CHAJANA na israeliitakana süʼütpaʼa tü süchikat Jordán, pejeshii naya sünain tü mma naapüinjatkat Maleiwa namüin. Soʼu wanee kaʼi, antüsü waneirua jieyuu, suunejaaka na tooloyuukana sünain wanee miʼiraa. Eesüjaʼa anale saaʼin namüin na israeliitakana aleewainjanain naya sümaa tia jieyuukalüirua, nayonnajüinjanain otta nekaainjanain. Eeshiijaʼa naaʼinmajeenale nakuwaʼipa otta nnojoleenale jamajüin naya saaʼin namüin. Nnojotsü wanaawain sukuwaʼipa tia jieyuukalüirua sümaa tü nikirajakalü anain Maleiwa.

 ¿Kasakaʼa alatüin namüin na israeliitakana? Anuu sünüiki tü Wiwüliakat: «Amaʼüjiraashii nakuwaʼipa na israeliitakana namaa na jieyuu chajanakana Moab». Tü keeʼireekat saaʼin tia jieyuukalüirua, shia naʼwaajüinjanain na israeliitakana tü maleiwayaasükalüirua. Shiakalaka naaʼinrüin tia, müshijeseʼe jashichin maʼin Jeʼwaa namüin (Núm. 25:1-3).

Nnojoishii oonooin na israeliitakana sümaa tü nuluwataakalü anain Maleiwa. Naʼwaajüin tü maleiwayaasükalüirua otta amaʼüjiraashii nakuwaʼipa. Wainma na outakana sünainjee tia (Éx. 20:4, 5, 14; Deut. 13:6-9). ¡Mojukatche maʼin tü naainjakat! ¿Jamüsü mojuka shia? Shia süka naainjalaʼa namüin kasa mojusü sümaa nalüʼülaain maʼin sünainmüin tü Mma Aapünajatkat namüin. Antüshiijeʼe naya suluʼumüin tia mmakat noonoole sümaa nünüiki Maleiwa (Núm. 25:5, 9).

Anuu tü nümakat chi aluwataaushikai Pablo süchiki tia: «Ashajünüsü nachiki na watuushinuukana wapüla waya katakana oʼu maaʼulu yaa saaʼujee sülüʼülüin nükalia chi Senyotkai süpüla niitaajeechin nüchikua. Tü alatakat namüin, ashajüna achikit süpüla süchiajaainjanain waya suulia waaʼinrajüin tü kasa mojusü naaʼinrapüʼükat» (1 Cor. 10:7-11). Talatakajasaʼa naaʼin Satanaa sünainjee nimeejüin na israeliitakana süka amaʼüjirawaa akuwaʼipaa, nnojoishii naya antüin nutuma suluʼumüin tü Mma Aapünajatkat namüin. Jalia waya naaʼin Satanaa, nimeejüin taa waya süpüla nnojoliinjanain wekerolüin suluʼumüin tü mma jeketüinjatkat nutuma Maleiwa.

Anasü maʼin nutuma Satanaa sukuwaʼipa tü naaʼinrakat süpüla nimeejüinjanain na anoujashiikana. Wainmairü wayuu nimeejaka. Nimeejüin na israeliitakana sükajee amaʼüjirawaa akuwaʼipaa. Nimeejüin wayuu maaʼulu sükajee tia. ¿Kasa niʼitaaka wapüleerua süpüla waʼluwajiraainjanain wakuwaʼipa? Niʼitaain shiyaakua wayuu maichesat jee amaʼüjiraasü sukuwaʼipa.

Wainma wayuu anajaka ojuunaa shiyaakua wayuu maichesat jee amaʼüjiraasü sukuwaʼipa. Jamüsüjaʼa sümaiwa paala, oʼunapuʼushii na wayuukana suluʼumüin Cine otta eeshii nayaʼlajüle rewiisüta otta karaloʼuta sümaajatü shiyaakua wayuu maichesat jee amaʼüjiraasü sukuwaʼipa. Eeshii na nnojoliikana sünainpünaain tia suulia neʼrajüin japülii neʼnnüle chayaa. Aluʼusaʼa maaʼulu mapüleeitpa ousütaa sünain tia süka eeitpain Internet. Eeshii nanajüle shiyaakua wayuu maichesat naʼyataaleruʼu otta suluʼu neʼejena. Suluʼu wainma mma, sümaʼanayaa sümüitpa wayuu tü Interneekat.

