1, 2. ¿Jamüsü watüjaaka saaʼu asülajülin maʼin Jeʼwaa?

ASÜLAJÜI maʼin Jeʼwaa. Nia chi kaapajalakai wamüin kasa süpüshuaʼa. Nia kakoroloko süpüshuaʼa tü kasa eekat saaʼu tü mmakat jee sükajee tia katüsü woʼu nutuma (Sal. 104:13-15; Ageo 2:8). Saashin tü Wiwüliakat, eesü naainjüle Jeʼwaa kasa pülasü süpüla naapüin tü kasa choʼujaakat sümüin nupueulose sükajee tü kasa eekat saaʼu tü mmakat.

² Jamüshiijaʼa na israeliitakana, wanaa sümaa chajanain naya 40 juya isashiipaʼa naapüin Jeʼwaa namüin maná sümaa wüin (Éx. 16:35). Müsüjeseʼe nnojoluin kasain choʼujaain namüin (Neh. 9:20, 21). Akaʼaya Eliseo aainjashi kasa pülasü nutuma Jeʼwaa, kasetirasü nutuma yootchon seita sümüin wanee wayuu outa aʼwayuuset. Saaʼu sükaaliinjünüin nutuma Jeʼwaa, suuntuin suwalaajüin sujuyaala jee ayatsia apütaain nneerü sümaʼana süpüla tü shikajatkalü aaʼu namaa na süchonniikana (2 Rey. 4:1-7). Müsia neʼe nukuwaʼipa Jesuu, aainjashi kasa pülasü nutuma Jeʼwaa süpüla nikirüin wainma  wayuu otta süpüla eeinjatüin nutuma tü nneerü choʼujaakat namüin (Mat. 15:35-38; 17:27).

3. ¿Kasa wekirajaajeetka anain sünain ekirajaayakat tüü?

³ Eesü süpüla naaʼinmajüin Jeʼwaa süpüshuaʼa tü kasa nukumajakat, wainma sukuwaʼipa tia nutuma. Ayatapejeʼe keeʼireein naaʼin napüleerua na aʼyataakana nümüin nasülajüin süpüshi tü kasa eekat namaʼana süpüla tü aʼyatawaa saainjakat nupueulose (Éx. 36:3-7; paashajeʼera Proverbios 3:9). ¿Jamüsüche keeʼireeka naaʼin Jeʼwaa wasülajüin nümüin süpüshi tü kasa naapakat wamüin? ¿Kasa naainjapuʼuka na aʼyataakana nümüin Jeʼwaa namaiwa süpüla nakaaliinjain sünain waneirua aʼyatawaa? ¿Kasa saainjaka tü nupueulosekat Jeʼwaa süpüla anain sukuwaʼipa sutuma tü nneerü asülajünakat? Wekirajaajeerü anain tia sünain ekirajaayakat tüü.

4. ¿Kasa weeʼiyataka nümüin Jeʼwaa wanaa sümaa wasülajüin nümüin?

⁴ Asülajüshii waya nümüin Jeʼwaa süka alin otta kojutuin nia wamüin. Jülüjale waaʼin süpüshuaʼa tü kasa naainjakat Jeʼwaa wapüleerua aijeechi maʼin nia wapüla. Majachi David wanaa sümaa nüküjain choʼujaain sukumajünüin wanee aʼwaajülee nümüin Jeʼwaa. Naashin David, naapajala Jeʼwaa wamüin süpüshuaʼa tü kasa eekat wamaʼana. Akaʼaya tü kasa wasülajakat nümüin Jeʼwaa süpüshi neʼe tü kasa naapakat wamüin (paashajeʼera 1 Crónicas 29:11-14).

5. ¿Jamüsü choʼujaaka wasülajüin nümüin Jeʼwaa sümaa nnojoluin waʼatapajüin keeʼirakain shia wamüin nutuma?

