajeenain aaʼin na outushiikana.

4. ¿Jamüsü süpüla wanoujain nünüiki wanee wayuu apansaajaka pütchi wamüin? Püküja sükajee wanee sukuwaʼipa.

⁴ Süpüla wanoujain sünain tü pütchi nüpansaajakat wamüin wanee wayuu, watüjaainjatü aaʼu naaʼinreein maʼin tü nümakat wamüin otta eein süpüla nuuntuin shia. Anuu wanee sukuwaʼipa süpüla wayaawatüin saaʼu tia. Sumojujaale wepia sutuma wanee wawai jee nümataale wamüin wanee waʼaleewain mayaa: «Takaalinjeechi pia sünain akumajaa tü pipiakat», wanoujeerü nünüiki süka weʼraajüin tü nukuwaʼipakat, kuʼyamalin nia piichi otta eein nümaʼana tü choʼujaakat süpüla nunoutuin tü wepiakat. ¿Eesüche süpüla wanoujain sünain nüsoʼireʼereerüin Maleiwa naaʼin na outushiikana? ¿Shiimainchejeʼe naaʼinreein tia? ¿Eesüche süpüla nuuntuin shia?

5, 6. ¿Jamüsü watüjaaka saaʼu nüsoʼireʼereein Jehová naaʼin na outushiikana?

⁵ ¿Keeʼireesüche naaʼin Jehová nüsoʼireʼereerüin naaʼin na outushiikana? Jamüsaʼa shia. Nüshajirüin suluʼu tü Bibliakat süchiki süsoʼiraainjatüin saaʼin wayuu (Is. 26:19; Os. 13:14; Alat. Map. 20:11-13, TNM). Nüpansaajüle Jehová wanee pütchi, nikeraajüin shia (Jos. 23:14). Keeʼireesü maʼin naaʼin nüsoʼireʼerüin naaʼin na outushiikana. ¿Jamüsü watüjaaka saaʼu tia?

⁶ Jülüjataa waaʼin tü nümakat Job. Nütüjaa maʼin aaʼulu nüsoʼiraweechin aaʼin nutuma Jehová outule nia (Job 14:14, 15, noota). Naaʼinreein maʼin tia Jehová napüleerua na wayuu aʼyataapuʼukana nümüin, na outuinnapakana. Keeʼireesü maʼin naaʼin anain naya jee talatüin naaʼin nasoʼiraapa aaʼin. ¿Jamüsüche naaʼin Jehová naaʼu na wayuu nnojoliikana eʼraajüin nia kataiwaʼaya noʼu? Süka niain chi Washi aipüraikai wayuu, nüsoʼireʼereein maʼin naaʼin (Aluw. 24:15). Keeʼireesü maʼin naaʼin naʼaleewain naya jee katüin noʼu süpüla kaʼikat süpüshuaʼa yaa mmapaʼa (Juan 3:16, TNM). Wayaawatüitpa aaʼu nüsoʼireʼereein Jehová naaʼin na outushiikana.

7, 8. ¿Jamüsü watüjaaka maʼin saaʼu pülashin Jehová süpüla nüsoʼireʼerüin naaʼin na outushiikana?

⁷ ¿Pülashiche Jehová süpüla nüsoʼireʼerüin naaʼin na outushiikana? Jamüsaʼa shia. Süküjain tü Bibliakat niain chi Pülashikai maʼin (Alat. Map. 1:8). Niyamülüin napüshuaʼa na nüʼünüükana otta müsia tü outaakat (1 Cor. 15:26, TNM). Süka watüjaain saaʼu tia, sükatchinrüin waaʼin jee sümülialüin waaʼin. Jülüjataa waaʼin tü alatakat sümüin tü wawalakat Emma Arnold. Eʼrüsü müliaa namaa na süpüshikana soʼunnaa tü Segunda Guerra Mundial münakat. Süpüla sümülialüin saaʼin tü süchonkot saaʼujee kojuyain na süpüshi outakana wanaa sümaa chajanain naya püreesain natuma na kanüliakana nazi, müsü shia sümüin: «Müleka müinnaʼaleere masoʼiraain aaʼin na outushiikana, pülasüjaʼamata tü outaakat nuulia Maleiwa, ¿aashimüin uuton?». Nnojotsü eein kasa pülaleeka maʼin nuulia Jehová. Süka naapüin kataa oʼuu sümüin kasa süpüshuaʼa, eeshii süpüla nüsoʼireʼerüin naaʼin na outushiikana, jama pülain maʼin nia.

