1. ¿Jamüsü anaka waashajaale süchiki jamakuwaʼipalüin süpüla wanoujain sünain tü shiimainkat?

 «¿JAMAKUWAʼIPAI süpüla punoujain sünain tü shiimainkat nüchiki Maleiwa?», eesüjaʼa kojuyatuairüle waküjain tia. Asakinnawaishii waya süchiirua tia weʼrajiraapa namaa na wawalayuukana. Kamalainsü wamüin waapajüin nanüiki süchiki jamakuwaʼipalüin süpüla neʼraajüin nukuwaʼipa Jehová otta süpüla alin nia napüla. Müshiʼiya wayakana, kamalainsü wamüin waküjain namüin jamüin kojutuka wamüin tü anoujaakat (Roma 1:11). Sükajee tia, wayaawata aaʼu anain maʼin süka waküjaliin pütchi nüchiki Jehová otta müsia wayaawata aaʼu wachajaainjatüin sukuwaʼipa süpüla ayatüin waya sünain tü anoujaakat, süpüla talatüinjachin Jehová watuma otta süpüla eein nia wamaa (3 Juan 4).

2. ¿Kasa wekirajaainjatka anain sünain ekirajaayakat tüü?

² Sünain ekirajaayakat tüü wekirajaajeerü anain waneirua kasa kojutuka atuma wamüin tü shiimainkat nüchiki Maleiwa otta tü waaʼinrajatkat süpüla ayatüin kojutuin shia wamüin. Wekirajaapa sünain, kojuteerü maʼin wamüin nürütkeʼerüin waya Jehová nünainmüin süpüla wanoujain (Juan 6:44). Otta keeʼireejeerü maʼin waaʼin waküjain süchiki tü shiimainkat nüchiki Maleiwa namüin na waneinnua.

3. ¿Jamüsü kojutuleeinjatka wamüin tü shiimainkat nüchiki Maleiwa?

³ Wainma kasa kojutuka atuma wamüin tü shiimainkat nüchiki Maleiwa. Tü kojutukat maʼin wamüin shia süka alin wapüla Jehová, chi kanainjeejachikai tü shiimainkat. Sükajee tü Bibliakat  watüjaa aaʼuchi pülashin maʼin chi Maleiwakai, chi Kakumalakai tü sirumatuʼukat jee tü Mmakat. Watüjaa aaʼu niain chi Washi iipünaajachikai, chi aikai apüla waya otta chi aaʼinmajakai waya (1 Ped. 5:7). Watüjaa aaʼuchi niain wanee Maleiwa amüliajüi, anamia, nnojoishii aashichijaamaatüin, miyoʼuin maʼin saalin wayuu nüpüla otta nüküjain tü shiimainkat waneepia (Éx. 34:6). Aaʼinrüshi nia kasa anasü waneepia (Is. 61:8). Aisü nümüin Jehová niʼrüle müliain waya otta keeʼireesü maʼin naaʼin najaʼttirüin tü müliaa shiʼrakat wayuu (Jer. 29:11). Kasataalejeseʼe süntüin tia kaʼikat, müshijeseʼe alin maʼin Jehová wapüla.

4, 5. ¿Jamüsü nüküjaka chi aluwataaushikai Pablo müin aka saaʼin wanee karapin tü kasa anasü waʼatapajakat?

⁴ Wanee kasa kojutuka atuma wamüin tü shiimainkat nüchiki Maleiwa shia süka anain wakuwaʼipa sutuma. Saʼakapünaa tü pütchi wekirajaakalü anain suluʼujee tü Bibliakat eesü tü kasa anasü waʼatapajakat, tü ekeraajeetkat mapeena. Anuu nünüiki chi aluwataaushikai Pablo süchiki tia: «Maa aka tü kachueera ajapuluʼujiakat anua, akaajaa nünüiki Maleiwa sünain sajapuluʼuinjatüin waaʼin» (Heb. 6:19, 20). Tü karapinkat süpülajatü jimatüin anuwa sutuma, akaajaʼa tü kasa anasü waʼatapajaka sutuma tü Nünüikikat Maleiwa jimatüsü waaʼin otta jutatüsü waaʼin sutuma soʼunnaa müliaa.

⁵ Tia pütchi nüküjakat Pablo namüinjatü na anoujashii chainjanakana iipünaa. Sünainpünaapejeʼe nakuwaʼipa na anoujashii yaainjanakana kepiain yaa saaʼu tü Mmakat paʼaraiisüpa shia (Juan 3:16, TNM). Anasü wakuwaʼipa süka waʼatapajüin katüinjatüin woʼu süpüla kaʼikat süpüshuaʼa.

