1, 2. ¿Kasa waaʼinrajatka sümaʼinruʼu waʼatapajüin paʼaraiisüin tü Mmakat?

 WAAPÜIN maʼin analuʼutka nümüin Jehová saaʼujee najaʼttirüinjatüin tü kasa mojusükat süpüla paʼaraiisüinjatüin tü Mmakat nutuma (2 Ped. 3:13, TNM). Nnojotsü watüjaain saaʼu joujeerüin tia, shiasaʼa sünainjee tü kasa weʼrakat alatüin sainküin mma, wayaawata maʼin aaʼu pejein shia (Mat. 24:32-34, 36; Aluw. 1:7).

² Jaʼitainna kakaliainnale waʼyataain nümüin Jehová, eesü süpüla seemiajaain tü wanoulakat sümaa jülüjain waaʼin nnojoleerüin nikeraajüin Maleiwa nünüiki süchiki paʼaraiisüinjatüin tü Mmakat. Müsüjeseʼe choʼujaain wakooʼomüinrüin tü wanoulakat. Naashin chi aluwataaushikai Pablo, tü manoulaakat shia tü «kasa jookalü atuma waya süpüla kaainjalaa» (Heb. 12:1, TNM). Suulia sülatüin tia wamüin, anasü wekirajawaire sünain tü wanoujeetkalü atuma paʼaraiiseerüin tü Mmakat (Heb. 11:1, TNM).

3. ¿Kasa wekirajaainjatka anain sünain ekirajaayakat tüü?

³ Sünain ekirajaayakat tüü, wekirajaajeerü anain apünüinsü kasa wanoujeetka atuma paʼaraiiseerüin tü Mmakat nutuma Jehová: (1) jülüjainjatü waaʼin tü naaʼinrakat Jehová wapüleerua nükajee Jesús, (2) jülüjainjatü waaʼin pülashin maʼin Jehová otta (3) waaʼinmaainjatü tü waʼyataainkat nümüin Maleiwa. Wekirajaajeerü anain tü nümakat Jehová nümüin Habacuc, tü akatsüinreetkat wanoula. Anashii wekirajaale palajana jamüin choʼujaaka wanoujain maʼin sünain paʼaraiiseerüin tü Mmakat.

¿JAMÜSÜ CHOʼUJAAKA KATSÜINJATÜIN TÜ WANOULAKAT?

4. (1) ¿Kasa waneekawalinjatka? (2) ¿Jamüsü katsüinjatka wanoula süpüla anain tü waneekakat?

⁴ Choʼujaasü katsüinjatüin tü wanoulakat süpüla anain tü kasa waneekawaikat. Jamüshiijaʼa waya, choʼujaashii waneeküinjanain jaraliinjanain waʼaleewajaain amaa, kasainjatüin wanajüin, waapajüin  jee washaitüin. Choʼujaasü waneeküinjatüin tü wekirajaainjatkalü anain, tü wakuwaʼipainjatkat sümaa waʼwayuuse jee namaa wachonnii otta tü waʼyataainjatkalü anain. Wasakira waaʼin sünain tüü: «¿Kasa jaʼyaka taaʼu sünainjee tü kasa taneekakat? ¿Jaʼyasüche taaʼu tanoujain sünain najaʼttireerüin Maleiwa tü kasa mojusükat jee sülüʼülüin sükalia süpüla paʼaraiisüinjatüin tü Mmakat? ¿Toʼunataapa süchiirua tü naneekakat na manoujainkana sünain paʼaraiiseerüin tü Mmakat?» (Mat. 6:19, 20; Luc. 12:16-21). Wanoujale maʼin sünain paʼaraiiseerüin tü Mmakat nutuma Maleiwa, aneerü sukuwaʼipa watuma tü kasa waneekakat.

5, 6. ¿Jamüsü katsüinjatka wanoula soʼunnaa müliaa? Püküja wanee sukuwaʼipa.

