EKIRAJAAYA 38
«Jürütkaa tanainmüin [...] aneerü jaaʼin tatuma»
«Jürütkaa tanainmüin, jia aʼyataakana maʼin otta jia müliakana aaʼin, aneerü jaaʼin tatuma» (MAT. 11:28).
JAYEECHI 17 «Tacheküin»
SÜCHIKI TÜ WEKIRAJAAINJATKALÜ ANAIN *
1. ¿Kasa nüküjaka Jesuu saashin Mateo 11:28-30?
ANASHAATASÜ maʼin tü pütchi nüküjakat Jesuu sümüin wainma wayuu. Anuu nünüiki: «Jürütkaa tanainmüin [...] aneerü jaaʼin tatuma» (paashajeʼera Mateo 11:28-30). Nnojotsü nünüikiyaain neʼe Jesuu tia. Jülüjataa waaʼin tü naaʼinrakat süpüleerua wanee wayuu ayuuisü.
2. ¿Kasa naaʼinraka Jesuu süpüleerua wanee wayuu ayuuisü?
2 Choʼujaasü kaalinwaa sümüin tia wayuukot. Mayaainjeʼe wainmain na tottoolu suʼunakana amaʼanamüin, ayatsia shia ayuulin, polooirü piamamüin juya amülain isha sümüin. Saashin tü Pütchi aapünakat nümüin Moisés, alerajünüinjatü wanee wayuu eekai amülain isha sümüin (Lev. 15:25). Saapapa tü wayuukot süchiki anain wayuu nutuma Jesuu, suʼunaka sünain achajawaa nüchiki. Süntapa nünain shipettüin nüsheʼin jee anaka shia. Nnojotpejeʼe anain neʼe shia nutuma Jesuu, anasü saaʼin nutuma süka kapülain naaʼin sukuwaʼipa jee kojutuin shia nümüin. «Nii waaʼiraa», müshi nia sümüin süka niiʼiyatüin sujutu nümüin jee alin shia nüpüla. Anakajasaʼa maʼin saaʼin tia wayuukot sünainjee tü naaʼinrakat Jesuu süpüleerua (Luc. 8:43-48).
3. ¿Jarat tü pütchi wekirajaainjatkalü anain?
3 Nnojotsü jimatüin neʼe tia wayuukot, süchajaain nüchiki Jesuu. Müinjanaʼaya waya wachajaainjatü sukuwaʼipa süpüla warütkaain nünainmüin Jesuu. Mayaainjeʼe nnojoluin anaʼlaa nameenain suulia ayuulii na arütkaakana nünainmüin Jesuu, ayatshia müin nia wamüin: «Jürütkaa tanainmüin [...] aneerü jaaʼin tatuma». Sünain ekirajaayakat tüü, wekirajaajeerü anain jaʼraisü pütchi: ¿Kasa waaʼinrajatka süpüla warütkaain nünainmüin Jesuu? ¿Kasa nüküjeeka achiki Jesuu wanaa sümaa nümüin «talüʼüjiraweerü jümaa jüchise»? ¿Kasa watüjaka sünainjee nukuwaʼipa Jesuu?
¿Jamüsü anaka waaʼin waʼyataale sünain tü aʼyatawaa naapakat wamüin? ¿Kasa waaʼinrajatka süpüla ayatüin anain waaʼin sünain aʼyatawaa nümaa Jesuu?«JÜRÜTKAA TANAINMÜIN»
4, 5. ¿Kasa waaʼinrajatka süpüla warütkaain nünainmüin Jesuu?
4 Wanee sukuwaʼipa süpüla warütkaain nünainmüin Jesuu shia wekirajaale süchiki tü nümakat jee tü naaʼinrakat (Luc. 1:1-4). Müshiijeseʼe wekirajaainjanain sünain tü sümakat tü Wiwüliakat nüchiki. Jee müsia, arütkaashii waya nünainmüin Jesuu wanaa sümaa woushikajaain süchiirua nukuwaʼipa jee woutiisain waya.