Akaʼaya sutuma eeitpain sümaʼana wayuu serulaat jee tableta, eeitpa süpüla nanajüin tia sünain waraittaa otta suluʼule naya neʼejena.

Süka mapüleeitpain anajaa ojuunaa shiyaakua wayuu maichesat jee amaʼüjiraasü sukuwaʼipa, wainma tü kasa mojusü eekat sünainjee. Eeshi eekai nuuʼulaain suulia nuʼwayuuse, mojutujiraain nümüinjiraa jee yarüttüin naaʼin. Amojujaasü nukuwaʼipa nümaa Maleiwa sünainjee tia. Kaluʼusü mojuu akuwaʼipaa anajaa shiyaakua wayuu maichesat jee amaʼüjiraasü sukuwaʼipa. Mojusü naaʼin wayuu sutuma. Kakaliasü tia süpüla motuinjatüin naaʼin.

Soto waaʼin nükaalinjeein waya Jeʼwaa suulia nimeejüin waya Satanaa. Süpüla anainjanain waya noʼuluʼu Jeʼwaa, waaʼinrüinjatü tü nnojotkat naaʼinrüin na israeliitakana. Oonooinjana waya sümaa tü nümakat Jeʼwaa (Éx. 19:5). Soteesü waaʼin nülerajüin Jeʼwaa tü anajaakat shiyaakua wayuu maichesat jee amaʼüjiraasü sukuwaʼipa. ¿Jamüsü watüjaaka saaʼu nülerajüin Jeʼwaa tia?

Jamüsüjaʼa tü nuluwataakalü anain Jeʼwaa na israeliitakana, naatajatü suulia tü aluwataanakalü anain na wane wayuukana. Tia, müsü aka saaʼin wanee süsepü miichi miyoʼu aaʼinmajaka na israeliitakana suulia tü kasa mojusü naaʼinrakat na kepiakana pejepünaa nanain (Deut. 4:6-8). Pansaasü nünüiki Jeʼwaa sükajee  tü nuluwataakalü anain: nülerajüin tü aʼluwajirawaakalü akuwaʼipaa.

Süchikijee nüküjain Jeʼwaa süchiki tü kasa mojusü naaʼinrakat na kepiakana pejepünaa nanain na israeliitakana, müshi nia namüin: «Nnojotsü jaaʼinrüinjatüin tü naaʼinrakat na wayuu kepiakana Canaán, eeinjanale jia tatuma. [...] Yarüttüsü maʼin nakuwaʼipa otta süsaleena naya naainjala tatuma». Yarüttüsü nakuwaʼipa na cananeokana noʼuluʼu Jeʼwaa, jama niain wanee Maleiwa wulekai maʼin akuwaʼipa (Lev. 18:3, 25).

Mayaapejeʼe süsalain nutuma Jeʼwaa naainjala na cananeokana, ayatüshiʼiya na wayuukana aʼluwajiraain nakuwaʼipa. Sülatapa suulia 1.500 juya, nüküjain Pablo mojuin maʼin nakuwaʼipa na wayuu kepiakana pejepünaa nanain na anoujashiikana. Maapülinsat naaʼin sünain aaʼinraa kasa yarüttüsü (Éf. 4:17-19, TNM). Müsia maaʼulu yaa, wainma na maapülinkana aaʼin sünain aaʼinraa kasa yarüttüsü. Na anoujashiikana, naaʼinmajüinjatü nakuwaʼipa suulia neirakaain sümüin ayaakuaa kashüülasü eʼitaanaka sünain wanee kasa.

Na eʼitaakana shiyaakua wayuu maichesat jee na anajakana shia, nayoutuin tü nuluwataakalü anain Maleiwa jee mojutusai nia namüin. Süsaleenapejeʼe naya naainjala nutuma (Roma 1:24-27). Nukumajüin waya sümaa müin wakuwaʼipa maʼaka naaʼin niakai otta süpüla nnojoliinjanain waaʼinrüin kasa yarüttüsü. Nüküjain nüinkaainjachin neʼe wanee wayuu sümaa wanee jierü müleka kasaarüle nia sümaa (Gén. 1:26-28; Prov. 5:18, 19).

