1. ¿Kasa eeka süpüla jülüjain naaʼin waneinnua wawalayuu?

 SAASHIN tü Bibliakat talatüshi maʼin Jehová namaa na aʼyataashiikana nümüin (Sal. 149:4). Eepejeʼe waneinnua wawalayuu mojukana aaʼin sutuma jülüjain naaʼin nnojolin talatüin Jehová namaa. Süküjain tü Bibliakat eejanain waneinnua wayuu namaiwajana mojukana aaʼin sutuma jülüjain naaʼin nnojolin talatüin Jehová namaa (1 Sam. 1:6-10; Job 29:2, 4; Sal. 51:11).

2. ¿Jaralii na talatakana amaa Jehová?

² Süküjain tü Bibliakat eein süpüla talatüin Jehová wamaa mayaainjeʼe nnojoluin lotuin maʼin wakuwaʼipa. Talatüshi nia wamaa süka niʼrüin kanoulain waya nünain Jesús otta woutiisain waya (Juan 3:16). Sükajee woutiisain waya atüjaana aaʼulu wayaawajaain suulia waainjala otta waküjaitpa nümüin Maleiwa waaʼinrajatüin tü nüchekakat (Aluw. 2:38; 3:19). Talatüshi Jehová wamaa niʼrapa waaʼinrüin tia süpüla aleewain waya nümaa. Wekeraajüle tü wamakat nümüin Jehová wanaa sümaa waapüin waaʼin nümüin talateechi nia wamaa otta aleeweechi nia wamaa (Sal. 25:14).

3. ¿Kasa wekirajaainjatka anain sünain ekirajaayakat tüü?

³ ¿Jamüsü jülüjaka naaʼin waneinnua wawalayuu nnojolin talatüin Maleiwa namaa? ¿Kasa naaʼinraka Jehová süpüla wayaawatüin saaʼu talatüin nia wamaa? ¿Kasa naaʼinrajatka wanee anoujashi süpüla niyaawatüin saaʼu talatüin Jehová nümaa?

¿JAMÜSÜ JÜLÜJAKA NAAʼIN WANEINNUA NNOJOLIN TALATÜIN JEHOVÁ NAMAA?

4, 5. ¿Kasa watüjaaka aaʼu mayaainjeʼe jülüjain waaʼin nnojoliin kasain anain apüla waya?

⁴ Wainma na mojukana aaʼin tepichiiwaʼaya naya sutuma jülüjain naaʼin nnojoliin kasain anain apüla naya (Sal. 88:15). Anuu nünüiki wanee wawala Adrián nünülia: «Jülüjasü taaʼin waneepia nnojolin kasain anain apüla taya. Jintüliiwaʼaya taya, tachuntapuʼuin maʼin nümüin Maleiwa nükaalinjainjanain na tapüshikana  süpüla kepiain naya suluʼu tü Paʼaraiisükat, antajaapejeʼe suluʼu taaʼin nnojolin anain taya süpüla kepiain taya suluʼu tü Paʼaraiisükat». Anuu nünüiki wanee wawala Tony nünülia, manoujainsalii na kachooinkana nia: «Eetaayaai naküjain tamüin na wayuu kachonkana taya alin taya napüla jee talatüin naya tamaa. Mojushaatasü taaʼin sutuma nnojoluin jaʼyain naaʼu talatüin naya tamaa».

⁵ Süntajaʼawaire wekiiruʼu nnojoliin kasain anain apüla waya jülüja waaʼin nürütkeʼerüin waya Jehová nünainmüin (Juan 6:44). Jülüjasü naaʼin Jehová tü suluʼukat waaʼin jee tü kasa anasü waaʼinrakat, tü nnojotkat weʼrüin (1 Sam. 16:7; 2 Crón. 6:30). Eekalaka süpüla wanoujain sünain nünüiki Jehová nüküjapa wamüin kojutuin waya nümüin (1 Juan 3:19, 20).

6. ¿Jamüsü naaʼin Pablo saalinjee tü kasa mojusü naaʼinrapuʼukat?

