1, 2. (1) ¿Jamüsü watüjaaka saaʼu eein süpüla weeʼiratüin wakuwaʼipa? (2) ¿Jetsü tü akuwaʼipaa nüküjakalü achiki Pablo suluʼu Colosas 3:10-14?

TÜ PÜTCHIKAT ‹eeʼiranajawaa akuwaʼipaa› ashajünüsü piantua suluʼu Traducción del Nuevo Mundo de las Santas Escrituras, suluʼusü Éfeso 4:24 otta Colosas 3:10. Tia akuwaʼipaakat shia tü niʼitaakat Maleiwa napüleerua na anoujashiikana. Eesü süpüla washatüin shia süka nukumajüin waya Maleiwa sünain müin aka naaʼin (Gén. 1:26, 27; Éf. 5:1).

² Shiimainya mojuin tü suchuntawaikat waaʼin sünainjee tü naainjalakat Adán sümaa Eva otta müsia sutuma washatüin nakuwaʼipa na wayuukana eejanale muloʼuin waya. Eepejeʼe süpüla weeʼiratüin wakuwaʼipa sutuma nükaaliinjain waya Jeʼwaa. Süpüla wountuin shia wekirajaajeerü anain tü akuwaʼipaa nüküjakalü achiki Pablo suluʼu tü Wiwüliakat (paashajeʼera Colosas 3:10-14). Otta wekirajaajeerü anain jamüinjatüin sukuwaʼipa tia watuma waküjapa pütchi.

3. ¿Kasa nnojotka naaʼinrüin na eeʼiratakana akuwaʼipa?

³ Süchikijee nimeʼejüin waaʼin Pablo sünain weeʼiratüinjatüin wakuwaʼipa, nüküjain nnojoluinjatüin koʼuin wakuwaʼipa sümüin wayuu. «Naʼakajee na judío oʼyotoonokana ata je naʼakajee na gentile moʼyotoojukana ata, saʼakajee tü wayuu süchiʼrakat mma, saʼakajee tü wayuu naatakat sünüiki, saʼakajee tü wayuu achepchiaakat ooʼulaka tü laülaasükat sümüiwa», müshi nia (Col. 3:11). Nnojotsü alanaʼaleeinjatüin naaʼin wanee anoujashi nooʼopünaa wanee nuwala sutuma naatain niʼiruku nuulia, naatain nuumain jee sutuma washirüin nia nuulia. Süka jamüin, nayajiraain neʼe napüshuaʼa na anoujashii shiimainshiikana (Gal. 3:28).

4. (1) ¿Jamüinjatü wakuwaʼipa namaa na wawalayuukana? (2) ¿Jamüsü eeka süpüla kapüleein shia wamüin?

⁴ Weeʼiratapa wakuwaʼipa kojutusü wamüin wayuu süpüshuaʼa jaʼitairü naatain shiʼiruku jee maʼletsein (Roma 2:11). Eepajaʼa tü mma eere kapüleein süpüla müinjatüin nakuwaʼipa na wawalayuukana. Jamüsüjaʼa chaa Sudáfrica, katataawashii atuma na washinnuukana, na yuuikana ata jee na metiisükana. Eeshii na wawalayuu ayatayüliikana katatüin. Müshiijeseʼe nemeʼejünüin aaʼin natuma na Laülaashii Jülüjakana Aaʼin na Aküjaliikana Pütchi sainküin Mma süpüla aijiraainjanain naya jee neʼraajiraain napüshuaʼa maʼaka süküjain 2 Corinto 6:13. Akumajünüsü sukuwaʼipa tia soʼujee oʼutuupüroʼu 2013.

5, 6. (1) ¿Kasa aluwataanaka anain na wawalayuukana suluʼu wanee mma süpüla aleewajiraainjanain naya? (Piirakaa sümüin tü ayaakuaa suluʼukat süpana 21). (2) ¿Jamüsü nakuwaʼipa sutuma naaʼinrüin tia?

