1. ¿Kasa nüchekaka Jehová süpüleerua wayuu maʼleekalia?

 NUKUMAJALA waya Jehová süpüla waneeküin wanee kasa süka waaʼin wamüiwaʼa, waaʼinrüin tia soʼukaiwai. Wanee kasa anaʼleeka maʼin süpüla waneeküin shia waapüin waaʼin nümüin Jehová süpüla waʼyataain nümüin jee waʼwaajüin nia namaa na aʼwaajakana nia. Nücheküin Jehová süpüleerua wayuu saaʼinrüin tia. Nücheküin tia süka alin nüpüla wayuu maʼleekalia otta niʼreein anain sukuwaʼipa, aleeweeshi nia namaa otta naapeein namüin kataa oʼu süpüla kaʼikat süpüshuaʼa (Deut. 30:19, 20; Gal. 6:7, 8).

2. ¿Kasa nüchekaka Jehová nüpüleerua wanee wayuu kaainjalakai? (1 Juan 2:1).

² Nnojotsü nüpüleeruain Jehová naaʼin wanee wayuu süpüla nunoujain nünain, nuuʼulaain nüneeküin tü kasa nüchekakat. ¿Kasa naaʼinrajatka na laülaashiikana kaainjarale wanee wawala woutiisakai? Nojuʼitirüinjachi nia naʼakajee na wawalayuukana nnojoire niyaawajaain suulia naainjala (1 Cor. 5:13). Nüchekapejeʼe Jehová nüpüleerua niyaawajaainjachin suulia naainjala jee aleewainjachin nia nümaa nüchikuaʼa. Aapajiraashi nikii chi Nüchonkai Jehová süpüla motuin naaʼin naainjala wanee wayuu kaainjalakai (paashajeʼera 1 Juan 2:1). Aipürai maʼin Jehová, nüküjain nümüin wanee wayuu kaainjalakai niyaawajaainjachin suulia naainjala (Zac. 1:3; Roma 2:4; Sant. 4:8).

3. ¿Kasa wekirajaajeetka anain sünain ekirajaayakat tüü?

³ Nüküjain Jehová tü jülüjakat naaʼin süchiki tü kasa mojusü  naaʼinrakat chi kaainjalashikai otta tü jülüjakat naaʼin nüchiki. Nücheküin wapüleerua Jehová washatüin nukuwaʼipa. Sünain ekirajaayakat tüü, wekirajaajeerü anain tü nümakat Pablo namüin na anoujashii chajanakana Corinto wanaa sümaa kaainjalain wanee anoujashi otta tü nümakat namüin süchikijee niyaawajaain chia wayuukai suulia naainjala. Otta wekirajaajeerü achiki tü jülüjakat naaʼin Jehová nüchiki chi wayuu kaainjalashikai.

NAAʼINRAKA NA ANOUJASHIIKANA KAAINJALAPA WANEE ANOUJASHI

4. ¿Kasa alataka suluʼu tü outkajaaleekat chayaa Corinto? (1 Corinto 5:1, 2).

⁴ (Paashajeʼera 1 Corinto 5:1, 2). Naapüin Pablo süchiki wanee kasa mojushaatasü alataka suluʼu tü outkajaaleekat Corinto. Eeshi wanee wawala aʼluwajiraakai nukuwaʼipa sümaa tü niiyaasükat. Mojusü maʼin tia naashin Pablo, jaʼitakajeʼe namüin na wayuu manoujainsaliikana, mojushaatasü tia. Nnojoliaasü mojuin naaʼinruʼu naya anoujashiikana nooʼulaain eein namaa chi kaainjalashikai. Eesüjaʼa jülüjale naaʼin amüliajüliin maʼin naya maʼaka naaʼin Jehová sükajee naaʼinrüin tia. Nnojotpejeʼe anain nümüin Jehová naaʼinrüle kasa mojusü wanee anoujashi. Sutuma mojuin tü naaʼinrakat chia anoujashikai, mojusü nanüiki na wayuukana nachiki na anoujashiikana. Ayatüle chia kaainjalashikai naʼaka na wawalayuukana, eesüjaʼa nashateerüle nukuwaʼipa. ¿Kasakaʼa aaʼinnajatüin nüka chia wayuukai naashin Pablo?

5. ¿Kasa nüshajaka Pablo namüin na anoujashii chajanakana Corinto otta kasa nüküjeeka sükajee tia? (1 Corinto 5:13; piirakaa sümüin tü ayaakuaakat).

