1. ¿Jamüshii jüüjüüinjanaka waya nümüin Jeʼwaa?

JÜÜJÜÜINJANA * waya nümüin Jeʼwaa süka niain Kakumalain waya. Nia neʼe Jeʼwaa chi anakai süpüla aküjaa wamüin tü waaʼinrajatkat (Alat. Map. 4:11). Jee müsia, jüüjüüinjana waya nümüin süka niain neʼe nümüiwaʼa anakai süpüla aluwatawaa waaʼu. Nnojotpejeʼe müin nakuwaʼipa na wayuu aluwataakana naaʼu na waneinnua. Atüjaleeshia maʼin Jeʼwaa, aipürai nia, kojutusü wayuu nümüin otta amülialaasü naaʼin saalin (Éx. 34:6; Roma 16:27; 1 Juan 4:8).

2. Sünainjee tü sümakat Hebreokana 12:9-11, ¿jamüshii jüüjüüinjanaka waya nümüin Jeʼwaa?

² Keeʼireesü naaʼin Jeʼwaa jüüjüüinjanain waya nümüin süka Washin nia otta süka alin nia wapüla, nnojotsü shiain süka mmoluin waya neema. Nüküjain Pablo suluʼu tü karaloʼuta nüshajakat namüin na Hebreokana jüüjüüinjanain waya nümüin Jeʼwaa süka aneein wakuwaʼipa niʼrüin (paashajeʼera Hebreokana 12:9-11).

3. (1) ¿Kasa waaʼinrajatka süpüla jüüjüüin waya nümüin Jeʼwaa? (2) ¿Kasa wekirajaainjatka anain sünain ekirajaayakat tüü?

³ Jüüjüüshii waya nümüin Jeʼwaa wachajaale maʼin sukuwaʼipa süpüla woonooin nümaa waneepia otta nnojorüle waaʼinrüin tü anakat neʼe saaʼin wamüin (Prov. 3:5). Mapüleejeerü wamüin jüüjüüin waya nümüin Jeʼwaa watüjaale saaʼu anain maʼin nukuwaʼipa, jama weʼrüin shia sünain süpüshuaʼa tü naaʼinrakat (Sal. 145:9). Weʼraajüle maʼin nukuwaʼipa Jeʼwaa akooʼomüinraajeerü maʼin naalin wapüla. Aire wapüla Jeʼwaa nnojoleerü choʼujaain süküjünakuʼu sümünüin wamüin tü waaʼinrajatkat jee tü nnojoluinjatkat waaʼinrüin. Wachajaajeerü sukuwaʼipa süpüla jülüjain waaʼin  kasa anasü maʼaka jülüjain shia naaʼin Jeʼwaa otta walerajeerü tü kasa mojusükat (Sal. 97:10). Eepejeʼe kapüleere wamüin jüüjüüinjanain waya nümüin Jeʼwaa. ¿Jamüsüche kapüleʼewaika shia wamüin? ¿Kasa natüjeetka na laülaashiikana sünainjee nukuwaʼipa Nehemías, chi sülaülakai mma? ¿Kasa nütüjeetka chi wayuu eekai kachooin sünainjee nukuwaʼipa David, chi aluwataaikai? ¿Kasa natüjeetka na jieyuu kachonshiikana sünainjee sukuwaʼipa María, tü niikat Jesuu? Wekirajaajeerü anain tia sünain ekirajaayakat tüü.

4, 5. ¿Jamüsü kapüleʼewaika wamüin jüüjüüinjanain waya nümüin Jeʼwaa saashin Roma 7:21-23?

⁴ Wanee kasa kapüleekalü anainjee jüüjüüin waya nümüin Jeʼwaa shia süka waleʼeruʼuin tü kaainjalaakat. Müsüjeseʼe kapüleein wamüin woonooin sümaa nünüiki Jeʼwaa. Wanaa sümaa niküin Adán sümaa Eva süchon tü wunuʼukot naneeküin süka naaʼin namüiwaʼa tü anakat jee mojukat süpüla naaʼinrüin (Gén. 3:22). Maaʼulu yaa, wainma na wayuu mojutkana amüin Jeʼwaa maʼaka naaʼinrüin shia Adán sümaa Eva. Shia naaʼinreeka neʼe tü anakat jee tü mojukat saaʼin namüin.

