1. ¿Jamüsü anaka waaʼin namaa na wayuu nnojoliikana kashapajaaraliin?

 ANASÜ waaʼin namaa na wayuu nnojoliikana kashapajaaraliin. Kojutushii wamüin na wayuu atüjakana aʼatapajaa sümaa nnojoluin shapaain naaʼin. Kojutushii wamüin na wayuu nnojoliikana aashichijaamaatüin wamüin mojukuwaʼiparüle watuma wanee kasa. Kojutushiʼiya wamüin na ekirajakana waya sünain tü Bibliakat süka nnojoluin jashichin naya wamüin wanaa sümaa nnojoluin wayaawatamaatüin saaʼu tü sümakat tü Bibliakat jee shiale wanaa sümaa nnojoluin waaʼinrüin tü nekirajakalü anain waya. Kojutusü maʼin wamüin süka nnojoluin naashichijaamaatüin wooʼomüin chi Wamaleiwasekai Jehová (Roma 2:4, TNM).

2. Püküja waneirua kasa eeka süpüla süshapalaain atuma waaʼin.

² Kojutushii wamüin na wayuu nnojoliikana kashapajaaraliin, eepejeʼe kapüleere wamüin müin wakuwaʼipa. Eesüjaʼa süshapajaale waaʼin kamaʼale waya sünain aainjaa cola süpüla wayaʼlajüin wanee kasa. Eeshiijaʼa jashichire waya mojule wanee kasa weʼrüin jee saainjünüle wanee kasa wamüin. Eesüjaʼa süshapajaale waaʼin sünain aʼatapajaa paʼaraiisüinjatüin tü Mmakat nutuma Jehová. ¿Aashin anain maʼin nnojoliire kashapajaaraliin waya? Wekirajaajeerü süchiki jamüin nukuwaʼipa chi wayuu nnojoikai kashapajaaralin, jamüin anaka müle wakuwaʼipa otta tü waaʼinrajatkat süpüla wountuin tia.

3. ¿Kasa naaʼinraka chi wayuu nnojoikai kashapajaaralin saainjünüle kasa mojusü nümüin?

³ Nnojoishi aashichijaamaatüin nia. Nnojoishi atkaain nia süpüleeruaanüle naaʼin, niyouta achikit pasalaain nia. Müsia neʼe nukuwaʼipa Jehová, müsü tü Bibliakat nüchiki: «Amüliajüi nia, anamia maʼin nia, nnojoishi aashichijaamaatüin, miyoʼu maʼin saalin wayuu nüpüla otta nüküjain tü shiimainkat waneepia» (Éx. 34:6, segunda nota).

4. ¿Kasa naaʼinraka chi wayuu nnojoikai kashapajaaralin naʼatapajüinjachire?

 ⁴ Atüjashi nia aʼatapajaa. Nnojotsü ashapalaain naaʼin jee nnojoishi nia jashichin kamaʼale nia sünain aʼatapajaa (Mat. 18:26, 27, TNM). Choʼujaasü maʼin nnojoluinjatüin süshapalaain waaʼin waaʼinrawaipa wanee kasa. Jamüsüjaʼa nüküjale wamüin wanee wayuu wanee kasa, nnojoluinjatü ashapalaain waaʼin jee nnojoishii asoutuinjanain waya pejeewa nümüin (Job 36:2). Nnojotsü ashapalaainjatüin waaʼin wakaalinjapa wanee wekirajüin süpüla niyaawatüin saaʼu wanee pütchi suluʼujee tü Bibliakat jee kakaliale nia süpüla nuuʼulaain wanee kasa mojusü kiʼraka anain nia.

5. ¿Kasa amaa naaʼinraka chi wayuu nnojoikai kashapajaaralin?

⁵ Jülüjasü naaʼin tü naaʼinrajatkat. Eesü kaʼi eere waaʼinramaatüinjatüin wanee kasa. Chi wayuu nnojoikai kashapajaaralin, nnojotsü ashapajaain naaʼin sünain aaʼinraa wanee aʼyatawaa choʼujaaka maʼin jee nnojotsü ashapajaain naaʼin süpüla kettaamaatüinjatüin shia nutuma. Shia jülüjaka naaʼin palajana tü naaʼinrajatkat süpüla anain maʼin nutuma tü niʼyataainkat.

6. ¿Kasa naaʼinraka chi wayuu nnojoikai kashapajaaralin niʼrüle müliaa?

⁶ Nnojoishi aʼyounalaain nia niʼrüle müliaa, atüjashi nia achecheraa naaʼin. Nnojotsiaajeʼe mojuin nüküjale nümüin wanee naʼaleewain süchiki tü kasa alatakat nümüin jee jamüin naaʼin soʼunnaa wanee müliaa. Nüchajaapejeʼe sukuwaʼipa süpüla anain naaʼin waneepia otta ayatüin niʼyataain nümüin Jehová sümaa talatüin naaʼin (Col. 1:11). Wachajaainjatü sukuwaʼipa süpüla nnojoliinjanain kashapajaaraliin waya. Wekirajaa süchiki jamüin waaʼinrajatka tia.

