1. ¿Jamüsü naataka maʼin tü alatakat maaʼulu suulia tü alatakat sümaiwa?

NAATA maʼin tü alatakat maaʼulu suulia tü alatakat sümaiwa. Nükotchirüin wayuu Jeʼwaa maaʼulu yaa saʼakajee eʼirukuuka süpüshua jee «sainküinjee mmakat süpüshua», maʼaka süküjatüjülüin shia tü Wiwüliakat. Müinnapa aka saaʼin wanee pueulo miyoʼu maʼin, alatüshii suulia mekiisat miyoone otta aʼyataashii waneepia nümüin soʼukai jee saʼwai (Alat. Map. 7:9, 15; Isa. 60:22). Nnojotsü mapuʼuin sümaiwa, wainmainnapa maʼin na wayuu aikana apüla Maleiwa sümaʼaleʼeya wayuu.

2. ¿Kasa kapülaka naaʼin na nnojoliikana aleewain nümaa Jeʼwaa? (Piirakaa sümüin tü ayaakuaakat).

² Süküjatüjülia tü Wiwüliakat kapülainjatüin naaʼin nakuwaʼipa neʼe namüiwaʼa na wayuu nnojoliikana aleewain nümaa Jeʼwaa. Wanaa sümaa nüküjain chi aluwataaushikai Pablo tü sukuwaʼipainjatkat wayuu sülüʼütpa süpüla sajaʼttüin tü kasakalüirua, nüküjain eeinjanain wayuu eekai «kapülain naaʼin nakuaippa neʼe namüiwa, eekai kachiiruain naaʼin tü washirüükat» otta «eekai shaitteein waneepia saaʼu maalin Maleiwa napüla»  (2 Tim. 3:1-4). Naata maʼin nakuwaʼipa noulia na aikana apüla Maleiwa. Nnojotpajaʼa talatüin naaʼin na wayuu kapülakana aaʼin nakuwaʼipa neʼe namüiwaʼa, jaʼitainna talatüin naya saaʼin namüin. Sutuma wainmain maʼin na wayuu makana akuwaʼipa, müliasü maʼin naaʼin na waneinnua.

3. ¿Kasa wekirajaajeetka anain sünain ekirajaayakat tüü? ¿Jamüsü wekirajaainjatka sünain tia?

³ Nütüjaatüjülia aaʼu chi aluwataaushikai Pablo wainmainjanain maʼin na wayuu kapülakana aaʼin nakuwaʼipa neʼe namüiwaʼa jee eein süpüla nashatüin shia na anoujashiikana. Müshijeseʼe «jalia pia noulia», nümüin wamüin nachiki na makana akuwaʼipa (2 Tim. 3:5). Kapüleepejeʼe wamüin wakatalaaleeinjanain noulia na wayuu makana akuwaʼipa. ¿Kasakaʼa waaʼinrüinjatüin suulia washatüin nakuwaʼipa jee süpüla talatüin naaʼin Jeʼwaa wamaa, chi Maleiwa aipüraikai wayuu? Wekirajaa sünain tü akuwaʼipaa kapülainjatkat waaʼin naashin Jeʼwaa suulia tü akuwaʼipaa aküjünakat suluʼu 2 Timoteo 3:2-4. Watüjaajeetka saaʼu kasain wayu tü kapülainjatkat waaʼin süpüla talatüinjatüin maʼin waaʼin.

4. ¿Jamüsü nnojotka mojuin aire waya wapülajiraa?

