EKIRAJAAYA 33
Eeshi Jehová waneepia namaa na aʼyataashiikana nümüin
«Naya niirakaaka amüin Jehová na kojutukana amüin nia» (SAL. 33:18).
JAYEECHI 4 Paʼanneetse taya Jeʼwaa
SÜCHIKI TÜ WEKIRAJAAINJATKALÜ ANAIN a
1. ¿Jamüsü nuchuntaka Jesús nümüin Jehová naaʼinmajüinjanain na nikirajüinkana?
WANEE ai süpülapünaa nuʼutunuin aaʼin Jesús, achuntushi maʼin nia nümüin chi Nüshi iipünaajachikai süpüla naaʼinmajüin na nikirajüinkana (Juan 17:15, 20). Watüjaa aaʼulu naaʼinmajüin Jehová waneepia na aʼyataashiikana nümüin. Nütüjaapejeʼe saaʼu Jesús mojulaajeechin maʼin Satanás namüin na nikirajüinkana, müsüjeseʼe choʼujaweerüin namüin nükaalinjain naya Jehová.
2. Saashin Salmo 33:18-20, ¿jamüsü nnojoluinjatka ayoʼujaain waaʼin süpüleerua tü alatakat wamüin?
2 Eʼrüshii müliaa na anoujashii shiimainshiikana sutuma tü kasa nuluwataakalü aaʼu Satanás. Sutuma tü alatakat wamüin, eesü süpüla shapaain maʼin waaʼin otta kapüleein wamüin waneepiain waya nümaa Maleiwa. Sünain ekirajaayakat tüü, wekirajaweerü anain nnojoluinjatüin ayoʼujaain waaʼin süpüleerua tia makat. Nütüjaa aaʼu Jehová süpüshuaʼa tü alatakat wamüin jee nükaalinjeein waya, jama eein nia wamaa. Wekirajaweerü nachiki piamashii wayuu namaiwajana wayaawateetka atuma niirakaain amüin Jehová na kojutukana amüin nia (paashajeʼera Salmo 33:18-20).
SÜMÜIWAʼALE WAAʼIN
3. ¿Kasa eeka süpüla sümüiwaʼain atuma waaʼin?
3 Mayaainjeʼe wainmain na wawalayuukana, eeshii süpüla müin wamüiwaʼakai waaʼin. Jamüshiijaʼa na jimaʼalii jee na majayünnüü koleejiakana, eeshii süpüla müin namüiwaʼakai naaʼin naküjainjatpa süchiki tü nanoujakalü anain namüin na nakonpañeetsekana jee shiale sutuma nalataain naʼakamüin waneinnua wawalayuu nnojoliipuʼukana noutkajaain amaa. Eesü yüülale waaʼin otta jülüjale waaʼin wayainjanain neʼe anouteʼerüin tü alatakat wamüin. Eeshiijaʼa yüütiraale waya sümaa tü alatakat wamüin süka nnojoleerüin nayaawatüin saaʼu jamüin waaʼin na waneinnua waküjale shia namüin. Eesüjaʼa jülüjale waaʼin maalin waya süpüla wayuu. Jaʼitairü kasain sümüiwaʼain atuma waaʼin, eesü süpüla shapaain maʼin waaʼin jee matchin waaʼin sutuma. Nnojotpejeʼe shiain keeʼireein naaʼin Jehová müinjatüin waaʼin mayaa. ¿Jamüsü watüjaaka saaʼu tia?
4. ¿Jamüshi nümüiwaʼakai naaʼin Elías naashin?
