1. ¿Kasa eeka süpüla waʼyanaajiraain anain nümaa Jeʼwaa?

NUKUMAJAIWAʼAYA wayuu Jeʼwaa keeʼireetüjülia naaʼin shiʼyanaajiraain nümaa sünain ekeraajaa tü nüchekakat napüleerua jee süpüleerua tü Mmakat. Ayatayüliipejeʼe waya aʼyanaajiraain nümaa maaʼulu mayaapejeʼe waleʼeruʼuin tü kaainjalaakat. Müsü tü Wiwüliakat nachiki na aʼyataakana waneepia nümüin Jeʼwaa: «Aʼyataalii [naya] nümaa Maleiwa». Waaʼinrüin tia wanaa sümaa waküjain pütchi sümüin wayuu otta wekirajüin shia (1 Cor. 3:5-9, TNM). Anashaatasü maʼin süka nüneeküin waya Jeʼwaa süpüla waʼyanaajiraain nümaa sünain tia. Eepejeʼe waneirua sukuwaʼipa süpüla waʼyataain nümüin Jeʼwaa. Wanee sukuwaʼipa shia sükajee wakaalinjain na wapüshikana jee na wawalayuukana, kamaneere waya sümüin wayuu otta waʼyataale sünain tü choʼujaakat suluʼu tü nupueulosekat Maleiwa jee woʼunüle eere choʼujaain Aküjalii pütchi. Sünain ekirajaayakat tüü wekirajaajeerü anain süchiki tia (Col. 3:23).

2. ¿Jamüsü nnojotka wayoujireʼerüinjatüin tü waʼyataainkat nümüin Jeʼwaa sümaa naʼyataain na waneinnua?

² Suʼunnaa wekirajaain sünain ekirajaayakat tüü, nnojo piyoujireʼerüin tü piʼyataainkat nümüin Jeʼwaa sümaa tü naʼyataainkat  na waneinnua, süka jamüin, naatawalin wakuwaʼipa. Eeshii laülaale waya, ayuuire jee naatale tü watüjakalü apüleerua suulia tü natüjakalü apüleerua na wawalayuukana. Eetaashii na kapüleekana amüin nakooʼomüinrüin naʼyataain nümüin Jeʼwaa. Müsüjeseʼe nümüin chi aluwataaushikai Pablo: «Anakaja eere jaaʼin sünain tü jaaʼinrakat süpüla jütüjaainjatüin saaʼu müleka anale je müleka mojule. Maa aka analejeʼe tü jaaʼinrakat, talateeshiijaʼa jia sümaa. Je nnojolu jiyoujireerüin tü jaaʼinrakat namaa juwalayuu» (Gal. 6:4).

3. ¿Jamüshii naʼyanaajiraaka nümaa Jeʼwaa na aaʼinmajakana napüshi?

³ Nuluwataain waya Jeʼwaa sünain akaalinjaa na wapüshikana. Eeshii na aʼyataainjanakana süpüleerua tü choʼujaakat sümüin napüshi. Eesü jieyuu eekai makatüin shipialuʼu süpüla saaʼinmajüin süchonnii otta eeshii wawalayuu aaʼinmajakana nashi jee nei. Müsü tü Wiwüliakat: «Wane anoujashi, müleka nnojorule naaʼinmajüin na nüpüshikana, na kepiakana nümaa maa aka eekai nnojoliin kepiain nümaa, niyouktüinjaʼa, sükajee tia, tü nünüikikat Maleiwa ekirajünakat anain nia. Mojuleesia maʼi tü naaʼinrakat nuulia wane manoulasai» (1 Tim. 5:8). Isale püchiki pukooʼomüinrüin piʼyataain nümüin Jeʼwaa sutuma paaʼinmajüin püpüshi, nnojo mojuin paaʼin saaliijee tia. Talatüsü naaʼin Jeʼwaa waapüle tü choʼujaakat sümüin wapüshi jee waaʼinmajüin naya (1 Cor. 10:31).