⁵ Choʼujaasü katsüinjatüin tü wanoulakat süpüla walatüin süchikumüin wanee müliaa weʼraka maʼaka saaʼin wapüleeruaanüle aaʼin saaʼujee wanoujain, wanainre wanee ayuulii eekai mepin jee shiale wanee kasa eekai keemain maʼin alataka wamüin. Eesüjaʼa yalayarüle waaʼin suʼttaiwaʼaya tü müliaa weʼrakat, shiasaʼa joo kamaʼale shia wamüin, choʼujaweerü wamüin katsüinjatüin tü wanoulakat süpüla wachecherüin waaʼin soʼunnaa tia otta süpüla ayatüinjanain waʼyataain nümüin Jehová sümaa talatüin waaʼin (Roma 12:12; 1 Ped. 1:6, 7).

⁶ Weʼrapa müliaa, eesüjaʼa jülüjale waaʼin nnojoleerüin paʼaraiisüin tü Mmakat nutuma Jehová. ¿Manoulasaliiche waya jülüjale waaʼin tia? Nnojo, nnojotsü shiain tia. Jamüsüjaʼa waneepiale shiʼitüin tü juyakat, eesüjaʼa jülüjale waaʼin müichiain mojuʼitüin chi Kaʼikai. Müsia neʼe tü alatakat wamüin weʼrapa müliaa, eesüjaʼa jülüjale waaʼin nnojoleerüin paʼaraiisüin tü Mmakat. Shiasaʼa joo katsüinre maʼin tü wanoulakat, wanoujeerü maʼin sünain nikeraajeerüin Jehová tü nümakat (Sal. 94:3, 14, 15; Heb. 6:17-19). Sutuma tia, waaʼinmaajeerü tü waʼyataainkat nümüin.

7. ¿Kasa eejüinjatka oulia waaʼin?

⁷ Choʼujaashii kanoulainjanain maʼin waya süpüla waküjain tü pütchi anakat maʼin. Waküjapa sümüin wayuu paʼaraiisüinjatüin tü Mmakat, wainma na manoujainkana sünain tia. «Kuenta neʼe tia», müshii neʼe naya (Mat. 24:14, TNM; Ezeq. 33:32). Jalia waya suulia wanaawain waaʼin namaa. Suulia majüin wakuwaʼipa maʼaka naaʼin, ayatüinjatü wakooʼomüinrüin tü wanoulakat. Anashii wekirajaale sünain apünüinsü kasa waaʼinrajatka süpüla wountuin tia.

JÜLÜJA WAAʼIN NAAPAJIRAAIN NIKII JESÚS WAAʼU

8, 9. ¿Jamüsü katsüinjeetka wanoula jülüjale waaʼin tü naaʼinrakat Jehová wapüleerua nükajee Jesús?

⁸ Wanee kasa wakatsüinreetka akajee tü wanoulakat shia jülüjale waaʼin tü naaʼinrakat Jehová wapüleerua nükajee Jesús. Sükajee naapajiraain nikii Jesús waaʼu, watüjaa aaʼu nikeraajeerüin Maleiwa tü nümakat. Anasü jülüjale maʼin waaʼin tü naaʼinrakat Jehová wapüleerua nükajee Jesús otta jamüin naaʼinraka tia. Waaʼinrüle tia, wanoujeerü maʼin anain paʼaraiiseerüin tü Mmakat nutuma Jehová otta kateerüin woʼu süpüla kaʼikat süpüshuaʼa. ¿Jamüsü watüjaaka saaʼu meerüin shia?

⁹ Jülüjataa waaʼin süpüshuaʼa tü kasa naaʼinrakat Jehová wapüleerua nükajee Jesús. Anasü nümüin Jehová nuluwataain chi waneeshikai Nüchon süpüla wayuuinjachin nia yaa mmapaʼamüin sümaa lotuin nukuwaʼipa, nia chi Nüchon aishikai maʼin nüpüla jee chi aleewakai maʼin amaa nia. Yaaiwaʼaya nia mmapaʼa, wainma tü müliaa niʼrakat jee müliashi maʼin nia atumawaa sülüʼütpa nükalia süpüla nuʼutunüin aaʼin. Aitaʼaleeshiijaʼa maʼin waya nüpüla Jehová süka naapüin nikii chi Nüchonkai waaʼu. Nnojoishijeʼe nuuʼulaain müliain chi Nüchonkai nnojoliireje alin waya nüpüla. Nnojoishijeʼe nuuʼulaain outuin nia, nnojoluinjatüle katüin woʼu nutuma süpüla kaʼikat süpüshuaʼa (Juan 3:16, TNM; 1 Ped. 1:18, 19). Sünainjee tü naaʼinrakat Jehová wapüleerua, watüjaaitpa maʼin aaʼu kepieenain waya nutuma süpüla kaʼikat süpüshuaʼa suluʼu tü Paʼaraiisükat.

