EKIRAJAAYA 34
JAYEECHI 107 Aipüralii waya maʼaka naaʼin Jeʼwaa
Amülialaasü naaʼin na laülaashiikana naalin chi kaainjalashikai
«¿Nnojotsükai piyaawatüin saaʼu nükaalinjain pia Maleiwa süpüla piyaawajaainjachin suulia paainjala?» (ROMA 2:4).
TÜ WATÜJEETKAT
Wekirajaajeerü anain tü naaʼinrakat na laülaashiikana süpüla nakaalinjain wane wawala kaainjalakai.
1. ¿Kasa naaʼinreetka Maleiwa nüpüleerua wanee wawala eekai kaainjalain?
WEKIRAJAA ANAINRÜ suluʼu ekirajaaya 33 tü naaʼinrajatkat na anoujashii chajanakana Corinto kaainjarale wanee anoujashi. Nnojoire niyaawajaain suulia naainjala ojuʼitinnajachi nia naʼakajee na anoujashiikana. Eepejeʼe süpüla nükaalinjain Maleiwa wanee wawala süpüla niyaawajaainjachin suulia naainjala maʼaka süküjünüin suluʼu Roma 2:4. ¿Kasa naaʼinrajatka na laülaashiikana nüpüleerua wanee wawala süpüla niyaawajaain suulia naainjala?
2, 3. ¿Kasa waaʼinrajatka watüjaale saaʼu kaainjalain wanee wawala otta jamüsü waaʼinrajatka tia?
2 Süpülapünaa nakaalinjain na laülaashiikana wanee wawala kaainjalakai natüjaainjatü saaʼu palajana tü kasa mojusü naaʼinrakat chia wawalakai. a ¿Kasakaʼa waaʼinrajatüin watüjale saaʼu kaainjalain wanee wawala? Wamaa nümüin chi wawala kaainjalashikai nüküjai shia namüin na laülaashiikana süpüla nakaalinjain nia (Is. 1:18; Aluw. 20:28; 1 Ped. 5:2).
3 ¿Kasa waaʼinrajatka nnojorüle nüküjeein shia namüin na laülaashiikana? Waküjainjatü shia namüin süpüla nakaalinjain nia. Mayaainjeʼe kapüleein wamüin tia, waaʼinrüin shia süka alin wapüla chi wawalakai otta alin wapüla Jehová (Sal. 27:14). Nnojotsü wacheküin nujuʼitinnüin chi wawalakai naʼakajee na wawalayuukana. Macheʼere nia süchiirua kaainjalaa amojujaajeerü nukuwaʼipa nümaa Jehová. Mojeerü pütchi nachiki na wawalayuukana otta nüchiki Jehová sünainjee tia.
NAAʼINRAKA NA LAÜLAASHIIKANA SÜPÜLA NAKAALINJAIN CHI WAWALA KAAINJALASHIKAI
4. ¿Kasa nachekaka na laülaashiikana nüpüleerua chi kaainjalashikai naikalaapa nümaa?
4 Kaainjarale wanee wawala, naneeküin na laülaashiikana apünüinshii laülaashii süpüla naikalaain nümaa. b Laülaashiikana naainnua nayaawatüinjatü saaʼu eein tü kasa kapüleekat namüin. Mayaainjeʼe nakaalinjeein chi kaainjalashikai natüjaa aaʼu nnojoluin süpüla napüleerua naaʼin shiiʼiree niiʼiratüin nukuwaʼipa (Deut. 30:19). Eeshi chi ayaawajaakai suulia naainjala maʼaka naaʼinrüin shia chi aluwataashikai David, eepejeʼe na nnojoliikana aaʼinrüin tia (2 Sam. 12:13). Eeshi chi macheʼeyaakai suulia tü nümakat Jehová nümüin (Gén. 4:6-8). Tü nachekakat na laülaashiikana nüpüleerua chi kaainjalashikai shia niyaawajaain suulia naainjala. ¿Kasa pütchi jülüjaka naaʼin na laülaashiikana naikalaapa nümaa chi kaainjalashikai?
5. ¿Kasa pütchi jülüjainjatka naaʼin na laülaashiikana naikalaapa nümaa chi kaainjalashikai? (2 Timoteo 2:24-26; piirakaa sümüin tü ayaakuaakat).
