1, 2. (1) ¿Jamüsü shikeraajia Isaías 60:22 maaʼulu yaa? (2) ¿Kasa choʼujaaka suluʼu nupueulose Maleiwa maaʼulu yaa?

«AWAINMALAAJEENA maʼin na wayuu paliʼitkana. Tayakai Jeʼwaa, tayeechi kooʼomüinka atuma naya», müsü tü Wiwüliakat (Is. 60:22, TNM). Ekeraajüsü pütchikat tüü maaʼulu yaa. Jamüsüjaʼa soʼu tü juyakat 2015, eejana 8.220.105 wawalayuu aküjakana pütchi sainküin mmakat süpüshuaʼa. Müshi Jeʼwaa: «Tayakai Jeʼwaa, tayeechi kooʼomüinka atuma naya». Sutuma tia, watüjaa aaʼu kooʼomüin kooʼomüin sümeerüin shiʼipaʼaya tü waʼyataainkat nümüin Jeʼwaa. ¿Wachajaainche sukuwaʼipa süpüla waküjüin pütchi otta wekirajüin wayuu süchiki Nuluwataaya Maleiwa? Watta naalii wawalayuu tooloyuu otta jieyuu pürekutsootkana rekulaat otta eeshii eekai pürekutsoolüin aaʼusiliaat. Eeshii wawalayuu eekai nakolojooin suluʼumüin wanee mma eere choʼujaain aküjülii pütchi. Jee eeshii eekai naʼyataain sünain akumajaa Piichi Outkajaalee.

² Akumajaasü maʼaka 2.000 outkajaalee jeket juyawai sainküin mmakat. Choʼujaashii wawalayuu eekai laülaashin otta na aʼyataakana neʼipajee süpüla nakaaliinjain na wawalayuu suluʼukana tia outkajaaleekalüirua. Sutuma tia, choʼujaashii na wawalayuu tooloyuu  aʼyataainjanakana neʼipajee na laülaashiikana suluʼu tia outkajaaleekalüirua otta müshiʼiya na aʼyataakana neʼipajee na laülaashiikana maaʼulu yaa, nasaʼwateein laülaashiinjanain naya. Wainma maʼin aʼyatawaa suluʼu nupueulose Maleiwa napüla na wawalayuu tooloyuukana otta na jieyuukana (1 Cor. 15:58, TNM).

3, 4. ¿Kasa eeka süpüla waʼyataain anain nümüin Jeʼwaa?

³ (Paashajeʼera 1 Timoteo 3:1). Anasü nünüiki Pablo namüin na wawalayuu «eekai keeʼireein naaʼin» aʼyatawaa napüleerua na wawalayuukana suluʼu tü outkajaaleekat. Wanaa sümaa «eekai keeʼireein naaʼin» nümüin Pablo, shia nüküjaka tü naaʼinrakat wanee wayuu achajaakai sukuwaʼipa süpüla naapaain wanee kasa wattaka nuulia, müshi niyurulakai saaʼin nütüna süpüla naapaain shia. Eesüjaʼa niyaawatüle saaʼu wanee wawala nunoukteʼerüinjatüin nukuwaʼipa süpüla niʼyataalinjachin neʼipajee na laülaashiikana. Shiasaʼa naaʼinrapa tia, aneeküneechi nia süpüla niʼyataain neʼipajee na laülaashiikana. Aʼyataainjaipajaʼa nia süchiirua nüsaʼwatüin laülaashin nia suluʼu tü outkajaaleekat.

⁴ Eeshii wawalayuu anoukteʼeraka nakuwaʼipa süpüla kooʼomüin natuma naʼyataain nümüin Jeʼwaa. Eeshii eekai pürekutsooleein, eeshii eekai naʼyataweein suluʼu Weteet jee naʼyataweein sünain akumajaa Piichi Outkajaalee. Wekirajaa sünain tü sükaaliinjeenakalü anain waya tü Wiwüliakat süpüla ayatüin kooʼomüin wanoula otta waʼyataain nümüin Jeʼwaa.

5. ¿Kasa eeka süpüla naaʼinrüin na jimaʼaliikana otta na majayünnüükana sutuma katsüinjüin naya?