⁸ Wanee kasa wayaawataka aaʼujee eein süpüla nüsoʼireʼerüin Jehová naaʼin na outushiikana shia süka sotuin naaʼin kasa süpüshuaʼa. Saashin tü Bibliakat kanüliayaa müsü tü shüliwaikalüirua nutuma (Is. 40:26). Sotushii naaʼin napüshuaʼa na outakana (Job 14:13; Luc. 20:37, 38). Nütüjaa aaʼu Jehová jamapuʼuin maʼin nakuwaʼipa na wayuu nüsoʼireʼerüinjanakana aaʼin, nütüjaa aaʼu tü naaʼinrapuʼukat otta tü jülüjapuʼukat naaʼin.

9. ¿Jamüsü punoujaka sünain süsoʼireʼenneerüin saaʼin wayuu outusü?

 ⁹ Watüjaaitpa aaʼu eein süpüla nuuntuin Jehová nüsoʼireʼerüin naaʼin na outushiikana, jama keeʼireein shia naaʼin jee pülain maʼin nia. Wanee kasa wanoujaka anainjee tia shia süka nüsoʼireʼerüin naaʼin waneinnua wayuu namaiwajana. Jamüsüjaʼa sümaiwa paala, naapüin Jehová pülaa namüin waneinnua wayuu süpüla nasoʼireʼerüin saaʼin wayuu outusü. Noʼutku naya wayuukana nia Jesucristo. Wekirajaa süchiki tü naaʼinrakat Jesús süpüla nüsoʼireʼerüin naaʼin wanee wayuu aküjünakai achiki suluʼu Juan kapiitulo 11.

10. (1) ¿Kasa alataka wanaa sümaa chajachin Jesús wanee saʼata tü süchikat Jordán? (2) ¿Kasakaʼa naaʼinrüin? (Juan 11:1-3).

¹⁰ (Paashajeʼera Juan 11:1-3, TNM). Suluʼu tü pueulokot Betania chajachi kepiain Lázaro, María otta Marta, pawalaawashii naya. Naʼaleewainyuu maʼin naya Jesús (Luc. 10:38-42). Sajaʼlajaayamüin tü juyakat 32, ayuuijaashi Lázaro otta shapaasü maʼin naaʼin na nuwalayuukana naaʼu. Aluwataashii naya pütchi nümüin Jesús wanaa sümaa chajachin nia wanee saʼata tü süchikat Jordán. Chaa Betania eejachire Lázaro, piama kaʼi wopuluʼu wayuu süpüla süntüin eejachire Jesús (Juan 10:40). Outushi Lázaro wanaa maʼin sümaa süntüin tü pütchikat nümüin Jesús. Mayaainjeʼe nütüjaain saaʼu Jesús outuichipain chi naʼaleewainkai, nuuʼulaain sülatüin piama kaʼi süpüla nuʼunajachin chai nukua Betaniamüin. Nüntapa Jesús chamüinña pienchitchi kaʼi outuin Lázaro. Tü keeʼireekat naaʼin Jesús shia naaʼinrüin wanee kasa aneetka atuma nakuwaʼipa na naʼaleewainkana otta tü aʼwaajüneechikalü anainjee Maleiwa (Juan 11:4, 6, 11, 17).

11. ¿Kasa watüjaka sünainjee tü naaʼinrakat Jesús napüleerua na naʼaleewainyuukana?

