1, 2. (1) ¿Kasa kaainjalaka atuma wanee wayuu otta eeshiche süpüla taashin nia suulia naainjala? (Paashajeʼera tü nootakat). (2) ¿Kasa wekirajaajeetka anain sünain ekirajaayakat tüü otta suluʼu waneirua ekirajaaya ashajünakat sünain rewiisütakat tüü? (Paashajeʼera sünain rewiisütakat tüü tü pütchikat «Jiakana aashajeʼerakana rewiisütakat tüü»).

 ¿PÜTÜJAWEE AAʼU aire maʼin pia nüpüla Jehová? Pikirajaa süchiki tü kasa naaʼinrakat süpüla nuʼtteʼerüin pia suulia kaainjalaa jee suulia outaa. Müsü aka saaʼin waʼünüü tü kaainjalakat, a nnojoishi jaralin isain suulia. Süka nnojoluin lotuin maʼin wakuwaʼipa, kaainjalashii waya wapüshuaʼa jee outushii waya (Roma 5:12). Nükaalinjeenapejeʼe waya Jehová süpüla taashin waya suulia waainjala.

² Alatüirü maʼaka 6.000 juya nükaalinjain Jehová na wayuukana süpüla aleewain naya nümaa mayaainjeʼe nnojoluin lotuin maʼin nakuwaʼipa. Naaʼinrüin tia süka alin maʼin naya nüpüla. Nütüja aaʼu outuin wayuu sutuma kaainjalaa, nnojotpejeʼe nücheküin tia wapüleerua shia nüchekaka katüinjatüin woʼu süpüla kaʼikat süpüshuaʼa (Roma 6:23). Shia nüchekakaʼaya Jehová püpüleerua tia. Sünain ekirajaayakat tüü, wekirajaajeerü anain apünüinsü kasa: ¿Kasa naaʼinraka Jehová süpüla taashin wayuu nutuma suulia kaainjalaa? ¿Kasa naaʼinrapuʼuka na wayuu namaiwajanakana süpüla talatüin Jehová natuma? ¿Kasa naaʼinraka Jesús süpüla nuʼtteʼerüin wayuu suulia kaainjalaa jee outaa?

 NAAʼINRAKA JEHOVÁ SÜPÜLEERÜA WAYUU

3. ¿Jamakuwaʼipalii süpüla kaainjalain Adán sümaa Eva?

³ Soʼu nukumajüin Jehová Adán sümaa Eva nukumajüin naya süpüla anain nakuwaʼipa, niʼitaain naya suluʼu wanee mma anasü, naapüin Eva nümüin Adán süpüla nuʼwayuuseinjatüin shia, wainmainjana nachonnii otta paʼaraiisüinjatü tü mmakat natuma maʼaka saaʼin tü mmakat Edén. Waneesia neʼe tü kasa nüpülajakat noulia. Outajana naya nnojoliire noonooin sümaa nünüiki Maleiwa. Eeshi wanee aapiee mojulaashi, nnojoishi alin naya nüpüla otta nnojoishi alin Jehová nüpüla. Nuuʼulakaka naaʼin Adán sümaa Eva süpüla kaainjalain naya, nnojoliipejeʼe naya oonooin sümaa nünüiki Jehová. Shia naaʼinraka neʼe tü nümakat chi aapiee mojulaashikai. Alatüsü namüin tü nümakat Jehová, laülaashii naya jee outushii naya (Gén. 1:28, 29; 2:8, 9, 16-18; 3:1-6, 17-19, 24; 5:5).

4. ¿Jamüsü mojukaʼa maʼin nümüin Jehová tü kaainjalakat otta kasa naaʼinraka süpüla nükaalinjain waya? (Roma 8:20, 21).

⁴ Mayaainjeʼe mojuin maʼin tia alatakat, nüshajirüin shia Jehová suluʼu tü Bibliakat süpüla wayaawatüin saaʼu mojuin maʼin nümüin tü kaainjalakat. Akayalaashi wanee wayuu nuulia Jehová kaainjarale nia jee outeechi nia sünainjee tia (Is. 59:2). Aʼürülaanüshi Jehová nutuma Satanás otta nüʼürülaain na wayuukana. Nuuʼulaküinjeseʼe naaʼin Adán sümaa Eva süpüla nnojoliin noonooin nümaa Jehová. Naaʼinrüinña tia waka wayakana. Akanajayaashi nia naaʼinruʼu süka tü naaʼinrakat chaʼayaa Edén. Nnojotpejeʼe niyaawatüin saaʼu alin maʼin nüpüla Jehová na wayuukana. Nnojotsü nuʼwanajaain Jehová tü nüchekakat napüleerua na nüikeyuukana Adán sümaa Eva. Aishii maʼin naya nüpüla, müsüjeseʼe nukumajamaatüin sukuwaʼipa süpüla taashin naya nutuma suulia kaainjalaa (paashajeʼera Roma 8:20, 21). Nütüjaa aaʼu eejeenain wayuu aikana apüla nia otta oonookana sümaa nünüiki. Nukumajüin sukuwaʼipa süpüla aleewain wayuu nümaa, süpüla taashin wayuu suulia kaainjalaa jee outaa, jama niain kakumalain tü kasakat süpüshuaʼa. ¿Kasa naaʼinraka süpüla tia?

