1, 2. ¿Kasa outkajawaa aainjünüinjatka soʼu juyaka 2018 paaʼinweenaka anain waya? ¿Jamüsü anaka maʼin shia? (Piirakaa sümüin tü ayaakuaakat).

WATTEERÜ maʼin saalii wayuu oʼuneetka sünain wanee outkajawaa aainjüneetka maatsoʼu 31 soʼu 2018 sainküin mmaka süpüshuaʼa. Aainjünüsü tia uatua süpüla juyaka. Outkajaajeena waya süchikijee nikerotüin chi Kaʼikai süpüla sotuin waaʼin naapajiraain nikii Jesuu waaʼu. Anashaatasü maʼin suutkajaʼawalin wayuu juyawai sünain tia sainküin mmakat süpüshuaʼa.

² Talatakajasaʼa maʼin naaʼin Jeʼwaa nümaa Jesuu sünainjee neʼrüin suutkajaain watta saalii wayuu sünain tia outkajawaakat otta saaʼu saainjünüin sainküin mmakat süpüshuaʼa soʼu kaʼikat tia. Müsü sünüiki tü Wiwüliakat süchiki tia: «Wayuuirua watta maʼi saalii [...]. Isasü achikii nayaawajünüin süka wainmashaatain maʼi naya. Eesü wayuu saʼakajee shiʼirukukat tü wayuukalüirua süpüshua, sainküinjee mmakat süpüshua. [...]. Aʼwaatüshii naya emetut maʼi sünain maa: ‹Wamaleiwasekalee, piakai joyotakai saaʼu tü einaseekat, oʼttaashii waya pütüma je nütüma chi Anneetchonkai›»  (Alat. Map. 7:9, 10). Kojutushi maʼin Jeʼwaa nümaa Jesuu süka wattain maʼin naalii wayuu oʼunakana sünain outkajawaakat tia süpüla sotuin naaʼin outuin Jesuu naaʼu.

3. ¿Kasa wekirajaainjatka anain sünain ekirajaayakat tüü?

³ Sünain ekirajaayakat tüü, wekirajaajeerü anain: 1) ¿Kasa waaʼinrajatka süpüla yapain waya otta anain wakuwaʼipa sünainjee tü Outkajawaakat eere Sotuin Waaʼin Outuin Jesuu? 2) ¿Jamüsü paaʼinwaka nupueulose Jeʼwaa sutuma tia outkajawaakat? 3) ¿Kasa waaʼinrajatka süpüla paaʼinwajiraain maʼin waya namaa na wawalayuukana? otta 4) ¿Eejeetche wanee chiiruajatü outkajawaa eere sotuin waaʼin outuin Jesuu waaʼu? Müle shia, ¿joujeerü?

4. ¿Jamüsü choʼujaaka woʼunüin sünain tü Outkajawaakat eere Sotuin Waaʼin Outuin Jesuu?

⁴ ¿Jamüsü kojutuka maʼin wamüin tia outkajawaakat? Shia süka waʼwaajüin Jeʼwaa sükajee tia. Nütüjaa aaʼulu Jeʼwaa nümaa Jesuu süpüshuaʼa tü waaʼinrakat süpüla woʼunüinjanain sünain tia outkajawaakat juyawai, aluʼusaʼa isaleereeya maʼin wachiki oʼunaa sünain. Wanaa sümaa woʼunuin sünain tia outkajawaakat, weeʼiyatüin nümüin Jeʼwaa kojutuin shia wamüin, müle shia watuma niʼitaajeerü wanülia suluʼu «tü karalouktakat kaluʼukot nanülia» na katüinjanaka oʼu waneepia nutuma (Mal. 3:16; Alat. Map. 20:15).

5. ¿Kasa waaʼinrajatka süpülapünaa tü Outkajawaakat eere Sotuin Waaʼin Outuin Jesuu?