⁵ Wainma kasa eeka süpüla naʼyataain anain nümüin Jeʼwaa na jimaʼaliikana jee na majayünnüükana süka katsüinjüin naya otta nnojoluin ayuulin naya (paashajeʼera Proverbios 20:29). Eeshii jimaʼalii aʼyataakana suluʼu Weteet sünain akumajaa otta eʼinpürimiijaa karaloukta. Eeshii na aʼyataakana sünain anouktaa jee akumajaa Piichi Outkajaalee. Nnaʼaya eekai naʼyataain sünain akaaliinjaa na müliakana sutuma sukutkujaain mma jee süsetüin wüin. Watta naalii na pürekutsoot ekirajaakana sünain wanee anüikii naatajatü otta okolojookana eere choʼujaain aküjülii pütchi.

6-8. (1) ¿Kasa naaʼinraka wanee wawala süpüla kojutüinjatüin nümüin aʼyatawaa nümüin Jeʼwaa? ¿Kasa niʼraka sünainjee tia? (2) ¿Jamüsü watüjaaka saaʼu anamiain Jeʼwaa?

⁶ Mayaainjeʼe alin wapüla Jeʼwaa sümaa waʼyataweein nümüin süka süpüshuaʼa waaʼin, eesü süpüla müin wakuwaʼipa maʼaka naaʼin wanee wawala Aaron nünülia. Nnojoishi nia talatüin sünain aʼyatawaa nümüin Jeʼwaa, eerejeʼe niʼyataweein nümüin süka süpüshuaʼa naaʼin. Oʼunapuʼushi nia sünain tü outkajawaakat jee sünain aküjaa pütchi jintüliiwaʼaya nia, akulajaapejeʼe naaʼin waneepia. ¿Kasaka naaʼinrüin chi wawalakai?

⁷ Nüchajaain sukuwaʼipa süpüla naashajeʼerüinjatüin tü Wiwüliakat weinshi, nikirajaa anainrü tü pütchi süpülajatkat tü outkajawaakat otta asouktüshi nia shiʼipajee tü asakinnakalü anain. Jee müshia nia, oʼuraajawaishi waneepia. Sutuma naaʼinrüin tia, kooʼomüinsü nunoula otta niʼyataain nümüin Jeʼwaa. Niʼraajaleeichipa Jeʼwaa sümaa aireein nüpüla. Talatüshi nia suluʼujee tia. Pürekutsootshi Aaron mapa, nükaaliinjain na müliakana sutuma sukutkujaain mma jee süsetüin wüin nepialuʼu otta okolojooshi nia suluʼumüin wanee mma naatajatü süpüla nüküjüin pütchi. Maaʼulu yaa, laülaashi suluʼu tü outkajaaleekat sümaa niʼyataain suluʼu Weteet. Naashin chi wawalakai, niʼrüin sünain anamiain maʼin Jeʼwaa. Müshi kojuyaalakai naaʼin nuulia Jeʼwaa naashin otta  kooʼomüinweesü niʼyataain nümüin. Nütüjaa aaʼu niʼreechin kasa anasü naaʼinrüle tia.

⁸ Anuu nünüiki chi salmistakai: «Jiyaawata saaʼu süka jukuwaʼipa jümüiwaʼa anain Jeʼwaa [...]. Na achajaakana Jeʼwaa nnojoleerü choʼujaain kasa anasü namüin» (paashajeʼera Salmo 34:8-10). Waʼyataale süka süpüshuaʼa waaʼin nümüin Jeʼwaa, talateerü waaʼin süka watüjaain saaʼu nücheküin Jeʼwaa tia. Akaʼaya nia, nikeraajeerü nünüiki wamüin sünain naaʼinmajüinjanain waya.

9, 10. ¿Jamüsü nnojoluinjatka süshapalaain waaʼin?

⁹ Eesüjaʼa kooʼomüinweere watuma waʼyataain nümüin Jeʼwaa. Nnojotpejeʼe ashapalaainjatüin waaʼin kakaliainnale waya sünain aʼatapajaa waneekünüin süpüla wanee aʼyatawaa suluʼu tü outkajaaleekat jee shiale waʼatapajüin sunouktaainjatüin wakuwaʼipa (Miq. 7:7). Eesü nuuʼulaajeerüle Jeʼwaa kakaliain tia. Weʼitaainjatpejeʼe waaʼin nünain süka nükaaliinjeenain waya. Majatüinka nukuwaʼipa Abraham. Nüküjüin Jeʼwaa sünain kachoinjachin Abraham, kojuyapejeʼe juya alataka süpülapünaa joʼuuin Isaac. Nnojotsü ashapalaain naaʼin Abraham suʼunnaa tia otta ayatüshi nia kanoulain waneepia nünain Jeʼwaa (Gén. 15:2-4; 21:5; Heb. 6:12-15).

