WATTA naalii wawalayuu aneekünaka jekenainka sainküinjee mmakat süpüshuaʼa süpüla laülaashiinjanain jee shiale süpüla naʼyataainjanain neʼipajee na laülaashiikana. Pialeje noʼutku naya wawalayuukana, talatakajasaʼa paaʼin süka piʼyataainjachin maʼin nümüin Jeʼwaa jee napüleerua na wawalayuukana.

Eesüjaʼa shapaale paaʼin sünainjee tia aʼyatawaakat. Anuu nünüiki Jason, wanee laülaashi suluʼu tü outkajaaleekat nnojoikai ataralüin maʼin: «Taneekünaiwaʼaya süpüla wanee aʼyatawaa suluʼu tü outkajaaleekat, shapaasü maʼin taaʼin saaʼujee tü taaʼinrüinjatkat». Alatüsü tia nümüin Moisés otta Jeremías soʼu naapüin Jeʼwaa namüin wanee aʼyatawaa, nnojoishii naya keraain süpüla tia naashin (Éx. 4:10; Jer. 1:6). Sülatüle tia pümüin, ¿kasa paaʼinrüinjatka süpüla nnojoluin mmoluwaain paaʼin jee süpüla ayatüin laülaain paaʼin sünain anoujaa? Eeshi süpüla pütüjain wainma kasa nünainjee Timoteo (Aluw. 16:1-3).

Eesüjaʼa 20 nuuyase Timoteo soʼu nuʼunüin sünain aküjaa pütchi nümaa chi aluwataaushikai Pablo. Eesüjaʼa shapaale maʼin naaʼin Timoteo soʼu tia süka nnojoluin nia kettaain süpüla ekirajaa jee achiawaa wayuu sükajee jintülin neʼe nia (1 Tim. 4:11, 12; 2 Tim. 1:1, 2, 7). Ayatapejeʼe nia alaüleʼerüin naaʼin sünain anoujaa, müshijeseʼe nümüin Pablo nüchiki: «Anasü saaʼin tamüin tajütüle Timoteo maalü jünainmüin, müleka nücheküle chi Senyotkai Jesucristo, süpüla jütütülaainjanain aaʼin». ¿Jamüsü anashiika nümüin Pablo nüjütüin Timoteo chaa Filiposmüin? «Nnojoishi eein tamaa wane wayuu makai aka naaʼin Timoteo», müshi nia (Filip. 2:19, 20).

¿Jamüsüche anaka maʼin nukuwaʼipa Timoteo süpüla nashatüin shia na laülaashiikana? Wekirajaa sünain aipiruasü kasa anaka maʼin süpüla jüshatüin sünainjee nukuwaʼipa.

1. Kapülasü naaʼin sukuwaʼipa wayuu. Nüküjain Pablo namüin na anoujashii chajanakana Filipos sünain kapülain maʼin naaʼin Timoteo süpüshuaʼa «tü kasa anasü aamüinjatkat» namüin (Filip. 2:20). Süka keeʼireein naaʼin Timoteo aleewain maʼin na anoujashiikana nümaa Jeʼwaa, nüchajaain sukuwaʼipa süpüla nükaalinjain naya.

William, wanee wawala alatakai suulia 20 juya sünain laülaashin nia, maʼwaishi namüin na jekenakana aneekünüin süpüla laülaashiin: «Ai jüpüla na wawalayuukana, jülüja jaaʼin tü alatakat namüin suulialeʼeya tü münakat jümüin suluʼu karaloʼuta». Nnojo jüshatüin nukuwaʼipa wanee wayuu suchupeetse wuusü, anteekai neʼe eemüin tü süshaʼwajülekat wuusü suulialeʼeya akotchojoo pasajeet.