⁶ Eesüjaʼa mojuwaire waaʼin saaʼujee tü kasa mojusü waaʼinrakat nnojoluiwaʼaya waʼyataain nümüin Jehová (1 Ped. 4:3). Eeshii waneinnua wawalayuu kakaliainnakana aʼyataain nümüin Jehová achecherüinjanakana naaʼin suulia naaʼinrüin tü kasa mojusü suchuntaakat naaʼin. ¿Jama piakai? ¿Jülüjasüche paaʼin nnojoluin motuin naaʼin Jehová tü kasa mojusü paaʼinrapuʼukat? Mülejeʼeya paaʼin, nnojo mojuin paaʼin, nnojoishi piain neʼe alatüin amüin tia, alatüsia tia namüin waneinnua wayuu aʼyataapuʼukana nümüin Maleiwa. Jamüshijaʼa chi aluwataaushikai Pablo mojushaatasü naaʼin saalinjee tü kasa mojusü naaʼinrapuʼukat (Roma 7:24). Ayaawajaashi nia suulia naainjala jee woutiisashi nia. Mayaainjeʼe nuuntuin tia nüküjain niain maawain maʼin naʼakajee na aluwataaushikana otta niain chi kaainjaraireekai maʼin (1 Cor. 15:9; 1 Tim. 1:15).

7. ¿Kasa jülüjainjatka waaʼin süchiki tü kasa mojusü waaʼinrapuʼukat?

⁷ Nüküjain chi Washi iipünaajachikai moteerüin naaʼin waainjala wayaawajaale suulia (Sal. 86:5). Shiimainrejeʼe wayaawajaain suulia waainjala wanoujainjatü anain motuin shia naaʼin Jehová (Col. 2:13).

8, 9. ¿Kasa waaʼinrajatka suulia suluʼuin waaʼin nnojolin talatüin Jehová wamaa?

⁸ Wapüshuaʼa wayakana aʼyataweeshii maʼin waya nümüin Jehová. Eepejeʼe süpüla jülüjain waaʼin isain wachiki waaʼinrüin tü kasa talatüinjachika atuma Jehová wamaa. Anuu sünüiki wanee wawala Amanda sünülia: «‹Wainmainjatü kasa taaʼinraka süpüla taʼyataainjatüin nümüin Jehová süka süpüshuaʼa taaʼin›, maʼwaisü taya suluʼu taaʼin. Sutuma jülüjain taaʼin tia eesü taʼyataʼawaire süchiirua waneirua kasa isaka tachiki tountuin. Sutuma nnojoluin tountuin tia jülüjasü taaʼin nnojoluin kasain anain apüla taya jee nnojolin talatüin Jehová tamaa».

⁹ ¿Kasa waaʼinrajatka suulia suluʼuin waaʼin nnojolin talatüin Jehová wamaa? Nnojotsü nuchuntuin wamüin Jehová wanee kasa isaka wachiki waaʼinrüin. Kojutusü nümüin süpüshuaʼa tü waaʼinrakat sünain aʼyatawaa nümüin, shialeekajaʼa waaʼinrüle shia süka süpüshuaʼa waaʼin. Jülüja waaʼin nakuwaʼipa waneinnua wayuu namaiwajana saashajaakana achiki tü Bibliakat aʼyataakana nümüin Jehová süka süpüshuaʼa naaʼin. Noʼutku naya wayuukana nia Pablo, aʼyataashi maʼin nia nümüin Jehová soʼunnaa wainma juya. Oʼunushi nia wattapünaa otta nüikaleʼerüin sukuwaʼipa outkajaalee. Kapüleepejeʼe nümüin Pablo mapa niʼyataain nümüin Maleiwa maʼakaapuʼu. ¿Talatüshiche Jehová nümaa mayaainjeʼe isaitpain nüchiki wainmain niʼyataain nümüin? Aa, ayatüshi talatüin nia nümaa süka naaʼinrüin tü kasa eekat süpüla nuuntuin sünain aʼyatawaa nümüin otta anakuwaʼipaishi nia nutuma Jehová (Aluw. 28:30, 31). Müsia neʼe wakuwaʼipa wayakana, eesüjaʼa isale wachiki waaʼinrüin tü aʼyatawaa waaʼinrapuʼukat nümüin Maleiwa. Anasü sotule waaʼin  shiain kojutuin maʼin nümüin Jehová waaʼinrüle wanee aʼyatawaa nümüin süka süpüshuaʼa waaʼin. Wekirajaa jooluʼu süchiki tü naaʼinrakat Jehová süpüla wayaawatüin saaʼu talatüin nia wamaa.

NAAʼINRAKA JEHOVÁ SÜPÜLA WATÜJAAIN SAAʼU TALATÜIN NIA WAMAA

10. ¿Jamüsü süpüla müin waapakai saaʼin nünüiki Jehová sünain talatüin nia wamaa? (Juan 16:27).