5 Wanee kasa waaʼinrajatka süpüla warütkaain nünainmüin Jesuu shia wachuntule kaalinwaa namüin na laülaashiikana choʼujaapa shia wamüin. Naya wawalayuukana niʼinaajala naya Jesuu süpüla naaʼinmajüin waya (Juan 21:16; Éf. 4:7, 8, 11; 1 Ped. 5:1-3, TNM). Choʼujaale kaalinwaa wamüin, waküjainjatü shia namüin. Nnojoishii kayaawasein naya süpüla natüjaainjatüin neʼe saaʼu tü alatakat wamüin. Anuu tü nümakat wanee wawala Julian nünülia: «Ojuʼitüshi taya suluʼujee Weteet sutuma ayuulin taya. Nüküjaka tamüin wanee taʼaleewain anain tachuntule namüin na laülaashiikana nalapalaaiwa taaʼu. ‹Nnojotsü choʼujaain tia tamüin›, müshiyaaje taya paala, tachuntapejeʼe shia mapa. Anasü taaʼin sutuma nakaalinjain taya, müshii naapakai saaʼin wanee kasa anasü tamüin». Na laülaashii waneepiakana nümaa Jeʼwaa maʼaka naaʼin na piamashii alapalaakana naaʼu Julian, nakaalinjeena waya süpüla wayaawatüin saaʼu tü «kasa jülüjakat naaʼin Cristo» jee tü nukuwaʼipakat (1 Cor. 2:15, 16; 1 Ped. 2:21). Nakaalinjale waya, aneerü waaʼin natuma, meena naapakai saaʼin wanee kasa anasü wamüin.
«TALÜʼÜJIRAWEERÜ JÜMAA JÜCHISE»
6. ¿Kasa nüküjeeka achiki Jesuu wanaa sümaa nümüin «talüʼüjiraweerü jümaa jüchise»?
6 Wanaa sümaa nümüin Jesuu: «Talüʼüjiraweerü jümaa jüchise», eesüjaʼa shiale nüküjeein achiki anainjatüin wamüin laülaain nia wapüleerua otta waʼyanaajiraain nümaa. Shiapejeʼe nüküjeein achiki Jesuu waʼyataainjanain nümüin Jeʼwaa.
7. (1) ¿Kasa aʼyatawaa aapünakat wamüin saashin Mateo 28:18-20? (2) ¿Kasa watüjaaka aaʼu süchiki tü aʼyatawaa naapakat Jeʼwaa nümüin Jesuu?
7 Arütkaashii waya nünainmüin Jesuu wanaa sümaa waapüin waaʼin nümüin Jeʼwaa jee woutiisain waya. Nuunejaain Jesuu wayuu maʼleekalia süpüla sürütkaain nünainmüin. Nnojoleechi nüʼleejüin wanee wayuu eekai niʼyataweein nümüin Maleiwa (Juan 6:37, 38). Napüshuaʼa na wayuu oushikajaakana süchiirua nukuwaʼipa Jesuu, kapülainjatü naaʼin naʼyanaajiraain nümaa sünain tü aʼyatawaa naapakat Jeʼwaa nümüin. Watüjaa aaʼulu nükaalinjeenain waya Jesuu waneepia sünain tia aʼyatawaakat (paashajeʼera Mateo 28:18-20).
«JÜTÜJA TANAINJEE»
Anainjatü naaʼin na waneinnua watuma maʼaka naaʼinrüin shia Jesuu. (Paashajeʼera tü pütchikat 8-11). *
8, 9. (1) ¿Jamüsü anaka naaʼin nümaa Jesuu na wayuu nnojoliikana yaletüin aaʼin? (2) ¿Kasa wasakirüinjatka anain waaʼin?
8 Anasü naaʼin nümaa Jesuu na wayuu nnojoliikana yaletüin aaʼin (Mat. 19:13, 14; Luc. 7:37, 38). ¿Jamüsü anaka naaʼin nümaa? Shia süka naatain nukuwaʼipa Jesuu noulia na fariseokana. Yaleta aaʼinchii naya wayuukana jee mamülialasat wayuu namüin (Mat. 12:9-14). Akaisaʼa Jesuu, aipürai nia jee nnojotsü yaletüin naaʼin. Kamalainsü namüin na fariseokana neʼnnaajünüin jee kojutuin naya sutuma wayuu. Nüküjain Jesuu namüin na nikirajüinkana nnojoluinjatüin müin nakuwaʼipa, nnojoluinjatüin yaletüin naaʼin jee nüküjain namüin nakaalinjainjanain na waneinnua (Mat. 23:2, 6-11). Na fariseokana, noupünaa aaʼinchii na wayuukana sümaa neimmolojuin naya (Juan 9:13, 22). Anapejeʼe naaʼin na wayuukana nutuma Jesuu süka naaʼinrüin kasa anasü napüleerua otta anain nünüiki namüin.
