1. ¿Kasa wachekaka napüleerua na wapüshi manoujainkana?

ANUU sünüiki tü wawalakat Pauline: * «‹Kasataalejeseʼe kottüin na tapüshikana tamaa suluʼu tü Paʼaraiisükat, anashijeʼe niʼyataale nümüin Jeʼwaa Wayne, chi taʼwayuusekai nümaʼaleʼeya chi tachonkai›, müsü taaʼin toʼttaiwaʼaya sünain anoujaa». Eesüjaʼa müle waaʼin maʼaka saaʼin tia wawalakat manoujainre na wapüshikana jee maalinre Maleiwa napüla.

2. ¿Jarat tü pütchi wasoutuinjatkalü eʼipajee sünain ekirajaayakat tüü?

² Nnojotsü wapüleeruainjatüin naaʼin na wapüshikana süpüla nanoujainjanain wanaa wamaa. Wakaalinjainjanapejeʼe naya süpüla kapülainjatüin naaʼin tü sümakat tü Wiwüliakat (2 Tim. 3:14, 15). ¿Jamüshii waküjainjanaka pütchi namüin na wapüshikana? ¿Jamüsü sümülialaainjatka waaʼin naalin? ¿Kasa waaʼinrüinjatka süpüla alin Jeʼwaa napüla? ¿Kasa naaʼinrüinjatka na wawalayuukana süpüla nakaalinjain waya?

3. ¿Jamüshii waküjainjanaka pütchi namüin na wapüshikana saashin 2 Pedro 3:9?

³ Alüʼütsü nakalia süpüla najaʼttirüin Jeʼwaa na nuluwataakana aaʼu Satanaa. Nayeena oʼttaakana na kettaakana süpüla katüin noʼu waneepia (Aluw. 13:48, TNM). Aküjashii maʼin waya pütchi namüin na nnojoliikana wapüshin. Nayaleekajaʼa nnojoleematüin waküjain amüin pütchi na wapüshikana, waküjeein namüin süpüla naʼyataainjanain nümüin Jeʼwaa. «Nücheküin Maleiwa süpüleerua shiyaawajaainjatüin wayuu süpüshua suulia saainjala. Aʼatapajüshi nia süka  nnojolüin nücheküin süpüleerua eeinjatüin wayuu eekai amüloulin saaliijee manoujain» (paashajeʼera 2 Pedro 3:9).

4. ¿Kasa mojukuwaʼipatka watuma waküjapa pütchi nümüin wanee wapüshi?

⁴ Eesü anakuwaʼiparüle jee mojukuwaʼiparüle wanüiki waküjapa tü pütchi suluʼujeejatkat tü Wiwüliakat. Jamüshiijaʼa waküjale pütchi nümüin wanee wayuu nnojoikai weʼraajüin, eesüjaʼa kemeʼeriale maʼin wanüiki nümüin, akaajasaʼa nümüin wanee wapüshi, waküjain nümüin eepünaweere neʼe.

5. ¿Kasa jülüjainjatka waaʼin waküjapa pütchi namüin na wapüshikana?

⁵ Sotule waaʼin tü palajatkat sukua waküjain pütchi nümüin wanee wapüshi, eesüjaʼa mojule waaʼin sutuma nnojoluin anakuwaʼipalüin wanüiki nümüin. Anuu nünüiki chi aluwataaushikai Pablo namüin na anoujashiikana: «Anakaja müleka kemeʼeriale jünüiki sümüin wayuu süpüshua sümaa kamaneein maʼi jia namüin süpüla yapainjanain jia süpüla asouktaa namüin» (Col. 4:5, 6). Jülüjainjatü waaʼin tia pütchikat waküjapa pütchi namüin na wapüshikana. Nnojorüle müin shia watuma wakaaʼinjeʼereena naya nuulia Jeʼwaa.

6, 7. ¿Jamüsü watüjaaka saaʼu nnojoluin sümülialaain saaʼin wanee wawala naalin suʼwayuuse?

⁶ Amülialaainjatü waaʼin naalin. Anuu sünüiki Pauline, tü wachuntakalü anülia paala: «Yootusü taya waneepia nümaa chi taʼwayuusekai nüchiki Maleiwa otta süchiki tü sümakat tü Wiwüliakat. Nnojotsü taya yootuin nümaa süchiki waneirua kasa». Nnojotpejeʼe nütüjaain aaʼu chi suʼwayuusekai tü sümakat tü Wiwüliakat jee nnojotsü niyaawatüin aaʼu tü sümakat nümüin. Saaʼin nümüin shia neʼe saaʼinmaaka Pauline tü sunoujakalü anain. Mmoluwaasüjeseʼe naaʼin suulia mojujain sukuwaʼipa jee suulia shimeejünüin.