⁵ Mayaainjeʼe weʼraajüin Jeʼwaa jee alin nia wapüla, eesü kapüleere wamüin jüüjüüinjanain waya nümüin. Alatüsü tia nümüin chi aluwataaushikai Pablo (paashajeʼera Roma 7:21-23). Waaʼinreein tü anakat noʼuluʼu Jeʼwaa maʼaka naaʼinreein shia Pablo, eepejeʼe kapüleere shia wamüin. Wounteerü tia wachecherüle waaʼin suulia waaʼinrüin kasa mojusü.

6, 7. ¿Jarat tü wane kasa kapüleekalü anainjee wamüin jüüjüüin waya nümüin Jeʼwaa? Püküja süchiki tü alatakat sümüin wanee wawala.

⁶ Eesü kapüleere wamüin jüüjüüinjanain waya nümüin Jeʼwaa sutuma tü wakuwaʼipakat jee sutuma tü naaʼinrakat na wayuu kepiakana waʼütpünaa. Naata tü sümakat wayuu suulia tü nümakat Jeʼwaa. Müsüjeseʼe eejüinjatüin waaʼin suulia joo wanaawajüin waaʼin namaa na wayuukana. Wekirajaa süchiki tia.

⁷ Suluʼu waneirua mma apüleeruaana aaʼinchii na jimaʼaliikana jee na majayünnüükana süpüla wainmainjatüin nneerü nakanajaka. Alatüsü tia sümüin wanee wawala Mary * sünülia. Süpülapünaa shikirajaain sünain tü Wiwüliakat, ekirajaapuʼusü shia suluʼu wanee eʼikülee miyoʼu eʼnnaajünaka maʼin suumainpaʼa. Apüleeruaana aaʼinrü shia natuma na süpüshikana süpüla shiʼyataainjatüin sünain wanee aʼyatawaa walaaka maʼin jee kojutuinjatka anainjee shia sümüin wayuu. Shia keeʼireepuʼuka saaʼin Mary tia. Eeʼiratapejeʼe tia shikirajaapa nüchiki Jeʼwaa otta sukooʼomüinraapa naalin Jeʼwaa süpüla. Kapüleepejeʼe tia sümüin, anuu sünüiki: «Eesü tantüle sünain aʼyatawaa walaaka maʼin, tatüjaapejeʼe saaʼu kapüleejeerüin tamüin taʼyataain nümüin Jeʼwaa saaʼujee tia. Kapüleʼewaisü tamüin tayoutuin wanee aʼyatawaa süka nnojoluin maajüin sukuwaʼipa wayuu eere kepiain taya. Achuntawaipejeʼe taya kaalinwaa nümüin Jeʼwaa süpüla tayoutuin wanee aʼyatawaa kapüleejeetka anainjee taʼyataain nümüin Jeʼwaa» (Mat. 6:24).

8. ¿Kasa wekirajaainjatka anain?

⁸ Eʼrüshii waya kasa anasü jüüjüüle waya nümüin Jeʼwaa. Jüüjüüle nümüin Jeʼwaa na wayuu eʼitaanakana ajapuluʼu laülawaa maʼaka naaʼin na laülaashiikana, chi wayuu eekai kachooin jee na jieyuu kachonshiikana, nakaalinjeena na waneinnua. Wekirajaajeerü anain nachiki waneinnua wayuu anakana atuma sukuwaʼipa tü laülawaa niʼitaakat Jeʼwaa najapuluʼu.

9. Püküja süchiki tü kasa mojusü eejatkat nüpüla Nehemías.

⁹ Niʼitaain Jeʼwaa na laülaashiikana süpüla naaʼinmajüin na anoujashiikana (1 Ped. 5:2). Wainmeerü kasa natüjaka na laülaashiikana  süchiki tü naaʼinrakat Nehemías napüleerua na aʼyataashiikana nümüin Jeʼwaa. Nia Nehemías aluwataaka saaʼu Judá (Neh. 1:11; 2:7, 8; 5:14). Jülüjataa waaʼin tü kasa mojusü eejatkat nüpüla Nehemías. Niʼrüin nnojoluin kojutuin namüin na judíokana tü aʼwaajüleekat Jeʼwaa. Nnojotsü asülajünüin namüin na leviitakana tü asülajünüinjatkat namüin naashin Jeʼwaa. Mojutusat namüin tü nümakat Jeʼwaa süchiki tü kaʼi neemeraainjatkalü oʼu. Otta eeshii na kaʼwayuusekana jieyuu nnojotka aʼwaajüin Jeʼwaa. Nunoutuinjatü Nehemías sukuwaʼipa tia (Neh. 13:4-30).

