KATCHINSÜ waaʼin sutuma tü wanoulakat. Numojujeʼereein Satanaa wakuwaʼipa nümaa Jeʼwaa. Tü wanoulakat müsü «aka wane taapüla najapuluʼukat wane surulaat suulia sülanüin najatü na nüʼünüükana nünainmüin» (Éf. 6:16). Kanourale waya wounteerü walatüin süchikumüin tü kasa alatakat wamüin, tü makalü aka saaʼin uuchi. Müshi Jesuu namüin na nikirajüinkana: «Müleka jünoujüle tanain, jaʼitairü nnojolüin katsüin jooluʼu tü jünoulakat, jaaʼinreerü tü kasa isakat süchiki wayuu. Maa aka jümataarüle paala sümüin wane uuchi, ‹Anakaja puʼunüle yaajee kaʼyatamüin›, sünoujeerü jünüiki» (Mat. 17:20). Watüjaa aaʼu aleewain maʼin waya nümaa Jeʼwaa kanourale maʼin waya, müsüjeseʼe wasakireʼereein suluʼu waaʼin sünain tüü: ¿Kasa waaʼinraka kanourale waya? ¿Jamüsü kojutuinjatka wamüin kanoulaa? ¿Kasa waaʼinrüinjatka süpüla wakatchinrüin wanoula? ¿Jarai wanoujainjachikai anain? (Roma 4:3).

Nnojoishii kanoulain neʼe waya sünainjee watüjaain saaʼu shiimain tü sümakat tü Wiwüliakat. Jaʼitakajeʼe neʼe tü yolujaakalüirua sunouja anainrü eein chi Maleiwakai otta mmotsü shiairua neema (Sant. 2:19). ¿Kasakaʼa waaʼinrüin kanourale waya?

Süküjain tü Wiwüliakat süchiki piamasü kasa waaʼinraka kanourale waya. Tü palajatkat shia «shiimainre wamüin shikeraajeerüin tü kasa waʼatapajakat» (Heb. 11:1₁, TNM). Kanourale waya wanoujeerü sünain shiimain tü nümakat Jeʼwaa jee shikeraajeerüin süpüshuaʼaleʼeya tü nümakat. Anuu tü nümakat Jeʼwaa namüin na israeliitakana: «Müleka juuntülejeʼe süpüla meweetüin chi kaʼikai jutuma otta nnojolin chi kashikai, eesüjaʼa mata süpüla jümalajeʼerüin tü pütchi tapansaajakat nümüin David chi aʼyataaikai tamüin» (Jer. 33:20, 21). Watüjaale saaʼu niweeteechin chi Kaʼikai jee chi Kashikai, nnojoleerü wainmajüin waaʼin saaʼu shikeraajeerüin süpüshuaʼa tü nümakat Maleiwa, jama niain kakumalain chi Kaʼikai nümaa chi Kashikai (Is. 55:10, 11; Mat. 5:18).

Tü piamakat shia «shiimainre wamüin wanee kasa mayaainjeʼe nnojoluin weʼrüin shia» (Heb. 11:1₂, TNM). Jülüjataa waaʼin nüsakirüle waya wanee jintüi süchiki tü joutaikat. Mayaainjeʼe nnojoluin weʼrüin tü joutaikat, mapüleesat wamüin waküjain nümüin jamüin watüjaaka saaʼu eein shia. Eesü süpüla wamüin nümüin waapüin shiiʼira tü joutaikat otta weʼrüin tü süpanakat wunuʼu yuunatüin sutuma jee waküjain nümüin süchiki waneirua kasa wayaawataka anainjee eein tü joutaikat. Sünainjee tia, niyaawateerü aaʼu eein tü joutaikat. Müsia neʼe sukuwaʼipa tü wanoulakat, mayaainjeʼe nnojoluin weʼrüin tü wanoujakalü anain wayaawata aaʼu shiimain shia (Roma 1:20).

