1, 2. ¿Jamüshii wekirajüinjanaka na waneeinnua?

NÜCHAJAAIN maʼin sukuwaʼipa Jesuu süpüla nüküjüin tü pütchi anasü süchikikat Nuluwataaya Maleiwa. Otta müsia niʼiküin na nikirajüinkana süpüla natüjainjanain ekirajaa wayuu jee süpüla naaʼinmajüin na anoujashiikana (Mat. 10:5-7). Akaataajaʼa Felipeya, jülüjasü naaʼin waneepia tü aküjaakat pütchi. Nikirajapejeʼe tü nüchoinkalüirua süpüla natüjain aküjaa pütchi (Aluw. 21:8, 9). Müinjatü watuma wayakanaya, wekirajüinjana na waneeinnua. ¿Jamüsü waaʼinrüinjatka tia?

² Sainküin mmakat süpüshuaʼa, watta naalii na eiwaʼaliikana ekirajaain sünain tü Wiwüliakat otta nnojoyüliʼiya naya woutiisain, choʼujaasüjeseʼe nekirajünüin. Wakaaliinjeein naya süpüla nayaawatüin saaʼu jamüin choʼujaaka naashajeʼerüinjatüin tü Wiwüliakat sümaa nekirajaain sünain namüiwaʼa. Wekirajeein naya süpüla natüjain aküjaa pütchi süchiki Nuluwataaya Maleiwa jee natüjain ekirajaa wayuu. Akaʼaya na wawalayuu jekenakana woutiisain, wekirajeein naya süpüla naʼyataaliinjanain neʼipajee na laülaashiikana jee süpüla laülaashiinjanain naya. Napüshuaʼa na wawalayuukana, eeshii süpüla nakaaliinjain na jekennuukana (Prov. 4:2).

3, 4. (1) ¿Jamüshi nütüjeechika aküjaa pütchi wanee wayuu eekai nikirajaain waneepia sünain Nünüiki Maleiwa naashin Pablo? (2) ¿Kasa waaʼinrajatka süpüla watütüleʼerüin naaʼin na waneeinnua süpüla neʼiküinjanain wayuu sünain tü Wiwüliakat?

³ Wayakana wapüshuaʼa aʼyataakana nümüin Jeʼwaa choʼujaasü waashajeʼerüinjatüin tü Wiwüliakat sümaa wekirajaain sünain süpüla wayaawatüin saaʼu tü keeʼireekat naaʼin Jeʼwaa. Aashajaashi Pablo süchiki tia namaa na anoujashii chejeʼewaliikana Colosas. Müshi nia: «Ayatshiʼiya waya achuntüin süpüla kekiinjanain jia nütüma [Maleiwa] süpüla jiyaawatüinjatüin saaʼu nukuaippa nükajee chi Naaʼinkai süpüla jütüjaainjatüin saaʼu tü nüchekakat jüpüleerua». Choʼujaashaatasü maʼin naashajeʼerüin naya anoujashiikana tü Nünüikikat Maleiwa jee nekirajaain sünain. Naashin Pablo, kekiinjana naya sükajee tia otta naaʼinrüinjatü tü keeʼireekat naaʼin Maleiwa. Jee müsia naaʼinreerü tü kasa anasü keeʼireekat naaʼin Maleiwa maʼaka saaʼin aküjaa tü pütchi anasükat (Col. 1:9, 10). Wekirajapa wanee wayuu sünain tü Wiwüliakat, wakaaliinjeein nia süpüla niyaawatüin saaʼu niʼyataajeechin nümüin Jeʼwaa naashajeʼerüle tü Wiwüliakat weinshi sümaa nikirajaain sünain.

⁴ Nnojoleena wakaaliinjain na wekirajüinkana sünain ayaawataa saaʼu choʼujaain maʼin nekirajaain sünain tü Wiwüliakat nnojoliire wekirajaain sünain weinshi. Aneena waya otta atüjeena waya aküjaa pütchi müleka waashajeʼerawaire tü Wiwüliakat sümaa wasakireʼerüin waaʼin sünain tü waashajeʼerakat. Jamüshijaʼa nüsakirüle waya wanee wayuu süchiki tü wanoujakalü anain, asoukteena waya nümüin sükajee tü Wiwüliakat jaʼitairü kapüleein tü nüsakitkalü anain. Waashajeʼerüle süchiki nukuwaʼipa Jesuu, nukuwaʼipa Pablo otta süchiki nakuwaʼipa waneeinnua sünain aküjaa pütchi, atütülaajeerü waaʼin otta ayateena waya aküjüin pütchi jaʼitairü kapüleein shia wamüin. Akaʼaya na wawalayuukana, eesüjaʼa süpüla keeʼireejeerüin naaʼin nekirajaain maʼin sünain tü Wiwüliakat müleka waküjüle namüin süchiki tü wekirajaakalü anain otta waküjüle namüin tü sükaaliinjakalü anain waya tia.