5. ¿Kasa naaʼinraka Jehová süpüleerua wayuu? (Génesis 3:15).

⁵ (Paashajeʼera Génesis 3:15, TNM). Tü palajatkat kasa naaʼinrakat Jehová shia nüküjain tü naaʼinrajatkat nüka Satanás, ajaʼttinnajachi Satanás nutuma suuʼuliwoʼu tü jietkat otta nunouteʼerüinjatü süpüshuaʼa tü kasa mojusü eekat sutuma kaainjalain Adán sümaa Eva (1 Juan 3:8). Müliainjachipejeʼe suuʼuliwoʼu tü jietkat nutuma Satanás, outajachi nia nutuma. Mayaainjeʼe mojuin maʼin naaʼin Jehová sünainjee tia, nuuʼulaain sülatüin süpüla katüin soʼu wainma wayuu jee sülaʼajaanüin noulia naainjala otta süpüla nnojoliinjanain outuin naya.

ALEEWASÜ WAYUU NÜMAA JEHOVÁ SÜMAIWA MAYAAINJEʼE SÜLEʼERUʼUIN KAAINJALAA

6. ¿Kasa naaʼinraka Abel nümaa Noé süpüla aleewain naya nümaa Jehová?

⁶ Nüpansaajüin Jehová shiʼipaʼaya eein süpüla aleewain wayuu nümaa mayaainjeʼe süleʼeruʼuin kaainjalaa. Kakalia mapa süchikijee niʼrüijaain wayumüin Adán sümaa Eva, eeshi wanee wayuu kanoulakai maʼin nünain Jehová, nachon nia, Abel nünülia. Aishi maʼin Jehová nüpüla, anasü nümüin talatüin nia nutuma otta aleewain nia nümaa. Nüsülajaka nümüin Jehová maʼaka jeʼrasü aneetchein, jama nürüleejülin. ¿Talatüshiche Jehová sümaa tia? Talatüsü naaʼin Jehová nümaa Abel sümaʼaleeya tü kasa nüsülajakat nümüin (Gén. 4:4). Talatüsia naaʼin Jehová mapa sümaa tü nasülajakat na wayuu aikana apüla  nia maʼaka naaʼin Noé (Gén. 8:20, 21). Wayaawata aaʼu sünainjee tia eein süpüla talatüin naaʼin Jehová natuma na wayuukana otta aleewain naya nümaa mayaainjeʼe naleʼeruʼuin kaainjalaa. b

7. ¿Kasa watüjaka sünainjee tü kasa naaʼinrüinjatiaakat Abrahán?

⁷ Eejachi wanee wayuu kanoulakai maʼin nünain Jehová, Abrahán nünülia. Nuchuntuin Jehová nümüin nuʼutuinjachin naaʼin Isaac, chi nüchonkai. Mojukajasaʼa maʼin naaʼin Abrahán sutuma tia. Oonoopejeʼe nia sümaa nünüiki Jehová, nuʼutajachiaa aaʼin chi nüchonkai. Nüküjapejeʼe Jehová nümüin Abrahán nnojoluinjatüin naaʼinrüin tia. Eesü wanee kasa watüjaka sünainjee tü kasa naaʼinrüinjatiaakat Abrahán: alin maʼin nüpüla Jehová wayuu maʼleekalia otta nücheküin süchiki naapajiraainjachin nikii chi Nüchonkai saaʼu saainjala wayuu (Gén. 22:1-18).

8. ¿Kasa kayaawaseka tü naaʼinrapuʼukat na israelitakana wanaa sümaa noʼutuin jee naʼajüin mürüt nümüin Jehová? (Levítico 4:27-29; 17:11).