6, 7. ¿Jamüsü sümülialaaka saaʼin Yvonne sutuma tü sümakat tü Bibliakat süchiki tü alateetkat mapeena?

⁶ Jülüjataa waaʼin sukuwaʼipa wanee wawala kanüliasü Yvonne. Nnojotsü anoujatüjülüin shia. Jintuluiwaʼaya shia, mmotpuʼusü seema tü outaakat. Anuu wanee pütchi saashajeʼeraka suluʼujee wanee karaloʼuta makataleeka suluʼu shikii: «Soʼu wanee kaʼi yüütaleejeeria kasa». Anuu sooʼomüin sünüiki: «Matunkuinsat taya soʼu aikat tia. Jülüjasü taaʼin jameerüin takuwaʼipa mapeena. Kasapülajanain eeka waya, nnojotsü taya outeein».

⁷ Majayütpa Yvonne shiʼraajüin na aküjaliikana pütchi nüchiki Jehová. Anuu sünüiki: «Tanoujaitpa anain eein süpüla katüin toʼu waneepia paʼaraiisüpa tü mmakat». Amülialaasü saaʼin sutuma sütüjaain saaʼu tü shiimainkat nüchiki Maleiwa. Müsü shia: «Nnojoluitpa siraain aikat taaʼu sümaa matunkuin taya saaʼujee jülüjain taaʼin jameerüin takuwaʼipa mapeena jee saaʼujee jülüjain taaʼin tü outaakat». Kojutusü maʼin sümüin Yvonne tü shiimainkat nüchiki Maleiwa otta kamalainsü sümüin saashajaain sümaa wayuu süchiki tü kasa anasü saʼatapajakat (1 Tim. 4:16).

8, 9. (1) ¿Kasa naaʼinraka chi wayuu naashajaakai achiki Jesús sutuma kojutuin nümüin tü nuusütakalü anain? (2) ¿Jamüsü paaʼin sutuma piyaawatüin saaʼu tü shiimainkat nüchiki Maleiwa?

⁸ Tü süchikikat Nuluwataainjachin Maleiwa shia süpüshi tü saashajaakat maʼin achiki tü Bibliakat. Naashin Jesús tü nukuwaʼipakat Maleiwa sünain aluwatawaa müsü aka saaʼin wanee korolo kojutusü ojoitünaka. Müshi nia: «Aluwataajeechi Maleiwa chejee iipünaajee. Tia müsü aka saaʼin wanee korolo nüntaka anain wanee wayuu suluʼu wanee mma, nuunjulaka shia süchikuaʼa. Talatüsü maʼin naaʼin chia wayuukai, nüiküinjeseʼe süpüshuaʼa tü kasa eejatkat nümaʼana süpüla niyaʼlajüin tü mma eejatüle nuunjulüin tia korolokot» (Mat. 13:44, TNM). Chia wayuukai nnojotsü nütüjaain saaʼu eejatüin tia korolo kojutusükat, shiasaʼa niʼrapa shia, nuiküin süpüshuaʼa tü kasa nümaʼanakat süpüla eeinjatüin shia nümaʼana. ¿Jamüsü naaʼinraka tia? Shia süka kojutuin maʼin tia  korolokot nümüin, alanaʼaleesia sujutu nümüin suulialeʼeya wane kasa.

⁹ ¿Müsüche paaʼin maʼaka naaʼin chia wayuukai sutuma piyaawatüin saaʼu tü shiimainkat nüchiki Maleiwa? Watüjaa aaʼu talatüin paaʼin sutuma tia. Nnojotsü eein wanee kasa alanaʼaleeka suulia waʼyataain nümüin Jehová otta nnojotsü eein wanee kasa alanaʼaleeka suulia tü kasa eejeetkat nuluwataapeena Maleiwa saaʼu mmakat. Nnojotsü amülain neʼe tü waaʼinrakat süpüla aleewain maʼin waya nümaa Jehová. Nnojotsü eein wanee kasa alanaʼaleeka suulia talatüin naaʼin Jehová wamaa (Col. 1:10).

10, 11. ¿Kasa atütüleʼeraka naaʼin Michael süpüla niiʼiratüin nukuwaʼipa?