⁵ Süpülapünaa tü Outkajawaakat eere Sotuin Waaʼin Outuin Jesuu, oʼuraajüinjana waya nümüin Jeʼwaa jee jülüjainjatü waaʼin kasain waaʼinrajatüin süpüla aleewain maʼin waya nümaa (paashajeʼera 2 Corinto 13:5). Anuu nünüiki Pablo namüin na anoujashiikana: «Anakaja müleka jiyaawatüle saaʼu tü jaaʼinrakat waneʼewaire jukua süpüla jütüjaainjatüin saaʼu müleka shiimüinre sünain jaaʼinrüin tü nüchekakat Cristo jüpüleerua». ¿Jamüinjatü sukuwaʼipa tia watuma? Eesü süpüla wasakirüin waaʼin sünain pütchikat tüüirua: «¿Tanoujainche suluʼuin taya nupueulose Jeʼwaa, na nüneekakana süpüla naainjain tü nüchekakat? ¿Aküjüshiche maʼin taya pütchi? ¿Ekirajüshiche maʼin taya wayuu sünain tü Wiwüliakat? ¿Teeʼiyatüinche süka takuwaʼipa tanoujain sünain sülüʼülüin süpüla süntüin tü kaʼi sajaʼlajaainjatkalü oʼu kasa süpüshuaʼa? ¿Ayatüsüche teʼitaain taaʼin nünain Jeʼwaa nümaa Jesuu maʼaka toʼttaiwaʼaya sünain anoujaa?» (Mat. 24:14; 2 Tim. 3:1; Heb. 3:14). Wasakirüle waaʼin sünain tia pütchikalüirua, watüjaajeerü aaʼu müleka shiimainre waaʼinrüin tü nüchekakat Kürisüto wapüleerua.

6. (1) ¿Kasa waaʼinrajatka süpüla katüin woʼu waneepia? (2) ¿Kasa naaʼinraka wanee laülaashi süpüla yapain nia juyawai süpüla outkajawaakat tia? ¿Kasa paaʼinrajatka püshateere nukuwaʼipa chia laülaashikai?

⁶ Wanee sukuwaʼipa süpüla yapain waya süpüla tia outkajawaakat shia waashajeʼerüle tü karaloʼuta aashajaakat süchiki tia otta wasakireʼerüle waaʼin sünain jamüin kojutuka maʼin shia (paashajeʼera Juan 3:16; 17:3, TNM). Kateerü woʼu waneepia wekirajaale sünain  nukuwaʼipa Jeʼwaa otta wanoujale nünain Jesuu. Yapeena waya süpüla tia outkajawaakat, wekirajaale nachiki süpüla warütkaain maʼin nanainmüin. Jamüshijaʼa wanee wawala kakaliaichika laülaain napüleerua na wawalayuukana, kottüsü nutuma süpüshuaʼa tü rewiisütairua Aapiria Wayuu aashajaaka süchiki tü Outkajawaakat eere Sotuin Waaʼin Outuin Jesuu otta tü aashajaakat süchiki alin maʼin waya nüpüla Jeʼwaa nümaa Jesuu. Maʼaka jeʼra semaana süpülapünaa tia outkajawaakat naashajeʼerüin tia rewiisütakalüirua otta nüsakireʼerüin naaʼin sünain jamüin kojutuka maʼin tia outkajawaakat. Ayatayüt kooʼomüin nutuma tia rewiisütakalüirua. Akaʼaya nia, nüsakireʼerüin naaʼin sünain tü pütchi aashajeʼennakat suluʼujee tü Wiwüliakat suʼunnaa tü kaʼi sotokalü oʼu waaʼin outuin Jesuu waaʼu. Naashin chia laülaashikai, wainma tü kasa nütüjakat juyawai sünainjee naaʼinrüin tia. Anaʼleesia maʼin tia ekirajawaakat süka kooʼomüin tü naaliinkat Jeʼwaa otta Jesuu nüpüla. Müle shia watuma wekirajaapa, aijeechi maʼin Jeʼwaa otta Jesuu wapüla, talateena maʼin waya namaa saaʼu süpüshuaʼa tü kasa naaʼinrakat wapüleerua jee aneerü wakuwaʼipa sünainjee tia outkajawaakat.