⁷ Süküjain Pauline namaʼawalin shia na wawalayuukana aliikawai, saawanoʼu sümaa rimiinkoʼu. Oʼunawaisü shia sünain tü outkajawaakat,  sünain aküjaa pütchi jee sünain awaraijawaa naaʼu na wawalayuukana. «Yüütüʼüwaisü tü miichikat nüpüla chi taʼwayuusekai», müsü Pauline. Nusukajaain shia nümaʼaleʼeya chi süchonkai. Nnojoishii niʼraajüin na wayuu kamaakana tü nuʼwayuusekat otta jülüjasü naaʼin nayain alanaʼaleein ojutü sümüin Pauline nuulialeʼeya niakai. «Anashii wooʼulaajiraale», müshijeseʼe nümüin sümüin. Nnojotsü amülialaain saaʼin Pauline naalin chi suʼwayuusekai.

8. ¿Kasa jülüjaka maʼin naaʼin na wapüshikana saashin 1 Pedro 3:1, 2?

⁸ Waaʼinrüinjatü kasa anasü noʼupala. Tü jülüjakat maʼin naaʼin na wapüshikana shia tü kasa waaʼinrakat, nnojotsü shiain tü kasa wamakat namüin (paashajeʼera 1 Pedro 3:1, 2). Shiyaawata aaʼu tia mapa tü wawalakat Pauline. Anuu sünüiki: «Tatüjaa aaʼu alin waya nüpüla Wayne jee nnojoluin anain nümüin nuuʼulaainjatüin taya. Tayaawatapejeʼe saaʼu teeʼiratüinjatüin takuwaʼipa wanaapünaa sümaa tü nümakat Jeʼwaa tamüin. Shiasaʼa sutuma ‹anashii wooʼulaajiraale› nümüin tamüin, anainjatü tatuma tü kasa taaʼinrakat suulialeʼeya tapüleeruain naaʼin shiiʼiree nunoujain». Ooʼulaasüjeseʼe shia suulia süpüleeruain naaʼin, yootowaisü shia nümaa süchiki tü alatakat nümüin. Niʼrüin Wayne kamaneein maʼin shia jee anain maʼin nukuwaʼipa chi nachonkai (Prov. 31:18, 27, 28). Kapülasü naaʼin sünüiki tü Wiwüliakat süka niʼrüin anain sukuwaʼipa nuʼwayuuse jee nukuwaʼipa chi nachonkai (1 Cor. 7:12-14, 16).

9. ¿Jamüshii ayatüinjanaka wakaalinjain na wapüshikana?

⁹ Ayatüinjana wakaalinjain naya. Waaʼinrüinjatü tü naaʼinrakat Jeʼwaa. Kojuyatua nüküjain namüin na wayuukana süchiki tü pütchi anasükat jee süchiki tü naaʼinrüinjatkat süpüla katüinjatüin noʼu waneepia (Jer. 44:4). Nüküjain Pablo nümüin Timoteo ayatüinjachin nia sünain akaalinjaa na waneinnua süpüla nuʼttaainjachin jee noʼttaainjanain  na aapajakana nünüiki (1 Tim. 4:16). Süka alin wapüla na wapüshikana, wacheküin napüleerua natüjaainjatüin saaʼu tü sümakat tü Wiwüliakat. Jamüsüjaʼa Pauline, anoujashi mapa chi suʼwayuusekai sutuma anain sünüiki nümüin jee anain tü kasa saaʼinrakat nuʼupala. Talatüsü maʼin saaʼin maaʼulu süka nunoujiraain chi suʼwayuusekai wanaa sümaa, pürekutsootshii naya piamaleʼeya jee laülaashi nia suluʼu tü outkajaaleekat.

10. ¿Jamüshii nnojoliinjanaka wakulajaain aaʼin nanainjee na wapüshikana?

¹⁰ Nnojoliinjana waya akulajaain aaʼin nanainjee. Woʼttaiwaʼaya sünain anoujaa, kapüleesü namüin na wapüshikana nekiʼralaain sünain tü wanoujakalü anain otta sünain tü wakuwaʼipakat. Neʼrüin nnojoluin sünainpünaain waya tü miʼiraa naaʼinrakat na suluʼukana waneirua iküleesia jee nnojoluin sünainpünaain waya poliitika. Naaʼaya na jashichikana wamüin sünainjee tia (Mat. 10:35, 36). Nnojo wayüülajüin naya. Nnojorüle wakaalinjain naya süpüla nayaawatüin saaʼu tü wanoujakalü anain, meena süsalakai naaʼin watuma tü naaʼinrakat jee meena wayüülajakai naaʼin süpüla outaa. Niapejeʼe Jesuu eʼitaanüin nutuma Jeʼwaa süpüla kasalajanainjatüin sümüin saainjala wayuu nutuma, nnojoishii wayain (Juan 5:22). Nnojorüle wakulajaain aaʼin nanainjee na wapüshikana, eesüjaʼa kapüleerüle naaʼin mapa tü sümakat tü Wiwüliakat (paashajeʼera tü pütchikat « Waküja namüin nanaʼlai suluʼu jw.org^®»).

