1. ¿Jamüsü watüjaaka saaʼu nnojoluin kapülain neʼe naaʼin Jeʼwaa nukuwaʼipa nümüiwaʼa?

NUʼTTAIWAʼAYA Maleiwa sünain akumajaa tü kasakalüirua niaʼala neʼe eejachikai nümüiwaʼa. Nnojotpejeʼe kapülain neʼe naaʼin Jeʼwaa nukuwaʼipa nümüiwaʼa, müshijeseʼe nukumajüin na aapieekana jee na wayuukana. Süka niain «chi Maleiwa talatakai aaʼin», kamalainsü maʼin nümüin aapaa kasa anasü (1 Tim. 1:11, TNM; Sant. 1:17). Süka keeʼireein naaʼin Maleiwa talatüin waaʼin, nikirajüin waya süpüla wasülajüliinjanain (Roma 1:20).

2, 3. (1) ¿Jamüsü talateetka waaʼin wasülajüliire? (2) ¿Kasa wekirajaainjatka anain sünain ekirajaayakat tüü?

² Nukumajüin Maleiwa na wayuukana sünain müin aka saaʼin nukuwaʼipa (Gén. 1:27, TNM). Nukumajüin waya sümaa eein akuwaʼipaa anasü wanain maʼaka eein shia nünain. Müsüjeseʼe talateerüin waaʼin washatüle nukuwaʼipa Jeʼwaa, kapürale waaʼin sukuwaʼipa wayuu otta wasülajüliire (Filip. 2:3, 4; Sant. 1:5).  Mayaapejeʼe waleʼeruʼuin tü kaainjalaakat, eesü süpüla washatüin nukuwaʼipa Jeʼwaa sünain kamaneein waya sümüin wayuu süka aletüjülüin wakuwaʼipa nutuma.

³ Talateerü naaʼin Jeʼwaa wamaa wasülajüliire, akaʼaya shia, mapüleejeerü wamüin ekeraajaa tü aʼyatawaa niʼitaakat wapüleerua otta talateerü maʼin waaʼin. Sünain ekirajaayakat tüü, wekirajaajeerü süchiki tia otta wekirajaajeerü anain jamüin nnojotka wooʼulaainjanain suulia kamanewaa.

4, 5. ¿Kasa wayaawataka anainjee kamaneein maʼin Jeʼwaa otta Jesuu?

⁴ Keeʼireesü maʼin naaʼin Jeʼwaa washatüin nukuwaʼipa, müsüjeseʼe talatüin maʼin naaʼin wasülajüliire niʼrüin (Éf. 5:1). Sünainjee tü kasa nukumajakat Jeʼwaa yaa mmapaʼa, wayaawata aaʼu keeʼireein maʼin naaʼin talatüin waaʼin (Sal. 104:24; 139:13-16). Waʼwaajüin Jeʼwaa wanaa sümaa wachajaain sukuwaʼipa süpüla talatüinjatüin naaʼin na waneinnua watuma.

⁵ Wayakana anoujashiikana washatüinjatü nukuwaʼipa Jesuu süka niiʼiyatüin wamüin sükajee nukuwaʼipa eein süpüla kamaneein wanee wayuu. Müshi nia: «Tayakai chi Shipayakai Wayuu, nnojoishi antüshin taya süpüla shiʼyataainjatuin wayuu tamüin, aluʼujasa süpüla taʼyataainjachin sümüin wayuu, je süpüla taashinjatüin wayuu wainma suulia saainjala sünainjee ouktüin taya saaʼu» (Mat. 20:28). Nüküjain chi aluwataaushikai Pablo namüin na anoujashiikana sünain müinjanain naya maʼaka naaʼin «Cristo Jesús» süka müin nia maʼaka naaʼin wanee «achepchiaa süpüla nükaaliijain waya» (Filip. 2:4, 5, 7). Wasakira waaʼin sünain tüü: «¿Kasache tanoutuinjatka sünain takuwaʼipa süpüla tashatüin maʼin nukuwaʼipa Jesuu?» (paashajeʼera 1 Pedro 2:21, TNM).