2. Kojutusü nümüin tü niʼyataainkat nümüin Jeʼwaa. Naashin Pablo, naata nukuwaʼipa Timoteo noulialeʼeya na wayuu «kapülaka neʼe naaʼin nakuaippa namüiwa» jee nnojoliikana «kapülain naaʼin nukuaippa Jesucristo» (Filip. 2:21). Niʼrüin Pablo kapülain naaʼin nakuwaʼipa neʼe namüiwaʼa na anoujashii eejanakana nükalioʼu. Shia kojutuleeka namüin tü keeʼireekat naaʼin suulialeʼeya tü naʼyataainkat nümüin Jeʼwaa. Nnojotpejeʼe müin nukuwaʼipa Timoteo süka najayatawalin sukuwaʼipa süpüla nukooʼomüinrüin niʼyataain nümüin Jeʼwaa, müsü nukuwaʼipa maʼaka naaʼin Isaías soʼu nümüin nümüin Jeʼwaa: «¡Anii taya! Taya puluwataa» (Isa. 6:8).

¿Kasa paaʼinrajatka süpüla pikeraajüin tü piʼyataainkat suluʼu tü outkajaaleekat sümaa nnojoluin motuin paaʼin tü choʼujaakat pümüin jee sümüin püpüshi? Naashin Pablo, shia jülüjainjatka waaʼin tü kasa alanaʼaleekat maʼin ojutu (Filip. 1:10, TNM). Jülüjainjatü waaʼin tü waʼyataainkat nümüin Jeʼwaa, shia kojutuleeinjatka wamüin. Otta eejüinjatü maʼin waaʼin suulia waneepiain waya sünain aaʼinraa waneirua kasa kamaʼaka jee mapüsaka anainjee waya. Müshi Pablo nümüin Timoteo: «Shia anaka aluʼu, pükayalaale suulia tü kasa süchüntaakat naaʼin na jimaʼaliikana wanaa pümaa. Shia kachiirua paaʼin lotuinjatüin pukuwaʼipa, kanoulaainjachin pia, aipüralinjachin pia wayuu otta anajiraa pia namaa na waneinnua» (2 Tim. 2:22, TNM).

3. Aʼyataashaatashi maʼin nia nümüin Jeʼwaa. Müsü nünüiki Pablo nüchiki Timoteo: «Maa aka wane wayuu eekai niʼyataain nümaa nüshi, akaʼaya nia tamaa sünain aküjaa nüchiki chi Oʼtteʼerüikai» (Filip. 2:22). Nnojoishi  shokulain Timoteo. Aʼyanaajiraashi maʼin nia nümaa Pablo, aleewashiijeseʼe maʼin naya.

Wainma aʼyatawaa eeka sutuma nupueulose Jeʼwaa. Anashaatasü maʼin tia aʼyatawaakat süka anain waaʼin sutuma otta kottüin waya namaa na wawalayuukana sünainjee. Püchajaa maʼin sukuwaʼipa süpüla pukooʼomüinrüin piʼyataain nümüin Jeʼwaa (1 Cor. 15:58, TNM).

4. Naaʼinrüin tü ekirajünakalü anain nia. Anuu nünüiki Pablo nümüin Timoteo: «Aluʼusa piakai [...] süka puushikajaain süchiirua takuaippa waneepia.Pütüjaa aaʼut takuaippa sünain tekirajüin tü shiimüinkat, sünain taaʼinrüin tü kasa anasü tekirajakat anain, sünain kachiiruain taaʼin tü nüchekakat Maleiwa tapüleerua, sünain laülaain taaʼin sünain anoujaa, je sünain alin tapüla wayuu. Pütüjaa aaʼut takuaippa sünain tachecherüin taaʼin sünain anoujaa» (2 Tim. 3:10, 11). Naaʼinrüin Timoteo tü ekirajünakalü anain nia, müsüjeseʼe saapünüin nümüin wainma aʼyatawaa (1 Cor. 4:17).

Eeshi süpüla püshatüin nukuwaʼipa wanee laülaashi kakaliaichika sünain tia niʼyataainkat. Eeshi wanee wawala Tom nünülia, kakaliaichi nia sünain laülaashin suluʼu tü outkajaaleekat. Sotusü naaʼin Tom tü naaʼinrakat wanee wawala laülaashika suluʼu tü outkajaaleekat nüpüleerua. Nükaalinjain nia naashin jee nikirajüin nia sünain tü naaʼinrüinjatkat süpüla anainjatüin nutuma tü niʼyataainkat. Müshi Tom: «Tasakirawalin chia wawalakai otta taaʼinrüin tü nümakat tamüin. Sutuma tia, nnojoluichipa mmoluwaain taya sünain aʼyatawaa».

