1. ¿Jaralii na aküjakana pütchi süpüla nanoujainjanain na wayuu kepiakana Filipos?

NÜNTAPA Pablo, Silas, Lucas otta Timoteo chamüin Filipos, watta maʼin naalii na wayuu aapajeekana süchiki Nuluwataainjachin Maleiwa. Sünainjee naküjain maʼin pütchi naya anoujashiikana eeinapa na wayuu anoujakana suluʼu tia mmakat. Eeshiijaʼa noutkajaale naya anoujashiikana shipialuʼu wanee wayuu kamaneeka maʼin, Lidia sünülia (Aluw. 16:40).

2. ¿Kasa mojusü alataka namüin na jekenakana sünain anoujaa chaa Filipos?

² Wainma kasa mojusü alataka namüin naya wayuu jekenakana sünain anoujaa. Nootuin Satanaa na wayuu mojulaashiikana süpüla nayoutuin tü pütchi nüküjakat Pablo, Silas, Lucas otta Timoteo. Nütaʼünakalaka Pablo nümaa Silas. Naʼyaajünaka süka wunuʼu jee püreesaka naya atumawaa. Nojuʼitapa, oʼunushii naya sünain atütüleʼeraa naaʼin na wayuu jekenakana sünain anoujaa. Süchikijee tia, oʼunushi Pablo, Silas otta Timoteo Filipojee. Eeshijaʼa niale Lucas apütüüin chayaa. ¿Kasakaʼa naaʼinrüin naya wayuu jekenakana sünain anoujaa? Ayatüshiʼiya naya sünain aʼyatawaa nümüin Jeʼwaa sükajee naapüin chi naaʼinkai namüin (Filip. 2:12). Talatüsü naaʼin Pablo sutuma tü naaʼinrakat naya anoujashiikana.

3. Saashin Filipos 1:9-11, ¿kasa nuchuntaka maʼin Pablo nümüin Jeʼwaa napüleerua na anoujashii kepiakana Filipos?

³ Poloo juya süchikijee tia, nüshajüin Pablo wanee karaloʼuta namüin na anoujashii kepiakana Filipos. Waashajeʼerapa tia pütchi nüshajakat, wayaawata aaʼu alin maʼin nüpüla Pablo  naya anoujashiikana. Müshi nia namüin: «Shiimüin teʼreein maʼi jia, süka alin maʼi jia tapüla maa aka alin jia nüpüla Cristo» (Filip. 1:8). Jee müsia, nüküjain namüin nuchuntuin nümüin Jeʼwaa süpüla kooʼomüinjatüin naalin na nawalayuukana napüla, süpüla naaʼinmaainjatüin tü kasa alanaʼaleekat suluʼu anain, lotuinjatüin nakuwaʼipa, nnojoluinjatüin naaʼinrüin wanee kasa nükaaʼinjaaka anainjee wanee wayuu nuulia Maleiwa. Otta naaʼinrüinjatüin tü kasa anasükat suʼupala wayuu süpüla kojutuin Jeʼwaa sutuma. Maaʼutpünaa yaa, wainma kasa anasü watüjaka sünainjee tü nümakat Pablo (paashajeʼera Filipos 1:9-11, TNM). Sünain ekirajaayakat tüü, wekirajaajeerü anain tü nüshajakat Pablo namüin na anoujashii kepiakana Filipos otta tü waaʼinrajatkat süpüla woonooin sümaa tia pütchikat.

4. (1) Saashin 1 Juan 4:9, 10, ¿kasa naaʼinraka Jeʼwaa wapüleerua saaʼujee alin waya nüpüla? (2) ¿Jetsüinjatche maʼin naalin Maleiwa wapüla?