11-13. ¿Kasa watüjaka sünainjee tü saaʼinrakat Alice süpüla sükaalinjain na wayuu kachooinkana shia?

¹¹ Kamaneeinjana waya jee pansaainjatü wanüiki (Prov. 15:2). Anuu tü saaʼinrakat tü wawalakat Alice. Ekirajaasü shia sünain tü Wiwüliakat soʼu chajatüin shia suluʼu wanee mma naatajatü. Wayuu manoulasalii na wayuu kachooinkana shia jee poliitikanainshii waneepia. Sütüjaa aaʼu tü wawalakat süküjamaatüinjatüin nümüin süshi jee sümüin shii süchiki tü kasa anasü shikirajaakalü anain. Anuu sünüiki: «Jashichireejeena na püpüshikana nnojorüle püküjamaatüin namüin tü punoujakalü anain jee tü pukuwaʼipakat». Ashajüsüjeseʼe shia karaloʼuta namüin, süsakirawalin naya sünain wanee pütchi suluʼujeejatü tü Wiwüliakat kamalainjeetka namüin, maʼaka saaʼin süchiki aijirawaa (1 Cor. 13:1-13). Saapawalin analuʼut namüin saaʼu anain shipijia natuma, saaʼu naaʼinmajüin shia jee okolojirawaisü shia namüin. Suwaraijaapa naaʼu, sükaalinjain tü shiikat sünain aaʼinraa waneirua kasa miichipaʼa. Mojushiipejeʼe namüin na wayuu kachooinkana shia süküjapa namüin süchiki tü sunoujakalü anain.

¹² Saashajeʼerawalin tü Wiwüliakat weinshi wanaa sümaa chajatüin shia namaa na wayuu kachooinkana shia. Sünainjee tia, shiyaawata aaʼu tü shiikat kojutuin sümüin Alice tü Nünüikikat Maleiwa. Nikirajaaka chi süshikai sünain waneirua kasa suluʼujeejatka tü Wiwüliakat, nütüjawee aaʼu kasain shikirajaain anain tü nüchonkat jee shiiʼiree mojuin nünüiki süchiki tü sümakat tü Wiwüliakat. «Tasülajüin nümüin wanee Wiwülia jee tashajaka suluʼu tia Wiwüliakat wanee pütchi nümüinjatü», müsü Alice. Niʼrüin nnojoluin kaluʼuin kasa mojusü tü sümakat tü Wiwüliakat, ponusü maʼin naaʼin tia.

¹³ Kamaneeinjana waya jee pansaainjatü wanüiki namüin na wapüshikana jaʼitaina eʼrüin waya müliaa sünainjee (1 Cor. 4:122). Jamüsüjaʼa Alice apüleeruaana aaʼinrü shia sutuma tü shiikat. Anuu sünüiki: «Soʼu woutiisain taya, ‹maalinsat taya püpüla›, müsü tamüin tü teikat». ¿Kasakaʼa saaʼinrüin Alice? Anuu sünüiki: «Pansaasü tanüiki sümüin, taküjain sümüin tanoujaitpain nünain Jeʼwaa jee nnojoluinjatüin tooʼulaain suulia. Taküjapejeʼe sümüin kojutuin shia tamüin jee alin maʼin shia tapüla. Aʼyalajiraasü taya sümaa, süchikijee tia, taʼlakajaaka shiyaaluʼu. Yalejeechiki, shiyaawata aaʼu tü teikat suʼwanajaain takuwaʼipa sutuma tü sümakat tü Wiwüliakat».

14. ¿Jamüshii wachecheraainjanaka süchiirua tü wamakat namüin na wapüshikana?