9 ¿Müsüche wakuwaʼipa maʼaka saaʼin nukuwaʼipa Jesuu? Wasakira waaʼin sünain tüü:
«‹Wayuu anamia sümaa nnojoluin yaletüin naaʼin›, ¿müsüche pütchi tachiki? ¿Taaʼinrüinche waneirua kasa napüleerua na tawalayuukana jaʼitairü müin malaacheinkai saaʼin? ¿Kamaneeshiche taya sümüin wayuu?».10. ¿Jamüsü naaʼin na nikirajüinkana Jesuu nümaa?
10 Anasü naaʼin na nikirajüinkana Jesuu nümaa süka anamiain nia namüin otta anashiin nümüin nikirajüin naya (Luc. 10:1, 19-21). Nüsakirüin Jesuu na nikirajüinkana süpüla nütüjaain saaʼu tü jülüjakat naaʼin süchiki wanee kasa (Mat. 16:13-16). Sünainjee tü ekirajünakalü anain naya nutuma Jesuu, atüjashii jee aaʼinrüshii naya kasa anasü. Müsü nakuwaʼipa maʼaka saaʼin sukuwaʼipa wanee aʼttiee kasiika maʼin sutuma saaʼinmajünüin.
Ana naaʼin na waneinnua watuma.
Tütü waya sünain aküjaa pütchi.
Nnojo yaletüin waaʼin, tütü waya sünain aʼyatawaa. *
11. ¿Kasa nüsakirüinjatka anain naaʼin wanee wayuu laülaashire nia napüleerua na waneinnua?
11 Laülaashire wanee wayuu napüleerua na waneinnua, nüsakireein naaʼin sünain tüü: ¿Anasüche tü taaʼinrakat namüin na tapüshikana jee namüin na wayuu taʼyanaajiraakana amaa? ¿Anasüche naaʼin tamaa? ‹Eeshi süpüla jüsakirüin taya›, ¿müshiche taya namüin? ¿Kapülasüche taaʼin tü namakat tamüin? Nnojo washatüin nakuwaʼipa na fariseokana. Aashichijaapuʼushii nooʼomüin na wayuu asakirakana naya otta müliashii natuma na wayuu ayoutakana süchiki tü nekirajakalü anain (Mar. 3:1-6; Juan 9:29-34).
«ANEERÜ JAAʼIN TATUMA»
12-14. ¿Jamüsü anaka waaʼin waʼyataale sünain tü aʼyatawaa naapakat Jesuu wamüin?
12 ¿Jamüsü aneetka waaʼin waʼyataale sünain tü aʼyatawaa naapakat Jesuu wamüin? Wekirajaa süchiki tia.
13 Anamia maʼin na wekiipüʼükana. Mayaainjeʼe Laülaain Jeʼwaa saaʼu kasakat süpüshuaʼa, nnojoishi eʼrülin wayumüin jee nnojotsü müliain waaʼin nutuma. Kojutusü nümüin tü waʼyataainkat (Heb. 6:10). Nükatsüinrüin waaʼin süpüla wountuin waʼyataain nümüin (2 Cor. 4:7; Gal. 6:5). Niʼitaain Jesuu shikii wapüleerua tü waaʼinrajatkat süpüla wakaalinjain na waneinnua (Juan 13:15). Nachajaain sukuwaʼipa na laülaashiikana süpüla müin nakuwaʼipa maʼaka naaʼin Jesuu, chi makai aka naaʼin wanee anneetpüʼü anamia (Heb. 13:20, TNM; 1 Ped. 5:2). Nachajaain sukuwaʼipa süpüla natütüleʼerüin waaʼin, süpüla kamaneeinjanain naya wamüin, süpüla nekirajüin waya otta süpüla naaʼinmajüin waya.