Süpüla kanoulainjanain waya, watüjaainjatü saaʼu tü nümakat Maleiwa (1 Tim. 2:4). Nnojotpejeʼe watüjaainjatüin neʼe saaʼu tia. Naashin chi aluwataaushikai Pablo, anoujainjachi wanee wayuu süka süpüshuaʼa naaʼin (Roma 10:10). Nnojotsü wanoujainjatüin neʼe sünain shiimain tü nümakat Jeʼwaa, kojutuinjatü shia wamüin. Müle sukuwaʼipa watuma, waaʼinreerü waneepia tü anakat nümüin (Sant. 2:20, 21). Chi wayuu mojutkai amüin tü nümakat Jeʼwaa, niyouta achikit tü aküjünakat nümüin nüchiki Maleiwa, icheshi nia süchiirua tü anakat saaʼin nümüin jee naaʼinreein neʼe tü suchuntaakat  naaʼin (2 Ped. 3:3, 4; Jud. 18). Mayaainjeʼe neʼrüin tü kasa pülasü naaʼinrakat Maleiwa na wayuu namaiwajanakana, ayatshiijaʼa manoulain naya (Núm. 14:11; Juan 12:37). Kojutule nümüin wanee wayuu tü nümakat Maleiwa jee niyoutule tü alawaakat, kanoulashi nia nutuma chi naaʼinkai Maleiwa (Gal. 5:22; 2 Tes. 2:10, 11).

Noʼutku na wayuu katchinkana maʼin anoula sümaiwa paala, nia chi aluwataaikai David (Heb. 11:32, 33). Nnojotpejeʼe katchin maʼin nanoula na nüpüshikana. Jamüshijaʼa Eliab, chi nuwala miyoʼushikai, nnojotsü niʼitaain naaʼin sünain eein süpüla nuʼtteʼerüin naya Jeʼwaa, müshijeseʼe naashichijaain nooʼomüin David sünainjee nüsakirüin na wayuukana süchiki tü nümakat Goliat (1 Sam. 17:26-28). Nnojoishi joʼuujiraain wanee wayuu sümaa kanoulaa jee nnojoishi kanoulain nia nünainjee nüshi jee nii. Kanoulashi David sünainjee aleewain nia nümaa Maleiwa.

Suluʼu Salmo 27, nüküja achikit David tü naaʼinrakat süpüla nükatchinrüin nunoula (wetsiikulokot 1). Jülüjasü naaʼin David tü alatakat nümüin paalainka jee jülüjasü naaʼin tü kasa naaʼinrakat Jeʼwaa namüin na nüʼünüükana (wetsiikulokot 2 otta 3). Kojutusü maʼin nümüin David tü piichi aʼwaajüleekat (wetsiikulokot 4). Antawaishi nia yalamüin sünain aʼwaajaa Jeʼwaa namaa waneinnua israeliita (wetsiikulokot 6). Achuntushi nia waneepia nümüin Jeʼwaa süpüla nuʼunirüin nukuwaʼipa (wetsiikulokot 7 otta 8). Kapülasü naaʼin niainjachin Jeʼwaa oʼunirüin nukuwaʼipa (wetsiikulokot 11). Kojutushaatasü nümüin David tü anoujaakat. Nüsakirüinjeseʼe suluʼu naaʼin süchiki jamüinjeʼe nukuwaʼipa nnojorüle nunoujain nünain Jeʼwaa (wetsiikulokot 13).

Katchinjeerü wanoula maʼaka naaʼin David wanaawale waaʼin nümaa otta waaʼinrüle tü nüküjakat achiki suluʼu Salmo 27. Kanouleena waya wayaawatüle saaʼu tü nümakat Maleiwa. Wekirajaale maʼin sünain tü Wiwüliakat jee tü karaloʼuta weitajakat, kanouleena maʼin waya (Sal. 1:2, 3). Wekirajaapa sünain tü Wiwüliakat, wasakireʼera suluʼu waaʼin sünain tü sümakat. Müle shia watuma, kojuteerü maʼin wamüin tü naaʼinrakat Jeʼwaa wapüleerua otta keeʼireejeerü waaʼin waʼwaajüin nia sünain tü outkajawaakat jee waküjain sümüin wayuu süchiki tü kasa anasü weʼreetkat nutuma (Heb. 10:23-25). Weeʼiyateerü kanoulain waya wachuntule waneepia nümüin Jeʼwaa otta nnojorüle yüülain waaʼin (Luc. 18:1-8). Wachunta waneepia nümüin Jeʼwaa süka watüjaain saaʼu naaʼinmajüin waya (1 Tes. 5:17; 1 Ped. 5:7). Waaʼinrüin tü kasa anasükat kanourale waya, müle shia watuma wakatchinreerü wanoula (Sant. 2:22).