7. (1) ¿Kasa nuchuntaka Jesuu soʼu tü ekawaa aipaʼajatkat naainjaka namaa na nikirajüinkana? (2) ¿Jamüsü watüjaaka aaʼu shikeraajüin nutuma Jeʼwaa tü nuchuntakat Jesuu nümüin?

⁷ Soʼu tü ai naainjakalü oʼu Jesuu tü ekawaa aipaʼajatkat namaa na nikirajüinkana, oʼuraajüshi nia nümüin Jeʼwaa süchiki paaʼinwain nia nümaa. Akaʼaya nia, achuntüshi napüleerua na nikirajüinkana süpüla paaʼinwain naya maʼaka nayakana (paashajeʼera Juan 17:20, 21). Naapüin Jeʼwaa tü nuchuntakat chi nüchonkai nümüin. Anaʼleesia maʼin tü Outkajawaakat eere Sotuin Waaʼin Outuin Jesuu, suulialeʼeya wanee outkajawaa süka paaʼinwain waya aküjaliikana pütchi nüchiki Jeʼwaa sutuma tia. Maaʼulu yaa, watta maʼin saalii wayuu sainküin tü mmakat jee sünainjee eʼirukuukat süpüshuaʼa outkajaakana süpüla neeʼiyatüin nanoujain sünain nuluwataain Jeʼwaa chi Nüchonkai yaa mmapaʼa. Eesü mma eere ponuin saaʼin wayuu kottuin na naatakana eʼiruku sünain tia outkajawaakat süka nnojoluin anashiin tia namüin. Anashaatapejeʼe nümüin Jeʼwaa otta Jesuu paaʼinwain na aʼyataashiikana nümüin sünain tia outkajawaakat.

8. ¿Kasa nüküjatüjütkalia Jeʼwaa nükajee Ezequiel?

⁸ Nnojotsü ponuin waaʼin paaʼinwain nupueulose Jeʼwaa maaʼulu yaa süka nüküjatüjülin shia Jeʼwaa nükajee Ezequiel. Aluwataanüshi Ezequiel sünain naapaainjachin piamasü wunuʼu, wanee wunuʼu nünüliamaainjatü Judá otta tü wanee wunuʼukat nünüliamaainjatü José, waneesüinjatü tia wunuʼukalüirua najapuluʼu (paashajeʼera Ezequiel 37:15-17). Saashin tü pütchikat «Süsakiraka anain wayuu» ojuʼitaka suluʼu Aapiria Wayuu juulioʼu soʼu 2016 (alijunaikiruʼusü), nüküjatüjülia Jeʼwaa nükajee Ezequiel naleʼejüinjanain na israeliitakana nachikuaʼa suluʼumüin tü Mma Aapünakat namüin paala jee paaʼinwainjanain naya nachikuaʼa. Aküjünatüjülia sükajee tia pütchikat paaʼinwainjanain na aʼwaajakana Jeʼwaa süpülapünaa süntüin tü kaʼi sajaʼlajaainjatkalü oʼu kasa süpüshuaʼa.

9. ¿Jamüsü watüjaaka saaʼu shikeraajüin sünain nupueulose Jeʼwaa tü aküjünatüjütkalia nükajee Ezequiel?