⁵ Anuu tü naaʼinrajatkat na wawalayuukana: paliraainjana naya sünain aküjaa pütchi jee sünain outkajawaa, otta awaraijaashii naya naaʼu na nawalayuukana jaʼitairü naatain nanüikipala jee neʼiruku. Sutuma wainmashaatain na wawalayuu aaʼinrakana tia, ponushii maʼin naya saaʼin wayuu. Anasüjeseʼe maʼin tü pütchi aluwataanakat nachiki na wawalayuukana sümüin Weteet. Anuu nünüiki wanee shikiipüʼü iküleesia: «Mayaainjeʼe nnojolin taya jümaain, teʼrüin anain maʼin sukuwaʼipa tü jiʼyataainkat jee aijiraashii jia eerejeʼe naatawalin jiʼiruku». ¿Jamüsü nakuwaʼipa na wawalayuukana sutuma naaʼinrüin tü aluwataanakalü anain naya?

⁶ Noma shia wanee wawala aashajaasü xhosa, nnojoishii suunejaweein paala shipialuʼumüin na wawalayuu wulekana ata, na aashajaakana inkülee. Shiasaʼa süchikijee süküjain pütchi namaa na wawalayuu wulekana ata jee suunejaanüin natuma nepialuʼumüin, «wayuu neʼe maʼaka waaʼin wayakana» müsü shia. Shiapa ounejaain na wawalayuu wulekana ata shipialuʼumüin sümaa süʼlakajaain nayaaluʼu, ponushi maʼin saaʼin wanee laülaashi  wulekai ata sutuma nüikalaain saaʼu wanee kaajachon. Anasü maʼin nakuwaʼipa na wawalayuukana maaʼulu sutuma naluwataanüin sünain müinjanain naya, eʼraajiraainnapa naya otta aleewainnapa naya mayaapejeʼe naatain neʼiruku sümaa nakuwaʼipa.

7. ¿Jamüsü choʼujaaka wamüliajüliin wayuu?

⁷ Süka niain aluwataain Satanaa maaʼulu, ayateena waya müliain sutuma maʼyataanii, sutuma ayuulii eekai mepin, sutuma süpüleeruaanüin waaʼin, sutuma sukutkujaain mma otta wawai, sutuma kaʼruwarannuu jee waneirua kasa. Choʼujaasüjeseʼe wamüliajüliin wayuu süpüla mapüleeinjatüin wamüin wakaaliinjiraain. Wamüliajüliire wayuu, aaʼinreena waya kasa anasü sümüin (Éf. 4:32). Waaʼinrüle tia, washateerü nukuwaʼipa Maleiwa otta mapüleejeerü wamüin amüliajaa wayuu (2 Cor. 1:3, 4, TNM).

8. ¿Jameerü nakuwaʼipa na wawalayuukana wamüliajüliire jee waainjüle kasa anasü namüin? Püküja jamüin nukuwaʼipa wanee wawala.

⁸ ¿Kaseerü waainjaka nüntüle wanee wawala wattajee? ¿Jama niale wanee wawala maʼletsekai? ¿Kasa anasü waainjainjatka namüin? Talatüinjana waya namaa otta aleewainjana waya namaa süpüla natüjaain saaʼu choʼujaain naya wamüin suluʼu tü outkajaaleekat (1 Cor. 12:22, 25). Wekirajaa sünain nukuwaʼipa Dannykarl, akolojooshi Filipinajee Japónmüin. Müliashi maʼin nia atumawaa niʼyataaleruʼu sutuma naatain nuumain. Shiasaʼa nuʼunaka sünain tü outkajawaakat chaa Japón. «Mayaainjeʼe naatain toumain, kamaneeshii maʼin tamüin, mataashi kakaliaichikai neʼraajüin taya», müshi nia. Aleewashi nia nümaa Maleiwa sutuma kamaneein maʼin na wawalayuukana nümüin. Anuu nanüiki na laülaashiikana nüchiki jee süchiki Jennifer tü nuʼwayuusekat: «Nnojotsü kapülain naaʼin washirü, pürekutsootshii naya, jaʼyasü naaʼu palajanain natuma Nuluwataaya Maleiwa, jee anasü nakuwaʼipa namüin na wawalayuukana» (Luc. 12:31).

9, 10. ¿Kasa neʼraka na wawalayuukana sutuma namülialaain aaʼin naaʼu na naküjakana amüin pütchi?