14 Wayuu anamia na wayuu waʼyataajiraakana amaa. Talatüsü waaʼin sümaa waʼyataain jee aijiraashii waya namaa na waʼaleewainkana. Jülüjataa waaʼin tüü, aʼyataajiraashii waya namaa wawalayuu wulekana akuwaʼipa, nnojotpejeʼe jülüjain naaʼin nayain anaʼleein akuwaʼipa woulia. Mayaainjeʼe natüjain süpüleerua waneirua kasa, nnojoishii naya aʼwaataain suluʼu otta nnojotsü jülüjain naaʼin sülanaʼaleein nakuwaʼipa woulia. «Wayuu aʼyataalii neʼe wamaa», nnojoishii müin naya wamüin. «Waʼaleewain», müshii naya wamüin. Alanaʼaleesia maʼin tü waalinkat napüla müsüjeseʼe eein süpüla naapajiraain nekii waaʼu.
15. ¿Jamüsü waaʼin sutuma tü aʼyatawaa waʼyataakalü anain?
15 Anashaatasü tü waʼyataakalü anain. Wekirajüin na wayuukana sünain tü shiimainkat nüchiki Jeʼwaa otta waküjain alawaain tü nikirajakalü anain Satanaa (Juan 8:44). Müliasü maʼin saaʼin wayuu sutuma tü alawaa nikirajakalü anain Satanaa. Jamüsüjaʼa naashin, nnojotsü motuin naaʼin Jeʼwaa tü kasa mojusü waaʼinrakat otta maaliinsalii waya nüpüla Jeʼwaa naashin. Mojusü maʼin saaʼin wayuu sutuma tia alawaakat. Warütkaapa nünainmüin Jesuu, alaʼajaanüsü woulia tü waainjalakat. Aitaʼaleeshiijaʼa waya nüpüla Jeʼwaa (Roma 8:32, 38, 39). Talatüsü maʼin waaʼin süka wekirajüin wayuu süpüla shiʼitaain saaʼin nünain Jeʼwaa otta süpüla anain sukuwaʼipa.
AYATA ANAIN WAAʼIN SÜNAIN AʼYATAWAA NÜMAA JESUU
16. ¿Jamüsü naataka tü aʼyatawaa naapakat Jesuu wamüin suulia waneirua aʼyatawaa?
16 Naata sümüin tü aʼyatawaa naapakat Jesuu wamüin suulia waneirua aʼyatawaa. Eeshii
mapüsale maʼin waya süchikijee aʼyatawaa otta nnojorüle talatüin waaʼin sutuma tü waʼyataakalü anain. Anapejeʼe maʼin waaʼin sutuma waʼyataain nümüin Jeʼwaa otta nümüin Jesuu. Eeshiijaʼa mapüsale maʼin waya süchikijee aʼyatawaa otta kapüleere maʼin wamüin oʼunaa sünain tü outkajawaakat. Aneetpejeʼe waaʼin otta katchinjeerü waaʼin woʼunüle sünain tü outkajawaakat. Akaataajaʼa wojuʼitüle sünain aküjaa pütchi otta wekirajaale sünain tü Wiwüliakat wamüiwaʼa, aneerü maʼin waaʼin.17. (1) ¿Jameena waya waʼyataale maʼin süchiirua waneirua kasa? (2) ¿Jamüsü eejüinjatka maʼin waaʼin sünain tü kasa waaʼinrajatkat?