¹¹ ¿Kasa watüjaka sünainjee tü naaʼinrakat Jesús napüleerua na naʼaleewainyuukana? Wanaa sümaa suluwataain pütchi María otta Marta nümüin Jesús, nnojotsü nachuntuin nümüin nüntajachin Betaniamüin. Shiaʼala neʼe naküjaka achiki ayuulin Lázaro (Juan 11:3). Nnojotsü choʼujaain maʼin nüntajachin Jesús eejachire Lázaro süpüla nüsoʼireʼerüin naaʼin, eesü süpüla naaʼinrüin tia eejachire nia. Ayatapejeʼe nia oʼunuin Betaniamüin süka cheein nia sümaa María otta Marta, na naʼaleewainkana. ¿Eeshiche wanee paʼaleewain akaalinjeekai maʼin pia sümaa nnojoluin puchuntuin shia nümüin? Mülejeʼe tia, pütüjaa aaʼuchi nükaalinjeechin pia soʼunnaa müliaa (Prov. 17:17). Washatüle nukuwaʼipa Jesús, meerü wakuwaʼipa namaa na waʼaleewainkana. Wekirajaa sooʼomüin süchiki tü alatakat wanaa sümaa outuin Lázaro.

12. (1) ¿Kasa nüküjaka Jesús sümüin Marta? (Juan 11:23-26). (2) ¿Jamüsü eeka süpüla sunoujain Marta sünain naaʼinreerüin Jesús tü nümakat sümüin?

¹² (Paashajeʼera Juan 11:23-26, TNM). Sütüjaapa saaʼu Marta nülüʼülüin Jesús süpüla nüntüin Betaniamüin, oʼunamaatüsü shia sünain apanapajaa nia. Sümakalaka nümüin Jesús: «Señotkalee, yaajachireje pia, nnojoishije outuin chi tawalakai» (Juan 11:21, TNM). Watüjaa aaʼulu eein süpüla nuuntuin Jesús naawaleʼerüin Lázaro suulia tü ayuuliikat. Nnojoipejeʼe naawaleʼerüin nia süka jülüjain naaʼin naaʼinrajatüin wanee kasa anaʼleeka maʼin. «Asoʼiraweechi aaʼin chi puwalakai», müshi Jesús sümüin Marta. Süpüla nükatsüinrüin  Jesús sunoula Marta, müshi nia sümüin: «Taya chi asoʼireʼerakai saaʼin wayuu outusü otta taya chi katakai atuma soʼu wayuu». Watüjaaitpa aaʼu naapüin Maleiwa pülaa nümüin Jesús süpüla nüsoʼireʼerüin naaʼin na outushiikana. Eetüjüliʼiya paala waneinnua wayuu nüsoʼireʼerakana aaʼin Jesús süpülapünaa nüsoʼireʼerüin naaʼin Lázaro. Nüsoʼireʼerüin saaʼin wanee jintut süchikijeechon neʼe outuin shia jee nüsoʼireʼerüin naaʼin wanee jimaʼai soʼuleʼeya tü kaʼi outakalü oʼu nia (Luc. 7:11-15; 8:49-55). ¿Eeshiche süpüla nüsoʼireʼerüin Jesús naaʼin wanee wayuu pienchitchikai kaʼi outuin jee keejuuichikai?

13. Sünainjee tü sümakat Juan 11:32-35, ¿kasa naaʼinraka Jesús niʼrapa shiʼyalajüin María namaa na waneinnua? (Piirakaa sümüin tü ayaakuaakat).

¹³ (Paashajeʼera Juan 11:32-35, TNM). Jülüjataa waaʼin tü alatakat. Akoyotsü María, tü nuwalakat Lázaro, nünainmüin Jesús sünain maa nümüin: «Señotkalee, yaajachirejeʼe pia nnojoishijeʼe outuin chi tawalakai». Mojusü maʼin saaʼin wanaa namaa na waneinnua. Mojusü maʼin naaʼin Jesús niʼrapa naʼyalajüin. Süka sümülialaain maʼin naaʼin Jesús naalin, aʼyalajüshi nia. Niyaawata aaʼu Jesús alin sümüin wayuu sünaajaale süpüshi otta nüsünneʼereein noulia tü kasa müliakalü atuma naaʼin.

14. ¿Kasa watüjaka nüchiki Jehová wanaa sümaa niʼyalajüin Jesús wanaa sümaa María?