⁴ Weʼrüin waalin nüpüla Jeʼwaa saaʼujee nuluwataain chi Nüchonkai süpüla outajachin nia saaʼu waainjala (paashajeʼera 1 Juan 4:9, 10, TNM). Aishii waya nüpüla Jeʼwaa müshijeseʼe alin nia wapüla (Roma 5:8). ¿Jetsüinjatche maʼin naalin Maleiwa wapüla? Anuu nünüiki Jesuu niʼipajee wanee wayuu karaloʼutamaajachi: «Alinjachi püpüla Jeʼwaa süka süpüshuaʼa paaʼin, süka süpüshuaʼa pukuwaʼipa otta süka tü jülüjakat paaʼin» (Mat. 22:36, 37, TNM). Alinjachi wapüla Jeʼwaa süka süpüshuaʼa waaʼin jee wakooʼomüinrüinjatü naalin wapüla. Nüküjain Pablo namüin na anoujashii kepiakana Filipos kooʼomüinjatüin naalin Maleiwa napüla. ¿Kasa waaʼinrajatka süpüla kooʼomüin naalin Maleiwa wapüla?

5. ¿Kasa waaʼinrajatka süpüla sükooʼomüinraain naalin Maleiwa wapüla?

⁵ Weʼraajüinjachi palajana Maleiwa süpüla alinjachin nia wapüla. Anuu tü sümakat tü Wiwüliakat süchiki tia: «Chi wayuu nnojoikai aipüralin wayuu, nnojoishijaʼa mata niʼraajüin Maleiwa, süka jamüin, aipüralin maʼin wayuu Maleiwa» (1 Juan 4:8, TNM). Naashin chi aluwataaushikai Pablo, aijeechi maʼin wapüla Jeʼwaa weʼraajüle maʼin nia otta wayaawatüle saaʼu tü anakat nümüin (Filip. 1:9, TNM). Woʼttaiwaʼaya sünain ekirajawaa sünain tü Wiwüliakat, wayaawata aaʼu waneirua kasa nüchiki Maleiwa otta akooʼomüinraasü naalin wapüla sünainjee tia. Akooʼomüinraapejeʼe maʼin tü naalinkat wapüla wekirajaapa maʼin nüchiki jee wayaawatapa saaʼu anain maʼin nukuwaʼipa. Choʼujaasüjeseʼe waashajeʼerüin weinshi tü Wiwüliakat otta wasakireʼerüin suluʼu waaʼin sünain tü sümakat (Filip. 2:16).

6. ¿Jara amaa alinjanakana wapüla saashin 1 Juan 4:11, 20, 21?

⁶ Sükajee watüjaain saaʼu alin maʼin waya nüpüla Jeʼwaa alinjanaʼaya wapüla na wawalayuukana (paashajeʼera 1 Juan 4:11, 20, 21). Eesüjaʼa jülüjale waaʼin alinjanainya neʼe wapüla na wawalayuukana, jama wanoujain nünain Jeʼwaa otta wachajaain sukuwaʼipa süpüla müin waya maʼaka naaʼin. Jee müsia, woushikajaain süchiirua nukuwaʼipa Jesuu süka alin waya nüpüla jee naapajiraain nikii waaʼu. Mayaainjeʼe müin tia, eesü kapüleere wamüin waaʼinrüin tü aluwataakalü anain waya, aijiraainjanain waya. Wekirajaa süchiki tü alatakat namüin na anoujashii kepiakana Filipos.

7. ¿Kasa watüjaka sünainjee tü nüküjakat Pablo sümüin Evodia otta Síntique?

⁷ Evodia otta Síntique, naya wanee jieyuu aʼyataajiraapuʼukana maʼin nümaa Pablo sünain aküjaa pütchi. Mojujiraapejeʼe naya mapa. Nuchuntuin Pablo nanülia suluʼu tü karaloʼuta nüshajakat namüin na anoujashii kepiakana Filipos jee nüchiaain naya. Nüküjain namüin anajiraainjanain naya (Filip. 4:2, 3). Otta nüküjain namüin naya  anoujashiikana nnojoliinjanain mojujiraain naya jee nnojoliinjanain naʼülüjiraain (Filip. 2:14). Anajiraashii naya jieyuukana otta aijiraashii maʼin na anoujashiikana sünainjee tü nümakat Pablo namüin soʼu tia.

8. (1) ¿Kasa eeka süpüla maalin anainjee wapüla na wawalayuukana? (2) ¿Kasa waaʼinrajatka sülatüle wamüin tia?