5. Püküja süchiki wanee kasa akaaliinjeenaka na wekirajüinkana süpüla kamalain namüin ekirajawaa sünain tü Wiwüliakat.

⁵ Eesüjaʼa wasakireʼerüirüle waaʼin jameerüin nükaaliinjia chi wekirajüinkai süpüla nikirajaainjachin weinshi sünain tü Wiwüliakat. Eesü süpüla weeʼiyatüin nümüin jamüinjatüin sukuwaʼipa tü wekirajaainjatkat nümaa. Maʼaka saaʼin nüchajaain tü wetsiikuloirua suluʼukat tü pütchikalüirua. Wekirajaale sünain Kasa shikirajaka, eesü süpüla wamüin nümüin naashajeʼerai tü sooʼomüin pütchi makat sünain tü karalouktakat. Wanee waaʼinrajatka shia weeʼiyatüin  nümüin jamüin sukuwaʼipa tü outkajawaakat süpüla weʼitaain nüpüleerua nusouktajachin sünain. Wama nümüin naashajeʼeraiwa süpüshuaʼa tü rewiisütakalüirua Aapiria wayuu otta ¡Despertad! Otta eein süpüla nikirajaain sünain tü asakinnakalü anain suluʼujee tü Wiwüliakat süka Watchtower Library otta PÜTCHIPÜLEE SULUʼUKA INTERNET sutuma Watchtower. Nuuʼulaküle chi wekirajüinkai tü waküjüitpakalü achiki, kamalainjeerü nümüin ekirajawaa sünain tü Wiwüliakat.

6. (1) ¿Kasa akaaliinjeechika chi pikirajüinkai süpüla kamalain nümüin ekirajawaa sünain tü Wiwüliakat? (2) ¿Jameetche naaʼin chi pikirajüinkai kamalainre nümüin ekirajawaa sünain tü Wiwüliakat?

⁶ Wekirajaale sünain tü Wiwüliakat nümaa wanee wayuu, keeʼireesü waaʼin niyaawatüinjatüin saaʼu choʼujaain maʼin nikirajaainjachin sünain tü Wiwüliakat süpüla niʼraajüinjachin maʼin Jeʼwaa. Wekiraja na wekirajüinkana süpüla kamalain namüin ekirajawaa otta nnojo wapüleeruain naaʼin. Nikirajaale maʼin sünain tü Wiwüliakat kamalainjeerü maʼin nümüin ekirajawaa sünain. Eeshi süpüla müin naaʼin maka naaʼin chi eeʼiraikai soʼu nümüin: «Kamalainsü tamüin arütkawaa nünainmüin Maleiwa. Nia teʼitaaka anain taaʼin Jeʼwaa chi Senyot Pülashikai maʼin» (Sal. 73:28, TNM). Nükaaliinjeechi nia Jeʼwaa nükajee chi naaʼinkai süpüla aleewainjachin nia nümaa.

7. ¿Jamüsü nekirajia na aluwataaushiikana nutuma Jesuu süpüla aküjaa pütchi? (Piirakaa sümüin tü ayaakuaa suluʼukat süpana 21).

⁷ Atüjeena waya ekirajaa jülüjale waaʼin jamüin nekirajia na aluwataaushiikana nutuma Jesuu. Aküjapuʼushi nia pütchi namaa, nashatüinjeseʼe tü sukuwaʼipakat nüküjia pütchi sümüin wayuu. Nikirajüin Jesuu na aluwataaushiikana jamüinjatüin naküjia pütchi (Mateo kapiitulo 10). ^[1] Sünain neʼe palit kaʼi, atüjamaatüshii ekirajaa na aluwataaushiikana sünain tü shiimainkat nüchiki Maleiwa (Mat. 11:1). Wekirajaa joo süchiki piamasü kasa eeka süpüla wekirajüin anain na wekirajüinkana waküjapa pütchi.

