SÜKA sülüʼülüin «sükalia sajaʼttüinjatüin tü kasakat süpüshua» wainma kasa eejiraaka amaa waya, müsüjeseʼe choʼujaain maʼin nnojoluinjatüin süshapalaain waaʼin (2 Tim. 3:1-5). Na wayuu kapülakana aaʼin nakuwaʼipa namüiwaʼa, nayoutuin süchiki anajirawaa otta matüjainsalii naya achecheraa naaʼin otta aʼatapajaa. Wayakana aʼyataaliikana nümüin Jeʼwaa wasakireʼerüinjatü waaʼin sünain tüü: «¿Wanaawasüche taaʼin namaa na manoujainsaliikana sünain süshapalaain taaʼin sünain aʼatapajaa? ¿Jamaluʼutche tatüjainjachin aʼatapajaa? ¿Kasa taaʼinrüinjatka süpüla nnojoluinjatüin süshapalaain taaʼin?».

Saashajaale tü Wiwüliakat nüchiki wanee wayuu eekai nütüjain aʼatapajaa, süküjain nnojolin yüülain nia jaʼitairü kapüleein maʼin tü eejiraakalü amaa nia. Akaʼaya nia, nüchecherüin naaʼin sümaa nnojolin motuin naaʼin tü kasa anasü naʼatapajakat. Nnojorüle süshapalaain waaʼin, nnojoleerü kapülain waaʼin wakuwaʼipa neʼe wamüiwaʼa, kapüleerü waaʼinya nakuwaʼipa na waneinnua. Jaʼitakajeʼe neʼe nakuwaʼipa na wayuu aaʼinrakana kasa mojusü wamüin, kapüleerü shia waaʼin otta wachajaajeerü sukuwaʼipa süpüla anajiraain waya namaa. Müsüjeseʼe süküjain tü Wiwüliakat watüjeenain aʼatapajaa aire wapüla wayuu (1 Cor. 13:4). * Wanee wayuu eekai jüüjüüin nümüin chi naaʼinkai Maleiwa, nnojoleerü ashapalaain naaʼin otta atüjeechi aʼatapajaa (Gal. 5:22, 23). ¿Kasa waaʼinrajatka süpüla watüjainjanain aʼatapajaa?

Süpüla nnojoluin süshapalaain waaʼin otta watüjain aʼatapajaa, wachuntajachi nümüin Jeʼwaa chi naaʼinkai süka naapüin nia namüin na eʼitaakana naaʼin nünain (Luc. 11:13). Katchin maʼin chi naaʼinkai Maleiwa, aʼyataainjanapejeʼe waya süchiirua tü wachuntakat otta pansaainjatü wakuwaʼipa sümaa tia (Sal. 86:10, 11). Aʼyataainjana waya waneepia süchiirua nnojoluin süshapalaain waaʼin otta watüjain aʼatapajaa. ¿Kasa maa waaʼinrajatka süpüla watüjainjanain aʼatapajaa?

Ekirajaainjana waya sünain nukuwaʼipa Jesuu. Soʼu naashajaain Pablo süchiki weeʼiratüinjatüin wakuwaʼipa, müshi nia: «Eeinjatü suluʼu jaaʼin tü anaa naapakat Kürisüto jümüin» (Col. 3:10, 12, 15, TNM). Süpüla wountüin tia, washatüinjatü nukuwaʼipa Jesuu, jamüshijaʼa nia, niʼitaain naaʼin sünain nunouteʼereerüin Jeʼwaa süpüshuaʼa tü kasa mojusükat soʼu tü kaʼi nüneekakat süpüla. Washatüle tü nukuwaʼipakat Kürisüto nnojoleerü shapaain waaʼin, jaʼitairü kasain alatüin (Juan 14:27; 16:33).

Mayaapejeʼe keeʼireein waaʼin suluʼumaatüin waya tü mma anasü nüküjakalü achiki Jeʼwaa, nnojoleerü ashapalaain waaʼin jülüjale waaʼin tü nukuwaʼipakat Jeʼwaa. Müsü tü Wiwüliakat: «Eesüjaʼa süpüla sümüin wane wayuu: ‹Aawalaashi chi Maleiwakai suulia nikettaajüin tü nümakat sünain pansaain nünüiki›. Tamüshii paala jia: Nnojoishi aawalaain nia suulia. Nnojoyüʼiya eitaain Cristo süpüla süsalainjatüin saainjala wayuu, süka nücheküin Maleiwa süpüleerua shiyaawajaainjatüin wayuu süpüshua suulia saainjala. Aʼatapajüshi nia süka nnojolüin nücheküin süpüleerua eeinjatüin wayuu eekai amüloulin saaliijee  manoujain» (2 Ped. 3:9). Jülüjale waaʼin nnojolin kashapajaaralin Jeʼwaa, washateerü nukuwaʼipa (Roma 2:4). Wekirajaa süchiki waneirua kasa kapüleeka anainjee waʼatapajüin.

