¿Jamajaʼa saaʼin pümüin? ¿Anasüche naaʼinrüle wayuu tia? Eesüjaʼa sülatüle wamüin tü alatakat sümüin Samantha otta nnojotsü watüjaain aaʼu tü waaʼinrajatkat. Shiasaʼa sükajee tü waaʼinrakat, atüjaana aaʼu wayuule anamia waya. Eeshii na aküjakana naʼalain shiiʼiree aneein nakuwaʼipa suʼupala wayuu. Sütüjaanapa aaʼu naküjüin alawaa naya wayuukana, alatitshii naya japülii otta nnojotsü jaralin oonooin sümaa nanüiki. Wekirajaa sünain waneeirua kasa mojusü neʼraka na nnojoliikana lotuin akuwaʼipa.

Nüküjüle naʼalain wanee wayuu nümüin naʼaleewain, nnojoleena naya anajiraain. Aluʼujasaʼa matüjainre nia aküjaa naʼalain, anoujüna anainrü nünüiki. Eepejeʼe tü naaʼinrajatkat süpüla müinjatüin nukuwaʼipa. Jamüshijaʼa nia, alatirüinjachi nia kaʼi nümaa naʼaleewain, lotuinjatü nünüiki yootiraapa nia nümaa otta nnojotsü shiainjatüin jülüjain naaʼin nukuwaʼipa nümüiwaʼa. Shiasaʼa nüküjüle naʼalain nümüin naʼaleewain jee nnojorüle lotuin nukuwaʼipa sünain tü kasa naaʼinrakat, mojujiraajeena naya otta kapüleejeerü namüin anajiraain naya nachikuaʼa.

¿Naʼalainpalaichi pia wanee püpüshi jee niale wanee paʼaleewain? Sülatüirüle tia pümüin, ¿aashin alin pümüin sümaa mojuin paaʼin sutuma tia? Nnojorüle lotuin nukuwaʼipa wanee wayuu, amojujaajeerü nukuwaʼipa namaa naʼaleewainyuu.

Naashin Robert Innes, wanee ekirajüi suluʼu tü eʼikülee miyoʼu chakat California, nukuwaʼipa wanee wayuu eekai nüküjüin naʼalain müsü aka saaʼin wanee wanülüü. Jamüsüjaʼa tü wanülüükat, alataasü nünain chi eekai nümaatalain chi ayuuishikai. Akaataajaʼa nukuwaʼipa wanee wayuu eekai alaain, nüshatüin shia mapa chi wayuu eekai nümaatalain.

¿Kasa waaʼinrüinjatka süpüla nnojoluinjatüin washatüin nakuwaʼipa na keejiakana amüin aküjaa alawaa? Süküjüin tia wamüin tü Wiwüliakat. Anasü paashajeʼerüle tü pütchi suluʼukat süpana 5 sünain rewiisütakat tüü.