¹⁰ Kapüleesü nümüin wanee wayuu nnojolinjachin nüshapalaain aaʼin (Prov. 13:12). Mojeetpejeʼe waaʼin sümaa ütteerüin waaʼin jülüjakuʼu müle waaʼin kakaliain tü kasa waʼatapajakat. Shia anaka aluʼu wanoukteʼerüle wakuwaʼipa süpüla eeinjatüin wanain tü akuwaʼipaa choʼujaakat süpüla wakaaliinjain na wawalayuukana. Wekirajaa sünain apünüinsü kasa eeka süpüla waaʼinrüin suʼunnaa waʼatapajüin.

11. (1) ¿Jarat tü akuwaʼipaa anakat süpüla waʼyataain achiirua? (2) ¿Jamüsü choʼujaaka eeinjatüin wanain tia akuwaʼipaakalüirua?

¹¹ Waʼyataa süchiirua tü akuwaʼipaa choʼujaakat wamüin. Waashajeʼerüle tü Wiwüliakat sümaa jülüjain waaʼin tü waashajeʼerakat suluʼujee, kekiijeena waya, atüjeena waya ayaawataa saaʼu wanee kasa otta atüjeena waya aneeka tü kasa anakat süpüla waaʼinrüin. Choʼujaasü müinjatüin nakuwaʼipa na wawalayuu tooloyuukana süpüla anain naaʼinmajia na wawalayuukana natuma (Prov. 1:1-4; Tito 1:7-9). Wanaa sümaa wekirajaain sünain tü Wiwüliakat, wayaawata aaʼu jamüin nünüiki Jeʼwaa süchiki wanee kasa. Anasü süpüshuaʼa tia wekirajaakalü anain süpüla watüjainjanain aaʼinraa waneepia tü nüchekakat Maleiwa. Jamüshiijaʼa waya, atüjeena süpüleerua tü wanüikinjatkat sümüin wayuu, watüjaajeerü aaʼu tü anakat süpüla wayaʼlajüin süka wanneetse, tü kuluulu anakat süpüla waʼatüin wanain jee tü anakat süpüla washaittüin.

12. ¿Kasa waaʼinrajatka süpüla watüjaanüin aaʼu sünain lotuin wakuwaʼipa?

¹² Wekeraaja tü aʼyatawaa eʼitaanakalü wajapuluʼu. Soʼu chajanain na israeliitakana sünain akumajaa tü aʼwaajüleekat Maleiwa, choʼujaashii nümüin Nehemías waneeinnua wayuu süpüla naaʼinrüinjatüin waneeirua aʼyatawaa.  Naya nüneekaka Nehemías na lotokana akuwaʼipa süka nütüjaain aaʼu alin Maleiwa napüla jee nütüjaa aaʼu naaʼinreerüin tü aluwataanakalü anain naya (Neh. 7:2; 13:12, 13). Müsia neʼe sukuwaʼipa maaʼulu, eere wanee wawala eekai naaʼinrüin waneepia tü aluwataanakalü anain nia sümaa niʼyataalin maʼin, atüjaaneechi aaʼu lotuin nukuwaʼipa. Suluʼujee tia, eesü süpüla saapünüin nümüin sooʼomüin niʼyataain (1 Cor. 4:2). Wayakana wapüshuaʼa, tooloyuukana otta jieyuukana, wekeraajüinjatü tü aʼyatawaa eʼitaanakat wajapuluʼu (paashajeʼera 1 Timoteo 5:25).

13. ¿Kasa waaʼinrajatka süpüla washatüin nukuwaʼipa José saainjünüle kasa mojusü wamüin?

¹³ Weʼitaa waaʼin nünain Jeʼwaa. Naaʼinrüle kasa mojusü wanee wayuu wamüin, eeshii süpüla waküjüin nümüin jamüin waaʼin sutuma tü naaʼinrakat. Nnojotpejeʼe waküjakuʼu wamüinjatüin waneepia nümüin nnojoluin anain tü naaʼinrakat wamüin süka eein süpüla mojuleein wakuwaʼipa nümaa. Jülüja waaʼin tü alatakat nümüin José. Mojusü maʼin tü naaʼinrakat na nuwalayuukana nümüin, mapa, püreesashi nia atumawaa sümaa nnojoluin kasain naainjalain. Niʼitaain naaʼin José nünain Jeʼwaa otta jülüjasü naaʼin tü kasa naaʼinrajatkat Jeʼwaa. Müshijeseʼe jüüjüüin nia nümüin waneepia (Sal. 105:19). Suʼunnaa niʼrüin nümüliala José, aʼyataashi nia süchiirua eeinjatüin nünain akuwaʼipaa anasü. Sutuma tia, nikeraajüin tü aʼyatawaa eʼitaanakalü najapuluʼu mapa (Gén. 41:37-44; 45:4-8). Saainjünüle kasa mojusü wamüin, achunteeshii  waya kekiiwaa nümüin Jeʼwaa. Nükaaliinjeena waya süpüla nnojoluin waashichijaain jee süpüla kamaneein waya waashajaapa nümaa chi kaainjalashikai woulia (paashajeʼera 1 Pedro 5:10).