4. ¿Kasa naaʼinrajatka na kachonshiikana süpüla kojutuleeinjatüin namüin tü sünainpünaakat Nuluwataaya Maleiwa? ¿Kasa eejeetka sutuma müin nakuwaʼipa?

⁴ Aʼyanaajiraashii nümaa Jeʼwaa na wawalayuukana natütüleʼerapa naaʼin nachonnii süpüla nakooʼomüinrüin naʼyataain nümüin Jeʼwaa. Naʼakajee naya tepichikana wainma na waneepiakana sünain aʼyatawaa nümüin Jeʼwaa miyoʼuyuupa naya, jaʼitainna wattain naya suulia napüshi. Naaʼaya eekai misioneeroin, naʼyataain suluʼu Weteet jee aküjakana pütchi eere choʼujaain Aküjalii pütchi. Sutuma wattain naya suulia napüshi, nnojoishii naya kottüin maʼakaapuʼu paala. Atütüleʼennapejeʼe naaʼin sutuma nei otta nashi süpüla ayatüin naʼyataain nümüin Jeʼwaa chaa eere naya. Naainjain tia süka talatüin maʼin naaʼin neʼrapa kojutuin maʼin namüin nachonnii tü naʼyataainkat nümüin Jeʼwaa (3 Juan 4). Anashaatasü maʼin naʼyanaajiraain nümaa Jeʼwaa na kachonshiikana. Eesü müle nanüiki maʼaka sünüiki Ana tü niikat Samuel wanaa sümaa sümüin: «Anii joo taapüinjachin nia nümüin Jeʼwaa süpüla niʼyataain nümüin» (1 Sam. 1:28).

5. ¿Kasa eeka süpüla pükaalinjain anain na wawalayuukana? (Piirakaa sümüin tü ayaakuaa suluʼukat süpana 21).

⁵ ¿Kasa eeka süpüla paaʼinrüin nnojoiyüire paaʼinmajüin püshi sümaa püi otta machonle pia? Eeshii süpüla pükaalinjain na wawalayuu laülaainnakana, eekai ayuulin otta eekai choʼujaain amüin akaalinjünaa. Jamüshijaʼa eere wanee wawala eekai naaʼinmajüin nüshi jee nii, eeshi süpüla pükaalinjain nia sünain tü choʼujaakat nümüin. Jülüjeeshii paaʼin na wawalayuu puutkajaakana amaa süpüla pütüjaain saaʼu jaraliin choʼujaain amüin kaalinwaa. Eetaale wanee wawala eekai saaʼinmajüin süshi süka laülaaichin nia, eeshi süpüla makatüin pia nümaa sümaʼinruʼu chain shia sünain aaʼinraa waneirua kasa. Wanee kasa eeka süpüla paaʼinrüin shia pükaalinjale wanee wawala eekai kapüleein amüin oʼunaa sünain tü outkajawaakat, eeshi süpüla puʼunuin nümaa pitaaraluʼumüin sünain anaʼlawaa nümüin wanee nüpüshi ayuuikai otta eeshi süpüla pükaalinjain nia chainjachire nia sünain ayaʼlajaa. Paaʼinrüle tia, aʼyanaajiraajeechi pia nümaa Jeʼwaa süka nachuntuin kaalinwaa na wawalayuukana nümüin (paashajeʼera 1 Corinto 10:24).

6. ¿Kasa waaʼinrajatka süpüla weeʼiyatüin sünain kamaneein waya?