¹⁰ Naapüin wamüin tü Bibliakat. Nücheka achikit Jehová nayaawatüin saaʼu na wayuu aikana apüla nia talatüin nia namaa. Süküjain tü Bibliakat piantuain nüküjain Jehová nümüin Jesús alin nia nüpüla jee talatüin nia nümaa (Mat. 3:17; 17:5). ¿Keeʼireesüche paaʼin nüküjain pümüin Jehová talatüin nia pümaa? Nnojoishi asoutuin wamüin Jehová iipünaajee, asoutushi nia wamüin sükajee tü Bibliakat. Jamüsüjaʼa waashajeʼerapa suluʼujee tü Bibliakat wanaa sümaa nüküjain Jesús namüin na nikirajüinkana alin naya nüpüla chi Nüshikai, müshi niakai aaʼin Jehová aküjain wamüin tia (paashajeʼera Juan 16:27). Mayaainjeʼe nnojoluin lotuin maʼin nakuwaʼipa na nikirajüinkana Jesús, ayatüsia nachajaain sukuwaʼipa süpüla naaʼinrüin tü nüchekakat Maleiwa. Nüküjainjeseʼe Jesús namüin talatüin nia namaa. Müsia neʼe nukuwaʼipa Jehová wamaa, müsü nüküjakai aaʼin wamüin talatüin nia wamaa (Juan 15:9, 15).

11. ¿Jamüsü nnojoluinjatka jülüjain waaʼin nnojolin talatüin Jehová wamaa soʼunnaa weʼrüin müliaa? (Santiago 1:12)

¹¹ Naapüin tü choʼujaakat wamüin. Nükaalinjeein maʼin waya Jehová otta naapeein tü kasa choʼujaakat wamüin. Eesü nuuʼulaʼawaire Jehová sülatüin kasa mojusü wamüin maʼaka sülatüin nümüin Job, chi wayuu lotokoi akuwaʼipa (Job 1:8-11). Weʼrapa müliaa nnojotsü anain jülüjale waaʼin nnojolin talatüin Jehová wamaa, shia anaka aluʼu wachecherüle waaʼin soʼunnaa tia süpüla sütüjaanüin aaʼu alin wapüla Jehová otta weʼitaain waaʼin sünain nükaalinjeenain waya (paashajeʼera Santiago 1:12). Soʼunnaa müliaa weʼreerü alin waya nüpüla Jehová sümaa nükaalinjeenain waya süpüla wachecherüin waaʼin.

12. ¿Kasa watüjaka sünainjee nukuwaʼipa Dimitri?

¹² Jülüja waaʼin nukuwaʼipa wanee wawala Dimitri nünülia, kepiashi nia Asia. Amülouisü tü niʼyataainkat, kakalia kashi maʼyataain nia. Süpüla jaʼyain naaʼu niʼitaain naaʼin nünain Jehová, nukooʼomüinrüin tü niʼyataainkat sünain aküjaa pütchi. Alata alata müsü tü kashikat  sümaa nnojoluin nuusütayaain anain wanee aʼyatawaa. Ayuuijaaka nia, isasü nüchiki nütamaain. Antajaasü suluʼumüin naaʼin nnojoluin anain nukuwaʼipa sümaa nuʼwayuuse otta sümaa nüchon. Wainmajüsü naaʼin shiimainreje talatüin Jehová nümaa. Soʼu wanee ai süshajaka tü nüchonkat nümüin tü sümakat Isaías 30:15, tü makat: «Jüchechereerü jaaʼin müleka nnojorüle shapaain maʼin jaaʼin otta jiʼitaale jaaʼin tanain». Sürütkaaka nünainmüin, sümaka nümüin: «Taata, mojupa maʼin paaʼin anasü jülüjale paaʼin pütchikat tüü». Niyaawataka saaʼu Dimitri naapüin Jehová tü kasa choʼujaakat sümüin nüpüshi maʼaka saaʼin eküülü, nasheʼin jee nepia. Niyaawataka saaʼu nüchecherüinjatüin naaʼin suulia shapaain maʼin naaʼin otta niʼitaainjatüin maʼin naaʼin nünain Jehová. Sükajee tü naaʼinrakat Jehová nüpüleerua Dimitri piyaawata aaʼulu naaʼinmajeechin pia Jehová otta nükaalinjeechin pia soʼunnaa piʼrüin müliaa.

