ASHAJINNÜSHI Pablo nutuma Jeʼwaa mekietsat akuwaʼipa eeka nünain chi wayuu jüüjüükai nümüin chi naaʼinkai Maleiwa (Gal. 5:22, 23). Tia akuwaʼipaakat, * jaʼyasü naaʼu chi eekai shiiʼiranajaain nukuwaʼipa nutuma Maleiwa (Col. 3:10). Jüüjüüle nia nümüin chi naaʼinkai Maleiwa, jaʼyeerü naaʼu tia akuwaʼipaakat maʼaka jaʼyain süchon wanee wunuʼu eekai shiʼyotunüin wüin saaʼu (Sal. 1:1-3).

Palajana, aashajaashi Pablo süchiki alinjatüin wayuu wapüla. Choʼujaashaatasü wamüin waaʼinrüin tia; maalinre wayuu wapüla, «nnojoleerü kasain saapüin» tü waaʼinrakat naashin Pablo (1 Cor. 13:2). ¿Jamüinjatü sukuwaʼipa saalin wayuu wapüla? ¿Kasa waaʼinrajatka süpüla alinjatüin wayuu wapüla? ¿Kasa waaʼinrajatka waneepia aire wayuu wapüla?

Süküjain tü Wiwüliakat tü sukuwaʼipainjatkat saalin wayuu wapüla. Jamüsüjaʼa aire wayuu wapüla, nnojoleena akulajaain waya sünain kamanewaa namüin, talateerü waaʼin sutuma ayatüin naya sünain tü shiimainkat, ayateena waaʼinmajüin naya, wanoujeerü anain nanüiki, wanoujeerü anain naaʼinreerüin tü anasükat otta wachechereerü waaʼin suʼunnaa saainjünüin kasa mojusü wamüin. Chi eekai shiimain alin wayuu nüpüla, jülüjashii naya naaʼin otta naaʼinrüin tü kasa anasükat waneepia napüleerua. Aluʼujasaʼa chi eekai maalin wayuu nüpüla, kachumürai, yaleta aaʼinchi, mojusü nünüiki sümüin wayuu, jiʼiyei, üttüsü naaʼin sünain wayuu otta nnojotsü motuin naaʼin tü kasa mojusü aainjünakat nümüin. Eekajasaʼa wayakana, keeʼireesü waaʼin alinjatüin wayuu wapüla (1 Cor. 13:4-8).

«Aipürai maʼin wayuu Maleiwa» (1 Juan 4:8, TNM). Sutuma tü kasa nukumajakat jee tü naaʼinrakat, wayaawata aaʼu müin nukuwaʼipa. Jamüshijaʼa nia, nuluwataain chi Nüchonkai Mmapaʼamüin süpüla müliain jee outuin nia waaʼu. Anuu nünüiki Juan süchiki tia: «¿Jamüsü watüjaakaʼa saaʼu alin waya nüpüla Maleiwa? Shia süka nuluwataain chi waneeshikai Nüchon yaa mmoluʼumüin süpüla niiʼiratüinjatüin waaʼin süpüla eeinjanain waya [süpüla kaʼikat süpüshuaʼa, TNM] [...]. ¿Washatüin tü aijirawaakat saaʼujee alin maʼi chi Maleiwakai wapüla? Nnojo. Washatüin saaʼujee alin maʼi neʼe waya nüpüla chi Maleiwakai. Nuluwataainjese chi Nüchonkai süpüla ouktüinjachin saaʼu waainjala süpüla nülaʼajaainjatüin woulia» (1 Juan 4:9, 10). Saaʼujee alin waya nüpüla Maleiwa, nülatirüin woulia tü waainjalakat otta waʼatapajüin katüinjatüin woʼu süpüla kaʼika süpüshuaʼa.

Süka nüntüin Jesuu yaa Mmapaʼamüin süpüla nikeraajüin tü keeʼireekat naaʼin Maleiwa, niiʼiyatüin alin wayuu süpüshuaʼa nüpüla. Anuu nünüiki Pablo süchiki tia: «Süka naaʼinrüitpain Jesucristo süpüshua tü nüchekakat chi Maleiwakai nüpüleerua sünain aapajirawaa nikii wwatua neʼe süpüla ouktaa waaʼu, taashiinapa waya suulia waainjala süpüla warütkaainjanain nünainmüin chi Maleiwakai» (Heb. 10:9, 10). Nnojoishi eeichin wanee wayuu eekai muloʼuin maʼin saalin wayuu nüpüla. Anuu nünüiki Jesuu: «Wane wayuu, aapajiraakai nukuaippa süpüla  ouktaa saaʼujee nütünajutüirua, miyoʼushaata maʼi naalin nüpüla» (Juan 15:13). Mayaainjeʼe waleʼeruʼuin tü kaainjalaakat, eesü süpüla washatüin sukuwaʼipa saalin wayuu nüpüla Jeʼwaa nümaa Jesuu. Wekirajaa sünain tü waaʼinrajatkat süpüla wountuinjatüin waaʼinrüin tia.