⁹ Soʼujee tü juyakat 1919 nükotchirüin Jeʼwaa na anoujashii chainjanakana chaa iipünaa süpüla paaʼinwain naya. Na anoujashii chainjanakana chaa iipünaa, naya na wunuʼu nünüliamaakana Judá. Süchikijee tia, wainma wainma müshii na anoujashii katüinjanakana oʼu waneepia saaʼu tü mmakat jee paaʼinwashii naya namaa na anoujashii chainjanaka chaa  iipünaa. Na katüinjanakana oʼu waneepia saaʼu tü mmakat naya na wunuʼu nünüliamaakana José. Nüküjatüjülia Jeʼwaa kottuinjanain najapuluʼu napüshuaʼa na anoujashiikana süpüla müinjanain aka saaʼin waneesia wunuʼu najapuluʼu (Ezeq. 37:19). Kottushii nutuma Jeʼwaa napüshuaʼa na naʼanneetsekana, na anoujashii chainjanakana iipünaa otta na «wane anneerüiruayaʼa» waneejannuukana (Juan 10:16; Zac. 8:23). Maaʼulu yaa, paaʼinwashii piamaleʼeya sünain aʼyatawaa nümüin Jeʼwaa otta nia aluwataakai Jesukürisüto naaʼu. Chi «tachepchiakai David» münüshi Jesuu nutuma Ezequiel suluʼu tü pütchi nüküjatüjütkalia (Ezeq. 37:24, 25). Woutkajaapa juyawai süpüla sotuin waaʼin outuin Jesuu waaʼu, eesü süpüla weʼrüin shikeraajüin tü nüküjatüjütkalia Jeʼwaa nükajee Ezequiel sünain paaʼinwainjanain napüshuaʼa na anoujashiikana, na chainjanakana iipünaa namaa na katüinjanakana oʼu waneepia yaa saaʼu tü mmakat. ¿Kasa waaʼinrajatka süpüla ayatüin paaʼinwain nupueulose Jeʼwaa?

10. ¿Kasa waaʼinrajatka süpüla paaʼinwain maʼin waya namaa na wawalayuukana?

¹⁰ Nnojoluinjatü yaletüin waaʼin süpüla paaʼinwain maʼin waya namaa na wawalayuukana. Jamüshijaʼa Jesuu wanaa sümaa yaajachin nia saaʼu tü mmakat, nüchiaain na nikirajüinkana suulia yaletüin naaʼin (Mat. 23:12). Na manoujainsaliikana pülayaasü naaʼin noulia na waneinnua. Nnojorüle yaletüin waaʼin kojuteena wamüin na laülaashiikana wapüleerua sünain anoujaa otta oonoojeena waya sümaa tü namakat  wamüin. Müle wakuwaʼipa, paaʼinweena maʼin waya namaa na wawalayuukana otta talateechi Jeʼwaa wamaa. Saashin tü Wiwüliakat, jashichishi nia namüin «na eekai yaletayaain naaʼin suluʼu nakuaippa namüiwa, otta kamaneeshi nia namüin eekai nnojolüin pülain naaʼin suulia wayuu» (1 Ped. 5:5).

11. ¿Jamüshii paaʼinweenaka maʼin waya jülüjale waaʼin kasain kayaawasein tü pankat otta tü wiinokot?

¹¹ Jülüjainjatü waaʼin kasain kayaawasein tü pankat otta tü wiinokot süpüla paaʼinwain maʼin waya namaa na wawalayuukana. Müinjatü shia watuma süpülapünaa otta suʼunnaa outkajawaakat tia (1 Cor. 11:23-25). Tü pan nnojotkat ejitünüin aʼaka soolojia, shiyaawasesü tü niʼiruku Jesuu naapajiraakat waaʼu sümaa maainjalain nia otta tü wiinokot shiyaawasesü nüsha Jesuu. Nnojotpajaʼa neʼe watüjaainjatüin saaʼu kasain kayaawasein tia. Sotuinjatü waaʼin waakajinnüin süka piamain na aikana maʼin apüla waya: Jeʼwaa süka naapüin nikii chi Nüchonkai waaʼu otta Jesuu süka nnojoluin naapajiraain nikii waaʼu mojusheeka. Jülüjale waaʼin tia, aijeena maʼin naya wapüla otta paaʼinweena waya namaa na wawalayuukana.

12. ¿Kasa wayaawataka sünainjee tü nüküjakat Jesuu nüchiki wanee aluwataai nümaa nüchepchia?

