1, 2. (1) ¿Jamüsü nnojotka shiyoʼujaainjatüin waaʼin süpüleerua Armagedón? (2) ¿Jarat tü pütchi wekirajaainjatkalü anain sünain ekirajaayakat tüü?

WAINMA na wayuu ayoʼujaakana aaʼin naapapa süchiki Armagedón. Naashin nayakana shia wanee atkawaa ajaʼttirajatka wayuu süpüshuaʼa sainküin mmakat jee ojuttirajatka tü mmakat süka wüin, wawai jee sutuma sukutkujaain. Naatapejeʼe tü sümakat tü Wiwüliakat süchiki tia. Nnojotsü ayoʼujaainjatüin waaʼin süpüleerua (Alat. Map. 1:3). Talatüinjatü waaʼin süka watüjaain saaʼu nnojoluinjatüin sajaʼttirüin wayuu, oʼttaainjatü wayuu sutuma. ¿Jamüsü süpüla müinjatüin tia?

² Saashin tü Wiwüliakat naya ajaʼttinnajanakana soʼunnaa Armagedón na aluwataashiikana saaʼu tü mmakat otta na mojulaashiikana. Nayainjana oʼttaaka na wayuu lotokana akuwaʼipa otta nnojoleerü jaralüin amojujüin sukuwaʼipa tü mmakat (Alat. Map. 11:18, TNM). Süpüla wayaawatüin saaʼu tia, wekirajaa sünain pienchisü pütchi: ¿Kasa wayu Armagedón? ¿Kasa alatajatka süpülapünaa suʼttüin? ¿Kasa waaʼinrajatka süpüla woʼttaainjanain? ¿Kasa waaʼinrajatka süpüla waneepiain waya nümaa Jeʼwaa sümaʼinruʼu sülüʼülaain maʼin sükalia?

3. (1) ¿Jamaluʼut tü pütchikat Armagedón? (2) ¿Jamüsü nnojotka shiain wanee mma tü kanüliakat Armagedón?

³ (Paashajeʼera Alateetkat Mapeena 16:14, 16). Tü pütchikat Armagedón uwatua neʼe süküjünüin suluʼu tü Wiwüliakat. «Uuchi Meguidó» maluʼulu shia suluʼu hebreo (Alat. Map. 16:16). Meguidó shia wanee pueulo eepuʼukat suluʼu Israel sümaiwa (Jos. 17:11). Nnojotpejeʼe shiain wanee mma tü kanüliakat Armagedón. Armagedón shia tü alatajatkat nakotchojiraapa napüshuaʼa na sülaülashiikana mma süpüla nashutüin saaʼu nupueulose Jeʼwaa (Alat. Map.  16:14). Sünain ekirajaayakat tüü, Armagedón münüsü tü atkawaa eemaateetka süchikijee nakotchojiraain napüshuaʼa na sülaülashiikana mma. ¿Jamüsü watüjaaka saaʼu nnojoluin shiain wanee mma tü kanüliakat Armagedón? Shia süka nnojoluin eein wanee uuchi kanüliakat Meguidó. Jee müsia, shia süka joʼuuchon tü mma kaluʼukat tü pueulokot Meguidó, nnojoleerü kettaain namaa napüshuaʼa na «sülaülashiikana mma», na surulaatkana sümaʼaleʼeya tü natkaayainjatkat. Akaʼaya Armagedón oʼtteerü wanaa sümaa sushutünüin saaʼu nupueulose Jeʼwaa sainküin tü Mmakat natuma na sülaülashiikana mma maʼaka wekirajaweerüin sünain ekirajaayakat tüü.

4. ¿Jamüsü sünainpünaaka nutuma Jeʼwaa tü nükaliakat sümaa tü alatakat chaa Meguidó?

⁴ ¿Jamüsü sünainpünaaka nutuma Jeʼwaa tü nükaliakat sümaa tü alatakat chaa Meguidó? Shia süka wainmain atkawaa eejatka chaa Meguidó otta suluʼu tü nasapüshii eejatkat chaa Jezreel. Kojuyatua nükaalinjain Jeʼwaa tü nupueulosekat süpüla sükanajüin tia atkawaakat. Jamüsüjaʼa süʼütpaʼa tü süchikat Meguidó, akaalinjünüshi Barac nutuma Jeʼwaa süpüla niyamülüinjanain na kananeokana. Nia Sísara nekiipüʼüka naya surulaatkana. Naapüin analuʼutka Barac sümaa Débora nümüin Jeʼwaa saaʼu nükaalinjain naya. Anuu neeʼirain nümüin: «Müsü sütkaakai aaʼin tü shüliwaikalüirua chejee iipünaajee [...] nümaa Sísara. Süsaapünaa amaachii naya tü luwopukat Cisón» (Juec. 5:19-21).