10. ¿Kasa naaʼinraka Nehemías shiʼipajee tü kasa mojusü alatakat?

¹⁰ Nnojotsü apüleeruaanüin naaʼin na judíokana nutuma Nehemías süpüla naaʼinrüin tü kasa anakat saaʼin nümüin. Tü naaʼinrakat shia nuchuntuin kaalinwaa nümüin Jeʼwaa otta nikirajüin na judíokana sünain tü Pütchi nuluwataakalü anain Jeʼwaa (Neh. 1:4-10; 13:1-3). Nnojotsü yaletüin naaʼin Nehemías müshijeseʼe niʼyanaajiraain namaa na nuwalayuukana sünain akumajaa süsepü Jerusalén (Neh. 4:15).

11. Saashin 1 Tesalónica 2:7, 8, ¿kasa naaʼinrajatka na laülaashiikana nakaalinjapa na anoujashiikana?

¹¹ Mayaainjeʼe nnojoluin sülatüin namüin na laülaashiikana tü alatakat nümüin Nehemías, eesü süpüla nashatüin tü nukuwaʼipakat. Aʼyataashii maʼin naya sünain akaalinjaa na wawalayuukana. Nnojotsü jülüjain naaʼin sülanaʼaleein nakuwaʼipa noulia süka laülaashin naya. Nnojotsü müliain naaʼin natuma, aishii naya napüla (paashajeʼera 1 Tesalónica 2:7, 8). Süka nnojoluin yaletüin naaʼin jee süka alin maʼin wayuu napüla kamaneeshii naya sümüin. Anuu tü nümakat Andrew, wanee wawala kakaliaichikai laülaashin: «Tayaawata aaʼulu sütanalüin naaʼin na wawalayuukana tü wamakat namüin, kamaneere waya namüin jee aleewale waya namaa. Müle nakuwaʼipa na laülaashiikana jüüjüweena na wawalayuukana namüin». Anuu nünüiki Tony, wanee wawala kakaliaichikai laülaashin suluʼu tü outkajaaleekat: «Tachajaain sukuwaʼipa süpüla taaʼinrüin tü sümakat Filipos 2:3 otta jülüjasü taaʼin nnojoluin sülanaʼaleein takuwaʼipa noulia na waneinnua. Sutuma taaʼinrüin tia, nnojotsü tapüleeruain  naaʼin na waneinnua süpüla naaʼinrüinjatüin tü tamakat».

12. ¿Jamüsü nnojoluinjatka yaletüin naaʼin na laülaashiikana?

¹² Nnojotsü yaletüinjatüin naaʼin na laülaashiikana maʼaka nnojoluin yaletüin naaʼin Jeʼwaa. Mayaainjeʼe niain Aluwataain saaʼu kasaka süpüshuaʼa, müshi nejepülaakai aaʼin süpüla niyalerüin chi wayuu müliakai niʼrüin (Sal. 18:35; 113:6, 7). Mojusü nümüin Jeʼwaa nukuwaʼipa chi wayuu yaletakai aaʼin (Prov. 16:5).

13. ¿Jamüsü nayaawatüinjatka saaʼu nanüiki na laülaashiikana?

¹³ Na laülaashii jüüjüükana nümüin Jeʼwaa nayaawatüinjatü saaʼu nanüiki. Nnojorüle nayaawatüin saaʼu, eesü süpüla airuʼuluin nanüiki mojutule naya atumawaa (Gal. 5:14, 15; Sant. 1:26). Anuu tü nümakat Andrew, chi wachuntakai anülia paalapa: «Eeshi tasounnajaweere nümüin wanee wawala eekai müin mojutüyaakai amüin taya. Tachechetpejeʼe taaʼin sutuma tekirajaain nachiki waneinnua wayuu saashajaakana achiki tü Wiwüliakat. Tayaawata aaʼu sünainjee nakuwaʼipa shiain anain nnojorüle yaletüin taaʼin jee anamiainjachin taya». Jüüjüüshi wanee laülaashii nümüin Jeʼwaa niiʼiyatüle alin nüpüla na nuwalayuukana jee anale nünüiki namüin jaʼitakajeʼe namüin na laülaashiikana wanaa nümaa (Col. 4:6).