Anuu nünüiki Pablo: «Anakaja müleka jüshatüle nukuaippa chi Maleiwakai, süka nüchooinapain jia je süka alin maʼi jia nüpüla. Anakaja müleka aijiraale jia jüpüla jüpüshua, maa aka alin jia nüpüla Cristo. Watüjaa aaʼuchi nia sünain alin waya nüpüla, süka naapajiraain nikii süpüla ouktaa waaʼujee», müshi nia (Éf. 5:1, 2). Shiimainjatü alin wayuu wapüla. Anuujeseʼe nünüiki Juan: «Tachonniwaa, jia aishiikana tapüla, anakaja nnojorule ‹Aishi pia tapüla› wamüin neʼe süka wanüiki. Shia anaka aluʼu waaʼinrüle tü kasa anasükat namüin na wawalayuukana süpüla natüjaainjatüin saaʼu sünain shiimüin naalii wapüla» (1 Juan 3:18). Jamüshiijaʼa waya saaʼu alin Jeʼwaa wapüla namaa na wayuukana, waküjain tü pütchi anasükat (Mat. 24:14; Luc. 10:27). Akaʼaya waya, aisü wayuu wapüla nnojoliire waashichijaamaatüin namüin, anamiale waya namüin jee motule waaʼin naainjala. Waaʼinra tü sümakat tü Wiwüliakat: «Jaaʼinra tü anasükat shiʼipajee eekai shiʼrülüin wayumüin jümüin, sümaa motüin jaaʼin saainjala maa aka naaʼin chi Senyotkai motüin naaʼin jaainjala», müsü (Col. 3:13).

Wachiaale wanee wayuu saaʼu wanee kasa mojusü naaʼinraka, nnojotsü saaʼujeein maalin nia wapüla. Eeshii wayuu matüjainka achiawaa nachonnii, naapüin süpüshuaʼa tü nachuntakat namüin suulia naʼyalajüin. Aluʼujasaʼa chi wayuu aikai apüla nüchon, nüchiaain nia niyüülajaale niʼrüin. Akaataajaʼa neʼe nukuwaʼipa Jeʼwaa wamüin, nüchiaain waya süpüla nunoutuin wakuwaʼipa (Heb. 12:6). Aire wanee wayuu wapüla, wachiaain nia naaʼinrüle kasa mojusü (Prov. 3:11, 12). Shiasaʼa sutuma waleʼeruʼuin tü kaainjalaakat, kapüleʼewaisü wamüin alinjatüin wayuu wapüla. Choʼujaasü wamüin wapüshuaʼa shiimainjatüin saalin wayuu wapüla. Wekirajaa sünain apünüinsü kasa waaʼinrajatka süpüla wainküin tia.

Palajana. Wachunta nümüin Maleiwa chi naaʼinkai. Naashin Jesuu, naapeechi Jeʼwaa chi naaʼinkai wamüin wachuntule nümüin (Luc. 11:13). Waaʼinrüle tia waneepia sümaa jüüjüüin waya nümüin chi naaʼinkai Maleiwa, aireʼejeeria maʼin wayuu wapüla (Gal. 5:16). Anashii nachuntule na laülaashiikana chi naaʼinkai Maleiwa süpüla nachiaain na wawalayuukana sükajee tü Wiwüliakat süka anakalü akuwaʼipa. Akaʼaya neʼe na kachonshiikana, nachunteein chi naaʼinkai Maleiwa nümüin nachiaainjanapa nachonnii suulia joo airuʼulajüin nanüiki namüin.

Piama. Jülüjeesü waaʼin tü naaʼinrakat Jesuu saaʼu alin wayuu nüpüla, jaʼitakajeʼe neʼe niʼrapa nümüliala (1 Ped. 2:21, 23). Anasü maʼin jülüjale waaʼin nukuwaʼipa Jesuu mojule sünüiki wayuu wamüin jee saainjünüle kasa mojusü wamüin. Wasakireein waaʼin sünain tüü: «¿Kasaje naaʼinraka Jesuu?». Anasü sukuwaʼipa wanee wawala sutuma saaʼinrüin tia, Leigh sünülia. Anuu sünüiki: «Eetaasü wanee wayuu aʼyanaajiraasü tamaa. Aluwataasü mensaaje namüin waneinnua takonpanyeetse eere mojuin sünüiki tachiki otta süchiki taʼyataain. Mayaainjeʼe aishaatain tia tamüin, tasakirüin taaʼin sünain tüü: ‹¿Kasaje naaʼinraka Jesuu nialeje aainjünüin amüin tüü?›. Shiasaʼa süchikijee tia, nnojotsü ayatüin jülüjakuʼu müin taaʼin tü alatakat tamüin. Tatüjaaka aaʼu mapa ayuulin tü takonpanyeetsekat sümaa shapaain saaʼin. ‹Saaʼinrüin ee tia sutuma mojuin saaʼin›, tamaka. Sutuma jülüjain taaʼin ayatüin alin wayuu nüpüla Jesuu mayaapejeʼe müliain nia atumaa, tashatüin nukuwaʼipa otta kojutusü tamüin tü takonpanyeetsekat», müsü Leigh. Washatüle nukuwaʼipa Jesuu, aijeerü wayuu wapüla waneepia.