⁴ Eejeena na «wayuu eekai kapülain naaʼin nakuaippa neʼe namüiwa», müshi Pablo. ¿Maluʼutche tia mojuin alin waya wapülajiraa? Nnojo. Choʼujaasü wamüin alin waya wapülajiraa süka aleinjatüin shia nutuma Jeʼwaa. Anuu nünüiki Jesuu: «Anasü aire püpüla wayuu süpüshua maa aka alin pia püpülajiraa» (Mar. 12:31). Nnojotsü süpüla alin wayuu wapüla nnojoliire alin waya wapülajiraa. Müsü tü Wiwüliakat wamüin: «Jia tooloyuukana, anakaja müleka aire jüpüla juʼwayuuse waneʼewaʼire jukua, [...] maa aka alin jia jüpülajiraa. Chi wayuu eekai alin nüpüla nuʼwayuuse, aijiraashi nia nüpüla süka tia. Wane wayuu, nnojotsü kanain naaʼin niʼiruku, shia eeka naaʼinmajüin shia» (Éf. 5:28, 29). Shiimain anain aire waya wapülajiraa, nnojotpajaʼa alanaʼaleeinjatüin waalin wapülajiraa.

5. ¿Jamüsü nakuwaʼipa na wayuu jülüjakana aaʼin nakuwaʼipa neʼe namüiwaʼa?

⁵ Nnojotsü anain sukuwaʼipa wayuu sutuma tü akuwaʼipaa aküjünakat suluʼu 2 Timoteo 3:2. Na makana akuwaʼipa aʼwaataashii suluʼu nakuwaʼipa namüiwaʼa (paashajeʼera Roma 12:3). Shia neʼe jülüjaka naaʼin nakuwaʼipa namüiwaʼa noulia na waneinnua. Shiasaʼa mojule wanee kasa natuma, naata neʼe na neʼitaakana saaʼu tü naainjalakat. Na wayuu makana akuwaʼipa nnojotsü talatüin naaʼin.

6. ¿Jameerü wakuwaʼipa aire wapüla Jeʼwaa?

⁶ Naashin na atüjashiikana maʼin süpüleerua tü Wiwüliakat, nüküjain Pablo palajana tü kasa mojeetkalü atuma wakuwaʼipa. Eekajasaʼa aire wapüla Maleiwa aneerü wakuwaʼipa, talateerü waaʼin, jimateerü waaʼin, nnojoleena waya jashichijaamaatüin, aainjeena waya kasa anasü, kamaneejeena waya, kanouleena waya, anamieena waya otta wachechereerü waaʼin (Gal. 5:22, 23). Anuujeseʼe nünüiki chi salmistakai: «¡Anataʼaleeshiijaʼa na wayuu Kamaleiwasekana Jeʼwaa!» (Sal. 144:15, TNM). Talatüsü maʼin naaʼin Jeʼwaa, akaʼaya na aʼyataakana nümüin talatüsü maʼin naaʼin. Naata maʼin nakuwaʼipa noulia na jülüjakana aaʼin nakuwaʼipa neʼe namüiwaʼa, na aʼatapajakana süsülajünüin kasa namüin. Na aʼyataakana nümüin Jeʼwaa talatüsü maʼin naaʼin süka nakaaliinjain na waneinnua (Aluw. 20:35).

7. ¿Kasa wasakireʼerüinjatka anain waaʼin süpüla watüjaain saaʼu aire wapüla Maleiwa?

 ⁷ ¿Jamüsü süpüla watüjaain saaʼu sülanaʼaleere tü waalinkat wapülajiraa suulialeʼeya tü naaliinkat Jeʼwaa wapüla? Jülüja waaʼin pütchikat tüü: «Tü kasa anasü jaaʼinrakat sümüin wayuu, nnojo jaaʼinrüin shia süpüla juʼwaajüneein süka ooʼulaka süpüla juʼwaataainjanain suluʼu sümaa pülayaain jaaʼin suulia wayuu. Je nnojo yaletayaain jukuaippa suʼupala wayuu. Shia anaka aluʼu kojutule napüshua na juwalayuukana jütüma. Meeshii aka jia naaʼin Cristo Jesús sünain kapülain jaaʼin nakuaippa na juwalayuukana, nnojo kapülain jaaʼin jukuaippa neʼe jümüiwa» (Filip. 2:3, 4). Wasakira waaʼin: «¿Taaʼinrüinche tü sümakat pütchikat tüü? ¿Tachajaainche sukuwaʼipa süpüla taaʼinrüin tü nuchuntakat Jeʼwaa tamüin? ¿Tachajaainche sukuwaʼipa süpüla takaaliinjain na tawalayuukana otta na wayuu taküjakana amüin pütchi?». Watüjaa aaʼulu kapüleein aaʼinraa tia. Eeshiijaʼa waʼyataainjanale maʼin süpüla waaʼinrüin shia otta wooʼulaainjanale suulia tü kasa keejiakat wamüin. Talateetpajaʼa maʼin waaʼin waaʼinrüle tia, süka jamüin, watüjaain saaʼu talateechin wamaa chi Miyoʼushikai saaʼu tü kasakat süpüshuaʼa.