14. (1) ¿Kasa nuluwataaka anain Jeʼwaa chi wayuu eekai kachooin? (2) ¿Kasa naaʼinrüinjatka naashin Jeʼwaa chi wayuu eekai kachooin?

¹⁴ Nuluwataain Jeʼwaa chi wayuu eekai kachooin süpüla laülaashinjachin nia süpüleerua nüpüshi. Nücheküin Jeʼwaa napüleerua nekirajüinjanain nachonnii otta nachiaainjanain naya (1 Cor. 11:3; Éf. 6:4). Nnojotpejeʼe müliainjatüin naaʼin nachonnii natuma. Asouteena naya nümüin chi Washikai Jeʼwaa saaʼu sukuwaʼipa nepijia nachonnii (Éf. 3:14, 15). Chi wayuu eekai kachooin jüüjüüshi nia nümüin Jeʼwaa naaʼinrüle tü nuluwataakalü anain nia. Nekirajaale süchiki nukuwaʼipa David, wainmeerü tü kasa natüjakat sünainjee.

15. Chi wayuu eekai kachooin, ¿jamüsü anaka süpüla nüshatüin nukuwaʼipa David, chi aluwataaikai?

¹⁵ Nnojoishi aneekünüin neʼe David süpüla laülaashinjachin nia süpüleerua nüpüshi, aneekünüshi niaʼaya süpüla nuluwataainjachin saaʼu Israel. Eepejeʼe mojuwaire nutuma sukuwaʼipa aluwatawaa (2 Sam. 11:14, 15). Mayaainjeʼe müin tia, ayatshia jüüjüüin David nümüin Jeʼwaa, naapaain sümaa tü nüchiaakalü oulia nia. Jamüshijaʼa nia, nüküjain nümüin Jeʼwaa tü suluʼukat naaʼin otta ayatsia naaʼinrüin tü nümakat (Sal. 51:1-4). Nnojotsü yaletüin naaʼin David, müshijeseʼe naapaain sümaa tü kasa anasü münakat nümüin, jaʼitaina jieyuuin na achiaakana nia  (1 Sam. 19:11, 12; 25:32, 33). Shia naaʼinmaaka David tü niʼyataainkat nümüin Jeʼwaa, nnojotsü naaʼinrüin piantua tü kasa mojusü naaʼinrapuʼukat.

16. ¿Kasa eeka süpüla nütüjain sünainjee nukuwaʼipa David chi wayuu eekai kachooin?

¹⁶ Jiakana tooloyuukana, anuu waneirua kasa eeka süpüla jütüjain sünainjee nukuwaʼipa David, chi aluwataaikai. Nnojotsü müliainjatüin naaʼin jüchonnii jutuma. Jiyaawata saaʼu tü mojukalü akuwaʼipa jutuma otta jaapaa sümaa tü münakat jümüin sükajee tü sümakat tü Wiwüliakat. Jaaʼinrüle tia, kojuteena jia sümüin juʼwayuuse jee namüin jüchonnii süka nnojoluin yaletüin jaaʼin neʼrüin. Juchuntapa kaalinwaa nümüin Jeʼwaa, jüküja nümüin süpüshuaʼa tü suluʼukat jaaʼin, nayaawateetka saaʼu na jüpüshikana jiʼitaain maʼin jaaʼin nünain Jeʼwaa. Shiapejeʼe jaaʼinmaainjatüin tü jiʼyataainkat nümüin Jeʼwaa (Deut. 6:6-9). Anale maʼin jukuwaʼipa napüleerua na jüpüshikana, meerü jüsülajakai saaʼin namüin wanee kasa eekai kojutuin maʼin.

17. ¿Kasa nuluwataaka anain Jeʼwaa na jieyuu kachonshiikana?

¹⁷ Naashin Jeʼwaa nekirajüinjana nachonnii na jieyuu kachonshiikana (Prov. 6:20). Tü saaʼinrakat jee tü sümakat wanee wayuu namüin süchonnii, shieerü sotoka naaʼin waneepia (Prov. 22:6). Wekirajaa sünain waneirua kasa eeka süpüla natüjain na jieyuu kachonshiikana sünainjee sukuwaʼipa María, tü niikat Jesuu.

18, 19. ¿Kasa eeka süpüla natüjain na jieyuu kachonshiikana sünainjee sukuwaʼipa María?