⁵ (Paashajeʼera 1 Corinto 5:13). Nüshajüin Pablo wanee karaloʼuta namüin na anoujashii chajanakana Corinto. Nüküjain namüin tü nnojoluinjatkat naaʼinrüin nujuʼitinnapa chi wayuu macheʼekai süchiirua kaainjalaa. Anuu nünüiki namüin: «Aniisa joo taya ashajüin jümüin süpüla nnojoliinjanain nümaain jia wanee wayuu eekai nunoujashin naashin sümaa nuʼluwajiraain nukuwaʼipa». ¿Kasa amaa nnojoluinjatka naaʼinrüin naya anoujashiikana? Anuu nünüiki Pablo namüin: «Nnojoliireejaʼa jia ekaainjanain nümaa chia wayuukai» (1 Cor. 5:11). Eeshiijaʼa aleeweenale waya nümaa wanee wayuu wekaale nümaa jee yootiraale waya nümaa. Tü nüküjeekalü achiki Pablo shia nnojoliinjanain na anoujashiikana nümaain chi wayuu ojuʼitinnakai. Noonoole sümaa tia pütchikat, nnojoleerü amojujaain nakuwaʼipa nutuma (1 Cor. 5:5-7). Otta eesüjaʼa niyaawateerüle saaʼu chi kaainjalashikai mojuin maʼin tü naaʼinrakat, japüijeechire nia  saaʼujee naainjala jee niyaawajaajeechire suulia naainjala.

6. ¿Kasa naaʼinraka na anoujashii chajanakana Corinto naashajeʼerapa tü nüshajakat Pablo namüin otta kasakaʼa naaʼinrüin chi kaainjalashikai?

⁶ Süchikijee nuluwataain Pablo tü karaloʼutakat namüin na anoujashii chajanakana Corinto, jülüjasü naaʼin noonoole na anoujashiikana sümaa tü nüshajakat. Nüküjaka Tito nümüin Pablo wanee kasa talataka maʼin atuma naaʼin. Naaʼinrüin naya anoujashiikana tü nümakat Pablo, nojuʼitirüin naʼakajee chi kaainjalashikai (2 Cor. 7:6, 7). Maʼaka jeʼra kashi mapa, ayaawajaashi suulia naainjala chi kaainjalashikai, niiʼiratüin nukuwaʼipa otta tü kasa mojusü jülüjakat naaʼin, shiaitpa naaʼinraka tü nüchekakat Jehová (2 Cor. 7:8-11). ¿Kasakaʼa naaʼinrajatüin na anoujashii chajanakana Corinto?

 NÜLEʼEJINNAPA NÜCHIKUAʼA CHI WAYUU AYAAWAJAAKAI SUULIA NAAINJALA

7. ¿Kasa anasü eeka sünainjee nujuʼitinnüin naʼakajee na anoujashiikana chi kaainjalashikai? (2 Corinto 2:5-8).

⁷ (Paashajeʼera 2 Corinto 2:5-8). Anuu nünüiki Pablo namüin na anoujashii chajanakana Corinto: «Süsalaichipa naainjala chia wayuukai jutuma, keraweechi nia maaʼaya». Süchikijee nujuʼitinnüin chi wayuukai naʼakajee na anoujashiikana, ayaawajaashi nia suulia naainjala. Motuinjatü naaʼin na anoujashiikana tia naainjalakat (Heb. 12:11).

8. ¿Kasa naaʼinrajatka na anoujashii chajanakana Corinto naashin Pablo?

⁸ Sünainjee niyaawajaain suulia naainjala chia wayuukai, nüküjain Pablo namüin na laülaashiikana naleʼejirüinjachin nia naʼakamüin na anoujashiikana. Anuujeseʼe nünüiki namüin: «Kamaneeinjana jia sümaa motuin jaaʼin naainjala chia wayuukai, jümülialüinjatü naaʼin». Tü nüküjeekalü achiki Pablo shia alinjachin napüla na anoujashiikana chia wawala aleʼejüshikai nüchikuaʼa jee kamaneeinjanain naya nümüin. Niyaawateetka aaʼu chi anoujashi aleʼejüshikai, talatüin na nuwalayuukana nümaa.

9. ¿Jamüshii eeka na anoujashii kapüleekana amüin motuin naaʼin naainjala chi nawala aleʼejakai nüchikuaʼa?