⁹ Waaʼinrüin tü anasükat sümüin wayuu süpüshuaʼa waküjapa pütchi namüin (Gal. 6:10). Wainmainna na wawalayuu ekirajaakana sünain wanee anüikii naatajatü sutuma namülialaain aaʼin naaʼu na wayuu naatakana oumain (1 Cor. 9:22, 23). Watta saalii kasa anasü neʼraka na wawalayuukana sünainjee tia. Jamüsüjaʼa wanee pürekutsoot Tiffany sünülia, kepiaka chaa Australia, sükaaliinjeein na wawalayuu ekirajaakana sünain tü anüikiikat suajili chaa Brisbane. Mayaainjeʼe kapüleein maʼin sümüin tia anüikiikat, wainma kasa sütüjaka sünainjee. Müsü sünüiki: «Maʼaka jiʼreere kasa anasü sünain aküjaa pütchi, jükaaliinja na wawalayuu aküjakana pütchi süka wanee anüikii naatajatü. Nnojotsü choʼujaain juʼunuin wattamüin süpüla tia. Talateerü maʼin paaʼin namaa na wawalayuukana».

¹⁰ Anuu nakuwaʼipa wane wawalayuu chakana Japón. Sakiko sünülia tü nachonkot, müsü shia: «Soʼujee tü juyakat 1990, watta saalii wayuu chejeʼewaliikana Brasil waküjakana amüin pütchi. Waashajeʼerapa namüin Alateetkat Mapeena 21:3, 4 otta müsia Salmo 37:10,  11, 29 suluʼu portugués, kapülasü naaʼin wanüiki jee eeshii eekai naʼyalajüin». Amülialaasü maʼin naaʼin na wawalayuukana naaʼu, anuujeseʼe sünüiki Sakiko: «Sutuma neʼraajeein maʼin Jeʼwaa naya wayuukana, ekirajaashii sünain portugués napüshuaʼa na tapüshikana wanaa tamaa». Mapa, akumajaasü wanee outkajaalee napülajatü na aashajaakana portugués. Wattainna maʼin naalii na wayuu naatakana oumain nakaaliinjaka süpüla woutiisain naya. «Mayaainjeʼe müliain waaʼin sünain ekirajawaa süpüla watüjain tia anüikiikat, talatüshii maʼin waya nümaa Jeʼwaa saaʼu nükaaliinjain waya», müsü Sakiko (paashajeʼera Aluwataaushikana 10:34, 35).

11, 12. (1) ¿Kasa weeʼiratüinjatka aaʼujee wakuwaʼipa? (2) ¿Kasa waaʼinrajatka süpüla nnojoluin yaletüin waaʼin?

¹¹ Weeʼiratüin wakuwaʼipa süpüla kojutuin Jeʼwaa sümüin wayuu, nnojotsü shiain süka keeʼireein waaʼin waʼwaajünüin sutuma wayuu. Soto waaʼin tü alatakat nümüin wanee aapiee yaletajaakai aaʼin (anasü paashajeʼerüle Ezequiel 28:17). Mayaainjeʼe jooin waya süpüla yaletajaain waaʼin sutuma waleʼeruʼuin tü kaainjalaakat, eeinjatü waaʼin süpüla nnojoluin yaletüin waaʼin. ¿Kasa waaʼinrajatka süpüla wountuin waaʼinrüin tia?

¹² Waashajeʼerüinjatü weinshi tü Wiwüliakat sümaa wasakireʼerüinjatüin waaʼin sünain (Deut. 17:18-20). Aneerü wakuwaʼipa jülüjale waaʼin tü nikirajakalü anain waya Jesuu sümaa washatüin tü nukuwaʼipakat (Mat. 20:28). Jamüshijaʼa nia, nuʼlojooin nooʼui na nikirajüinkana süka matüjain nia yaletaa aaʼin (Juan 13:12-17). Achuntajana waya nümüin Maleiwa süpüla nnojoluin yaletayaain waaʼin noulia na waneinnua (Gal. 6:3, 4; Filip. 2:3).

13. ¿Kasa weʼreetka nnojorüle yaletüin waaʼin?