¹⁰ Wainma wawalayuu ooʼulaakana wainma kasa süpüla talatüin Jehová namaa. Eeshii na ooʼulaakana suulia ekirajawaa kasa anaka maʼin suluʼu eʼikülee miyoʼu, eeshii na ooʼulaakana suulia kachiiruain naaʼin washirüü otta eeshii na eeʼiratakana nakuwaʼipa neʼraajapa Jehová. Tia shia tü naaʼinrakat Michael miyoʼupa nia. Jimaʼaitpa nia, ekirajaashi nia süpüla nütüjain asheʼejirawaa. Anuu nünüiki: «Taaʼinmaasü maʼin katchinjachin maʼin taya [...]. Jülüjawaisü taaʼin nnojolin eein wanee katchinkai toulia». Nikirajaapa sünain tü Bibliakat niyaawata aaʼu tü jülüjakat naaʼin Jehová süchiki tü naaʼinrakat (Sal. 11:5). Anuu tü nüküjakat nüchiki chi wawala ekirajakai nia sümaa tü nuʼwayuusekat: «Nnojotsü napüleeruain taaʼin süpüla tooʼulaainjachin suulia tü taaʼinrakat. Tü naaʼinrakat shia nekirajüin maʼin taya sünain tü shiimainkat nüchiki Maleiwa».

¹¹ Aishi maʼin Jehová nüpüla Michael nikirajaapa maʼin nüchiki. Wanee kasa atanatka naaʼin shia nütüjaain saaʼu sümülialaain naaʼin Maleiwa naalin na aʼyataashiikana nümüin. Niyaawata aaʼu Michael nuuʼulaainjachin suulia wanee kasa mojusü kamalainka maʼin nümüin. Anuu nünüiki: «Kapüleesü tamüin tooʼulaainjachin suulia atkawaa. Tatüjaapejeʼe saaʼu talateerüin naaʼin Jehová tooʼulaale suulia tia. Tayaawata aaʼu nnojoleerüin amülain neʼe tü taaʼinrakat taʼyataale nümüin». Kojutusü maʼin nümüin Michael nütüjaain saaʼu tü shiimainkat nüchiki Maleiwa, müsüjeseʼe niiʼiratüin nukuwaʼipa mayaainjeʼe kapüleein shia nümüin (Sant. 1:25).

12, 13. ¿Jamüsü saaʼin Mayli sutuma tü sümakat tü Bibliakat?

¹² Süpüla wayaawatüin saaʼu choʼujaain watüjaain saaʼu tü shiimainkat nüchiki Maleiwa jee kojutuin shia wamüin, kayaawasesü shia sutuma tü Bibliakat. Süküjain müin aka saaʼin wanee ranpara chuwataka eere kojoin piʼyuushi (Sal. 119:105; Éf. 5:8). Jamüsüjaʼa Mayli, wanee wayuu chejeʼewatka Azerbaiyán, talatüsü maʼin saaʼin sutuma müin sünakakai saaʼin tü Bibliakat eepünaainjatüle shia. Naata tü nunoujakalü anain chi süshikai otta tü sunoujakalü anain tü shiikat. Jamüshijaʼa chi süshikai musulmán nia otta tü shiikat judío shia. Anuu sünüiki Mayli: «Tatüjaa aaʼu eein chi Maleiwakai, eepejeʼe waneirua kasa nnojotka tayaawatüin aaʼu. Eesü tasakirawaire taaʼin sünain tüü: ‹¿Kasache nukumajaka apüla waya Maleiwa?, ¿nukumajüinche waya süpüla müliain maʼin waya jee jotuinjanain waya saʼaka siki outapa waya?›. ‹Süpüshuaʼa tü kasa alatakat alejatia nutuma Maleiwa›, müshii na wayuukana. Müsüjeseʼe tasakirüin taaʼin sünain tüü: ‹¿Müshiiche waya maʼaka saaʼin wanee mieeka najapuluʼu Maleiwa? ¿Talatüsüche naaʼin müliale waya niʼrüin?›».

¹³ Ayatüsia Mayli süchajaain susoutia tü pütchi sütüjaweekalü aaʼu. Mapa anasü sümüin shikirajünüin sünain tü Bibliakat jee woutiisasü shia. Anuu sünüiki: «Sutuma pansaain tü sümakat tü Bibliakat, naatasü tü jülüjakat taaʼin maaʼulu jee jimatüsü taaʼin». Maʼaka saaʼinrüin Mayli, wayakana aʼyataashiikana  nümüin Jehová waʼwaajüin nia süka nüneeküin waya süpüla wojuʼitüin saʼakajee piʼyuushi süpüla wekerotüinjanain nünainmüin saʼakamüin tü nuwaralakat (1 Ped. 2:9).

14. ¿Kasa waaʼinrajatka süpüla kojutuin maʼin wamüin tü shiimainkat nüchiki Maleiwa? (Paashajeʼera tü pütchikat « Waneirua shiyaawase»).