¹⁴ Wanee kasa watüjaka sünainjee niʼyalajüin Jesús wanaa sümaa María shia nümüliajüin Jehová saaʼin wayuu. ¿Jamüsü watüjaaka saaʼu tia? Wekirajaa anainrü suluʼu ekirajaaya 15 nüshatüin maʼin Jesús nukuwaʼipa chi Nüshikai, aisü nümüin niʼrüle wayuu müliain (Juan 12:45). Waashajeʼerapa süchiki niʼyalajüin Jesús niʼrapa mojuin maʼin naaʼin na naʼaleewainyuukana, wayaawata aaʼu mojuin maʼin naaʼin Jehová niʼrapa müliain waya (Sal. 56:8). Sutuma watüjaain saaʼu müin nukuwaʼipa Jehová, ¿aashin arütkaweein maʼin waya nünainmüin?

15. ¿Kasa pülasü naaʼinraka Jesús eejachire niʼitaanüin Lázaro saashin Juan 11:41-44? (Piirakaa sümüin tü ayaakuaakat).

¹⁵ (Paashajeʼera Juan 11:41-44, TNM). Nüntapa Jesús eejachire niʼitaanüin Lázaro, nuchuntuin süsünneʼennüin tü ipa eʼitaanakat soʼulujuna tü woowirakat. Süküjaka Marta nümüin keejuuichipain müliashii. Anuujeseʼe nünüiki Jesús sümüin: «Mataashi tamakai pümüin piʼreerüin  jorottuin maʼin tü nüpülainkat Maleiwa müleka punoujale» (Juan 11:39, 40, TNM). Süchikijee tia, niirakaaka Jesús iipünaamüin jee nuchuntaka nümüin Jehová noʼupala na yalajanakana jutkatüin. Naaʼinrüin tia süpüla nuʼwaajünüinjachin Jehová sünainjee tü naaʼinrakat. Shiasaʼa süchikijee tia, nümakalaka: «Lázaro, pujuʼitaa yalejee». Nujuʼitaakalaka Lázaro suluʼujee tü woowirakat. Nuuntuinjaʼa Jesús naaʼinrüin wanee kasa pülasü isaka süchiki saaʼinrüin wayuu (paashajeʼera nota de estudio suluʼujeejatka Juan 11:17, TNM [alijunaikiruʼusü]).

16. ¿Jamüsü watüjaaka maʼin aaʼu nasoʼiraainjanain aaʼin na outushiikana sünainjee tü aküjünakalü achiki suluʼu Juan kapiitulo 11?

¹⁶ Sünainjee tü aküjünakalü achiki suluʼu Juan kapiitulo 11, eesü süpüla wanoujain maʼin sünain nasoʼiraainjanain aaʼin na outushiikana. Soto waaʼin tü nümakat Jesús sümüin Marta wanaa sümaa nümüin sümüin: «Asoʼiraweechi aaʼin chi puwalakai» (Juan 11:23, TNM). Maʼaka naaʼin chi Nüshikai, keeʼireesü maʼin naaʼin Jesús naaʼinrüin tia otta eesü süpüla nuuntuin shia. Sünainjee niʼyalajüin Jesús, wayaawata aaʼu najaʼttireerüin tü outaakat sümaʼaleeya tü müliaa eekat sünainjee. Wanaa sümaa nüsoʼireʼerüin Jesús naaʼin Lázaro süchikijee outaa, wayaawata aaʼu saapünüin pülaa nümüin Jesús süpüla nüsoʼireʼerüin naaʼin na outushiikana. Anasü jülüjale waaʼin tü nümakat Jesús sümüin Marta, tü makat: «Mataashi tamakai pümüin piʼreerüin jorottuin maʼin tü nüpülainkat Maleiwa müleka punoujale» (Juan 11:40, TNM). Wainma kasa wanoujaka anainjee nüsoʼireʼereerüin Maleiwa naaʼin na outushiikana. ¿Kasakaʼa joo waaʼinrüinjatüin süpüla shiimainjatüin wamüin tia?

17. ¿Kasa waaʼinrajatka wekirajaapa nachiki na wayuu asoʼiraakana aaʼin süchikijee outaa, na aküjünakana achiki suluʼu tü Bibliakat?

