1, 2. (1) ¿Kasa jülüjaka naaʼin Jeʼwaa niʼrapa wattain saalii wayuu outkajaaka sünain tü Ekawaa Aipaʼajatkat nutuma chi Senyotkai? (Piirakaa sümüin tü ayaakuaa sünainkat süta tü rewiisütakat). (2) ¿Kasa wekirajaainjatka anain sünain ekirajaayakat tüü?

¿KASA jülüjaka naaʼin Jeʼwaa niʼrapa wattain saalii wayuu outkajaaka sainküin mmakat süpüla sotuin naaʼin tü Ekawaa Aipaʼajatkat nutuma chi Senyotkai? Jülüjashii naaʼin na wayuukana waneʼewai nakua, nnojotsü shiain jülüjain naaʼin wattain naalii. Jülüjashii naaʼin na outkajaʼawaikana juyawai. Eeshii na antawaikana jaʼitasü apüleeruaanüin naaʼin. Eeshii na nnojoliikana antawalin semaanawai, kojutupajaʼa namüin noutkajaain süpüla Sotuin Naaʼin Outuin Jesuu. Otta jülüjashii naaʼin Jeʼwaa na eiwaʼaliikana sünain tia outkajawaakat, na antakana sutuma natüjaweein saaʼu kasain aainjünüin sünain.

² Talatakajasaʼa naaʼin Jeʼwaa sutuma niʼrüin wainmain wayuu oʼunaka sünain tü Outkajawaakat eere Sotuin Waaʼin Outuin Jesuu (Luc. 22:19). Shiapejeʼe anashiin nümüin Jeʼwaa noutkajaain na wayuukana shiiʼiree naʼwaajeein nia, jaʼitaina wainmain jee paliʼirüin naya. Sünain ekirajaayakat tüü, wekirajaweerü anain jamüin nnojotka shiain neʼe woʼunüin anain tü Ekawaa Aipaʼajatkat nutuma chi Senyotkai otta jamüin woutkajaʼawaika semaanawai sünain tü outkajawaa niʼitaakat Jeʼwaa napüla na aikana apüla nia.

3, 4. (1) ¿Jamüshii woutkajaʼawaika? (2) ¿Kasa jaʼyaka suluʼu wakuwaʼipa wanaa sümaa woutkajaain? (3) Sünainjee tü sümakat 1 Corinto 11:23-26, ¿jamüshii woʼunajanaka sünain tü Outkajawaakat eere Sotuin Waaʼin Outuin Jesuu?

³ Outkajaashii maʼin waya süpüla waʼwaajüin Jeʼwaa otta süpüla nikirajüin waya. Na wayuu yaletakana aaʼin, nnojotsü choʼujaain  namüin nekirajünüin naashin (3 Juan 9). Akaajasaʼa wayakana, wacheka achikit wekirajünüin nutuma Jeʼwaa jee sutuma tü nupueulosekat (Is. 30:20; Juan 6:45).

⁴ Wanaa sümaa woutkajaain, jaʼyasü suluʼu wakuwaʼipa nnojoluin yaletüin waaʼin otta wacheka achikit nikirajüin waya Jeʼwaa. Oʼunawaishii waya sünain tü Outkajawaakat eere Sotuin Waaʼin Outuin Jesuu süka kojutuin shia wamüin, süka nnojoluin yaletüin waaʼin otta süka woonooin sümaa tü nuluwataakalü anain Jesuu soʼu nümüin: «Tü waaʼinrakat jooluʼu, süpülajatü jaaʼinrüin waneepia süpüla sotüinjachin jaaʼin taya» (paashajeʼera 1 Corinto 11:23-26). Sünainjee woʼunüin sünain tia outkajawaakat, sotusü waaʼin aishaatain waya nüpüla Jeʼwaa otta achecheraasü waaʼin sünain tü kasa waʼatapajakat nutuma. Nütüjaapejeʼe saaʼu Jeʼwaa nnojoluin aneerüin neʼe waaʼin sutuma sütütüleʼennüin otta sümüliannüin waaʼin uatua süpüla juyakat. Müsüjeseʼe niʼitaain tü outkajawaakat semaanawai otta oʼunajana waya sünain naashin. Oonoweena waya sümaa nünüiki müleka nnojorüle yaletüin waaʼin. Ekirajaashii maʼin waya süpüla tia outkajawaakat semaanawai otta oʼunawaishii waya sünain.

5. ¿Jamüshii eeka na wayuu anashiikana amüin noʼunüin sünain tü outkajawaakat?