7. Saashin Santiago 5:7, 8, ¿jamüsü anaka nnojoliire kashapajaaraliin waya? (Piirakaa sümüin tü ayaakuaakat).

⁷ Choʼujaasü maʼin nnojoliinjanain kashapajaaraliin waya süpüla woʼttaainjanain. Washata  nakuwaʼipa na wayuu aʼyataapuʼukana nümüin Jehová sümaiwa, na nnojoliikana ashapalaain aaʼin sünain aʼatapajaa nikeraajeerüin Maleiwa tü nümakat (Heb. 6:11, 12). Tü wakuwaʼipakat saashin tü Bibliakat, müsü aka saaʼin nukuwaʼipa wanee wayuu apünajüi (paashajeʼera Santiago 5:7, 8). Chi wayuu apünajüikai, aʼyataashi maʼin nia sünain apünajaa nuwaüyein sümaa nnojoluin nütüjaain saaʼu joujeerüin susotuin. Nnojotsü ashapalaain naaʼin sünain aʼatapajaa kachonmaatüinjatüin tü nüpünajüinkat. Müsia neʼe wakuwaʼipa, aʼyataashii maʼin waya nümüin Jehová mayaainjeʼe nnojoluin watüjaain saaʼu joujaleechin nüntaka oʼu chi Waseñotsekai (Mat. 24:42, TNM). Müsüjeseʼe nnojoluin süshapalaain waaʼin sünain aʼatapajaa nikeraajeerüin Jehová süpüshuaʼa tü nümakat. Süshapajaale waaʼin, eesü süpüla wakulajaain aaʼin sünain aʼatapajaa otta eeshii süpüla wakayalaain nuulia Jehová shiʼipaʼaya. Eesü süpüla woʼunuin süchiirua waneirua kasa talatamaateetka atuma waaʼin waaʼinruʼu. Eekajasaʼa nnojoliire kashapajaaraliin waya, wachechereerü waaʼin jee oʼttaajeena waya (Miq. 7:7; Mat. 24:13, TNM)

8. ¿Jamüsü aneetka wakuwaʼipa namaa na waneinnua nnojoliire kashapajaaraliin waya? (Colosas 3:12, 13).

⁸ Nnojoliire kashapajaaraliin waya, aneerü wakuwaʼipa namaa na waneinnua otta waapajeerü nanüiki yootopa waya namaa (Sant. 1:19). Anajiraajeena waya namaa na waneinnua. Süpüleeruaanüle maʼin waaʼin, wayaawateerü saaʼu wanüiki jee nnojoleerü waküjain wanee pütchi airuʼutka. Airuʼurule nünüiki wanee wayuu wamüin, nnojoleena aashichijaamaatüin waya jee nnojoleerü wachekajüin nümüin tü niʼralakat wayumüin wamüin. Waaʼinrüle tia, kamaneejeena waya namüin sümaa moteerüin waaʼin naainjala (paashajeʼera Colosas 3:12, 13, TNM).

9. ¿Jamüshii nnojoliinjanaka kashapajaaraliin waya waneeküinjatpa wanee kasa? (Proverbios 21:5).

⁹ Aneerü tü kasa waneekakat nnojoliire kashapajaaraliin waya. Nnojoleerü waneekamaatüin wanee kasa jee asakireena waya süchiirua tia palajana süpüla anain sukuwaʼipa watuma (paashajeʼera Proverbios 21:5). Jamüshiijaʼa kashapajaaraliire waya sünain achajawaa süchiki aʼyatawaa, eesü süpüla waapaamaatüin eekai eein sümaa nnojoluin jülüjain waaʼin palajana süpütaajeerüle kaʼi wapüla süpüla woutkajaain jee waküjain pütchi. Nnojoliire kashapajaaraliin waya, jülüjeerü waaʼin wattale woulia tü aʼyatawaakat, jeʼrainjatüin oora waʼyataaka sünain, aneerüle wakuwaʼipa sümaa wapüshi jee aneerüle wakuwaʼipa nümaa Jehová sutuma.

10. ¿Kasa waaʼinrajatka süpüla nnojoliin kashapajaaraliin waya?

