1. ¿Jamüshii wasoutaka sünain tü outkajawaakat?

 OUTKAJAʼAWAISHII waya süpüla waʼwaajüin Jehová (Sal 26:12; 111:1). Outkajaashii wayaʼaya süpüla watütüleʼerajiraain waaʼin soʼunnaa tü alatakat wamüin maaʼulu (1 Tes. 5:11). Wasoutapa sünain tü outkajawaakat, waaʼinrüin tia piamasükat kasa.

2. ¿Jeʼtsü tü ekirajawaa eekat süpüla wayalerüin anain wajapü?

² Eeshii süpüla wasoutuin sünain tü pütchi asakinnakalü anain sünain tü outkajawaakat semaanawai, maʼaka sünain tü Ekirajawaakat sünain Aapiria Wayuu. Eesiaʼaya süpüla wayalerüin wajapü sünain tü outkajawaakat Wakuwaʼipa otta Waʼyataain nümüin Maleiwa sünain tü pütchi kanüliakat «Püchajaa süchiki kaaʼürüi suluʼu tü Bibliakat», Ekirajawaa sünain tü Bibliakat namaa na wawalayuukana jee müsia sünain waneirua ekirajawaa.

3. (1) ¿Kasa kapüleeka atuma wayalerüin wajapü sünain tü outkajawaakat? (2) ¿Kasa waaʼinrajatka saashin Hebreokana 10: 24, 25?

³ Keeʼireesü waaʼin wapüshuaʼa waʼwaajüin Maleiwa jee watütüleʼerüin naaʼin na wawalayuukana sükajee tü wamakat sünain tü outkajawaakat. Eesüjaʼa kapüleere wamüin wayalerüin wajapü sünain tü outkajawaakat sutuma mmoluin waya jee shiale sutuma nnojoliin waneekünüin maʼin süpüla wasoutuin sünain jaʼitasü kojuyatuain wayalerüin wajapü. Suluʼu tü karaloʼuta nüshajakat chi aluwataaushikai Pablo namüin na hebreokana, eesü wanee pütchi anaka maʼin süpüla waaʼinrüin. Tü waaʼinmaainjatkat naashin Pablo sünain tü outkajawaakat shia watütüleʼerajiraainjatüin waaʼin waneʼewai wakua (paashajeʼera Hebreokana 10:24, 25, TNM). Jülüjale waaʼin eein süpüla watütüleʼerüin naaʼin na waneinnua sükajee tü wamakat sünain tü outkajawaakat, nnojoleerü mmoluin maʼin waaʼin wayalerapa wajapü, jaʼitasü palitchonle wanüiki wasoutapa. Nnojoliire waneekünüin  maʼin süpüla wasoutuin sünain tü outkajawaakat, talateeria waaʼin weʼrüle nasoutuin na waneinnua (1 Ped. 3:8, TNM).

4. ¿Jeʼtsü tü apünüinsükat kasa wekirajaainjatka anain sünain ekirajaayakat tüü?

⁴ Sünain ekirajaayakat tüü, wekirajaajeerü anain palajana tü waaʼinrajatkat süpüla watütüleʼerajiraain waaʼin woutkajaale namaa palitchon wawalayuu eere eein süpüla kojuyatuain wasoutuin sünain tü ekirajaanakalü anain. Otta wekirajaajeerü anain tü waaʼinrajatkat süpüla watütüleʼerajiraain waaʼin woutkajaale namaa watta naalii wawalayuu eere nnojoluin eein süpüla wasoutuin wapüshuaʼa sünain tü ekirajaanakalü anain. Wekirajaajeerü anain jamüinjatüin sukuwaʼipa tü wanüikinjatkat süpüla watütüleʼerüin naaʼin na waneinnua.

5. ¿Kasa eeka süpüla waaʼinrüin süpüla watütüleʼerajiraain waaʼin woutkajaale namaa palitchon wawalayuu?