8, 9. (1) ¿Jamapuʼusü sukuwaʼipa nutuma Jesuu süpüla yootoo sümaa wayuu? (2) ¿Jamüinjatü nakaaliinjia na jekennuukana sünain aküjaa pütchi süpüla yootuin naya sümaa wayuu maʼaka naaʼinrüin Jesuu?

⁸ Yootuinjana waya namaa na wayuukana. Nnojoishi neʼe yootuin Jesuu suʼupala wainma wayuu, yootowaishi nia namaa na wayuukana waneʼewai nakua. Aleewapuʼushi nia namaʼaya. Yootushinka nia sümaa wanee jiet ajaʼitaka wüin suluʼu wanee ishi chaa suluʼu tü pueulokot Sicar (Juan 4:5-30). Yootushinka niaʼaya nümaa wanee wayuu achekajüi nneerü neʼipajee na sülaülakana mma, Mateo Leví nünülia. Nuunejaain nia Jesuu süpüla nikirajaainjachin nümaa, «aa» nümaka Mateo nümüin. Ounejaanüshi Jesuu nutuma Mateo otta wanee wayuuinnua süpüla neküin nümaʼana. Soʼu tia aashajaashi Jesuu suʼupala wainma wayuu (Mat. 9:9; Luc. 5:27-39).

⁹ Eejachi wanee wayuu kanüliashi Natanael, mojusü nünüiki nachiki na wayuu chejeʼewaliikana Nazaret, eejeʼewaire Jesuu. Mayaapejeʼe müin chia wayuukai, ayatshia kamaneein Jesuu nümüin. Sutuma müin nia nümüin Natanael aʼwanajaasü naaʼin nutuma otta ekirajaweeshi nia sooʼomüin nüchiki Jesuu (Juan 1:46-51).  ¿Kasa shikirajaka anain waya nukuwaʼipa Jesuu? Kamaneere sümaa anamiain waya namüin na wayuukana, eesü süpüla naapajüin wanüiki. ^[2] Wekiraja na jekennuukana süpüla kamaneeinjanain naya otta aleewainjanain sümaa wayuu. Müle naya watuma talateerü naaʼin sünain aküjaa pütchi.

10-12. (1) ¿Kasa naaʼinraka Jesuu süpüla kamalainjatüin sümüin wayuu tü pütchi nikirajakalü anain? (2) ¿Kasa waaʼinrajatka süpüla wakaaliinjain na jekenakana aküjüliin pütchi süpüla natüjainjanain ekirajaa wayuu?

¹⁰ Wekirajüinjana na aapajakana wanüiki. Wainma maʼin kasa naaʼinraka Jesuu. Na kamalainkana amüin aapajaa nünüiki Jesuu, kachipünaasü naaʼin nünüiki otta nekirajüin naya sünain wainma kasa. Soʼu wanee kaʼi, eejatü wainma maʼin wayuu sotpaʼa wanee palaa aapajüsüirua nünüiki Jesuu. Noʼotooka suluʼu wanee anua nümaa Pedro, nikirajaka na wayuukana yalejee. Süchikijee tia, ekirajünüshi Pedro nutuma sünain wanee kasa. Naainjaka Jesuu wanee kasa pülasü süpüla nataʼülüin wainma jime. Nümaka süchikijee: «Maa aka olojülin pia jime, okotchajeechi joo pia wayuu tamüin süpüla saapajüinjatüin tanüiki». Saashin tü Wiwüliakat, nüpütüin Pedro otta na nümaajanakana «süpüshua tü nakorolokot süpüla oʼunaa nümaa Jesús», nümaatalashii naya soʼujeʼereʼeya tia (Luc. 5:1-11).

¹¹ Eetaashinka wanee wayuu ekirajaweekai sooʼomüin nüchiki Jesuu, Nicodemo nünülia. Chia wayuukai, noʼutku na aʼyataakana suluʼu tü kanüliakat Sanedrín. Eesü naaʼin suulia jamajüin nanüiki na wanee judíokana nümüin neʼrüle nia yootuin nümaa Jesuu. Müshijeseʼe nuʼunüin nümaʼanamüin Jesuu aipaʼa süpüla yootuin nia nümaa. Kamaneeshi Jesuu nümüin wayuukai otta nikirajüin nia sünain waneeirua kasa anashaatasü maʼin (Juan 3:1, 2). Ayuʼtshi Jesuu kaʼi waneepia süpüla nikirajüin wayuu sünain tü shiimainkat jee süpüla nükatsüinrüin nanoula. Müinjana wayakanaʼaya, ouyantüinjana namaʼanamüin na wayuukana soʼu tü oora anakat namüin, ayuʼlüinjana waya kaʼi süpüla wekirajüin naya.