¹⁰ Wachunta kaalinwaa nümüin Jehová. Nnojoleena kashapajaaraliin waya eere waaʼu tü nüpülainkat Maleiwa (Gal. 5:22, 23, TNM). Eesüjaʼa süpüla sülatüin wamüin wanee kasa eeka süpüla süshapalaain atuma waaʼin. Soʼunnaa tia, ayataʼaya wachuntuin nümüin Maleiwa tü nüpülainkat (Luc. 11:9, 13). Wachunta nümüin Jehová wanaawai tü jülüjakat waaʼin sümaa tü jülüjakat naaʼin süchiki wanee kasa. Ayatüle wachuntuin kaalinwaa nümüin Jehová otta wachajaale sukuwaʼipa süpüla nnojoliinjanain kashapajaaraliin waya, wounteerü tia.

11, 12. ¿Jamüsü watüjaaka saaʼu nnojolin kashapajaaralin Jehová?

¹¹ Jülüja waaʼin nakuwaʼipa na wayuu namaiwajanakana. Aashajaasü tü Bibliakat nachiki wayuu nnojoliikana kashapajaaraliin. Jülüjale waaʼin tü nakuwaʼipakat, washateerü tia nachiirua. Wekirajaa süchiki nakuwaʼipa noʼutku  naya wayuukana. Joʼu wekirajaai palajana süchiki nukuwaʼipa Jehová.

¹² Suluʼu tü apainkat Edén, mojutusai Jehová nutuma Satanás jee nüküjain nnojolin anain nia süpüla aluwatawaa otta nnojolin aipüralin nia. Sutuma nütüjaain saaʼu Jehová kakalieerüin süpüla sütüjaanüin aaʼu anain maʼin sukuwaʼipa aluwatawaa nutuma, nnojoishi nuʼunaajaain aaʼin Satanás. Naaʼinrüin tia saaʼujee nnojoluin süshapalaain naaʼin jee nüchecherüin naaʼin. Sümaʼainruʼu naʼatapajüin tia, ayatüsia nüchecherüin naaʼin mayaainjeʼe mojutuin nia atumawaa. Sutuma nnojoluin nüshapajaain Jehová, watta naalii na wayuu eʼraajakana nia otta na eekana süpüla katüin oʼu süpüla kaʼikat süpüshuaʼa (2 Ped. 3:9, 15). Jülüjale waaʼin süpüshuaʼa tü kasa anasü weʼrakat sünainjee nnojoluin nüshapajaain aaʼin Jehová, mapüleejeerü wamüin waʼatapajüin tü kaʼi najaʼttirüinjatkalü oʼu süpüshuaʼa tü kasa mojusükat.

13. ¿Jamüsü watüjaaka saaʼu nüshatüin Jesús nukuwaʼipa Jehová wanaa sümaa yaajachin nia yaa mmapaʼa? (Piirakaa sümüin tü ayaakuaakat).

¹³ Nüshatüin Jesús nukuwaʼipa chi Nüshikai, nnojoishi nia kashapajaaralin. Atüjaana aaʼu müin nukuwaʼipa wanaa sümaa yaajachin nia mmapaʼa. Eesü eere kaʼi kapüleeka oʼu nümüin Jesús nnojoluin naashichijaain, shialeekajaʼa namüin na karaloʼutamaajanakana otta na fariseokana, na piamakana oʼupünaa (Juan 8:25-27). Maʼaka naaʼin Jehová, nnojoishi aashichijaamaatüin Jesús. Jamüsüjaʼa wanaa sümaa airuʼuluin pütchi nümüin, nnojoishi nia peʼipaain namaa na airuʼutkana anüiki nümüin (1 Ped. 2:23). Mayaainjeʼe müliain nia atumawaa, ayatüsia nüchecherüin naaʼin jee nnojoishi nia aʼyounalaain. Müsüjeseʼe sümüin tü Bibliakat nüchiki mayaa: «Anakajaʼa jülüjale jaaʼin nukuwaʼipa chi achecherakai naaʼin soʼunnaa mojuin nanüiki nümüin na wayuu kaainjarannuukana» (Heb. 12:2, 3, TNM).  Müshiʼiya wayakana, eesia süpüla wachecherüin waaʼin sümaa nnojoluin washapajaain aaʼin soʼunnaa müliaa müleka nükaalinjale waya Jehová.

14. ¿Kasa watüjaka sünainjee nnojoluin süshapalaain naaʼin Abrahán? (Hebreokana 6:15; piirakaa sümüin tü ayaakuaakat).