⁵ Asülajüshii waya nümüin Jeʼwaa süka shiain wanee sukuwaʼipa süpüla waʼwaajüin nia. Niʼrüin chi aluwataaushikai Juan nutuma Jeʼwaa tü namakat na nüchepchiakana Maleiwa chaa iipünaa, wanaa sümaa namüin: «Maleiwakalee, waʼwaajüin pia süka piainjaʼa neʼe piakai aluwataain waaʼu. Alanaʼaleeshia maʼi pia sünain anain je sünain pülashin, süka piainjaʼa kakumalain kasakat süpüshua suluʼu tü püchekakat paaʼinyaka. Je ayatsüjaʼa shia waneepia maaʼulu yaa süka alejatüinjaʼa shia pütüma» (Alat. Map. 4:11). Shiimain niain neʼe Jeʼwaa nümüiwaʼa anaka süpüla waʼwaajüin, müsüjeseʼe waapüin nümüin tü kasa kojutusü eekat wamaʼana. Jamüshiijaʼa na israeliitakana, nuluwataain naya Jeʼwaa nükajee Moisés süpüla naainjawalin apünüinsü miʼiraa süpüla juyaka. Sünain tia miʼiraakalü asülajünapuʼu amüinchi Jeʼwaa, müsüjeseʼe nnojoliipuʼuin noʼunuin na israeliitakana sünain tia miʼiraakat sümaa majapüitpain naya (Deut. 16:16). Akaʼaya maaʼulu yaa, waʼwaajüin Jeʼwaa sükajee tü kasa wasülajakat nümüin otta nnojotsü waʼatapajüin keeʼirakain shia wamüin. Sükajee tia, weeʼiyatüin kojutuin wamüin wakaaliinjain nupueulose Jeʼwaa sünain tü aʼyatawaa saaʼinrakat.

6. ¿Jamüsü aneetka wakuwaʼipa wasülajüliire? (Piirakaa sümüin tü ayaakuaa suluʼukat süpana 17).

⁶ Aneerü wakuwaʼipa wasülajüliire suulialeʼeya waʼatapajüin wasülajünüin amüin (paashajeʼera Proverbios 29:21). Jamüshijaʼa nükotchajüle wanee jintüi tü nneerü nasülajakat nümüin na kachonkana nia jee sükajee tia nneetkat niʼyalajüle wanee kasa nüsülajüinjatka namüin, ¿jameerü naaʼin na kachonkana nia? Akaʼaya wanee pürekutsoot kepiakai namaa na kachoinkana nia, nüsülajawaire nneerü namüin süpüla nawalaajüin tü piichi kaluʼukat naya jee süpüla nayaʼlajüin eküülü,  talateena naya nümaa. Süka jamüin, niiʼiyateerüin chi nachonkai kojutuin nümüin tü naaʼinrakat nüpüleerua. Müsia neʼe tü wakuwaʼipakat nümaa Jeʼwaa, nütüjaa aaʼulu aneerüin wakuwaʼipa wasülajüle nümüin süpüshi tü kasa kojutusü eekat wamaʼana.

7, 8. (1) ¿Kasa naaʼinrapuʼuka na israeliitakana süpüla nakaaliinjain sünain waneirua aʼyatawaa? (2) ¿Kasa naaʼinrapuʼuka na israeliitakana napüleerua na aʼyataapuʼukana maʼin nümüin Jeʼwaa?

⁷ Süküjain tü Wiwüliakat nasülajapuʼuin na israeliitakana süpüla waneirua aʼyatawaa aainjünakat sümaiwa. Jamüshijaʼa Moisés nütütüleʼerüin naaʼin na israeliitakana sünain asülajaa süpüla sukumajünüin tü aʼwaajüleekat. Müsia neʼe sukuwaʼipa nutuma David wanaa sümaa sukumajünüin tü piichi aʼwaajüleekat Maleiwa (Éx. 35:5; 1 Crón. 29:5-9). Akaʼaya wanaa nümaa chi aluwataaikai Jehoás, anaatünüsü tü aʼwaajüleekat Jeʼwaa natuma na sacerdootekana sükajee tü nneerü nasülajakat na israeliitakana (2 Rey. 12:4, 5). Nakalioʼu na nikirajüinkana Jesuu, kaapiashii na anoujashii chajanakana Antioquía nachiki na nawalayuu chajanakana Judea sünain müliain naya sutuma jamü. Akaaliinjünüshiijeseʼe naya natuma wanaa sümaa naluwataain tü choʼujaakat namüin (Aluw. 11:27-30).