Eeshii na nnojoliikana mojuin amüin anajaa shiyaakua wayuu amaʼüjiraasü sukuwaʼipa otta aashajeʼeraa süchiki. Eesü nnojorüle süntapünaain suluʼu naaʼin wanaawain naya namaa na mojutukana amüin tü nuluwataakalü anain Maleiwa. Wanaawapejeʼe naya namaa süka nanajüin shia. Nalerajüinjatü tia na aʼyataashiikana nümüin Maleiwa. Anuu sünüiki tü Wiwüliakat wamüin: «Jia aikana apüla Jeʼwaa, jüleraja tü kasa mojusükat» (Sal. 97:10).

Na ooʼulaweekana suulia anajaa shiyaakua wayuu maichesat, kapüleesü namüin nooʼulaain suulia. Süka waleʼeruʼuin tü kaainjalaakat, eeshiijaʼa eejiraale waya sümaa tü kasa yarüttüsü  suchuntaakat waaʼin. Eesüjaʼa jülüjale waaʼin nnojoluin mojuin anajaa shiyaakua wayuu maichesat jee amaʼüjiraasü sukuwaʼipa (Jer. 17:9). Wainmapejeʼe na ooʼulaakana suulia, anoujashii naya maaʼulu wanaa wamaa. Eesia süpüla nuuntuin wanee wayuu nuuʼulaain suulia nünajüin shiyaakua wayuu maichesat. Wekirajaa süchiki tü sümakat tü Wiwüliakat süpüla nnojoliinjanain nimeejüin waya Satanaa sükajee tia.

Amojujaasü nakuwaʼipa na israeliitakana sutuma naaʼinrüin tü kasa mojusü suchuntaakat naaʼin. Eesü süpüla sülatüin wamüin tia. Anuu tü nümakat Santiago, chi nimüliakai Jesuu: «¿Kasa kaainjaleeka atüma wane wayuu? Kaainjaleeshi süka noonooin sümaa tü kasa mojusü keeʼireekat naaʼin. Müleka naaʼinrüle tü mojusükat keeʼireekat naaʼin, kaainjalaa tia» (Sant. 1:14, 15). Eeshi süpüla kaainjalain wanee wayuu jülüjale naaʼin waneepia tü kasa mojusü keeʼireekat naaʼin. Nnojo jülüjain waaʼin kasa yarüttüsü.

¿Kasa waaʼinrüinjatka ayatüle jülüjain waaʼin kasa yarüttüsü? Anuu tü waaʼinrüinjatkat naashin Jesuu: «Kaainjarale pia sutuma tü pajapükat jee sutuma tü puuʼuikat, anasü piʼyotoole sümaa pujutüin shia [...]. Shiale kaainjalain atuma pia tü poʼukot, anasü piyuʼrüle sümaa pujutüin shia» (Mat. 18:8, 9, TNM). Tü nüküjeekalü achiki Jesuu sükajee tia pütchikat, shia wasünneʼerüinjatüin woulia tü kasa kaainjaleenakalü atuma waya. ¿Jamüsü süpüla waaʼinrüin tia nümakat Jesuu weʼrüle shiyaakua wayuu maichesat?

Sujuʼitüle weʼrüin shiyaakua wayuu maichesat jee amaʼüjiraasü sukuwaʼipa, nnojo jülüjain waaʼin nnojoleerüin kasain alatüin wamüin sünainjee tia. Chajaa woʼu suulia. Wayokojoomaata tü telewisootkat, tü computadorkot jee tü serulaatkat. Süchikijee, jülüja waaʼin kasa anasü. Müle shia watuma, aneerü tü jülüjakat waaʼin, nnojoleerü mojuin.

Niʼrüle wanee wayuu shiyaakua wayuu maichesat jee amaʼüjiraasü sukuwaʼipa, nnojotsü motomaatüin shia naaʼin, kakalia jülüjain naaʼin otta eesü süntajaʼalaa sümüle suluʼu nikii. Sülatapa tia nümüin, eeshi süpüla nümülejeein nükorolo.  Müleka puuʼulaaichipale suulia anajaa shiyaakua wayuu maichesat otta süntajaʼawaire suluʼumüin pikii, soteesü paaʼin aleʼeinya tia otta yapeeshi pia süpüla piyoutamaatüin süchiki.