5. ¿Jamüsü naateetka sukuwaʼipa Armagedón suulia tü alatakat soʼu nütkaain Barac?

⁵ Anuu tü nümakat Barac sümaa Débora sajaʼttiamüin neeʼirain nümüin Jeʼwaa: «Jeʼwaakalee, sülata namüin püʼünüü tü alatakat nümüin Sísara. Akanasaʼa na wayuu aikana apüla pia, kasataalejeseʼe müin naya maʼaka naaʼin chi kaʼikai niweetapa» (Juec. 5:31). Soʼunnaa Armagedón, najaʼttireena Jeʼwaa na nüʼünüükana, akanasaʼa na aikana apüla nia oʼttaajeena nutuma. Naateerü sukuwaʼipa Armagedón suulia tü alatakat soʼu nütkaain Barac. Soʼunnaa Armagedón, nnojoliinjana atkaain na aʼyataashiikana nümüin Jeʼwaa otta nnojoliinjana naya kaʼapülajüin. Neʼitaainjatü naaʼin nünain Jeʼwaa otta nanain na nümaajanakana jee nnojoliinjana mmoluin naya (Is. 30:15; Alat. Map. 19:11-15).

6. Soʼunnaa Armagedón, ¿kasa najaʼttireenaka aka Jeʼwaa na mojulaashiikana?

⁶ Soʼunnaa Armagedón, ¿kasa naaʼinreetka Jeʼwaa süpüla najaʼttirüin na mojulaashiikana? Wainmeerü kasa naaʼinraka. Eesü süpüla nukutkujeʼerüin tü mmakat, shiʼitüin nutuma tü juyakat sümaa kayeeloin shia otta eesü süpüla jashichin maʼin tü juyakat nutuma (Job 38:22, 23; Ezeq. 38:19-22). Eeshiijaʼa natkaajiraajeenale neʼe na nüʼünüükana (2 Crón. 20:17, 22, 23). Otta eeshiijaʼa najaʼttireenale naya nakajee na aapieekana (Is. 37:36). Watüjaa aaʼu najaʼttireenain Jeʼwaa napüshuaʼa na mojulaashiikana, nayeena oʼttaaka na wayuu lotokana akuwaʼipa (Prov. 3:25, 26).

7, 8. (1) ¿Kasa naküjeetka na sülaülashiikana mma saashin 1 Tesalónica 5:1-7? (2) ¿Jamüsü nnojotka kaluʼuin anaa akuwaʼipaa tia naküjeetkat?

⁷ Aküjüneerü süchiki eejeerüin «anaa akuaippa» jee jimataa aaʼin süpülapünaa nükalia Jeʼwaa (paashajeʼera 1 Tesalónica 5:1-7). «Tü nükaliakat Senyotkai» sümaka 1 Tesalónica 5:2, shia tü «müliaa miyoʼusükat» (Alat. Map. 7:14). ¿Kasa wayaawateetka akajee sülüʼülüin süpüla suʼttüin sükalia tü müliaa miyoʼusükat? Saashin tü Wiwüliakat, aküjüneerü süchiki eejeerüin «anaa akuaippa» jee jimataa aaʼin süpülapünaa suʼttüin.

⁸ Na sülaülashiikana mma, naküjeerü süchiki eeitpain «anaa akuaippa» jee jimataa aaʼin, ¿jamüsüche naküjeetka tia? ¿Wanaaweetche naaʼin na shikiipüʼükana tü iküleesia ekirajakalü alawaa sümaa tia aküjüneetkat? Eesüjaʼa meerüle. Nnojotpejeʼe shiimainjeerüin tü naküjakat na sülaülashiikana mma, jama shiain wanee naʼalain na yolujaakana. Nnojoleerü kaluʼuin anaa akuwaʼipaa tia alawaakat. Shimeejeerü naaʼin na wayuukana süpüla jimatüin naaʼin otta süpüla jülüjain naaʼin  nnojoleenain jamajüin naya. Antalaa meerü tü müliaa miyoʼusükat. Meerü shia aka saaʼin saalin joʼuu sümüin wanee jierü süpülapünaa jemelin shia. ¿Kaseetche alataka namüin na waneepiakana nümaa Jeʼwaa? Mayaainjeʼe nnojoluin natüjaain saaʼu kasoʼuleerüin tia kaʼikat, nnojoleerü ainkuuin naaʼin süka natüjaatüjülin saaʼu sülatajatüin tia.