13. ¿Kasa amaa naaʼinraka Jehová süpüla watüjaain saaʼu talatüin nia wamaa?

¹³ Naapüin wamüin na wawalayuukana. Sutuma tü naaʼinrakat na wawalayuukana wapüleerua eesü süpüla watüjaain saaʼu talatüin Jehová wamaa. Eesüjaʼa niʼitaale Jehová suluʼu naaʼin na waneinnua naküjain pütchi wamüin atütüleʼerüinjatka waaʼin soʼu tü kaʼi choʼujaakalü oʼu shia wamüin. Shia tü aainjünakat süpüleerua wanee wawala shapaaka maʼin aaʼin, kepiasü shia Asia. Amülouisü shiʼyataain, mayeinsü maʼin shia sutuma wanee ayuulii otta nnojolitchipa laülaashin chi suʼwayuusekai sutuma kaainjalain nia. Anuu sünüiki: «‹¿Jamüsüche sülataka tamüin tia?›, maa müsü taaʼin. ¿Shiache sutuma taainjain wanee kasa mojuka noʼuluʼu Jehová jee nnojolin talatüin nia tamaa?». Suchuntuin maʼin nümüin Jehová shiyaawatüinjatüin saaʼu ayatülejeʼeya talatüin nia sümaa. ¿Kasakaʼa naaʼinrüin Jehová  süpüleerua? Anuu sooʼomüin sünüiki tia wawalakat: «Aashajaashii tamaa na laülaashiikana, nakaalinjain taya süpüla tayaawatüin saaʼu alin taya nüpüla Jehová». Kakalia mapa wainmajüsü saaʼin süchikuaʼa. Suchuntakalaka maʼin kaalinwaa nümüin Jehová. Anuu tü sümakat tü wawalakat süchiki tü naaʼinrakat Jehová süpüleerua: «Soʼuleʼeya kaʼikat tia naapüin wanee karaloʼuta tamüin na wawalayuukana, taashajeʼerapa tia karaloʼutakat akatsüinraasü taaʼin, tayaawata aaʼulu nusoutuin Jehová tamüin». Wayaawata aaʼu talatüin Jehová wamaa sükajee tü pütchi nakatsüinrakalü akajee waaʼin na wawalayuukana (Sal. 10:17).

14. ¿Kasa amaa naaʼinraka Jehová nakajee na wawalayuukana süpüla watüjaain saaʼu talatüin nia wamaa?

¹⁴ Watüjaa aaʼu talatüin Jehová wamaa nachiaapa waya na wawalayuukana. Jamüsüjaʼa sümaiwa paala ashajinnüshi chi aluwataaushikai Pablo nutuma Jehová 14 karaloʼuta namüinjatü na anoujashiikana. Sükajee tia karaloʼutakat nüchiaain Pablo na anoujashiikana süka anakalü akuwaʼipa. ¿Jamüsü naaʼinraka Jehová tia nükajee Pablo? Shia süka nüchiaain Jehová na wayuu aikana nüpüla, jama niain chi Washi aipüraikai maʼin (Prov. 3:11, 12). Wachiaanüle wanaapünaa sümaa tü sümakat tü Bibliakat nnojo jülüjain waaʼin nnojolin talatüin Jehová wamaa, shia anaka aluʼu jülüjale waaʼin naaʼinrüin tia Jehová süka alin waya nüpüla (Heb. 12:6). Wekirajaa sooʼomüin süchiki tü naaʼinrakat Jehová süpüla watüjaain saaʼu talatüin nia wamaa.

WANE KASA NAAʼINRAKA JEHOVÁ WAYAAWATAKA ATUMA TALATÜIN NIA WAMAA

15. (1) ¿Jaralii na naapakana amüin Jehová tü nüpülainkat? (2) ¿Kasa wayaawataka aaʼu sünainjee tia?

¹⁵ Naapüin Jehová tü nüpülainkat namüin na wayuu talatakana amaa nia (Mat. 12:18). Anasü püsakireʼerüle paaʼin sünain tüü: «¿Jaʼyasüche saaʼu takuwaʼipa eein tü nüpülainkat Maleiwa taaʼu? ¿Jaʼyasüche taaʼu nnojoluichipain kashapajaaralin taya maʼaka kashapajaaralin taya paala nnojoluiwaʼaya tanoujain?». Püchajaale maʼin sukuwaʼipa eeinjatüin paaʼu tü nüpülainkat Maleiwa, piyaawateerü aaʼu talatüin Jehová pümaa (paashajeʼera tü pütchikat « Eere waaʼu tü nüpülainkat Maleiwa...»).