⁵ Woutkajaale namaa palitchon wawalayuu, eeshii süpüla palitchon na asoutakana shiʼipajee tü nüsakitkalü anain wanee wawala ekirajakai sünain tü outkajawaakat. Eeshijaʼa kamaʼale chi wawalakai sünain aʼatapajaa jaralinjachin ayalerüin najapü. Sutuma tia, kamaʼajeerü tü ekirajawaakat jee nnojoleerü atütülaain naaʼin na wawalayuukana. ¿Kasa eeka süpüla waaʼinrüin sülatüle tia? Wachajaa maʼin sukuwaʼipa süpüla wasoutuin sünain tü outkajawaakat. Waaʼinrüle tia, watütüleʼereerü naaʼin na waneinnua süpüla nasoutuin.

6, 7. ¿Kasa paaʼinrajatka süpüla nnojoluin mmoluin maʼin pia sünain ayaleraa pajapü sünain tü outkajawaakat?

⁶ Wainma wawalayuu mmotkana jülüjale naaʼin nasoutuinjanain sünain tü outkajawaakat. Müle pukuwaʼipa, ¿kasa eeka süpüla paaʼinrüin? Anasü püchajaale sukuwaʼipa süpüla nnojolinjachin mmoluin pia süpüla pütütüleʼerüin naaʼin na waneinnua sükajee tü pümakat.

⁷ Wanee kasa puunteetka akajee tia shia paaʼinrüle tü aküjünakalü achiki suluʼu waneirua rewiisüta Aapiria Wayuu. b Aküjünüsü yala yapainjatüin watuma palajana tü wanüikinjatkat (Prov. 21:5). Pikirajaale maʼin sünain tü ekirajaanajatkalü anain, mapüleejeerü pümüin piyalerüin pajapü sünain tü outkajawaakat. Wane kasaya eeka süpüla paaʼinrüin shia nnojoluinjatüin wainmain pünüiki (Prov. 15:23; 17:27). Paliʼirüle pünüiki, nnojoleechi mmoluin maʼin pia. Wainmale maʼin tü püküjakalü achiki, nnojoleerü nayaawatüin aaʼu na wawalayuukana tü paashajaakalü achiki, aluʼujasaʼa palitchonle pünüiki nayaawateerü aaʼu. Püküjale süka pünüiki tü pikirajaakalü anain sümaa paliʼirüin pünüiki putuma, nayaawateerü aaʼu na waneinnua yapatüjülüin tü ekirajawaakat putuma otta natüjaweerü saaʼu piyaawatüin saaʼu tü saashajaakalü achiki.

8. ¿Jamüsü naaʼin Jehová püchajaale maʼin sukuwaʼipa süpüla pusoutuin sünain tü outkajawaakat?

⁸ ¿Kasa paaʼinrajatka ayatüle mmoluin pia süpüla pusoutuin sünain tü outkajawaakat mayaainjeʼe paaʼinrüin tü wekirajaaitpakalü anain? Soto paaʼin kojutuin nümüin Jehová tü paaʼinrakat süpüla püchajaain maʼin sukuwaʼipa süpüla pusoutuin sünain tü outkajawaakat (Luc. 21:1-4). Nnojotpejeʼe nuchuntuin Jehová pümüin wanee kasa eekai isain püchiki (Filip. 4:5). Anasü piyaawatüle saaʼu tü eekat süpüla puuntuin, pütüjaapa saaʼu tia puuʼulaka shia jee puchunta kaalinwaa nümüin Jehová süpüla nnojoluin mmoluin paaʼin. Tü eekat süpüla paaʼinrüin palajana shia pusoutuin süka palitchon pünüiki sünain tü outkajawaakat.

9. ¿Kasa eeka süpüla kapüleein wamüin woutkajaale namaa watta naalii wawalayuu?