¹² Waküjapa pütchi namaa na jekenakana anoujain, eeshii süpüla wekirajüin naya sünain ouyantawaa nachikuaʼa namaʼanamüin na wayuu ekirajaweekana sünain tü Wiwüliakat. Eeshii süpüla wouyaajanain naya sünain ouyantawaa wachikuaʼa sümaʼanamüin wayuu otta sünain ekirajaa wayuu. Sükajee tia, atüjeena naya ekirajaa wayuu sünain tü Wiwüliakat otta nakaaliinjeerü wayuu süpüla shiʼraajüinjachin Jeʼwaa. Mapa, kamalainjeerü namüin aaʼinraa tia. Akaʼaya naya, atüjeena achechera naaʼin otta ayateena naya ouyantaain nachikuaʼa sümaʼanamüin wayuu jaʼitairü nnojoluin shia napüla (Gal. 5:22) (paashajeʼera tü pütchikat « Ayatüshi nia masütaajüin»).

13, 14. (1) ¿Kasa shikirajaka anain waya nakuwaʼipa na wayuu aaʼinrakana kasa süpüleerua wayuu sümaiwa paala? (2) ¿Kasa waaʼinrajatka süpüla wekirajüin na jimaʼaliikana otta na jekennuukana sünain anoujaa süpüla naaʼinrüin kasa anasü napüleerua na wawalayuukana?

¹³ Nücheküin Jeʼwaa süpüleerua aijiraainjanain na aʼyataashiikana nümüin sümaa nakaaliinjiraain (paashajeʼera Lucas 22:24-27 otta 1 Pedro 1:22). Saashin tü Wiwüliakat, wainma kasa naaʼinraka Jesuu süpüla nükaaliinjain wayuu otta aapajiraashi nia nikii saaʼu wayuu (Mat. 20:28). Eepuʼusü wanee anoujasü Dorcas sünülia, saaʼinrapuʼuin tü anasükat waneepia süpüla sükaaliinjain wayuu (Aluw. 9:36, 39). Eetaasü waneʼeya, María sünülia, «tütüsü sünain aʼyatawaa» napüleerua na anoujashii chejeʼewaliikana Roma (Roma 16:6). ¿Kasa waaʼinrajatka süpüla wekirajüin na jekennuukana sünain anoujaa süpüla naaʼinrüin kasa anasü napüleerua na wawalayuukana?

 ¹⁴ Eeshii süpüla wounejaain na jekenakana anoujain süpüla noʼunüin wamaa sünain awaraijawaa naaʼu na wawalayuu laülaainnakana jee na ayuuikana. Na kachonshiikana, namaweeshii na nachonniikana anashiire shia. Na laülaashiikana suluʼu tü outkajaaleekat, eeshii süpüla nachuntüin kaaliinwaa namüin na jimaʼaliikana jee namüin na jekenakana sünain anoujaa süpüla neʼikajaain neküin na laülaainnakana jee shiale süpüla nakumajüin wanee kasa nepialuʼu naya wawalayuukana. Neʼrüle na jimaʼaliikana jee na jekennuukana jülüjain waaʼin na wawalayuukana, nashateerü tia wanainjee. Anuu tü naaʼinrapuʼukat wanee laülaashi: wanaa sümaa nüküjawalin pütchi namüin na wayuu kepiakana wattaluʼu suulia tü pueulokot, nünaʼlaapuʼu amüinna na wawalayuu kepiakana chayaa. Sutuma naaʼinrüin tia, nüshatüin tü nukuwaʼipakat wanee jimaʼai nümaatalapuʼukai. Atüjashi nia akaaliinjaa na wawalayuukana (Roma 12:10).

15. ¿Jamüsü choʼujaaka nakaaliinjünüin na wawalayuu tooloyuukana natuma na laülaashiikana?

¹⁵ Nikirajüin waya Jeʼwaa nakajee na wawalayuu ekirajakana suluʼu tü outkajaaleekat, müsüjeseʼe choʼujaain natüjainjanain ekirajaa na wawalayuu tooloyuukana. Eeshii süpüla nakaaliinjünüin natuma na laülaashiikana süpüla natüjaleeinjanain ekirajaa. Jamüshijaʼa nikirajüinjachire sünain wanee pütchi wanee wawala aʼyataaikai neʼipajee na laülaashiikana, eesü süpüla nuuʼulaküin tü nünüikinjatkat nuʼupala wanee laülaashi süpüla nükaaliinjünüin nutuma (Neh. 8:8). ^[3]

16, 17. (1) ¿Kasa naaʼinraka Pablo sutuma keeʼireein naaʼin nütüjainjachin Timoteo? (2) ¿Kasa naaʼinrajatka na laülaashiikana süpüla nekirajüin na wawalayuu tooloyuukana sünain aaʼinmajaa na anoujashiikana?