⁸ Na israeliitakana asülajapuʼushii nneerü namüin na aʼyataapuʼukana maʼin nümüin Jeʼwaa. Saashin tü pütchi aapünakat nümüin Moisés nutuma Jeʼwaa, nnojoliinjana kapaalain na leviitakana maʼaka naaʼin na israeliitakana. Müsüjeseʼe aapünapuʼuin diezmo namüin na leviitakana natuma israeliitakana. Sutuma tia, jülüjasü naaʼin na leviitakana waneepia tü naʼyataainkat nümüin Jeʼwaa suluʼu tü aʼwaajüleekat (Núm. 18:21). Akaʼaya Jesuu namaa na nikirajüinkana, akaaliinjünüshi naya sutuma waneirua jieyuu süka nawashirüin (Luc. 8:1-3).

9. ¿Jalejeekuwat tü nneerü asülajünapuʼukat sümaiwa?

⁹ Wainma sukuwaʼipa tü nneerü asülajünakat. Nasülajüin na israeliitakana tü korolo kojutusü nalüʼüjakat Egiptojee süpüla sukumajünüin tü aʼwaajüleekat Maleiwa (Éx. 3:21, 22; 35:22-24). Nakalioʼu na nikirajüinkana Jesuu, eeshii anoujashii oikakana noumain otta nepia süpüla nasülajüin tü süliakat namüin na aluwataaushiikana. Süka tü nneerü aapünakat namüin na aluwataaushiikana nakaaliinjain na anoujashii eekana choʼujaain amüin kasa (Aluw. 4:34, 35). Eejana na anoujashii akatalakana süpüshi nanneetse süpüla nasülajüin shia süpüla waneirua aʼyatawaa nümüin Jeʼwaa (1 Cor. 16:2). Na washinnuukana maʼin namaʼaleʼeya na maʼletsekana asülajapuʼushii naya (Luc. 21:1-4).

10, 11. (1) ¿Jamüsü washatüinjatka nakuwaʼipa na anoujashii namaiwajanakana? (2) ¿Jamüsü paaʼin sutuma püsülajüin süpüshi pünneetse süpüla tü aʼyatawaa saaʼinrakat nupueulose Jeʼwaa maaʼulu?

¹⁰ Akaʼaya wayakana maaʼulu yaa eesü tü kasa wasülajakalü apüla süpüshi wanneetse. Eesüjaʼa nanoutajatüle tü piichi outkajaaleekat na wawalayuu puutkajaakana amaa jee nakumajüinjanale wanee Piichi Outkajaalee. Eesüjaʼa choʼujaale sunoutunüin wanee Weteet. Eesü  süpüla wasülajüin süpüshi wanneetse süpüla tü outkajawaakat miyoʼu. Eeshii na wawalayuu müliakana sutuma sukutkujaain mma jee sutuma wawai jee choʼujaakana amüin nakaaliinjünüin. Süka tü nneerü wasülajakat wakaaliinjain na misioneerokana, na pürekutsoot pesiaatkana, na wawalayuu alapalaakana waaʼu, na wawalayuu aʼyataakana chaa Warwick otta na aʼyataakana suluʼu Weteet sainküinpünaa mmaka. Akaʼaya shia, na wawalayuukana eesü süpüla nasülajüin süpüshi nanneetse süpüla sukumajünüin piichi outkajaalee otta süpüla sukumajünüin piichi süpüla tü outkajawaakat miyoʼu napüla na wawalayuukana sainküin mmaka süpüshuaʼa.