⁵ Watta naalii na wayuu anashiikana amüin noʼunuin sünain tü outkajawaakat, süka jamüin, nekirajaweein nüchiki Jeʼwaa (Is. 50:4). Shia nantawaika anain palajana tü Outkajawaakat eere Sotuin Waaʼin Outuin Jesuu otta süchikijee, outkajaʼawaishii naya semaanawai (Zac. 8:20-23). Talatüsü waaʼin wanaa namaa wawalayuu sutuma wekirajünüin otta woʼuninnüin akuwaʼipa nutuma Jeʼwaa, chi akaaliijakai waya otta taashika atuma waya suulia kaainjalaa (Sal. 40:17). Nnojotsü woʼtchejaain amaa, anain maʼin woutkajaale süpüla nikirajüin waya Jeʼwaa nümaa Jesuu, chi Nüchon aishikai maʼin nüpüla (Mat. 17:5; 18:20; 28:20).

6. ¿Kasa naaʼinraka wanee wayuu sutuma nnojoluin yaletüin naaʼin?

⁶ Wounejaʼawalin na wayuukana juyawai sünain tü Outkajawaakat eere Sotuin Waaʼin Outuin Jesuu. Watta naalii wayuu anakana akuwaʼipa sünainjee wounejaain naya sünain tü outkajawaakat. Eeshi wanee wawala aapakai nümüin wanee wayuu wanee karaloʼuta sünüliamaajatü tia outkajawaakat. «Nnojoitaajeechi taya oʼunüin», nümaka chi wayuukai. Shiasaʼa soʼu tü ai saainjünakalü oʼu tü outkajawaakat, ainküshi naaʼin chi wawalakai nüntüin chi wayuukai. Ponusü naaʼin chia wayuukai kamaneein na wawalayuukana nümüin, müshijeseʼe nuʼunawalin sünain tü outkajawaakat. Soʼu wanee juya, apünüintua neʼe nnojoluin nia sünain tü outkajawaakat. ¿Jamüshiche nuʼunawaika sünain tü outkajawaakat? Anuu nünüiki chi wawalakai nüchiki: «Nnojotsü yaletüin naaʼin chia wayuukai». Nia Jeʼwaa arütkeʼeraka chia wayuukai sünainmüin nupueulose. Wawalaichipa nia maaʼulu yaa süka woutiisain nia (2 Sam. 22:28; Juan 6:44).

7. ¿Jamüsü nnojotka yaletüin waaʼin sutuma waashajeʼerüin tü Wiwüliakat otta sutuma tü watüjakat sünainjee tü outkajawaakat?

⁷ Tü watüjakat sünainjee tü outkajawaakat otta tü waashajeʼerakat suluʼujee tü Wiwüliakat, sükaaliijain waya süpüla nnojoluin yaletüin waaʼin. Maʼaka jeʼra semaana süpülapünaa tü Outkajawaakat eere Sotuin Waaʼin Outuin Jesuu, ekirajaana anainrü suluʼu tü outkajaaleekat süchiki nukuwaʼipa Jesuu otta süchiki nnojoluin yaletüin naaʼin soʼu naapajiraain nikii waaʼu. Maʼaka jeʼra kaʼi süpülapünaa tü Outkajawaakat eere Sotuin Waaʼin Outuin Jesuu, waashajeʼerüinjatü tü sümakat tü Wiwüliakat süchiki nuʼutunuin aaʼin otta nüsoʼireʼennüin aaʼin. Sutuma wekirajaain sünain tia, kojutusü wamüin naapajiraain nikii waaʼu. Müsüjeseʼe nnojoluin yaletüin waaʼin maʼaka nnojoluin yaletüin naaʼin Jesuu otta anashiisü wamüin waaʼinrüin tü nuluwataakalü anain Maleiwa jaʼitasü kapüleein shia wamüin (Luc. 22:41, 42).

8. ¿Kasa naaʼinraka Jesuu niiʼiyataka akajee meimmoluin nia?

⁸ Meimmoluinjana waya maʼaka naaʼin Jesuu. maʼaka jeʼra kaʼi süpülapünaa outuin Jesuu, niiʼiyatüin meimmoluin nia, wekirajaa sünain tia. Nütüjaa aaʼu niʼrüinjachin japülii natuma na nüʼünüükana, naʼyaajüinjachin nia otta noʼutajachin naaʼin (Mat. 20:17-19). Mayaapejeʼe sülatajatüin tia nümüin, nnojoishi nia eimmolojooin seema outaa. Soʼu tü ai nütaʼünajachikalü oʼu chaa Getsemaní, aashajaashi nia namaa na aluwataaushii waneepiakana nümaa, müshi nia: «Jütamaajaa jumaala, jooʼuya woʼunaiwa. Alüʼütshi chi aapüinjachikai tekii» (Mat. 26:36, 46). Otta wanaa sümaa nantüin na ataʼülajanakana nia, arütkaashi nia nanainmüin sümaa nüküjain namüin niain nataʼülajachin jee nooʼulaainjanain noʼunüin na aluwataaushiikana (Juan 18:3-8). Meimmoluinsai Jesuu soʼu tia, ¿aashimüin? Akaʼaya maaʼulu yaa, na anoujashii chainjanakana iipünaa otta na kepiainjanakana mmapaʼa, meimmoluinsalii naya maʼaka meimmoluin Jesuu. ¿Jamüsüche sukuwaʼipa süpüla meimmoluin naya?