⁶ Kamaneeshii na aʼyanaajiraakana nümaa Jeʼwaa. Sünain tü karaloʼuta ashajuushikat süka Griego, tü pütchikat «kamanewaa», «anamiaa namüin na nnojoliikana piʼraajüin» maluʼulu (Heb. 13:2 ,TNM; noota). Suluʼu tü Wiwüliakat aküjünüsü nachiki wainma wayuu kamaneeshii anakana süpüla washatüin akuwaʼipa (Gén. 18:1-5). Eere süpüla wakaaliinjain wayuu, waaʼinreein shia jaʼitainna nnojoluin wawalayuuin naya sünain anoujaa (Gal. 6:10).

7. ¿Jamüshii kamaneeinjanaka waya namüin na wawalayuu alapalaakana waaʼu eere woutkajaain?

⁷ Aʼyanaajiraashii waya nümaa Jeʼwaa sükajee kamaneein waya namüin na wawalayuu alapalaakana waaʼu eere woutkajaain (paashajeʼera 3 Juan 5, 8). Katsüinsü wanoula natuma naya wawalayuukana maʼaka katsüin nanoula watumaya (Roma 1:11, 12). Jülüja paaʼin nüchiki wanee wawala Olaf nünülia. Jimaʼaiwaʼaya nia, antüshi wanee wawala sünain alapalawaa naaʼu na wawalayuukana eere nuutkajaain. Maʼwayuusesai chia wawalakai, nnojoika jaralinjachin makatüin epialuʼu nia. Nüsakiraka Olaf chi nüshikai jee tü niikat eere süpüla makatüin chi wawalakai nepialuʼu. Mayaapejeʼe nnojolin naküjaliin pütchi wanaa nümaa, «eeshi süpüla makatüin nia wamaa, cheechi pia atunküin saaʼu sofá» müshii nümüin. Talatüshi maʼin Olaf semaanaka tia. «Yootowaishii waya watta maalü süchiki wainma kasa anashaatasü maʼin», müshi Olaf. «Soʼujee tia aʼyataweeshi maʼin taya waneepia nümüin Jeʼwaa», müshi nia. Alatüirü 40 juya sünain misioneeroin Olaf suluʼu kojuyasü mma.

8. ¿Jamüshii kamaneeinjanaka waya jaʼitairü müin nnojotkai kojutuin sümüin wayuu tia? Püküja süchiki tü alatakat sümüin Yésica.

⁸ Wainma kasa eeka süpüla weeʼiyatüin akajee alin wapüla wayuu jaʼitasü mojutuin tia sümüin. Wekirajaa süchiki wanee wayuu Yésica sünülia, chejeʼewat shia Ecuador. Ekirajünüsü shia sutuma wanee wawala chaa España. Soʼu wanee kaʼi aʼyalajüsü Yésica suʼunnaa nekirajaain. Süsakiraka shia tü wawalakat jamüin shiʼyalajaka, makalaka süküjain Yésica wanee kasa alataka sümüin süpülapünaa kepiain shia España. Müliapuʼusü maʼin sutuma maʼletsein shia. Soʼu wanee kaʼi, nnojotsü kasain eejatüin sümaʼana süpüla shikirüin tü süchonchonkat, süsirüin neʼe wüin. Oʼuraajüsü Yésica soʼu tia wanaa sümaa shiyuujain tü süchonkat. Süntapaataka piamasü wawalayuu shipialuʼumüin, airuʼutsü maʼin sünüiki Yésica sümüin tü wawalayuukalüirua otta süchatajaain tü karaloʼuta aapünakat sümüin. «¿Shia tekirajatka tachon tüü?» müsü shia namüin. Mayaapejeʼe nachajaain sukuwaʼipa süpüla neimaleʼerüin shia, nnojotsü jaa müin shia namüin. Mapa, süpütüin tü piamasükat wawalayuu wanee wotsa sümaa eküülü soʼuluʼu shipia Yésica. Talatashaanasü saaʼin Yésica sotowaipa saaʼin tia, mojuwaipejeʼe saaʼin sutuma nnojolin jaa sümüin nümüin Jeʼwaa soʼu tia mayaapejeʼe nusoutuin shiʼipajee tü suchuntakat. Suluʼujee tia, shiʼitaain süpüleerua shiʼyataainjatüin nümüin Jeʼwaa. Eeʼiratüsü sukuwaʼipa sutuma kamaneein maʼin tü piamasükat wawalayuu (Ecl. 11:1, 6).

