1. Püküja waneirua kasa weʼraka süka naʼakain waya na aʼwaajakana Jehová.

 ANATAʼALEESHIIJAʼA waya süka naʼakain waya na wayuu aʼwaajakana Jehová. Mayaainjeʼe suʼunuin suluʼu keemain maʼin tü mmapaʼakat maaʼulu, anasü waaʼin süka naapüin wamüin Jehová na wawalayuukana. Müshii naya maʼaka saaʼin wapüshi wamüin (Sal. 133:1). Sükajee tü nikirajakalü anain waya Jehová wountuin talatüin waya sümaa wapüshi (Éf. 5:33–6:1). Otta kekiishii waya nutuma süpüla jutatüin waaʼin suulia shapawaa aaʼin jee süpüla talatüin waaʼin.

2. (1) ¿Kasa waʼyataainjatka achiirua? (2) ¿Jamüsü waaʼinrüinjatka tia?

² Aʼyataainjanapejeʼe waya süchiirua nnojoliinjanain wamalajaain suulia aʼyatawaa nümüin Jehová. Eeshiijaʼa jashichire waya saaʼujee tü naaʼinrakat jee tü namakat na waneinnua. Eesüjaʼa sümalajaale waaʼin saalinjee mojuin watuma wanee kasa, shialeekajaʼa kojuyatuale shia waaʼinrüin. Sutuma tü wekirajaainjatkalü anain sünain ekirajaayakat tüü, ayateena waya aʼyataain nümüin Jehová mojule waaʼin sutuma tü naaʼinrakat wanee wawala, mojule waaʼin sutuma wanee kasa naaʼinraka waʼwayuuse otta mojule waaʼin saalinjee wanee kasa waaʼinraka. Wekirajaapa sünain tia waneʼewai sukua, wekirajaajeerü nachiki waneinnua wayuu namaiwajana saashajaakana achiki tü Bibliakat otta tü watüjeetkat nanainjee.

NAAINJALE KASA MOJUSÜ WAMÜIN WANEE WAWALA

3. ¿Kasa kapüleeka namüin napüshuaʼa na anoujashiikana?

³ Tü kapüleekalü aaʼujee. Eejeena wawalayuu aainjeenakana kasa mojushiijeetka wamüin. Eesüjaʼa sümalajaale waaʼin sutuma wanee kasa naainjaka. Müshiʼiya na laülaashiikana eesüjaʼa mojule natuma wanee kasa. Sünainjee tia alatakat, eesüjaʼa  wainmajüle waaʼin nayale na anoujashii shiimainshiikana na Aküjaliikana pütchi. Eesüjaʼa jülüjale waaʼin anain nnojoliire waashajaain namaa na aainjakana kasa mojusü wamüin jee shiale anain nnojoliire woutkajaain (Sof. 3:9). ¿Anasüche waaʼinrüle tia? Anashii wekirajaale süchiki tü naaʼinrakat wanee wayuu nümaiwajachi, aainjünakai amüin kasa mojusü.

4. ¿Kasa alataka nümüin chi aluwataaushikai Pablo?

⁴ Wanee wayuu nümaiwajachi. Nütüjaa aaʼu chi aluwataaushikai Pablo naleʼeruʼuin süchiki kaainjalaa na anoujashiikana. Jamüshijaʼa nuutkajaapa namaa na anoujashii chajanakana Jerusalén, eejana waneinnua nnojotka anain naaʼin nümaa (Aluw. 9:26). Eejana waneinnua mojukana anüiki nüchiki (2 Cor. 10:10).Soʼu wanee kaʼi niʼrüin Pablo wanee wayuu laülaakai aaʼin sünain anoujaa naaʼinrüin wanee kasa nnojotka anain, mojeetka atuma nakuwaʼipa na wane anoujashiikana (Gal. 2:11, 12). Jee müsia mojushaatasü naaʼin Pablo sutuma tü naaʼinrakat Marcos, wanee aʼyataajiraakai nümaa (Aluw. 15:37, 38). Sünainjee tia alatakat nümüin Pablo, eesüjaʼa jülüjale naaʼin anain nükaaʼinjaale noulia na anoujashiikana. Nnojotpejeʼe naaʼinrüin Pablo tia, shia naaʼinmaaka maʼin tü kasa anakat natuma otta ayatüshi nia aʼyataain maʼin nümüin Jehová. ¿Kasa naaʼinraka süpüla nuuntuin tia?