4 Jülüjataa waaʼin tü alatakat nümüin Elías, wanee wayuu waneepiakai nümaa Jehová. Waraittüshi nia soʼu 40 kaʼi isashiipaʼapünaa suulia nuʼutunuin aaʼin sutuma Jezabel (1 Rey. 19:1-9). Nuunjulaaka suluʼu wanee koʼushii. «Taya neʼe apütaaka tamüiwaʼa», nümaka nümüin Jehová soʼu tia (1 Rey. 19:10). Niayaa naaʼinruʼu apütaaka nümüiwaʼa naʼakajee na nünüikimaajanakana Maleiwa. Nnojotpejeʼe müin tia süka nükaalinjain Abdías 100 nünüikimaajana Maleiwa suulia suʼutunuin naaʼin sutuma Jezabel (1 Rey. 18:7, 13). ¿Jamakaʼa nümüiwaʼakai naaʼin Elías? Eesüjaʼa jülüjale naaʼin suʼutunuin naaʼin napüshuaʼa na nünüikimaajanakana Maleiwa otta eesüjaʼa shiale sutuma nnojoluin jaralüin aneeküin shiʼyataweein nümüin Jehová süchikijee tü alatakat namüin na nünüikimaajanakana Baal saaʼu tü uuchikat Carmelo. Eesüjaʼa süpüla müin nümüiwaʼakai naaʼin sutuma jülüjain naaʼin nnojoluin jaralüin atüjaain saaʼu tü aainjüneetkat nüka nütaʼunüle otta shiale sutuma jülüjain naaʼin nnojoluin jaralüin kachipünaain saaʼin nukuwaʼipa. Nnojotsü süküjain tü Bibliakat jamüin nümüiwaʼakai naaʼin Elías, watüjaapejeʼe saaʼu niyaawatüin saaʼu Jehová jamüin naaʼin otta tü naaʼinrakat süpüla nükaalinjain nia.
¿Jamüsü sütütüleʼeraka waaʼin tü naaʼinrakat Jehová nüpüleerua Elías wanaa sümaa müin wamüiwaʼakai waaʼin? (Paashajeʼera tü pütchikat 5 otta 6).
5. ¿Kasa naaʼinraka Jehová süpüla niyaawatüin saaʼu Elías nnojolin nümüiwaʼain nia?
5 Naaʼinrüin Jehová waneirua kasa süpüla nükaalinjain Elías. Jamüshijaʼa nia, nütütüleʼerüin naaʼin süpüla nüküjain nümüin tü suluʼukat naaʼin. «¿Kasa paainjaka yaʼayaa Elías?», müshi nia piantua nümüin (1 Rey. 19:9, 13). Jülüjasü maʼin naaʼin Jehová nünüiki Elías nüsoutapa nümüin. Süchikijee tia niiʼiyatüin Jehová nümüin wanee kasa süpüla niyaawatüin saaʼu eein nia nümaa jee pülashaatain maʼin nia. Otta nüküjain nümüin wainmain na israelita aʼwaajakana nia (1 Rey. 19:11, 12, 18). Anakajasaʼa naaʼin Elías nüküjapa nümüin Jehová süpüshuaʼa tü suluʼukat naaʼin jee sutuma tü nüküjakat Jehová nümüin. Naapaka Jehová aʼyatawaa kaawainka maʼin nümüin. Jamüshijaʼa nia, nüneeküinjachi Hazael süpüla nuluwataain saaʼu Siria otta nüneeküinjachi Jehú süpüla nuluwataain saaʼu Israel otta müsia nüneeküinjachi Eliseo süpüla nünüikimaainjachin nia Maleiwa (1 Rey. 19:15, 16). Sutuma naapüin Jehová tia aʼyatawaakat nümüin Elías, nükaalinjain nia süpüla nnojoluin jülüjain maʼin naaʼin tü kasa mojusü alatakat nümüin otta aʼyataajiraashi nia nümaa Eliseo nutuma. ¿Kasa waaʼinrajatka süpüla nükaalinjain waya Jehová wanaa sümaa müin wamüiwaʼakai waaʼin?
6. ¿Kasa eeka süpüla waküjain nümüin Jehová müle wamüiwaʼakai waaʼin? (Salmo 62:8).