9, 10. (1) ¿Kasa eeka süpüla nakaalinjain anain na israeliitakana sümaiwa paala? (2) ¿Kasa eeka süpüla pükaalinjain anain suluʼu tü outkajaaleekat?

⁹ Nakalioʼu na israeliitakana achuntunawaisü kaalinwaa namüin süpüla waneirua aʼyatawaa  (Éx. 36:2; 1 Crón. 29:5; Neh. 11:2). Maaʼulu yaa, eeshii süpüla wakaalinjain na wawalayuukana sükajee tü watüjakalü apüleerua, tü eekat wamaʼana jee wachajaale sukuwaʼipa süpüla namaain waya. Wakaalinjale naya, talateerü maʼin waaʼin sutuma otta anakuwaʼipaleena waya nutuma Jeʼwaa

¹⁰ Atütüleʼennüsü naaʼin na wawalayuu tooloyuukana sutuma tü Wiwüliakat süpüla naʼyataain süchiirua neʼipajanain naya na laülaashiikana jee laülaashiire naya suluʼu tü outkajaaleekat (1 Tim. 3:1, 8, 9, TNM; 1 Ped. 5:2, 3). Na aʼyataakana süchiirua tia nakaalinjeena maʼin na wawalayuukana sünain akatsüinra nanoula otta sünain tü choʼujaakat namüin (Aluw. 6:1-4). Wainma kasa eeka süpüla pükaalinjain anain. Maʼaka saaʼin jülüjain paaʼin na antakana sünain tü outkajawaakat, paapüin karaloʼuta namüin na wawalayuukana suluʼu tü outkajaaleekat, jülüjain paaʼin eeinjanale waküjain pütchi jee punoutüin tü Piichi Outkajaaleekat. ¿Eeichi pia asakinnüin natuma na laülaashiikana müleka eere süpüla pükaalinjain sünain tia? Na aaʼinrakana tia suluʼu tü outkajaaleekat talatüshii maʼin naya naashin sutuma nakaalinjain na waneinnua.

11. ¿Kasa anasü shiʼraka wanee wawala aʼyataaka sünain akumajaa Piichi Outkajaalee?

¹¹ Wainma naʼaleewainyuu na aʼyataakana sünain akumajaa Piichi Outkajaalee. Shia tü alatakat sümüin wanee wawala Margie sünülia, 18 juya shiʼyataain sünain tia. Suʼunnaa tia shikirajüin kojuyasü majayünnüü sünain tia aʼyatawaakat otta aleewasü shia namaa. Saashin tü wawalakat, atütüleʼerajiraashii naaʼin sünain anoujaa soʼu tia (Roma 1:12). Jee müsia mapa, suʼunnaa shiʼrüin sümüliala, amüliajünüsü saaʼin natuma na aʼyataapuʼukana sümaa. ¿Eeirü pipirajüin tü karaloʼuta süpülajatkat aʼyatawaa sünain akumajaa Piichi Outkajaalee? Eeshii süpüla waʼyataain sünain tia jaʼitairü nnojoliin watüjain süpüleerua tia.

12. ¿Kasa eeka süpüla wakaalinjain anain süchikijee wanee wawai jee sukutkujaale mma?