⁸ Maalinjeena wapüla na wawalayuukana jülüjale neʼe waaʼin tü kasa mojusü naaʼinrakat. Tia, shia alataka sümüin Evodia otta Síntique. Wainma kasa woʼtchejaʼawaika amaa waneepia. Jülüjale waaʼin tü kasa mojusü naaʼinrakat na waneinnua, maalinjeena naya wapüla. Jamüshijaʼa nnojoire nüntüin wanee wawala wounejaakai süpüla nipitajüin wamaa tü Piichi Outkajaaleekat, eeshii jashichire waya nümüin sünainjee nnojoluin nüntüin. Shialeekajaʼa sotule waaʼin süpüshuaʼa tü kasa mojukuwaʼipatkat nutuma, eeshii süpüla jashichireein waya nümüin jee sümatsüinjaain naalin wapüla. Sülatüle pümüin tia, soteesü paaʼin niʼrüin Jeʼwaa tü kasa mojukat putuma jee tü kasa mojukat natuma na wawalayuukana. Mayaainjeʼe müin tia, ayatüshiʼiya alin waya nüpüla. Müsüjeseʼe jülüjainjatüin waaʼin tü kasa anasü naaʼinrakat na wawalayuukana jee aipüraliinjanain waya maʼaka naaʼin Jeʼwaa. Paaʼinweena maʼin waya namaa na wawalayuukana wachajaale maʼin sukuwaʼipa süpüla kooʼomüin naalin wapüla (Filip. 2:1, 2).

9. Püküja süpüshi tü kasa alanaʼaleekat suluʼu anain naashin Pablo.

⁹ Nükajee chi naaʼinkai Maleiwa, nüküjain Pablo namüin na anoujashii kepiakana Filipos jee namüin napüshuaʼa na anoujashiikana shiainjatüin naaʼinmaain maʼin «tü kasa alanaʼaleekat suluʼu anain» (Filip. 1:10, TNM). Süpüshi tia, shia kojutuinjachin Maleiwa sutuma wayuu, shikeraajüinjatüin tü keeʼireekat naaʼin, paaʼinwainjanain jee anajiraainjanain na anoujashiikana (Mat. 6:9, 10, TNM; Juan 13:35). Shiale waaʼinmaain maʼin tia, shiimainjaʼa alin wapüla Jeʼwaa.

10. ¿Kasa waaʼinrajatka süpüla lotuin wakuwaʼipa noʼuluʼu Jeʼwaa?

¹⁰ Nüküjainya Pablo lotuinjatüin wakuwaʼipa. Nnojotpejeʼe maluʼuluin tia nnojoleenain woʼtchejaain sümaa wanee kasa. Niaʼala neʼe Jeʼwaa maainjalakai nümüiwaʼa. Loteetpejeʼe wakuwaʼipa noʼuluʼu wakooʼomüinrüle naalin wapüla jee waaʼinmaale maʼin tü kasa alanaʼaleekat suluʼu anain. Aire wapüla Jeʼwaa, nnojoleerü waaʼinrüin wanee kasa eeka süpüla sükaaʼinjaain anainjee wayuu nuulia.

11. ¿Jamüsü mojuka wakaaʼinjeʼerüle wanee anoujashi?

¹¹ Aküjünüsü wamüin nnojoluinjatüin waaʼinrüin wanee kasa sükaaʼinjaajeetka anainjee wayuu nuulia Jeʼwaa, nnojotsü ashaitaain tia. Eesü süpüla sükaaʼinjaain wayuu nuulia Jeʼwaa sünainjee tü wanajakat, tü waapajakat, tü washeʼinkat jee tü kasa waʼyataakalü anain. Eesüjaʼa nnojorüle mojuin tü kasa waaʼinrakat, mojeetpejeʼe shia mojule nakuwaʼipa na waneinnua sünainjee tü waneekakat. Naashin Jesuu, anashi müleka nujutinnüle shirokumüin palaa chi wayuu nükaaʼinjaakai anainjee wanee anoujashi, sünain kanutpünaainjachin nia wanee ipa miyoʼu süpüla wattainjachin nia shiinaluʼumüin tü palaakat (Mat. 18:6).

12. ¿Kasa watüjaka sünainjee tü naaʼinrakat waneinnua pürekutsoot?