¹⁶ Choʼujaashaatasü maʼin nekirajünüin nooʼomüin wawalayuu tooloyuu süpüla jülüjain naaʼin na wawalayuukana suluʼu tü outkajaaleekat (paashajeʼera «Pütchi pütüjaainjatka aaʼu»). Nikirajüin Pablo Timoteo otta nuluwataain nia sünain ekirajaa na waneeinnua. Müshi nia nümüin: «Anakaja müleka katchinre paaʼin waneepia [...]. Je tü pütchi tekirajapüʼükat anain pia paala suʼupala wayuu wainma, anakaja piʼitaale jooluʼu shia napüleerua na anoujashiikana eekai neʼnnaajünüin sünain aaʼinraa waneepia tü aluwataanakat anain naya je eekai tütüin süpüla ekirajaa. Anakaja piʼitaale shia napüleerua süpüla nekirajüinjatüin wayuu sünain» (2 Tim. 2:1, 2). Watta saalii kasa nütüjaka Timoteo nünainjee Pablo süka laülaashin jee aluwataaushin Pablo soʼu tia. Müshijeseʼe nütüjain Timoteo aküjaa pütchi jee akaaliinjaa na anoujashiikana (2 Tim. 3:10-12).

¹⁷ Kakalia Pablo sünain ekirajaa Timoteo süka keeʼireein naaʼin nütüjainjachin maʼin (Aluw. 16:1-5). ¿Kasa naaʼinrajatka na laülaashiikana  süpüla nashatüin nukuwaʼipa Pablo? Anashii nounejaale na aʼyataaliikana neʼipajee eekai natüjüin süpüla nawaraijaain naaʼu na wawalayuukana süpüla natütüleʼerüin naaʼin. Sünainjee tia, atüjeena ekirajaa na aʼyataakana neʼipajee na laülaashiikana, nachechereerü naaʼin suulia jashiee otta aipüraliijeena naya. Kiʼreena nayaʼaya sünain achuntaa kaaliinwaa nümüin Jeʼwaa süpüla aaʼinmajaa na anoujashiikana (1 Ped. 5:2).

18. ¿Jamüsü choʼujaaka wekirajüin na wawalayuukana sünain aʼyatawaa nümüin Jeʼwaa?

¹⁸ Maaʼulu yaa, choʼujaasü maʼin nekirajünüin na jekenakana anoujain süpüla natüjainjanain aküjaa pütchi. Jee müsia, choʼujaashii wawalayuu aaʼinmajüinjanaka na anoujashii suluʼukana tü outkajaaleekat. Keeʼireesü naaʼin Jeʼwaa natüjainjanain napüshuaʼa na aʼyataashiikana nümüin otta niʼitaain wajapuluʼu wekirajüin na jekenakana anoujain. Choʼujaasü maʼin wekirajüin na wanee wawalayuukana maʼaka saaʼin nutuma Jesuu otta Pablo. Müshiijeseʼe wekirajüinjanain napüshuaʼa na wawalayuukana süka wainmain aʼyatawaa eeka maaʼulu süpülapünaa sajaʼttüin kasakat süpüshuaʼa.

19. ¿Jamüsü pütüjaaka saaʼu anain wachajaale sukuwaʼipa süpüla wekirajüin na wawalayuukana?

¹⁹ Kapüleesü ekirajaa na jekennuukana otta choʼujaasü wakatalüin kaʼi süpüla waaʼinrüin tia. Watüjaapejeʼe saaʼu nükaaliinjeenain waya Jeʼwaa nümaa Jesuu süpüla anainjatüin watuma nekirajia naya wawalayuukana. Jee müsia talateena waya weʼrapa naya naʼyataain napüleerua na wawalayuukana suluʼu tü outkajaaleekat jee sünain aküjaa pütchi (1 Tim. 4:10). Akaʼaya waya, wachajaainjatü sukuwaʼipa süpüla kooʼomüinjatüin wanoula, wanouktüin wakuwaʼipa otta aleewain maʼin waya nümaa Jeʼwaa.