1. ¿Kasa tü paʼaraiisü kaluʼukat waya maaʼulu yaa jee kasa tü waaʼinreekat maʼin amüin?

 MÜSHII suluʼukai waaʼin wanee paʼaraiisü maaʼulu yaa eere anain maʼin wakuwaʼipa, watta naalii na wayuu eekana suluʼu otta watta saalii waʼyataain. Jimatüsü maʼin waaʼin jee nnojoishii ojuʼiteein waya suluʼujee tia paʼaraiisükat, shia wachekaka achiki wattain naalii na wayuu antakana waʼakamüin. ¿Kasa waashajaaka achiki? Shia waashajaaka achiki tü paʼaraiisü kaluʼukat waya maaʼulu yaa. a

2. ¿Kasa ponoko waaʼin sünainjee tü paʼaraiisü kaluʼukat waya maaʼulu yaa?

² Ponusü maʼin waaʼin müin niʼitaakai waaʼin Jehová suluʼu wanee paʼaraiisü eere jimatüin waaʼin mayaainjeʼe wattain naalii na aʼürülaakana sooʼomüin wayuu, jouluin mojulawaa jee wattain saalii kasa mojusü (1 Juan 5:19; Apoc. 12:12). Nütüjaa aaʼu Jehová eein süpüla sülatüin kasa mojusü wamüin nutuma Satanás. Saaʼujee alin waya nüpüla Jehová müshii niʼitaakai waaʼin suluʼu wanee paʼaraiisü eere talatüin waaʼin sünain aʼyatawaa nümüin. Saashin tü Bibliakat tia paʼaraiisükat müsü aka saaʼin wanee ounjulaaya jee müsü aka saaʼin wanee apain eekai shiʼyotunüin aaʼu wüin (Is. 4:6; 58:11). Talatüsü maʼin naaʼin na suluʼukana tia paʼaraiisükat süka anain nakuwaʼipa nutuma Jehová jee müshii nakaalinjünakai aaʼin mayaainjeʼe sülatüin kasa mojusü namüin süka sülüʼülüin sükalia süpüla sajaʼttüin kasa mojusü (Is. 54:14; 2 Tim. 3:1).

3. ¿Jamüsü shikeraajia chaa Israel tü sümakat Isaías 65?

³ Nüküjain Jehová suluʼu Isaías 65 jamüinjatüin sukuwaʼipa wayuu suluʼu tü paʼaraiisü kaluʼukat waya maaʼulu. Tia pütchi nüküjatüjütkalia Isaías ekeraajüsü shia palajana soʼu juyakat 537 süpülapünaa  wakalia. Soʼu tia na judío ayaawajaakana suulia naainjala ajütünüshii naya Babiloniajee. Naleʼejakalaka noumainpaʼamüin. Eʼrüshii naya kasa anasü nutuma Jehová jee nükaalinjain naya, nakumajakalaka Jerusalén süchikuaʼa jama sajaʼttinnüin paala. Anakalaka maʼin tia pueulokot natuma süchikuaʼa. Nakumajüinña tü aʼwaajüleekat süpüla nuʼwaajünüinjachin Jehová nüchikuaʼa chaa Israel (Is. 51:11; Zac. 8:3).

4. ¿Jamüsü shikeraajia maaʼulu yaa tü sümakat Isaías kapiitulo 65?

⁴ Ekeraajüsiaʼaya maaʼulu yaa tü nümakat Isaías. Ekeraajüsü tia soʼujee 1919 wanaa sümaa nojuʼitüin na aʼyataashiikana nümüin Jehová suluʼujee Babilonia, tü kojutukalü atumawaa, müsü aka wattakuatkai saaʼin sainküin tü mmakat tü paʼaraiisü eekat maaʼulu. Watta saalii outkajaalee natuma na aküjakana pütchi süchiki nuluwataainjachin Maleiwa. Talatüshii maʼin naya sünain aaʼinraa tia. Watta naalii wayuu katkaaraliipuʼuka namaiwa jee yarüttapuʼuka akuwaʼipa, kooʼomüitpa nanoula jee jeketüitpa nakuwaʼipa wanaapünaa sümaa tü nüchekakalü achiki Maleiwa (Éf. 4:24). Shiimainña shikeraajeerüin tü nümakat Isaías süchiki tü mma jeketükat, eʼrapejeʼe waya kasa anasü maaʼulu yaa. Joʼu wekirajaai sünain tü kasa anasü weʼrakat sutuma suluʼuin waya tü paʼaraiisü eekat maaʼulu jee jamüshii nnojoliinjanaka wojuʼitüin suluʼujee.