¹³ (Paashajeʼera Proverbios 22:4). Nnojotsü nücheküin Jeʼwaa napüleerua na aʼyataakana nümüin yaletüinjatüin naaʼin. Eʼreena waya kasa anasü nnojorüle yaletüin waaʼin. Paaʼinwajiraajeena waya namaa na wawalayuukana, aleeweena waya namaa jee kamaneejeechi maʼin Jeʼwaa wamüin. Anuujeseʼe nünüiki Pedro: «Otta jia anoujashiikana jüpüshua, wanaa sümaa jükaaliijain na juwalayuukana, jalia jia suulia juʼwaataʼalaain suluʼu jukuaippa, süka wachiajaanüin suulia tia suluʼu tü ashajuushikat paala sünain  müin mayaa: ‹Aashichijaashi Maleiwa namüin na eekai yaletayaain naaʼin suluʼu nakuaippa namüiwa, otta kamaneeshi nia namüin eekai nnojolüin pülain naaʼin›» (1 Ped. 5:5).

14. ¿Jarai chi kamaneekai maʼin jee chi atüjakai maʼin aʼatapajaa?

¹⁴ Malaa neʼe saashin wayuu tü kamanewaakat sümaa tü kaʼatapalaakat. Nnojotpajaʼa shiimain tü namakat. Tia, shia tü nukuwaʼipakat Jeʼwaa chi Maleiwa pülashikai maʼin. Nia kamaneekai maʼin jee nia atüjakai maʼin aʼatapajaa (2 Ped. 3:9). Majatü nukuwaʼipa nümüin Abraham otta Lot wanaa sümaa nasakiijüin nia, nnojoishi aashichijaain namüin (Gén. 18:22-33; 19:18-21). Akaataajaʼa nukuwaʼipa Jeʼwaa namüin na israeliitakana eerejeʼe neʼrüliin wayumüin nümüin, alatüsü suulia 1500 juya sünain müin nukuwaʼipa namüin (Ezeq. 33:11).

15. ¿Jamüsü anaka süpüla washatüin nukuwaʼipa Jesuu?

¹⁵ Anamia maʼin Jesuu (Mat. 11:29, 30). Nnojoishi aashichijaamaatüin namüin na nikirajüinkana mayaainjeʼe niʼrüin mojuin nakuwaʼipa. Wanaa sümaa yaajachin nia Mmapaʼa, nüchecherüin naaʼin napüleerua na nüʼünüükana eerejeʼe niyoujünüin jee nüliʼrajünüin natuma. Ayatshia anamiain sümaa nütüjain aʼatapajaa, sünainmüinreʼeya tü kaʼi outakalü oʼu nia. Wanaa sümaa nükacheʼennüin, nuchuntuin nümüin Jeʼwaa nülatiraiwa naainjala na wayuukana noulia, «süka nnojoliin natüjaain saaʼu tü naaʼinrakat taka» müshi nia (Luc. 23:34). Anataʼaleesüjaʼa nukuwaʼipa Jesuu süpüla washatüin, anamia nia jee nnojoishi aashichijaamaatüin wanaa sümaa müliain nia atumawaa (paashajeʼera 1 Pedro 2:21-23).

16. ¿Kasa waaʼinrajatka wayuule anamia waya jee watüjale aʼatapajaa?

¹⁶ ¿Kasa waaʼinrajatka wayuule anamia waya jee watüjale aʼatapajaa? Motuinjatü waaʼin tü naainjalakat na wawalayuukana wamüin. Anuu nünüiki Pablo: «Jaaʼinra tü anasükat shiʼipajee eekai shiʼrülüin wayumüin jümüin, sümaa motüin jaaʼin saainjala maa aka naaʼin chi Senyotkai motüin naaʼin jaainjala» (Col. 3:13). Choʼujaasü maʼin anamiainjanain waya jee watüjainjanain aʼatapajaa süpüla waaʼinrüinjatüin tü nümakat Pablo. Waaʼinrüle tia, paaʼinwajiraajeena waya namaa na wawalayuukana.

17. ¿Jamüsü choʼujaaka anamiainjanain waya jee watüjainjanain aʼatapajaa?