8. ¿Kasa naainjaka waneinnua wawalayuu sutuma alin maʼin napüla Maleiwa?

⁸ Eeshii wawalayuu ooʼulaakana suulia tü nekirajaakalü anain eerejeʼe eein süpüla washirüin naya sünainjee. Naaʼinrüin tia süka alin napüla Maleiwa jee kooʼomüinweein tü naʼyataainkat nümüin. Jamüsüjaʼa Erika, tottoot shia, ooʼulaasü suulia ekirajawaa waneepia sünain tottoolaa süpüla pürekutsoolüin shia. Aküjasü shia pütchi suluʼu kojuya mma nümaa chi suʼwayuusekai. Anuuka sünüiki Erika: «Watta saalii tü kasa watüjakat sünainjee aküjaa pütchi suluʼu naata anüikii jee wainma maʼin na waʼaleewainkana, talatüsü maʼin waaʼin sutuma tia». Ayatayülia tottooluin Erika, shiapajaʼa  shiʼyataain maʼin anain ekirajaa wayuu nüchiki Jeʼwaa otta akaaliinjaa na suwalayuukana sünain anoujaa. «Talatüsü maʼin taaʼin sutuma müin takuwaʼipa», müsü shia.

9. ¿Jamüsü nnojotka talatüin naaʼin wanee wayuu eekai kachiiruain naaʼin washirüü?

⁹ Nüküjain Pablo eeinjatüin wayuu eekai «kachiiruain naaʼin tü washirüükat». Anuu tü alatakat nümüin wanee pürekutsoot wanaa sümaa nüküjain pütchi nümüin wanee wayuu chaa Irlanda, eeirü maʼaka jeʼra juya süchiirua. Nujutalüin nükatteetse chi wayuukai sümaa niyuʼlüin nünneetse jee nümaka nümüin chi wawalakai: «Anii tamaleiwasekai», müshi sümüin nünneetse. Mayaainjeʼe nnojoluin müin sünüiki wayuu süpüshuaʼa, wainma na wayuu wanaawakana aaʼin nümaa chia wayuukai. Alanaʼaleesia sujutü tü nneetkat namüin otta sujutü tü kasa eekat süpüla nayaʼlajüin süka. Anuupejeʼe sünüiki tü Wiwüliakat: «Chi wayuu keeʼireekai aaʼin washirüü, nnojotsü talatüin naaʼin sümaa tü kasa eekat nümaʼana, keeʼireesü naaʼin sooʼomüin» (Ecl. 5:10, TNM). Wanee wayuu eekai washireein, kooʼomüinweesü nümüin waneepia tü nuwashirüinkat. Süka kooʼomüinweein maʼin shia nümüin, aʼyataashi waneepia süchiirua. Sutuma tia, «mojushaatasü maʼi naaʼin» mapa (1 Tim. 6:9, 10).

10. ¿Jamüsü sünüiki tü Wiwüliakat süchiki tü washirüükat otta tü maʼletseekat?