¿JAMÜSÜ WAKUWAʼIPA SULUʼU TÜ PAʼARAIISÜ EEKAT MAAʼULU?

5. ¿Jamüsü talataka naaʼin na wayuu suluʼukana tü paʼaraiisü eekat maaʼulu maʼaka süküjatüjülüin shia Isaías 65:13?

⁵ Müshii nnojoliika ayuulin waaʼin jee jamaamasü waaʼin. Nüküjain Isaías naatain maʼin nakuwaʼipa na suluʼukana tü paʼaraiisü eekat maaʼulu noulia na nnojoliikana suluʼuin (paashajeʼera Isaías 65:13). Naapüin Jehová namüin na aʼyataashiikana nümüin tü kasa choʼujaakat süpüla anainjatüin nanoula. Naapüin wamüin tü nüpülainkat, naapüin tü Bibliakat jee watta saalii kasa naaʼinraka süpüla anainjatüin wanoula. Müshii wekakai aaʼin, asüshii waya jee talatüsü waaʼin suluʼujee tia (anasü paashajeʼerüle Apocalipsis 22:17). Eekajasaʼa na nnojoliikana kepiain suluʼu tü paʼaraiisü eekat maaʼulu naata maʼin nakuwaʼipa. Müshii nalatirakai aaʼin jamü, wüinñaasü jee eʼrüshii naya japülii. Nnojotsü namaʼanain tü choʼujaakat süpüla anainjatüin nanoula (Amós 8:11).

6. (1) ¿Jamüsü sünüiki Joel 2:21-24 süchiki naapüin wamüin Jehová tü kasa choʼujaakat sümüin wanoula? (2) ¿Jamüsü wakuwaʼipa suluʼujee tia?

⁶ Nüküjatüjülia Joel naapüinjatüin Jehová tü kasa choʼujaakat namüin na anoujashiikana nünain. Naapüinjatü trigo, cebada, wiino jee müsia tü seita ayuʼluushikat sünainjee oliva (Joel 2:21-24). Tü nüküjeekalü achiki Joel shia naapüinjatüin Jehová tü kasa choʼujaakat namüin na wayuu anoujakana nünain. Naapüinjatiaʼaya tü kasa choʼujaakat sümüin nanoula. ¿Jamüsü sukuwaʼipa tia nutuma Jehová maaʼulu yaa? Naapüin wamüin tü Bibliakat, tü karaloʼuta akumajünakat sünainjee, naapüin wamüin jw.org, outkajaashii waya nutuma jee oʼunushii waya sünain outkajawaa miyoʼu. Müsüjaʼaya naapakai saaʼin waneepia tü weküinkat. Müshiijeseʼe müin nnojoliikai ayuulin waaʼin jee anasü waaʼin.

7. ¿Jamüsü talataka maʼin naaʼin na anoujashiikana? (Isaías 65:14).

⁷ Talatüshii waya jee anasü waaʼin. Naapüin maʼin tü analuʼutkat nümüin Maleiwa na anoujashiikana, talatüshii maʼin naya (paashajeʼera Isaías 65:14). ¿Kasa talataka aaʼujee na anoujashiikana? Shia saaʼujee sükatchinraain naaʼin sutuma tü pütchi shiimain suluʼukat tü Bibliakat jee sutuma tü pütchi ekeraajeetkat. Akaʼaya joo naya shiimainsü namüin shikeraajeerüin tü kasa naʼatapajakat, jama sünainjeejatüin shia naapajiraain nikii Jesús. Talatüshii maʼin naya naashajaapa süchiki tia namaa na nawalayuukana (Sal. 34:8; 133:1-3).