5 Chi wawala kaainjalashikai müshi akaʼa naaʼin wanee aneerü machikikai noulia na laülaashiikana (Luc. 15:4, 6). Naikalaapa na laülashiikana nümaa chi kaainjalashikai, nnojotsü airuʼuluin nanüiki nümüin, nnojotsü müliain naaʼin natuma, nnojotsü jülüjain neʼe naaʼin nasakiijüin nia süpüla natüjaain saaʼu tü naaʼinrakat. Tü jülüjakat maʼin naaʼin na laülaashiikana shia tü sümakat 2 Timoteo 2:24-26 (paashajeʼera). Nnojoishii naya peʼipaain nümaa, kamaneeshii naya nümüin jee yootushii naya nümaa süpüla natanalüin naaʼin.
Chi wawala kaainjalashikai müshi aka naaʼin wanee aneerü machikikai. Nachajaain na laülaashiikana nüchiki maʼaka naaʼin wanee anneetpüʼü achajaakai nüchiki wanee aneerü machikikai nuulia. (Paashajeʼera tü pütchikat 5).
6. ¿Kasa naaʼinraka palajana na laülaashiikana süpülapünaa naikalaain nümaa chi kaainjalashikai? (Roma 2:4).
6 Ekirajaashii palajana na laülaashiikana süpüla wanaawain naaʼin sümaa tü jülüjakat naaʼin Jehová. Jülüjasü naaʼin pütchikat tüü: «¿Nnojotsükai piyaawatüin saaʼu nükaalinjain pia Maleiwa süpüla piyaawajaainjachin suulia paainjala?». Kamaneeshii maʼin naya nümüin chi wawala kaainjalashikai maʼaka kamaneein maʼin Jehová (paashajeʼera Roma 2:4). Naaʼinmajüinjatü na laülaashiikana nanoula na wawalayuukana maʼaka naaʼinmajüin Cristo nanoula na anoujashiikana (Is. 11:3, 4; Mat. 18:18-20). Süpülapünaa naikalaain nümaa chi kaainjalashikai, achuntushii naya palajana nümüin Jehová süpüla niyaawajaain chi kaainjalashikai suulia naainjala, nachajaain suluʼu tü Bibliakat, suluʼu tü karaloʼutakalüirua otta achuntushii naya nümüin Jehová süpüla nayaawatüin saaʼu nukuwaʼipaka chi kaainjalashikai otta tü alatakat nümüin. Yootushii naya süchiki tü natüjaainjatkalü aaʼu nüchiki chi kaainjalashikai maʼaka saaʼin tü nukuwaʼipapuʼukat paala, tü jülüjakat naaʼin otta tü nukuwaʼipakat kaainjalaka atuma nia (Prov. 20:5).
7, 8. ¿Kasa naaʼinrajatka na laülaashiikana süpüla nnojoluin naashichijaain nümüin chi kaainjalashikai maʼaka nnojoluin naashichijaain Jehová?
7 Nnojoishii aashichijaamaatüin na laülaashiikana maʼaka nnojoluin aashichijaamaatüin Jehová. Jülüjasü naaʼin tü naaʼinrakat Jehová napüleerua na wayuu kaainjalakana sümaiwa paala. Jamüshijaʼa nia soʼu kaainjalain Caín, nnojoishi aashichijaamaatüin nümüin, nüküjain nümüin sülateerüin kasa mojusü nümüin macheʼere nia süchiirua kaainjalaa jee aneerüin nukuwaʼipa noonoole sümaa nünüiki (Gén. 4:6, 7). Achiaanüshi David nutuma Jehová nükajee Natán, kayaawasesü nutuma Natán tü nümakat nümüin David süpüla niyaawatüin saaʼu David mojuin maʼin tü naaʼinrakat (2 Sam. 12:1-7). Kojuyatua nuluwataain Jehová na nünüikimaajanakana süpüla nakaalinjain na israelita kaainjalakana (Jer. 7:24, 25). Nnojoishi yalain neʼe Jehová aʼatapajüin nayaawajaain na israelitakana suulia naainjala, nukumajüin sukuwaʼipa süpüla nüküjain namüin nayaawajaainjanain suulia naainjala.
8 Nashatüin na laülaashiikana nukuwaʼipa Jehová nakaalinjapa chi anoujashi kaainjalashikai süpüla niyaawajaain suulia naainjala. Nnojoishii aashichijaainjanain na laülaashiikana nümüin chi kaainjalashikai maʼaka süküjain 2 Timoteo 4:2. Naashichijaale nümüin, eeshijaʼa nnojoleechire noonooin chi kaainjalashikai sümaa tü pütchi münakat nümüin jee nnojoleechire niyaawajaain suulia naainjala. Anamiainjana na laülaashiikana nümüin.