¹⁷ Anamiainjana waya jee atüjainjana waya aʼatapajaa naashin Jeʼwaa süpüla katüin woʼu suluʼu tü mma jeketkat (Mat. 5:5, TNM; Sant. 1:21, TNM). Anaʼleesia maʼin tia akuwaʼipaakat süka kojuteechin Jeʼwaa watuma suʼupala wayuu jee wakaaliinjeena naya sünain aaʼinraa tü sümakat tü Wiwüliakat (Gal. 6:1; 2 Tim. 2:24-26).

18. ¿Jamüsü shiimainka alin wapüla wayuu nnojoliire kachekalaʼatain waya wayuu?

¹⁸ Tü nukuwaʼipakat Maleiwa wekirajaaitpakalü anain sünainpünaasü tü aliikalü apüla wayuu. Nüchiaain Santiago na anoujashiikana süka kapülain naaʼin na washinnuukana noulia na maʼletsekana. Nüküjain namüin jamüin mojuka tia nümüin Maleiwa, müshi nia: «Anashii aire jüpüla wayuu süpüshua maa aka alin jia jüpülajiraa». Nümakalaka namüin süchikijee: «Kachekarale jia suʼutku wayuu, shiimüin sünain jiain kaainjaraliin sükajee tia. Je kasalajaneerü jümüin tia süka moonooloin jia sümaa tü ashajuushikat» (Sant. 2:8, 9). Aire wapüla wayuu, nnojoleena mojutuin wamüin na nnojoliikana koleejiain namaiwa, na naatakana eʼiruku jee na maʼletsekana. Shiimainjatü alin wayuu wapüla süpüla nnojoliinjanain waya kachekalaʼatain wayuu.

19. ¿Jamüsü choʼujaaka alinjatüin wayuu wapüla?

¹⁹ Shiimainre alin wayuu wapüla, nnojoleena waya akulajaain aaʼin sünain kamanewaa, nnojoleena waya achumujüin jee nnojoleerü pülayaain waaʼin (1 Cor. 13:4). Makalaka choʼujaain watüjain aʼatapajaa, waaʼinrüin kasa anasü sümüin wayuu jee nnojoluin yaletayaain waaʼin waküjapa pütchi (Mat. 28:19). Müle wakuwaʼipa, anajiraajeena waya namaa napüshuaʼa na wawalayuukana. Aijiraale waya, paaʼinwajiraajeena na wawalayuukana jee kojuteechi Jeʼwaa natuma, jee müsia poneerü maʼin saaʼin wayuu tü wakuwaʼipakat sümaa nekirajaweejeenain sünain tü shiimainkat. Anuujeseʼe sünüiki tü Wiwüliakat: «Aijiraale jia jüpüla, alanaʼaleejeeria maʼi sünain anain shia suulia süpüshua tü kasa anasü jaaʼinrakat, süka paaʼinwajiraajeenain jia sünain anoujaa sütüma. Je talateerü naaʼin chi Maleiwakai sütüma tia» (Col. 3:14).

20. (1) ¿Kasa wasakireʼerüinjatka anain waaʼin? ¿Jamüsü waaʼinrajatka shia? (2) ¿Kasa waʼatapajaka maʼin?

²⁰ «¿Kasa choʼujaayütka teeʼiratüin sünain takuwaʼipa?», müinjana waya suluʼu waaʼin. Achuntajana waya nümüin Jeʼwaa nükaaliinjaiwa waya. Müsia wasünneʼerüinjatü suluʼujee wekii tü kasa mojusü jülüjakat waaʼin otta weeʼiratüinjatü wakuwaʼipa süpüla suluʼuinjanain waya Nuluwataaya Maleiwa (Gal. 5:19-21). Wasakira waaʼin sünain tüü: «¿Teeʼiratüinche tü jülüjakat taaʼin süpüla talatüin Jeʼwaa tamaa?» (Éf. 4:22-24). Sutuma waleʼeruʼuin tü kaainjalakat, jülüjainjatü waaʼin waneepia tü wakuwaʼipakat süpüla wanouteʼerawalin wanee kasa eekai sumojujaain sünain. Anashaateenapajaʼa waya lotopa wakuwaʼipa jee shiiʼirataleepa wakuwaʼipa waneepia.