 JÜLÜJA WAAʼIN PÜLASHIN MAʼIN JEHOVÁ

10. ¿Kasa nuuntaka naaʼinrüin Jehová saashin Éfeso 3:20?

¹⁰ Wanee sukuwaʼipa süpüla wakatsüinrüin tü wanoulakat shia jülüjale waaʼin pülashin maʼin Jehová. Süka müin nukuwaʼipa, nnojotsü kasain isain nüchiki. Kapüleesü maʼin sümüin wayuu sunoujain anain eein süpüla katüin soʼu süpüla kaʼikat süpüshuaʼa suluʼu tü Paʼaraiisükat. Nüpansaajawalüin wamüin Jehová waneirua pütchi kapüleeka süpüla sunoujain anain wayuu. Watüjaa aaʼu nikeraajüin Jehová tü nümakat süka pülashin maʼin nia (Job 42:2; Mar. 10:27). Süka pülashin maʼin nia, eesü süpüla nüküjain wamüin naaʼinreerüin kasa anashaatasü maʼin (paashajeʼera Éfeso 3:20, TNM).

11. Püküja wanee pütchi nikeraajaka Jehová sümaiwa (paashajeʼera tü pütchikat « Waneirua pütchi nikeraajaka Jehová anashaataka maʼin»).

¹¹ Jülüjataa waaʼin waneirua pütchi nüpansaajaka Jehová namüin waneinnua wayuu namaiwajana, tü nnojotkalü antapünaain suluʼu nekii naaʼinrüinjatüin tia napüleerua. Mayaainjeʼe laülaain Abrahán otta Sara, nüküjain Jehová namüin kachooinjanain naya (Gén. 17:15-17). Nüküjainña Jehová nümüin Abrahán naapüinjatüin tü mmakat Canaán namüin na nüikeyuukana. Na nüikeyuukana Abrahán naya na israelitakana. Kakaliashii achepchieein naya Egipto. Sünainjee tia, eesüjaʼa jülüjale naaʼin nnojoleerüin nikeraajüin tü nümakat Jehová nümüin Abrahán. Nikeraajapejeʼe Jehová tü nümakat. Kakalia mapa, nüküjain Jehová sümüin Elizabeth kachoinjatüin shia mayaainjeʼe laülaairüin shia. Nüküjainña Jehová sümüin María jemeyuleerüin shia nümaa chi Nüchonkai. Sünainjee tia, nikeraajüin Jehová tü pütchi nüpansaajatüjütkalia suluʼu tü apainkat Edén (Gén. 3:15).

12. ¿Jamüsü watüjaaka saaʼu pülain maʼin Jehová sünainjee tü sümakat Josué 23:14 otta Isaías 55:10, 11?

¹² Jülüjapa waaʼin süpüshuaʼa tü pütchi nüpansaajakat Jehová jee tü naaʼinrakat süpüla nikeraajüin shia, wayaawata aaʼuchi pülashin maʼin nia. Katsüinsü wanoula nünain sünainjee tü naaʼinrakat otta watüjaa maʼin aaʼulu paʼaraiiseerüin tü Mmakat nutuma (paashajeʼera Josué 23:14; Isaías 55:10, 11). Müle sukuwaʼipa wanoula, yapeena waya süpüla wakaalinjain na waneinnua süpüla nanoujain sünain paʼaraiiseerüin tü Mmakat nutuma Jehová, nnojoluin alawaain tia. Anuu tü nümakat Jehová süpüla wayaawatüin saaʼu shiimain eejeerüin nutuma wanee siruma jeketü otta wanee mma jeketü: «Püshaja pümata tü tanüikikat süpüla kapülainjatüin saaʼin wayuu shia süka shiimüin» (Alat. Map. 21:1, 5).

WAAʼINMAA TÜ KATSÜINJEETKALÜ ATUMA WANOULA

13. ¿Jamüsü sükatsüinraaka wanoula woutkajaapa?