Anuu tü nümakat Jesuu namüin na nikirajüinkana wanee ai süpülapünaa outuin nia: «Anakaja ayatüle jia sünain jünoujain nünain Maleiwa maaʼaya aka  tanaʼinya» (Juan 14:1). Nnojoishi niainjachin wanoujain anain Jeʼwaa nümüiwaʼa, wanoujainjachi anain Jesuu. ¿Kasa waaʼinrajatka süpüla wanoujain nünain Jesuu? Wekirajaa sünain apünüinsü kasa waaʼinrajatka.

Tü palajatkat shia kojutuinjatüin wamüin tü naaʼinrakat Jeʼwaa wapüleerua waneʼewai wakua, naapüin nikii chi Nüchonkai waaʼu. Müshi Pablo süchiki tia: «Je süpüshua tü taaʼinrakat, taaʼinrüin sükajee tanoujain nünain Cristo, chi Nüchonkai Maleiwa, chi aikai apüla taya sümaa naapajiraain nikii süpüla ouktüin taaʼujee» (Gal. 2:20). Wanoujale nünain Jesuu, kojuteerü wamüin naapajiraain nikii waaʼu. Sünainjee tia, nülaʼajaajeerü Jeʼwaa waainjala, kateerü woʼu waneepia otta weʼrüin waalin nüpüla Jeʼwaa (Roma 8:32, 38, 39; Éf. 1:7). Wanoujale sünain naapajiraain nikii Jesuu waaʼu, nnojoleerü sotokuʼu müin waaʼin tü kasa mojusü waaʼinrapuʼukat (2 Tes. 2:16, 17).

Tü piamakat shia wachuntuin kaalinwaa nümüin Jeʼwaa saaʼujee naapajiraain nikii Jesuu. Sükajee tia «anakaja müleka warütkaale nünainmüin chi Maleiwakai süpüla nükaaliijüinjanain waya. Nnojo kaaʼin waya neema, süka nümüliajeein waya. Je sünainjee naʼanasia, nükaaliijeena waya soʼu tü kaʼi wachuntakat oʼu nümüin» (Heb. 4:15, 16; 10:19-22). Wachuntule nümüin Jeʼwaa, katchinjeerü waaʼin süpüla eejiraain waya sümaa tü kasa nuuʼulakakalü aka waaʼin Satanaa (Luc. 22:40).

Tü apünüinkat shia woonooinjanain sümaa tü nümakat Jesuu. Anuu tü nümakat chi aluwataaushikai Juan süchiki tia: «Chi eekai niʼitaain naaʼin nünain chi Nüchonkai Maleiwa, kateerü noʼu waneepia; niasaʼa chi eekai nnojolin noonooin sümaa nünüiki, amülouijeechi sümaa süsaleechin nia nutuma Maleiwa» (Juan 3:36, TNM). Naashin Juan naata nukuwaʼipa chi wayuu kanoulakai nuulia chi moonooinkai sümaa tü münakat nümüin. Kanouleena waya nünain Jesuu woonoole sümaa tü nümakat wamüin. Woonoo amaalü «tü nüchekakat Cristo» waaʼinrüle süpüshuaʼa tü nikirajakalü anain jee tü nuluwataakalü anain (Gal. 6:2). Jee müsia waaʼinrüle waneepia tü nümakat «chi achepchiee oonookai otta kekiikai maʼin» (Mat. 24:45, TNM). Waaʼinrüle tü nuluwataakalü anain waya Jesuu, eejiraajeena waya sümaa tü kasa alatakat wamüin, tü makat aka saaʼin wawai (Mat. 7:24, 25).

Anuu tü nümakat wanee wayuu nümüin Jesuu: «Anoujaichipa taya pünain, anakaja pükaaliijüle taya süpüla katsüin tanoula pünain waneepia» (Mar. 9:24). Kanoulashiyaajee chia wayuukai, niyaawatapejeʼe saaʼu nükatchinrüinjatüin nunoula. Choʼujaajeerü wamüin waaʼinrüin tia soʼu wanee kaʼi. Wakatchinra wanoula maaʼutpünaa yaa. Wounteerü tia waashajeʼerüle tü Wiwüliakat jee wasakireʼerüle suluʼu waaʼin sünain tü sümakat, müle shia watuma kojuteerü maʼin wamüin tü naaʼinrakat Jeʼwaa wapüleerua. Wakatchinreerü wanoula waʼwaajüle nia sünain tü outkajawaakat, waküjale pütchi süchiki tü kasa anasü weʼreetkat nutuma otta wachuntule kaalinwaa nümüin waneepia. Waaʼinrüle tia, wayaawateerü aaʼu tü waalinkat nüpüla Jeʼwaa (Jud. 20, 21).