⁸ Nüküjain Jehová mapa namüin na israelitakana noʼutuinjatüin saaʼin mürüt nümüin jee naʼajüinjatüin shia süpüla sülaʼajaanüin noulia naainjala (paashajeʼera Levítico 4:27-29; 17:11). Tü mürüt noʼutapuʼukalü aaʼin saaʼu naainjala, shiyaawasesü tü naaʼinrajatkat Jehová mapa süpüla nuʼtteʼerüin wayuu maʼleekalia suulia saainjala. Nüküjain Jehová namüin na nünüikimaajanakana naküjainjatüin jaralin chi suuʼuliwoʼukai tü jietkat, nia chi Nüchonkai Maleiwa, müliainjachi nia jee outuinjachi nia. Niyaawasesü tü anneerü oʼutunapuʼukat aaʼin jee aapünapuʼukat nümüin Jehová (Is. 53:1-12). Jülüja paaʼin tüü: naapüinjatü Jehová nikii chi Nüchonkai süpüla outajachin nia saaʼu saainjala wayuu maʼleekalia jee süpüla nuʼuteerüin shia suulia kaainjalaa jee outaa. Aapajiraashia nikii Jesús saaʼu paainjala.

NAAʼINRAKA JESÚS SÜPÜLA TAASHIN WAYUU SUULIA KAAINJALAA

9. ¿Kasa nüküjaka Juan, chi Awoutisaajüikai nüchiki Jesús? (Hebreokana 9:22; 10:1-4, 12).

⁹ Anuu nünüiki Juan chi Awoutisaajüikai soʼu niʼrüin nüntüin Jesús chi Nazaretjeʼewaikai: «Jiirakaa nümüin chi Anneetchon nümaʼanajeejachikai Maleiwa, nia alaʼajaaka saainjala wayuu suulia». Alatüsü tia soʼu tü juyakat 29 (Juan 1:29). Nüküjain Juan niain Jesús chi suuʼuliwoʼukai tü jietkat. Nia Jesús chi aapajiraainjachikai nikii saaʼu saainjala wayuu. Ekeraajüsü tü nümakat Jehová, taashinjatüin wayuu maʼleekalia nutuma Jesús suulia kaainjalaa jee outaa (paashajeʼera Hebreokana 9:22; 10:1-4, 12).

10. ¿Jamüshi nümakaʼa Jesús nüntüshin süpüla nikirajüin na kaainjaraliikana?

¹⁰ Amülialaasü naaʼin Jesús naalin na wayuu mojukana aaʼin sutuma kaainjalaa, nuunejaain naya süpüla nümaatalain naya. Niyaawata aaʼu Jesús müliain maʼin saaʼin wayuu maʼleekalia sutuma tü kaainjalakat. Arütkaashijeseʼe nia sünainmüin wayuu eʼnnaajünaka suluʼu kaainjaralüin. Anuu nünüiki: «Nnojotsü choʼujaain niʼrajeʼerüin wanee wayuu anale nia. Akaajasaʼa ayuuire nia, oʼunushi nümaʼanamüin wanee tottoot. [...] Jee müshia taya nnojoishi antüshin süpüla ekirajaa na lotokana akuwaʼipa, naya tekirajüinjanaka na kaainjaraliikana» (Mat. 9:12, 13). Naaʼinrüin Jesús tia nümakat. Soʼu wanee kaʼi arütkaasü wanee wayuu nünainmüin, suʼlojoko nuuʼui süka suʼwüira. Sümülialaaka naaʼin Jesús saalin tia wayuukot, nülatiraka  sooʼopünaa naaʼin saainjala (Luc. 7:37-50). Eetaasü wane wayuu chejeʼewat Samaria, nikirajüin shia Jesús nüchiki Maleiwa mayaainjeʼe nütüjaain saaʼu kaainjaralüin shia (Juan 4:7, 17-19, 25, 26). Naapüin Jehová tü nüpülainkat nümüin Jesús süpüla nüsoʼireʼerüin saaʼin wayuu tooloyuu, jieyuu otta tepichi. Niyamülüin tü outaakat sükajee tia (Mat. 11:5).

11. ¿Jamüsü nnojotkaʼa mmoluin naaʼin na wayuu kaainjaraliikana soʼu narütkaain nünainmüin Jesús?

¹¹ Arütkaashii nünainmüin Jesús na wayuu kaainjaraliikana. Naaʼinrüin tia süka sümülialaain naaʼin naalin otta kojutuin naya nümüin (Luc. 15:1, 2). Atütüleʼennüsü naaʼin nutuma Jesús otta aaʼinrüshi nia kasa napüleerua süka kanoulain naya nünain (Luc. 19:1-10). Sükajee tü nümakat Jesús otta tü kasa naaʼinrakat, wayaawata aaʼu alin waya nüpüla chi Washikai Jehová otta nümüliajülin wayuu (Juan 14:9). Nükaalinjeein waya süpüla taashin waya suulia waainjala. Nikirajüin Jesús na kaainjaraliikana süpüla nanouteʼerüin nakuwaʼipa otta süpüla nümaatalain naya (Luc. 5:27, 28).