¹² Jülüjataa waaʼin tü naaʼinrakat wanee pürekutsoot sümaa nuʼwayuuse süpüla nnojoluinjatüin nakaaʼinjeʼerüin wayuu nuulia Jeʼwaa. Suluʼu tü outkajaaleekat, eejachi wanee wawala sümaa nuʼwayuuse jekenaka woutiisain. Ekirajünüshii naya süpüla anainjatüin maʼin nakuwaʼipa tepichijaiwaʼaya naya. Naashin naya wawalayuukana, nnojotsü anain nuʼunule wanee anoujashi suluʼumüin cine, jaʼitakajeʼe anale tü peliikula  nünajüinjatkat. Mojushiisü maʼin namüin naya wawalayuukana naapapa süchiki nünajüin peliikula chia wawalakai sümaa nuʼwayuuse. Shiasaʼa natüjaapa saaʼu tia naya wawalayuukana, nnojoishii naya oʼunuin suluʼumüin cine. Waneʼereʼeya noʼunuin natüjapa naya wawalayuukana ayaawataa saaʼu tü kasa anakat jee tü kasa mojukat (Heb. 5:14). «Aishii jia wapüla», nnojoishii müin neʼe naya namüin, aaʼinrüshii naya kasa anasü napüleerua (Roma 14:19-21; 1 Juan 3:18).

13. ¿Kasa kaainjaleechika anainjee watuma wanee anoujashi?

¹³ Eeshi süpüla nükaaʼinjaain wanee wawala nuulia Jeʼwaa kaainjarale nia watuma. Jülüjataa waaʼin nukuwaʼipa wanee wayuu ekirajaakai sünain tü Wiwüliakat. Asüipuʼu nia jee watta saalii kasa naaʼinrakat süpüla nuuʼulaain suulia. Nütüjaa aaʼu nnojoluinjachin nüsüin yootchonyaakaijeʼe. Niiʼiratüitpa nukuwaʼipa jee woutiisashi nia. Soʼu wanee kaʼi, ounejaanüshi nia namaa waneinnua wawalayuu nutuma wanee wawala, naapaka chi wawalakai wanee asüüshi nümüin jee nümaka nümüin: «Woutiisaichipa pia otta eeshi chi naaʼinkai Maleiwa paaʼu. Soto paaʼin püchechereechin paaʼin suulia sülanaʼaleein püsüin», nnojotpejeʼe nümaʼülain tia nümüin. Watüjaa aaʼu mojeerüin nukuwaʼipa chia wawalakai jaa nümüle sümüin tü münakat nümüin.

14. ¿Kasa ekirajünaka anain waya sünain tü outkajawaakat süpüla woonooin sümaa tü sümakat Filipos 1:10?

¹⁴ Wainma tü kasa ekirajünakalü anain waya sünain tü outkajawaakat süpüla woonooin sümaa tü sümakat Filipos 1:10, TNM. Ekirajünüshii waya sünain tü kasa  alanaʼaleekat suluʼu anain nümüin Jeʼwaa. Ekirajünüshii waya sünain waaʼinrüinjatüin tü ekirajünakalü anain waya süpüla lotuinjatüin wakuwaʼipa. Jee müsia, ekirajünüshii waya sünain waaʼinrüinjatüin tü kasa anasükat sümüin wayuu otta alinjatüin shia wapüla (Heb. 10:24, 25). Watütüleʼennule aaʼin natuma na wawalayuukana, akooʼomüinraasü maʼin naalin wapüla otta naalin Jeʼwaa. Aire wapüla Jeʼwaa otta na wawalayuukana süka süpüshuaʼa waaʼin, nnojoleerü waaʼinrüin wanee kasa nakaaʼinjaweenaka anainjee.

