1, 2. ¿Kasa anasü niʼraka wanee wayuu woutiisapa nia?

 ANATAʼALEESHIJAʼA maʼin wanee wayuu woutiisapa, jama naʼakain nia na nüpüshikana Jehová. Na wayuu naʼakainnapakana na nüpüshikana Jehová wanaawasü naaʼin nümaa David wanaa sümaa nümüin nümüin Jehová: «Anataʼaleeshijaʼa chi wayuu püneekakai süpüla chain nia suluʼu püpaatiase» (Sal. 65:4).

² Nnojotsü nüntirüin Jehová wayuu eekai eein naʼakamüin na aʼyataashiikana nümüin. Maʼaka wekirajaain sünain ekirajaaya mekietsat, arütkaashi Jehová nanainmüin na wayuu aleeweekana nümaa (Sant. 4:8). Naapapa naaʼin na wayuukana nümüin Jehová jee woutiisapa naya, aleewashii maʼin naya nümaa. Müsü nünüiki Jehová namüin: «[Taapeetkalaka] kasa anasü jümüin nnojorüleepa kasain choʼujaain jümüin» (Mal. 3:10; Jer. 17:7, 8).

3. ¿Kasa kojutuinjatka wamüin waapapa waaʼin nümüin Jehová otta woutiisapa waya? (Eclesiastés 5:4, 5).

³ Sünainjeʼereeya woutiisain waya oʼttushii waya sünain aʼyatawaa nümüin Jehová. Waapüinnapale waaʼin nümüin Jehová jee woutiisainnapale waya suluʼuinjatü waaʼin wekeraajüin wanüiki nümüin jaʼitainna wooʼulakünüin aaʼin otta wapüleeruaanüin aaʼin saaʼujee wanoujain (paashajeʼera Eclesiastés 5:4, 5). Oushikajaainjana waya süchiirua nukuwaʼipa Jesús otta oonooinjana waya sümaa tü nuluwataakalü anain (Mat. 28:19, 20; 1 Ped. 2:21). Sünain ekirajaayakat tüü, wayaawateerü  aaʼu tü waaʼinrajatkat süpüla wountuin tia.

WASHATA NUKUWAʼIPA JESÚS JAʼITAIRÜ KAPÜLEEIN WAMÜIN

4. ¿Kasa nüküjeeka achiki Jesús wamüin wanaa sümaa nümüin «müinjatü nülüʼüjakai saaʼin waneepia tü wunuʼu akachennakalü anain wayuu»? (Lucas 9:23).

⁴ Nnojo jülüjain paaʼin nnojoleerüin kasain alatüin pümüin süchikijee woutiisain pia. Nüküjain Jesús namüin na nikirajüinkana müinjatüin nalüʼüjakai saaʼin waneepia tü wunuʼu akachennakalü anain wayuu (paashajeʼera Lucas 9:23). ¿Shiache nüküjeeka achiki Jesús mülieenain waneepia na nikirajüinkana? Nnojo, eejeerü kasa anasü neʼreetka, mülieenapejeʼe naya süka süpüleeruaaneerüin naaʼin (2 Tim. 3:12).

5. ¿Kasa anasü neʼreetka na wayuu ooʼulaakana waneirua kasa süpüleerua naʼyataain nümüin Jehová naashin Jesús?

⁵ Eeshijaʼa püpüleeruaanüichire aaʼin saaʼujee punoujain natuma na püpüshikana jee shiale puuʼulaain suulia wanee aʼyatawaa anaka maʼin süpüla paaʼinmaain tü piʼyataainkat nümüin Jehová (Mat. 6:33). Müle pukuwaʼipa, anasü jülüjale paaʼin nnojoluin motuin naaʼin Jehová tü kasa anasü paaʼinrakat (Heb. 6:10). Eesüjaʼa piʼrüirüle shikeraajüin sünain pukuwaʼipa tü nümakat Jesús, tü makat mayaa: «Chi eekai nüpütüin nipia, nuwala, nushunuu, nüshi, nii, nüchonnii otta nuumain saaʼujee tekirajanain nia otta saaʼujee nüküjain tü pütchi anasükat, alanaʼaleejeeria maʼin tü kasa aapüneetkat nümüin maʼaka saaʼin polootua shikii, kepieechi nia, kawaleechi, kashunuujeechi, keijeechi, kachonjeechi jee koumainjeechi nia, jaʼitashi müliain atumawaa otta kateerü noʼu mapeena süpüla kaʼikat süpüshuaʼa» (Mar. 10:29, 30). Alanaʼaleesia tü kasa anasü naapakat Jehová pümüin suulialeʼeya tü puuʼulaakat süpüleerua piʼyataain nümüin (Sal. 37:4).