⁹ ¿Kasa eeka süpüla kapüleein pümüin puutkajaale namaa wainma wawalayuu? Eeshijaʼa süpüla nnojolin püneekünüin kojuyatua süpüla pusoutuin sünain tü outkajawaakat süka wainmain wawalayuu  asouteekana. Jülüjataa waaʼin sukuwaʼipa wanee wawala kanüliaka Danielle, kamalainsü maʼin sümüin asoutaa sünain tü outkajawaakat. c Kojutusü sümüin tia süka suʼwaajüin Jehová, süka sütütüleʼerüin naaʼin na waneinnua otta süka sotuin saaʼin tü shikirajaakalü anain suluʼujee tü Bibliakat. Shiasaʼa suutkajaapa namaa watta naalii wawalayuu, nnojoluitpa maʼin aneekünüin süpüla susoutuin sünain tü outkajawaakat, eesü susoutule neʼe uwatua. Anuukalaka sünüiki tü wawalakat: «Süka nnojoluin taneekünüin maʼin süpüla asoutaa sünain tü outkajawaakat, mojusü maʼin taaʼin, mataasü süsütünakai toulia wanee taʼyataain nümüin Jehová. Nnojorüle püneekünüin kojuyatua süpüla pusoutuin sünain tü outkajawaakat, eesüjaʼa süntajaale pikiiruʼu niʼrülin wayumüin pümüin chi ekirajakai».

10. ¿Kasa eeka süpüla paaʼinrüin süpüla püneekünüin süpüla pusoutuin sünain tü outkajawaakat?

¹⁰ ¿Eeiria alatüin pümüin tü alatakat sümüin Danielle? Müle shia, eesüjaʼa jülüjale paaʼin nnojoluin anain piyalerüle pajapü piantua sünain tü outkajawaakat jee shiale anain neʼe pümüin paapajüin nanüiki na waneinnua. Müle pukuwaʼipa, nnojo piyüülajaain. Anasü paaʼinrüle tüü süpüla püneekünüin süpüla pusoutuin: yapa putuma kojuyasü pünüiki süpüla pusoutuin sünain wanee ekirajawaa. Nnojoire püneekünüin süpüla pusoutuin sünain wanee pütchi, eeshi süpüla püneekünüin mapa. Pikirajaapa pipialuʼu sünain Aapiria Wayuu, jülüja paaʼin jamüin pansaaka tü pütchikalüirua sümaa sünülia tü ekirajaayakat. Paaʼinrüle tia, wainmeerü pütchi eeka süpüla pusoutuin eʼipajee. Wanee kasa anaka süpüla paaʼinrüin shia yapale pia süpüla pusoutuin shiʼipajee tü pütchi kapüleekat suluʼujee tü Bibliakat (1 Cor. 2:10, TNM). Süka kapüleein süpüla süküjünüin tia pütchikat, nnojoishii wainmain na wawalayuu ayaleetkana najapü sünain. ¿Jama ayatüle nnojolin püneekünüin süpüla pusoutuin shiʼipajee tü asakinnakalü anain mayaainjeʼe puuʼulaküin tü wekirajaaitpakalü anain? ¿Kasa anaka süpüla paaʼinrüin? Nnojoluiwaʼaya suʼttuin tü outkajawaakat, paashajaa nümaa chi wawala oʼunirüinjachikai sukuwaʼipa tü ekirajawaakat jee püküjeetka nümüin jaralüin tü pütchi pusouteekalü eʼipajee.

11. Sünainjee tü sümakat Filipos 2:4, ¿kasa anaka süpüla waaʼinrüin?

¹¹ (Paashajeʼera Filipos 2:4, TNM). Nüküjain chi aluwataaushikai Pablo namüin na anoujashiikana kapülainjatüin naaʼin nakuwaʼipa na waneinnua, tia shia wanee pütchi nüshajakat Pablo nutuma Maleiwa. ¿Kasa waaʼinrajatka süpüla waaʼinrüin tü nümakat Pablo woutkajaapa namaa na wawalayuukana?  Shia sotuinjatüin waaʼin nasouteein wanaa wamaa na wawalayuukana sünain tü outkajawaakat.

12. ¿Kasa waaʼinrajatka süpüla nasoutuin maʼin na wawalayuukana sünain tü outkajawaakat? (Piirakaa sümüin tü ayaakuaakat).