5. Ekirajaashi nia waneepia. Müsü nünüiki Pablo nümüin Timoteo: «Shia anaka aluʼu müleka kachiiruale paaʼin keisalaa sümüin pukuaippa nuʼupala Maleiwa» (1 Tim. 4:7). Wanee ayoujiraai, nnojotsü naʼatapajüin nikirajünüinjachin waneepia nutuma chi ekirajakai nia, choʼujaasü nikirajaain nümüiwaʼa. Müshijeseʼe müin Pablo nümüin Timoteo: «Anakaja ayatüle pia sünain aashajeʼeraa tü karaloukta nüchikimaajatkat Maleiwa suluʼu tü outkajaaleekat. Anashi ayatüle pia sünain ekirajaa wayuu sünain nünüiki Maleiwa süpüla nayaawatüin saaʼu. Anashi ayatüle pia sünain emeʼejaa naaʼin shiiʼiree noonoweein sümaa. [...] Müleka tütüle pia sünain piʼyataain nümüin Maleiwa, nayaawateechi aaʼu pia na puwalayuukana sünain laülaain paaʼin sünain anoujaa» (1 Tim. 4:13-15).

Ayata pukooʼomüinrüin tü pütüjakalü apüleerua sünain tü piʼyataainkat nümüin Jeʼwaa. Pikirajaa weinshi sünain tü Wiwüliakat otta poonoo sümaa tü kasa jeketü sümakat nupueulose Jeʼwaa. Nnojo piʼitaain paaʼin pünainjiraa. Nnojo paaʼinrüin wanee kasa sümaa nnojoluin pikirajaain süchiirua palajana süka kakaliaichin pia sünain aaʼinraa shia paashin. Püshata nukuwaʼipa Timoteo, eeja «paaʼin sünain tü pükuwaippakat suulia paaʼinrajüin kasa mojusü je suulia pikirajüin sünain kasa naatajatü» (1 Tim. 4:16).

6. Niʼitaain naaʼin nünain chi naaʼinkai Jeʼwaa. Müshi Pablo nümüin Timoteo: «Anakaja müleka paaʼinmajüle tü pütchi shiimüin aapünakat pümüin suulia amülajüin neʼe shia. Chi akaaliijakai waya sünain waaʼinmajüin tia pütchikat, nia chi Naaʼinkai Maleiwa süka eein nia suluʼu waaʼin» (2 Tim. 1:14). Choʼujaasü niʼitaainjatüin naaʼin Timoteo nünain chi naaʼinkai Maleiwa.

Anuu nünüiki Donald, wanee wawala kakaliaichikai sünain laülaashin: «Na wayuu aneekünakana süpüla aʼyatawaa nümüin Jeʼwaa, aleewainjana nümaa. Atütülaajeerü naaʼin na aaʼinrakana tia. Nachuntüle chi naaʼinkai Jeʼwaa jee naʼyataale maʼin süchiirua eeinjatüin nanain tü akuwaʼipaa eekat nutuma chi naaʼinkai Maleiwa, aneerü naaʼin na wawalayuukana natuma» (Sal. 84:7; 1 Ped. 4:11).

Talatüsü maʼin waaʼin süka nalaüleʼerüin naaʼin sünain anoujaa na wawalayuu jekenakana aneekünüin süpüla neʼipajanain na laülaashiikana jee laülaashiire naya. Anuu nünüiki chi wawalakai Jason, chi waashajaakai achiki suʼttiajee pütchikat tüü: «Nnojoluichipa taya mmoluwaain jee shapaain taaʼin saaʼujee tü aʼyatawaa aapünakat tamüin suluʼu tü outkajaaleekat. Talatüshi maʼin taya süka niain kaapajalain shia Jeʼwaa tamüin».

¿Pukooʼomüinreetche punoula? Müle shia putuma, talateerü maʼin naaʼin na wawalayuukana jee aneerü nakuwaʼipa sutuma.