8. ¿Jarat tü piamasü kasa jaʼyakat saaʼu nakuwaʼipa na suluʼukana tü paʼaraiisü eekat maaʼulu?

⁸ Eesü piamasü kasa jaʼyaka saaʼu nakuwaʼipa  na suluʼukana tü paʼaraiisü eekat maaʼulu, paaʼinwashii naya jee aijiraashii maʼin naya. Eesü paaʼinwajirawaa sutuma aijiraain waya. Sükajee tia wayaawata aaʼulu jameerüin wakuwaʼipa suluʼupa waya tü mma jeketükat, aijiraweena waya jee paaʼinwaleejeena waya suulialeʼeya maaʼulu (Col. 3:14). Anuu sünüiki wanee wawala shiʼrapa aijiraain maʼin na aküjaliikana pütchi nüchiki Jehová: «Isasü tachiki talatajatüin taya, nnojotsü talatayaain taya sümaa tapüshi. Naya teʼraka palajana sünain aijiraain maʼin na aküjaliikana pütchi nüchiki Jehová. Sutuma teʼrüin müin nakuwaʼipa aishii tapüla na tapüshikana». Chi wayuu eekai talateein aaʼin jee eekai aneein naaʼin suluʼuinjachin tü paʼaraiisü eekat maaʼulu. Jaʼitasü jamüin nanüiki na manoujainsaliikana wachiki, anasü nünüiki Jehová jee na wayuu nümaajanakana wachiki, kojutushii waya namüin (Is. 65:15).

9. ¿Kaseerü alataka süka tü kasa müliakalü atuma waaʼin? (Isaías 65:16, 17).

⁹ Nnojotsü shapaain waaʼin. Aküjünüsü suluʼu Isaías 65:14 naʼwaateenüin sutuma mojuin naaʼin jee naʼyalajeenain sutuma yüülain naaʼin na wayuu ayoutakana süchiki suluʼuin naya tü paʼaraiisü eekat maaʼulu. ¿Jama na aʼyataashiikana nümüin Maleiwa? ¿Kaseetche alataka sümüin tü kasa mojukalü atuma naaʼin? Anuu nünüiki Jehová: «Moteerü aaʼinñüü tü müliaa eepuʼukat sümaiwa; nnojoleerü teʼrüin piantua» (paashajeʼera Isaías 65:16, 17). Ajaʼtteerü nutuma Maleiwa tü kasa müliakalü atuma waaʼin jee nükaalinjeena waya süpüla nnojorüleein sotuin waaʼin tia.

10. ¿Jamüsü anaka maʼin namaale waya na wawalayuukana? (Piirakaa sümüin tü ayaakuaakat).

¹⁰ Nnojotsü shapaain waaʼin maaʼulu yaa woutkajaapa namaa na wawalayuukana. Chapa waya sünain tü outkajawaakat nnojotsü shapaain waaʼin sutuma tü kasa mojusü alatakat naʼaka na manoujainsaliikana. ¿Kasa waaʼinrajatka süpüla ayatüinña eein tü jimataakalü aaʼin suluʼu tü paʼaraiisü eekat maaʼulu? Jaʼyainjatü saaʼu wakuwaʼipa eein tü nüpülainkat Maleiwa waaʼu, alinjatü wapüla wayuu, talatüinjatü waaʼin, jimatüinjatü waaʼin, kamaneeinjana waya jee matüjainjana waya aashichijawaa (Gal. 5:22, 23). Anataʼaleesüjaʼa maʼin wakuwaʼipa saaʼujee naʼakain waya na anoujakana nünain Maleiwa. Nnojoliire wojuʼitüin suluʼujee tü paʼaraiisü eekat maaʼulu yaa weʼreerü shikeraajüin tü nümakat Jehová süchiki eeinjatü nutuma «wane sirumatuʼu jeketü jee müsia wanee mma jeketü».

