Nnojotkaʼa wanaawain tü nüshajakat Mateo sümaa tü nüshajakat Lucas nüchiki Jesuu joʼuuiwaʼaya nia, shia süka naatain tü naküjakalü achiki waneʼewai nakua.

Jamüshijaʼa Mateo, nia naashajaaka maʼin achiki José. Nüküjain kasain naaʼinrüin José nütüjaapa saaʼu ipuoluin María, nüküjain jamüin nünüiki wanee aapiee nümüin José jee tü naaʼinrakat süchikijee tia (Mat. 1:19-25). Naashin Mateo, eeshi waneʼeya aapiee aapitkai José süpüla nuʼunuinjachin Egiptomüin sümaa nüpüshi otta oonooshi nia nümaa. Mapa, aapinnüshi nia nutuma wanee aapiee süpüla nüleʼejüinjachin nüchikuaʼa Israelmüin. Oonooshi nia otta nuʼunaka Nazaretmüin (Mat. 2:13, 14, 19-23). Suluʼu Mateo kapiitulo 1 otta 2, akaratshitua suchuntunüin nünülia José. Jee müsia María, pienchitua neʼe suchuntunüin sünülia.

Eekajasaʼa Lucas, shia naashajaaka maʼin achiki María. Nüküjain sünain nüntüin chi aapieekai Gabriel sümaʼanamüin, nüküjain suʼunuin María eemüin Elisabet otta nüshajüin jamüin sünüiki sünain aʼwaajaa Jeʼwaa (Luc. 1:26-56). Nüshajüinya Lucas tü nümakat Simeón sümüin María süchiki tü müliaa niʼrüinjatkat Jesuu. Sünain tü nüshajakat Lucas nüchiki Jesuu wanaa sümaa 12 nuuyase otta makatüin nia suluʼu tü aʼwaajüleekat Maleiwa, shia nüshajaka anüiki María, nnojotsü nüshajüin nünüiki José. Jee müsia nüküjain Lucas jamüin saaʼin María sutuma süpüshuaʼa tia alatakat (Luc. 2:19, 34, 35, 48, 51). Suluʼu Lucas kapiitulo 1 otta 2, polootua piamamüin suchuntunüin sünülia María. Jee müshia José, apünüintua neʼe suchuntunüin nünülia. Nüshajüin Mateo süchiki tü jülüjakat naaʼin José jee tü naaʼinrakat. Eekajasaʼa Lucas, shia nüshajaka tü jülüjakat saaʼin María jee tü saaʼinrakat.

Wanee kasa naatawaika nutuma Mateo nümaa Lucas shia nanülia na nutuushinuukana Jesuu. Jamüshijaʼa Mateo, nüshajüin nanülia na kooʼuliwoʼukana José otta niiʼiyatüin niainjachin aluwataain Jesuu nüchikumüin David sutuma nüchonyaain nia José. ¿Suluʼu jamüin? José, nuuʼuliwoʼu David naaʼu Salomón (Mat. 1:6, 16). Eekajaʼa Lucas, nüshajüin nanülia na kooʼuliwoʼukana María otta niiʼiyatüin niainjachin aluwataain Jesuu nüchikumüin David süka nülüin nia (Roma 1:3). ¿Jamüshi nülüinka nia David? Shia sutuma nuuʼuliwoʼuin David María naaʼu Natán (Luc. 3:31). Watüjaa aaʼu shiain María nüchoin Helí, ¿jamakaʼa ‹José nüchon Helí› nümaka Lucas? Sümaiwa shiapuʼusü ashajünaka nanülia na tooloyuukana süpüla sütüjaanüin aaʼu jaralin kooʼuliwoʼuin wanee wayuu. ‹José nüchon Helí› müshi Lucas süka nüshimiain nia (Luc. 3:23).

Sutuma nüshajüin Mateo nümaa Lucas nanülia na nutuushinuukana Jesuu, ayaawatüna aaʼuchi niain Jesuu chi Mesíaskai. Sütüjaa aaʼu wayuu süpüshuaʼa nuuʼuliwoʼuin David Jesuu, jaʼitakajeʼe na fariseokana jee na saduceokana, natüjaa aaʼu tia. Maaʼulu yaa, kanoulashii waya süka watüjaain saaʼu jaralüin kooʼuliwoʼuin Jesuu jee müsia watüjaa aaʼu nikeraajeerüin Jeʼwaa tü nümakat.