17 Mapüseena waya waʼyataale maʼin süchiirua waneirua kasa. Müsüjeseʼe eejüinjatüin maʼin waaʼin sünain tü kasa waaʼinrawaikat. Jamüsüjaʼa shiale waʼyataain maʼin achiirua kamaʼanaa wainma korolo, amüleena neʼe waya mapüsain süchiirua. Wekirajaa sünain tü nümakat Jesuu nümüin wanee jimaʼai asakirakai nia süchiki kasainjatüin naaʼinrüin süpüla katüin noʼu waneepia. Washirü chia jimaʼaikai. Kojutusü maʼin nümüin tü Pütchi aapünakat nümüin Moisés otta eeshijaʼa wayuule anashi nia. Saashin tü karaloʼuta nüshajakat Marcos, nümülialüin Jesuu chia wayuukai naaʼinyaka. Anuujeseʼe tü nümakat nümüin: «Anakaja puikküle tü pukorolokot süpüshua [...] Je paaʼinrapa tia, aleʼejeechi pia püchikua tanainmüin süpüla tamaain pia». Oʼuneeshiaajee chia jimaʼaikai nümaa Jesuu, mojupejeʼe maʼin naaʼin süchiirua tü nuwashirüinkat (Mar. 10:17-22). Niyoutuin tü aʼyatawaa naapeekat Jesuu nümüin, shia kachiiruaka naaʼin tü washirüükat (Mat. 6:24). ¿Kasajeʼe waaʼinraka müle wakuwaʼipa?
18. (1) ¿Kasa wasakireʼerüinjatka anain waaʼin? (2) ¿Jamüsü wasakireʼerüinjatka waaʼin sünain tia?
18 Anasü wasakirawaire waaʼin sünain kasain alanaʼaleein maʼin ojutu wamüin. ¿Jamüsü waaʼinrajatka tia? Shia süpüla wayaawatüin saaʼu tü kasa talateetkalü atuma waaʼin. Anuu tü nümakat wanee jimaʼai, Mark nünülia: «Taaʼinruʼu, nnojoluyaasü kachiiruain taaʼin kamaʼanaa wainma kasa. Mayaainjeʼe pürekutsoolin taya, shia taaʼinmaaka maʼin tü aʼyatawaakat süpüla nnojoluinjatüin choʼujaain tamüin wanee kasa. ‹Jamüshiche nnojoika talatayaain taya›, maa müshi taya. Tayaawataka saaʼu shiain taaʼinmaain tü suchuntaakat taaʼin suulialeʼeya tü taʼyataainkat nümüin Jeʼwaa». Niiʼiratüin Mark nukuwaʼipa süpüla nukooʼomüinrüin niʼyataain nümüin Jeʼwaa. Anuu nünüiki: «Eesü shapaale taaʼin sutuma manneetsein taya. Nükaalinjapejeʼe taya Jeʼwaa nümaa Jesuu süpüla taaʼinmaain tü taʼyataainkat nümüin».
19. ¿Jamüsü pansaainjatka tü jülüjakat waaʼin wanaapünaa sümaa tü keeʼireekat naaʼin Jeʼwaa?
19 Ayateerü anain waaʼin sünain aʼyatawaa nümaa Jesuu waaʼinrüle apünüinsü kasa. Tü palajatkat shia pansaainjatüin tü jülüjakat waaʼin wanaapünaa sümaa tü keeʼireekat naaʼin Jeʼwaa. Aʼyataashii waya nümüin Jeʼwaa müsüjeseʼe ayatüinjatüin watuma tü nümakat wamüin. Nia Walaamainkaʼaya Jeʼwaa (Luc. 17:10). Nnojorüle waaʼinrüin tü nümakat Jeʼwaa wanaapünaa sümaa tü keeʼireekat naaʼin, mapüseena neʼe waya. Jamüshijaʼa wanee paaʼa, jaʼitashi katchin maʼin nia, mapüseechi neʼe yalejewaain nümüle nuulia chi oʼunajirakai nia. Waʼyataale nümüin Jeʼwaa wanaapünaa sümaa tü keeʼireekat naaʼin, wounteerü waaʼinrüin kasa eekai müin kapüleekai saaʼin wamüin otta wounteerü tü kasa isainjatiaakat wachiki waaʼinruʼu. Soteesü waaʼin nnojoluin eein wanee kasa eeka süpüla sümalajeʼerüin tü keeʼireekat naaʼin Jeʼwaa (Roma 8:31; 1 Juan 4:4).
20. ¿Kasa waʼyataainjatka eeʼiree nümaa Jesuu?