6. ¿Jamüsü ayatüinjatka püchecherüin paaʼin süchikijee woutiisain pia?

⁶ Süchikijee woutiisain pia ayatüinjatü püchecherüin paaʼin suulia paaʼinrüin tü suchuntaakat piʼiruku (1 Juan 2:16). Eesüjaʼa müle paaʼin maʼaka naaʼin chi aluwataaushikai Pablo süka püleʼeruʼuin süchiki kaainjalaa. Anuu nünüiki: «Shiaʼaya maʼin suluʼuka taaʼin toonooinjachin sümaa tü pütchi nuluwataakalü anain Maleiwa. Tü kasa suchuntaakat teʼiruku naata maʼin suulia tü kasa yaakat tekiiruʼu, müsü peʼipaajiraakai saaʼin. Müshijeseʼe müin püreesakai taaʼin sutuma tü kaainjalaakat, jama shiain taleʼeruʼuin achiki tia» (Roma 7:22, 23). Eesüjaʼa mojule paaʼin süka püchecherüinjatüin paaʼin waneepia suulia paaʼinrüin tü suchuntaakat paaʼin. Püchechereetpejeʼe paaʼin suulia paaʼinrüin kasa mojusü jülüjale paaʼin tü pümakat nümüin Jehová wanaa sümaa paapüin paaʼin nümüin. ¿Jamüsü watüjaaka saaʼu tia?

7. ¿Jamüshii waneepieenaka waya nümaa Jehová waapüle waaʼin nümüin?

⁷ Naapapa naaʼin wanee wayuu nümüin Jehová nnojotsü naaʼinrüinjatüin tü nüchekakat neʼe nümüiwaʼa. Niyoutuinjatü tü kasa mojusü suchuntaakat naaʼin otta nnojoluinjatü naaʼinrüin tü keeʼireekat naaʼin mojule shia noʼuluʼu Jehová (Mat. 16:24). Suchuntaale waaʼin waaʼinrüin wanee kasa mojusü jee sülatüle wanee kasa wamüin, nnojoleerü wainmajakuʼu müin waaʼin sünain tü waaʼinrajatkat süka jülüjain waaʼin tü wamakat nümüin Jehová wanaa sümaa waapüin waaʼin nümüin. Waaʼinrüle tia washateerü nukuwaʼipa Job. Anuu nünüiki: «Ayatajachia neʼe taya nümaa Jehová» (Job 27:5). Nüküjain tia soʼunnaa niʼrüin maʼin müliaa.

8. ¿Jamüsü wachechereetka waaʼin suulia waaʼinrüin tü suchuntaakat waaʼin jülüjale waaʼin tü wamakat nümüin Jehová wanaa sümaa waapüin waaʼin nümüin?

⁸ Wachechereerü waaʼin suulia waaʼinrüin  tü kasa mojusü suchuntaakat waaʼin jülüjale waaʼin waküjain nümüin Jehová waaʼinrüinjatüin tü nüchekakat wapüleerua. Jamüshiijaʼa waya nnojoleena aʼalaajaain suʼupala wayuu eekai kaʼwayuusein, jama waküjaitpain nümüin Jehová nnojoleerüin waaʼinrüin wanee kasa eekai müin aka saaʼin tia. Nnojoleena müliain waya mapa sutuma tü kasa mojusü suchuntaakat waaʼin müleka wasünneʼeramaatüle tü kasa mojusü antajaakat suluʼu waaʼin, nnojoleena waya suluʼupünaain napüna na mojulaashiikana (Prov. 4:14, 15).