¹³ Wanee kasa akatsüinreetka wanoula shia tü outkajawaakat. Eesü wanee wawala kanüliasü Anna, b kakaliairü shia sünain tü anoujaakat otta wainmairü tü shiʼyataakalü anain nümüin Jehová, müsü shia: «Tü outkajawaakat tamüin, müsü aka saaʼin karapin, süka jamüin, shiain tü ichekat maʼin atuma tü tanoulakat. Jamüsüjaʼa nnojorüle anain maʼin wanee pütchi nutuma wanee wawala jee nnojorüle nüküjain wanee pütchi anaka maʼin, eesiaʼaya tü kasa tatüjakat sünainjee tü Bibliakat. Sünainjee tia, katsüinsü maʼin tü tanoulakat». Akatsüinraasia tü wanoulakat sünain tü outkajawaakat waapapa nanüiki na wawalayuu asoutakana sünain (Roma 1:11, 12; 10:17, TNM).

14. ¿Jamüsü sükatsüinraaka tü wanoulakat waküjale tü pütchi anakat maʼin?

¹⁴ Akatsüinraasia tü wanoulakat waküjale maʼin tü pütchi anakat maʼin (Heb. 10:23). Jülüjataa waaʼin tü sümakat wanee wawala kanüliasü Barbara, eetaairü maʼaka 70 juya Süküjalüin pütchi, müsü shia: «Akatsüinraasü waneepia tü tanoulakat sutuma taküjain tü pütchi anakat maʼin. Tayaawata aaʼu ichein maʼin tü tanoulakat taküjapa sümüin wayuu süchiki tü nukuwaʼipakat Jehová jee süchiki tü kasa anasü naaʼinrajatkat wapüleerua».

15. ¿Jamüsü sükatsüinraajeetka tü wanoulakat wekirajaale wamüiwaʼa sünain tü Bibliakat? (Piirakaa sümüin tü ayaakuaakat).

 ¹⁵ Wane kasa waaʼinrajatka süpüla wakatsüinrüin tü wanoulakat shia wekirajaale wamüiwaʼa sünain tü Bibliakat. Saashin Susan, ekirajaʼawaisü shia sünain tü Bibliakat süka sükatalüin tü kaʼi shikirajaainjatkalü oʼu. Anuu sünüiki: «Tekirajaʼawalin anainrü rimiinkoʼuluwai tü rewiisütakat Aapiria Wayuu, tü ekirajaanajatkalü anain semaanaka tüseena jee müsia tekirajaʼawalin anainrü luunoʼuluwai otta maatteʼuluwai tü wekirajaainjatkalü anain sünain tü outkajawaakat Wakuwaʼipa otta Waʼyataain nümüin Maleiwa. Jee waneirua kaʼi, ekirajaʼawaisü taya sünain wanee pütchi suluʼujeejatka tü Bibliakat». Akatsüinraasü maʼin tü sunoulakat Susan süka sükatalawalüin kaʼi süpüla shikirajaain sünain tü Bibliakat. Eesü wane wawalaya Irene sünülia, kakaliairü aʼyataain shia eejeere sukumajünüin tü waʼyataainkat nümüin Maleiwa, katsüinsü maʼin tü sunoulakat sutuma shikirajaain sünain tü pütchi ekeraajakat suluʼujee tü Bibliakat otta tü nnojoyütkalia ekeraajüin. Müsü shia: «Ponusü maʼin taaʼin süka teʼrüin nikeraajüin Jehová süpüshuaʼa tü nümakat suluʼu tü Bibliakat». c

SHIIMAIN SHIKERAAJEERÜIN TÜ NÜMAKAT MALEIWA

16. ¿Jamüsü watüjaaka saaʼu wamüinjatüin tü pütchi nümakat Jehová nümüin Habacuc? (Hebreokana 10:36, 37).