¹⁴ ¿Kasa waaʼinrajatka suulia süshapalaain waaʼin sümaʼainruʼu waʼatapajüin süntüin nükalia Maleiwa? Eeshiijaʼa kakaliainnale waya sünain aʼatapajaa nükalia Maleiwa jee jülüjale waaʼin nnojoleerüin weʼrüin shia. Jülüjataa waaʼin nukuwaʼipa Abrahán. Wanaa sümaa 75 nuuyase sümaa machooin nia, nüküjain Jehová nümüin anakuwaʼipalüinjatüin watta saalii wayuu nünainjee (Gén. 12:1-4). ¿Niʼrüinche Abrahán tü nüküjakat Jehová nümüin? Süpüshi neʼe niʼraka. Süchikijee nülatüin tü süchikat Éufrates, naʼatapajüin sülatüin 25 juya süpüla kachoinjachin nia, Isaac nünülia chi nüchonkai. 60 juya süchikijee tia, joʼuushii na nüikeyuukana, Esaú nünülia wanee otta Jacob nünülia chi wane (paashajeʼera Hebreokana 6:15, TNM). Nnojoishi niʼrüin Abrahán wattain naalin na nüikeyuukana otta nnojoishi niʼrüin saapünüin namüin tü Mma Anasükat. Ayatapejeʼe nia aleewain nümaa chi Kakumalakai nia (Sant. 2:23). Talateetkajasaʼa naaʼin Abrahán suluʼu tü Paʼaraiisükat niʼrapa tü eekat sutuma kanoulain nia jee sutuma nnojoluin süshapalaain naaʼin: anakuwaʼipaliijeena watta naalii wayuu nünainjee (Gén. 22:18). ¿Kasa watüjaka sünainjee nukuwaʼipa Abrahán? Eesüjaʼa nnojorüle weʼrüin shikeraajüin maaʼulu süpüshuaʼa tü nümakat Jehová, watüjaapejeʼe saaʼu aneerüin wakuwaʼipa nutuma maaʼulu otta watteerüin saalii kasa anasü weʼreetka suluʼu tü Paʼaraiisükat. Weʼreerü tia nnojorüle süshapalaain waaʼin maʼaka nnojoluin süshapalaain naaʼin Abrahán (Mar. 10:29, 30).

15. ¿Kasa anaka süpüla wekirajaain anain?

 ¹⁵ Eeshii waneinnua wayuu nnojoliikana kashapajaaraliin saashin tü Bibliakat (Sant. 5:10). Anashii pikirajaale nachiki. b Jimaʼaichonshi maʼin David wanaa sümaa nüneekünüin süpüla nuluwataainjachin saaʼu Israel. Kakaliapejeʼe naʼatapajüin nüikalaainjachin sünain aluwatawaa. Waneepiashi Simeón otta Ana nümaa Jehová sümaʼainruʼu naʼatapajüin nüntüin chi Mesíaskai (Luc. 2:25, 36-38, TNM). Wekirajaapa nachiki naya wayuukana wasakira waaʼin sünain tüü: «¿Kasa naaʼinraka süpüla nnojoluin süshapalaain naaʼin? ¿Kasa anasü niʼraka sünainjee müin nukuwaʼipa? ¿Kasa taaʼinrajatka süpüla tashatüin nukuwaʼipa?». Eesiaʼaya tü watüjakat nanainjee na wayuu kashapajaaraliikana (1 Sam. 13:8-14). Wekirajaapa nachiki wasakira waaʼin sünain tüü: «¿Jamüsü süshapalaaka naaʼin? ¿Kasa mojusü neʼraka sünainjee müin nakuwaʼipa?».

16. ¿Kasa anasü weʼreetka nnojoliire kashapajaaraliin waya?

¹⁶ Jülüja waaʼin tü kasa anasü weʼreetkat nnojoliire kashapajaaraliin waya. Müle wakuwaʼipa, talateerü waaʼin, nnojoleena aashichijaamaatüin waya, nnojoleena ayuulin waya jee nnojoleerü shapaakuʼu müin waaʼin. Aneerü wakuwaʼipa namaa na waneinnua jee paaʼinweena waya namaa na wawalayuukana. Wachecherüle waaʼin suulia waashichijaain nümüin chi wayuu aainjakai kasa mojusü wamüin, nnojoleena peʼipaain waya nümaa (Sal. 37:8, noota; Prov. 14:29). Tü anaʼleekat maʼin sünainjee nnojoliin kashapajaaraliin waya, shia washateerüin nukuwaʼipa chi Washi iipünaajachikai otta aleeweenain maʼin waya nümaa.

17. ¿Kasa wachajaainjatka akuwaʼipa wapüshuaʼa?

¹⁷ Wekirajaaitpa anain anain maʼin nnojoliire kashapajaaraliin waya otta eʼreenain waya kasa anasü sünainjee. Eejeerü kaʼi kapüleejeetka oʼu wamüin nnojoliin kashapajaaraliin waya. Nükaalinjeenapejeʼe waya Jehová süpüla nnojoluin müin wakuwaʼipa. Sümaʼainruʼu waʼatapajüin paʼaraiisüinjatüin tü Mmakat, watüjaa aaʼu alin nüpüla Jehová na kojutukana amüin nia, na aʼatapajakana tü naaʼinrüinjatkat napüleerua (Sal. 33:18). Anakalaka maʼin wachajaale sukuwaʼipa süpüla nnojoliinjanain kashapajaaraliin waya.