6 Keeʼireesü naaʼin Jehová waküjain nümüin süpüshuaʼa tü suluʼukat waaʼin. Nütüjaa aaʼu tü alatakat wamüin jee nüküjain wamüin eein süpüla woʼuraajüin nümüin jaʼitairü kasain alatüin wamüin sümaa naapajeerüin wanüiki (1 Tes. 5:17). Talatüshi nia naapapa nanüiki na aʼwaajakana nia noʼuraajapa nümüin (Prov. 15:8). ¿Kasa eeka süpüla waküjain nümüin Jehová wanaa sümaa müin wamüiwaʼakai waaʼin? Eesü süpüla waküjain nümüin jamüin waaʼin maʼaka naaʼinrüin shia Elías (paashajeʼera Salmo 62:8). Waküja nümüin süpüshuaʼa tü shapaakalü atuma waaʼin jee jamüin mojuka waaʼin. Wachunta kaalinwaa nümüin süpüla watüjaain saaʼu tü waaʼinrajatkat. Müle sümüiwaʼakai paaʼin otta mmorüle pia sünain aküjaa noʼupala na koleejiajiraakana pümaa tü punoujakalü anain, puchunta kaalinwaa nümüin Jehová süpüla yalayalainjatüin paaʼin jee süpüla pütüjainjatüin süpüleerua pünüiki (Luc. 21:14, 15). Yüülale maʼin paaʼin waneepia, puchunta nümüin Jehová süpüla mapüleein pümüin paashajaain nümaa wanee wawala laülaakai aaʼin sünain anoujaa süchiki tia jee süpüla niyaawatüin saaʼu chi wawalakai jamüin paaʼin. Nnojoleerü müin wamüiwaʼakai waaʼin waneepia waküjale nümüin Jehová jamüin waaʼin, jülüjale waaʼin tü nükaalinjakalü akajee waya otta wooʼulaale nakaalinjain waya na waneinnua.
¿Wachajaainche sukuwaʼipa süpüla waküjain maʼin pütchi namaa na wawalayuukana? (Paashajeʼera tü pütchikat 7).
7. ¿Kasa pütüjaka süchiki nukuwaʼipa Mauricio?
7 Naapüin Jehová wamüin aʼyatawaa anaka maʼin. Nütüjaa aaʼu sümaa kojutuin nümüin tü waaʼinrakat napüleerua na wawalayuukana otta sünain ekirajaa wayuu (Sal. 110:3). ¿Jamüsü nnojoleetka müin wamüiwaʼakai waaʼin waʼyataale maʼin nümüin Jehová? Jülüja waaʼin nukuwaʼipa wanee wawala jimaʼai kanüliakai Mauricio. b Maʼaka jeʼra kashi süchikijee woutiisain nia, akayalaashi nuulia Jehová wanee naʼaleewain. Anuu nünüiki: «Wainmajüsü taaʼin teʼrapa nükayalaain nuulia Jehová chi taʼaleewainkai jee tasakirüin taaʼin ayatüinjachire taʼyataain nümüin Jehová. Müshi tamüiwaʼakai taaʼin jee jülüjasü taaʼin nnojoluin eein chi ayaawatakai saaʼu jamüin taaʼin». ¿Kasa naaʼinraka Mauricio süpüla ayatüin niʼyataain nümüin Jehová? Anuu nünüiki: «Nnojotsü jülüjakuʼu müin taaʼin tü alatakat sutuma taküjain maʼin pütchi. Talatüsü taaʼin taküjapa pütchi namaa na wawalayuukana otta nnojoluichipa müin tamüiwaʼakai taaʼin». Talatüsü waaʼin waküjapa pütchi namaa na wawalayuukana mayaainjeʼe nnojoluin yalain naya wamaa. Atütülaasü waaʼin waküjapa pütchi namaa suluʼupünaa teleepono otta carta. ¿Kasa amaa atütülaka naaʼin Mauricio? Anuu sooʼomüin nünüiki: «Aʼyataashi maʼin taya napüleerua na wawalayuukana. Yapajüsü maʼin tatuma tü pütchi tekirajüinjatkalü anain sünain tü outkajawaakat. Sutuma taaʼinrüin tia, tayaawata aaʼu alin maʼin taya nüpüla Jehová otta napüla na wawalayuukana».
SHAPAALE WAAʼIN SUTUMA TÜ MÜLIAA WEʼRAKAT
8. ¿Jamüsü waaʼin weʼrapa müliaa?