¹⁰ Shiimain choʼujaain tü nneetkat wamüin, süka jamüin, eein süpüla wayaʼlajüin wanee kasa süka (Ecl. 7:12). ¿Talateenache waya shiale neʼe eein wamaʼana tü kasa choʼujaakat wamüin? Jamüsaʼa (paashajeʼera Eclesiastés 5:12). Anuu nünüiki Agur nüchon Jaqué: «Nnojo maʼletsein taya putuma jee nnojo washirüin taya putuma. Shia neʼe paapa tamüin tü teküinjatkat». ¿Jamüsü niyoutaka chia wayuukai tü maʼletseekat? Suuliajachi nuʼluwajüin. Jamüshijaʼa nuʼluwajüle, mojuteechi Maleiwa sutuma wayuu. ¿Jamaka niyoutaka washirüü? Anuu nünüiki: «Suulia wainmajüin kasa tamaʼana otta suulia tounjulajüin püchiki sünain maa: ‹¿Jaraikai chi Jeʼwaakai?›» (Prov. 30:8, 9, TNM). Eesüjaʼa piʼraajüle wayuu eʼitaaka saaʼin sünain suwashirüin nuulialeʼeya Maleiwa.

11. ¿Jamüsü nünüiki Jesuu süchiki tü washirüükat?

¹¹ Sülanaʼaleere sujutü tü nneetkat nümüin wanee wayuu, nnojoleechi talatüin Maleiwa nümaa. Anuu nünüiki Jesuu: «Maa aka kojutaʼatüle piamashii laama nütüma chi aʼyataaikai sünain alin nüpüla wane je sünain maalin nüpüla chi waneʼe, meechi aka Maleiwa jütüma müleka shiale kachiiruain jaaʼin tü washirüükat nuulialeʼeya». Anuu nünüiki Jesuu süpülapünaa tia: «Anakaja müleka nnojorule jünaajaain kasa anasü yaa mmaluʼu eere sheʼe mma ajaʼttirüinjatkat shia je eere suʼluwajünüin. Müleka jaaʼinrüle tü anasükat sümüin wayuu, naapeerü jümüin Maleiwa tü kasa anasü matüjainkat keʼewaa, matüjainkat ajaʼttaa, matüjainkat aʼluwajünaa, süka nümaʼanain shia Maleiwa chaa iipünaa» (Mat. 6:19, 20, 24).

12. ¿Jamüsü kooʼomüinjeetka waʼyataain nümüin Jeʼwaa nnojorüle kachiiruain waaʼin wainma kasa? Püküja tü naaʼinrakat wanee wawala.

¹² Wainma aʼyataalii nümüin Jeʼwaa nnojoliika kachiiruain aaʼin wainma kasa. Naaʼinrüin tia süpüla talatüin naaʼin otta kooʼomüin naʼyataain nümüin Jeʼwaa. Müsü nukuwaʼipa Jack, wanee wawala kepiashi chaa Estados Unidos. Eejatü nümaʼana wanee piichi miyoʼu otta oikaashi nia. Nuikaka tia süpüla pürekutsoolin nia sümaa tü nuʼwayuusekat. Anuu nünüiki: «Kapüleesü wamüin woiküin wepia otta wanee mma eejatka wamaʼana. Tatüjaa aaʼu shapaapuʼuin taaʼin sutuma tü alatakat tamüin sünain taʼyataain. Eekajasaʼa tü taʼwayuusekat  talatüsü maʼin saaʼin sutuma pürekutsoolüin shia. ‹Anashaatashi chi talaamainkai› mapuʼusü shia tamüin. Maaʼulu yaa, pürekutsoolüichipa taya otta aʼyataashii waya piamaleʼeya nümüin waneeshia laama, Jeʼwaa».

13. ¿Jamüsü süpüla watüjaain saaʼu sülanaʼaleere wamüin sujutü tü nneetkat?