¹¹ Wapüshuaʼa wayakana eeshii süpüla wasülajüin süpüla tü aʼyatawaa saaʼinrakat nupueulose Jeʼwaa maaʼulu, sümaʼinruʼu sülüʼülüin süpüla sajaʼttüin kasa süpüshuaʼa. Nnojotsü atüjaanüin saaʼu nanülia na wawalayuu asülajakana süpüshi nanneetse. Wejitapa süpüshi wanneetse suluʼu tü kojonchon eekat suluʼu tü outkajaaleekat jee waluwataale shia suluʼupünaa jw.org, nnojotsü natüjaain saaʼu na waneinnua jeʼrain maʼin tü wasülajakat. ¿Jama palitchonle saaʼin wamüin tü nneerü wasülajakat? Jülüjaa waaʼin nnojoluin wayain neʼe wamüiwaʼa asülajüin tü nneerü eekat sümaʼana nupueulose Jeʼwaa, wainma maʼin na wawalayuu asülajakana süpüshi nanneetse jaʼitairü palitchon nasülajüin. Jamüshiijaʼa na wawalayuu maʼletsekana, nashatüin nakuwaʼipa na anoujashii chajanakana Macedonia nakalioʼu na nikirajüinkana Jesuu. Mayaainjeʼe eein choʼujawaa namüin nasülajüin süpüshi tü nantakalü anain sümaa talatüin naaʼin (2 Cor. 8:1-4).

12. ¿Kasa saaʼinraka nupueulose Jeʼwaa süpüla anain sutuma sukuwaʼipa tü nneerü asülajünakat?

¹² Sutuma kekiin maʼin na Laülaashii Jülüjakana Aaʼin na Aküjaliikana Pütchi anasü natuma sukuwaʼipa tü nneerü asülajünakat (Mat. 24:45). Naya akumajakana tü sukuwaʼipainjatkat tü nneerü asülajünakat (Luc. 14:28). Sümaiwa, eʼitaanapuʼusü tü nneerü asülajünakat najapuluʼu na wayuu laülaakana aaʼin sünain anoujaa süpüla anainjatüin sukuwaʼipa tü nneetkat natuma. Jamüshijaʼa Esdras, aleʼejüshi Jerusalénmüin sümaa tü korolo kojutusü nüsülajakat chi aluwataaikai chaa Persia. Eejatü ooro, pülaata otta waneirua kasa kojutusü, eesüjaʼa maʼaka jeʼra miyoone sujutü süpüshuaʼa tia makalü. Nütüjaa aaʼulu Esdras nümüinjatüin Jeʼwaa tia asülajuushikat. Aluwataashijeseʼe nia wayuu süpüla saaʼinmajüinjatüin tia korolokot suluʼupünaa tü wopukot suulia suʼluwajünüin (Esd. 8:24-34). Akaʼaya chi aluwataaushikai Pablo, nukotchajüin tü nneerü nasülajakat na anoujashiikana süpüla nakaaliinjain na anoujashii chajanakana Judea. Süchikijee tia, nuluwataain Pablo waneinnua anoujashii lotokana akuwaʼipa sümaa tia nneetkat, süka jamüin, «loteesü watüma sukuaippa tü waaʼinrakat, süka waaʼinreein tü anasükat waneepia, maa aka nuʼupala chi Maleiwakai, otta suʼupala tü wayuukolüirua süpüshua», müshi nia (paashajeʼera 2 Corinto 8:18-21). Maaʼulu yaa, tü nupueulosekat Jeʼwaa süshatüin nukuwaʼipa Esdras nümaa Pablo süpüla anain sukuwaʼipa tü nneerü nasülajakat na wawalayuukana.

13. ¿Jamüsü sunouteʼeraka nupueulose Maleiwa sukuwaʼipa tü nneerü asülajünakat?