8 Watüjaa aaʼu weʼreenain müliaa sülüʼütpa sükalia süpüla sajaʼttüinjatüin tü kasa mojusükat (2 Tim. 3:1). Eesüjaʼa süntajaale wanee müliaa wanainmüin. Eesüjaʼa süntajaale maʼletsee wanainmüin, ayuuijaʼalaʼa wamüle jee nünaajaale wanee wapüshi aikai wapüla. Shapaasü waaʼin sutumajee tia, shialeekajaʼa süntajaale wanainmüin wainma müliaa uwatuwoʼushi. Soto waaʼin eein Jehová wamaa otta eein süpüla walatüin süchikumüin tü müliaa weʼrakat süka nükaalinjain waya.
9. ¿Jeʼtsü waneirua müliaa niʼraka Job?
9 Jülüjataa waaʼin tü naaʼinrakat Jehová süpüla nükaalinjain Job. Wainma müliaa niʼraka uwatuwoʼushi. Soʼu wanee kaʼi ajaʼttaleesia nümüʼlüin, oʼutunusü naaʼin na nüchepchiakana otta na nüchonniikana (Job 1:13-19). Süchikijeechon tia alatakat nümüin, ayuuijaakalaka nia sutuma wanee ayuulii keemasü maʼin, ajaʼttüsü nüta sutuma (Job 2:7). Anuu nünüiki Job sutuma müliain maʼin nia: «Keemasü maʼin tü müliaa teʼrakat. Kasataalejeseʼe oʼutuin taya» (Job 7:16).
Süpüla nütüjaain saaʼu Job naaʼinmajünüin nutuma Jehová, nüküjain Jehová nümüin alin nüpüla süpüshuaʼa tü kasa nukumajakat. (Paashajeʼera tü pütchikat 10).
10. ¿Kasa naaʼinraka Jehová nüpüleerua Job süpüla nüchecherüin naaʼin soʼunnaa müliaa? (Piirakaa sümüin tü ayaakuaa sünainkat süta tü rewiisütakat).
10 Nütüjaa aaʼu Jehová süpüshuaʼa tü müliaa niʼrakat Job. Süka alin Job nüpüla, nükaalinjain nia süpüla nüchecherüin naaʼin soʼunnaa tü müliaa niʼrakat jee süpüla waneepiain nia nümaa. Nüküjain Jehová nümüin Job kekiin maʼin nia otta alin nüpüla süpüshuaʼa tü kasa nukumajakat. Nüküjain nümüin süchiki waneirua mürüt anajüsü ma’in (Job 38:1, 2; 39:9, 13, 19, 27; 40:15; 41:1, 2). Otta müsia nütütüleʼerüin naaʼin Job nükajee Elihú, wanee jimaʼai waneepiakai nümaa Maleiwa. Nüküjain nümüin Job naapeerüin Jehová kasa anasü namüin na achechetkana naaʼin soʼunnaa müliaa. Eepejeʼe wanee kasa naaʼinraka Jehová nüpüleerua Job nükajee Elihú. Nüchiaain nia Elihú süka anakalü akuwaʼipa süpüla niyaawatüin saaʼu niain Jehová chi alanaʼaleekai woulia, jama niain chi Kakumalakai kasakat süpüshuaʼa (Job 37:14). Nuluwataain Jehová Job süpüla nuʼuraajüinjachin napüleerua na apünüinshii naʼaleewainyuu kaainjalakana (Job 42:8-10). ¿Kasa naaʼinraka Jehová maaʼulu süpüla nükaalinjain waya soʼunnaa weʼrüin müliaa?
11. ¿Jamüsü sütütüleʼeraka waaʼin tü sümakat tü Bibliakat soʼunnaa weʼrüin müliaa?