5. ¿Kasa naaʼinraka Pablo suulia nükaaʼinjaain noulia na anoujashiikana? (Colosas 3:13, 14; piirakaa sümüin tü ayaakuaakat).

⁵ Nnojotsü naaʼinmaain maʼin Pablo tü kasa mojukat natuma na anoujashiikana, shia naaʼinmaaka tü kasa anakat natuma süka alin naya nüpüla. Müsüjeseʼe nülatirüin sooʼopünaa naaʼin tü aainjünakat nümüin. Kaawainsü nünüiki wanaa sümaa nümüin: «Ayataʼaya jülatirüin sooʼopünaa jaaʼin naainjala na waneinnua jee motomaata jaaʼin tü kasa mojusü aainjünakat jümüin» (paashajeʼera Colosas 3:13, 14). Mayaainjeʼe nüpütüin nia Marcos nümüiwaʼa soʼu tü palajatkat nukua wattapünaa sünain aküjaa pütchi, nnojoishi jashichikuʼu müin Pablo nümüin. Tü naaʼinrakat Pablo shia nüchajaain sukuwaʼipa süpüla anajiraainjachin nia nümaa. Nüküjain Pablo suluʼu tü karaloʼuta nüshajakat namüin na anoujashii chajanakana Colosas, nükaalinjain maʼin nia Marcos jee nümülialüin naaʼin (Col. 4:10, 11). Soʼunnaa püreesain Pablo chaa Roma, nuchuntuin nümüin Marcos nüntajachin nümaʼanamüin süpüla nükaalinjain nia (2 Tim. 4:11). Nnojotkalaka jülüjain naaʼin Pablo mepin nakuwaʼipa na anoujashiikana. ¿Kasa watüjaka sünainjee tü naaʼinrakat?

6, 7. ¿Kasa waaʼinrajatka süpüla aijiraain waya namaa na wawalayuukana mayaainjeʼe eein tü kasa naainjakat wamüin? (1 Juan 4:7).

 ⁶ Tü watüjakat. Keeʼireesü naaʼin Jehová ayatüinjanain aijiraain waya namaa na wawalayuukana (paashajeʼera 1 Juan 4:7). Naainjale wanee kasa mojusü wamüin wanee wawala, nnojo jülüjain waaʼin naaʼinrüin tia süka üttüin naaʼin wanain. Shia anaka aluʼu jülüjale waaʼin kachiiruain naaʼin chia wawalakai naaʼinrüin tü nüchekakat Jehová (Prov. 12:18). Mayaainjeʼe waleʼeruʼuin süchiki kaainjalaa, ayatüshii alin waya nüpüla Jehová. Nnojoishii waya nüpütüin wamüiwaʼa mojule watuma wanee kasa jee nnojoishi jashichikuʼu müin nia wamüin (Sal. 103:9). Washata nukuwaʼipa chi Washikai, moto waaʼin tü naainjakat wamüin na waneinnua (Éf. 4:32–5:1).

⁷ Choʼujaashii paaʼinwajiraainjanain waya namaa na wawalayuukana süka sülüʼülüin maʼin nükalia Maleiwa. Eeshiijaʼa mülieenale maʼin waya atumawaa jee püreesale waya. Sülatapa tia wamüin, choʼujaajeena maʼin wamüin na wawalayuukana (Prov. 17:17). Jülüja waaʼin tü alatakat nümüin Josep, a wanee wawala kepiakai España. Püreesashi nia namaa waneinnua wawalayuu süka nayoutuin surulaalüin naya. Anuu nünüiki: «Süka kottiraain waya suluʼu tü kaatsetkat, eeshii jashichijiraale waya. Choʼujaasüjeseʼe walatirüinjatüin sooʼopünaa waaʼin tü waainjakat jee motomaatüinjatüin shia waaʼin. Sutuma waaʼinrüin tia, paaʼinwajiraashii waya jee aaʼinmajiraashii waya noulia na wane püreesashiikana. Sotusü taaʼin wanaa sümaa seewaain tatüna. Süka kaülajain shia atumawaa isasü tachiki takutuleʼerüin shia. Eejachi wanee wawala ashijaʼawaikai tamüin tasheʼin jee nükaalinjawalin taya sünain aaʼinraa waneirua kasa. Soʼu kaʼikat tia, tayaawata aaʼu tü naaʼinrakat wanee wayuu shiimainre alin nüpüla wane». Wakumajamaata sukuwaʼipa mojujiraale waya nümaa wanee wawala

MOJULE WAAʼIN SUTUMA WANEE KASA NAAʼINRAKA WAʼWAYUUSE

8. ¿Kasa kapüleeka namüin na kaʼwayuuseshiikana?