9. ¿Najaʼttireenache Jeʼwaa uwatuwoʼushi na nümaajanakana Satanaa? Püküja süchiki tü alateetkat.

⁹ Nnojoleena najaʼttirüin Jeʼwaa uwatuwoʼushi na nümaajanakana Satanaa maʼaka najaʼttirüin naya uwatuwoʼushi soʼu nükalia Noé. Shieerü najaʼttiraka Jeʼwaa palajana tü kanüliakat Babilonia tü Miyoʼusükat, tia shia süpüshuaʼa tü iküleesia ekirajakalü alawaa. Shiasaʼa soʼunnaa Armagedón, najaʼttireerü Jeʼwaa sukuwaʼipa poliitika, surulaat jee oikawaa. Wekirajaa süchiki tia piamasükat kasa alatajatka.

10. Saashin Alateetkat Mapeena 17:1, 6 otta 18:24, ¿jamüsü najaʼttireetka Jeʼwaa Babilonia tü Miyoʼusükat?

¹⁰ Süsaleerü saainjala nutuma Jeʼwaa «tü wayuu maaʼinsatkat maʼi» (paashajeʼera Alateetkat Mapeena 17:1, 6; 18:24). Mojutusai Jeʼwaa sümüin wayuu sutuma Babilonia tü Miyoʼusükat. Ekirajüsü alawaa nüchiki Jeʼwaa otta müsü aka saaʼin wanee jierü maaʼinsat süka wanaawain shia namaa na sülaülashiikana mma. Müliashii maʼin na wayuukana sutuma, shimeejüin naya saaʼu nanneetse. Otta watta naalii na wayuu outakana sutuma jee naʼaka naya wayuu outakana eeshii na aʼyataaliikana nümüin Jeʼwaa (Alat. Map. 19:2). ¿Kaseetche naaʼinraka Jeʼwaa süpüla najaʼttirüin Babilonia tü Miyoʼusükat?

11. (1) ¿Kasa kayaawaseka chi wanülüü ishotoikai? (2) ¿Kaseerü naaʼinraka Jeʼwaa nüka chi wanülüü ishotoikai süpüla najaʼttirüin Babilonia?

¹¹ Najaʼttireerü Jeʼwaa Babilonia tü Miyoʼusükat sükajee «poloosü nuʼuwa wane wanülüü ishotoi». Chi wanülüü ishotoikai shiyaawase tü kanüliakat Organización de las Naciones Unidas. Shiasaʼa tü poloosükat nuʼuwa, nayaawase na sülaülashiikana mma wanaawakana aaʼin sümaa. Ashuteena nutuma Jeʼwaa saaʼu Babilonia tü Miyoʼusükat na sülaülashiikana mma. «Yüütüüjeerü maʼi natüma. Je [malaleejeeria] shia natüma», najaʼttireerü süpüshuaʼa tü kasa eekat sümaʼana otta naküjeerü achiki tü kasa mojusü saaʼinrakat (Alat. Map. 17: 3, 16). Poneerü maʼin naaʼin na wayuu wanaawakana aaʼin sümaa süka nnojoleerüin kamaʼakuʼu sümüin, ajaʼttinneena uwatuwoʼushi. Poneerü naaʼin tia süka suʼwaataapuʼuin suluʼu sukuwaʼipa, talatüin maʼin saaʼin maa aka wanee sülaüla mma jee nnojoluin müin shia aka saaʼin wanee wayuu outa aʼwayuuset otta nnojoleerüin shiʼrüin müliaa saashin (Alat. Map. 18:7, 8).

12. (1) ¿Kasa nnojoleetka nuuʼulaain Jeʼwaa naaʼinrüin na sülaülashiikana mma? (2) ¿Jamüsü nnojoleetka nuuʼulaain Jeʼwaa naaʼinrüin tia?