9, 10. ¿Kasa naaʼinrajatka na laülaashiikana süpüla niyaawatüin saaʼu chi wawala kaainjalashikai kasain amojujaain atuma nukuwaʼipa nümaa Jehová otta kasain kaainjalain atuma nia?
9 Yootushii na laülaashiikana süpüla natüjaain saaʼu kasain kaainjalain anainjee chi wawalakai. Yootushii naya süchiki tüü: ¿Amatchinjaasüche nunoula sutuma nnojoluin nikirajaain sünain tü Bibliakat jee nnojoluin nujuʼituin sünain aküjaa pütchi? ¿Ooʼulaashiche nia suulia oʼuraajaa nümüin Jehová? ¿Nnojotsüche nüchecherüin naaʼin suulia tü kasa mojusü jülüjakat naaʼin? ¿Jaraliiche na wayuu kamaʼawaika nia? ¿Kasawaiche tü nünajakat jee tü naapajakat? ¿Kaainjalaashiche nia sutuma tü jülüjakat naaʼin jee tü keeʼireekat naaʼin? ¿Niyaawata aaʼuche mojuin naaʼin Jehová sutuma tü kasa mojusü naaʼinrakat?
10 Süpüla niyaawatüin saaʼu chi wawala kaainjalashikai kasain amojujaain atuma nukuwaʼipa nümaa Jehová otta kasain kaainjalain atuma nia, eeshii süpüla nüsakinnüin süchiirua waneirua kasa natuma na laülaashiikana. Kamaneeinjanapejeʼe naya nasakirapa nia. Nnojoishi nasakiijainjachin nia süchiirua wanee kasa nnojotka choʼujaain natüjainjatüin aaʼu (Prov. 20:5). Eesüjaʼa kayaawaseerüle natuma nanüiki maʼaka kayaawasein nutuma Natán nünüiki nümüin David. Naaʼinrüinjatü tia na laülaashiikana süpüla niyaawatüin saaʼu chi wawala kaainjalashikai mojuin maʼin tü kasa naaʼinrakat. Soʼu naikalaain na laülaashiikana nümaa soʼu tü palajatkat nakua, eesüjaʼa mojule maʼin naaʼin chi kaainjalashikai sutuma tü kasa mojusü naaʼinrakat jee niyaawajaale suulia naainjala.
11. ¿Jamüsü nukuwaʼipa Jesús namüin na kaainjaraliikana?
11 Nashatüin na laülaashiikana nukuwaʼipa Jesús. Anuu nünüiki soʼu nüsakirüin Saulo chi chejeʼewaikai Tarso: «Sauloo, ¿jamüshikai müliaka maʼin taya putuma?». Sutuma nüsakirüin Jesús nia sünain tia, niyaawata aaʼu Saulo mojuin maʼin tü kasa naaʼinrakat (Aluw. 9:3-6). Anuuka joo nünüiki Jesús süchiki wanee wayuu kanüliakat Jezabel: «Kakaliairü maʼin taʼatapajüin shiiʼiree shiyaawajaainjatüin suulia saainjala» (Apoc. 2:20, 21).
12, 13. ¿Kasa naaʼinrajatka na laülaashiikana nnojoire niyaawajaamaatüin suulia naainjala wanee wawala? (Piirakaa sümüin tü ayaakuaakat).
12 Nashatüin na laülaashiikana nukuwaʼipa Jesús, nnojotsü jülüjamaatüin naaʼin nnojoluin niyaawajaweein wanee wawala suulia naainjala. Eeshi wawala eekai niyaawajaamaatüin suulia naainjala soʼu tü palajatkat nukua nüikalaanüin amaa. Eepejeʼe na choʼujaakana amüin naikalaanüin amaa maʼaka jeʼratua. Makalaka nakumajeein na laülaashiikana sukuwaʼipa naikalaain nachikuaʼa nümaa wanee wawala kaainjalashi. Süchikijee nüikalaanüin amaa soʼu tü palajatkat nukua, eesüjaʼa jülüjeerüle naaʼin mojuin maʼin tü kasa naaʼinrakat, nuchuntule nümüin Jehová motuin naaʼin tü naainjalakat jee niyaawajaajeechire suulia naainjala (Sal. 32:5; 38:18). Nüikalaanapa amaa nüchikuaʼa eesüjaʼa naateerüle tü jülüjakat naaʼin suulia tü palajatkat nukua jee niiʼiratüitpale nukuwaʼipa.