¹⁸ Sütüjaa aaʼulu María tü sümakat tü Ashajuushikat. Kojutushi maʼin Jeʼwaa sümüin otta aleewasü maʼin shia nümaa. Saaʼinrüin tü nuluwataakalü anain Jeʼwaa mayaainjeʼe kapüleein shia sümüin (Luc. 1:35-38, 46-55).

¹⁹ Jia jieyuu kachonshiikana, eesü süpüla jütüjain wainma kasa anasü sünainjee sukuwaʼipa María. Jaashajeʼera tü Wiwüliakat jee juchunta kaalinwaa nümüin Jeʼwaa süpüla aleewain maʼin jia nümaa. Choʼujaasü jaaʼinrüin waneirua kasa süpüla anain jukuwaʼipa noʼuluʼu Jeʼwaa mayaainjeʼe kapüleein shia jümüin. Eeshiijaʼa jaashichijaale namüin jüchonnii süka aletüjülüin nakuwaʼipa na kachonniikana jia. Jaʼitakajeʼe jütüjaapa saaʼu tü nümakat Jeʼwaa süchiki tü naaʼinrajatkat na wayuu kachonshiikana, eesü kapüleere jümüin jüchecherüin jaaʼin suulia jaashichijaain namüin jüchonnii, shialeekajaʼa mapüsale jia jee kekeʼerale na jüchonniikana (Éf. 4:31). Müle tü alatakat jümüin, juchunta kaalinwaa nümüin Jeʼwaa. Anuu tü sümakat Lydia: «Eesü tachuntule nümüin Jeʼwaa süpüla nüchecherüin taaʼin suulia airuʼuluin tanüiki nümüin chi tachonkai tachiaapa nia. Eesü yüütapünaale taya süpüla tachuntüin nümüin Jeʼwaa suulia taashichijaain nümüin chi tachonkai. Jutatüsü taaʼin  sutuma tachuntüin kaalinwaa nümüin Jeʼwaa» (Sal. 37:5).

20. (1) ¿Kasa kapüleeka namüin waneinnua jieyuu? (2) ¿Kasa naaʼinrajatka süpüla neeʼiyatüin naalin nachonnii napüla?

²⁰ Eeshii na jieyuu kapüleekana amüin eeʼiyataa naalin nachonnii (Tito 2:3, 4). Müsü nakuwaʼipa sünainjee nnojolin shiiʼiyatünüin naalin natuma na wayuu kachooinkana naya. Nnojotpejeʼe naaʼinrajatüin tia naka nachonnii. Na jieyuu jüüjüükana nümüin Jeʼwaa, neeʼiyatüinjatü naalin nachonnii napüla. Eesüjaʼa kapüleere namüin naaʼinrüin tia, nounteetpejeʼe shia sutuma nükaalinjain Jeʼwaa naya. Müle sukuwaʼipa natuma, talateerü naaʼin jee talateerü naaʼin na napüshikana.

21, 22. ¿Kasa anasü weʼreetka jüüjüüle waya nümüin Jeʼwaa saashin Isaías 65:13, 14?

²¹ Nütüjaa aaʼulu David anain nukuwaʼipa sutuma jüüjüüin nia nümüin Jeʼwaa. Anuu nünüiki: «Anasü maʼin tü nümakat Jeʼwaa wamüin otta talatüsü waaʼin sutuma; anasü maʼin tü nuluwataakalü anain Jeʼwaa, wayaawata aaʼu wanee kasa sutuma». Jee müshi nia: «Süchiaain taya suulia kasa mojusü, taaʼinrüle tü pümakat, eʼreechi taya anaa» (Sal. 19:8, 11). Maaʼulu yaa, eesü süpüla wayaawatüin saaʼu jaralin jüüjüüin nümüin Jeʼwaa otta jaralin nnojolin jüüjüüin nümüin. Talatüsü maʼin naaʼin na wayuu jüüjüükana nümüin Jeʼwaa süka naaʼinrüin tü nuluwataakalü anain naya (paashajeʼera Isaías 65:13, 14).

²² Jüüjüüle nümüin Jeʼwaa na laülaashiikana, chi wayuu eekai kachooin otta na jieyuu kachonshiikana, aneerü maʼin nakuwaʼipa, talateerü saaʼin napüshi jee paaʼinweena na wawalayuukana. Shiapejeʼe anaʼleein maʼin talatüin naaʼin Jeʼwaa natuma (Prov. 27:11). Nnojotsü eein wanee kasa wanaapünaaka sümaa tia.