⁸ Tü kapüleekalü aaʼujee. Saashin tü Bibliakat eʼreena müliaa na wayuu kasaatkana (1 Cor. 7:28). Alateerü tia namüin süka naleʼeruʼuin süchiki kaainjalaa, naatain nakuwaʼipa jee naatain tü kamalainkat namüin. Eesüjaʼa neʼrüle mojuin sutuma naʼwayuuse wanee kasa nnojotka neʼrüin wanaa sümaa namüraajiraain. Eeshiijaʼa mojujiraale naya sünainjee tia. «Pia kasitka tia», eeshii namajiraale. Eesüjaʼa jülüjale naaʼin anain nooʼulaajiraale sutuma mojujiraain naya. ¿Shiache shipika tia? b Wekirajaa süchiki wanee wayuu sümaiwajatü kapüleeka amüin kepiajiraain shia nümaa suʼwayuuse.

9. ¿Kasa alataka sümüin Abigaíl?

⁹ Wanee wayuu sümaiwajatü. Abigaíl sünülia nuʼwayuuse Nabal, wayuu eʼrüi wayumüin sümaa mojulaain nia (1 Sam. 25:3). Kapüleekajasaʼa sümüin Abigaíl kepiain shia nümaa. Soʼu wanee kaʼi eʼrüijaashi wayumüin Nabal nümüin David, chi aluwataainjachikai saaʼu Israel otta namüin na nümaajanakana (1 Sam. 25:9-13). Shia wanee kasa eekai süpüla sajayatüin Abigaíl süpüla suuʼulaain nuulia Nabal. Eesüjaʼa süpüla suʼluwataain nuulia Nabal jee suuʼulaain nuʼutunuin aaʼin nutuma David. Nnojotpejeʼe saaʼinrüin tia, aashajaasü shia nümaa David suulia nuʼutunuin aaʼin Nabal (1 Sam. 25:23-27). ¿Jamüsü saaʼinraka tia?

10. ¿Jamüsü waneepiaka Abigaíl nümaa chi suʼwayuusekai mayaainjeʼe kapüleein sümüin kepiajiraain shia nümaa?

 ¹⁰ Aishi maʼin Jehová süpüla Abigaíl otta kojutusü sümüin tü nümakat süchiki tü kaʼwayuuseekat. Sütüjaa aaʼulu tü nümakat Jehová nümüin Adán wanaa sümaa naapüin Eva nümüin (Gén. 2:24). Sütüjaa aaʼulu Abigaíl kasaarüle wanee wayuu süpülajatü kaʼikat süpüshuaʼa naashin Maleiwa. Süka saaʼinmaain saaʼinrüin tü nüchekakat Maleiwa, aashajaasü shia nümaa David süpüla nnojolinjachin nuʼutunuin aaʼin Nabal otta süpüla nnojoliinjanain noʼutunuin aaʼin na wayuu kepiakana sümaa. «Taya kasitka tü kasa alatakat», müsü shia nümüin David mayaainjeʼe nnojoluin shiain kasirüin tia. Aikajasaʼa maʼin Abigaíl nüpüla Jehová, tü wayuu meimmoluinkat otta tü kachipünaakalü aaʼin nakuwaʼipa na waneinnua. ¿Kasa natüjaka na kaʼwayuuseshiikana sünainjee sukuwaʼipa Abigaíl? Wekirajaa süchiki tia.

11. (1) ¿Kasa keeʼireeka naaʼin Jehová napüleerua na kaʼwayuuseshiikana? (Éfeso 5:33). (2) ¿Kasa pütüjaka sünainjee sukuwaʼipa Carmen? (Piirakaa sümüin tü ayaakuaa ).