13 Süpüla niyaawajaain wanee wawala suulia naainjala, amülialaasü naaʼin na laülaashiikana naalin otta kamaneeshii naya nümüin. Achuntushii naya nümüin Jehová süpüla nakaalinjain naya otta naʼatapajüin niyaawajaain nutuma Jehová suulia naainjala (2 Tim. 2:25, 26).
Aikalaajeena na laülaashiikana nümaa wanee wawala kaainjalashi maʼaka jeʼratua nnojoire niyaawajaamaatüin suulia naainjala. (Paashajeʼera tü pütchikat 12).
14. ¿Jara ayaawajeʼeraka atuma wanee wawala suulia naainjala otta jamüsü watüjaakaʼa saaʼu tia?
14 Talatüsü maʼin waaʼin niyaawajaale wanee wawala suulia naainjala (Luc. 15:7, 10). ¿Jara ayaawajeʼeraka atuma nia suulia naainjala? ¿Nayache na laülaashiikana? Anuu nünüiki Pablo: «Eeshiijaʼa nayaawajaajeenale naya wayuukana nutuma Maleiwa suulia naainjala» (2 Tim. 2:25). Nia Jehová ayaawajeʼeraka wanee wawala suulia naainjala, nnojoishi niain wanee wayuu. Nüküjain Pablo tü kasa anasü eekat sünainjee niyaawajaain suulia naainjala wanee wayuu. Naashin Pablo nülaüleʼerüin naaʼin süpüla isain nia suulia tü kasa nimeejakalü aka chi Yolujaakai (2 Tim. 2:26).
15. ¿Kasa naaʼinrajatka na laülaashiikana süpüla ayatüin nakaalinjain chi wawala ayaawajaakai suulia naainjala?
15 Niyaawajaale wanee wawala suulia naainjala, ayateena na laülaashiikana alapalaain naaʼu süpüla nakatchinrüin nunoula, süpüla ayatüin naaʼinrüin tü kasa anasükat otta süpüla nüchecherüin naaʼin suulia tü kasa niʼitaakat Satanás (Heb. 12:12, 13). Nnojotsü naküjain na laülaashiikana namüin na wawalayuukana tü kasa mojusü naaʼinrakat chi kaainjalashikai. Eepejeʼe wanee kasa naküjainjatka namüin na wawalayuukana. ¿Kasa wayu tia?
«PÜCHIAA NIA NOʼUPALA NAPÜSHUAʼA NA JUTKATÜSHIIKANA»
16. ¿Kasa nüküjeeka achiki Pablo suluʼu 1 Timoteo 5:20 soʼu nümüin «noʼupala na jutkatüshiikana»?
16 (Paashajeʼera 1 Timoteo 5:20). Nüshajala Pablo tia pütchikat nümüin Timoteo, wanee laülaashi suluʼu tü outkajaaleekat. Nüküjain nümüin nüchiaainjanain «noʼupala napüshuaʼa na jutkatüshiikana na wayuu aaʼinrakana kasa mojusü». ¿Kasa nüküjeeka achiki Pablo? Nnojotsü shiain nüküjeein achiki nüchiaanajachin noʼupala napüshuaʼa na jutkatüshiikana chi kaainjalashikai, shia nüküjeeka achiki naküjainjatüin na laülaashiikana sunouteʼennüitpain tü naainjalakat otta nüchiaanüitchipain suulia naaʼinrüin shia piantua. Naküjainjatü shia namüin na atüjaakana saaʼu tü kasa mojusü naaʼinrakat chi kaainjalashikai otta na nüküjakana amüin süchiki tü naainjalakat.
17. ¿Kasa aküjünajatka namüin na wawalayuukana natüjaale saaʼu wainma wawalayuu süchiki naainjala wanee wawala otta jamüsü süküjünajatkaʼa tia namüin?
17 Natüjaale saaʼu wainma wawalayuu süchiki naainjala chi wawalakai jee shiale natüjaajeerüin saaʼu mapa, aküjünajatü namüin nüchiaanüitchipain chi wawalakai suulia naaʼinrüin shia piantua, niainjachi aküjakai tia wanee laülaashi. ¿Jamüsü süküjünajatkaʼa tia? Anuu nünüiki Pablo: «Mmoleenaka na waneinnua suulia kaainjalajüin naya».
