«Eere wanee wayuu jaʼaka nnojoikai oonooin sümaa tü pütchi ashajünakat suluʼu karaloʼutakat tüü, eeja maʼin jaaʼin nuulia», müshi Pablo namüin na anoujashii chajanakana Tesalónica (2 Tes. 3:14). Waküjapuʼuin paala namüinjatü tia pütchikat na laülaashiikana. Eere wanee wawala nnojoikai oonooin sümaa wanee pütchi suluʼuka tü Bibliakat jee achiaanakai kojuyatua natuma na laülaashiikana, aküjünapuʼusü wanee pütchi namüin na wawalayuukana suluʼu tü outkajaaleekat. Nnojoliinjanaka jutkatiraain na anoujashiikana sünain aaʼinraa waneirua kasa jee sünain ashaitajawaa nümaa chia anoujashikai.

Choʼujaapejeʼe wapansaajüin wanee kasa. Eere wanee wawala nnojoikai oonooin sümaa wanee pütchi suluʼuka tü Bibliakat jee achiaanakai kojuyatua natuma na laülaashiikana, nnojotsü choʼujaain naküjain na laülaashiikana wanee pütchi namüin na wawalayuukana suluʼu tü outkajaaleekat süpüla eejüinjatüin naaʼin nuulia chia anoujashikai. Naya aneeküinjanakana na anoujashiikana waneʼewai nakua tü naaʼinrajatkat eere wanee anoujashi makai akuwaʼipa. ¿Jamüsü wapansaajakaʼa tü wayaawatakat sünainjee 2 Tesalónica 3:14? Wekirajaa sünain tü naashajaakalü achiki Pablo süpülapünaa nüküjain tia pütchikat.

Niʼrüin Pablo eein waneinnua anoujashii macheʼeyaakana suulia tü pütchi ashajünakat. Anuujeseʼe nünüiki namüin soʼu nülapalaainkain naaʼu: «Chi wayuu nnojoikai aʼyataweein, anashijaʼamata nnojoire niküin». Eeshii waneinnua anoujashii nnojoliikana aʼyataweein mayaainjeʼe eein süpüla naʼyataain jee müsia ekerotushii naya sünainpünaa sukuwaʼipa wayuu. ¿Kasakaʼa naaʼinrüin Pablo süpüla nüchiaain naya anoujashii nnojoliikana oonooin sümaa tü pütchi ashajünakat? (2 Tes. 3:6, 10-12).

Anuu nünüiki Pablo nüchiki chi wayuu nnojoikai oonooin sümaa tü pütchi ashajünakat: «Eeja maʼin jaaʼin nuulia». Tü nüküjeekalü achiki Pablo suluʼu griego, shia nütüjaanajachin aaʼu jaralin chi wayuu macheʼeyaakai suulia tü pütchi ashajünakat otta eejüinjatüin naaʼin na anoujashiikana suulia sumojujaain nakuwaʼipa nutuma. Nnojoishii nayain neʼe na laülaashiikana aküjünakana amüin tia pütchikat nutuma Pablo. Nüküjainña shia namüin napüshuaʼa na wawalayuukana (2 Tes. 1:1; 3:6).

¿Müinjaiche chia wayuukai namüin na wane anoujashiikana maʼaka naaʼin wanee anoujashi ojuʼitinnakai naʼakajee na anoujashiikana? Nnojo. Anuu tü nümakat Pablo: «Ayataʼaya jüchiaain nia maʼaka jüchiaain wanee juwala». Eeinjachi nia namaa na wane anoujashiikana sünain tü outkajawaakat otta sünain aküjaa pütchi. Nnojolinjachipejeʼe nia namaain jutkatiraapa naya sünain aaʼinraa waneirua kasa jee shiale sünain wanee ashaitajawaa. ¿Jamüsü naaʼinrajatkaʼa tia? Anuu nünüiki Pablo: «Süpüla niʼrüinjachin japülii». Niʼrüle japülii chi wayuu macheʼeyaakai suulia tü pütchi sümakat tü Bibliakat, eesüjaʼa niiʼirateerüle nukuwaʼipa suluʼujee tia (2 Tes. 3:14, 15).

¿Kasa waaʼinrajatka maaʼulu süpüla woonooin sümaa tü nümakat Pablo? Wayaawatüinjatü maʼin saaʼu müleka shiimainreje maʼlaüleʼerüin naaʼin sünain anoujaa chia wawalakai. Nnojoishi aashajaain Pablo nüchiki chi wayuu achekakai kasa naata suulia tü wachekakat, tü kasa mojukat saaʼin wamüin otta nnojoishi nia aashajaain nüchiki chi wayuu aaʼinrakai wanee kasa mojuka atuma waaʼin. Nia naashajaaka achiki chi wayuu macheʼeyaakai suulia tü sümakat tü Bibliakat.

Weʼrüle maaʼulu wanee wawala macheʼeyaakai suulia tü sümakat tü Bibliakat, a waneeküinjatü waneʼewai wakua nnojoliinjanale waya jutkatiraain nümaa sünain aaʼinraa waneirua kasa jee shiale sünain ashaitajawaa. Süka wayainjanain aneekaka tia süka waaʼin wamüiwaʼa, nnojoleerü waküjakuʼu wamüin süchiki namüin na waneinnua, aluʼujasaʼa namüin na wapüshi kepiajiraakana wamaa. Ayateenapejeʼe waya nümaain sünain tü outkajawaakat otta sünain aküjaa pütchi. Wamaajeechi nia sünain aaʼinraa waneirua kasa jee sünain wanee ashaitajawaa niiʼirataleepa nukuwaʼipa.