11 Nnojoishi yootuin wamaa Jehová maʼaka yootuin nia nümaa Job. Eepejeʼe süpüla waapajüin nünüiki sükajee tü Bibliakat (Roma 15:4). Nütütüleʼerüin waaʼin sükajee tü kasa naaʼinrajatkat mapeena. Wekirajaa sünain waneirua pütchi suluʼujee tü Bibliakat atütüleʼereetka waaʼin weʼrapa müliaa. Nüküjain Jehová wamüin sükajee tü Bibliakat nnojoluin eein wanee kasa ataʼülaka nukuwaʼipa suulia alin waya nüpüla (Roma 8:38, 39). Otta nüküjain wamüin pejein nia «nanain napüshuaʼa na achajaakana nüchiki», naapajüin nanüiki noʼuraajapa nümüin (Sal. 145:18). Nüküjain Jehová wamüin eein süpüla wachecherüin waaʼin soʼunnaa müliaa jee talatüin waaʼin weʼitaale waaʼin nünain (1 Cor. 10:13; Sant. 1:2, 12). Saashin tü Nünüikikat Maleiwa motsomüin neʼe tü müliaa weʼrakat, eekajasaʼa tü kataa oʼuu naapüinjatkat wamüin Jehová süpülajatü kaʼikat süpüshuaʼa (2 Cor. 4:16, 17; 4:18, TNM). Nüküjain Jehová wamüin najaʼttirüinjachin Satanás otta napüshuaʼa na ashatakana nukuwaʼipa, nayajaʼa na kasitkana tü müliaa weʼrakat (Sal. 37:10). ¿Pünaajaaitche suluʼu pikii waneirua wetsiikulo atütüleʼereetka paaʼin soʼunnaa tü müliaa piʼreetkat?
12. ¿Kasa waaʼinrajatka süpüla jaloulin wamüin tü nüküjakat Jehová wamüin suluʼu tü Bibliakat?
12 Keeʼireesü naaʼin Jehová waashajeʼerüin tü Bibliakat waneepia sümaa wasakireʼerüin waaʼin sünain. Weʼitaale suluʼu wakuwaʼipa tü wekirajaakalü anain, katchinjeerü wanoula jee aleeweena maʼin waya nümaa Jehová. Sünainjee tia, wachechereerü waaʼin soʼunnaa müliaa. Naapeerü Jehová wamüin tü nüpülainkat weʼitaale waaʼin sünain tü Nünüikikat. Sükajee tü nüpülainkat, naapüin wamüin «tü yalayalaakat» süpüla wachecherüin waaʼin soʼunnaa müliaa (2 Cor. 4:7-11).
13. ¿Jamüsü süchechetka waaʼin soʼunnaa müliaa tü pütchi aapünakat wamüin nükajee chi achepchiee oonookai otta kekiikai maʼin?
13 Naapüin Jehová wamüin nükajee chi achepchiee oonookai otta kekiikai maʼin tü katchinjeetkalü atuma wanoula otta süpüla eejüin waaʼin suulia tü ooʼulakünakalü aka waaʼin. Naapüin tia sükajee wainma pütchi, video otta jayeechi (Mat. 24:45). Naapüin Jehová wamüin tia soʼu tü kaʼi choʼujaakalü oʼu shia wamüin, anasüjeseʼe wekirajaale maʼin sünain tia. Kojutusü tia sümüin wanee wawala chejeʼewat Estados Unidos, müsü shia: «Ooʼulakünüsü taaʼin kojuyatua soʼu tü 40 juya taʼyataakalü oʼu nümüin Jehová». Wainma müliaa shiʼraka tia wawalakat. Outushi chi sutuushikai sutuma süsaapünaain nia wanee kemion, epeʼtshi suchupeetsekai, outushii sutuma ayuulii outasiroʼu na wayuu kachooinkana shia otta piantua kanserüin shia. ¿Kasa achechetka saaʼin soʼunnaa tia? Anuu sünüiki: «Naaʼinmajüin taya Jehová waneepia. Tachecherüin taaʼin soʼunnaa müliaa sükajee tü pütchi naapakat wamüin nükajee chi achepchiee oonookai otta kekiikai maʼin. Sutuma tia eesü süpüla müin tanüiki maʼaka naaʼin Job wanaa sümaa nümüin: «Jaʼitaichi outuin taya, ayatajachia neʼe taya nümaa Jehová» (Job 27:5).
¿Kasa waaʼinrajatka süpüla wakaalinjain na wawalayuukana? (Paashajeʼera tü pütchikat 14).
14. ¿Kasa naaʼinraka Jehová süpüla nükaalinjain waya nakajee na wawalayuukana soʼunnaa kasa kapüleesü? (1 Tesalónica 4:9).