¹² Motuinjatü waaʼin naainjala na wawalayuukana wamüin süpüla paaʼinwain maʼin waya namaa. Müle shia watuma, weeʼiyateerü nümüin Jeʼwaa talatüin waya nümaa saaʼu nülaʼajaain waainjala woulia süka naapajiraain nikii Jesuu waaʼu. Wanaa sümaa nüküjain Jesuu nüchiki wanee aluwataai nümaa chi nüchepchiakai nüküjain motuinjatüin waaʼin naainjala na waneinnua wamüin. Paashajeʼera Mateo 18:23-34 otta püsakireʼera paaʼin: «¿Taaʼinreeinche maʼin tü nikirajakalü anain taya Jesuu? ¿Tayaawatüinche saaʼu nakuwaʼipa na tawalayuukana suulia jashichimaatüin taya namüin? ¿Motusüche taaʼin naainjala na waneinnua toulia?» Nnojotpejeʼe wanaawain saainjala wanee wayuu, eesü eekai mojuleein maʼin. Müsüjeseʼe kapüleein wamüin motuin shia waaʼin. Wayaawatüin sünainjee tü nüküjakat Jesuu nüchiki chia aluwataaikai nümaa chi nüchepchiakai keeʼireein naaʼin Jeʼwaa motuin waaʼin naainjala na wawalayuukana wamüin (paashajeʼera Mateo 18:35). Nüküjain Jesuu nnojoleerüin motuin naaʼin Jeʼwaa waainjala nnojorüle motuin waaʼin naainjala na wawalayuukana mojule naaʼin saaʼujee tia, shialeekajaʼa watüjaale saaʼu waaʼinrajatüin shia. Choʼujaasü wasakireʼerüin waaʼin sünain tia. Süpüla ayatüin waya paaʼinwain namaa na wawalayuukana, waaʼinrajatü tü nikirajakalü anain waya Jesuu, motuinjatü waaʼin naainjala na wawalayuukana wamüin.

13. ¿Kasa waaʼinrajatka süpüla ayatüin paaʼinwain waya namaa na wawalayuukana?

¹³ Motule waaʼin naainjala na wawalayuukana wamüin, ayateena paaʼinwain waya namaa. Nüküjain chi aluwataaushikai Pablo süchiiruainjanain maʼin waya anajirawaa namaa waneinnua süpüla paaʼinwain waya (Éf. 4:3). Sülüʼülaapa tü Outkajawaakat eere Sotuin Waaʼin Outuin Jesuu otta soʼu tia aikat, jülüjeesü paaʼin jamüin pukuwaʼipa namaa na waneinnua. Püsakira paaʼin: «¿Jaʼyasüche taaʼu nnojoluin jashichin taya namüin na kaainjalakana toulia? ¿Jaʼyasüche taaʼu shiain kachiiruain taaʼin tü anajirawaakat süpüla paaʼinwain taya namaa na waneinnua?» Wasakireʼera waaʼin sünain tia.

14. ¿Jamüshii alinjanaka maʼin wapüla na wawalayuukana?

¹⁴ Alinjana wapüla na wawalayuukana maʼaka alin naya nüpüla Jeʼwaa süpüla paaʼinwajiraain waya namaa (1 Juan 4:8). «Alinjana tapüla na tawalayuukana, nnojotpajaʼa choʼujaain anain nashoʼu tamüin», nnojotsü müinjatüin wanüiki. Shiale jülüjain waaʼin tia, iseerü wachiki tü nümakat Pablo sünain ‹waaʼinrüinjatüin tü anasükat namüin na wawalayuukana  saaʼu alin naya wapüla› (Éf. 4:2, TNM). Nnojotsü shiainjatüin neʼe waaʼinrüin tü anasükat namüin na wawalayuukana naashin Pablo, waaʼinrajatü tia saaʼu alin naya wapüla. Mayaainjeʼe naatain maʼin nakuwaʼipa na wawalayuukana, eenakuushii naya nutuma Jeʼwaa (Juan 6:44). Wainma tü kasa aikalü aaʼujee naya nüpüla Jeʼwaa. Aire nüpüla Jeʼwaa na wawalayuukana, ¿jamataalüinjanaka süpüla nnojoluin alin naya wapüla? Ai wapüla na wawalayuukana maʼaka nücheküin shia Jeʼwaa wapüleerua (1 Juan 4:20, 21).