6. ¿Kasa watüjaka sünainjee tü nüküjakat Jesuu nüchiki chi wayuu samariajeʼewaikai? (Piirakaa sümüin tü ayaakuaa suluʼukat süpana 15).

⁶ Talateechi maʼin Jeʼwaa wamaa washatüle nukuwaʼipa otta nukuwaʼipa Jesuu. Müsüjeseʼe kapülainjatüin maʼin waaʼin nakuwaʼipa na waneinnua jee wachajaainjatü maʼin sukuwaʼipa süpüla wakaaliinjain naya sünain tü choʼujaakat namüin. Nikirajüin waya Jesuu sünain tia sükajee tü nüküjakat nüchiki chi wayuu samariajeʼewaikai akaalinjakai wanee judío (paashajeʼera Lucas 10:29-37). Nüküjakaʼa Jesuu tia shia süka nüsakinnüin nutuma wanee wayuu sünain maa: «¿Jaralii na aijanakana tapüla paajüin?». Sünainjee tü nümakat Jesuu nümüin chia wayuukai, wayaawata aaʼu choʼujaain maʼin wakaalinjain wayuu süpüla talatüin Jeʼwaa wamaa.

7. ¿Kasa waaʼinrajatka süka kojutuin wamüin tü nikirajakalü anain waya Jeʼwaa?

⁷ Wanee kasa kapülainjatka atuma waaʼin sukuwaʼipa wayuu shia tü alatakat chaa suluʼu tü apainkat Edén. Soʼu tia, nüküjain Satanaa aneerüin nukuwaʼipa Adán otta Eva nnojorüle noonooin nümaa Jeʼwaa jee kapürale naaʼin nakuwaʼipa neʼe namüiwaʼa. Kapülasü saaʼin Eva sukuwaʼipa neʼe sümüiwaʼa, müsüjeseʼe meein shia maʼaka naaʼin Maleiwa. Müshia neʼe Adán alanaʼaleesia saalin tü nuʼwayuusekat nüpüla nuulialeʼeya Jeʼwaa (Gén. 3:4-6). Nnojoliipejeʼe naya eʼrüin kasa anasü sünainjee tü naaʼinrakat. Nnojoleena waya talatüin shiale kapülain waaʼin wakuwaʼipa neʼe wamüiwaʼa. Kapülainjatü waaʼin sukuwaʼipa wayuu süpüla weeʼiyatüin kojutuin maʼin wamüin tü nikirajakalü anain waya Jeʼwaa.

8. ¿Jamüsü nnojoluinjatka jülüjain naaʼin Adán sümaa Eva nakuwaʼipa neʼe namüiwaʼa?

⁸ Mayaapejeʼe niain eejachin neʼe Adán sümaa Eva suluʼu tü apainkat Edén, nnojotsü jülüjainjatüin  naaʼin nakuwaʼipa neʼe namüiwaʼa, süka jamüin, nüküjatüjüliain Jeʼwaa namüin kachoinjanain naya süpüla jouluin na nooʼuliwoʼukana sainküin mmakat süpüshuaʼa sümaa paʼaraiisüinjatüin tü Mmakat natuma (Gén. 1:28). Tü jülüjainjatkat naaʼin Adán sümaa Eva shia talatüinjatüin naaʼin na nooʼuliwoʼukana maʼaka keeʼireein shia naaʼin Jeʼwaa. Aʼyanaajiraainjania naya napüshuaʼa süpüla paʼaraiisüinjatüin tü Mmakat natuma. Wainma maʼin tü naʼyataainjatüyaakalü anain.