9. (1) ¿Jamüsü choʼujaaka wamüin meimmoluinjanain waya süpüla waneepiain waya sünain tü outkajawaakat? (2) ¿Jamüsü naaʼin otta nanoula na wawalayuu püreesashiikana naapapa süchiki anain wanoula?

⁹ Eesü tü kasa kapüleekalü atuma woʼunüin sünain tü outkajawaakat, makalaka choʼujaain wamüin meimmoluinjanain waya. Eeshii wawalayuu müliakana sutuma ayuulin naya, mojuin naaʼin otta matchin naaʼin. Eeshii na apüleeruaanakana aaʼin sutuma napüshi jee natuma na sülaülakana mma. Jülüjataa waaʼin na wawalayuu püreesakana saaʼujee nanoula. Eesü süpüla sükatchinraain nanoula sutuma naapüin ayatüinya waya sünain anoujaa (Heb. 13:3). Akatchinraasü nanoula, meimmoluinsalii naya otta waneepiashii nümaa Jeʼwaa naapapa wachiki ayatüin waʼyataain nümüin Jeʼwaa mayaapejeʼe sülatüin kasa mojusü wamüin. Shiaʼaya alataka tia nümüin chi aluwataaushikai Pablo wanaa sümaa püreesain nia Roma. Talatawaishi nia naapawaipa süchiki waneepiain nümaa Jeʼwaa na anoujashiikana (Filip. 1:3-5, 12-14). Nüshajüin tü karaloʼutakat Hebreokana, eesüjaʼa nüshajüle shia süpülapünaa nüjütünüin jee shiale süchikijeechon. Sünain tia karaloʼutakat, nuchuntuin namüin na anoujashiikana noutkajaainjanain waneepia, müshi nia namüin: «Anakaja müleka ayatüle jia sünain aijiraain jüpüla jüpüshua» (Heb. 10:24, 25; 13:1).

10, 11. (1) ¿Jaralii wounejaainjanaka sünain tü Outkajawaakat eere Sotuin Waaʼin Outuin Jesuu? (2) ¿Jamüshii wounejaainjanaka naya saashin Éfeso 1:7?

¹⁰ Meimmoluinsalii waya wanaa sümaa wounejaain sünain tü Outkajawaakat eere Sotuin Waaʼin Outuin Jesuu na wapüshikana, na waʼyataajiraakana amaa otta na kepiakana waʼütpünaa. ¿Jamüshiiche wounejaaka naya? Shia süka waapüin analuʼut nümüin Jeʼwaa otta nümüin Jesuu saaʼujee tü naaʼinrakat wapüleerua. Otta müsia, wacheka achikit natüjaainjatüin saaʼu na wayuukana tü naaʼinrajatkat süpüla anain nakuwaʼipa «sünainjee anamiain chi Maleiwakai», müshiijeseʼe taashin waya nutuma (paashajeʼera Éfeso 1:7; Alat. Map. 22:17, TNM).

¹¹ Eesü wane kasa jaʼyaka suluʼu wakuwaʼipa  wanaa sümaa woutkajaain. Jaʼyasü maʼin tia suluʼu nukuwaʼipa Jeʼwaa nümaa Jesuu.

12. (1) ¿Jamüsü kooʼomüinka maʼin naalin Jeʼwaa nümaa Jesuu wapüla? (2) ¿Kasa waaʼinrajatka süpüla müin wakuwaʼipa maʼaka nukuwaʼipa Jesuu saashin 2 Corinto 5:14, 15?

¹² Outkajaʼawaishii waya sutuma alin wapüla Jeʼwaa nümaa Jesuu otta kooʼomüinreesia naalin wapüla wanaa sümaa woutkajaain. ¿Jamüsü kooʼomüinreeka naalin wapüla? Shia süka sotowalin waaʼin sünain tü outkajawaakat tü naaʼinrakat wapüleerua (Roma 5:8). Sotusü waaʼin sutuma tü Outkajawaakat eere Sotuin Waaʼin Outuin Jesuu, aishaatain maʼin na wayuukana napüla. Jaʼitakajeʼe na mojutukana amüin taashin naya atumawaa. Waapüin maʼin tü analuʼutkat namüin, müsüjeseʼe müin wakuwaʼipa weinshi maʼaka nukuwaʼipa Jesuu (paashajeʼera 2 Corinto 5:14, 15). Jee waʼwaajeein maʼin Jeʼwaa sutuma nuluwataain chi Nüchonkai sünain aapajirawaa nikii waaʼu. Wanee sukuwaʼipa süpüla waʼwaajüin nia shia sükajee wayalerüin wajapü süpüla wasoutuin sünain tü outkajawaakat.