18. ¿Kasa naaʼinraka na laülaashiikana kaainjarale wanee jintüi nnojoikai polooin mekiisatmüin ouyase? (Piirakaa sümüin tü ayaakuaakat).
18 ¿Kasa naaʼinrajatka na laülaashiikana kaainjarale wanee jintüi nnojoikai polooin mekiisatmüin ouyase? Nakumajeerü na laülaashiikana sukuwaʼipa süpüla naikalaain nümaa piamashii laülaashii otta namaa na wayuu kachooinkana nia. c Nasakireena na wayuu kachooinkana nia süchiki tü kasa naaʼinrakat nüpüleerua süpüla niyaawajaain suulia naainjala. Noonoole chi jintüikai sümaa tü namakat na wayuu kachooinkana nia, niiʼiratüle tü jülüjakat naaʼin jee nukuwaʼipa, naküjeerü na laülaashiikana namüin na kachooinkana nia ayatüinña nakaalinjain nia. Natüjaa aaʼu na laülaashiikana nuluwataain Jehová na kachonshiikana süpüla nayainjanain achiaain nachonnii, naaʼinrajatü tia süka anakalü akuwaʼipa (Deut. 6:6, 7; Prov. 6:20; 22:6; Éf. 6:2-4). Asakinnawaleena naya natuma na laülaashiikana ayatüleʼeya nakaalinjain chi nachonkai. ¿Jama macheʼere chi jintüikai süchiirua kaainjalaa? Aikalaajeena na laülaashiikana nümaa chi jintüikai otta namaa na wayuu kachooinkana nia.
Kaainjarale wanee jintüi, aikalaajeena piamashii laülaashii nümaa otta namaa na wayuu kachooinkana nia. (Paashajeʼera tü pütchikat 18).
AISÜ MAʼIN WAYUU NÜPÜLA JEHOVÁ JEE AMÜLIAJÜI MAʼIN NIA
19. ¿Kasa naaʼinraka na laülaashiikana süpüla nashatüin nukuwaʼipa Jehová nakaalinjapa wanee wawala kaainjalakai?
19 Nuchuntuin Jehová namüin na laülaashiikana naaʼinmajüinjanain na wawalayuukana noulia na macheʼekana süchiirua kaainjalaa (1 Cor. 5:7). Naaʼinreerü wainma kasa nüpüleerua chi wawala kaainjalashikai süpüla niyaawajaain suulia naainjala. Jülüjasü naaʼin na laülaashiikana eein süpüla niiʼiratüin nukuwaʼipa chi kaainjalashikai. Nashatüin nukuwaʼipa Jehová süka alin maʼin wayuu nüpüla jee nümüliajülin wayuu (Sant. 5:11). Anuu tü nüshajakat chi aluwataaushikai Juan namüin na nuwalayuukana: «Tachonniichein, tashajüin jümüin pütchikat tüü süpüla nnojoliinjanain kaainjalain jia. Eeshi chi akaalinjakai waya, ichaa nia nüʼütpaʼa chi Washikai Maleiwa, nia Jesucristo, loto akuwaʼipachi nia, nükaalinjeechi wanee wayuu eekai kaainjalain jaʼaka» (1 Juan 2:1).
20. ¿Kasa wekirajaainjatka anain sünain tü wane ekirajaayakat?
20 Eere wanee wawala ayoutakai niyaawajaain suulia naainjala, ojuʼitinneechi nia naʼakajee na wawalayuukana. Sülatüle tia, ¿kasa naaʼinrajatka na laülaashiikana? Wekirajaajeerü anain tia sünain tü wane ekirajaayakat.
JAYEECHI 103 Eʼitaaushi nutuma Maleiwa na laülaakana wapüleerua
a Pütchikat tüü, namüinjatü shia na tooloyuukana otta na jieyuukana mayaainjeʼe «wawala kaainjalakai» sümüin.
b «Outkajaashii apünüinshii laülaashii nümaa chi kaainjalashikai süpüla nusoutuin saaʼu naainjala», mapuʼushii waya sümüin tia. Süka nnojoliin outkajaain neʼe na laülaashiikana süpüla natüjaain saaʼu mojule maʼin tü naaʼinrakat chi kaainjalashikai, «aikalaashii na laülaashiikana nümaa chi kaainjalashikai», müshii waya sümüin tia jooluʼu.
c Pütchikat tüü, nümüinjatia shia chi aaʼinmajakai chi jintüikai jee niale wanee nüpüshi epijakai nia.