11. ¿Jamüinjatü waaʼin saaʼujee suluʼuin waya tü paʼaraiisü eekat maaʼulu? (Isaías 65:18, 19).

¹¹ Waapüin analuʼutka nümüin Maleiwa jee talatüshii maʼin waya. Nüküjain Isaías wattain saalii tü kasa waapüinjatkalü aaʼu analuʼut nümüin Maleiwa waya aʼyataashiikana nümüin jee talatüinjana waya, nia Kakumalaka Jehová tü paʼaraiisü kaluʼukat waya maaʼulu (paashajeʼera Isaías 65:18, 19). Shiajaʼa nuluwataaka waya Jehová süpüla wakaalinjain wayuu shiiʼiree  sujuʼiteein naʼakajee na manoujainsaliikana. Tü kaluʼukat naya müsü aka saaʼin wanee isashiipaʼa jee wakaalinjain naya süpüla nekeroluin naʼakamüin na anoujashiikana eere müin aka saaʼin wanee mma anasü. ¿Aashin talatüin maʼin waya sutuma watüjaain saaʼu tia pütchi shiimainkat? Yooteeshii waya sümaa wayuu süchiki tü kasa anasü weʼreetkat (Jer. 31:12).

12. ¿Jamüsü paaʼin sutuma tü sümakat Isaías 65:20-24?

¹² Waapüin tü analuʼutkat nümüin Maleiwa saaʼu suluʼuin waya tü paʼaraiisü eekat maaʼulu jee talatüshii maʼin waya sutuma tü kasa waʼatapajakat. Jülüjataa jaaʼin süpüshuaʼa tü kasa jiʼreetkat suluʼu tü mma jeketükat jee süpüshuaʼa tü kasa jaaʼinreetkat. Anuu sünüiki tü Bibliakat: «Nnojoleechi eein wanee joʼuu eekai katüin noʼu soʼu jeʼra kaʼi neʼe jee nnojoleena eein wayuu muloʼuyuu eekai laülamaatüin maalü». Saashin tü Bibliakat na wayuukana shiimain nakumajeenain miichi süpüla kepiainjanain naya suluʼu, shiimain napünajeenain süpüla neküinjatüin süchon naʼttia jee nnojoleerü kasain nashapajaain achiirua, jama neʼreenain kasa anasü nutuma Jehová. Nüküjain Maleiwa aneerüin sukuwaʼipa wayuu, nnojoleerü shapaain naaʼin jee talateena naya. Süpülapünaa nachuntuin kaalinwaa nümüin Maleiwa nütüjaatüjüleerü aaʼu tü kasa choʼujaakat namüin jee naapeerü tü suchuntaakat naaʼin (Is. 65:20-24; Sal. 145:16).

13. ¿Jamüsü sünüiki Isaías 65:25 süchiki tü wanoutakat sünain wakuwaʼipa süpüla waʼyataainjanain nümüin Jehová?

¹³ Jimatüsü waaʼin jee anasü waaʼin. Watta naalii wayuu nükaalinjaka Maleiwa sükajee tü nüpülainkat, mapuʼusü nakuwaʼipa maʼaka sukuwaʼipa wüchii jashichisü, anoutaapejeʼe tü nakuwaʼipakat (paashajeʼera Isaías 65:25). Anamiainnapa naya maʼaka saaʼin wanee wüchii eekai sümausajuushin (Roma 12:2; Éf. 4:22, 24). Shiimainña ayatüin nnojoluin lotuin tü wakuwaʼipakat waya aʼyataashiikana nümüin Maleiwa, müsüjeseʼe eein tü kasa mojuwaikalü watuma. Anapejeʼe maʼin tü kasa naaʼinrakat Maleiwa süka paaʼinwain wayuu maʼleekalia nutuma jee aijiraain waya otta jimatajiraain waaʼin (Tito 2:11). Nia neʼe ountaka aaʼinrüin tia waka chi Maleiwa Pülashikai maʼin.