12. ¿Kasa nüküjaka Jesús süchiki outajachin nia?

¹² Nütüjaa aaʼu Jesús tü alatajatkat nümüin. Nüküjain namüin na nikirajüinkana saapünajatüin nikii süpüla outaa otta nükachennajachin sünain wanee wunuʼu (Mat. 17:22; 20:18, 19). Nütüjaa aaʼu naapajiraainjachin nikii saaʼu saainjala wayuu maʼleekalia maʼaka nüküjatüjülin shia Juan otta na nünüikimaajanakana Maleiwa. Nikirajüinña Jesús sürütkaainjatüin wayuu nünainmüin süchikijee  outuin nia (Juan 12:32). Talatüshi Jehová natuma na wayuu anoujakana nünain Jesús, na oushikajaakana süchiirua nukuwaʼipa, taashishii naya nutuma Jehová suulia naainjala (Roma 6:14, 18, 22; Juan 8:32). Yalayala aaʼinchi Jesús, aapajiraashi nia nikii saaʼu saainjala wayuu mayaainjeʼe nütüjain saaʼu müliainjachin maʼin nia (Juan 10:17, 18).

13. (1) ¿Kasa aaʼinnaka nümüin Jesús süpülapünaa nuʼutunüin aaʼin? (2) ¿Jamüsü nuuʼulaakaʼa Jehová nuʼutunuin aaʼin Jesús? (Piirakaa sümüin tü ayaakuaakat).

¹³ Aapüna ekiichi Jesús, ataʼünüshi nia, airuʼutsü pütchi nümüin, aküjünüsü alawaa nüchiki, oʼutunajachi aaʼin nia otta müliashi maʼin nia atumawaa, akachennüshi nia jee achitünüshi nia sünain wanee wunuʼu natuma na surulaatkana. Mayaainjeʼe müliain maʼin naaʼin Jesús, waneepiashi nia nümaa Jehová. Mojusü maʼin naaʼin Jehová sutuma tü alatakat nümüin chi Nüchonkai. Nuuʼulaapejeʼe sülatüin tia mayaainjeʼe alin maʼin nia nüpüla jee eein süpüla nüshaʼwaleʼerüin shia nuulia. ¿Jamüsü naaʼinrakaʼa tia? Anuu nünüiki Jesús: «Aisü maʼin wayuu nüpüla Maleiwa, naapüinjeseʼe nikii chi waneeshikai Nüchon süpüla nnojoliinjanain amüloulin na wayuu anoujakana nünain. Neʼreenaka suluʼujee tia kataa oʼuu süpüla kaʼikat süpüshuaʼa» (Juan 3:16).

14. ¿Kasa wayaawataka sünainjee tü alatakat nümüin Jesús?

¹⁴ Sünainjee naapajiraain nikii Jesús saaʼu saainjala wayuu, wayaawata aaʼu alin maʼin nüpüla Jehová napüshuaʼa na nüikeyuukana Adán sümaa Eva. Nuuʼulaain müliain jee outuin chi Nüchonkai süpüla nuʼtteʼerüin pia suulia kaainjalaa jee outaa, miyoʼu maʼin paalin nüpüla (1 Juan 4:9, 10). Nükaalinjeein waya wapüshuaʼa süpüla aleewain waya nümaa mayaainjeʼe waleʼeruʼuin kaainjalaa. Taasheeshii waya nutuma suulia kaainjalaa.

15. ¿Kasa waaʼinrajatka süpüla anain wakuwaʼipa sünainjee naapajiraain nikii Jesús?

¹⁵ Nuuʼulaain Jehová naapajiraain nikii chi Nüchonkai süpüla sülaʼajaanüin waainjala woulia. Eepejeʼe tü kasa waaʼinrüinjatkat. Anuu tü nümakat Juan, chi Awoutisaajüikai otta tü nümakat Jesús: «Anashii jiyaawajaale suulia jaainjala süka sülüʼülüin nükalia Maleiwa süpüla aluwatawaa chejee iipünaajee» (Mat. 3:1, 2; 4:17). Aleeweere waya nümaa Maleiwa ayaawajaainjana waya suulia waainjala. ¿Kasa naaʼinraka wanee wayuu niyaawajaale suulia naainjala? ¿Jamüsü waaʼinrajatkaʼa tia süpüla talatüin Jehová wamaa? Wekirajaajeerü anain tia sünain tü wane ekirajaayakat.