¹⁴ Sünainjee nakuwaʼipa naya wawalayuukana wayaawata aaʼu jamüin kojutuka wamüin tü shiimainkat nüchiki Maleiwa. Eepejeʼe waneirua kasa kojutuka atuma wamüin shia. ¿Eesüche süpüla wekirajaain sünain tü kojutukalü atuma wamüin tü shiimainkat? Kojutule maʼin wamüin shia wachajaweerü sukuwaʼipa süpüla jaʼyain sünain wakuwaʼipa.

15. ¿Kasa waaʼinrajatka süpüla jaʼyain waaʼu kojutuin wamüin tü shiimainkat?

¹⁵ Wanee kasa waaʼinrajatka süpüla jaʼyain waaʼu kojutuin wamüin tü shiimainkat shia wekirajaale waneepia sünain tü Bibliakat otta sünain tü karaloʼutairua eekat natuma na Aküjaliikana pütchi. Jaʼitainna kakaliainnain maʼin waya sünain anoujaa, eesia tü wekirajaainjatkalü achiirua. Anuu tü pütchi ashajünakat sünain tü palajatkat Aapiria Wayuu ojuʼitaka suluʼu inglés: «Tü shiimainkat müsü aka saaʼin  wanee süsii wunuʼu chakat isashiipaʼa pasanain sünain mojuui keipüsesü. Puusüteere sünain, püchajaainjatü maʼin süchiki [...]. Püsüʼüteere shia, ejepülaainjachi pia. Müinjatia neʼe sukuwaʼipa watuma süpüla wayaawatüin saaʼu tü shiimainkat. Nnojotsü anainjatüin neʼe waaʼin sümaa waneesia pütchi. [...] Wachajaainjatü sooʼomüin süpüla wayaawatüin maʼin saaʼu». Wachajaainjatü sukuwaʼipa süpüla wekirajaain sünain tü Bibliakat, nnojoleena amülain waya sünain aaʼinraa tia.

16. ¿Jamüsü sukuwaʼipa putuma süpüla pikirajaain sünain tü Bibliakat? (Proverbios 2:4-6).

¹⁶ Nnojotsü kamalain wamüin wapüshuaʼa aashajeʼeraa karaloʼuta jee ekirajawaa. Keeʼireepejeʼe naaʼin Jehová wekirajaainjanain süpüla wayaawatüin saaʼu tü shiimainkat nüchiki (paashajeʼera Proverbios 2:4-6). Waaʼinrüle tia, wainmeerü kasa watüjaka sünainjee. Naashin wanee wawala kanüliakai Corey nikirajaa anainrü waneʼewai sukua tü wetsiikulo naashajeʼerakat suluʼujee tü Bibliakat. Müshi nia: «Taashajeʼerüin tü noota wünaapünaakat sünain tü süpanakat otta tü wetsiikulokalüirua pasanainka sünain jee tekirajaa tamüsia sünain. [...] Wainma kasa tatüjaka sünainjee süka müin sukuwaʼipa tatuma». Wachajaale maʼin sukuwaʼipa süpüla wekirajaain sünain tü Bibliakat, jaʼyeerü waaʼu kojutuin wamüin tü shiimainkat nüchiki Maleiwa (Sal. 1:1-3).

17. ¿Kasa waaʼinrajatka süpüla watüjaain saaʼu kojutuin wamüin tü shiimainkat nüchiki Maleiwa? (Santiago 1:25).

¹⁷ Nnojoishii ekirajaainjanain neʼe waya nüchiki Maleiwa, waaʼinrajatiaʼaya tü wekirajaakalü anain. Waaʼinrüle tia, talateerü maʼin waaʼin (paashajeʼera Santiago 1:25). ¿Kasa waaʼinrajatka süpüla watüjaain saaʼu kojutuin wamüin tü shiimainkat nüchiki Maleiwa? Naashin wanee wawala wasakireʼerüinjatü anain waaʼin kasain tü anakat süpüla waaʼinrüin jee kasain choʼujaain süpüla wanouteʼerüin sünain wakuwaʼipa. Anuu nünüiki chi aluwataaushikai Pablo: «Anasü müleka ichere jia waneepia sünain tü shiimüinkat ekirajünakat anain jia» (Filip. 3:16).

18. ¿Kasa anasü weʼraka sutuma waaʼinrüin tü wekirajaakalü anain nüchiki Maleiwa?

¹⁸ Wainma kasa anasü weʼraka sutuma waaʼinrüin tü wekirajaakalü anain nüchiki Maleiwa. Anasü wakuwaʼipa sutuma, talatüsü naaʼin Jehová otta talatüsü naaʼin na wawalayuukana (Prov. 27:11; 3 Juan 4). Sutuma tia, kojutusü wamüin tü shiimainkat nüchiki Maleiwa otta waaʼinrüin shia.