14. ¿Jamüsü shikeraajia sünain nukuwaʼipa wanee wawala tü sümakat Isaías 65:25?

¹⁴ ¿Shiimainchejeʼeya sunoutaain nukuwaʼipa wanee wayuu? Wayaawata aaʼu shiimain tia sükajee sunoutaain nukuwaʼipa wanee wayuu 20 ouyase, katkaaraipuʼu maʼin nia jee aʼluwajiraapuʼushi nukuwaʼipa. Kojuyatua püreesain nia saaʼujee naainjain waneirua kasa mojuka maʼin, maʼaka saaʼin nuʼluwajüin kemion jee saaʼujee waneirua kasa naainjaka. Atkaʼawaishi maʼin nia waneepia. Naapapa süchiki tü shikirajakalü anain tü Bibliakat jee nuʼunapa sünain tü outkajawaakat namaa na aküjaliikana pütchi nüchiki Jehová, niyaawata aaʼu nüntüin sünain wanee kasa shiimainka anain maʼin, shia suluʼuin nia tü paʼaraiisü eekat maaʼulu. Süchikijee woutiisain nia, kojuyatua jülüjain naaʼin shikeraajüin sünain nukuwaʼipa tü sümakat Isaías 65:25, mapuʼushi nia maʼaka naaʼin wanee león eekai jashichin maʼin, anoutaapejeʼe nukuwaʼipa. Müichipa aka naaʼin wanee anneetchon eekai anamiain.

15. (1) ¿Jamüshii wakaalinjeeka na wayuukana süpüla suluʼuin naya tü paʼaraiisü eekat maaʼulu? (2) ¿Kasa waaʼinrajatka süpüla wountuin tia?

¹⁵ Anuu sünüiki Isaías 65:13 suʼttiajee: «Anuu nünüiki chi Señotkai Jehová, chi Laülaakai saaʼu kasa süpüshuaʼa». Jee müsü sünüiki wetsiikulokot 25 sajaʼttiamüin: «Shia nünüiki Jehová tia». Ekeraajüsü waneepia tü nümakat Maleiwa (Is. 55:10, 11). Shiimainña maʼin eein tü paʼaraiisü eekat maaʼulu nutuma Jehová, jama shikeraajüin süpüshuaʼa tü nüküjakat süchiki. Pawalaawajiraashii waya nutuma, anasü waaʼin jee jimatüsü waaʼin mayaainjeʼe naʼakain waya wayuu manoujainsalii mojulaakana maʼin (Sal. 72:7). Saaʼujee süpüshuaʼa tia wakaalinjeein maʼin wayuu süpüla naʼakainjanain naya na anoujashiikana. ¿Kasa waaʼinrajatka süpüla wountuin tia? Shia jülüjainjatka maʼin waaʼin wekirajüin wayuu (Mat. 28:19, 20).

 WAKAALINJA WAYUU SÜPÜLA SULUʼUIN NAYA TÜ PAʼARAIISÜ EEKAT MAAʼULU

16. ¿Kasa sürütkaaka anainjee wayuu sünainmüin tü paʼaraiisü eekat maaʼulu?

¹⁶ Eeshii süpüla waʼyataain wapüshuaʼa shiiʼiree anainjatüin sukuwaʼipa tü paʼaraiisü eekat maaʼulu süpüla anashiinjatüin sümüin wayuu suluʼuin shia. ¿Jamüinjatü sukuwaʼipa tia watuma? Müinjatü tü wakuwaʼipakat maʼaka nukuwaʼipa Jehová, nnojotsü nüpüleeruain saaʼin wayuu süpüla saaʼinrajatüin tü kasa nüchekakat, kamaneeshi nia sümüin süpüla sürütkaain nünainmüin (Jer. 31:3; Juan 6:44). Na wayuu ekirajaakana nüchiki Jehová jee anale tü kasa suluʼukat naaʼin arütkaweesü naaʼin nünainmüin, jama anain maʼin tü nukuwaʼipakat neʼrüin. ¿Kasa waaʼinrajatka süpüla anain wakuwaʼipa shiiʼiree sürütkaweein wayuu sünainmüin tü paʼaraiisü eekat maaʼulu?