¹² Nnojoleerü nuuʼulaain Jeʼwaa sajaʼttinnüin tü nupueulosekat natuma na sülaülashiikana mma, jama kojutuin maʼin namüin na aʼyataaliikana nümüin Jeʼwaa nünülialuʼuin naya. Otta sükajee noonooin sümaa tü nümakat sünain nojuʼitajanain suluʼujee Babilonia tü Miyoʼusükat (Aluw. 15:16, 17; Alat. Map. 18:4). Jee süka nakaalinjain wayuu süpüla sujuʼitüin suluʼujee Babilonia, nnojoleerü antüin nanainmüin «tü müliaa antajatkat sünainmüin saaliijee saainjala». Mayaainjeʼe naaʼinmajüneenain nutuma Jeʼwaa na anoujashiikana, nakatchinrajatü nanoula süpüla eejiraain naya sümaa tü alatajatkat süchikijee tia.

13. (1) ¿Jaralii na Gog münakana amüin? (2) Sünainjee tü sümakat Ezequiel 38:2, 8, 9, ¿joujeerü suʼttaka Armagedón?

¹³ Nushutapa Gog (paashajeʼera Ezequiel 38:2, 8, 9). Sajaʼttinnapa nutuma Jeʼwaa tü iküleesia ekirajakalü alawaa, shia eejeetka neʼe sümüiwaʼa nupueulose Jeʼwaa yaa saaʼu tü mmakat. Jashicheechi maʼin Satanaa sünainjee tia, müshijeseʼe niʼikeʼereenain na sülaülashiikana mma namaa na namaajanakana süpüla nashutüinjanain saaʼu nupueulose Jeʼwaa. Nuunteerü tia sükajee naʼalain na yolujaakana (Alat. Map. 16:13, 14). «Gog chi chejeʼewaikai Magog», münüshii na sülaülashiikana mma namaa na namaajanakana. Oʼtteerü Armagedón sushutünapa aaʼu nupueulose Jeʼwaa natuma na sülaülashiikana mma (Alat. Map. 16:16).

14. ¿Kasa nayaawateetka aaʼu na sülaülashiikana mma?

¹⁴ Neʼitaajeerü naaʼin na sülaülashiikana mma nanain na nasurulaatsekana (2 Crón. 32:8). Akanasaʼa wayakana weʼitaajeerü waaʼin nünain chi Wamaleiwasekai Jeʼwaa. Shieerü wanee malaa sümüin wayuu tia, süka jamüin, kojutupuʼuin sümüin wayuu Babilonia tü Miyoʼusükat.  Mayaainjeʼe müin sukuwaʼipa, nnojotsü shia akaalinjünüin natuma na sümaleiwasekana, ajaʼttinnüitpa shia nutuma chi «wanülüü ishotoikai» sükajee «tü poloosükat nuʼuwa» (Alat. Map. 17:16). Sünainjee tia, jülüjeerü naaʼin na sülaülashiikana mma mapüleejeerüin namüin najaʼttirüin nupueulose Jeʼwaa. Nashutapa saaʼu, meena naya aka saaʼin siruma akojolooka saaʼu wanee mma (Ezeq. 38:16). Nayaawateetka saaʼu niain Jeʼwaa natkaain amaa. Alateerü namüin tü alatakat nümüin Faraón shiroku tü palaa Ishosükat (Éx. 14:1-4; Ezeq. 38:3, 4, 18, 21-23).

15. ¿Kaseerü naaʼinraka Kürisüto süpüla najaʼttirüin na mojulaashiikana?

¹⁵ Kürisüto namaa na nusurulaatsekana, najaʼttireena napüshuaʼa na mojulaashiikana namaʼaleʼeya na namaajanakana (Alat. Map. 19:11, 14, 15). Jama Satanaa, chi nüʼünüükai Jeʼwaa chi aküjakai alawaa süpüla sushutünüin aaʼu nupueulose Jeʼwaa, ¿kaseerü alataka nümüin? Ojutüneechi nia nutuma Jesuu namaʼaleʼeya na yolujaakana suluʼumüin wanee ishi. Asürünneena naya soʼunnaa miit juya (Alat. Map. 20:1-3).

16. (1) ¿Kasa waaʼinrajatka süpüla weʼraajüin Jeʼwaa? (2) Soʼunnaa Armagedón, ¿kaseerü alataka namüin na wayuu eʼraajakana Jeʼwaa?