9. ¿Jamüsü waaʼinmaajeetka tü sünainpünaakat wanoula jülüjale waaʼin tü wamakat nümüin Jehová wanaa sümaa waapüin waaʼin nümüin?

⁹ ¿Kasa waaʼinreetka saapünüle wamüin wanee aʼyatawaa kapüleejeetka atuma wamüin woʼunuin sünain tü outkajawaakat? Nnojoleerü waapaain, nnojoleerü jülüjakuʼu müin waaʼin aneerüle wakuwaʼipa sutuma süka watüjaatüjülüin saaʼu waaʼinmaainjatüin tü outkajawaakat. Jülüjale waaʼin tü naaʼinrakat Jesús, wayoutamaateerü tü mojeetkalü atuma wakuwaʼipa nümaa Jehová. Naaʼinrüin Jesús waneepia tü anashiikat nümüin chi Nüshikai süpüla talatüin nia nümaa (Mat. 4:10; Juan 8:29).

10. ¿Kasa naaʼinreetka Jehová wapüleerua süpüla ayatüin woushikajaain süchiirua nukuwaʼipa Jesús süchikijee woutiisaa?

¹⁰ Atüjaaneerü aaʼu woushikajaain süchiirua nukuwaʼipa Jesús sutuma tü waaʼinrakat soʼunnaa weʼrüin müliaa otta suuʼulakünapa waaʼin. Anuu tü sümakat tü Bibliakat süchiki tü naaʼinreetkat Jehová wapüleerua: «Sutuma waneepiain Maleiwa jümaa, nnojoleerü nuuʼulaain suuʼulakünüin jaaʼin süka wanee kasa nnojoleetka jüchecherüin atuma jaaʼin. Suuʼulakünapa jaaʼin nükaalinjeena jia Maleiwa süpüla jüchecherüinjatüin jaaʼin soʼunnaa tia» (1 Cor. 10:13).

 PUUSHIKAJAA WANEEPIA SÜCHIIRUA NUKUWAʼIPA JESÚS

11. ¿Kasa anaka süpüla paaʼinrüin süpüla puushikajaain waneepia süchiirua nukuwaʼipa Jesús? (Piirakaa sümüin tü ayaakuaakat).

¹¹ Aʼyataashi Jesús süka süpüshuaʼa naaʼin nümüin Jehová otta aleewashi nia nümaa süka nuʼuraajüin waneepia nümüin (Luc. 6:12). Tü paaʼinrajatkat süpüla puushikajaain süchiirua nukuwaʼipa Jesús süchikijee woutiisain pia shia paaʼinmaain paaʼinrüin waneirua kasa aleeweechika atuma pia nümaa Jehová. Müsü tü Bibliakat: «Eerejeʼeya wanee kasa waaʼinraka shiiʼiree wakooʼomüinreein waʼyataain nümüin Maleiwa, ayataʼaya waaʼinrüin shia» (Filip. 3:16). Eesüjaʼa paapawaijeerüle nachiki waneinnua wawalayuu akooʼomüinrakana naʼyataain nümüin Jehová maʼaka naaʼin na oʼunakana sünain tü Ekirajawaa Napülajatkat na Aküjaliikana Pütchi jee nayale na akolojookana eere choʼujaain Aküjalii pütchi. Eere süpüla puuntuin paaʼinrüin tia, paaʼinra shia. Napüshuaʼa na aʼyataashiikana nümüin Jehová nachajaain maʼin sukuwaʼipa süpüla nakooʼomüinrüin tü naʼyataainkat nümüin (Aluw. 16:9). Isale püchiki pukooʼomüinrüin piʼyataain maaʼutpünaa, nnojo jülüjain paaʼin nayain anaʼleein akuwaʼipa puulia na ountakana tia. Tü anakat süpüla paaʼinrüin shia püchecherüin paaʼin sünain anoujaa (Mat. 10:22). Jülüja paaʼin talatüin Jehová pümaa süka piʼyataain nümüin wanaapünaa sümaa pukuwaʼipa. Paaʼinrüle tia, waneepieechi pia oushikajaain süchiirua nukuwaʼipa Jesús süchikijee woutiisaa (Sal. 26:1).