Eesü tü kasa kapüleekat maʼin anainjee waʼatapajüin otta nnojoluin süshapalaain waaʼin. Jamüshijaʼa yootule wanee wayuu otta waküjeere wanee kasa anaka saaʼin wamüin, nnojoishii waya asounajaainjanain (Sant. 1:19). Jee namaale waya wawalayuu naataka akuwaʼipa woulia jee mojushiire wamüin tü nakuwaʼipakat, nnojoishii waya aashichijaainjanain namüin. Anasü sotule waaʼin nnojoliin naashichijaain Jeʼwaa otta Jesuu wamüin eerejeʼe nnojoluin lotuin maʼin wakuwaʼipa. Nnojotsü shiain jülüjain maʼin naaʼin tü mojukat sünain wakuwaʼipa, shia jülüjaka naaʼin tü anakat otta tü waaʼinrakat süpüla wanouteʼerawalin shia (1 Tim. 1:16; 1 Ped. 3:12).

Wachecherüinjatü waaʼin suulia jashichijaain waya müleka shiʼitaanüle waaʼu waainjain jee waküjain wanee kasa mojusü. Eeshiijaʼa neʼe wasoutule waaʼu. Naatapejeʼe tü waaʼinrajatkat saashin tü Wiwüliakat, müsü shia: «Anaʼleesia nukuwaʼipa chi eekai nnojolin jashichijaain nuulialeʼeya chi yaletakai aaʼin. Nnojo jashichijaain pia, süka jamüin, nayain müin akuwaʼipa na malakana» (Ecl. 7:8, 9). Jaʼitairü alawaain neʼe wanee kasa aküjünaka wachiki, wachecherüinjatü waaʼin otta jülüjeesü maʼin waaʼin kasain anain süpüla waaʼinrüin shiʼipajee tia. Shiaʼaya naaʼinraka Jesuu tia soʼu mojuin pütchi nüchiki (Mat. 11:19, TNM).

Na wayuu kachonshiikana nnojoishii jashichijaainjanain namüin nachonnii nachiaapa naya sünainjee aaʼinraa otta jülüja aaʼin wanee kasa mojusü. Jülüjataa waaʼin nukuwaʼipa wanee wawala aʼyataakai suluʼu tü Weteet chakat Escandinavia, Mattias nünülia. Jimaʼaiwaʼaya nia, nemeeʼerainpalapuʼushi nia na nukonpainyeetsekana suluʼu tü koleejiakat saaliijee tü nunoujakalü anain. Nnojotsü nütüjaain aaʼu tia chi nüshikai jee tü niikat, neʼrapajeʼe wainmajüin naaʼin chi nachonkai saaʼu tü nunoulakat. Anuujeseʼe nünüiki Gillis, chi nüshikai Mattias: «Soʼu tia nnojoishii jashichijaain waya nümüin». Wainma kasa nüsakitka anain Mattias, eeshi nümüle: «¿Jaraiche maʼin chi Maleiwakai? ¿Jama nnojorüle nünüikin Maleiwa tü Wiwüliakat? ¿Jamüsü süpüla watüjaain saaʼu niain aluwataain waya sünain aaʼinraa wanee kasa?». Eeshi nümawaire nümüin chi nüshikai: «¿Jamüshi süsaleechika taya jutuma nnojorüle tanoujain sünain tü junoujakalü anain?».