¹³ Eeshii wawalayuu sümaa napüshi ooʼulaakana suulia ayaʼlajaa wainma kasa sutuma wainmain nneerü nakataajaka. Naaʼinrüin tia süpüla naʼyataainjanain maʼin nümüin Jeʼwaa. Müsia neʼe sukuwaʼipa nupueulose Jeʼwaa. Wainma maʼin aʼyatawaa anasü saainjaka, akatsaʼa wainmaleein tü nneerü oʼunakat sünain suulialeʼeya tü nneerü asülajünakat. Eetaairü maʼaka jeʼra juya sünain müin shia. Sünainjee tia,  nachajaain sukuwaʼipa suulia wainmain maʼin tü nneerü oʼunakat sünain tü aʼyatawaa aainjünakat maaʼulu. Aainjünüsü tia süpüla anainjatüin sukuwaʼipa tü nneerü nasülajakat na wawalayuukana.

14-16. (1) ¿Kasa aainjünaka süka tü nneerü asülajünakat? (2) ¿Kasa anasü piʼraka sünainjee tü saainjakat nupueulose Jeʼwaa?

¹⁴ Wainmaleesia maaʼulu tü kasa anasü neʼrakat na wawalayuu kakaliainnakana sünain anoujaa suluʼu nupueulose Jeʼwaa. Eesü maaʼulu yaa waneirua paajina suluʼu Internet, jw.org otta JW Broadcasting. Akaʼaya tü Wiwüliakat Traducción del Nuevo Mundo de las Santas Escrituras, eesü suluʼu wainma anüikii. Suʼunnaa tü juyakat 2014 otta 2015, aainjünüsü wanee outkajawaa miyoʼu eere nantüin na wawalayuu naatakana oumain, «Anasü palajanale watuma tü Nuluwataayakat Maleiwa» sünülia tia outkajawaakat, aainjünüsü shia suluʼu waneirua estadio miyoʼuyuu maʼin suluʼu 14 mma. Talatüshii maʼin na wawalayuu oʼunakana sünain.

¹⁵ Wainma maʼin na wawalayuu talatakana aaʼin saaʼu süpüshuaʼa tü kasa saapakat nupueulose Jeʼwaa namüin. Anuu nünüiki wanee wawala sümaa nuʼwayuuse chakana aʼyataain nümüin Jeʼwaa Asia: «Aʼyataashii waya nümüin Jeʼwaa suluʼu wanee pueulochon. Sünainjee tia, müshii wattakai maʼin waaʼin noulia na wawalayuukana jee eesü motule waaʼin wattain maʼin naalii na wawalayuu aʼyataakana nümüin Jeʼwaa. Shiasaʼa wanajapa tü programa ojuʼitawaikat kashiwai suluʼu JW Broadcasting, jülüjasü waaʼin wainmain na wawalayuukana sainküin mmaka otta wayajiraain neʼe. ‹Pejesü waaʼin nanain na Laülaashii Jülüjakana Aaʼin na Aküjaliikana Pütchi wanaa sümaa wanajüin tü programa ojuʼitawaikat kashiwai suluʼu Broadcasting›, müsü nanüiki waneinnua wawalayuu. Maaʼulu yaa, talatüsü maʼin naaʼin sutuma suluʼuin naya nupueulose Jeʼwaa».

 ¹⁶ Sainküin mmaka süpüshuaʼa akumajünüsü otta anoutunusü maʼaka 2.500 Piichi Outkajaalee. Nachuntapuʼuin maʼin na wawalayuu chakana Honduras wanee Piichi Outkajaalee, jee maaʼulu yaa akumajünüitpa shia namüin. Anuu nanüiki: «Talatüshii maʼin waya süka nüpüshin waya na nüpüshikana Jeʼwaa yaakana saaʼu tü mmakat otta na chakana iipünaa. Talatüshii maʼin waya saaʼu paaʼinwain waya namaa napüshuaʼa na wawalayuu eekana sainküin mmaka». Müsia neʼe nanüiki na wawalayuukana sujuʼitapa tü Wiwüliakat otta waneirua karaloʼuta suluʼu nanüiki, nakaaliinjünapa natuma na wawalayuukana süchikijee wanee wawai jee sukutkujaain mma otta neʼrapa kasa anasü sünainjee aküjaa pütchi süka tü kareetachonkot eere jouluin wayuu.

