Mojupuʼusü maʼin nanüiki na nüʼünüükana Jesuu nümüin otta namüin na nikirajüinkana saaliijee tia. Sünain tü Pütchi aapünakat nümüin Moisés aküjünüsü kasain yarüttüin anainjee nukuwaʼipa wanee wayuu süpüla nuʼwaajüin Maleiwa. Maʼaka saaʼin süntüle sükashia tü jietkat sümüin, ayuuire wayuu sutuma ajaʼttaa ata, naapaale wanee ouktüsü jee shiale wanee mürüt ouktüsü. Süpüla wulein wanee wayuu nüchikuaʼa, aʼajüinjachi mürüt nümüin Maleiwa jee noʼoojule (Levítico, kapiitulo 11 sünainmüin 15; Números, kapiitulo 19).

Na fariseokana neʼitaain sooʼomüin tü pütchi aapünakat nümüin Moisés. Saashin wanee karaloukta, nakooʼomüinjüin na fariseokana tü yarüttakalü anainjee nukuwaʼipa wanee wayuu otta naküjüin tü aaʼinnajatkat yarüttala sümüle wayuu nutuma. Otta müsia, nashajüin wanee süchikimaajatü iita otta wanee kasairua eekat süpüla yarüttüin jee nnojoluin yarüttüin. Naküjüinya sümüin wayuu tü saaʼinrajatkat süpüla wuleinjatüin shia süchikuaʼa naashin.

Müshii na nüʼünüükana Jesuu: «¿Jamüshii na pikirajüinkana moonooinkaʼa naya sümaa tü ekirajünapüʼükat anain waya natüma na watuushinuukana? Nnojoliikalaka noʼlojooin najapü süpüla ekaa» (Mar. 7:5). Naya fariseokana nnojotsü shiain neʼe naashajaain achiki wuleinjatüin najapü. Oʼyotunajatü wüin saaʼu najapü na wayuukana süpülapünaa neküin naashin. Saashin tü karaloukta aashajaakat nachiki, naküja achikit tü iita oʼlojooyainjatkat ajapü, tü wüinkat, chi oʼlojüinjachikai shia otta jalapünainjatüin nuʼlojooin nünain.

¿Jamüsüche nünüiki Jesuu süchiki tia? Müshi nia: «Lotüsü maʼi nünüiki Isaías jüchiki [...], sünain nümüin mayaa: ‹Kojutuyaashi taya natüma na wayuukana süka nanüiki neʼe, nnojoittaapaʼa kojutüin taya natüma süka süpüshua naaʼin. Tü namapüʼükat sünain naʼwaajüin taya naashin, nnojotsü kasain saamüin tamüin. Je nekirajüin wayuu sünain pütchi naleʼeruʼujeejatü neʼe, nnojotsü nekirajüin anain tü taluwataakat anain›, müsü nünüiki Maleiwa. Jiyouktüin tü nuluwataakat anain Maleiwa süpüla joonooinjatüin sümaa tü shikirajapüʼükat anain wayuu» (Mar. 7:6-8).