 Müshi Gillis: «Eeshi jashichire chi wachonkai sünain yootoo wamaa, nnojoipejeʼe nia jashichin tamüin jee sümüin tü niikat, jashichishi nia sutuma tü shiimainkat süka shiain kapüleein atuma nukuwaʼipa naashin». ¿Kasaka naaʼinrüin Gillis sutuma tia? Anuu nünüiki: «Kojuyatua yootuin taya nümaa otta kamaʼawaishii waya sünain yootoo. Jülüjapuʼusü taaʼin tü nümakat tamüin otta tasakirawalin nia süpüla tayaawatüin saaʼu tü suluʼukat naaʼin otta jamüin nünüiki süchiki wanee kasa. Eeshi taküjawaire wanee kasa nümüin chi tachonkai süpüla jülüjain shia naaʼin otta yootuin waya mapa süchiki tia. Eeshi taashajaale nümaa süpüla wooʼulaain sülatüin waneesia jee piamale kaʼi süpüla jülüjain taaʼin palajana tü nüsakitkalü anain taya. Shiasaʼa sutuma yootowalin waya waneepia, niyaawata aaʼu Mattias kasapülajatüin naapajiraaka nikii Jesuu waaʼu, niyaawata aaʼu alin waya nüpüla Jeʼwaa otta niain anain süpüla aluwatawaa waaʼu. Nnojotsü waneein kaʼi taaʼinrüin tia nüka chi tachonkai otta eesü kapüleʼewaire shia, akooʼomüinraapejeʼe mapa naalin Jeʼwaa nüpüla. Talatüshii maʼin waya süka nnojoliin jashichijaain waya nümüin chi wachonkai soʼu jimaʼalin nia jee sutuma wakaalinjain nia süpüla sujutuuin suluʼu naaʼin tü shiimainkat».

Gillis sümaa nuʼwayuuse neʼitaain naaʼin nünain Jeʼwaa suʼunnaa nakaalinjain chi nachonkai. Anuu nünüiki Gillis: «Wainmatua taküjain nümüin Mattias aishaatain nia wapüla otta wachuntashaatain nümüin Jeʼwaa süpüla nükaalinjain nia süpüla niyaawatüin saaʼu tü nnojotkat nütüjaain aaʼu». Talatashaatashii wayuukana naainnua sutuma nnojoliin naashichijaain nümüin chi nachonkai.

Choʼujaasü nnojoluinjatüin süshapalaain waaʼin müleka waaʼinmajüle wanee wapüshi jee niale wanee waʼaleewain kanainkai wanee ayuulii eekai mepinaseein. Wekirajaa süchiki tü alatakat sümüin Ellen, * kepiasü shia chaa Escandinavia.

Alatüirü mekiisat juya süchikijee ayuuijaain nikii suʼwayuuse Ellen. sutuma tia ayuuliikat, isasü nüchiki talatüin naaʼin, mojuin naaʼin jee sümülialaain naaʼin saalin wayuu. Kapüleeshaatasü tia sümüin Ellen. Anuujeseʼe sünüiki: «Tachecherüin taaʼin otta oʼuraajüsü maʼin taya waneepia». Sümaka süchikijee: «Tü pütchi kamalainkat tamüin otta amülialaka taaʼin shia tü sümakat Filipos 4:13 (TNM), müsü mayaa: ‹Katchinshi taya süpüla tü kasakat süpüshuaʼa nutuma chi katchinkai atuma taya›». Sutuma nükatchinrüin Jeʼwaa saaʼin Ellen, eejiraasü shia sümaa tü alatakat sümüin sümaa sütüjain aʼatapajaa (Sal. 62:5, 6).

Nia Jeʼwaa atüjakai maʼin aʼatapajaa (2 Ped. 3:15). Wainmatua süküjain tü Wiwüliakat nnojoluin naashichijaamaatüin Jeʼwaa süka nütüjain aʼatapajaa (Neh. 9:30; Isa. 30:18). Wekirajaa sünain tü naaʼinrakat soʼu nüsakirüin nia Abraham sünain jamüin najaʼttirüinjatka Sodoma. Jülüjasü naaʼin Jeʼwaa nünüiki Abraham suʼunnaa nüsakirüin nia otta suʼunnaa nüküjain nümüin tü shapaakalü atuma naaʼin. Süka jülüjain naaʼin Jeʼwaa nünüiki Abraham asoutushi nia shiʼipajee tü nüsakitkalü anain nia otta nüküjain nümüin nnojoluinjatüin najaʼttirüin Sodoma müleka eere polooshii wayuu anamiaa suluʼu (Gén. 18:22-33). Anashaatasü ashataa nukuwaʼipa Jeʼwaa süka nütüjain aʼatapajaa otta achecheraa naaʼin suulia jashiee.

Süka shiiʼiranajaaitpain wakuwaʼipa, nnojoluinjatü ashapalaain waaʼin otta atüjainjana waya aʼatapajaa. Waʼyataale maʼin süchiirua eein wanain akuwaʼipaakat tüü, kojuteechi maʼin watuma Jeʼwaa, chi Washi aipüraikai jee atüjakai aʼatapajaa. Otta müsia, naʼakeena waya «na wayuu achechetkana naaʼin sünain anoujaa» (Heb. 6:10-12).