9. Püküja jamüin talatayütkaleje naaʼin na wayuukana naʼyataayüliire süpüla paʼaraiisüin tü Mmakat natuma.

⁹ Aʼyanaajiraainjachia Adán, Eva otta na nooʼuliwoʼukana nümaa Jeʼwaa süpüla paʼaraiisüinjatüin tü mmakat jee süpüla shikeraajüin tü keeʼireekat naaʼin Jeʼwaa. Sükajee tia, ekeroluinjanaʼaya sünainmüin «tü eemerawaakat» (Heb. 4:11). Talatüsüjeʼe maʼin naaʼin sutuma tia. Akaʼaya naya, anasüjeʼe nakuwaʼipa nutuma Jeʼwaa saaʼu nakaalinjüliin otta kapülain naaʼin nakuwaʼipa na waneinnua.

10, 11. ¿Kasa waaʼinrajatka süpüla wountuin aküjaa pütchi otta ekirajaa wayuu?

¹⁰ Maaʼulu yaa, eesü wanee aʼyatawaa naapaka Jeʼwaa wamüin: aküjaa pütchi otta ekirajaa wayuu. Süpüla wountuin waaʼinrüin aʼyatawaakat tüü, kapülainjatü waaʼin wayuu. Jee ayateena waya waneepia sünain tia aʼyatawaakat müleka aire wapüla Jeʼwaa otta aire wapüla wayuu.

¹¹ Naashin Pablo, aʼyataashi nia niʼipajee Jeʼwaa namaa waneinnua anoujashii süka naküjain pütchi otta nekirajüin wayuu sünain tü shiimainkat (1 Cor. 3:6, 8, 9). Maaʼulu yaa, aʼyataashii waya niʼipajee Jeʼwaa süka  wachajaain sukuwaʼipa süpüla waküjain maʼin tü pütchi nümaʼanajeejatkat otta wasülajüin süpüshi tü kasa eekat wamaʼana süpüla tü choʼujaakat süpüla aküjaa pütchi. Anashaatasü maʼin aʼyatawaa niʼipajee Jeʼwaa.

12, 13. Saaʼin pümüin, ¿jarat tü kasa anasü weʼrakat sünainjee ekirajaa wayuu?

¹² Talatüshii maʼin waya sutuma wachajaain sukuwaʼipa süpüla waküjain maʼin pütchi otta wekirajüin wayuu. Naashin na wawalayuu ekirajakana wayuu sünain tü Wiwüliakat, talatüsü maʼin naaʼin sutuma naaʼinrüin tia. Wanee kasa talataka atuma waaʼin shia niyaawatüle saaʼu wanee wekirajüin tü pütchi sümakat tü Wiwüliakat, sükooʼomüinraale nunoula, nunouteʼerüle nukuwaʼipa otta nüküjale sümüin wayuu süchiki tü nikirajaakalü anain. Akaʼaya Jesuu, talatüshi nia naleʼejapa na 70 nikirajüin «sümaa talatüin maʼi naaʼin» süchikijee aküjaa pütchi süka wainmain kasa anasü neʼraka sünainjee tia (Luc. 10:17-21).

¹³ Talatüshii napüshuaʼa na wawalayuukana sainküin mmakat süka neʼrüin sunoutaain sukuwaʼipa wayuu sutuma tü pütchi süchikikat Nuluwataaya Maleiwa. Jülüjataa waaʼin sukuwaʼipa Ana, wanee wawala majayüt okolojooka eere palitchoin Aküjalii pütchi chaa Europa. * Anuu sünüiki: «Kamalainshaatasü tamüin wainmain na wayuu ekirajaweekana sünain tü Wiwüliakat. Talatüsü maʼin taaʼin sutuma tü taʼyataainkat nümüin Jeʼwaa. Taleʼejapa tepialuʼumüin, nnojotsü jülüjain taaʼin tü kasa alatakat tamüin, shia jülüjaka taaʼin tü kasa alatakat namüin na tekirajüinkana otta tü shapaakalü atuma naaʼin. Jee tachajaain sukuwaʼipa süpüla tatütüleʼerüin naaʼin otta takaaliinjain naya. Tayaawatüitpa saaʼu shiimain anakuwaʼipalüin tü wayuu aapakat suulialeʼeya tü aapünakat amüin» (Aluw. 20:35).