14, 15. (1) ¿Jamüsü eeinjatka waaʼin sünain tü sukuwaʼipakat wekirajia? (2) ¿Kasa paaʼinrajatka süpüla punoukteʼerüin sukuwaʼipa pikirajia? (Piirakaa sümüin tü ayaakuaa suluʼukat süpana 15 otta paashajeʼera tü pütchikat « Wachajaweein sukuwaʼipa»).

¹⁴ Nüküjüin Pablo nümüin Timoteo nunoukteʼerawalinjatüin sukuwaʼipa nikirajia. Anuu sooʼomüin nünüiki Pablo: «Ee paaʼin sünain tü pukuaippakat suulia paaʼinrajüin kasa mojusü je suulia pikirajüin sünain kasa naatajatü» (1 Tim. 4:13, 16). ¿Jamüsüche nunoukteʼerawalinjatka Timoteo sukuwaʼipa nikirajia sümaa kakaliaichin nia sünain aküjaa pütchi? Shia süka suʼwanajaʼawalin sukuwaʼipa wayuu. Süpüla saapajüinjatüin wayuu nünüiki Timoteo, nunoukteʼerüinjatü nikirajia süpüla anainjatüin shia. Müinjatia watuma waküjapa pütchi.

¹⁵ Eesü nnojorüle wayuu shipialuʼu wapüla wanaa sümaa waküjüin pütchi. Suluʼu waneeirua mma, nepialuʼushii na wayuukana, shiajaʼa neʼe kapüleein wamüin yootoo namaa süka süttüin nepia. Wachajaweein sukuwaʼipa süpüla waküjüin pütchi namüin naya wayuukana.

16. ¿Kasa waaʼinrajatka süpüla anainjatüin wakuwaʼipa sünain aküjaa pütchi eere jouluin wayuu?

¹⁶ Watta naalii wawalayuu kamalainkana amüin aküjaa pütchi eere jouluin wayuu maʼaka saaʼin süshaʼwajüle türein, süshaʼwajüle wuusü, metkaaruluʼu otta patkeruʼu. Süpüla noʼttüin sünain aashajawaa sümaa wayuu, naküjüin süchiki wanee kasa naapajaka suluʼu raawia. Eeshii eekai anain nanüiki nachiki nachonnii na wayuu naashajaainjanakana amaa jee nasakirüle naya sünain naʼyataain. Yooteere wayuu namaa, naashajeʼeraa namüsia na wawalayuukana wanee pütchi suluʼujee tü Wiwüliakat otta nasakirüin naya jamüin saaʼin namüin tia pütchikat. Shiasaʼa sutuma tia, eeshii na wayuu atüjaweekana sooʼomüin.

17, 18. (1) ¿Kasa waaʼinrajatka süpüla nnojoliinjanain mmoluin waya sünain aküjaa pütchi eere jouluin wayuu? (2) ¿Jamüshi sükaaliinjeechika pia süpüla püküjüin pütchi keeʼireere paaʼin aʼwaajaa Maleiwa maʼaka naaʼin David?

¹⁷ Eesüjaʼa kapüleere wamüin yootoo kaayeruʼu sümaa wayuu nnojotka weʼraajüin. Mapuʼushi Eddie, wanee pürekutsoot chejeʼewai Nueva York. Süpüla nnojolinjachin mmoluin chia wawalakai sünain aashajawaa sümaa wayuu, ekirajaashi nia sümaa nuʼwayuuse soʼu tü ai naʼwaajakalü oʼu Maleiwa. Shia nekirajaaka anain tü nanüikinjatkat shiʼipajee wayuu eekai süsakirüin naya süchiki tü nanoujakalü anain. Jee müshiʼiya naya, nasakirüin waneeirua wawalayuu süpüla nütüjaain saaʼu tü naaʼinrakat yootopa naya sümaa wayuu. Kamalaaitpa nümüin Eddie aküjaa pütchi eere jouluin wayuu.