¹³ Jülüja waaʼin pütchikat tüü süpüla watüjaain saaʼu sülanaʼaleere wamüin sujutü tü nneetkat: «¿Jaʼyasüche saaʼu takuwaʼipa tanoujain sünain tü sümakat tü Wiwüliakat süchiki tü nneetkat? ¿Shiache alanaʼaleeka tamüin sujutü tü nneetkat? ¿Shiache jülüjaka neʼe taaʼin wainmainjatüin kasa tamaʼana suulialeʼeya anain takuwaʼipa nümaa Jeʼwaa otta namaa na waneinnua? ¿Shiimainchejeʼe tanoujain sünain naapeerüin Jeʼwaa tü kasa choʼujaakat tamüin?». Weʼitaa waaʼin sünain nnojoleenain nüpütüin waya Jeʼwaa weʼitaale waaʼin nünain (Mat. 6:33, TNM).

14. ¿Jamüsü watüjaaka saaʼu nnojoluin mojuin tü shaittaakat?

¹⁴ Süküjatüjülia tü Wiwüliakat eejeerüin wayuu eekai «shaitteein waneepia» sülüʼütpa sükalia süpüla sajaʼttüin tü kasakalüirua. Watüjaaitpa aaʼu nnojoluin mojuin aire waya wapülajiraa otta nnojoluin mojuin tü nneetkat. Akaataajaʼa tü shaittaakat nnojotsü mojuin nnojorüle waneepiain waya sünain. Eesü wayuu eekai «mojusü tü shaittaakat» sümüin, nnojotpajaʼa shiimain tia naashin Jeʼwaa. Anuu sünüiki tü Wiwüliakat namüin na aʼyataakana waneepia nümüin Jeʼwaa: «Puʼuna, pika sümaa talatüin paaʼin otta püsa wiino sümaa anain paaʼin» (Ecl. 9:7, TNM).

15. ¿Kasa aküjüneeka süka tü pütchikat «shaitteein waneepia»?

¹⁵ Saashin 2 Timoteo 3:4, eejeerü wainma wayuu eekai shaitteein waneepia. Wayuukana naainnua, naya na nnojoliikana kachipünaain aaʼin Maleiwa. Süküjain tia pütchikat kachiiruain naaʼin «shaitteein waneepia saaʼu maalin Maleiwa napüla». Müsia nünüiki wanee atüjashi süpüleerua tü Wiwüliakat, «nnojoishi alin Maleiwa napüla», müshi nia. Tia pütchikat süchiajaain na kachiiruakana aaʼin tü shaittaakat otta tü kasa talatakalü atuma naaʼin. Na shaitteekana waneepia saashin tü Wiwüliakat naya na ayatakana «shapaain naaʼin [...] shiiʼiree emiʼijaa» (Luc. 8:14).

16, 17. ¿Jamüsü watüjaaka saaʼu nnojoluin mojuin nümüin Jesuu aaʼinraa tü kasa talatakalü atuma naaʼin?

¹⁶ Nnojotsü mojuin nümüin Jesuu aaʼinraa wanee kasa talataka atuma naaʼin. Soʼu wanee kaʼi, oʼunüshi nia sünain wane miʼiraa shikiira kaʼwayuusee suluʼu tü pueulokot Caná otta sünain wane ekawaa (Juan 2:1-10; Luc. 5:29). Sünain tia miʼiraa shikiirakat kaʼwayuusee, aainjashi Jesuu kasa pülasü, wiinojaasü nutuma tü wüinkat. Shiasaʼa wanaa sümaa «wayuu kasa aleʼechi nia» nümünüin natuma na fariseokana, nüküjain Jesuu nnojoluin pansaain tü namakat (Luc. 7:33-36).