12, 13. ¿Kasa paaʼinrajatka piyaawatüle saaʼu nnojoluin paaʼin sünain aʼyatawaa nümüin Jehová? (1 Corinto 9:16, 17; paashajeʼera tü pütchikat « Paaʼinrajatka süpüla ayatüin pia sünain tü ayoujirawaakat»).

¹² Piyaawatüle saaʼu nnojoluin puʼuraajüin nümüin Jehová süka süpüshuaʼa paaʼin jee  nnojorüle paaʼin sünain aküjaa pütchi jee aashajeʼeraa tü Bibliakat, nnojo jülüjain paaʼin nnojoluin eein paaʼu tü nüpülainkat Jehová. Süka nnojoluin lotuin wakuwaʼipa, eesü kaʼi nnojoleetka oʼu waaʼin sünain aaʼinraa wanee kasa. Sülatüle pümüin tia, anasü jülüjale paaʼin nukuwaʼipa Pablo. Nütüjaa aaʼulu Pablo kapüleʼewaijeerüin nümüin naaʼinrüin tü niʼyataainkat mayaainjeʼe nüchajaain sukuwaʼipa süpüla nüshatüin nukuwaʼipa Jesús (paashajeʼera 1 Corinto 9:16, 17). Naashin Pablo jaʼitashi nuluwanaajuushire sünain aaʼinraa tü niʼyataainkat, naaʼinrajatia neʼe tia, jama shiain tü aʼyatawaa eʼitaanakat najapuluʼu. Tü nüküjeekalü achiki Pablo shia nikeraajeein tü niʼyataainkat, jaʼitairü jamüin naaʼin.

¹³ Maʼaka naaʼin Pablo paaʼinra kasa anasü jaʼitairü jamüin paaʼin. Ayatüle paaʼinrüin kasa anasü aneerü paaʼin sutuma. Pikirajaale waneepia sünain tü Bibliakat, puʼuraajüle, puutkajaale otta püküjale pütchi waneepia, waneepieechi pia oushikajaain süchiirua nukuwaʼipa Jesús süchikijee woutiisaa. Akatsüinraajeerü naaʼin na wawalayuukana neʼrüle pia waneepiain sünain aʼyatawaa nümüin Jehová (1 Tes. 5:11).

«AYATAʼAYA JÜSAKIREʼERÜIN JAAʼIN»

14. (1) ¿Kasa püsakireʼerüinjatka anain paaʼin? (2) ¿Jamüsü paaʼinrajatka tia? (2 Corinto 13:5).

¹⁴ Süchikijee woutiisain pia anasü püsakireʼerüle paaʼin sünain pukuwaʼipa otta sünain tü paaʼinrawaikat (paashajeʼera 2 Corinto 13:5). Jülüja paaʼin puʼuraajüle waneepia, paashajeʼerüle sümaa pikirajaʼawalin sünain tü Bibliakat, puutkajaale otta püküjale pütchi waneepia. Püchajaa sukuwaʼipa süpüla kamalain pümüin aaʼinraa tia süpüla anain pukuwaʼipa sünainjee. Püsakireʼera paaʼin sünain tüü: «¿Tountuinche tekirajüin wayuu sünain tü sütüjaainjatkalü aaʼu wayuu palajana suluʼujee tü Bibliakat? ¿Kasache taaʼinrajatka süpüla kamalain tamüin tekirajüin wayuu? Toʼuraajapa nümüin Jehová, ¿lotusüche tanüiki nümüin? ¿Jaʼyasüche saaʼu teʼitaain taaʼin nünain sükajee tü tamakat nümüin? ¿Tachajaainche sukuwaʼipa süpüla waneepiain taya sünain tü outkajawaakat? ¿Kasa taaʼinrajatka süpüla jülüjain taaʼin tü ekirajünakalü anain sünain tü outkajawaakat otta süpüla anain maʼin tanüiki tasoutapa sünain?».

15, 16. ¿Kasa pütüjaka sünainjee tü alatakat nümüin Robert?