¹⁴ Eesü nnojorüle nayaawatamaatüin saaʼu na wapüshikana kojutuin maʼin wamüin tü waʼyataainkat nümüin Jeʼwaa. Jamüsüjaʼa shii Alice, aʼyalajüsü shia saalinjee suuʼulaainjatüin Alice  suulia ekirajawaa suluʼu eʼikülee miyoʼu jee pürekutsoolüinjatüin shia. Ichepejeʼe tü wawalakat süchiirua tü süneekakat. Anuu sünüiki: «Nnojorüle püchecheraain süchiirua tü kasa pümakat namüin na püpüshikana, napüleerueerü paaʼin shiiʼiree paaʼinrüin waneirua kasa. Shiasaʼa pansaale pünüiki namüin sümaa kamaneein pia, nayaawateerü aaʼu anain maʼin tü punoujakalü anain». Shiaʼaya saaʼinraka tia tü wawalakat Alice. Maaʼulu yaa, pürekutsootshii na wayuu kachooinkana shia jee laülaashi chi süshikai suluʼu tü outkajaaleekat.

15. Saashin Mateo 5:14-16 otta 1 Pedro 2:12, ¿kasa nayaawateetka aaʼu na wapüshikana sünainjee tü kasa anasü naaʼinrakat na wawalayuukana?

¹⁵ Arütkaasü wayuu nünainmüin Jeʼwaa sünainjee tü kasa anasü naaʼinrakat na aʼyataashiikana nümüin (paashajeʼera Mateo 5:14-16; 1 Pedro 2:12). Manoujainre suʼwayuuse wanee wawala, shia anaka aluʼu niʼraajüle na wawalayuukana. Jamüsüjaʼa tü wawalakat Pauline, wachuntaka anülia suʼttiajee ekirajaayakat tüü, suunejaʼawalin na wawalayuukana shipialuʼumüin süpüla neʼraajünüinjanain nutuma chi suʼwayuusekai. Yootushi nia nümaa wanee wawala jee niyaawataka saaʼu anain nakuwaʼipa na aküjaliikana pütchi nüchiki Jeʼwaa. Anuu nünüiki: «Achuntushi kaʼi niʼyataaleruʼu chia wawalakai süpüla nünajüinjachin tamaa ashaitüsü woola. Yalejeechiki, tayaawata aaʼu nnojoluin kamalain neʼe nümüin tü anoujaakat, eesü waneirua kasa kamalainka nümüin».

16. ¿Jamüshii wounejaainjanaka na wapüshikana sünain tü outkajawaakat?

¹⁶ Wanee sukuwaʼipa süpüla wakaalinjain na wapüshikana shia wounejaale naya sünain tü outkajawaakat (1 Cor. 14:24, 25). Tü palajatkat  nukua Wayne sünain tü outkajawaakat shia sünain tü Outkajawaakat eere Sotuin Waaʼin Outuin Jesuu, chajachi nia süchikijee niʼyataain jee süka motsomüin sümaʼa tia outkajawaakat. Anuu nünüiki: «Nnojotsü tayaawatüin aaʼu tü aashajaanakalü achiki, shia neʼe sotoka taaʼin kamaneein maʼin tamüin na wawalayuukana. Antüshii tanainmüin, nasaküin taya jee kapülashi taya naaʼin». Eeshi wanee wawala sümaa nuʼwayuuse akaalinjawaika Pauline nümaa chi süchonkai, naaʼinmajüin nia süpüla jülüjainjatüin saaʼin tü outkajawaakat jee süpüla süküjainjatüin pütchi. Shiasaʼa nüchekapa Wayne süchiki ekirajawaa sünain tü sunoujakalü anain Pauline, achuntushi nia ekirajawaa nümüin chia wawalakai.

17. (1) ¿Kasa tü nnojoluinjatkat mojuin atuma waaʼin? (2) ¿Jamüshii ayatüinjanaka wakaalinjain na wapüshikana?

¹⁷ Kasataalejeseʼe naʼyataain nümüin Jeʼwaa napüshuaʼaleʼeya na wapüshikana. Jaʼitairü wainmain tü kasa waaʼinrakat süpüla wakaalinjain naya, nnojoleenapejeʼe anoujayaa müin naya napüshuaʼa. Nnojo mojuin waaʼin sülatüle tia wamüin. Nnojotsü jaralüinjatüin wapüleeruain aaʼin shiiʼiree sücheküin tü wanoujakalü anain. Eesü süpüla kapülain naaʼin na wapüshikana tü pütchi waküjakat namüin neʼrüle talatüin waaʼin sünain aʼyatawaa nümüin Jeʼwaa. Woʼuraaja napüleerua, waküja namüin tü sümakat tü Wiwüliakat süka anaka akuwaʼipa jee ayata wakaalinjain naya (Aluw. 20:20). Soto waaʼin nükaalinjeenain waya Jeʼwaa sünain tü waaʼinrakat. Naapaale na wapüshikana sümaa tü sümakat tü Wiwüliakat oʼttaajeena naya.