13. Püküja süchiki tü waaʼinrakat süpüla weeʼiyatüin alin wapüla Jeʼwaa nümaa chi Nüchonkai.

¹³ Outkajaʼawaishii waya mayaapejeʼe wainmain tü kasa waaʼinrajatkat, sükajee tia weeʼiyatüin alin wapüla Maleiwa nümaa chi Nüchonkai. Eeshii wawalayuu outkajaʼawaikana süchikijee naʼyataain jaʼitashii mapüsain naya. Otta tü wane outkajawaakat aainjünawaisü saawanoʼu jee rimiinkoʼu wanaa sümaa neemeraain na wayuukana. ¿Kojutusüche nümüin Jeʼwaa woutkajaain jaʼitaina mapüsain waya? Kojutusü nümüin. Kojutule maʼin wamüin tü outkajawaakat, kojutushaateerü nümüin Jeʼwaa alin nia wapüla (Mar. 12:41-44).

14. ¿Kasa jaʼyaka suluʼu nukuwaʼipa Jesuu?

¹⁴ Jaʼyasü suluʼu nukuwaʼipa Jesuu alin nüpüla wayuu, müshiijeseʼe nükaaliijain na waneinnua mayaapejeʼe wainmain kasa naaʼinrajatka. Aapajiraashi nia nikii napüleerua na nikirajüinkana otta kapülasü naaʼin nakuwaʼipa suulialeʼeya nukuwaʼipa. Jamüshijaʼa nia, aashajaashi namaa jaʼitashi mapüsain nia jee mojuin naaʼin (Luc. 22:39-46). Shia jülüjaka naaʼin kasain naaʼinrajatüin napüleerua na waneinnua, nnojotsü kapülain naaʼin tü saaʼinrajatkat wayuu nüpüleerua (Mat. 20:28). Aire wapüla Jeʼwaa otta na wawalayuukana, outkajaweena waya soʼu tü ai saainjünakalü oʼu tü Ekawaa Aipaʼajatkat nutuma chi Senyotkai otta waneepieena waya sünain tü outkajawaa aainjünakat semaanawai.

15. ¿Jaralii na wakaalinjainjanakana maʼin?

 ¹⁵ Naʼakashii waya na anoujashii shiimainshiikana otta talatüsü waaʼin sünain wakaaliijain na wayuukana süpüla nanoujainjanain wanaa wamaa. Nayapejeʼe wakaalinjainjanain maʼin na wawalayuu eemiajaakana anoula (Gal. 6:10). Aishii wapüla naya wawalayuukana wounejaale naya sünain tü outkajawaakat jee shialeekajaʼa sünain tü Outkajawaakat eere Sotuin Waaʼin Outuin Jesuu. Weʼrapa naleʼejüin nünainmüin Jeʼwaa na wawalayuu eemiajaakana anoula, talatüsü maʼin waaʼin maʼaka talatüin naaʼin Jeʼwaa otta Jesuu (Mat. 18:14).

16. (1) ¿Kasa watütüleʼerajiraainjatka apüla waaʼin? (2) ¿Kasa sükaaliijeenaka anain waya tü outkajawaakat? (3) ¿Jamüsü anaka maʼin sotule waaʼin tü sümakat Juan 3:16 soʼu sükalia tü Outkajawaakat eere Sotuin Waaʼin Outuin Jesuu?

¹⁶ Sülüʼütpa sükalia tü Outkajawaakat eere Sotuin Waaʼin Outuin Jesuu, wounejaa maʼin wayuu maʼleekalia. Aainjüneerü tia outkajawaakat aaʼuriiroʼu 19 soʼu 2019 (paashajeʼera tü pütchikat « Wounejaa wayuu maʼleekalia»). Watütüleʼerajiraa waaʼin süpüla waneepiain waya sünain tü outkajawaa niʼitaakat Jeʼwaa wapüleerua. Alüʼütsü maʼin sükalia süpüla sajaʼttüin kasa mojusü, müshiijeseʼe woʼunajanain sünain tü outkajawaakat. Waaʼinrüle tia, sükaaliijeena waya süpüla nnojoluin yaletüin waaʼin, süpüla meimmoluin waya otta alin wapüla wayuu (1 Tes. 5:8-11). Kojuta wamüin alin waya nüpüla Jeʼwaa jee nüpüla chi Nüchonkai (paashajeʼera Juan 3:162, TNM).