¹⁶ Jaʼitaina kakaliainnain otta jekenain waya sünain anoujaa nünain Jeʼwaa, oʼttaajeena waya weʼraajüle maʼin nukuwaʼipa Jeʼwaa otta woonoole sümaa tü nümakat chi Wasenyotsekai Jesucristo (2 Tes. 1:7-9). Weʼraajüin Jeʼwaa watüjaale saaʼu tü anakat jee tü mojukat nümüin otta watüjaale saaʼu tü nuluwataakalü anain. Jee müsia weʼraajüin nia aire nia wapüla, woonoole sümaa tü nümakat wamüin otta niale waʼwaajüin neʼe nümüiwaʼa (1 Juan 2:3-5; 5:3). Weʼraajüle nia niʼraajeena waya otta aneerü wakuwaʼipa noʼuluʼu jee nuʼtteʼereena waya soʼunnaa Armagedón (1 Cor. 8:3).

17. ¿Kasa waaʼinrajatka süpüla woonooin sümaa «tü nümakat chi Wasenyotsekai Jesucristo»?

¹⁷ «Tü nümakat chi Wasenyotsekai Jesucristo», shia süpüshuaʼa tü nikirajakalü anain otta ashajünüsü shia suluʼu tü Wiwüliakat. Woonoo amaalü tia waaʼinrüle süpüshuaʼa tü nuluwataakalü anain, waaʼinmaale tü waʼyataainkat nümüin Jeʼwaa, kojutule wamüin tü nuluwataakalü anain  jee waküjale maʼin tü pütchi anasükat, tü süchikikat nukuwaʼipa Maleiwa sünain aluwatawaa (Mat. 6:33; 24:14). Otta wakaalinjale na anoujashii chainjanakana iipünaa süpüla nekeraajüin tü naʼyataainkat (Mat. 25:31-40).

18. ¿Kasa naaʼinreetka na anoujashii chainjanakana iipünaa napüleerua na «anneerüiruayaʼa waneejannuu» sümakana amüin tü Wiwüliakat?

¹⁸ Soʼu palit kaʼi, na anoujashii chainjanakana iipünaa aainjeena kasa anasü napüleerua na anoujashii «anneerüiruayaʼa waneejannuu» sümakana amüin tü Wiwüliakat (Juan 10:16). ¿Jameerü sukuwaʼipa tia natuma? Süpülapünaa suʼttüin Armagedón, napüshuaʼa na 144.000 cheena naya chaa iipünaa. Katüinjatü noʼu nutuma Jeʼwaa süpüla kaʼika süpüshuaʼa. Napüsheena naya na aapiee ayamülüinjanakana Gog otta naaʼinmajeerü nupueulose Jeʼwaa (Alat. Map. 2:26, 27; 7:9, 10). Talateerü maʼin saaʼin tü «wayuuirua wattaka maʼin saalii» süka nakaalinjain na anoujashii chainjanakana iipünaa yaaiwaʼaya naya saaʼu mmakat.

19, 20. Mayaainjeʼe wainmain tü kasa mojusü eejiraakalü amaa waya, ¿kasa waaʼinrajatka süpüla waneepiain waya nümaa Jeʼwaa sümaʼinruʼu suʼttüin Armagedón?

¹⁹ Maaʼulu yaa, wainma tü kasa mojusü alatakat wamüin. Eepejeʼe süpüla wachecherüin waaʼin soʼunnaa tia otta talatüin waaʼin (Sant. 1:2-4). Wounteerü tia wachuntule waneepia kaalinwaa nümüin Jeʼwaa (Luc. 21:36). Jee müsia, waashajeʼerüinjatü tü Wiwüliakat weinshi, wasakireʼerüinjatü waaʼin sünain tü sümakat süchiki tü kasa alatajatkat mapeena (Sal. 77:12). Waaʼinrüle süpüshuaʼa tia otta waküjale maʼin pütchi, akatsüinraajeerü wanoula jee shiimainjeerü maʼin wamüin tü kasa naaʼinrüinjatkat Jeʼwaa.

²⁰ Jülüja waaʼin talateerüin maʼin waaʼin nnojotpa Babilonia tü Miyoʼusükat otta sülatapa Armagedón. Shiapejeʼe jülüjainjatüin waaʼin talateerüin maʼin waaʼin kojutupa Jeʼwaa sutuma wayuu otta niapa neʼe aluwataain nümüiwaʼa (Ezeq. 38:23). Nnojoleerü ayoʼujaain naaʼin süpüleerua Armagedón na wayuu eʼraajakana Jeʼwaa, na oonookana sümaa nünüiki chi Nüchonkai jee na wayuu achecherakana naaʼin süntaleepa nükalia Jeʼwaa (Mat. 24:13).