14 Nikirajüin Jehová na aʼyataashiikana nümüin süpüla aijiraainjanain naya jee süpüla natütüleʼerajiraain naaʼin soʼunnaa kasa kapüleesü (2 Cor. 1:3, 4; paashajeʼera 1 Tesalónica 4:9). Na wawalayuukana nakaaliijeein maʼin waya süpüla waneepiain waya nümaa Jehová weʼrapa müliaa, maʼaka naaʼinrüin shia Elihú (Aluw. 14:22). Shiyaawata aaʼu tia wanee wawala kanüliasü Diane. Ayuuijaapa chi suʼwayuusekai sutuma wanee ayuulii keemasü maʼin, natütüleʼerüin saaʼin na wawalayuukana otta nakaalinjain shia süpüla ayatüin ichein sunoula. Anuu sünüiki: «Kapüleesü maʼin wamüin tü alatakat soʼu kojuya kashi. Weʼrüin tü naalinkat Jehová wapüla, nakaalinjain maʼin waya na wawalayuukana otta naapüin tü kasa choʼujaakat wamüin süpüla walatüin süchikumüin tü müliaa weʼrakat. Awaraijaashii waaʼu, nayamaajüin waya otta najuupatüin waya. Neʼikajaapuʼuin taya sünain tü outkajawaakat jee tojuʼitapa sünain aküjaa pütchi». ¿Aashin talatüin waaʼin süka naʼakain waya na wawalayuu aikana apüla waya?
KOJUTUSÜ MAʼIN WAMÜIN NAAʼINMAJÜIN WAYA JEHOVÁ JEE NÜMÜLIAJÜIN WAAʼIN
15. ¿Jamüsü watüjaaka saaʼu eein süpüla wachecherüin waaʼin soʼunnaa müliaa?
15 Eesü tü kasa alatakat wamüin wapüshuaʼa. Nnojoliipejeʼe waya wamüiwaʼain soʼunnaa tia. Eeshi Jehová waneepia wamaa maʼaka naaʼin wanee washi aipüraikai maʼin. Naapajeein wanüiki jee nükaalinjeein waya (Is. 43:2). Eesü süpüla wachecherüin waaʼin soʼunnaa müliaa sükajee tü kasa naapakat Jehová wamüin. Eeshii süpüla woʼuraajüin nümüin otta waashajeʼerüin tü Bibliakat. Eesü süpüla nütütüleʼerüin waaʼin sükajee tü pütchi naapakat wamüin nükajee chi achepchiee oonookai jee kekiikai maʼin otta nakajee na wawalayuu aikana apüla waya.
16. ¿Kasa waaʼinrajatka süpüla ayatüin naaʼinmajüin waya Jehová?
16 Kojutusü maʼin wamüin süka jülüjain waya naaʼin chi Washi iipünaajachikai. «Nia chi talatakai atuma waaʼin» (Sal. 33:21). ¿Kasa waaʼinrajatka süpüla jaʼyainjatüin waaʼu kojutuin wamüin naaʼinmajüin waya Jehová? Anainjatü wamüin jee waapaainjatü amaa tü kasa naapakat wamüin süpüla katchin wanoula. Süpüla ayatüin naaʼinmajüin waya Jehová, oonooinjana waya waneepia nümaa jee waaʼinrüinjatü tü nüchekakat. Müle shia watuma naaʼinmajeena waya süpüla kaʼikat süpüshuaʼa (1 Ped. 3:12).
JAYEECHI 38 Naaʼinmajeein pia Jeʼwaa
a Choʼujaashii nükaalinjain waya Jehová süpüla walatüinjanain süchikumüin tü müliaa weʼrakat maaʼulu. Sünain ekirajaayakat tüü, wekirajaweerü anain eein Jehová waneepia namaa na aʼyataashiikana nümüin. Nütüjaa aaʼu tü alatakat wamüin waneʼewai wakua otta naapüin wamüin tü achecherüinjatkat waaʼin soʼunnaa müliaa.
b Aʼwanajaanüsü waneirua anüliee.