16. (1) ¿Jaralii na niʼitaakana ajapuluʼu Jehová naküjainjanain tü pütchi anakat maʼin? (1 Tesalónica 2:4). (2) ¿Jamüsü paaʼin sutuma pütüjaain saaʼu tia?

¹⁶ Niʼitaain Jehová najapuluʼu na wayuu talatakana amaa nia naküjainjanain tü pütchi anakat maʼin (paashajeʼera 1 Tesalónica 2:4). Jülüja  waaʼin sukuwaʼipa wanee wawala Jocelyn sünülia, eʼrüsü kasa anasü sünainjee süküjain tü pütchi anakat maʼin. Soʼu wanee kaʼi mojushaatasü maʼin saaʼin, anuu sünüiki: «Nnojotsü taaʼin sünain aküjaa pütchi, ojuʼitapejeʼe taya soʼu kaʼikat tia jama pürekutsoolüin taya. Toʼuraajaka nümüin Jehová. Soʼu kaʼikat tia taküjaka pütchi sümüin Mary, wanee wayuu kamaneeka jee ekirajaweeka sünain tü Bibliakat». Maʼaka jeʼra kashi süchikijee tia süküjaka Mary sümüin Jocelyn suchuntuin maʼin kaalinwaa nümüin Jehová wanaapünaa sümaa süntüin shipialuʼumüin. Anuu sünüiki Jocelyn: «Tayaawata aaʼu talatüin Jehová tamaa sünainjee tü sümakat Mary». Nnojoleerü sücheküin wayuu süpüshuaʼa tü pütchi anakat maʼin, watüjaapejeʼe saaʼu talatüin Jehová sümaa tü waaʼinrakat süpüla waküjain tü pütchikat sümüin wayuu.

17. ¿Kasa watüjaka sünainjee tü sümakat Vicky? (Salmo 5:12).

¹⁷ Anajiraashi Jehová namaa na talatakana amaa nia saaʼujee naapajiraain nikii Jesús (1 Tim. 2:5, 6). Kanourale waya sünain naapajiraain nikii Jesús waaʼu jee woutiisale waya, ¿kasa waaʼinrajatka ayatüle jülüjain waaʼin nnojolin talatüin Jehová wamaa? Eesü nnojorüle pansaain tü jülüjakat waaʼin wachiki, pansaapejeʼe tü nümakat Jehová. Lotusü nakuwaʼipa noʼuluʼu na wayuu kanoulakana sünain naapajiraain nikii Jesús naaʼu otta anakuwaʼipaliijeena naya nutuma (paashajeʼera Salmo 5:12; Roma 3:26). Jülüja waaʼin sukuwaʼipa wanee wawala Vicky sünülia. Shiyaawata aaʼu talatüin Jehová sümaa sünainjee jülüjain saaʼin naapajiraain nikii Jesús saaʼu. Anuu sünüiki Vicky: «Tayaawataka saaʼu kakaliaichin Jehová sünain aʼatapajaa tanouteʼerüin tü jülüjakat taaʼin [...]. Müsü tamakai aaʼin nümüin: ‹Nnojotsü anain süpüla alin taya püpüla. Nnojotsü süpüla pülaʼajaainjatüin taainjala sükajee naapajiraain nikii chi Püchonkai›». Jülüjale waaʼin naapajiraain nikii Jesús waaʼu wayaawateerü aaʼu alin waya nüpüla Jehová jee talatüin nia wamaa.

18. ¿Jamüsü nnojoleetka wainmajüin waaʼin sünain talatüin Jehová wamaa ayatüle alin nia wapüla?

¹⁸ Jaʼitairü wachajaain maʼin sukuwaʼipa süpüla waaʼinrüin tü wekirajaaitpakalü anain, eejeerü kaʼi amalajaajeetka oʼu waaʼin otta jülüjeetka oʼu waaʼin nnojolin talatüin Jehová wamaa. Sülatüle pümüin tia, anasü jülüjale paaʼin talatüin Jehová namaa na wayuu ayatakana alin apüla nia (Sant. 1:12). Ayataʼaya pürütkaain nünainmüin Jehová otta jülüja paaʼin tü naaʼinrakat süpüla pütüjaain saaʼu talatüin nia pümaa. Jülüja paaʼin waneepia nnojolin wattain nia woulia (Aluw. 17:27).