15. ¿Jamüsü süpüla watüjaain saaʼu eejeerüin wanee chiiruajatü outkajawaa eere sotuin waaʼin outuin Jesuu waaʼu?

¹⁵ Anteerü tü kaʼi eere waainjeerüin tü chiiruaajatkalü Outkajawaa eere Sotuin Waaʼin Outuin Jesuu jee süchikijee, nnojoleerü aainjünüin piantua tia outkajawaakat. ¿Jamüsü watüjaaka saaʼu tia? Nüküjain Pablo noutkajaainjanain juyawai na anoujashii chainjanakana chaa iipünaa süpüla sotuin naaʼin outuin Jesuu waaʼu «süpülapünaa nüleʼejüin chi Senyotkai nüchikua» (1 Cor. 11:26). Wanaa sümaa nüküjain Jesuu süchiki tü shiyaawaseinjatkat sülüʼülüin sajaʼttüin kasa süpüshuaʼa, nüküjain nüntajachin nüchikuaʼa. Anuu nünüiki Jesuu süchiki tü müliaa miyoʼu weʼreetkat soʼu palit kaʼi: «Eʼnneerü chaa sirumatuʼu wane kasa atüjaaneetkat atuma saaʼu sünain tantamaateechin tayakai chi Shipayakai Wayuu. Je tü wayuukolüirua sainküin mmakat süpüshua eekai nnojolüin saʼatapajüin taya, aʼwaateena naya süka mmolüin naya teema. Je shiʼreechi taya wayuu, tayakai, chi Shipayakai Wayuu, sünain antaa saʼaka tü sirumakat [...]. Eweeteerü wane shipijana jontoroyoi emetuluinjatü maʼi. Je ajütüneena na aapiee nümaʼanajeejanakana Maleiwa süpüla nakotchajüinjatüin tü wayuu aneekuushikalüirua nütüma sainküinjee tü mmakat süpüshuaʼale» (Mat. 24:29-31). Nüsaajeena Jesuu na aneekuushii chainjanakana iipünaa yaayüliikana saaʼu tü mmakat süpüla kottuin naya. Alateerü tia süchikijee suʼttuin tü müliaa miyoʼusükat jee süpülapünaa tü atkawaa kanüliakat Armagedón. Sünain tia atkawaakat, akanajuujeena napüshuaʼa na aluwataaliikana saaʼu tü mmakat nutuma Jesuu namaa na 144.000 anoujashii (Alat. Map. 17:12-14). Tia outkajawaa aainjüneetkat süpülapünaachon nüsaajüin Jesuu na chainjanakana iipünaa, nnojoleerü aainjünüin piantua.

16. ¿Jamüshii nnojoliinjanaka makatüin waya suulia tü Outkajawaakat eere Sotuin Waaʼin Outuin Jesuu aainjüneetka soʼu juyakat tüü?

¹⁶ Anashii nnojorüle makatüin waya suulia tü outkajawaa aainjüneetkat Maatsoʼu 31. Puchunta kaaliinwaa nümüin Jeʼwaa süpüla ayatüin paaʼinwain maʼin pia namaa na wawalayuukana (paashajeʼera Salmo 133:1). Soʼu wanee kaʼi oʼuneena waya sünain tü chiiruaajatkat Outkajawaa eere Sotuin Waaʼin Outuin Jesuu. Sümaʼinruʼu süntüin kaʼikat tia, weeʼiyata anain maʼin wamüin kottuin waya namaa na wawalayuukana juyawai sünain tia outkajawaakat.