¹¹ Tü watüjakat. Keeʼireesü naaʼin Jehová kojutuinjatüin namüin na kaʼwayuuseshiikana tü sukuwaʼipakat kaʼwayuusee, jaʼitairü kapüleein namüin nayaawatüin saaʼu sukuwaʼipa naʼwayuuse. Talatakajasaʼa naaʼin Jehová neʼrapa na kaʼwayuuseshiikana nachajaain sukuwaʼipa süpüla anajiraain naya, kojutujiraain otta süpüla aijiraain naya (paashajeʼera Éfeso 5:33). Jülüja waaʼin sukuwaʼipa Carmen. Aipirua juya kasaalüin shia wanaa sümaa shikirajaain sünain tü Bibliakat namaa na Aküjaliikana pütchi otta woutiisasü shia. Müsü sünüiki: «Niyoutuin taʼwayuuse tapüleerua woutiisain taya. Jülüjasü naaʼin mojuteechin nia tatuma sünainjee taʼyataain nümüin Jehová. Airuʼutsü nünüiki tamüin otta nüküjain tamüin nuuʼulaajeerüin taya ayatüle tanoujain». Nnojotpejeʼe amalajaain saaʼin Carmen sünainjee tia. Soʼunnaa 50 juya süchajaain maʼin sukuwaʼipa süpüla alinjachin süpüla suʼwayuuse jee kojutuinjachin nia sümüin. Anuu sooʼomüin sünüiki: «Kakalia mapa, tayaawata aaʼu nukuwaʼipa chi taʼwayuusekai otta tachajaain sukuwaʼipa süpüla anainjatüin tanüiki nümüin. Tatüjaa aaʼu tü jülüjakat naaʼin Jehová süchiki kaʼwayuusee, tachajaain maʼin sukuwaʼipa süpüla waneepiainjatüin taya nümaa taʼwayuuse. Süka alin taya nüpüla Jehová nnojotsü amalajaain taaʼin». c Mojule paaʼin sutuma wanee kasa naaʼinraka puʼwayuuse, nükaalinjeerü pia Jehová süpüla pülatüin süchikumüin tia.

 MOJULE WAAʼIN SAALINJEE WANEE KASA WAAʼINRAKA

12. ¿Jamüsü waaʼin kaainjarale waya?

¹² Tü kapüleekalü aaʼujee. Eesüjaʼa jülüjale waaʼin mepin tü wakuwaʼipakat kaainjarale waya. Saashin tü Bibliakat, mojusü maʼin waaʼin kaainjarale waya (Sal. 51:17). Alatüsü tia nümüin Robert, wanee wawala aʼyataaka maʼin süchiirua neʼipajanain na laülaashiikana. Kaainjalashi nia otta nütüjaa aaʼu mojuin naaʼin Jehová nutuma. Müshi nia: «Mojushaatasü maʼin taaʼin saalinjee taainjala. Tatüjaa aaʼulu yarüttüin takuwaʼipa noʼuluʼu Jehová. Aʼyalajüshi taya sümaa toʼuraajüin nümüin Jehová. Jülüjasü taaʼin nnojoleerüin naapüin tanüiki piantua, jama mojuin naaʼin tatuma». Kaainjarale waya, mojushaatasü waaʼin. Eesüjaʼa jülüjale waaʼin nüpütüin waya Jehová wamüiwaʼa otta nnojoliinnapain anain waya süpüla waʼyataain nümüin (Sal. 38:4). Mülejeʼeya paaʼin, akatsüinraajeerü paaʼin sünainjee nukuwaʼipa wanee wayuu nümaiwajachi ayatakai aʼyataain nümüin Jehová mayaainjeʼe kaainjalain nia.

13. (1) ¿Kasa naainjalaka Pedro? (2) ¿Kasa mojusü naaʼinraka süpülapünaa tia?

¹³ Wanee wayuu nümaiwajachi. Wanee ai süpülapünaa nuʼutunuin aaʼin Jesús, naaʼinrüin Pedro waneirua kasa mojuka kaainjalaka anainjee nia. Müshi Pedro nümüin Jesús sümaa yaletüin naaʼin: «Nnojoleechi pia tapütüin pümüiwaʼa, jaʼitashi napütüin pia pümüiwaʼa na waneinnua» (Mar. 14:27-29). «Nnojo jutunkajüin», müshi Jesús namüin na nikirajüinkana wanaa sümaa chajanain naya suluʼu tü mma kanüliakat Getsemaní, ayatapejeʼe atunkuin Pedro nüpüla Jesús (Mar. 14:32, 37-41). Shiasaʼa nütaʼünapa Jesús, apantajaashi Pedro (Mar. 14:50). Mapa, apünüintua nüküjain nnojolin niʼraajüin Jesús (Mar. 14:66-71). ¿Kasa naaʼinraka Pedro niyaawatapa saaʼu kaainjalain nia? Mojushaatasü naaʼin sümaa niʼyalajüin maʼin (Mar. 14:72). ¿Jamüsüche naaʼin Pedro niʼrapa kachetüin Jesús sünain tü wunuʼukot? Eesüjaʼa mojushaatale naaʼin.