⁹ Eeshiijaʼa na anoujashii mamaneekana nümüin chi nawala aleʼejüshikai nüchikuaʼa. Eesüjaʼa müle nakuwaʼipa sutuma mojuin pütchi nüchiki Jehová jee nachiki na anoujashiikana sutuma tü naaʼinrakat chia wayuukai jee müsia neʼrüle japülii sünainjee tia. Eeshiijaʼa eere na anoujashii mojukana amüin nüleʼejinnüin nüchikuaʼa chi wawalakai. Eesüjaʼa mojule namüin tia süka noonooin waneepia sümaa nünüiki Jehová (anasü paashajeʼerüle Lucas 15:28-30). ¿Jamüshi alinjachikaʼa napüla na anoujashiikana chi nawala ayaawajaakai suulia naainjala?

10, 11. ¿Kaseerü alataka nnojorüle motuin naaʼin na laülaashiikana naainjala chi wayuu ayaawajaakai suulia naainjala?

¹⁰ ¿Jamüsüjeʼe naaʼin chi wayuu ayaawajaakai suulia naainjala nnojorüle nooʼulaain na laülaashiikana nüleʼejüin nüchikuaʼa naʼakamüin na anoujashiikana? ¿Jamüsüjeʼe naaʼin niʼrüle na nuwalayuukana nnojoluin alin nia napüla? Mojusüjeʼe maʼin naaʼin. Antüsüjeʼe suluʼumüin naaʼin nnojoluin süpüla nüleʼejüin nüchikuaʼa nünainmüin Jehová. Eesüjaʼa jülüjeerüle naaʼin nnojoleerüin motuin naaʼin Jehová tü naainjalakat otta amülain neʼe niiʼiratüin nukuwaʼipa.

¹¹ ¿Kasaje alataka nnojorüle motuin naaʼin na anoujashiikana naainjala chi wayuu ayaawajaakai suulia naainjala? Amojujaasüje nakuwaʼipa nümaa Jehová. Nnojotsüjeʼe nashatüin nukuwaʼipa Jehová, chi motokoi aaʼin saainjala wayuu eekai shiyaawajaain suulia saainjala. Shiajeʼe neʼe nashataka nukuwaʼipa Satanás, chi mojulaashi nnojoikai amülialaain saalin wayuu. Naaʼinrüinje tü naaʼinrakat chi Yolujaakai, namojujain naaʼin chia wayuukai suulia niʼyataain nüchikuaʼa nümüin Jehová (2 Cor. 2:10, 11; Éf. 4:27).

12. ¿Kasa naaʼinrajatka na anoujashii chajanaka Corinto süpüla nashatüin nukuwaʼipa Jehová?

¹² ¿Kasa naaʼinrajatka na anoujashii chajanakana Corinto süpüla nashatüin nukuwaʼipa Jehová suulia nashatüin nukuwaʼipa Satanás? Motuinjatü naaʼin naainjala chi wayuu ayaawajaakai suulia naainjala maʼaka motuin shia naaʼin Jehová. Jülüja waaʼin tü ashajünakat nüchiki Jehová suluʼu tü Bibliakat. Anuu nünüiki David: «Anamia maʼin pia Jehová jee motusü paaʼin naainjala wanee wayuu» (Sal. 86:5). Anuu tü nüshajakat Miqueas: «¿Eeshiche wanee Maleiwa makai aka paaʼin, alatitkai sooʼopünaa naaʼin naainjala na aʼyataashiikana nümüin?» (Miq. 7:18).  Anuuka joo nünüiki Isaías: «Acheküshi nuʼwanajaain nukuwaʼipa chi eekai mojulaain otta nuuyantaain nüchikuaʼa nünainmüin Jehová, amüliajüneechi nia nutuma chi Wamaleiwasekai süka motuin naaʼin saainjala wayuu» (Is. 55:7).

13. ¿Jamüsü anakaʼa naleʼejiramaatüle na laülaashiikana chi wayuu ayaawajaakai suulia naainjala? (Paashajeʼera tü pütchi kanüliakat « ¿Joujachi aleʼejinnüin nüchikuaʼa naʼakamüin na anoujashiikana chi wayuu chejeʼewaikai Corinto?»).