20 Tü piamakat kasa waaʼinrüinjatka shia wayaawatüinjatüin saaʼu kasain waʼyataain eeʼiree nümüin Jeʼwaa. Nia kojutuinjachika watuma Jeʼwaa, chi Washikai. Nükalioʼu Jesuu wainma na wayuu anoujakana nünain shiiʼiree neʼreein kasa anasü nutuma. Sünainjee müin nakuwaʼipa, ooʼulaashii naya suulia aʼyatawaa nümaa Jesuu otta nnojoishii talatüin naya (Juan 6:25-27, 51, 60, 66; Filip. 3:18, 19, TNM). Eepejeʼe na aʼyataakana nümüin Jeʼwaa süka alin nia napüla otta aipüralin naya wayuu. Talatüshii naya sünain aʼyatawaa nümüin Jeʼwaa kataiwaʼaya noʼu otta naʼatapajüin noʼunuin iipünaamüin süpüla aʼyatawaa nümaa Jesuu. Talateeria waaʼin waʼyataale nümaa Jesuu süka süpüshuaʼa waaʼin.
21. ¿Kasa naaʼinreetka Jeʼwaa wapüleerua saashin Mateo 6:31-33?
21 Tü apünüinkat shia jülüjainjatüin waaʼin nükaalinjeenain waya Jeʼwaa. Waneeküin waʼyataain nümüin Jeʼwaa. Wainma kasa wooʼulaaka süpüleerua otta eesü kapüleere shia wamüin. Nüküjain wamüin Jesuu müliainjanain waya atumawaa saaʼujee wanoula. Weʼitaainjatpejeʼe waaʼin sünain nükatchireerüin waaʼin Jeʼwaa soʼunnaa tü kasa mojusü alatakat wamüin. Wachecherüle waaʼin soʼunnaa tü kasa mojusü alatakat wamüin, katchinjeerü maʼin wanoula (Sant. 1:2-4). Weʼitaainjatü waaʼin sünain naapeerüin Jeʼwaa wamüin tü choʼujaakat wamüin, naaʼinmajeenain waya Jesuu otta natütüleʼereerüin waaʼin na wawalayuukana (paashajeʼera Mateo 6:31-33; Juan 10:14; 1 Tes. 5:11). Wounteerü wachecherüin waaʼin soʼunnaa tü alatakat wamüin süka wainmain tü kasa nükaalinjakalü aka waya Jeʼwaa.
22. ¿Kasa talatüinjatka atuma waaʼin?
22 Tü wayuu anakat nutuma Jesuu, anasü saaʼin soʼuleʼeya kaʼikat tia. Aneetpejeʼe saaʼin suushikajaale waneepia süchiirua nukuwaʼipa Kürisüto. ¿Kasache süneekaka saaʼin pümüin? Süneekülejeʼe aʼyatawaa nümaa Jesuu, eesüjaʼa chale shia iipünaa sünain aʼyatawaa nümaa. Nnojotsü amülain neʼe tü saaʼinrakat süpüla suushikajaain süchiirua nukuwaʼipa Jesuu. Chainjanale waya kepiain chaa iipünaa jee yaa saaʼu tü Mmakat, talatüinjatia neʼe waaʼin süka nümüin wamüin Jesuu: «Jürütkaa tanainmüin».
JAYEECHI 13 Washata nukuwaʼipa Kürisüto
^ püt. 5 Nuunejaain waya Jesuu süpüla warütkaain nünainmüin. ¿Kasa waaʼinrajatka süpüla warütkaain nünainmüin? Wekirajaajeerü anain tia sünain ekirajaayakat tüü otta süsoʼireerü waaʼin sünain aneerüin waaʼin sutuma waʼyanaajiraain nümaa Kürisüto.
^ püt. 60 SÜCHIKI TÜ AYAAKUAAKALÜIRUA. Süpüla anainjatüin saaʼin wayuu nutuma Jesuu, naatawaisü sukuwaʼipa tü kasa naaʼinrakat süpüleerua.
^ püt. 66 SÜCHIKI TÜ AYAAKUAAKALÜIRUA. Süpüla anainjatüin naaʼin na waneinnua nutuma wanee wawala, naatawaisü sukuwaʼipa tü naaʼinrakat napüleerua maʼaka naaʼinrüin shia Jesuu.