Apünüin. Waaʼinra kasa anasü süpüleerua wayuu jaʼitairü kapüleein shia wamüin. Müinjatü nakuwaʼipa na anoujashii shiimainshiikana süka alin wayuu napüla (Juan 13:34, 35). Mapuʼusü nukuwaʼipa Jesuu. Chapuʼushi nia chaa eere Maleiwa otta nüpütüin kasa süpüshuaʼa süpüleerua nükaaliinjain waya otta nnojoishi nia aʼalijiraain suulia outaa waaʼu (Filip. 2:5-8). Washatüle tü sukuwaʼipakat saalin wayuu  nüpüla Jesuu, wanaaweerü waaʼin nümaa otta tü jülüjakat waaʼin. Akaʼaya waya, shieerü kapülaka waaʼin nakuwaʼipa na waneinnua suulialeʼeya tü wakuwaʼipakat neʼe wamüiwaʼa.

Wainma kasa anasü weʼreetka weeʼiyatüle tü saalinkat wayuu wapüla. Anuu piamasü kasa anasü:

• WATTA NAALII WAWALAYUU SAINKÜIN TÜ MMAKAT. Saaʼu aijiraain wayakana wapüshuaʼa, watüjaa aaʼu kamaneejeenain wamüin na wawalayuukana suluʼupünaa waneirua outkajaalee. Anashaatashii maʼin waya süka alin waya napüla na wawalayuukana sainküin tü mmakat (1 Ped. 5:9). Nayaʼala neʼe makana akuwaʼipa na aʼyataakana nümüin Jeʼwaa.

• ANAJIRAASHII WAYA. Sutuma waaʼinrüin tü anasükat neʼipajee na wawalayuu eekai neʼrüliin wayumüin wamüin, anajiraashii jee aijiraashii waya (Éf. 4:2, 3). Wanaa sümaa sünanin waya tü outkajawaakat jee tü outkajawaakat miyoʼu, shiʼrüin wayuu anajiraain maʼin waya (Sal. 119:165; Isa. 54:13). Wachajaale sukuwaʼipa süpüla aleewain waya namaa na wawalayuukana, weeʼiyateerü sünain alin maʼin naya wapüla jee talateechi Jeʼwaa watuma (Sal. 133:1-3; Mat. 5:9).

«Shiimüinreje sünain aijiraain jia jüpüla, akaaliijiraajeena jüpüshua sünain tü jünoulakat», müshi Pablo (1 Cor. 8:1). Sünain tü nüshajakat Pablo suluʼu 1 Corinto kapiitulo 13, nüküjain sooʼomüin süchiki tia. ‹Sukuwaʼipamaajatü saalin wayuu›, münüsü tia pütchikat. Naashin Pablo, aire wayuu wapüla kapüleerü waaʼin tü nakuwaʼipakat (1 Cor. 10:24; 13:5). Jee müsia, shiimainre alin wayuu wapüla, nnojoleena waya aashichijaamaatüin namüin, nnojoleena müliain watuma otta kamaneejeena waya namüin. Mülejeʼeya nukuwaʼipa wanee wayuu sümüin nüpüshi, aijiraajeechi nia namaa otta paaʼinwajiraajeechi nia namaa na wawalayuukana (Col. 3:14).

Wainma sukuwaʼipa süpüla weeʼiyatüin tü saalinkat wayuu wapüla, shiapejeʼe anaʼleein aire wapüla Maleiwa otta kaluʼusü tia kasa anasü. Paaʼinwajiraashii waya namaa na wawalayuukana sutuma alin Maleiwa wapüla. Talatüshii waya sünain aʼyataajirawaa namaa eerejeʼe naatain wakuwaʼipa, weʼiruku jee wanüikipala (Sof. 3:9). Jüüjüü waya nümüin chi naaʼinkai Maleiwa süpüla jaʼyainjatüin waaʼu waneepia alin wayuu wapüla.