¹⁶ Eeshii waneinnua wawalayuu kakaliainnakana aʼatapajüin tü kaʼi najaʼttirajatkalü oʼu Maleiwa tü kasa mojusükat. Eeshii waneinnua jülüjakana aaʼin kamaʼain chi Maleiwakai saaʼin namüin süpüla naaʼinrüin tia. Nütüjaa aaʼu Jehová jamüin naaʼin na aʼyataashiikana nümüin. Anuukalaka nünüiki nümüin Habacuc: «Choʼujaayülia tü kaʼi shikeraajüinjatkalü oʼu tia piʼrakat. Alüʼülaasü maʼin tia kaʼikat. Jaʼitairü kamaʼain shia, ayataʼa jülüjain paaʼin süka shikeraajeerüin. Nnojoleerü kamaʼain shia» (Hab. 2:3). ¿Nümüinjatche  nümüiwaʼa Habacuc tia pütchikat? ¿Wamüinjattaapa wapüshuaʼa maaʼulu? Nüküjirüin Jehová nükajee Pablo tü nümakat nümüin Habacuc namüin na anoujashii aʼatapajakana maʼin paʼaraiisüinjatüin tü Mmakat (paashajeʼera Hebreokana 10:36, 37, TNM). Kamaʼale saaʼin wamüin Jehová süpüla paʼaraiisüinjatüin tü Mmakat nutuma, ayataʼaya jülüjain waaʼin nikeraajeerüin tü nümakat, «nnojoleerü kamaʼain shia».

17. ¿Kasa saaʼinraka wanee wawala süpüla saaʼinrüin tü nümakat Jehová nümüin Habacuc?

¹⁷ Wainma na wawalayuu kakaliainnakana aʼatapajüin tü nükaliakat Maleiwa. Jülüjataa waaʼin tü sukuwaʼipakat tü wawalakat Louise, oʼttusü shia sünain aʼyatawaa nümüin Maleiwa soʼu 1939. Müsü shia: «Antajatia taaʼinruʼu Armagedón nnojoluiwaʼaya 18 touyase, eetaayaai sülatüin tia. Nnojotsü ashapalaain taaʼin sutuma taashajeʼerüin süchiki nakuwaʼipa waneinnua wayuu namaiwajana, na nnojoliikana ashapalaain aaʼin süpüla neʼrüinjatüin shikeraajüin tü nümakat Jehová namüin, maʼaka naaʼin Noé, Abrahán, José otta waneinnua wayuu. Süka eejüin taaʼin namaa na waneinnua sünain aʼatapajaa tü nükaliakat Maleiwa, taaʼinmaasü maʼin sülüʼülüin sükalia süpüla paʼaraiisüinjatüin tü Mmakat». Watüjaa aaʼu wainmain na wawalayuu wanaawakana aaʼin sümaa tia wawalakat, na kakaliainnakana sünain aʼyatawaa nümüin Jehová.

18. Sünainjee tü kasa nukumajalakat Jehová, ¿jamüsü watüjaaka saaʼu paʼaraiiseerüin tü Mmakat nutuma?

¹⁸ Mayaainjeʼe nnojoluin weʼrüin paʼaraiisüin tü Mmakat maaʼulu yaa, eesü waneirua kasa weʼraka, maʼaka saaʼin tü shüliwaikalüirua, tü wunuʼuliakalüirua, tü mürütkalüirua jee müsia tü wayuukalüirua. Mayaainjeʼe nnojoluin eetüjülin shia sümaiwa, watüjaa aaʼulu eein shia süka nukumajalain shia Jehová (Gén. 1:1, 26, 27). Nüküjain wamüin Maleiwa paʼaraiisüinjatüin tü Mmakat nutuma jee nikeraajeerü shia. Kateerü woʼu süpüla kaʼikat süpüshuaʼa sümaa nnojoleenain ayuulin waya. Watüjaa aaʼulu paʼaraiiseerüin tü Mmakat nutuma Maleiwa soʼu tü kaʼi niʼitaakalü oʼu shia (Is. 65:17; Alat. Map. 21:3, 4).

19. ¿Kasa waaʼinrajatka süpüla wakatsüinrüin wanoula?

¹⁹ Wakatsüinra maʼin wanoula sümaʼinruʼu waʼatapajüin paʼaraiisüin tü Mmakat. Kojuta wamüin tü naaʼinrakat Jehová wapüleerua nükajee Jesús, jülüja waaʼin pülain maʼin Jehová otta waaʼinmaa tü katsüinjeetkalü atuma wanoula. Waaʼinrüle tia, naʼakeena waya «na wayuu aapünajanakana amüin tü kasa aküjünatüjütkalia achiki paala», na kanoulakana maʼin jee na nnojoliikana ashapajaain (Heb. 6:11, 12, TNM; Roma 5:5, TNM).