¹³ Süpüla nashatüin nukuwaʼipa Jehová na anoujashii chajanakana Corinto, motuinjatü naaʼin naainjala chi wayuu ayaawajaakai suulia naainjala jee alinjachi nia napüla. Motule naaʼin na anoujashiikana naainjala chi wayuu ayaawajaakai suulia naainjala, jüüjüüshii naya sümüin tü aluwataanakalü anain naashin Pablo (2 Cor. 2:9). Aleʼejamaatüshi chia wayuukai nüchikuaʼa süka niyaawatüin saaʼu mojuin maʼin tü kasa naaʼinrakat. Makalaka naleʼejiramaatüin nia na laülaashiikana.

LOTUSÜ NUTUMA JEHOVÁ SUKUWAʼIPA WANEE KASA JEE AMÜLIALAASÜ NAAʼIN SAALIN WAYUU

14, 15. ¿Kasa watüjaka sünainjee tü alatakat namüin na anoujashii chajanakana Corinto? (2 Pedro 3:9; piirakaa sümüin tü ayaakuaakat).

¹⁴ Tü alatakat namüin na anoujashii chajanakana Corinto, «ashajünüsü süpüla wekirajünüinjanain sünain» (Roma 15:4). Tü watüjakat sünainjee tia shia nnojoluin anain nümüin Jehová naaʼinrüle kasa mojusü wanee anoujashi.  Süka nümüliajülin maʼin Jehová, eeshii na makana nuuʼulaajeechin Jehová ayatüinña naʼakain na wawalayuukana chi wayuu kaainjalashikai mayaainjeʼe nnojolin niyaawajaain suulia. Amüliajüi maʼin Jehová, nnojotpejeʼe aʼwanajaain tü jülüjakat naaʼin süchiki tü kasa anasükat jee tü kasa mojusükat (Jud. 4). Nuuʼulaale chi kaainjalashikai naʼaka na wawalayuukana, amojujaajeerü nakuwaʼipa. Müle sukuwaʼipa nutuma Jehová nnojoishijaʼamata amülialaain nia naalin na wawalayuukana (Prov. 13:20; 1 Cor. 15:33).

¹⁵ Tü nikirajeekalü anain waya Jehová shia nnojoluin anain nümüin outule wanee wayuu sünainjee kaainjalain nia, nuʼtteʼereein na wayuu ayaawajaakana suulia naainjala. Amülialaashi nia naalin na wayuu eeʼiratakana nakuwaʼipa jee aʼyataweekana nümüin nachikuaʼa (Ezeq. 33:11; paashajeʼera 2 Pedro 3:9). Jaʼyasü naaʼu chi wayuu chejeʼewaikai Corinto niyaawajaain suulia naainjala, jama niiʼiratüitpain nukuwaʼipa. Nüküjainjeseʼe Jehová namüin na anoujashii chajanakana Corinto motuinjatüin naaʼin naainjala chia wayuukai, anainjatüin namüin nüleʼejüin nüchikuaʼa otta talatüinjanain naya nümaa.

16. ¿Jamüsü paaʼin sutuma pütüjaaitpain saaʼu tü naaʼinrakat Jehová nüpüleerua chi anoujashi chejeʼewaikai Corinto ayaawajaakai suulia naainjala?

¹⁶ Sükajee tü wekirajaaitpakalü anain süchiki tü alatakat namüin na anoujashii chajanakana Corinto, wayaawata aaʼu aipüralin maʼin Jehová, lotuin nutuma sukuwaʼipa wanee kasa otta anamiain nia (Sal. 33:5). Waʼwaajüin Jehová süka anain maʼin nukuwaʼipa. Motusü naaʼin waainjala mayaainjeʼe waleʼeruʼuin tü kaainjalakat, talatüsü waaʼin nümaa sükajee tia. Waapüin analuʼutkat nümüin Jehová süka naapüin nikii chi Nüchonkai süpüla outuin nia saaʼu waainjala. Atütülaasü waaʼin süka alin maʼin waya nüpüla Jehová otta niʼreein anain wakuwaʼipa.

17. ¿Kasa wekirajaajeetka anain sünain tü wane ekirajaayakat?

¹⁷ Kaainjarale wanee wawala maaʼulu yaa, ¿kasa naaʼinrajatka na laülaashiikana niyaawajaale suulia naainjala? ¿Kasa naaʼinrajatka na wawalayuukana nujuʼitinnüle wanee wawala natuma na laülaashiikana? ¿Kasa naaʼinrajatka na wawalayuukana nüleʼejinnüle mapa nüchikuaʼa? Wekirajaajeerü anain tia sünain tü wane ekirajaayakat.