14. ¿Kasa waaʼinrajatka süpüla talatüinjatüin waaʼin sutuma waküjain pütchi jaʼitairü nnojoluin saapajüin wayuu wanüiki?

¹⁴ Eepejeʼe süpüla talatüin paaʼin sünain aküjaa pütchi jaʼitairü nnojoluin saapajüin wayuu pünüiki, süka jamüin, püküjain pütchi namüin napüshuaʼa na wayuu kepiakana eere püküjawalin pütchi. Tü waaʼinrakat müsü aka saaʼin tü aluwataanakalü anain Ezequiel nutuma Jeʼwaa, müshi nia nümüin: «Püküjainjatü tanüiki namüin, naapajeerejeʼe shia jee nayoutulejeʼe shia» (Ezeq. 2:7; Isa. 43:10). Jaʼitairü nnojoluin saapajüin wayuu tü pütchi waküjakat, talatüshii waya süka kojutuin nümüin Jeʼwaa tü waʼyataainkat nümüin (paashajeʼera Hebreokana 6:10). Anuu nünüiki wanee wawala süchiki tü aküjaakat pütchi: «Müshii wapünajakai aaʼin sümaa woʼyotuin wüin saaʼu otta oʼuraajüshii waya süpüla kamalainjatüin namüin na wayuukana ekirajawaa nüchiki Jeʼwaa» (1 Cor. 3:6).

15. ¿Asülajüliinjanache neʼe waya sutuma saapüin analuʼut wayuu wamüin? ¿Jamüsüjaʼa saaʼin pümüin?

¹⁵ Niʼreein waya Jesuu talatüin waaʼin sünainjee wasülajüliin. Jamüshiijaʼa wasülajüliire,  eejeerü wayuu eekai süshatüin wakuwaʼipa. Müshi Jesuu süchiki tia: «Anashii müleka jüsülajüle sümüin wayuu eekai cheʼojaain kasa sümüin. Je tü cheʼojaakat jümüin, asülajüneerü nütüma chi Maleiwakai sünain wainmashaateerüin shia. Akaajaa müleka matüjüinre asülajaa jia sümüin wayuu, meeria jukuaippa nütüma Maleiwa. Masülajuujeena amüin jia» (Luc. 6:38). Nnojotsü aapüin analuʼut wayuu süpüshuaʼa saaʼu tü wasülajakat sümüin. Asülajüliinjanapejeʼe waya jaʼitairü mojutuin tia sümüin wayuu, süka nnojoluin watüjaain saaʼu jameerüin naaʼin wanee wayuu sutuma tü wasülajakat nümüin.

16. ¿Jaralii na kamaneeinjanakana amüin waya? ¿Jamüshii kamaneeinjanaka waya namüin?

¹⁶ Chi eekai shiimain nüsülajüliin, nnojotsü naʼatapajüin keeʼirakain nümüin tü nüsülajakat. Anuujeseʼe nünüiki Jesuu süchiki tia: «Peenajira na mojushiikana, na matünasaliikana, na eekai masaʼain, je na eekai moʼuin. Anataʼaleejeechijaʼa maʼi pia sükajee tia, jaʼitaina nnojolüin keʼichin pümüin natüma» (Luc. 14:13, 14). Saashin tü Wiwüliakat, «eʼreechi kasa anasü chi wayuu kamaneekai» otta talateechi maʼin «chi wayuu akaalinjakai chi müliakai aaʼin» (Prov. 22:9; Sal. 41:1). Asülajüliinjana waya saaʼu wakaalinjeein na waneinnua.

17. ¿Kasa eeka süpüla waapüin sümüin wayuu süpüla talatüinjatüin waaʼin?

¹⁷ Wanaa sümaa nüküjain Pablo tü nümakat Jesuu süchiki anain maʼin «chi wayuu aapakai nuulia chi aapünakai amüin», nnojotsü shiain neʼe naashajaain achiki aapaa kasa sümüin wayuu. Tü nümakat Pablo sünainpünaasüya atütüleʼeraa saaʼin wayuu, achiawaa sükajee tü Wiwüliakat otta akaalinjaa wayuu eekai choʼujaain amüin wanee kasa (Aluw. 20:31-35). Sükajee tü nümakat jee tü naaʼinrakat Pablo, nikirajüin waya sünain choʼujaain  maʼin wachajaain sukuwaʼipa süpüla wakaalinjain wayuu, kapülain shia waaʼin sümaa alin shia wapüla.