17. ¿Jamüsü watüjaaka saaʼu nükaaliinjain Jeʼwaa tü nupueulosekat maaʼulu?

¹⁷ Wainma maʼin na wayuu nnojoliikana ayaawatüin saaʼu jamüin wountaka waaʼinrüin süpüshuaʼa tü aʼyatawaakat süka tü nneerü nasülajakat na wawalayuukana. Aluwataanüshinka wanee wayuu sutuma wanee konpainyiia süpüla nünalaainjatüin sümüin tü aʼyatawaa aainjünakat suluʼu wanee Weteet eere shiʼinpürimiijünüin karaloʼuta. Ponusü maʼin naaʼin nnojoluin süwalaajünüin naʼyataain na wawalayuukana suluʼu Weteet süka saainjünüin tü aʼyatawaakat sükajee tü nneerü nasülajakat na wawalayuukana jee nnojoluin saainjünüin rifa, teletón jee oikaa wanee kasa shiiʼiree wakotchojüin nneerü. «Ponoshootosü maʼin taaʼin tü jaaʼinrakat. Jaratka maʼin ountuin tia», müshi nia. Shiimain tü nümakat. Isasüjeʼe wachiki waaʼinrüin süpüshuaʼa tia aʼyatawaakat nnojoliire nükaaliinjain waya Jeʼwaa (Job 42:2).

18. (1) ¿Kaseerü naapaka wamüin Jeʼwaa wasülajüliire? (2) ¿Kasa wekirajaka akajee na wachonniikana otta na jekenakana sünain anoujaa?

¹⁸ Kojutushii maʼin waya nümüin Jeʼwaa müsüjeseʼe nuuʼulaain wasülajüin süpüshi wanneetse süpüla tü aʼyatawaa aainjünakat süpüleerua Nuluwataaya. Nüküjain wamüin Jeʼwaa naapeerüin wamüin naʼanasiain wasülajüliire (Mal. 3:10). Nüküjain wamüin Jeʼwaa aneerüin wakuwaʼipa nutuma wasülajüliire (paashajeʼera Proverbios 11:24, 25). Akaʼaya shia, nüküjain wamüin talateenain maʼin waya wasülajüliire süka anakuwaʼipalin «chi wayuu aapakai nuulia chi aapünakai amüin» (Aluw. 20:35). Eeshii süpüla wekirajüin sükajee wanüiki otta wakuwaʼipa na wachonniikana otta na jekenakana sünain anoujaa süpüla nasülajüliinjanain.

19. ¿Kasa sütütüleʼeraka anain waya ekirajaayakat tüü?

¹⁹ Süpüshuaʼa tü kasa eekat wamaʼana naapajala shia Jeʼwaa wamüin. Shiasaʼa wasülajapa nümüin, weeʼiyatüin alin nia wapüla otta kojutuin wamüin süpüshuaʼa tü kasa naainjakat wapüleerua (1 Crón. 29:17). Talatüsü maʼin naaʼin na israeliitakana wanaa sümaa nasülajüin süpüshi nanneetse süpüla sukumajünüin tü aʼwaajüleekat Maleiwa. Müsü sünüiki tü Wiwüliakat: «Talatakalaka maʼin naaʼin na wayuukana sutuma tü naapakat nümüin Jeʼwaa süka naaʼin, nnojotsü shiain sutuma münajalain naya, nasülajüin süka süpüshuaʼa naaʼin» (1 Crón. 29:9). Akaʼaya neʼe wayakana maaʼulu yaa, talatüshii maʼin waya sükajee wasülajüin nümüin Jeʼwaa süpüshi tü kasa naapakat wamüin.