14. ¿Jamüshi nnojoikai nümalajaain Pedro suulia aʼyatawaa nümüin Jehová? (Piirakaa sümüin tü ayaakuaa sünainkat süta tü rewiisütakat).

¹⁴ Nnojoishi amalajaain Pedro jee ayatüshi aʼyataain nümüin Jehová. ¿Kasa naaʼinraka süpüla nuuntuin tia? Nnojoishi akatalaain nia noulia na anoujashiikana, müshijeseʼe nakatsüinrüin naaʼin (Luc. 24:33). Nüsoʼirapa aaʼin Jesús süchikijee outaa, eeʼiyalaashi nia nümüin Pedro, eesüjaʼa naaʼinrüle tia süpüla nükatsüinrüin naaʼin (Luc. 24:34; 1 Cor. 15:5). Nnojoishi aʼülüjain Jesús nümüin saalinjee tü  naaʼinrakat. Tü naaʼinrakat Jesús shia naapüin sooʼomüin aʼyatawaa nümüin (Juan 21:15-17). Nnojoishi amalajaain Pedro süka nütüjaain saaʼu nnojolin niyüülajüin nia Jesús otta süka nakaalinjain nia na anoujashiikana. Wekirajaa süchiki tü watüjakat sünainjee nukuwaʼipa Pedro.

15. ¿Kasa keeʼireeka naaʼin Jehová watüjaain aaʼu? (Salmo 86:5; Roma 8:38, 39; piirakaa sümüin tü ayaakuaakat).

¹⁵ Tü watüjakat. Keeʼireesü naaʼin Jehová wayaawatüin saaʼu alin maʼin waya nüpüla otta nülatireerüin sooʼopünaa naaʼin waainjala (paashajeʼera Salmo 86:5; Roma 8:38, 39). Nnojotsü mojuin mojule waaʼin saalinjee waainjala, shiainjaʼa mojuin jülüjale waaʼin maalin waya nüpüla Jehová otta nnojoleerüin motuin naaʼin waainjala. Achuntamaatüinjana waya kaalinwaa kaainjarale waya. Anuu nünüiki Robert, chi wachuntayüikai anülia suluʼu pütchi 12: «Tayaawata aaʼu kaainjalain taya süka jülüjain taaʼin tounteerüin tachecherüin taaʼin tamüiwaʼa suuʼulakünapa taaʼin». Niyaawata aaʼu nüküjainjatüin tia namüin na laülaashiikana. Müshi Robert: «Taashajaapa namaa na laülaashiikana, naküjain tamüin alin taya nüpüla Jehová sümaa nnojoleechin nüpütüin taya tamüiwaʼa. Nnojoishi taya nayüülajüin». Watüjaa aaʼu aishaatain waya nüpüla Jehová otta moteerüin naaʼin waainjala wayaawajaale suulia, wachuntule kaalinwaa otta wachajaale sukuwaʼipa süpüla nnojoluin waaʼinrüin tia piantua (1 Juan 1:8, 9). Jülüjale waaʼin alin maʼin waya nüpüla Jehová, nnojoleena waya amalajaain waaʼinrüle kasa mojusü.

16. ¿Jamüsü keeʼireeka paaʼin ayatüin piʼyataain nümüin Jehová?

¹⁶ Kojutusü maʼin nümüin Jehová süpüshuaʼaleeya tü kasa waaʼinrakat sünain aʼyatawaa nümüin maaʼulu soʼutpünaa keemain maʼin tü mmapaʼakat. Nükaalinjeena waya süpüla nnojoliinjanain wamalajaain jaʼitairü kasain maʼin alatüin wamüin. Anasü wakooʼomüinrüle naalin na wawalayuukana wapüla süpüla walatirüin sooʼopünaa waaʼin tü naainjakat wamüin. Jaʼyeerü waaʼu alin wapüla Jehová jee kojutuin wamüin sukuwaʼipa kaʼwayuusee, wachajaale sukuwaʼipa anajiraain waya sümaa waʼwayuuse. Kaainjarale waya, wachunta kaalinwaa nümüin Jehová, nnojo motuin waaʼin alin waya nüpüla otta moteerüin naaʼin waainjala, ayataʼaya waʼyataain nümüin. Anasü maʼin «ayatüleʼeya waaʼinrüin kasa anasü, weʼreenaka kasa anasü suluʼujee tia» (Gal. 6:9).