¹² Eeshiijaʼa wakaalinjale na wawalayuukana  neʼrüle müliaa sutuma wawai jee sukutkujaale mma eere kepiain naya. Wanee sukuwaʼipa süpüla wakaalinjain naya shia sükajee wasülajüin nneerü süpüla tü choʼujaakat namüin (Juan 13:34, 35; Aluw. 11:27-30). Jee wakaalinjale naya sünain okotchojoo tü yarütshi apütaakat süchikijee tia alatakat namüin otta sünain anoutaa nepia. Jülüja paaʼin tü alatakat sümüin wanee wawala kepiaka chaa Polonia, Gabriela sünülia. Ajaʼttaleesia shipia sutuma süsetüin wüin. Amülialaasü saaʼin sutuma wainmain wawalayuu suluʼujeejanaka waneirua outkajaalee akaalinjaka shia. Müsü Gabriela: «Nnojotsü taya aashajaweein süchiki tü kasa amülouikat sutuma wüin, aluʼusaʼa süchiki tü kasa anasü teʼrakat süchikijee tia. Sutuma tü alatakat tamüin, tayaawatüitpa aaʼu nnojoluin eein wanee kasa alanaʼaleeka sünain anain suulialeʼeya naʼakain taya na wawalayuukana jee talatüsü maʼin taaʼin sutuma». Müsia nanüiki wainma wawalayuu akaalinjünaka neʼrapa müliaa sutuma wawai jee waneirua kasa. Akaʼaya na akaalinjakana naya, talatashaatashii maʼin (paashajeʼera Aluwataaushikana 20:35; 2 Corinto 9:6, 7, TNM).

13. ¿Jamüsü katsüinka wanoula wakaalinjale na wawalayuukana? Püküja süchiki tü saaʼinrakat wanee wawala.

¹³ Stephanie namaa waneinnua wawalayuu aʼyanaajirashii nümaa Maleiwa sünain akaalinjaa na wawalayuu aʼluwataakana chamüin Estados Unidos süka eejatüin kasachiki noumainpaʼa. Aʼyataashii maʼin naya sünain achajawaa piichi napüla naya wawalayuukana otta nachajaain tü kasa choʼujaakat namüin naya wawalayuukana. Müsü Stephanie süchiki tia: «Talatüsü maʼin naaʼin na wawalayuukana neʼrapa alin naya wapüla, sütanalüin waaʼin tia. Saaʼin namüin wakaaliinjain naya, nayapejeʼe akaalinjain maʼin waya, süka jamüin, katsüin wanoula sutuma weʼrüin paaʼinwajiraain na wawalayuukana, aijiraain naya, kanoulain maʼin naya otta neʼitaain naaʼin nünain Jeʼwaa. Suluʼujee tia kojutusü maʼin wamüin tü naapakat Jeʼwaa wamüin sükajee tü nupueulosekat».

14, 15. (1) ¿Kasa naaʼinraka Isaías sutuma tü nümakat Jeʼwaa? (2) ¿Kasa eeka süpüla paaʼinrüin süpüla püshatüin nukuwaʼipa Isaías?

¹⁴ ¿Kooʼomüinweesü piʼyataain nümüin Jeʼwaa? ¿Eeshiche süpüla puʼunüin sünain aküjaa pütchi eere choʼujaain Aküjalii pütchi? Mayaapejeʼe nnojoliin woʼunuinjanain wattapünaa süpüla wakaalinjain wayuu, eepejeʼe wawalayuu eekana süpüla naaʼinrüin tia. Sükajee tia, nashatüin nukuwaʼipa Isaías wanaa sümaa nümüin Jeʼwaa: «¿Jaraleeiche taluwataaka otta jaraleeiche oʼunaka wooʼopünaa?». Nusoutaka Isaías niʼipajee: «¡Anii taya! Taya puluwataa» (Isa. 6:8). ¿Müsüche pünüiki choʼujaapa wawalayuu süpüla naʼyataain suluʼu nupueulose Jeʼwaa? ¿Kasa eeka süpüla pükaalinjain anain maaʼulu?