18. ¿Jamüsü nanüiki na ekirajaakana süchiirua sukuwaʼipa wayuu süchiki tü aapaakat kasa sümüin wayuu?

¹⁸ Na ekirajaakana süchiirua sukuwaʼipa wayuu, natüjaaitpa aaʼu talatüin saaʼin wayuu sutuma asülajaa jee aapaa wanee kasa. Jee saashin wanee pütchi ashajünaka süchiki tia, talatüsü naaʼin na wayuukana naaʼinrüle wanee kasa anasü napüleerua na waneinnua. Otta müsia, naashin na ekirajaakana süchiirua sukuwaʼipa wayuu, anasü waaʼin wakaaliinjale wayuu eekai choʼujaain amüin wanee kasa. Jee nnojoishi ayuuleʼein maʼin wayuu otta talatüsü naaʼin waneepia, niʼyataale süka naaʼin nümüiwaʼa süpüla nükaaliinjain wayuu. Nnojotpejeʼe shiain wanee kasa jeketü tia wamüin, nüküjain Jeʼwaa suluʼu tü Wiwüliakat talateerüin waaʼin waapüle kasa sümüin wayuu (2 Tim. 3:16, 17).

19, 20. ¿Jamüshii wasülajüliinjanaka?

¹⁹ Eesü kapüleere wamüin kamanewaa sükajee saʼakain waya wayuu kapülaka neʼe aaʼin sukuwaʼipa sümüiwaʼa. Naashin Jesuu, piamasü tü pütchi alanaʼaleekat maʼin saʼakajee tü Pütchi aapünakat nümüin Moisés. Tü palajatkat shia alinjachin Jeʼwaa wapüla süka süpüshuaʼa waaʼin, süka süpüshuaʼa wakuwaʼipa, süka tü jülüjakat waaʼin jee süka süpüshuaʼa watsüin. Jee tü wane pütchikat shia alinjatüin wayuu wapüla maʼaka aijiraain waya wapülajiraa (Mar. 12:28-31, TNM). Wekirajaaitpa anain sünain ekirajaayakat tüü sünain nashatüin nukuwaʼipa Jeʼwaa na aikana apüla nia. Asülajüi Jeʼwaa jee müshia Jesuu, otta naluwataain waya süpüla wasülajüliinjanain süka talateerüin maʼin waaʼin sükajee tia. Wachajaale sukuwaʼipa süpüla waapüin kasa nümüin Jeʼwaa jee wakaalinjain na waneinnua, kojuteechi maʼin nia watuma, aneerü wakuwaʼipa otta nakuwaʼipa na waneinnua.

²⁰ Eeshiijaʼa wachajaale sukuwaʼipa süpüla wakaalinjain wayuu otta nayale wakaalinjain maʼin na wawalayuukana (Gal. 6:10). Ayatüle waaʼinrüin tia, eesüjaʼa süpüla eejeerüin wayuu eekai saapüin analuʼut wamüin otta eekai alin apüla waya saaʼujee tia. Shiasaʼa suluʼujee tia, talateerü waaʼin. Anuujeseʼe sünüiki tü Wiwüliakat: «Chi wayuu eekai nüsülajülin anakuwaʼipaleechi otta chi eekai nükaalinjalin, akaalinjüneechi» (Prov. 11:25). Sükajee tü kasa waaʼinrakat jee sükajee tü waʼyataainkat nümüin Jeʼwaa, kamaneeshii waya sümüin wayuu otta wakaaliinjain shia sümaa nnojoluin waʼatapajüin keeʼirakain shia wamüin. Sünain tü wane ekirajaayakat, wekirajaajeerü anain jamüin maʼin sukuwaʼipa tia.