Jülüjeesü paaʼin tü nüchekakat Maleiwa püpüleerua otta paainjeein tü nümakat pümüin. Püshata nukuwaʼipa chi aluwataaushikai Pablo, anuu nünüiki: «Eesü taaʼin waneepia suulia taaʼinrüin tü süchekalakat taaʼin tamüiwa» (1 Cor. 9:27). Eeinjatü paaʼin suulia paaʼinrüin tü kasa mojusü süchekakat paaʼin. Paaʼinra tü sümakat Roma 12:2: «Müleka juuʼulaale suulia [jülüjain jaaʼin tü jülüjakat naaʼin na manoujainsaliikana], niiʼirateerü jukuaippa Maleiwa. Sünainjee tüü, juunteerü jiyaawatüin saaʼu tü nüchekakat jüpüleerua, je keeʼireejeerü jaaʼin jaaʼinreein tia». Müleka jülüjale paaʼin jee paaʼinrüle tü nüchekakat Maleiwa püpüleerua, talateerü paaʼin.

Pikirajaa sünain waneirua wetsiikulo süpüla wanaawainjatüin pukuwaʼipa sümaa tü keeʼireekat naaʼin Jeʼwaa otta piyaawatüinjatüin saaʼu tü kasa anakat süpüla paaʼinrüin. Süntajaapa suluʼumüin pikii kasa mojusü, jülüja paaʼin tü sümakat tia wetsiikulokalüirua. Anuu süpüshi: Salmo 119:37, Isaías 52:11, Mateo 5:28, Éfeso 5:3, Colosas 3:5 otta 1 Tesalónica 4:4-8.

¿Jama suchuntaale maʼin paaʼin pünajeein shiyaakua wayuu maichesat? Paaʼinra tü naaʼinrakat Jesuu (1 Ped. 2:21). Süchikijee woutiisain nia, kojuyatua nuuʼulakünüin aaʼin nutuma Satanaa. ¿Kasakaʼa naaʼinrüin? Ayatüsia niyoutuin tü nümakat Satanaa. Kojuyatua nüküjain Jesuu nümüin Satanaa tü sümakat tü Wiwüliakat. «Puʼuna pümata toulia Satanás», müshi nia nümüin. Nuʼunakalaka nuulia. Nnojoishi aakalüin Jesuu nüchiki chi Yolujaakai, akaainjachia piakai (Mat. 4:1-11). Ayateechia Satanaa namaa na nümaajanakana macheʼein wachiirua shiiʼiree jülüjain waaʼin kasa yarüttüsü, jalia waya suulia waakalüin nüchiki. Puunteerü puuʼulaain suulia pünajüin shiyaakua wayuu maichesat. Nükaalinjeechi pia Jeʼwaa süpüla puuʼulaʼaleʼeinya suulia tia.

Woʼuraaja waneepia nümüin Jeʼwaa jee wachunta kaalinwaa nümüin. Naashin Pablo waküjainjatü nümüin Maleiwa tü shapaakalü atuma waaʼin. Aneerü waaʼin nutuma otta nükajee Jesuu, jutateerü waaʼin suulia shapawaa aaʼin jee suulia jülüjaa aaʼin kasa mojusü (Filip. 4:6, 7). Sümaʼinruʼu eejiraain waya sümaa tü kasa mojusü suchuntaakat waaʼin, aneerü waaʼin nutuma Jeʼwaa. Müleka warütkaale nünainmüin, arütkaajeechi nia wanainmüin (Sant. 4:8).

Nnojoleena nimeejüin waya Satanaa müleka aleewale waya nümaa Jeʼwaa. Anuu nünüiki Jesuu nüchiki Satanaa: «Mayaainje nuluwataain [Satanaa] saaʼu wayuu sainküin mma, nnojoishi laülaain nia taaʼu» (Juan 14:30). ¿Jamüsü nütüjaaka saaʼu tia? Anuu nünüiki: «Chi kajünalakai taya, tamaashi waneepia. Nnojoishi nuuʼulaain taya tamüiwa, süka taaʼinrüin weinshi tü kasa talatakat atüma naaʼin» (Juan 8:29). Waaʼinrüle tü nümakat Jeʼwaa, nnojoleena nuuʼulaain waya wamüiwaʼa. ¡Wayouta anajaa shiyaakua wayuu maichesat jee amaʼüjiraasü sukuwaʼipa! Nnojoleena waya aakalüin nüchiki Satanaa.