¹⁷ Nnojoitpajaʼa waneepiain Jesuu sünain aaʼinraa tü kasa talatakalü atuma naaʼin. Nia Jeʼwaa palajanaka nutuma otta nükaaliinjain maʼin wayuu. Naapajiraain nikii süpüla katüinjatüin soʼu wayuu nünainjee. Anuu nünüiki Jesuu namüin na nikirajüinkana: «Anataʼaleeshiijaʼa maʼi jia müleka shiʼrüle wayumüin  wayuu jümüin saaliijee jünoujain tanain, müleka shimeʼerainparale jia je müleka jaashajaanüle sünain mojuin pütchi jüchiki. Meerü jukuaippa aka nakuaippa na nünüikimaajanakana Maleiwa paala sümaiwa sünain neʼnnüin amüin natüma na jutuushikanairua. Otta jiakana soʼu tü kaʼi mülieenakat oʼu jia sütüma wayuu, talata jia süka süpüshua jaaʼin, süka jütüjaain naaʼu chi Maleiwakai sünain nüsülajüinjatüin kasa anashaatakat jümüin chaa iipünaa eere nia» (Mat. 5:11, 12).

18. ¿Kasa wasakirüinjatka anain waaʼin süpüla watüjaain saaʼu müleka kachiiruale waaʼin tü shaittaakat?

¹⁸ ¿Jamüsü süpüla watüjaain saaʼu kachiiruale waaʼin tü shaittaakat jee aaʼinraa tü kasa talatakalü atuma waaʼin? Wasakireʼera waaʼin sünain pütchikat tüü: «¿Shiache kojutuleeka maʼin tamüin tü shaittaakat, tü anajaakat otta tü aapajaakat wanee kasa suulialeʼeya tü outkajawaakat otta tü aküjaakat pütchi? ¿Tooʼulaajeetche tü kasa kamalainkat tamüin süpüla taʼyataain nümüin Jeʼwaa? Taneeküinjachipa tü tashaittüinjatkat, ¿jülüjasüche taaʼin tü nümakat Jeʼwaa süchiki tia?». Süka alin wapüla Jeʼwaa otta talateein naaʼin watuma, wayoutuinjatü tü kasa watüjaakat aaʼu mojuin nümüin otta tü kasa eekai müin mojukai saaʼin wamüin (paashajeʼera Mateo 22:37, 38).

19. ¿Jaralii na wayuu nnojoliikana talatüin aaʼin?

¹⁹ Eeirü maʼaka 6 miit juya müliain wayuu nutuma chi Yolujaakai. Maaʼulu yaa, sülüʼütpa sükalia süpüla sajaʼttüin tü kasakalüirua, wainma maʼin na wayuu kapülakana aaʼin nakuwaʼipa neʼe namüiwaʼa, kachiiruasü naaʼin tü washirüükat otta tü shaittaakat. Shia naaʼinraka neʼe tü kasa suchuntaakat naaʼin. Na wayuu makana akuwaʼipa nnojotsü talatüin naaʼin. Anuu sünüiki tü Wiwüliakat: «Anataʼaleeshijaʼa chi akaaliinjünakai nutuma chi Nümaleiwasekai Jacob, chi eʼitaaka naaʼin nünain Jeʼwaa chi Nümaleiwasekai» (Sal. 146:5, TNM).

20. Püküja jamüin talataka paaʼin sutuma alin püpüla Jeʼwaa

²⁰ Aishi maʼin Jeʼwaa napüla na aʼyataakana nümüin otta kooʼomüinshii juyawai na wayuu eʼraajakana nia sümaa alin maʼin nia napüla. Tia shiiʼiyatüin wamüin suʼttuitpain tü Nuluwataayakat Maleiwa sünain aluwatawaa otta wainmeerüin kasa anasü weʼreetka sutuma. Waaʼinrüle tü nüchekakat Jeʼwaa wapüleerua, talateechi maʼin nia watuma otta talateena maʼin waya süpüla kaʼika süpüshuaʼa. Sünain tü wanee ekirajaayakat, wekirajaajeerü anain tü akuwaʼipaa mojusü eekat sutuma kapülain saaʼin wayuu sukuwaʼipa sümüiwaʼa otta tü akuwaʼipaa anasü eekat nanain na aʼyataakana nümüin Jeʼwaa.