15. Püküja süpüshi tü kasa anasü naashajaakalü achiki Pablo.

¹⁵ Achuntushi Pablo nümüin Jeʼwaa naaʼu na anoujashii kepiakana Filipos süpüla naaʼinrüinjatüin «tü kasa anasükat» (Filip. 1:11, TNM). Süpüshi tia kasa anasükat, shia alin Jeʼwaa napüla, alin napüla na nawalayuukana, naküjain namüin na waneinnua nanoujain nünain Jesuu otta süchiki tü kasa anasü neʼreetkat. Naashin Pablo müinjana aka saaʼin «tü jolotsükalüirua chakat iipünaa chuwatuuin saʼakapünaa tü piyuushikat» (Filip. 2:15). Wanaawasü tia sümaa tü nümakat Jesuu namüin na nikirajüinkana soʼu nümüin: «Müshii aka jia saaʼin wane anakia, süka shiyaawatüinjatüin saaʼu tü shiimüinkat wayuu jütüma» (Mat. 5:14-16). Nüküjain namüin nekirajüinjatüin wayuu nüchiki jee naküjainjanain pütchi sümüin wayuu wattapünaa (Mat. 28:18-20; Aluw. 1:8). Aaʼinrüshii waya «tü kasa anasükat» waküjale maʼin pütchi.

16. Sünainjee tü sümakat Filipos 1:12-14, ¿kasa eeka süpüla waaʼinrüin jaʼitasü kapüleein shia wamüin? (Piirakaa sümüin tü ayaakuaa sünainkat süta tü rewiisütakat).

¹⁶ Eeshii süpüla waküjain pütchi jaʼitasü kasain alatüin wamüin. Eesü süpüla wajayatüin waküjain pütchi soʼunnaa kapüleein maʼin shia wamüin. Müsü nutuma Pablo. Jamüsüjaʼa soʼu nüshajüin tü karaloʼuta  namüinjatkat na anoujashii kepiakana Filipos, püreesashi nia chaa Roma. Najayatapejeʼe tia süpüla nüküjain pütchi namüin na waariakana jee namüin na wayuu anaʼlaakana nümüin. Sünainjee tü naaʼinrakat Pablo, yalayalasü naaʼin na anoujashiikana jee meimmoluinsalii naya sünain aküjaa nünüiki Maleiwa (paashajeʼera Filipos 1:12-14; 4:22).

17. Püküja süchiki tü naaʼinrakat waneinnua wawalayuu süpüla naküjain pütchi mayaainjeʼe süpülajünüin noulia.

¹⁷ Watta naalii na wawalayuu meimmoluinkana sünain aküjaa pütchi maʼaka naaʼin Pablo. Eeshii wawalayuu kepiakana suluʼu mma eere süpülajünüin noulia naküjain pütchi sainküin miichi. Nachajaapejeʼe sukuwaʼipa süpüla naküjain pütchi (Mat. 10:16-20). Jamüshijaʼa wanee wawala alapalaakai naaʼu na wawalayuukana, nüküjain kasainjatüin naaʼinrüin na wawalayuukana süpüla naküjain pütchi. Aküjainjana naya pütchi naashin sümüin napüshi, namüin na kepiakana naʼütpünaa, na koleejiajiraakana namaa, namüin na aʼyataajiraakana namaa jee namüin na wayuu neʼraajakana. Piama juya süchikijee tia, awainmalaashii na wawalayuukana chayaa. Eesüjaʼa nnojorüle süpülajünüin woulia waküjain pütchi, eepejeʼe wanee kasa watüjaka sünainjee tü naaʼinrakat naya wawalayuukana. Wachajaainjatü sukuwaʼipa süpüla waküjain maʼin pütchi, müle shia watuma, nükaalinjeena waya Jeʼwaa süpüla waküjain pütchi mayaainjeʼe kapüleein shia wamüin (Filip. 2:13).

18. ¿Jarat tü pütchi woonooinjatkalü amaa?

¹⁸ Maaʼutpünaa yaa, choʼujaasü maʼin woonooinjanain sümaa tü pütchi nüshajakat Pablo namüin na anoujashii kepiakana Filipos. Waaʼinmaa maʼin tü kasa alanaʼaleekat suluʼu anain, waʼyataa maʼin süchiirua lotuin wakuwaʼipa, nnojo waaʼinrüin wanee kasa nakaaʼinjaajeetka anainjee na wawalayuukana otta waaʼinra tü kasa anasükat. Müle shia watuma, akooʼomüinraajeerü naalin na wawalayuukana wapüla otta kojuteechi watuma chi Washikai Jeʼwaa.