 ¹⁵ Wanaa sümaa naashajaain Jesuu süchiki tü aküjaakat pütchi otta ekirajaa wayuu, müshi nia: «Wainma wayuu eekai saapeein tachiki tayakai chi Oʼtteʼerüikai. Otta palitchon na yapakana süpüla oʼunaa sünainmüin tü wayuukolüirua süpüla naküjainjatüin tachiki sümüin. Je sükajee tia, juchunta jumaala nümüin chi Tashikai Maleiwa süpüla nuluwataainjanain na wayuu aküjüinjanakana tachiki namüin» (Mat. 9:37, 38). ¿Eeshiche süpüla pürekutsoolin pia eere choʼujaain Aküjalii pütchi? ¿Eeshiche süpüla pükaaliinjain wanee wawala süpüla niainjachin pürekutsoolin chayaa? Wainma na wawalayuu jülüjakana aaʼin shiain anain pürekutsoorüle naya eere choʼujaain Aküjalii pütchi süpüla neeʼiyatüin alin Jeʼwaa otta wayuu napüla. ¿Eesüche waneirua kasa eeka süpüla paaʼinrüin süpüla kooʼomüin putuma piʼyataain nümüin Jeʼwaa? Paaʼinrüle tia, talateerü maʼin paaʼin sutuma.

16, 17. ¿Kasa eeka süpüla naaʼinrüin na kooʼomüinweekana aʼyataain nümüin Jeʼwaa?

¹⁶ Süka wainmain aʼyatawaa suluʼu Weteet jee sünain akumajaa Piichi Outkajaalee, ¿oʼuneeiche pia sünain akaalinjaa? Eeshi süpüla piʼyataain waneepia chayaa jee pükaalinjale waneirua kaʼi süpüla semaanaka. Choʼujaashii waneepia wawalayuu süpüla naʼyataain eepünaale naluwataanüin sutuma nupueulose Jeʼwaa. Eesüjaʼa saapüneerüle pümüin wanee aʼyatawaa naata suulia tü pütüjakalü apüleerua. Kojutusü maʼin nümüin Jeʼwaa tü naaʼinrakat na wawalayuu apütakana wainma kasa süpüleerua naʼyataain nümüin eepünaale naluwataanüin (Sal. 110:3).

¹⁷ Müleka keeʼireere paaʼin pikirajünüin süpüla kooʼomüin piʼyataain nümüin Jeʼwaa, eesü süpüla pipirajüin tü karaloʼuta süpülajatkat puʼunuin sünain Ekirajawaa napüla na Aküjaliikana Pütchi. Sünain tia ekirajawaakat ekirajünüshii wawalayuu eekai laülaain naaʼin sünain anoujaa otta waneepiain sünain aʼyatawaa nümüin Jeʼwaa. Ekirajünüshii naya süpüla kooʼomüin naʼyataain nümüin Jeʼwaa. Na wawalayuu epirajakana tü karaloʼuta süpülajatkat tia ekirajawaakat natüjaa aaʼu noʼunuinjanain eemüinre naluwataanüin. ¿Eeshiche süpüla pukumajüin pukuwaʼipa süpüla puʼunuin sünain tia ekirajawaakat otta kooʼomüin putuma piʼyataain nümüin Jeʼwaa? (1 Cor. 9:23, TNM).

18. ¿Kasa anasü weʼreetka waʼyataale waneepia nümaa Jeʼwaa?

¹⁸ Wayakana aʼyataaliikana nümüin Jeʼwaa, keeʼireesü maʼin waaʼin kamaneein waya sümüin wayuu, alin shia wapüla jee wakaaliinjain wayuu sünain tü choʼujaakat sümüin. Waaʼinrüle tia waneepia, talateerü waaʼin otta aneerü waaʼin (Gal. 5:22, 23). Washatüle nukuwaʼipa Jeʼwaa jee wachajaale sukuwaʼipa süpüla waʼyanaajirain nümaa, talateerü maʼin waaʼin jee talateerü naaʼin Jeʼwaa wamaa.(Prov. 3:9, 10).