¹⁷ Wekirajaa nachiki na wayuu asoʼiraakana aaʼin süchikijee outaa jee wasakireʼera waaʼin sünain tia. Eeshii mekiisalii wayuu asoʼiraakana aaʼin süchikijee outaa saashin tü Bibliakat. c ¿Eesüche süpüla wekirajaain süchiki tü alatakat  namüin waneʼewai nakua? Sümaʼinruʼu wekirajaain süchiki tia, jülüjainjatü waaʼin shiimain eejanain naya. Sümaʼinruʼu waaʼinrüin tia, jülüja waaʼin tü watüjakat sünainjee tü alatakat otta jülüja waaʼin nüsoʼireʼereein Jehová naaʼin na outushiikana otta eein süpüla nuuntuin shia. Anapejeʼe maʼin wasakireʼerüle waaʼin süchiki tü alatakat nümüin Jesús wanaa sümaa nüsoʼireʼennüin aaʼin süchikijee outaa. Wainma wayuu eʼraka nia katapa noʼu nüchikuaʼa, tia shia tü wanoujakat maʼin anainjee süsoʼiraainjatüin saaʼin wayuu outusü (1 Cor. 15:3-6, 20-22).

18. ¿Kasa waaʼinrajatka süpüla anain wakuwaʼipa sutuma tü jayeechi süchikimaajatkalü asoʼirawaa aaʼin? (Paashajeʼera tü nootakat).

¹⁸ Waapaja, weeʼiraja otta jülüja waaʼin tü jayeechi süchikimaajatkalü asoʼirawaa aaʼin (Éf. 5:19). d Sünainjee tia jayeechikalüirua, sükatsüinreerü wanoula otta shiimainjeerü wamüin süsoʼiraainjatüin saaʼin wayuu outusü. Müsüjeseʼe anain maʼin waapajüle, weeʼirajüle otta waküjale tü watüjakat sünainjee tü jayeechikalüirua soʼu tü kaʼi waʼwaajakalü oʼu Maleiwa sümaa wapüshi. Anasü watüjale süpüleerua tü jayeechikalüirua jee wanaajaa suluʼu waaʼin tü watüjakat sünainjee. Shiasaʼa sülatalaʼa sümüle wanee kasa wamüin jee niale anaajaain wanee wapüshi aikai wapüla, nükaalinjeena waya Jehová sükajee tü nüpülainkat süpüla sotuin waaʼin tü jayeechikalüirua. Tia sükatsüinreerü waaʼin otta sümülialeerü waaʼin.

19. ¿Kasa wasakireʼerüinjatka anain waaʼin jülüjapa waaʼin tü kaʼi nasoʼiraainjatkalü oʼu na outushiikana? (Paashajeʼera tü pütchikat « ¿Kasa püsakireeka anain naya?»).

¹⁹ Maa chakai waaʼin suluʼu tü Paʼaraiisükat. Eesü süpüla wountuin tia, jama nukumajüin waya Jehová suluʼu müin wakuwaʼipa. «Süka jülüjain taaʼin waneepia tü Paʼaraiisükat, müsü taatakai saaʼin seejuu tü süsiikalüirua wunuʼu», müsü sünüiki wanee wawala. Jülüjataa waaʼin weʼrapa suluʼu tü Paʼaraiisükat na wayuu aʼyataapuʼukana nümüin Maleiwa. ¿Jarai chi piʼraajeekai maʼin amüin naʼakajee? ¿Kasa püsakireeka anain nia? Jülüjataa waaʼin jameerüin waaʼin weʼrapa nachikuaʼa na wapüshi outuinnapakana, kaseerüin waküjain namüin, wojuupateenain naya otta talateerüin maʼin waaʼin namaa.

20. ¿Kasa ayatüinjatka waaʼinrüin?

²⁰ Talatüsü maʼin waaʼin süka watüjaain saaʼu nüsoʼireʼereerüin Jehová naaʼin na outushiikana. Watüjaa aaʼu naaʼinreein maʼin tia otta eein süpüla nuuntuin shia. Müshi nümakai aaʼin Jehová wamüin waneʼewai wakua: «Piʼreena nachikuaʼa na püpüshi outuinnapakana». Ayataʼaya wanoujain maʼin sünain nasoʼiraajeenain naaʼin na outushiikana. Waaʼinrüle tia, aleeweena maʼin waya nümaa Jehová, chi Asoʼireʼerüinjachikai saaʼin wayuu outusü.