¹⁸ Talatüle maʼin waya sünain aküjaa pütchi sümaa wanoukteʼerawalin wekirajia, nayaawateena aaʼu waya na wawalayuukana sünain laülaain waaʼin sünain anoujaa (paashajeʼera 1 Timoteo 4:15). Sünainjee tia, eeshii süpüla wakaaliinjeenain waneeinnua wayuu süpüla nanoujain nünain Jeʼwaa. Müshi David: «Taʼwaajeechi Jeʼwaa süpüla kaʼikat süpüshuaʼa; eeʼirajeechi taya waneepia nüchiki. Talatashaateerü taaʼin nümaa Jeʼwaa; naapeerü süchiki tia na wayuu anamiakana otta talateena naya sutuma» (Sal. 34:1, 2, TNM).

19. ¿Jamüshi eeka süpüla talatüin wanee wayuu aʼyataai nümüin Jeʼwaa mayaainjeʼe kapüleein tü alatakat nümüin?

¹⁹ Anuu sooʼomüin nünüiki David: «Jeʼwaakalee, suʼwaajeechi pia süpüshuaʼa tü kasa  pukumajakat otta naʼwaajeechi pia na waneepiakana pümaa. Naküjeerü süchiki anain maʼin puluwataaya jee naküjeerü süchiki tü püpülainkat süpüla sütüjaainjatüin saaʼu wayuu tü kasa pülasü paaʼinrakat jee süchiki paʼanasia sünain aluwatawaa» (Sal. 145:10-12, TNM). Na aikana apüla Jeʼwaa jee na waneepiakana nümaa, keeʼireeshaatasü naaʼin naküjüin pütchi nüchiki sümüin wayuu. Eesüjaʼa kapüleere wamüin waküjüin maʼin pütchi sainküin piichi sutuma laülaainnain waya jee shiale sutuma tü ayuuliikat. Sotuinjatpejeʼe waaʼin waʼwaajüin Jeʼwaa wanaa sümaa waküjüin pütchi namüin na pejekana wanain maʼaka naaʼin na tottootkana jee na petmeerakana. Jaʼitakajeʼe püreesale waya saaliijee tü wanoujakalü anain, eeshii süpüla waküjüin pütchi nüchiki Jeʼwaa suluʼu tü kaatsetkat. Talateechi Jeʼwaa waaʼinrüle tia (Prov. 27:11). Jee müsia, talatüshi nia süka waʼyataain nümüin mayaapejeʼe manoujain wapüshi (1 Ped. 3:1-4). Jaʼitairü kapüleein maʼin tü alatakat wamüin, eeshii süpüla waʼwaajüin Jeʼwaa, eeshii süpüla aleewain waya nümaa otta kooʼomüin wanoula.

20, 21. ¿Kasa naaʼinreetka na wawalayuukana neʼrüle kooʼomüin wanoula otta kooʼomüin waʼyataain nümüin Jeʼwaa?

²⁰ Shiimain aneerüin maʼin wakuwaʼipa nutuma Jeʼwaa wachajaale sukuwaʼipa süpüla aleewain waya nümaa jee waʼyataale nümüin süka süpüshuaʼa waaʼin. Wanoukteʼerüle wakuwaʼipa jee wanoukteʼerüle tü kaʼi waküjawaikalü oʼu pütchi, wakaaliinjeena na wayuukana sünain atüjawaa saaʼu tü kasa anashaatasü naaʼinrajatkat Jeʼwaa. Wakaaliinjeena na wawalayuukanaʼaya sükajee tia. Otta müsia, aijeena maʼin waya napüla na wawalayuukana neʼrapa wachajaain sukuwaʼipa süpüla kooʼomüin waʼyataain suluʼu tü outkajaaleekat.

²¹ Wayakana wapüshuaʼa, eeshii süpüla aleewain maʼin waya nümaa Jeʼwaa, eesü süpüla kooʼomüin wanoula otta kooʼomüin waʼyataain nümüin. Eesü süpüla waaʼinrüin tia jaʼitainna jekenale jee kakaliainnale waʼyataain nümüin Jeʼwaa. Sünain tü wanee ekirajaayakat wekirajaajeerü anain tü waaʼinrajatkat süpüla wakaaliinjain na waneeinnua süpüla kooʼomüin nanoula otta kooʼomüin naʼyataain nümüin Jeʼwaa.