Kanoulainjana waya süpüla talatüin Jehová wamaa. Anuu nünüiki Pablo: «Ayataʼaya juʼuraajüin wapüleerua süpüla nnojoliinjanain jamajüin waya sutuma wayuu eekai mojulaain jee eʼrülin wayumüin, jama nnojoluin sunoujayaa sümüin wayuu süpüshuaʼa» (2 Tes. 3:2). Aashajaashi Pablo nachiki na wayuu mojulaashiikana nümüin. Akatsaʼa tü nümakat sünain «nnojoluin sunoujayaa sümüin wayuu süpüshuaʼa» sünainpünaasü nakuwaʼipa na manoujainkana nünain chi Maleiwa kakumalakai kasa süpüshuaʼa (Roma 1:20). Eeshii na anoujakana sünain kasa pülasü. Nnojoipejeʼe talatüin Jehová namaa.

Süpüla talatüin Maleiwa wamaa wanoujainjatü anain shiimain eein nia otta naapüin kasa anasü namüin na kanoulakana nünain (Heb. 11:6). Chi wayuu eekai aaʼu nüpülain Maleiwa kanoulashi nia. Süpüla eeinjatüin waaʼu tü nüpülainkat Maleiwa wachuntuinjatü shia nümüin (Luc. 11:9, 10, 13). Otta waashajeʼerüinjatü tü Nünüikikat, jülüjainjatü waaʼin tü sümakat jee waaʼinrajatü tü wekirajaakalü anain suluʼujee. Waaʼinrüle tia nükaalinjeena waya Jehová sükajee tü nüpülainkat süpüla kanoulain maʼin waya nünain.