¹² Süpüla wayaawatüin saaʼu tia, jülüja waaʼin wanee sukuwaʼipa. Paashajaainjachire namaa na paʼaleewainyuukana, nnojoishi pia asoutuin pejeewa namüin, puuʼulaain naashajaain napüshuaʼa. Müsia neʼe tü waaʼinrajatkat woutkajaapa namaa na wawalayuukana, wacheküin maʼin nasoutuin wainma wawalayuu sünain tü outkajawaakat. Wanee kasa waaʼinrajatka süpüla watütüleʼerajiraain waaʼin namaa na wawalayuukana shia wooʼulaale nasoutuin sünain tü outkajawaakat (1 Cor. 10:24, TNM). Wekirajaa sünain tü waaʼinrajatkat süpüla wountuin tia.

13. ¿Kasa waaʼinrajatka süpüla kojuyain na wawalayuu asoutuinjanakana sünain tü outkajawaakat?

¹³ Anasü paliʼirüle wanüiki wasoutapa sünain tü outkajawaakat. Waaʼinrüle tia, wainmeena na wawalayuu asoutakana sünain. Anashii nayale eʼitaain sukuwaʼipa tia na laülaashiikana otta na wawalayuu kakaliainakana sünain anoujaa. Paliʼirüinjatü tü wanüikikat wasoutapa, nnojotsü wainmainjatüin tü pütchi waashajaakalü achiki. Püküjale süpüshuaʼa tü aküjünakalü achiki suluʼu wanee pütchi, nnojoleerü eein sooʼomüin pütchi süpüla nasoutuin na waneinnua. Jamüsüjaʼa suluʼu pütchikat tüü, piamasü pütchi aashajaanaka achiki: paliʼirüinjatü wanüiki wasoutapa sünain tü outkajawaakat otta nnojoluinjatü wainmain tü pütchi waashajaakalü achiki. Püneekünüle süpüla pusoutuin sünain pütchikat tüü, anasü püküjale waneesia neʼe pütchi saʼakajee tü aashajaanakalü achiki yaʼaya.

14. ¿Kasa wayaawatüinjatka aaʼu palajana süpüla watüjaain saaʼu jeʼratuainjanain wasoutuin sünain tü outkajawaakat? (Piirakaa sümüin tü ayaakuaakat).

¹⁴ Piyaawata saaʼu jeʼratuainjatüin piyalerüin pajapü süpüla pusoutuin sünain tü outkajawaakat. Wayalerüle wajapü pejeewa, eesüjaʼa süpüla wapüleeruain naaʼin chi wawala oʼunirakai sukuwaʼipa tü ekirajawaakat jee nüneeküle waya kojuyatua süpüla wasoutuin noulialeʼeya na waneinnua. Sünainjee tia, eesüjaʼa süpüla jülüjain naaʼin na wawalayuukana nnojoluin choʼujaain nayalerüin najapü (Ecl. 3:7).

15. (1) ¿Kasa waaʼinrajatka nnojoliire waneekünüin süpüla wasoutuin sünain tü outkajawaakat? (2) ¿Kasa jülüjainjatka naaʼin chi wawala oʼunirakai sukuwaʼipa wanee ekirajawaa? (Paashajeʼera tü pütchikat « Waaʼinrajatka woʼunirüle sukuwaʼipa wanee ekirajawaa»).

 ¹⁵ Wainmale na wawalayuu ayalerakana najapü süpüla nasoutuin, eeshiijaʼa süpüla nnojoliin waneekünüin maʼin süpüla wasoutuin. Eesüjaʼa süpüla sujutaain tü outkajawaakat sümaa nnojoliin wasoutuin uwatuayaakalüje neʼe. Sutuma tia, eesü süpüla mojuin waaʼin. Müle wakuwaʼipa, nnojo wayüülajaain (Ecl. 7:9).

16. ¿Kasa waaʼinrajatka süpüla watütüleʼerüin naaʼin na wawalayuu asoutakana sünain tü outkajawaakat?

¹⁶ Mayaainjeʼe nnojolin püneekünüin maʼin süpüla pusoutuin sünain tü outkajawaakat, eesü süpüla jülüjain maʼin paaʼin nanüiki na waneinnua. Jaʼitashi nnojolin pusoutuin sünain tü outkajawaakat, pütütüleʼereeria naaʼin na wawalayuu asoutakana püküjale namüin anain maʼin tü nanüikikat (Prov. 10:21). Waaʼinrapa tia, watütüleʼerüinña naaʼin na wawalayuukana.