¹⁵ Anasü püsakireʼerüle paaʼin süpüla piyaawatüin saaʼu tü punouteʼerajatkat sünain pukuwaʼipa. Jülüja waaʼin tü alatakat nümüin wanee wawala Robert nünülia. Müshi nia: «Wanaa sümaa 20 touyase aʼyataapuʼushi taya soʼu shiatapünaa kaʼi. Soʼu wanee kaʼi, suunejaain taya wanee takonpañeetse shipialuʼumüin. ‹Yüütüüisü  miichipaʼa›, müsü shia tamüin. Mayaainjeʼe ‹nnojo› tamüin sümüin, nnojotpejeʼe lotuin tanüiki uwatuwoʼushi. Taküjain sümüin mapa jamüin nnojolinjachika toʼunuin shipialuʼumüin». Mayaainjeʼe nnojolin kaainjalain Robert sünainjee tü ooʼulakünakalü aka naaʼin, niyaawata aaʼulu pansaʼaleeinjatüin nünüiki uwatuwoʼushi. Anuu nünüiki: «Nnojotsü taaʼinrüin tü naaʼinrakat José, chi apantajaakai sümaʼanajee tü nuʼwayuusekat Potifar (Gén. 39:7-9). Eetaayaai antapünaain suluʼu tekii kapüleeinjatüin tamüin tayoutajaain sümaa tü sümakat tamüin. Sünainjee tü alatakat tamüin tayaawata aaʼu icheinjatüin maʼin tanoula».

¹⁶ Piyoutuirüle paaʼinrüin kasa mojusü, anasü paaʼinrüle tü naaʼinrakat Robert. Püsakira paaʼin sünain tüü: «‹Nnojo›, ¿müshiche taya uwatuwoʼushi?». Nnojo piyüülajaain piyaawatüle saaʼu punouteʼerajatüin wanee kasa sünain pukuwaʼipa, anasü süka piyaawatüin saaʼu tia. Paashajaa süchiki tia nümaa Jehová otta püchajaa sukuwaʼipa süpüla paaʼinrüin tü nüchekakat (Sal. 139:23, 24).

17. ¿Jameerü pütchi nüchiki Jehová lotule wakuwaʼipa waneepia? Püküja süchiki nukuwaʼipa Robert.

¹⁷ Eesü sooʼomüin tü watüjakat sünainjee tü alatakat nümüin Robert. Anuu nünüiki: «Süchikijee ‹nnojo tamüin sümüin›, müsü shia tamüin: ‹Tatüjaaitpa aaʼu nnojoluin piamain pukuwaʼipa›. ‹¿Süka jamüin?›, tamaka sümüin. Nüküjain wanee saʼaleewain sümüin aküjaipuʼukai pütchi paala sünain piamain nakuwaʼipa na jimaʼalii jee na majayünnüü aküjaliikana pütchi nüchiki Jehová. ‹Tooʼulakeerüinjaʼa naaʼin Robert›, sümaka nümüin chi saʼaleewainkai. Akalajasaʼa nnojoluin taaʼinrüin tia suulia mojutuin atumawaa Jehová».

18. ¿Kasa paaʼinreeka amüin süchikijee woutiisaa? (Paashajeʼera tü pütchikat « Piamasü pütchi jalouijeetka pümüin»).

¹⁸ Paapapa paaʼin nümüin Jehová jee woutiisapa pia, jaʼyasü paaʼu kojuteein pümüin Jehová otta piʼraajireein nünülia sümüin wayuu jaʼitairü kasain alatüin pümüin. Anasü pütüjaale saaʼu niʼrüin Jehová tü alatakat pümüin otta tü paaʼinrakat süpüla püchecherüin paaʼin suuʼulakünapa paaʼin. Niʼrüin tü paaʼinrakat süpüla waneepiain pia nümaa. Aneerü pukuwaʼipa nutuma sünainjee paaʼinrüin tia. Nnojo mmoluin pia, nükaalinjeechi pia Jehová sükajee tü nüpülainkat süpüla paaʼinrüin tü anakat (Luc. 11:11-13). Nükaalinjeechi pia Jehová süpüla puushikajaain waneepia süchiirua nukuwaʼipa Jesús süchikijee woutiisaa.