17. ¿Kasa waaʼinrajatka süpüla narütkaainjanain na wayuukana sünainmüin tü paʼaraiisü eekat maaʼulu?

¹⁷ Alinjana wapüla na wawalayuukana jee kamaneeinjana waya namüin. Shia waaʼinrajatka tia süpüla narütkaainjanain na wayuukana sünainmüin tü paʼaraiisü eekat maaʼulu. Shia wachekaka achiki noʼunajanain na wayuukana sünain tü outkajawaakat maʼaka noʼunapuʼuin sünain tü outkajawaakat na manoujainsalii chajanakana Corinto sümaiwa paala. Anuu nanüiki süchiki tü outkajawaakat: «Shiimainña maʼin eein chi Maleiwakai jümaa» (1 Cor. 14:24, 25; Zac. 8:23). Müsüjeseʼe choʼujaain maʼin waapaainjanain sümaa pütchikat tüü: «Anakajaʼa anajiraale jia namaa na waneinnua» (1 Tes. 5:13).

18. ¿Kasa narütkaajeetka anainjee na wayuukana sünainmüin tü paʼaraiisü eekat maaʼulu?

¹⁸ Kapülainjatü waaʼin nakuwaʼipa na wawalayuukana maʼaka kapülain shia naaʼin Jehová. Shiakalaka jülüjeein waaʼin tü kasa anakat natuma, nnojotsü shiainjatüin jülüjain waaʼin tü mojukat natuma, jama sajaʼlajaweerüin tia. Saaʼujee alin wapüla na wawalayuukana wanouteerü akuwaʼipa wanee mojujirawaa namaa. Wounteerü tia woonoole sümaa pütchikat tüü: «Shia anaka aluʼu  kamaneejiraale jia, jümüliajiraale otta motomaatüle jaaʼin tü kasa mojusü aainjünakat jümüin» (Éf. 4:32). Napüshuaʼa na wayuu meekana akuwaʼipa mayaa, anashiijeerü namüin narütkaain sünainmüin tü paʼaraiisü eekat maaʼulu. b

AYATAʼAYA WAYA SULUʼU TÜ PAʼARAIISÜ EEKAT MAAʼULU

19. (1) ¿Jamüsü nanüiki waneinnua wayuu aleʼejakana nachikuaʼa suluʼumüin tü paʼaraiisü eekat maaʼulu? (Paashajeʼera tü pütchikat « Ooʼulaapünaashii naya suulia anoujaa»). (2) ¿Kasa waaʼinmaainjatka maʼin? (Piirakaa sümüin tü ayaakuaakat).

¹⁹ Anakatche wakuwaʼipa süka suluʼuin waya tü paʼaraiisü eekat maaʼulu. Anaʼleeitpaʼaya maʼin tia paʼaraiisüka suulialeʼeya sümaiwa jee watta maʼin naalii na aʼyataakana nümüin Jehová suluʼukana tia paʼaraiisükat. Waapüin analuʼutka nümüin Maleiwa saaʼu niʼitaain waya suluʼu tia paʼaraiisü eekat maaʼulu. Napüshuaʼa na wayuu aneekana aaʼin, talateekana aaʼin, jimateekana aaʼin jee nnojoliikana shapaweein aaʼin, ekerotuinjana suluʼu tia paʼaraiisükat jee nnojoliinjana ojuʼitüin naya suluʼujee. Eejeepejeʼe waaʼin, jama nüchajaain maʼin sukuwaʼipa Satanás süpüla nimeejüinjanain waya jee nükayaleʼereein waya suulia tia paʼaraiisükat (1 Ped. 5:8; Apoc. 12:9). Nnojo wooʼulaain nimeejüin waya, shia waaʼinmaainjatka maʼin waaʼinmajüinjatüin tia paʼaraiisükat süpüla anachoinjatüin shia, süpüla wuleinjatüin shia jee süpüla jimatajiraain saaʼin wayuu suluʼu.