17. (1) ¿Kasa anaka süpüla naaʼinrüin na kachonshiikana? (2) Maʼaka weʼrüin suluʼu tü videokot, ¿jeʼtsü tü pienchisükat kasa waaʼinrajatka süpüla yapain watuma tü wanüikinjatkat sünain tü outkajawaakat? (Paashajeʼera tü nootakat).

¹⁷ ¿Kasa amaa waaʼinrajatka süpüla watütüleʼerajiraain waaʼin woutkajaapa namaa na wawalayuukana? Kachonleje pia, pükaalinja naya süpüla yapain natuma tü nanüikinjatkat sünain tü outkajawaakat  wanaapünaa sümaa tü nakuwaʼipakat (Mat. 21:16). Eesü pütchi wekirajaaka sünain tü outkajawaakat napülajatka neʼe na wayuu miyoʼuyuukana, maʼaka saaʼin tü sünainpünawaakat kaʼwayuusee jee tü amaʼüjirawaakalü akuwaʼipaa. Saʼakajee tia ekirajaayakat, eesü süpüla eein pütchi eeka süpüla nasoutuin anain na tepichikana. Eesiaʼaya süpüla püküjain namüin na püchonniikana jamüin nnojoleenaka naneekünüin süpüla nasoutuin sünain tü outkajawaakat. Püküjale tia namüin, nnojoleerü mojuin naaʼin naneekünüle na waneinnua noulia (1 Tim. 6:18). d

18. ¿Kasa waaʼinrajatka suulia waashajaain maʼin süchiki tü wakuwaʼipakat wasoutapa sünain tü outkajawaakat? (Proverbios 27:2).

¹⁸ Eesü süpüla yapain watuma tü wanüikinjatkat sünain tü outkajawaakat süpüla waʼwaajüin Jehová otta süpüla watütüleʼerüin naaʼin na wawalayuukana (Prov. 25:11). Mayaainjeʼe eein süpüla waküjawalin süchiki tü wakuwaʼipakat, anasü nnojorüle waashajaain maʼin süchiki (paashajeʼera Proverbios 27:2; 2 Cor. 10:18, TNM). Shianjaʼa anain maʼin waküjale süchiki nukuwaʼipa Jehová, süchiki tü Nünüikikat otta süchiki nakuwaʼipa na aʼyataashiikana nümüin (Alat. Map. 4:11). Eesiaʼaya süpüla waküjain süchiki tü wakuwaʼipakat wasakinnüle sünain wanee pütchi wamüinjatka maʼaka saaʼin tü asakinnakalü anain sünain tü pütchikat 19.

19. (1) ¿Kasa anasü weʼreetka kapürale waaʼin nakuwaʼipa na outkajaakana wamaa? (Roma 1:11, 12). (2) ¿Jamüsü kamalainka pümüin pusoutuin shiʼipajee tü asakinnakalü anain sünain tü outkajawaakat?

¹⁹ «Ayatashaatainjatü jutuma tüü jusoutapa sünain tü outkajawaakat», nnojoishii münüin waya. Mayaainjeʼe nnojoluin süküjünüin wamüin tia, anasü wachajaale maʼin sukuwaʼipa süpüla watütüleʼerüin naaʼin na waneinnua sükajee wanüiki. Eesü nayaawatüle saaʼu waneinnua wawalayuu choʼujaain nasoutuin kojuyatua sünain tü outkajawaakat. Eekajasaʼa namüin waneinnua, anainjatü naaʼin nasoutapa sünain tü outkajawaakat jaʼitainna nnojoliin naneekünüin kojuyatua süpüla tia jee talatüinjana naya süka eein waneinnua wawalayuu asouteekana sünain tü outkajawaakat. Kapürale waaʼin nakuwaʼipa na outkajaakana wamaa, watütüleʼerajiraajeerü waaʼin waneʼewai wakua (paashajeʼera Roma 1:11, 12).